← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information
62060: 1Pet

Click on a word for lexical analysis.
Click on a red-colored coordinate for comments and/or translations of the line
View in Serto
Ask AI about a passage
Hide manuscript variants

01:01 [ai]ܦܿܶܛܪܳܘܣ ܫܠܺܝܚܳܐ ܕܝܶܫܽܘܥ ܡܫܺܝܚܳܐ܃ ܠܰܓܼܒܼܰܝܳܐ̈ ܘܬܼܰܘܬܿܳܒܼܶܐ̈ ܕܰܙܪܺܝܥܺܝܢ ܒܦܿܳܢܛܳܘܣ܂ ܘܰܒܓܼܰܠܰܛܺܝܰܐ܂ ܘܰܒܩܰܦܿܳܘܕܼܩܺܝܰܐ ܘܒܼܰܐܣܺܝܰܐ܂ ܘܰܒܒܼܺܝܬܼܽܘܢܺܝܰܐ܃
01:02 [ai]ܐܰܝܠܶܝܢ ܕܶܐܬܼܓܒܼܺܝܘ ܒܰܡܩܰܕܡܽܘܬܼ ܺܝܕܼܰܥܬܼܶܗ ܕܰܐܠܳܗܳܐ ܐܰܒܼܳܐ܂ ܒܩܰܕܿܺܝܫܽܘܬܼܳܐ ܕܪܽܘܚܳܐ܃ ܕܢܶܗܘܽܘܢ ܠܡܰܫܡܰܥܬܼܳܐ ܘܠܰܪܣܳܣ ܕܡܶܗ ܕܝܶܫܽܘܥ ܡܫܺܝܚܳܐ܂ ܛܰܝܒܿܽܘܬܼܳܐ ܘܰܫܠܳܡܳܐ ܢܶܣܓܿܶܐ ܠܘܳܬܼܟܼܽܘܢ܀
01:03 [ai]ܡܒܼܰܪܰܟܼ ܗ̱ܽܘ ܐܰܠܳܗܳܐ ܐܰܒܼܽܘܗ̱ܝ ܕܡܳܪܰܢ ܝܶܫܽܘܥ ܡܫܺܝܚܳܐ܃ ܗܰܘ ܕܒܰܚܢܳܢܶܗ ܣܰܓܿܺܝܳܐܐ ܐܰܘܠܕܼܰܢ ܡܶܢ ܕܪܺܝܫ܃ ܒܰܩܝܳܡܬܿܶܗ ܕܝܶܫܽܘܥ ܡܫܺܝܚܳܐ܃ ܠܣܰܒܼܪܳܐ ܕܚܰܝ̈ܶܐ܂
01:04 [ai]ܘܰܠܝܳܪܬܿܽܘܬܼܳܐ ܕܠܳܐ ܡܶܬܼܚܰܒܠܳܐ ܘܠܳܐ ܡܶܬܿܛܰܢܦܼܳܐ ܘܠܳܐ ܚܳܡܝܳܐ܂ ܗܳܝ ܕܰܡܛܰܝܒܼܳܐ ܠܟܼܽܘܢ ܒܰܫܡܰܝܳܐ܂
01:05 [ai]ܟܰܕܼ ܢܛܺܝܪܺܝܢ ܐܢ̱ܬܿܽܘܢ ܒܚܰܝܠܳܐ ܕܰܐܠܳܗܳܐ ܘܰܒܗܰܝܡܳܢܽܘܬܼܳܐ܃ ܠܚܰܝ̈ܶܐ ܕܰܡܛܰܝܒܼܺܝܢ ܕܢܶܬܼܓܿܠܽܘܢ ܠܙܰܒܼܢܶܐ̈ ܐ̱ܚܪ̈ܳܝܶܐ܃
