← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information
62062: 1Jn

Click on a word for lexical analysis.
Click on a red-colored coordinate for comments and/or translations of the line
View in Serto
Ask AI about a passage
Hide manuscript variants

previous chapter


03:01 [ai]ܘܰܚܙܰܘ܂ ܕܰܟܼܡܳܐ ܣܰܓܿܺܝ ܚܽܘܒܶܗ ܕܰܐܒܼܳܐ ܠܘܳܬܼܰܢ܃ ܕܿܰܒܼܢܰܝܳܐ ܩܪܳܢ܂ ܐܳܦܼ ܥܰܒܼܕܿܰܢ܂ ܡܶܛܽܠ ܗܳܢܳܐ ܥܳܠܡܳܐ ܠܳܐ ܝܳܕܼܰܥ ܠܰܢ܃ ܡܶܛܽܠ ܕܳܐܦܼܠܳܐ ܠܶܗ ܺܝܕܼܰܥ܀
03:02 [ai]ܚܰܒܺܝܒܼܰܝ̈܃ ܗܳܫܳܐ ܒܢܰܘܗ̱ܝ ܚܢܰܢ ܕܰܐܠܳܗܳܐ܂ ܘܠܳܐ ܐܶܬܼܓܿܠܺܝ ܥܕܼܰܡܳܐ ܠܗܳܫܳܐ܃ ܡܳܢܳܐ ܥܬܼܺܝܕܼܺܝܢܰܢ ܕܢܶܗܘܶܐ܂ ܝܳܕܼܥܺܝܢܰܢ ܕܶܝܢ ܕܡܳܐ ܕܶܐܬܼܓܿܠܺܝ܃ ܒܰܕܼܡܽܘܬܼܶܗ ܗܳܘܶܝܢܰܢ܂ ܘܚܳܙܶܝܢܰܢ ܠܶܗ ܐܰܝܟܼ ܡܶܕܶܡ ܕܺܐܝܬܼܰܘܗ̱ܝ܂
03:03 [ai]ܘܟܼܽܠ ܐܰܝܢܳܐ ܕܺܐܝܬܼ ܠܶܗ ܥܠܰܘܗ̱ܝ ܗܳܢܳܐ ܣܰܒܼܪܳܐ܃ ܡܕܼܰܟܿܶܐ ܢܰܦܼܫܶܗ ܐܰܝܟܼ ܕܗܽܘ ܕܟܶܐ ܗ̱ܽܘ܂
03:04 [ai]ܡܰܢ ܕܶܝܢ ܕܥܳܒܼܶܕܼ ܚܛܺܝܬܼܳܐ܃ ܥܰܘܠܳܐ ܣܳܥܰܪ܂ ܚܛܺܝܬܼܳܐ ܓܶܝܪ ܟܽܠܳܗ ܥܰܘܠܳܐ ܗ̱ܝ܂
03:05 [ai]ܘܝܳܕܼܥܺܝܢ ܐܢ̱ܬܿܽܘܢ܃ ܕܗܰܘ ܕܶܐܬܼܓܿܠܺܝ ܕܢܶܣܰܒܼ ܚܛܳܗܰܝܢ̈܂ ܘܰܚܛܺܝܬܼܳܐ ܒܶܗ ܠܰܝܬܿ܂
03:06 [ai]ܘܟܼܽܠ ܕܒܶܗ ܡܩܰܘܶܐ܃ ܠܳܐ ܚܳܛܶܐ܂ ܘܟܼܽܠ ܕܚܳܛܶܐ܃ ܠܳܐ ܚܙܳܝܗ̱ܝ܂ ܘܠܳܐ ܝܰܕܼܥܶܗ܀
03:07 [ai]ܒܢܰܝ܃ ܠܳܐ ܐ̱ܢܳܫ ܢܰܛܥܶܝܟܼܽܘܢ܂ ܗܰܘ ܕܥܳܒܼܶܕܼ ܙܰܕܿܺܝܩܽܘܬܼܳܐ܃ ܙܰܕܿܺܝܩܳܐ ܗܽܘ܃ ܐܰܝܟܼ ܕܳܐܦܼ ܗܽܘ ܡܫܺܝܚܳܐ ܐܺܝܬܼܰܘܗ̱ܝ ܙܰܕܿܺܝܩܳܐ܂
