← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information
62062: 1Jn

Click on a word for lexical analysis.
Click on a red-colored coordinate for comments and/or translations of the line
View in Serto
Ask AI about a passage
Hide manuscript variants

previous chapter


04:01 [ai]ܚܰܒܺܝܒܼܰܝ̈܃ ܠܳܐ ܠܟܼܽܠ ܪ̈ܽܘܚܺܝܢ ܬܗܰܝܡܢܽܘܢ܂ ܐܶܠܳܐ ܗܘܰܝܬܿܽܘܢ ܦܳܪܫܺܝܢ ܪ̈ܽܘܚܶܐ܃ ܐܶܢ ܡܶܢ ܐܰܠܳܗܳܐ ܐܺܝܬܼܰܝܗܶܝܢ܂ ܡܶܛܽܠ ܕܣܰܓܿܺܝܶܐܐ̈ ܢܒܼܺܝܶܐ̈ ܕܰܓܳܠܶܐ̈ ܢܦܼܰܩܘ ܒܶܗ ܒܥܳܠܡܳܐ܂
04:02 [ai]ܒܗܳܕܼܶܐ ܡܶܬܼܝܰܕܼܥܳܐ ܪܽܘܚܶܗ ܕܰܐܠܳܗܳܐ܂ ܟܽܠ ܪܽܘܚܳܐ ܕܡܰܘܕܿܝܳܢ ܕܝܶܫܽܘܥ ܡܫܺܝܚܳܐ ܐܶܬܼܳܐ ܒܰܒܼܣܰܪ܃ ܡܶܢ ܐܰܠܳܗܳܐ ܗ̱ܝ܂
04:03 [ai]ܘܟܼܽܠ ܪܽܘܚܳܐ ܕܠܳܐ ܡܰܘܕܿܝܳܐ ܕܝܶܫܽܘܥ ܐܶܬܼܳܐ ܒܰܒܼܣܰܪ܃ ܠܰܝܬܿܶܝܗ ܡܶܢ ܐܰܠܳܗܳܐ܂ ܐܶܠܳܐ ܗܳܕܼܶܐ ܡܶܢ ܡܫܺܝܚܳܐ ܗ̱ܝ ܕܰܓܿܳܠܳܐ܃ ܗܰܘ ܕܰܫܡܰܥܬܿܽܘܢ ܕܳܐܬܼܶܐ܂ ܘܗܳܫܳܐ ܒܥܳܠܡܳܐ ܐܺܝܬܼܰܘܗ̱ܝ ܡܶܢ ܟܰܕܿܽܘ܂
04:04 [ai]ܐܰܢ̱ܬܿܽܘܢ ܕܶܝܢ ܡܶܢ ܐܰܠܳܗܳܐ ܐܺܝܬܼܰܝܟܿܽܘܢ ܒܢܰܝܳܐ܃ ܘܰܙܟܼܰܝܬܿܽܘܢ ܐܶܢܽܘܢ܂ ܡܶܛܽܠ ܕܪܰܒܿ ܗܰܘ ܕܰܒܼܟܼܽܘܢ܃ ܡܶܢ ܗܰܘ ܕܰܒܼܥܳܠܡܳܐ܂
04:05 [ai]ܘܗܳܠܶܝܢ ܡܶܢ ܥܳܠܡܳܐ ܐܶܢܽܘܢ܂ ܡܶܛܽܠ ܗܳܢܳܐ ܡܶܢ ܥܳܠܡܳܐ ܡܡܰܠܠܺܝܢ܃ ܘܥܳܠܡܳܐ ܠܗܽܘܢ ܫܳܡܰܥ܂
04:06 [ai]ܚܢܰܢ ܕܶܝܢ ܡܶܢ ܐܰܠܳܗܳܐ ܚܢܰܢ܂ ܘܗܰܘ ܕܝܳܕܼܰܥ ܠܰܐܠܳܗܳܐ܃ ܫܳܡܰܥ ܠܰܢ܂ ܘܗܰܘ ܕܠܳܐ ܐܺܝܬܼܰܘܗ̱ܝ ܡܶܢ ܐܰܠܳܗܳܐ܃ ܠܳܐ ܫܳܡܰܥ ܠܰܢ܂ ܒܿܳܗ ܒܗܳܕܼܶܐ܂ ܡܶܣܬܿܰܟܠܺܝܢܰܢ ܠܪܽܘܚܳܐ ܕܰܫܪܳܪܳܐ܃ ܘܰܠܪܽܘܚܳܐ ܕܡܰܛܥܝܳܢܽܘܬܼܳܐ܀
04:07 [ai]ܚܰܒܺܝܒܼܰܝ̈܃ ܢܰܚܶܒܼ ܚܰܕܼ ܠܚܰܕܼ܃ ܡܶܛܽܠ ܕܚܽܘܒܿܳܐ ܡܶܢ ܐܰܠܳܗܳܐ ܗܽܘ܂ ܘܟܼܽܠ ܡܰܢ ܕܡܰܚܶܒܼ܃ ܡܶܢ ܐܰܠܳܗܳܐ ܺܝܠܺܝܕܼ܃ ܘܝܳܕܼܰܥ ܠܰܐܠܳܗܳܐ܂