01:06 [ai]ܕܰܒܼܗܽܘܢ ܬܶܚܕܿܽܘܢ ܠܥܳܠܰܡ܃ ܐܳܦܼܶܢ ܒܗܳܢܳܐ ܙܰܒܼܢܳܐ ܩܰܠܺܝܠ ܡܶܬܿܬܿܥܺܝܩܺܝܢ ܐܢ̱ܬܿܽܘܢ ܒܢܶܣܝܽܘܢܶܐ̈ ܡܫܰܚܠܦܼܶܐ̈ ܕܥܳܕܼܶܝܢ ܥܠܰܝܟܿܽܘܢ܃
01:07 [ai]ܐܰܝܟܿܰܢܳܐ ܕܒܽܘܚܪܳܢܳܐ ܕܗܰܝܡܳܢܽܘܬܼܟܼܽܘܢ ܢܶܬܼܚܙܶܐ܃ ܕܰܡܝܰܬܿܰܪ ܡܶܢ ܕܰܗܒܼܳܐ ܣܢܺܝܢܳܐ ܕܶܐܬܼܒܿܩܺܝ ܒܢܽܘܪܳܐ܃ ܠܬܼܶܫܒܿܽܘܚܬܳܐ ܘܠܺܐܝܩܳܪܳܐ ܘܰܠܩܽܘܠܳܣܳܐ܂ ܒܓܶܠܝܳܢܶܗ ܕܝܶܫܽܘܥ ܡܫܺܝܚܳܐ܂
01:08 [ai]ܗܰܘ ܕܠܳܐ ܚܙܰܝܬܿܽܘܢܳܝܗ̱ܝ ܘܡܰܚܒܼܺܝܢ ܐܢ̱ܬܿܽܘܢ ܠܶܗ܂ ܘܰܒܗܰܝܡܳܢܽܘܬܼܶܗ ܪܳܘܙܺܝܢ ܐܢ̱ܬܿܽܘܢ ܒܚܰܕܼܽܘܬܼܳܐ ܡܫܰܒܿܰܚܬܳܐ ܕܠܳܐ ܡܶܬܼܡܰܠܠܳܐ܃
01:09 [ai]ܕܰܬܼܩܰܒܿܠܽܘܢ ܦܽܘܪܥܳܢܳܐ ܕܗܰܝܡܳܢܽܘܬܼܟܼܽܘܢ܂ ܚܰܝ̈ܶܐ ܕܢܰܦܼܫܳܬܼܟܼܽܘܢ̈܂
01:10 [ai]ܗܳܢܽܘܢ ܚܰܝ̈ܶܐ ܕܥܰܩܶܒܼܘ ܗ̱ܘܰܘ ܥܠܰܝܗܽܘܢ ܢܒܼܺܝܶܐ̈܃ ܟܰܕܼ ܐܶܬܼܢܰܒܺܝܘ ܥܰܠ ܛܰܝܒܿܽܘܬܼܳܐ ܕܰܥܬܼܺܝܕܼܳܐ ܗܘܳܬܼ ܕܬܶܬܼܺܝܗܶܒܼ ܠܟܼܽܘܢ܂
01:11 [ai]ܘܰܒܨܰܘ ܕܒܰܐܝܢܳܐ ܙܰܒܼܢܳܐ ܡܚܰܘܝܳܐ ܘܡܰܣܗܕܼܳܐ ܪܽܘܚܶܗ ܕܰܡܫܺܝܚܳܐ ܕܥܳܡܪܳܐ ܒܗܽܘܢ܃ ܕܰܥܬܼܺܝܕܼܺܝܢ ܚܰܫܰܘܗ̱ܝ̈ ܕܰܡܫܺܝܚܳܐ ܘܬܼܶܫܒܿܽܘܚܬܿܶܗ ܕܡܶܢ ܒܳܬܼܰܪܟܿܶܢ܂
