The Comprehensive Aramaic Lexicon

02:01 [ai]	ܐܰܢܺܝܚܘ ܗܳܟܼܺܝܠ ܡܶܢܟܼܽܘܢ ܟܽܠܳܗ ܒܺܝܫܽܘܬܼܳܐ܂ ܘܟܼܽܠܶܗ ܢܶܟܼܠܳܐ ܘܡܰܣܰܒܼ ܒܰܐܦܿܶܐ̈܂ ܘܰܚܣܳܡܳܐ܂ ܘܡܶܐܟܼܰܠ ܩܰܪܨܳܐ܂
02:02 [ai]	ܘܰܗܘܰܘ ܐܰܝܟܼ ܝܰܠܽܘܕܼܶܐ̈ ܫܰܒܼܪ̈ܶܐ܂ ܘܶܐܬܼܪܰܓܼܪܰܓܼܘ ܠܳܗ ܠܡܶܠܬܼܳܐ܃ ܐܰܝܟܼ ܕܰܠܚܰܠܒܼܳܐ ܢܰܩܕܿܳܐ ܘܪܽܘܚܳܢܳܐ܃ ܕܒܳܗ ܬܶܬܼܪܰܒܿܽܘܢ ܠܚܰܝ̈ܶܐ܂
02:03 [ai]	ܐܶܢ ܛܥܶܡܬܿܽܘܢ ܘܰܚܙܰܝܬܿܽܘܢ ܕܛܳܒܼ ܗ̱ܽܘ ܡܳܪܝܳܐ܂
02:04 [ai]	ܗܰܘ ܕܠܶܗ ܡܶܬܼܩܰܪܒܼܺܝܢ ܐܢ̱ܬܿܽܘܢ܃ ܕܺܐܝܬܼܰܘܗ̱ܝ ܟܺܐܦܼܳܐ ܚܰܝܳܐ ܕܰܐܣܠܝܽܘܗ̱ܝ ܒܢܰܝ ܐ̱ܢܳܫܳܐ܃ ܘܰܓܼܒܼܶܐ ܘܰܡܝܰܩܰܪ ܠܘܳܬܼ ܐܰܠܳܗܳܐ܂
02:05 [ai]	ܘܳܐܦܼ ܐܰܢ̱ܬܿܽܘܢ ܐܰܝܟܼ ܟܺܐܦܼܶܐ̈ ܚܰܝܳܬܼܳܐ̈ ܐܶܬܼܒܰܢܰܘ܂ ܘܰܗܘܰܘ ܗܰܝܟܠܶܐ̈ ܪ̈ܽܘܚܳܢܶܐ ܘܟܼܳܗܢܶܐ̈ ܩܰܕܿܺܝܫܶܐ̈܃ ܠܡܰܣܳܩܽܘ ܕܶܒܼܚܶܐ̈ ܪ̈ܽܘܚܳܢܶܐ ܕܰܡܩܰܒܿܠܺܝܢ ܩܕܼܳܡ ܐܰܠܳܗܳܐ܂ ܒܝܰܕܼ ܝܶܫܽܘܥ ܡܫܺܝܚܳܐ ܿ܀ܿ܀ܿ
02:06 [ai]	ܐܰܡܺܝܪ ܗ̱ܽܘ ܓܶܝܪ ܒܰܟܼܬܼܳܒܼܳܐ܃ ܕܗܳܐ ܣܳܐܶܡ ܐ̱ܢܳܐ ܒܨܶܗܝܽܘܢ܃ ܟܺܐܦܼܳܐ ܒܚܺܝܪܬܳܐ ܘܝܰܩܺܝܪܬܳܐ ܒܪܺܝܫ ܙܳܘܺܝܬܼܳܐ܂ ܘܡܰܢ ܕܰܡܗܰܝܡܶܢ ܒܿܳܗ܂ ܠܳܐ ܢܶܒܼܗܰܬܼ܂
02:07 [ai]	ܠܟܼܽܘܢ ܗܳܟܼܺܝܠ ܐܶܬܼܺܝܗܶܒܼ ܗܳܢܳܐ ܐܺܝܩܳܪܳܐ܃ ܠܰܐܝܠܶܝܢ ܕܰܡܗܰܝܡܢܺܝܢ܂ ܠܗܳܢܽܘܢ ܕܶܝܢ ܕܠܳܐ ܡܶܬܿܛܦܿܺܝܣܺܝܢ܃
