← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information
62060: 1Pet

Click on a word for lexical analysis.
Click on a red-colored coordinate for comments and/or translations of the line
View in Serto
Ask AI about a passage
Hide manuscript variants

previous chapter


04:01 [ai]ܐܶܢ ܡܫܺܝܚܳܐ ܗܳܟܼܺܝܠ ܚܰܫ ܚܠܳܦܼܰܝܟܿܽܘܢ ܒܰܒܼܣܰܪ܃ ܘܳܐܦܼ ܐܰܢ̱ܬܿܽܘܢ ܒܶܗ ܒܗܳܢܳܐ ܪܶܥܝܳܢܳܐ ܐܶܙܕܿܰܝܰܢܘ܂ ܟܽܠܡܰܢ ܕܡܳܐܶܬܼ ܓܶܝܪ ܒܦܰܓܼܪܶܗ܃ ܫܠܺܝ ܠܶܗ ܡܶܢ ܟܽܠܗܽܘܢ ܚܛܳܗܶܐ̈܃
04:02 [ai]ܕܠܳܐ ܡܶܟܿܺܝܠ ܠܰܪ̈ܓܼܺܝܓܼܳܬܼܳܐ ܕܿܰܒܼܢܰܝܢܳܫܳܐ ܢܺܚܶܐ܃ ܟܡܳܐ ܙܰܒܼܢܳܐ ܕܺܐܝܬܼܰܘܗ̱ܝ ܒܦܰܓܼܪܳܐ܃ ܐܶܠܳܐ ܠܨܶܒܼܝܳܢܳܐ ܕܰܐܠܳܗܳܐ܂
04:03 [ai]ܣܳܦܼܶܩ ܓܶܝܪ ܙܰܒܼܢܳܐ ܗܰܘ ܕܰܥܒܼܰܪ܃ ܕܰܦܼܠܰܚܬܿܽܘܢ ܒܶܗ ܨܶܒܼܝܳܢܳܐ ܕܚܰܢܦܼܶܐ̈܃ ܒܳܐܣܽܘܛܽܘܬܼܳܐ܂ ܘܰܒܪܰܘܳܝܽܘܬܼܳܐ܂ ܘܰܒܨܰܚܢܽܘܬܼܳܐ܂ ܘܒܼܰܙܡܳܪܳܐ܂ ܘܰܒܦܼܽܘܠܚܳܢܳܐ ܕܫܺܐܕܼܶܐ̈܂
04:04 [ai]ܘܗܳܐ ܗܳܫܳܐ ܡܶܬܿܕܰܡܪܺܝܢ ܘܰܡܓܼܰܕܿܦܼܺܝܢ ܥܠܰܝܟܿܽܘܢ܃ ܒܰܕܼܠܳܐ ܡܶܫܬܿܰܪܚܺܝܬܿܽܘܢ ܥܰܡܗܽܘܢ ܒܗܳܝ ܐܳܣܽܘܛܽܘܬܼܳܐ ܩܰܕܼܡܳܝܬܳܐ܂
04:05 [ai]ܗܳܢܽܘܢ ܕܿܝܳܗܒܺܝܢ ܦܶܬܼܓܼܳܡܳܐ ܠܰܐܠܳܗܳܐ܃ ܗܰܘ ܕܰܥܬܼܺܝܕܼ ܠܰܡܕܼܳܢ ܡܺܝܬܼܶܐ̈ ܘܚܰܝ̈ܶܐ܂