01:12 [ai]ܘܶܐܬܼܓܿܠܺܝ ܠܗܽܘܢ܂ ܟܽܠ ܕܒܳܨܶܝܢ ܗ̱ܘܰܘ܂ ܡܶܛܽܠ ܕܠܰܘ ܠܢܰܦܼܫܗܽܘܢ ܒܿܳܥܶܝܢ ܗ̱ܘܰܘ܃ ܐܶܠܳܐ ܠܰܢ ܕܺܝܠܰܢ ܡܶܬܼܢܰܒܿܶܝܢ ܗ̱ܘܰܘ܃ ܐܰܝܠܶܝܢ ܕܗܳܫܳܐ ܐܶܬܼܓܿܠܺܝ ܠܟܼܽܘܢ܃ ܒܝܰܕܼ ܐܰܝܠܶܝܢ ܕܿܣܰܒܰܪܢܳܟܼܽܘܢ܂ ܒܪܽܘܚܳܐ ܕܩܽܘܕܼܫܳܐ ܕܶܐܫܬܿܰܕܿܰܪ ܡܶܢ ܫܡܰܝܳܐ܂ ܕܰܒܼܗܶܝܢ ܒܗܳܠܶܝܢ܂ ܡܶܬܼܪܰܓܼܪܓܼܺܝܢ ܐܳܦܼ ܡܰܠܰܐܟܼܶܐ̈܂ ܕܰܢܕܼܰܝܩܽܘܢ܂
01:13 [ai]ܡܶܛܽܠ ܗܳܢܳܐ ܚܙܽܘܩܘ ܚܰܨܶܐ̈ ܕܿܬܼܰܪ̈ܥܝܳܬܼܟܼܽܘܢ܃ ܘܶܐܬܿܬܿܥܺܝܪܘ ܓܡܺܝܪܳܐܺܝܬܼ܂ ܘܣܰܒܰܪܘ ܥܰܠ ܚܰܕܼܽܘܬܼܳܐ ܕܳܐܬܼܝܳܐ ܠܟܼܽܘܢ܃ ܒܓܶܠܝܳܢܶܗ ܕܡܳܪܰܢ ܝܶܫܽܘܥ ܡܫܺܝܚܳܐ܃
01:14 [ai]ܐܰܝܟܼ ܒܢܰܝܳܐ ܡܶܫܬܿܰܡܥܳܢܶܐ̈܂ ܘܠܳܐ ܬܿܶܫܬܰܘܬܿܦܼܽܘܢ ܬܽܘܒܼ ܠܰܪ̈ܓܼܺܝܓܼܳܬܼܟܼܽܘܢ ܩܰܕܼܡܳܝܳܬܼܳܐ̈܃ ܐܰܝܠܶܝܢ ܕܪܳܓܿܺܝܢ ܗܘܰܝܬܿܽܘܢ ܕܠܳܐ ܒܺܝܕܼܰܥܬܼܳܐ܂
01:15 [ai]ܐܶܠܳܐ ܗܘܰܘ ܩܰܕܿܺܝܫܺܝܢ ܒܟܽܠܗܽܘܢ ܗܽܘܦܿܳܟܼܰܝܟܿܽܘܢ̈܃ ܐܰܝܟܼ ܕܩܰܕܿܺܝܫ ܗܰܘ ܡܰܢ ܕܰܩܪܳܟܼܽܘܢ܂
01:16 [ai]ܡܶܛܽܠ ܕܰܟܼܬܼܺܝܒܼ܃ ܕܰܗܘܰܝܬܿܽܘܢ ܩܰܕܿܺܝܫܺܝܢ ܐܰܝܟܿܰܢܳܐ ܕܳܐܦܼ ܐܶܢܳܐ ܩܰܕܿܺܝܫ ܐ̱ܢܳܐ܂
01:17 [ai]ܘܶܐܢ ܗܽܘ ܕܰܐܒܼܳܐ ܩܳܪܶܝܢ ܐܢ̱ܬܿܽܘܢ܃ ܗܰܘ ܕܠܰܝܬܿ ܩܕܼܳܡܰܘܗ̱ܝ ܡܰܣܰܒܼ ܒܰܐܦܿܶܐ̈܃ ܘܕܼܳܐܶܢ ܠܟܼܽܠܢܳܫ ܐܰܝܟܼ ܥܒܼܳܕܼܰܘܗ̱ܝ̈܃ ܒܕܶܚܠܬܼܳܐ ܐܶܬܿܕܿܰܒܰܪܘ ܒܙܰܒܼܢܳܐ ܗܳܢܳܐ ܕܬܰܘܬܳܒܼܽܘܬܼܟܼܽܘܢ܂
01:18 [ai]ܟܰܕܼ ܝܳܕܼܥܺܝܢ ܐܢ̱ܬܿܽܘܢ ܕܠܳܐ ܒܟܶܣܦܿܳܐ ܕܒܳܠܶܐ ܘܠܳܐ ܒܕܰܗܒܼܳܐ܃ ܐܶܬܼܦܿܪܶܩܬܿܽܘܢ ܡܶܢ ܥܒܼܳܕܼܰܝܟܿܽܘܢ̈ ܣܪ̈ܺܝܩܶܐ܃ ܗܳܢܽܘܢ ܕܩܰܒܿܶܠܬܿܽܘܢ ܡܶܢ ܐܰܒܼܳܗܰܝܟܿܽܘܢ̈܃
