The Comprehensive Aramaic Lexicon

05:01 [ai]	ܒܿܳܥܶܐ ܐ̱ܢܳܐ ܕܶܝܢ ܡܶܢ ܩܰܫܺܝܫܶܐ̈ ܕܺܐܝܬܼ ܒܟܽܘܢ܃ ܐܶܢܳܐ ܩܰܫܺܝܫܳܐ ܚܰܒܼܪܟܼܽܘܢ܂ ܘܣܳܗܕܿܳܐ ܕܚܰܫܰܘܗ̱ܝ̈ ܕܰܡܫܺܝܚܳܐ܂ ܘܫܰܘܬܿܳܦܼܳܐ ܕܫܽܘܒܼܚܶܗ ܗܰܘ ܕܰܥܬܼܺܝܕܼ ܕܢܶܬܼܓܠܶܐ܃
05:02 [ai]	ܪܥܰܘ ܡܰܪܥܺܝܬܼܳܐ ܕܰܐܠܳܗܳܐ ܕܡܰܫܠܡܳܐ ܠܟܼܽܘܢ܂ ܘܰܣܥܽܘܪܘ ܪܽܘܚܳܢܳܐܺܝܬܼ܂ ܠܳܐ ܒܰܩܛܺܝܪܳܐ܃ ܐܶܠܳܐ ܒܨܶܒܼܝܳܢܳܐ܂ ܠܳܐ ܒܝܽܘܬܼܪ̈ܳܢܶܐ ܛܰܢܦܿܶܐ̈܃ ܐܶܠܳܐ ܡܶܢ ܟܽܠܶܗ ܠܶܒܟܽܘܢ܂
05:03 [ai]	ܠܳܐ ܐܰܝܟܼ ܡܳܪ̈ܰܝܳܐ ܕܡܰܪܥܺܝܬܼܳܐ܃ ܐܶܠܳܐ ܐܰܝܟܼ ܕܬܶܗܘܽܘܢ ܠܗܽܘܢ ܕܡܽܘܬܼܳܐ ܫܰܦܿܺܝܪܬܳܐ܂
05:04 [ai]	ܕܟܰܕܼ ܢܶܬܼܓܠܶܐ ܪܰܒܿ ܪ̈ܳܥܰܘܳܬܼܳܐ܃ ܬܩܰܒܿܠܽܘܢ ܡܶܢܶܗ ܟܠܺܝܠܳܐ ܕܫܽܘܒܼܚܳܐ ܕܠܳܐ ܚܳܡܶܐ܂
05:05 [ai]	ܘܰܐܢ̱ܬܿܽܘܢ ܥܠܰܝܡܶܐ̈܃ ܐܶܫܬܿܰܥܒܿܰܕܼܘ ܠܩܰܫܺܝܫܰܝܟܿܽܘܢ̈܂ ܘܶܐܬܼܥܰܛ̱ܦܼܘ ܚܺܝܨܳܐܺܝܬܼ ܡܰܟܿܺܝܟܼܽܘܬܼ ܪܶܥܝܳܢܳܐ ܠܘܳܬܼ ܚܕܼܳܕܼܶܐ̈܂ ܡܶܛܽܠ ܕܰܐܠܳܗܳܐ ܣܰܩܽܘܒܼܠܳܐ ܗ̱ܘ ܕܰܐܝܠܶܝܢ ܕܡܶܬܿܬܿܪܺܝܡܺܝܢ܃ ܘܰܠܡܰܟܿܺܝܟܼܶܐ̈ ܝܳܗܶܒܼ ܛܰܝܒܿܽܘܬܼܳܐ܀
05:06 [ai]	ܐܶܬܼܡܰܟܿܰܟܼܘ ܗܳܟܼܺܝܠ ܬܚܶܝܬܼ ܐܺܝܕܼܶܗ ܬܿܰܩܺܝܦܼܬܳܐ ܕܰܐܠܳܗܳܐ܃ ܕܗܺܝ ܬܪܺܝܡܟܼܽܘܢ ܒܙܰܒܼܢܳܐ ܕܙܳܕܼܶܩ܂
05:07 [ai]	ܘܨܶܦܼܬܼܟܼܽܘܢ ܟܽܠܳܗ ܫܕܼܰܘ ܥܰܠ ܐܰܠܳܗܳܐ܃ ܕܠܶܗ ܒܛܺܝܠ ܥܠܰܝܟܿܽܘܢ܂