03:08 [ai]ܗܰܘ ܕܣܳܥܰܪ ܚܛܺܝܬܼܳܐ܃ ܡܶܢ ܣܳܛܳܢܳܐ ܗܽܘ܃ ܡܶܛܽܠ ܕܡܶܢ ܪܺܫܺܝܬܼܳܐ ܗܽܘ ܣܳܛܳܢܳܐ ܚܰܛܳܝܳܐ ܗܽܘ܂ ܘܡܶܛܽܠ ܗܳܢܳܐ ܐܶܬܼܚܙܺܝ ܒܪܶܗ ܕܰܐܠܳܗܳܐ܃ ܕܢܶܫܪܶܐ ܥܒܼܳܕܼܰܘܗ̱ܝ̈ ܕܣܳܛܳܢܳܐ܂
03:09 [ai]ܟܽܠ ܕܶܐܬܼܺܝܠܶܕܼ ܡܶܢ ܐܰܠܳܗܳܐ܃ ܚܛܺܝܬܼܳܐ ܠܳܐ ܥܳܒܼܶܕܼ܂ ܡܶܛܽܠ ܕܙܰܪܥܶܗ ܒܶܗ ܐܺܝܬܼܰܘܗ̱ܝ܂ ܘܠܳܐ ܡܶܫܟܿܰܚ ܠܡܶܚܛܳܐ܃ ܕܡܶܢ ܐܰܠܳܗܳܐ ܐܶܬܼܺܝܠܶܕܼ܂
03:10 [ai]ܒܗܳܕܼܶܐ ܡܶܬܼܦܿܰܪܫܺܝܢ ܒܢܰܘܗ̱ܝ ܕܰܐܠܳܗܳܐ܃ ܡܶܢ ܒܢܰܘܗ̱ܝ ܕܣܳܛܳܢܳܐ܂ ܟܽܠ ܕܠܳܐ ܥܳܒܼܶܕܼ ܙܰܕܿܺܝܩܽܘܬܼܳܐ ܘܠܳܐ ܡܰܚܶܒܼ ܠܰܐܚܽܘܗ̱ܝ܃ ܠܰܝܬܰܘܗ̱ܝ ܡܶܢ ܐܰܠܳܗܳܐ܂
03:11 [ai]ܕܗܳܢܰܘ ܦܽܘܩܕܳܢܳܐ ܕܰܫܡܰܥܬܿܽܘܢ ܡܶܢ ܩܕܼܺܝܡ܃ ܕܬܰܚܒܼܽܘܢ ܚܰܕܼ ܠܚܰܕܼ܂
03:12 [ai]ܠܰܘ ܐܰܝܟܼ ܩܳܐܝܶܢ܂ ܗܰܘ ܕܺܐܝܬܼܰܘܗ̱ܝ ܗ̱ܘܳܐ ܡܶܢ ܒܺܝܫܳܐ ܘܰܩܛܰܠ ܠܰܐܚܽܘܗ̱ܝ܂ ܘܡܶܛܽܠ ܡܳܢܳܐ ܩܰܛܠܶܗ܃ ܐܶܠܳܐ ܡܶܛܽܠ ܕܒܺܝܫܺܝܢ ܗ̱ܘܰܘ ܥܒܼܳܕܼܰܘܗ̱ܝ̈܃ ܘܕܼܰܐܚܽܘܗ̱ܝ ܙܰܕܿܺܝܩܺܝܢ܂
03:13 [ai]ܘܠܳܐ ܬܿܶܬܿܕܰܡܪܽܘܢ ܐܰܚܰܝ̈܃ ܐܶܢ ܣܳܢܶܐ ܠܟܼܽܘܢ ܥܳܠܡܳܐ܂
03:14 [ai]ܚܢܰܢ ܝܳܕܼܥܺܝܢܰܢ ܕܫܰܢܺܝܢܰܢ ܡܶܢ ܡܰܘܬܳܐ ܠܚܰܝ̈ܶܐ܃ ܒܗܳܕܼܶܐ ܕܡܰܚܒܼܺܝܢܰܢ ܠܰܐܚܰܝܢ̈܂ ܗܰܘ ܕܠܳܐ ܡܰܚܶܒܼ ܠܰܐܚܽܘܗ̱ܝ܃ ܡܩܰܘܶܐ ܒܡܰܘܬܳܐ܂
03:15 [ai]ܟܽܠ ܓܶܝܪ ܕܣܳܢܶܐ ܠܰܐܚܽܘܗ̱ܝ܃ ܩܳܛܶܠ ܐ̱ܢܳܫܳܐ ܗܽܘ܂ ܘܝܳܕܼܥܺܝܢ ܐܢ̱ܬܿܽܘܢ ܕܟܽܠ ܕܩܳܛܶܠ ܐ̱ܢܳܫܳܐ܃ ܠܳܐ ܡܶܫܟܿܚܺܝܢ ܡܩܰܘܶܝܢ ܒܶܗ ܚܰܝ̈ܶܐ ܕܰܠܥܳܠܰܡ܂