01:19 [ai]ܐܶܠܳܐ ܒܰܕܼܡܳܐ ܝܰܩܺܝܪܳܐ ܕܶܐܡܪܳܐ ܕܡܽܘܡܳܐ ܘܛܽܘܠܫܳܐ܂ ܠܰܝܬܿ ܒܶܗ܂ ܕܺܐܝܬܼܰܘܗ̱ܝ ܡܫܺܝܚܳܐ܂
01:20 [ai]ܗܰܘ ܕܰܡܩܰܕܰܡ ܗ̱ܘܳܐ ܦܪܺܝܫ ܠܗܳܕܼܶܐ܃ ܡܶܢ ܩܕܼܳܡ ܬܿܰܪ̈ܡܝܳܬܼܶܗ ܕܥܳܠܡܳܐ܃ ܘܶܐܬܼܓܿܠܺܝ ܒܰܐ̱ܚܪܳܝܬܿܗܽܘܢ ܕܙܰܒܼܢܶܐ̈ ܡܶܛܽܠܳܬܼܟܼܽܘܢ܂
01:21 [ai]ܐܰܝܠܶܝܢ ܕܒܺܐܝܕܼܶܗ ܗܰܝܡܶܢܬܿܽܘܢ ܒܰܐܠܳܗܳܐ܂ ܗܰܘ ܕܰܐܩܺܝܡܶܗ ܡܶܢ ܒܶܝܬܼ ܡܺܝܬܼܶܐ̈܃ ܘܝܰܗ̱ܒܼ ܠܶܗ ܫܽܘܒܼܚܳܐ܃ ܕܗܰܝܡܳܢܽܘܬܼܟܼܽܘܢ ܘܣܰܒܼܪܟܼܽܘܢ ܢܶܗܘܶܐ ܥܰܠ ܐܰܠܳܗܳܐ܀
01:22 [ai]ܟܰܕܼ ܢܶܗܘܝܳܢ̈ ܩܰܕܿܺܝܫܳܢ̈ ܢܰܦܼܫܳܬܼܟܼܽܘܢ̈ ܒܡܶܫܬܿܰܡܥܳܢܽܘܬܼܶܗ ܕܰܫܪܳܪܳܐ܃ ܘܢܶܗܘܝܳܢ̈ ܡܰܠܝܳܢ̈ ܚܽܘܒܿܳܐ ܕܠܳܐ ܡܰܣܰܒܼ ܒܰܐܦܿܶܐ̈܃ ܕܡܶܢ ܠܶܒܿܳܐ ܕܰܟܼܝܳܐ ܘܰܓܼܡܺܝܪܳܐ܃ ܬܶܗܘܽܘܢ ܡܰܚܒܼܺܝܢ ܚܰܕܼ ܠܚܰܕܼ܂
01:23 [ai]ܐܰܝܟܼ ܐ̱ܢܳܫܳܐ ܕܡܶܢ ܕܪܺܝܫ ܐܶܬܼܺܝܠܶܕܿܬܿܽܘܢ܃ ܠܳܐ ܡܶܢ ܙܰܪܥܳܐ ܕܒܳܠܶܐ܂ ܐܶܠܳܐ ܡܶܢ ܐܰܝܢܳܐ ܕܠܳܐ ܒܳܠܶܐ܂ ܒܡܶܠܬܼܳܐ ܚܰܝܬܼܳܐ ܕܰܐܠܳܗܳܐ ܕܩܰܝܳܡܳܐ ܠܥܳܠܰܡ܂
01:24 [ai]ܡܶܛܽܠ ܕܟܽܠ ܒܣܰܪ ܥܡܺܝܪܳܐ܂ ܘܟܼܽܠܳܗ ܝܳܐܝܽܘܬܼܶܗ ܐܰܝܟܼ ܥܽܘܦܼܝܳܐ ܕܚܰܩܠܳܐ܂ ܝܳܒܼܶܫ ܥܡܺܝܪܳܐ ܘܚܳܡܶܐ ܥܽܘܦܼܝܳܐ܃
01:25 [ai]ܘܡܶܠܬܼܶܗ ܕܰܐܠܳܗܰܢ ܩܰܝܳܡܳܐ ܠܥܳܠܡܺܝܢ܂ ܘܗܳܕܼܶܐ ܗ̱ܝ ܡܶܠܬܼܳܐ ܗܳܝ ܕܿܶܐܣܬܿܰܒܰܪܬܿܽܘܢ܀

next chapter