The Comprehensive Aramaic Lexicon

02:01 [ai]	ܒܢܰܝ܃ ܗܳܠܶܝܢ ܟܳܬܼܶܒܼ ܐ̱ܢܳܐ ܠܟܼܽܘܢ܂ ܕܠܳܐ ܬܶܚܛܽܘܢ܂ ܘܶܐܢ ܐ̱ܢܳܫ ܢܶܚܛܶܐ܃ ܐܺܝܬܼ ܠܰܢ ܦܰܪܰܩܠܺܛܳܐ ܠܘܳܬܼ ܐܰܒܼܳܐ܃ ܝܶܫܽܘܥ ܡܫܺܝܚܳܐ ܙܰܕܿܺܝܩܳܐ܂
02:02 [ai]	ܗܽܘܝܽܘ ܓܶܝܪ ܚܽܘܣܳܝܳܐ ܕܥܰܠ ܐܰܦܿܰܝ̈ ܚܛܳܗܰܝܢ̈܂ ܘܠܰܘ ܚܠܳܦܼܰܝܢ ܕܺܝܠܰܢ ܒܰܠܚܽܘܕܼ܃ ܐܶܠܳܐ ܐܳܦܼ ܚܠܳܦܼ ܟܽܠܶܗ ܥܳܠܡܳܐ܂
02:03 [ai]	ܘܰܒܗܳܕܶܐ ܡܰܪܓܿܫܺܝܢܰܢ ܕܺܝܕܼܰܥܢܳܝܗ̱ܝ܃ ܐܶܢ ܢܳܛܪܺܝܢܰܢ ܦܽܘܩܕܳܢܰܘܗ̱ܝ̈܂
02:04 [ai]	ܗܰܘ ܓܶܝܪ ܕܳܐܡܰܪ ܕܺܝܕܼܰܥܬܼܶܗ܃ ܘܦܼܽܘܩܕܳܢܰܘܗ̱ܝ̈ ܠܳܐ ܢܳܛܰܪ܃ ܕܰܓܿܳܠܳܐ ܗܽܘ܂ ܘܰܫܪܳܪܳܐ ܠܰܝܬܿ ܒܶܗ܂
02:05 [ai]	ܗܰܘ ܕܶܝܢ ܕܢܳܛܰܪ ܡܶܠܬܼܶܗ܃ ܒܗܳܢܳܐ ܡܫܰܠܰܡ ܫܰܪܺܝܪܳܐܺܝܬܼ ܚܽܘܒܶܗ ܕܰܐܠܳܗܳܐ܂ ܒܗܳܕܼܶܐ ܓܶܝܪ ܝܳܕܼܥܺܝܢܰܢ܂ ܕܒܶܗ ܚܢܰܢ܂
02:06 [ai]	ܗܰܘ ܕܳܐܡܰܪ ܕܒܶܗ ܐܺܝܬܼܰܝ܃ ܘܳܠܶܐ ܠܶܗ ܕܰܐܝܟܼ ܗܰܠܟܼܳܬܼܶܗ̈ ܕܺܝܠܶܗ ܢܗܰܠܶܟܼ ܿ܀ܿ܀ܿ
02:07 [ai]	ܚܰܒܺܝܒܼܰܝ̈܃ ܠܰܘ ܦܽܘܩܕܳܢܳܐ ܚܰܕܼ̱ܬܼܳܐ ܟܳܬܼܶܒܼ ܐ̱ܢܳܐ ܠܟܼܽܘܢ܃ ܐܶܠܳܐ ܦܽܘܩܕܳܢܳܐ ܥܰܬܿܺܝܩܳܐ܃ ܗܰܘ ܕܺܐܝܬܼ ܗ̱ܘܳܐ ܠܟܼܽܘܢ ܡܶܢ ܒܪܺܫܺܝܬܼ܂ ܦܽܘܩܕܳܢܳܐ ܕܶܝܢ ܥܰܬܿܺܝܩܳܐ ܐܺܝܬܼܰܘܗ̱ܝ ܡܶܠܬܼܳܐ ܗܳܝ ܕܰܫܡܰܥܬܿܽܘܢ܂
02:08 [ai]	ܬܽܘܒܼ ܦܽܘܩܕܳܢܳܐ ܚܰܕܼ̱ܬܼܳܐ ܟܳܬܼܶܒܼ ܐ̱ܢܳܐ ܠܟܼܽܘܢ܃ ܗܰܘ ܕܺܐܝܬܼܰܘܗ̱ܝ ܫܰܪܺܝܪܳܐ܂ ܒܶܗ ܘܰܒܟܼܽܘܢ܃ ܕܚܶܫܽܘܟܼܳܐ ܥܒܼܰܪ ܠܶܗ܃ ܘܢܽܘܗܪܳܐ ܫܰܪܺܝܪܳܐ ܫܰܪܺܝ ܡܶܬܼܚܙܶܐ܂