02:08 [ai]	ܟܺܐܦܼܳܐ ܗ̱ܘ ܕܬܽܘܩܰܠܬܼܳܐ ܘܰܐܒܼܢܳܐ ܕܟܶܫܠܳܐ܂ ܘܡܶܬܿܬܿܰܩܠܺܝܢ ܒܶܗ ܒܰܕܼܠܳܐ ܡܶܬܿܛܦܿܺܝܣܺܝܢ ܠܡܶܠܬܼܳܐ܂ ܕܰܠܗܳܕܼܶܐ ܣܺܝܡܺܝܢ܂
02:09 [ai]	ܐܰܢ̱ܬܿܽܘܢ ܕܶܝܢ ܫܰܪܒܿܬܼܳܐ ܐܰܢ̱ܬܿܽܘܢ ܓܒܼܺܝܬܼܳܐ܃ ܕܰܡܟܼܰܗܢܳܐ ܠܡܰܠܟܿܽܘܬܼܳܐ܂ ܥܰܡܳܐ ܩܰܕܿܺܝܫܳܐ܂ ܟܶܢܫܳܐ ܦܪܺܝܩܳܐ܂ ܬܣܰܒܿܪܽܘܢ ܬܶܫܒܿܚܳܬܼܶܗ̈ ܕܗܰܘ ܕܰܩܪܳܟܼܽܘܢ ܡܶܢ ܚܶܫܽܘܟܼܳܐ ܠܢܽܘܗܪܶܗ ܡܝܰܬܿܪܳܐ܂
02:10 [ai]	ܐܰܝܠܶܝܢ ܕܡܶܢ ܩܕܼܺܝܡ ܠܳܐ ܚܫܺܝܒܼܺܝܢ ܗܘܰܝܬܿܽܘܢ ܥܰܡܳܐ܃ ܗܳܫܳܐ ܕܶܝܢ ܥܰܡܳܐ ܕܰܐܠܳܗܳܐ܂ ܐܳܦܼܠܳܐ ܪ̈ܰܚܡܶܐ ܐܺܝܬܼ ܗ̱ܘܰܘ ܥܠܰܝܟܿܽܘܢ܃ ܗܳܫܳܐ ܕܶܝܢ ܐܶܫܬܿܰܦܿܰܥܘ ܥܠܰܝܟܿܽܘܢ ܪ̈ܰܚܡܶܐ܀
02:11 [ai]	ܚܰܒܺܝܒܼܰܝ̈܃ ܒܿܳܥܶܐ ܐ̱ܢܳܐ ܡܶܢܟܼܽܘܢ܃ ܐܰܝܟܼ ܥܳܪ̈ܨܶܐ ܘܰܐܝܟܼ ܬܰܘܬܿܳܒܼܶܐ̈܃ ܐܶܬܼܦܿܰܪܰܩܘ ܡܶܢ ܟܽܠܗܶܝܢ ܪ̈ܓܼܺܝܓܼܳܬܼܶܗ ܕܦܰܓܼܪܳܐ܃ ܗܳܠܶܝܢ ܕܥܳܒܼܕܳܢ̈ ܩܪܳܒܼܳܐ ܠܽܘܩܒܼܰܠ ܢܰܦܼܫܳܐ܂
02:12 [ai]	ܘܢܶܗܘܽܘܢ ܫܰܦܿܺܝܪܺܝܢ ܗܽܘܦܿܳܟܼܰܝܟܿܽܘܢ̈ ܩܕܼܳܡ ܟܽܠܗܽܘܢ ܒܢܰܝ ܐ̱ܢܳܫܳܐ܂ ܐܰܝܠܶܝܢ ܕܰܡܡܰܠܠܺܝܢ ܥܠܰܝܟܿܽܘܢ ܡܶܠܶܐ̈ ܒܺܝܫܳܬܼܳܐ̈܃ ܢܶܚܙܽܘܢ ܥܒܼܳܕܼܰܝܟܿܽܘܢ̈ ܫܰܦܿܺܝܪ̈ܶܐ܃ ܘܰܢܫܰܒܿܚܽܘܢ ܠܰܐܠܳܗܳܐ ܒܝܰܘܡܳܐ ܕܒܽܘܚܪܳܢܳܐ܂
