← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information
62060: 1Pet

Click on a word for lexical analysis.
Click on a red-colored coordinate for comments and/or translations of the line
View in Serto
Ask AI about a passage
Hide manuscript variants

previous chapter


03:01 [ai]ܗܳܟܼܰܢܳܐ ܐܳܦܼ ܐܰܢ̱ܬܿܶܝܢ ܢܶܫܶܐ̈܃ ܐܶܫܬܿܰܥܒܿܰܕܼܶܝܢ̈ ܠܒܼܰܥܠܰܝܟܿܶܝܢ̈܃ ܕܰܐܝܠܶܝܢ ܕܠܳܐ ܡܶܬܿܛܦܿܺܝܣܺܝܢ ܠܡܶܠܬܼܳܐ܃ ܒܕܽܘܒܿܳܪ̈ܰܝܟܿܶܝܢ ܫܰܦܿܺܝܪ̈ܶܐ܂ ܕܠܳܐ ܥܰܡܠܳܐ܂ ܬܶܩܢܝܳܢ̈ ܐܶܢܽܘܢ܃
03:02 [ai]ܟܰܕܼ ܚܳܙܶܝܢ ܕܰܒܼܕܼܶܚܠܬܼܳܐ ܘܰܒܢܰܟܼܦܿܽܘܬܼܳܐ ܡܶܬܿܕܿܰܒܿܪ̈ܳܢ ܐܢ̱ܬܿܶܝܢ܂
03:03 [ai]ܘܠܳܐ ܬܶܨܛܰܒܿܬܼܳܢ̈܂ ܒܨܶܒܼܬܿܶܐ̈ ܒܰܪ̈ܳܝܶܐ ܕܰܓܼܕܼܽܘܠܶܐ̈ ܕܿܣܰܥܪ̈ܰܝܟܿܶܝܢ܂ ܐܰܘ ܕܚܶܫܠܳܬܼܳܐ̈ ܕܕܼܰܗܒܼܳܐ܂ ܐܰܘ ܕܰܠܒܼܽܘܫܶܐ̈ ܡܝܰܬܿܪ̈ܶܐ܂
03:04 [ai]ܐܶܠܳܐ ܐܶܨܛܰܒܿܰܬܼܶܝܢ̈ ܒܒܼܰܪܢܳܫܳܐ ܟܰܣܝܳܐ ܕܠܶܒܿܳܐ܃ ܒܪܽܘܚܳܐ ܡܰܟܿܺܝܟܼܬܳܐ ܕܠܳܐ ܡܶܬܼܚܰܒܠܳܐ܃ ܨܶܒܼܬܳܐ ܕܰܡܝܰܬܿܰܪ ܩܕܼܳܡ ܐܰܠܳܗܳܐ܂
03:05 [ai]ܗܳܟܼܰܢܳܐ ܓܶܝܪ ܐܳܦܼ ܡܶܢ ܩܕܼܺܝܡ ܢܶܫܶܐ̈ ܩܰܕܿܺܝܫܳܬܼܳܐ̈ ܐܰܝܠܶܝܢ ܕܰܡܣܰܒܿܪ̈ܳܢ ܗ̱ܘܰܝ̈ ܒܰܐܠܳܗܳܐ܃ ܡܨܰܒܿܬܼܳܢ̈ ܗ̱ܘܰܝ̈ ܢܰܦܼܫܳܬܼܗܶܝܢ̈ ܘܡܶܫܬܿܰܥܒܿܕܼܳܢ̈ ܗ̱ܘܰܝ̈ ܠܒܼܰܥܠܰܝܗܶܝܢ̈܂