04:06 [ai]ܡܶܛܽܠ ܗܳܢܳܐ ܓܶܝܪ ܐܶܣܬܿܰܒܰܪ ܐܳܦܼ ܠܡܺܝܬܼܶܐ̈܃ ܕܢܶܬܿܕܼܺܝܢܽܘܢ ܐܰܝܟܼ ܒܢܰܝܢܳܫܳܐ ܒܰܒܼܣܰܪ܃ ܘܢܺܚܽܘܢ ܒܰܐܠܳܗܳܐ ܒܪܽܘܚ܂
04:07 [ai]ܡܰܛܝܰܬܼ ܠܳܗ ܕܶܝܢ ܚܰܪܬܼܳܐ ܕܟܽܠ܂ ܡܶܛܽܠ ܗܳܢܳܐ ܐܶܬܼܢܰܟܿܰܦܼܘ ܘܶܐܬܿܬܿܥܺܝܪܘ ܠܰܨܠܽܘܬܼܳܐ܂
04:08 [ai]ܘܰܩܕܼܳܡ ܟܽܠ ܡܶܕܶܡ܃ ܚܽܘܒܿܳܐ ܚܰܪܺܝܦܼܳܐ ܠܘܳܬܼ ܚܕܼܳܕܼܶܐ̈ ܢܶܗܘܶܐ ܠܟܼܽܘܢ܂ ܚܽܘܒܿܳܐ ܓܶܝܪ ܡܚܰܦܿܶܐ ܣܽܘܓܼܳܐܐ ܕܰܚܛܳܗܶܐ̈܂
04:09 [ai]ܘܰܗܘܰܝܬܿܽܘܢ ܪܳܚܡܺܝܢ ܐܰܟܼܣܢܳܝܶܐ̈ ܕܠܳܐ ܪܶܛܢܳܐ܂
04:10 [ai]ܘܟܼܽܠܢܳܫ ܡܶܢܟܼܽܘܢ ܡܰܘܗܰܒܼܬܳܐ ܕܩܰܒܿܶܠ ܡܶܢ ܐܰܠܳܗܳܐ܃ ܢܫܰܡܶܫ ܒܿܳܗ ܠܚܰܒܼܪ̈ܰܘܗ̱ܝ܃ ܐܰܝܟܼ ܪ̈ܰܒܰܝ ܒܳܬܿܶܐ̈ ܛܳܒܼܶܐ̈ ܕܛܰܝܒܿܽܘܬܼܳܐ ܡܦܼܰܪܰܫܬܳܐ ܕܰܐܠܳܗܳܐ܂
04:11 [ai]ܟܽܠܡܰܢ ܕܰܡܡܰܠܶܠ܃ ܐܰܝܟܼ ܡܶܠܬܼܳܐ ܕܰܐܠܳܗܳܐ܂ ܢܡܰܠܶܠ܂ ܘܟܼܽܠܡܰܢ ܕܰܡܫܰܡܶܫ܃ ܐܰܝܟܼ ܕܡܶܢ ܚܰܝܠܳܐ ܗܰܘ ܕܰܐܠܳܗܳܐ ܝܳܗܶܒܼ ܠܶܗ܃ ܕܰܒܼܟܼܽܠ ܕܥܳܒܼܕܺܝܢ ܐܢ̱ܬܿܽܘܢ܃ ܢܶܫܬܿܰܒܿܰܚ ܐܰܠܳܗܳܐ ܒܝܰܕܼ ܝܶܫܽܘܥ ܡܫܺܝܚܳܐ܂ ܗܰܘ ܕܕܼܺܝܠܶܗ ܗ̱ܺܝ ܬܿܶܫܒܿܽܘܚܬܳܐ ܘܺܐܝܩܳܪܳܐ ܠܥܳܠܰܡ ܥܳܠܡܺܝܢ܂ ܐܰܡܺܝܢ܀
04:12 [ai]ܚܰܒܺܝܒܼܰܝ̈܃ ܠܳܐ ܬܿܶܬܿܕܰܡܪܽܘܢ ܒܢܶܣܝܽܘܢܶܐ̈ ܕܗܳܘܶܝܢ ܠܟܼܽܘܢ܃ ܐܰܝܟܼ ܕܿܡܶܕܶܡ ܢܽܘܟܼܪܳܝ ܓܳܕܼܶܫ ܠܟܼܽܘܢ܂ ܡܶܛܽܠ ܕܰܠܒܼܽܘܚܪܳܢܟܼܽܘܢ ܗ̱ܽܘ ܗܳܘܶܝܢ܂