05:08 [ai]	ܐܶܬܿܬܿܥܺܝܪܘ ܘܶܥ̱ܗܰܕܼܘ܂ ܡܶܛܽܠ ܕܰܒܼܥܶܠܕܿܒܼܳܒܼܟܼܽܘܢ ܣܳܛܳܢܳܐ ܐܰܝܟܼ ܐܰܪܝܳܐ܂ ܢܳܗܶܡ ܘܰܡܗܰܠܶܟܼ܂ ܘܒܼܳܥܶܐ܂ ܕܰܠܡܰܢܽܘ ܢܶܒܼܠܰܥ܂
05:09 [ai]	ܩܽܘܡܘ ܗܳܟܼܺܝܠ ܠܩܽܘܒܼܠܶܗ܃ ܟܰܕܼ ܡܫܰܪܪܺܝܢ ܐܢ̱ܬܿܽܘܢ ܒܗܰܝܡܳܢܽܘܬܼܳܐ܂ ܘܕܼܰܥܘ ܕܳܐܦܼ ܥܰܠ ܐܰܚܰܝܟܿܽܘܢ̈ ܕܰܒܼܥܳܠܡܳܐ܃ ܗܶܢܽܘܢ ܗܳܠܶܝܢ ܚܰܫܶܐ̈ ܥܳܪܨܺܝܢ܂
05:10 [ai]	ܐܰܠܳܗܳܐ ܕܶܝܢ ܕܛܰܝܒܿܽܘܬܼܳܐ܂ ܗܰܘ ܕܰܩܪܳܢ ܠܫܽܘܒܼܚܶܗ ܕܰܠܥܳܠܰܡ܃ ܒܝܰܕܼ ܝܶܫܽܘܥ ܡܫܺܝܚܳܐ܂ ܗܰܘ ܕܝܰܗ̱ܒܼ ܠܰܢ܃ ܕܟܰܕܼ ܢܣܰܝܒܰܪ ܗܳܠܶܝܢ ܐܽܘܠܨܳܢܶܐ̈ ܙܥܽܘܪ̈ܶܐ܃ ܕܢܶܬܼܚܰܝܰܠܘ ܢܶܫܬܿܰܪܰܪ ܘܢܶܬܼܩܰܝܰܡ ܒܶܗ ܠܥܳܠܰܡ܃
05:11 [ai]	ܕܠܶܗ ܫܽܘܒܼܚܳܐ ܘܽܐܘܚܕܳܢܳܐ ܘܺܐܝܩܳܪܳܐ܃ ܠܥܳܠܰܡ ܥܳܠܡܺܝܢ܂ ܐܰܡܺܝܢ܀
05:12 [ai]	ܗܳܠܶܝܢ ܙܥܽܘܪ̈ܝܳܬܼܳܐ ܐܰܝܟܼ ܕܣܳܒܼܰܪ ܐ̱ܢܳܐ܂ ܟܶܬܼܒܿܶܬܼ ܠܟܼܽܘܢ܃ ܒܝܰܕܼ ܣܺܠܘܰܢܳܘܣ ܐܰܚܳܐ ܡܗܰܝܡܢܳܐ܂ ܘܰܡܦܿܳܣ ܐ̱ܢܳܐ ܘܣܳܗܶܕܼ ܐ̱ܢܳܐ܃ ܕܗܳܕܼܶܐ ܗ̱ܝ ܛܰܝܒܿܽܘܬܼܳܐ ܫܰܪܺܝܪܬܳܐ ܕܰܐܠܳܗܳܐ܃ ܗܳܕܼܶܐ ܕܩܳܝܡܺܝܢ ܐܢ̱ܬܿܽܘܢ ܒܿܳܗ܂
05:13 [ai]	ܫܳܐܠܳܐ ܫܠܳܡܟܼܽܘܢ܂ ܥܺܕ̱ܿܬܳܐ ܓܒܼܺܝܬܼܳܐ ܕܰܒܼܒܼܳܒܼܶܠ܂ ܘܡܰܪܩܳܘܣ ܒܶܪܝ܂
05:14 [ai]	ܫܰܐܠܘ ܒܰܫܠܳܡܳܐ ܚܰܕܼ ܕܚܰܕܼ ܒܢܽܘܫܰܩܬܳܐ ܩܰܕܿܺܝܫܬܳܐ܂ ܫܠܳܡܳܐ ܥܰܡ ܟܽܠܗܽܘܢ ܐܰܝܠܶܝܢ ܕܒܰܡܫܺܝܚܳܐ ܐܶܢܽܘܢ܂ ܐܰܡܺܝܢ܀