02:09 [ai]	ܡܰܢ ܕܳܐܡܰܪ ܗܳܟܼܺܝܠ ܕܺܐܝܬܼܰܘܗ̱ܝ ܒܢܽܘܗܪܳܐ܃ ܘܣܳܢܶܐ ܠܰܐܚܽܘܗ̱ܝ܃ ܒܚܶܫܽܘܟܼܳܐ ܐܺܝܬܼܰܘܗ̱ܝ ܥܕܼܰܡܳܐ ܠܗܳܫܳܐ܂
02:10 [ai]	ܗܰܘ ܕܶܝܢ ܕܡܰܚܶܒܼ ܠܰܐܚܽܘܗ̱ܝ܃ ܒܢܽܘܗܪܳܐ ܡܟܼܰܬܿܰܪ܂ ܘܟܼܶܫܠܳܐ ܠܰܝܬܿ ܒܶܗ܂
02:11 [ai]	ܗܰܘ ܕܶܝܢ ܕܣܳܢܶܐ ܠܰܐܚܽܘܗ̱ܝ܃ ܒܚܶܫܽܘܟܼܳܐ ܐܺܝܬܼܰܘܗ̱ܝ܂ ܘܰܒܚܶܫܽܘܟܼܳܐ ܡܗܰܠܶܟܼ܂ ܘܠܳܐ ܝܳܕܼܰܥ܂ ܠܰܐܝܟܿܳܐ ܐܳܙܶܠ܃ ܡܶܛܽܠ ܕܚܶܫܽܘܟܼܳܐ ܣܰܡܺܝ ܐܶܢܶܝܢ̈ ܥܰܝܢܰܘܗ̱ܝ̈܀
02:12 [ai]	ܟܳܬܼܶܒܼ ܐ̱ܢܳܐ ܠܟܼܽܘܢ ܒܢܰܝܳܐ܃ ܕܶܐܫܬܿܒܼܶܩܘ ܠܟܼܽܘܢ ܚܛܳܗܰܝܟܿܽܘܢ̈܂ ܡܶܛܽܠ ܫܡܶܗ܂
02:13 [ai]	ܟܳܬܼܶܒܼ ܐ̱ܢܳܐ ܠܟܼܽܘܢ ܐܰܒܼܳܗܶܐ̈܃ ܕܺܝܕܼܰܥܬܿܽܘܢܳܝܗ̱ܝ ܠܗܰܘ ܕܺܐܝܬܼܰܘܗ̱ܝ ܗ̱ܘܳܐ ܡܶܢ ܒܪܺܫܺܝܬܼ܂ ܟܳܬܼܶܒܼ ܐ̱ܢܳܐ ܠܟܼܽܘܢ ܥܠܰܝܡܶܐ̈܃ ܕܰܙܟܼܰܝܬܿܽܘܢܳܝܗ̱ܝ ܠܒܼܺܝܫܳܐ܂ ܟܶܬܼܒܿܶܬܼ ܠܟܼܽܘܢ ܛܠܳܝܶܐ̈܃ ܕܺܝܕܼܰܥܬܿܽܘܢ ܠܰܐܒܼܳܐ܂
02:14 [ai]	ܟܶܬܼܒܿܶܬܼ ܠܟܼܽܘܢ ܐܰܒܼܳܗܶܐ̈܃ ܕܺܝܕܼܰܥܬܿܽܘܢ ܠܗܰܘ ܕܡܶܢ ܒܪܺܫܺܝܬܼ܂ ܟܶܬܼܒܿܶܬܼ ܠܟܼܽܘܢ ܥܠܰܝܡܶܐ̈܃ ܕܚܰܝܠܬܼܳܢܶܐ̈ ܐܢ̱ܬܿܽܘܢ܂ ܘܡܶܠܬܼܶܗ ܕܰܐܠܳܗܳܐ ܫܰܪܝܳܐ ܒܟܽܘܢ܂ ܘܰܙܟܼܰܝܬܿܽܘܢܳܝܗ̱ܝ ܠܒܼܺܝܫܳܐ܂
02:15 [ai]	ܠܳܐ ܬܶܪܚܡܽܘܢ ܠܥܳܠܡܳܐ܃ ܘܠܳܐ ܠܡܶܕܶܡ ܕܺܐܝܬܼ ܒܶܗ܂ ܡܰܢ ܓܶܝܪ ܕܪܳܚܶܡ ܠܥܳܠܡܳܐ܃ ܚܽܘܒܶܗ ܕܰܐܒܼܳܐ ܠܰܝܬܿ ܒܶܗ܂