03:16 [ai]ܒܗܳܕܼܶܐ ܝܳܕܼܥܺܝܢܰܢ ܚܽܘܒܶܗ ܕܰܠܘܳܬܼܰܢ܃ ܕܗܽܘ ܝܰܗ̱ܒܼ ܢܰܦܼܫܶܗ ܚܠܳܦܼܰܝܢ܂ ܘܳܐܦܼ ܚܢܰܢ܂ ܙܳܕܼܶܩ ܠܰܢ܃ ܕܥܰܠ ܐܰܦܿܰܝ̈ ܐܰܚܰܝܢ̈ ܢܶܬܿܶܠ ܢܰܦܼܫܳܬܼܰܢ̈܂
03:17 [ai]ܘܰܐܝܢܳܐ ܕܺܐܝܬܼ ܠܶܗ ܩܶܢܝܳܢܳܐ ܕܥܳܠܡܳܐ܃ ܘܢܶܚܙܶܐ ܠܰܐܚܽܘܗ̱ܝ ܕܰܣܢܺܝܩ܃ ܘܢܶܐܚܽܘܕܼ ܪ̈ܰܚܡܰܘܗ̱ܝ ܡܶܢܶܗ܃ ܐܰܝܟܿܰܢܳܐ ܐܺܝܬܼ ܒܶܗ ܚܽܘܒܶܗ ܕܰܐܠܳܗܳܐ܀
03:18 [ai]ܒܢܰܝ܃ ܠܳܐ ܢܰܚܶܒܼ ܚܰܕܼ ܠܚܰܕܼ ܒܡܶܠܶܐ̈ ܘܰܒܠܶܫܳܢܳܐ܃ ܐܶܠܳܐ ܒܰܥܒܼܳܕܼܶܐ̈ ܘܒܼܰܫܪܳܪܳܐ܂
03:19 [ai]ܘܰܒܗܳܕܶܐ ܡܶܫܬܰܘܕܥܺܝܢܰܢ܃ ܕܡܶܢ ܫܪܳܪܳܐ ܐܺܝܬܼܰܝܢ܂ ܘܰܩܕܼܳܡ ܕܢܺܐܬܼܶܐ ܗܽܘ܃ ܡܦܿܺܝܣܺܝܢܰܢ ܠܶܒܰܢ܂
03:20 [ai]ܕܶܐܢ ܗܽܘ ܠܶܒܰܢ ܒܳܣܰܪ ܠܰܢ܃ ܟܡܳܐ ܐܰܠܳܗܳܐ ܕܪܰܒܿ ܡܶܢ ܠܶܒܰܢ ܘܝܳܕܼܰܥ ܟܽܠܡܶܕܶܡ ܿ܀ܿ܀ܿ
03:21 [ai]ܚܰܒܺܝܒܼܰܝ̈܃ ܐܶܢ ܠܶܒܰܢ ܠܳܐ ܒܳܣܰܪ ܠܰܢ܃ ܓܳܠܝܳܢ̈ ܐܶܢܶܝܢ̈ ܐܰܦܿܰܝܢ̈ ܩܕܼܳܡ ܐܰܠܳܗܳܐ܂
03:22 [ai]ܘܟܼܽܠܡܶܕܶܡ ܕܫܳܐܠܺܝܢܰܢ܃ ܢܳܣܒܺܝܢܰܢ ܡܶܢܶܗ܃ ܡܶܛܽܠ ܕܢܳܛܪܺܝܢܰܢ ܦܽܘܩܕܳܢܰܘܗ̱ܝ̈܃ ܘܫܰܦܿܺܝܪ̈ܳܬܼܳܐ ܣܳܥܪܺܝܢܰܢ ܩܕܼܳܡܰܘܗ̱ܝ܂
03:23 [ai]ܘܗܳܢܳܐ ܗ̱ܽܘ ܦܽܘܩܕܳܢܶܗ܃ ܕܰܢܗܰܝܡܶܢ ܒܰܫܡܳܐ ܕܰܒܼܪܶܗ ܝܶܫܽܘܥ ܡܫܺܝܚܳܐ܃ ܘܢܰܚܶܒܼ ܚܰܕܼ ܠܚܰܕܼ܂ ܐܰܝܟܼ ܕܦܰܩܕܿܰܢ܂
03:24 [ai]ܘܰܐܝܢܳܐ ܕܢܳܛܰܪ ܦܽܘܩܕܳܢܰܘܗ̱ܝ̈܃ ܒܶܗ ܡܶܬܼܢܛܰܪ܂ ܘܗܽܘ ܫܳܪܶܐ ܒܶܗ܂ ܘܰܒܗܳܕܶܐ ܡܶܣܬܿܰܟܠܺܝܢܰܢ ܕܫܳܪܶܐ ܒܰܢ܃ ܡܶܢ ܪܽܘܚܶܗ ܗܳܝ ܕܝܰܗ̱ܒܼ ܠܰܢ܀

next chapter