02:13 [ai]	ܘܰܗܘܰܝܬܿܽܘܢ ܡܶܫܬܿܰܥܒܿܕܼܺܝܢ ܠܟܼܽܠܗܽܘܢ ܒܢܰܝ ܐ̱ܢܳܫܳܐ ܡܶܛܽܠ ܐܰܠܳܗܳܐ܂ ܠܡܰܠܟܿܶܐ̈ ܡܶܛܽܠ ܫܽܘܠܛܳܢܗܽܘܢ܂
02:14 [ai]	ܘܰܠܕܼܰܝܳܢܶܐ̈ ܡܶܛܽܠ ܕܡܶܢܶܗ ܡܶܫܬܿܰܕܿܪܺܝܢ ܠܰܬܼܒܼܰܥܬܼܳܐ ܕܡܰܣܟܠܳܢܶܐ̈܃ ܘܰܠܬܼܶܫܒܿܽܘܚܬܳܐ ܕܥܳܒܼܕܿܰܝ̈ ܛܳܒܼܳܬܼܳܐ̈܂
02:15 [ai]	ܕܗܳܟܼܰܢܳܐ ܗ̱ܘ ܨܶܒܼܝܳܢܳܐ ܕܰܐܠܳܗܳܐ܃ ܕܒܰܥܒܼܳܕܼܰܝܟܿܽܘܢ̈ ܫܰܦܿܺܝܪ̈ܶܐ ܬܶܣܟܿܪܽܘܢ ܦܽܘܡܳܐ ܕܣܰܟܼܠܶܐ̈܃ ܗܳܢܽܘܢ ܕܠܳܐ ܝܳܕܼܥܺܝܢ ܠܰܐܠܳܗܳܐ܂
02:16 [ai]	ܐܰܝܟܼ ܒܢܰܝ ܚܺܐܪ̈ܶܐ܂ ܘܠܳܐ ܐܰܝܟܼ ܐ̱ܢܳܫܳܐ ܕܰܥܒܼܺܝܕܼܳܐ ܠܗܽܘܢ ܚܺܐܪܽܘܬܼܗܽܘܢ ܬܰܚܦܿܺܝܬܼܳܐ ܠܒܼܺܝܫܽܘܬܼܗܽܘܢ܂ ܐܶܠܳܐ ܐܰܝܟܼ ܥܰܒܼܕܿܰܘܗ̱ܝ̈ ܕܰܐܠܳܗܳܐ܂
02:17 [ai]	ܠܟܼܽܠܢܳܫ ܝܰܩܰܪܘ܂ ܠܰܐܚܰܝܟܿܽܘܢ̈ ܐܰܚܶܒܼܘ܂ ܘܡܶܢ ܐܰܠܳܗܳܐ ܕܚܰܠܘ܂ ܘܰܠܡܰܠܟܿܶܐ̈ ܝܰܩܰܪܘ܂
02:18 [ai]	ܘܰܐܝܠܶܝܢ ܥܰܒܼܕܿܶܐ̈ ܕܺܐܝܬܼ ܒܟܽܘܢ܃ ܐܶܫܬܿܰܥܒܿܰܕܼܘ ܠܡܳܪ̈ܰܝܟܿܽܘܢ܂ ܒܕܶܚܠܬܼܳܐ܃ ܠܳܐ ܒܰܠܚܽܘܕܼ ܠܛܳܒܼܶܐ̈ ܘܰܠܡܰܟܿܺܝܟܼܶܐ̈܂ ܐܶܠܳܐ ܐܳܦܼ ܠܰܩܫܰܝܳܐ̈ ܘܰܠܥܰܣܩܶܐ̈܂
02:19 [ai]	ܠܗܳܠܶܝܢ ܓܶܝܪ ܐܺܝܬܼ ܠܗܽܘܢ ܛܰܝܒܿܽܘܬܼܳܐ ܩܕܼܳܡ ܐܰܠܳܗܳܐ܃ ܠܰܐܝܠܶܝܢ ܕܡܶܛܽܠ ܬܿܺܐܪܬܳܐ ܫܰܦܿܺܝܪܬܳܐ ܡܣܰܝܒܿܪܺܝܢ ܥܳܩܳܬܼܳܐ̈܂ ܕܳܐܬܼܝܳܢ̈ ܥܠܰܝܗܽܘܢ ܒܥܰܘܠܳܐ܂