02:16 [ai]	ܟܽܠ ܡܶܕܶܡ ܓܶܝܪ ܕܺܐܝܬܼ ܒܶܗ ܒܥܳܠܡܳܐ܃ ܪܶܓܿܬܼܳܐ ܗܽܘ ܕܦܰܓܼܪܳܐ܂ ܘܪܶܓܿܬܼܳܐ ܕܥܰܝܢܶܐ̈܃ ܘܫܽܘܒܼܗܳܪܳܐ ܕܥܳܠܡܳܐ܂ ܗܳܠܶܝܢ ܕܠܳܐ ܗ̱ܘܰܝ̈ ܡܶܢ ܐܰܒܼܳܐ܃ ܐܶܠܳܐ ܡܶܢܶܗ ܐܶܢܶܝܢ̈ ܡܶܢ ܥܳܠܡܳܐ܂
02:17 [ai]	ܘܥܳܒܼܰܪ ܥܳܠܡܳܐ܂ ܗܽܘ ܘܪܶܓܿܬܼܶܗ܂ ܗܰܘ ܕܶܝܢ ܕܥܳܒܼܶܕܼ ܨܶܒܼܝܳܢܶܗ ܕܰܐܠܳܗܳܐ܃ ܡܩܰܘܶܐ ܠܥܳܠܰܡ܀
02:18 [ai]	ܒܢܰܝ܃ ܙܰܒܼܢܳܐ ܗܽܘ ܐ̱ܚܪܳܝܳܐ܂ ܘܰܐܝܟܼ ܡܶܕܶܡ ܕܰܫܡܰܥܬܿܽܘܢ ܕܳܐܬܼܶܐ ܡܫܺܝܚܳܐ ܕܰܓܿܳܠܳܐ܃ ܘܗܳܫܳܐ ܗܘܰܘ ܠܗܽܘܢ ܣܰܓܿܺܝܶܐܐ̈ ܡܫܺܝܚܶܐ̈ ܕܰܓܳܠܶܐ̈܂ ܘܡܶܢ ܗܳܕܼܶܐ ܝܳܕܼܥܺܝܢܰܢ܃ ܕܙܰܒܼܢܳܐ ܗܽܘ ܐ̱ܚܪܳܝܳܐ܂
02:19 [ai]	ܡܶܢܰܢ ܢܦܼܰܩܘ܃ ܐܶܠܳܐ ܠܰܘ ܡܶܢܰܢ ܗ̱ܘܰܘ܂ ܐܶܠܽܘ ܓܶܝܪ ܡܶܢܰܢ ܗ̱ܘܰܘ܃ ܠܘܳܬܼܰܢ ܡܟܼܰܬܿܪܺܝܢ ܗ̱ܘܰܘ܂ ܐܶܠܳܐ ܢܦܼܰܩܘ ܡܶܢܰܢ܃ ܕܬܶܬܼܺܝܕܼܰܥ ܕܠܰܘ ܡܶܢܰܢ ܗ̱ܘܰܘ܂
02:20 [ai]	ܘܰܐܢ̱ܬܿܽܘܢ܂ ܡܫܺܝܚܽܘܬܼܳܐ ܐܺܝܬܼ ܠܟܼܽܘܢ ܡܶܢ ܩܰܕܿܺܝܫܳܐ܃ ܘܦܼܳܪܫܺܝܢ ܐܢ̱ܬܿܽܘܢ ܗ̱ܽܘ ܠܟܼܽܠ ܐ̱ܢܳܫ܂
02:21 [ai]	ܠܳܐ ܟܶܬܼܒܿܶܬܼ ܠܟܼܽܘܢ܃ ܕܠܳܐ ܝܳܕܼܥܺܝܢ ܐܢ̱ܬܿܽܘܢ ܠܶܗ ܠܰܫܪܳܪܳܐ܃ ܐܶܠܳܐ ܕܝܳܕܼܥܺܝܢ ܐܢ̱ܬܿܽܘܢ ܠܶܗ܃ ܘܰܕܼܟܼܽܠܳܗ ܕܰܓܳܠܽܘܬܼܳܐ ܠܳܐ ܗ̱ܘܳܬܼ ܡܶܢܶܗ ܡܶܢ ܫܪܳܪܳܐ܂
02:22 [ai]	ܡܰܢܽܘ ܕܰܓܿܳܠܳܐ܃ ܐܶܠܳܐ ܐܶܢ ܐܰܝܢܳܐ ܕܟܳܦܼܰܪ ܕܝܶܫܽܘܥ ܠܳܐ ܗ̱ܘܳܐ ܡܫܺܝܚܳܐ܂ ܗܳܢܳܐ ܗܽܘ ܡܫܺܝܚܳܐ ܕܰܓܿܳܠܳܐ܂ ܗܰܘ ܕܟܳܦܼܰܪ ܒܰܐܒܼܳܐ܃ ܟܳܦܼܰܪ ܐܳܦܼ ܒܰܒܼܪܳܐ܂