04:13 [ai]ܐܶܠܳܐ ܚܕܼܰܘ ܕܡܶܫܬܰܘܬܿܦܼܺܝܢ ܐܢ̱ܬܿܽܘܢ ܠܚܰܫܰܘܗ̱ܝ̈ ܕܰܡܫܺܝܚܳܐ܂ ܕܗܳܟܼܰܢܳܐ ܐܳܦܼ ܒܓܶܠܝܳܢܳܐ ܕܬܶܫܒܿܽܘܚܬܿܶܗ ܬܶܚܕܿܽܘܢ ܘܬܼܶܪܘܙܽܘܢ܂
04:14 [ai]ܘܶܐܢ ܡܶܬܼܚܰܣܕܼܺܝܢ ܐܢ̱ܬܿܽܘܢ ܥܰܠ ܐܰܦܿܰܝ̈ ܫܡܶܗ ܕܰܡܫܺܝܚܳܐ܃ ܛܽܘܒܼܰܝܟܿܽܘܢ܂ ܕܪܽܘܚܳܐ ܡܫܰܒܿܰܚܬܳܐ ܕܰܐܠܳܗܳܐ ܡܶܬܿܬܿܢܺܝܚܳܐ ܥܠܰܝܟܿܽܘܢ܂
04:15 [ai]ܒܰܠܚܽܘܕܼ ܠܳܐ ܐ̱ܢܳܫ ܡܶܢܟܼܽܘܢ ܐܰܝܟܼ ܩܳܛܽܘܠܳܐ܂ ܐܰܘ ܐܰܝܟܼ ܓܰܢܳܒܼܳܐ܂ ܐܰܘ ܐܰܝܟܼ ܥܳܒܼܶܕܼ ܒܺܝܫܳܬܼܳܐ̈܂ ܢܶܗܘܶܐ ܚܳܐܶܫ܂
04:16 [ai]ܐܶܢ ܕܶܝܢ ܚܳܐܶܫ ܐܰܝܟܼ ܟܪܺܣܛܝܳܢܳܐ܃ ܠܳܐ ܢܶܒܼܗܰܬܼ܃ ܐܶܠܳܐ ܢܫܰܒܿܰܚ ܠܰܐܠܳܗܳܐ ܒܶܗ ܒܗܳܢܳܐ ܫܡܳܐ܂
04:17 [ai]ܡܶܛܽܠ ܕܙܰܒܼܢܳܐ ܗ̱ܘ܂ ܕܰܢܫܰܪܶܐ ܕܺܝܢܳܐ ܡܶܢ ܒܰܝܬܿܶܗ ܕܰܐܠܳܗܳܐ܂ ܐܶܢ ܕܶܝܢ ܡܶܢܰܢ ܡܫܰܪܶܐ܃ ܐܰܝܕܼܳܐ ܗ̱ܝ ܚܰܪܬܼܳܐ ܕܰܐܝܠܶܝܢ ܕܠܳܐ ܡܶܬܿܛܦܿܺܝܣܺܝܢ ܠܰܣܒܼܰܪܬܼܶܗ ܕܰܐܠܳܗܳܐ܂
04:18 [ai]ܘܶܐܢ ܙܰܕܿܺܝܩܳܐ ܠܡܰܚܣܶܢ ܚܳܝܶܐ܃ ܪܰܫܺܝܥܳܐ ܘܚܰܛܳܝܳܐ܂ ܐܰܝܟܿܳܐ ܡܶܫܬܿܟܼܰܚ܂
04:19 [ai]ܡܶܛܽܠ ܗܳܢܳܐ ܐܰܝܠܶܝܢ ܕܚܳܫܺܝܢ ܐܰܝܟܼ ܨܶܒܼܝܳܢܶܗ ܕܰܐܠܳܗܳܐ܃ ܢܰܓܼܥܠܽܘܢ ܠܶܗ ܢܰܦܼܫܳܬܼܗܽܘܢ̈ ܒܰܥܒܼܳܕܼܶܐ̈ ܫܰܦܿܺܝܪ̈ܶܐ܃ ܐܰܝܟܼ ܕܰܠܒܼܳܪܽܘܝܳܐ ܡܗܰܝܡܢܳܐ܀

next chapter