02:20 [ai]	ܐܰܝܠܶܝܢ ܕܶܝܢ ܕܡܶܛܽܠ ܣܰܟܼܠܘܳܬܼܗܽܘܢ̈ ܡܣܰܝܒܿܪܺܝܢ ܐܽܘܠܨܳܢܶܐ̈܃ ܐܰܝܕܼܳܐ ܬܿܶܫܒܿܽܘܚܬܳܐ ܗܳܘܝܳܐ ܠܗܽܘܢ܂ ܐܶܠܳܐ ܡܳܐ ܕܥܳܒܼܕܺܝܢ ܐܢ̱ܬܿܽܘܢ ܕܫܰܦܿܺܝܪ ܘܐܳܠܨܺܝܢ ܠܟܼܽܘܢ ܘܰܡܣܰܝܒܿܪܺܝܢ ܐܢ̱ܬܿܽܘܢ܃ ܗܳܝܕܶܝܢ ܝܳܪܒܿܳܐ ܬܶܫܒܿܽܘܚܬܿܟܼܽܘܢ ܠܘܳܬܼ ܐܰܠܳܗܳܐ܂
02:21 [ai]	ܠܗܳܕܼܶܐ ܓܶܝܪ ܐܶܬܼܩܪܺܝܬܿܽܘܢ܃ ܕܳܐܦܼ ܡܫܺܝܚܳܐ ܡܺܝܬܼ ܚܠܳܦܼܰܝܢ܂ ܘܰܫܒܼܰܩ ܠܰܢ ܗܳܢܳܐ ܛܽܘܦܼܣܳܐ܃ ܕܰܐܢ̱ܬܿܽܘܢ ܒܥܶܩܒܼܳܬܼܶܗ̈ ܬܗܰܠܟܼܽܘܢ܂
02:22 [ai]	ܗܰܘ ܕܠܳܐ ܥܒܼܰܕܼ ܚܛܺܝܬܼܳܐ܃ ܐܳܦܼܠܳܐ ܢܶܟܼܠܳܐ ܐܶܫܬܿܟܼܰܚ ܒܦܽܘܡܶܗ܂
02:23 [ai]	ܗܰܘ ܕܡܶܨܛܰܚܶܐ ܗ̱ܘܳܐ ܘܠܳܐ ܡܨܰܚܶܐ܂ ܘܚܳܐܶܫ ܗ̱ܘܳܐ ܘܠܳܐ ܡܶܬܼܠܰܚܰܡ܂ ܐܶܠܳܐ ܡܰܫܠܶܡ ܗ̱ܘܳܐ̈ ܠܕܼܰܝܳܢܳܐ ܕܟܺܐܢܽܘܬܼܳܐ܂
02:24 [ai]	ܘܰܫܩܰܠ ܚܛܳܗܰܝܢ̈ ܟܽܠܗܽܘܢ܃ ܘܰܐܣܶܩ ܐܶܢܽܘܢ ܒܦܰܓܼܪܶܗ ܠܰܨܠܺܝܒܼܳܐ܃ ܕܟܰܕܼ ܡܺܝܬܼܺܝܢܰܢ ܠܰܚܛܺܝܬܼܳܐ܃ ܒܙܰܕܿܺܝܩܽܘܬܼܳܐ ܕܺܝܠܶܗ ܢܺܚܶܐ܂ ܒܫܽܘܡܳܬܼܶܗ̈ ܓܶܝܪ ܐܶܬܼܰܐܣܺܝܬܿܽܘܢ܂
02:25 [ai]	ܕܛܳܥܶܝܢ ܗܘܰܝܬܿܽܘܢ ܐܰܝܟܼ ܥܶܪ̈ܒܿܶܐ܃ ܘܶܐܬܼܦܿܢܺܝܬܿܽܘܢ ܗܳܫܳܐ ܠܘܳܬܼ ܪܳܥܝܳܐ ܘܣܳܥܽܘܪܳܐ ܕܢܰܦܼܫܳܬܼܟܼܽܘܢ̈܀

next chapter