03:06 [ai]ܐܰܝܟܿܰܢܳܐ ܕܣܰܪܳܐ ܡܶܫܬܿܰܥܒܿܕܼܳܐ ܗ̱ܘܳܬܼ ܠܰܐܒܼܪܳܗܳܡ ܘܩܳܪܝܳܐ ܗ̱ܘܳܬܼ ܠܶܗ ܡܳܪܝ܂ ܗܳܝ ܕܗܳܘܝܳܢ̈ ܐܢ̱ܬܿܶܝܢ ܠܳܗ ܒܢܳܬܼܳܐ ܒܰܥܒܼܳܕܼܶܐ̈ ܛܳܒܼܶܐ̈܃ ܟܰܕܼ ܠܳܐ ܡܶܬܿܬܿܙܺܝܥܳܢ̈ ܐܢ̱ܬܿܶܝܢ ܡܶܢ ܟܽܠ ܕܶܚܠܳܐ܂
03:07 [ai]ܘܰܐܢ̱ܬܿܽܘܢ ܓܿܰܒܼܪ̈ܶܐ܃ ܗܳܟܼܰܢܳܐ ܥܡܰܪܘ ܥܰܡ ܢܶܫܰܝܟܿܽܘܢ̈ ܒܺܝܕܼܰܥܬܼܳܐ܂ ܘܰܐܝܟܼ ܕܰܠܡܳܐܢܶܐ̈ ܡܚܺܝܠܶܐ̈܃ ܒܺܐܝܩܳܪܳܐ ܐܰܚܽܘܕܼܘ ܐܶܢܶܝܢ̈܃ ܡܶܛܽܠ ܕܳܐܦܼ ܗܳܢܶܝܢ̈ ܥܰܡܟܼܽܘܢ ܝܳܪ̈ܬܿܳܢ ܡܰܘܗܰܒܼܬܳܐ ܕܚܰܝ̈ܶܐ ܕܰܠܥܳܠܰܡ܃ ܕܠܳܐ ܬܶܗܘܽܘܢ ܡܶܬܿܬܿܰܩܠܺܝܢ ܒܰܨܠܰܘܳܬܼܟܼܽܘܢ̈܂
03:08 [ai]ܫܽܘܠܳܡܳܐ ܕܶܝܢ܃ ܕܬܶܗܘܽܘܢ ܟܽܠܟܼܽܘܢ ܒܰܐܘܝܽܘܬܼܳܐ܂ ܘܰܗܘܰܝܬܿܽܘܢ ܚܳܫܺܝܢ ܥܰܡ ܐܰܝܠܶܝܢ ܕܚܳܫܺܝܢ܂ ܘܪܳܚܡܺܝܢ ܚܰܕܼ ܠܚܰܕܼ܂ ܘܰܗܘܰܝܬܿܽܘܢ ܪܰܚܡܬܼܳܢܺܝܢ ܘܡܰܟܿܺܝܟܼܺܝܢ܂
03:09 [ai]ܘܰܠܐ̱ܢܳܫ ܒܺܝܫܬܳܐ ܚܠܳܦܼ ܒܺܝܫܬܳܐ ܠܳܐ ܬܶܦܼܪܥܽܘܢ܂ ܘܳܐܦܼܠܳܐ ܨܽܘܚܺܝܬܼܳܐ ܚܠܳܦܼ ܨܽܘܚܺܝܬܼܳܐ܂ ܐܶܠܳܐ ܕܰܠܩܽܘܒܼܠܳܐ ܕܗܳܠܶܝܢ܃ ܗܘܰܝܬܿܽܘܢ ܡܒܼܰܪܟܼܺܝܢ܂ ܠܗܳܕܼܶܐ ܓܶܝܪ ܐܶܬܼܩܪܺܝܬܿܽܘܢ܃ ܕܒܽܘܪܟܿܬܼܳܐ ܬܺܐܪܬܿܽܘܢ܂
03:10 [ai]ܡܰܢ ܕܨܳܒܼܶܐ ܗܳܟܼܺܝܠ ܚܰܝ̈ܶܐ܃ ܘܪܳܚܶܡ ܝܰܘܡܳܬܼܳܐ̈ ܛܳܒܼܶܐ̈ ܠܡܶܚܙܳܐ܃ ܢܶܛܰܪ ܠܶܫܳܢܶܗ ܡܶܢ ܒܺܝܫܬܳܐ܃ ܘܣܶܦܼܘܳܬܼܶܗ̈ ܠܳܐ ܢܡܰܠܠܳܢ̈ ܢܶܟܼܠܳܐ܂