02:23 [ai]	ܘܗܰܘ ܕܟܳܦܼܰܪ ܒܰܒܼܪܳܐ܃ ܐܳܦܼܠܳܐ ܒܰܐܒܼܳܐ ܡܗܰܝܡܶܢ܂ ܡܰܢ ܕܡܰܘܕܿܶܐ ܒܰܒܼܪܳܐ܃ ܐܳܦܼ ܒܰܐܒܼܳܐ ܡܰܘܕܿܶܐ܂
02:24 [ai]	ܘܰܐܢ̱ܬܿܽܘܢ܂ ܡܶܕܶܡ ܕܰܫܡܰܥܬܿܽܘܢ ܡܶܢ ܩܕܼܺܝܡ܃ ܢܩܰܘܶܐ ܠܘܳܬܼܟܼܽܘܢ܂ ܐܶܢ ܓܶܝܪ ܡܩܰܘܶܐ ܠܘܳܬܼܟܼܽܘܢ ܡܶܕܶܡ ܕܰܫܡܰܥܬܿܽܘܢ ܡܶܢ ܩܕܼܺܝܡ܃ ܐܳܦܼ ܐܰܢ̱ܬܿܽܘܢ ܡܩܰܘܶܝܢ ܐܢ̱ܬܿܽܘܢ ܒܰܐܒܼܳܐ ܘܒܼܰܒܼܪܳܐ܂
02:25 [ai]	ܘܗܳܢܰܘ ܫܽܘܘ̱ܕܿܳܝܳܐ ܕܶܐܫܬܰܘܕܿܺܝ ܠܰܢ܃ ܚܰܝ̈ܶܐ ܕܰܠܥܳܠܰܡ܂
02:26 [ai]	ܗܳܠܶܝܢ ܕܶܝܢ ܟܶܬܼܒܿܶܬܼ ܠܟܼܽܘܢ܃ ܡܶܛܽܠ ܐܰܝܠܶܝܢ ܕܡܰܛܥܶܝܢ ܠܟܼܽܘܢ܂
02:27 [ai]	ܘܳܐܦܼ ܐܰܢ̱ܬܿܽܘܢ܂ ܐܶܢ ܬܩܰܘܶܐ ܠܘܳܬܼܟܼܽܘܢ ܡܫܺܝܚܽܘܬܼܳܐ ܕܩܰܒܿܶܠܬܿܽܘܢ ܡܶܢܶܗ܃ ܠܳܐ ܣܢܺܝܩܺܝܢ ܐܢ̱ܬܿܽܘܢ ܕܐ̱ܢܳܫ ܢܰܠܶܦܼܟܼܽܘܢ܂ ܐܶܠܳܐ ܐܰܝܟܼ ܡܫܺܝܚܽܘܬܼܳܐ ܕܺܐܝܬܼܶܝܗ ܡܶܢ ܐܰܠܳܗܳܐ܃ ܗܺܝ ܡܰܠܦܼܳܐ ܠܟܼܽܘܢ ܥܰܠ ܟܽܠܡܶܕܶܡ܂ ܘܫܰܪܺܝܪܳܐ ܗ̱ܝ ܘܠܰܝܬܿ ܒܿܳܗ ܕܰܓܳܠܽܘܬܼܳܐ܂ ܘܰܐܝܟܼ ܕܰܐܠܶܦܼܟܼܽܘܢ܃ ܩܰܘܰܘ ܒܶܗ܂
02:28 [ai]	ܘܗܳܫܳܐ ܒܢܰܝ܃ ܩܰܘܰܘ ܒܶܗ܃ ܕܡܳܐ ܕܡܶܬܼܓܠܶܐ܂ ܠܳܐ ܢܶܒܼܗܰܬܼ ܡܶܢܶܗ܂ ܐܶܠܳܐ ܬܶܗܘܶܐ ܠܰܢ ܓܰܠܝܽܘܬܼ ܐܰܦܿܶܐ̈ ܒܡܶܐܬܼܺܝܬܼܶܗ܂
02:29 [ai]	ܐܶܢ ܺܝܕܼܰܥܬܿܽܘܢ ܕܙܰܕܿܺܝܩ ܗ̱ܽܘ܃ ܕܰܥܘ܂ ܕܳܐܦܼ ܟܽܠ ܕܥܳܒܼܶܕܼ ܙܰܕܿܺܝܩܽܘܬܼܳܐ܃ ܡܶܢܶܗ ܐܺܝܬܼܰܘܗ̱ܝ܀

next chapter