03:11 [ai]ܢܶܥܒܰܪ ܡܶܢ ܒܺܝܫܬܳܐ ܘܢܶܥܒܿܶܕܼ ܛܳܒܼܬܼܳܐ܂ ܘܢܶܒܼܥܶܐ ܫܠܳܡܳܐ ܘܢܶܪܗܰܛ ܒܳܬܼܪܶܗ܂
03:12 [ai]ܡܶܛܽܠ ܕܥܰܝܢܰܘܗ̱ܝ̈ ܕܡܳܪܝܳܐ ܥܰܠ ܙܰܕܿܺܝܩܶܐ̈܃ ܘܶܐܕܼܢܰܘܗ̱ܝ̈ ܠܡܶܫܡܰܥ ܐܶܢܽܘܢ܂ ܘܰܐܦܿܰܘܗ̱ܝ̈ ܕܡܳܪܝܳܐ ܥܰܠ ܒܺܝܫܶܐ̈܂
03:13 [ai]ܘܡܰܢܽܘ ܕܢܶܥܒܿܶܕܼ ܠܟܼܽܘܢ ܒܺܝܫܬܳܐ܃ ܐܶܢ ܬܶܗܘܽܘܢ ܛܰܢܳܢܶܐ̈ ܕܛܳܒܼܳܬܼܳܐ̈܂
03:14 [ai]ܘܶܐܢ ܗܽܘ ܕܬܶܚܫܽܘܢ ܥܰܠ ܐܰܦܿܰܝ̈ ܟܺܐܢܽܘܬܼܳܐ܃ ܛܽܘܒܼܰܝܟܿܽܘܢ܂ ܘܠܳܐ ܬܶܕܼܚܠܽܘܢ ܡܶܢ ܐܰܝܠܶܝܢ ܕܰܡܕܼܰܚܠܺܝܢ ܠܟܼܽܘܢ܂ ܘܠܳܐ ܬܶܫܬܿܰܓܼܫܽܘܢ܂
03:15 [ai]ܐܶܠܳܐ ܩܰܕܿܶܫܘ ܒܠܶܒܿܰܘܳܬܼܟܼܽܘܢ̈ ܠܡܳܪܝܳܐ ܡܫܺܝܚܳܐ܂ ܘܰܗܘܰܝܬܿܽܘܢ ܡܛܰܝܒܼܺܝܢ ܠܡܰܦܿܰܩ ܒܪܽܘܚܳܐ܃ ܠܟܼܽܠ ܕܬܳܒܼܰܥ ܠܟܼܽܘܢ ܡܶܠܬܼܳܐ ܥܰܠ ܣܰܒܼܪܳܐ ܕܗܰܝܡܳܢܽܘܬܼܟܼܽܘܢ܂ ܒܡܰܟܿܺܝܟܼܽܘܬܼܳܐ ܘܰܒܕܼܶܚܠܬܼܳܐ܃
03:16 [ai]ܟܰܕܼ ܐܺܝܬܼ ܠܟܼܽܘܢ ܬܿܺܐܪܬܳܐ ܛܳܒܼܬܼܳܐ܃ ܐܰܝܟܿܰܢܳܐ ܕܗܳܢܽܘܢ ܕܰܡܡܰܠܠܺܝܢ ܥܠܰܝܟܿܽܘܢ ܐܰܝܟܼ ܕܥܰܠ ܐ̱ܢܳܫܳܐ ܒܺܝܫܶܐ̈܃ ܢܶܒܼܗܬܼܽܘܢ ܐܰܝܟܼ ܐ̱ܢܳܫܳܐ ܕܛܳܠܡܺܝܢ ܠܕܼܽܘܒܿܳܪ̈ܰܝܟܿܽܘܢ ܫܰܦܿܺܝܪ̈ܶܐ ܕܒܰܡܫܺܝܚܳܐ܂
03:17 [ai]ܥܳܕܼܪܳܐ ܗ̱ܝ ܠܟܼܽܘܢ ܓܶܝܪ܂ ܕܟܰܕܼ ܥܳܒܼܕܺܝܢ ܐܢ̱ܬܿܽܘܢ ܥܒܼܳܕܼܶܐ̈ ܛܳܒܼܶܐ̈܃ ܬܶܣܒܿܠܽܘܢ ܒܺܝܫܳܬܼܳܐ̈܃ ܐܶܢ ܗܳܟܼܰܢܳܐ ܗ̱ܘ ܨܶܒܼܝܳܢܳܐ ܕܰܐܠܳܗܳܐ܃ ܘܠܳܐ ܟܰܕܼ ܥܳܒܼܕܺܝܢ ܐܢ̱ܬܿܽܘܢ ܒܺܝܫܳܬܼܳܐ̈܂
03:18 [ai]ܡܶܛܽܠ ܕܳܐܦܼ ܡܫܺܝܚܳܐ ܚܕܼܳܐ ܙܒܼܰܢ ܡܺܝܬܼ ܚܠܳܦܼ ܚܛܳܗܰܝܢ̈܃ ܙܰܕܿܺܝܩܳܐ ܚܠܳܦܼ ܚܰܛܳܝܶܐ̈܃ ܕܰܢܩܰܪܶܒܼܟܼܽܘܢ ܠܰܐܠܳܗܳܐ܂ ܘܡܺܝܬܼ ܒܰܦܼܓܼܰܪ ܘܰܚܝܳܐ ܒܪܽܘܚ܂
03:19 [ai]ܘܰܐܟܼܪܶܙ ܠܢܰܦܼܫܳܬܼܳܐ̈ ܐܰܝܠܶܝܢ ܕܰܐܚܺܝܕܼܳܢ̈ ܗ̱ܘܰܝ̈ ܒܰܫܝܽܘܠ܂
03:20 [ai]ܗܳܠܶܝܢ ܕܡܶܢ ܩܕܼܺܝܡ ܠܳܐ ܐܶܬܿܛܦܿܺܝܣ ܗ̱ܘܰܝ̈ ܒܝܰܘܡܳܬܼܶܗ̈ ܕܢܽܘܚ܃ ܟܰܕܼ ܡܰܓܿܪܰܬܼ ܪܽܘܚܶܗ ܕܰܐܠܳܗܳܐ ܦܶܩܕܿܰܬܼ ܕܬܶܗܘܶܐ ܩܺܒܼܽܘܬܼܳܐ܂ ܥܰܠ ܣܰܒܼܪܳܐ ܕܰܬܼܝܳܒܼܽܘܬܼܗܽܘܢ܃ ܘܰܬܼܡܳܢܶܐ ܒܰܠܚܽܘܕܼ ܢܰܦܼܫܳܢ̈ ܥܰܠܶܝܢ̈ ܠܳܗ ܘܰܚܝܰܝ̈ ܒܡܰܝܳܐ̈܂
03:21 [ai]ܕܳܐܦܼ ܐܰܢ̱ܬܿܽܘܢ ܒܶܗ ܒܗܰܘ ܛܽܘܦܼܣܳܐ ܚܳܝܶܝܢ ܐܢ̱ܬܿܽܘܢ ܒܡܰܥܡܽܘܕܼܺܝܬܼܳܐ܃ ܠܰܘ ܟܰܕܼ ܦܰܓܼܪܳܐ ܡܫܺܝܓܼܺܝܢ ܐܢ̱ܬܿܽܘܢ ܡܶܢ ܨܳܐܬܼܳܐ܃ ܐܶܠܳܐ ܟܰܕܼ ܡܰܘܕܶܝܢ ܐܢ̱ܬܿܽܘܢ ܒܰܐܠܳܗܳܐ ܒܬܺܐܪܬܳܐ ܕܟܺܝܬܼܳܐ܂ ܘܒܼܰܩܝܳܡܬܿܶܗ ܕܝܶܫܽܘܥ ܡܫܺܝܚܳܐ܂
03:22 [ai]ܗܰܘ ܕܶܐܬܼܥܰܠܺܝ ܠܰܫܡܰܝܳܐ܂ ܘܺܐܝܬܼܰܘܗ̱ܝ ܥܰܠ ܝܰܡܺܝܢܳܐ ܕܰܐܠܳܗܳܐ܂ ܘܶܐܫܬܿܰܥܒܿܰܕܼܘ ܠܶܗ ܡܰܠܰܐܟܼܶܐ̈ ܘܫܰܠܺܝܛܳܢܶܐ̈ ܘܚܰܝܠܰܘܳܬܼܳܐ̈ ܿ܀ܿ܀ܿ

next chapter