04:08 [ai]ܡܶܛܽܠ ܕܰܐܠܳܗܳܐ ܚܽܘܒܿܳܐ ܗܽܘ܂ ܘܟܼܽܠ ܕܠܳܐ ܡܰܚܶܒܼ܃ ܠܳܐ ܝܳܕܼܰܥ ܠܰܐܠܳܗܳܐ܂
04:09 [ai]ܒܗܳܕܼܶܐ ܐܶܬܼܺܝܕܼܰܥ ܚܽܘܒܶܗ ܕܰܐܠܳܗܳܐ ܕܰܠܘܳܬܼܰܢ܃ ܕܠܰܒܼܪܶܗ ܺܝܚܺܝܕܼܳܝܳܐ ܫܰܕܿܰܪ ܐܰܠܳܗܳܐ ܠܥܳܠܡܳܐ ܕܢܺܚܶܐ ܒܺܐܝܕܼܶܗ܂
04:10 [ai]ܒܗܳܢܳܐ ܐܺܝܬܼܰܘܗ̱ܝ ܚܽܘܒܿܳܐ܃ ܠܳܐ ܗ̱ܘܳܐ ܕܰܚܢܰܢ ܐܰܚܶܒܼܢ ܠܰܐܠܳܗܳܐ܃ ܐܶܠܳܐ ܗܽܘ ܐܰܚܒܼܰܢ܃ ܘܫܰܕܿܰܪ ܠܰܒܼܪܶܗ ܚܽܘܣܳܝܳܐ ܥܰܠ ܐܰܦܿܰܝ̈ ܚܛܳܗܰܝܢ̈܀
04:11 [ai]ܚܰܒܺܝܒܼܰܝ̈܃ ܐܶܢ ܗܳܟܼܰܢܳܐ ܐܰܚܒܼܰܢ ܐܰܠܳܗܳܐ܃ ܐܳܦܼ ܚܢܰܢ ܚܰܝܳܒܼܺܝܢܰܢ ܚܰܕܼ ܠܚܰܕܼ ܠܡܰܚܳܒܼܽܘ܂
04:12 [ai]ܠܰܐܠܳܗܳܐ ܡܶܡܬܼܽܘܡ ܐ̱ܢܳܫ ܠܳܐ ܚܙܳܝܗ̱ܝ܂ ܐܶܢ ܕܶܝܢ ܢܰܚܶܒܼ ܚܰܕܼ ܠܚܰܕܼ܃ ܐܰܠܳܗܳܐ ܒܰܢ ܡܩܰܘܶܐ܃ ܘܚܽܘܒܶܗ ܡܶܫܬܿܰܡܠܶܐ ܒܰܢ܂
04:13 [ai]ܘܰܒܗܳܕܶܐ ܝܳܕܼܥܺܝܢܰܢ܂ ܕܒܶܗ ܡܩܰܘܶܝܢܰܢ܃ ܘܗܽܘ ܡܩܰܘܶܐ ܒܰܢ܃ ܕܡܶܢ ܪܽܘܚܶܗ ܝܰܗ̱ܒܼ ܠܰܢ܂
04:14 [ai]ܘܰܚܢܰܢ ܚܙܰܝܢ ܘܡܰܣܗܕܼܺܝܢܰܢ܃ ܕܰܐܒܼܳܐ ܫܰܕܿܰܪ ܠܰܒܼܪܶܗ ܦܳܪܽܘܩܳܐ ܠܥܳܠܡܳܐ܂
04:15 [ai]ܟܽܠ ܕܡܰܘܕܿܶܐ ܒܝܶܫܽܘܥ ܕܗܽܘܝܽܘ ܒܪܶܗ ܕܰܐܠܳܗܳܐ܃ ܐܰܠܳܗܳܐ ܒܶܗ ܡܩܰܘܶܐ܂ ܘܗܽܘ ܡܩܰܘܶܐ ܒܰܐܠܳܗܳܐ܂
04:16 [ai]ܘܰܚܢܰܢ ܗܰܝܡܶܢܢ ܘܺܝܕܼܰܥܢ ܚܽܘܒܿܳܐ܃ ܕܺܐܝܬܼ ܠܶܗ ܠܰܐܠܳܗܳܐ ܨܶܐܕܼܰܝܢ܂ ܐܰܠܳܗܳܐ ܓܶܝܪ ܚܽܘܒܿܳܐ ܗܽܘ܂ ܘܟܼܽܠ ܕܰܡܩܰܘܶܐ ܒܚܽܘܒܿܳܐ܃ ܒܰܐܠܳܗܳܐ ܡܩܰܘܶܐ܂
04:17 [ai]ܘܰܒܗܳܕܶܐ ܡܶܫܬܿܰܠܰܡ ܚܽܘܒܶܗ ܥܰܡܰܢ܃ ܕܓܰܠܝܽܘܬܼ ܐܰܦܿܶܐ̈ ܬܶܗܘܶܐ ܠܰܢ ܒܝܰܘܡܳܐ ܕܕܼܺܝܢܳܐ܂ ܡܶܛܽܠ ܕܰܐܝܟܼ ܕܰܗܘܳܐ ܗܽܘ܃ ܗܳܟܼܰܢܳܐ ܐܳܦܼ ܚܢܰܢ ܐܺܝܬܼܰܝܢ ܒܗܳܢܳܐ ܥܳܠܡܳܐ܂
04:18 [ai]ܕܶܚܠܬܼܳܐ ܒܚܽܘܒܿܳܐ ܠܰܝܬܿ܂ ܐܶܠܳܐ ܚܽܘܒܿܳܐ ܡܫܰܡܠܝܳܐ܃ ܠܒܼܰܪ ܫܳܕܼܶܐ ܠܳܗ ܠܕܼܶܚܠܬܼܳܐ܃ ܡܶܛܽܠ ܕܕܼܶܚܠܬܼܳܐ ܒܩܶܢܛܳܐ ܐܺܝܬܼܶܝܗ܂ ܗܰܘ ܕܶܝܢ ܕܕܼܳܚܶܠ܃ ܠܳܐ ܡܫܰܡܠܰܝ ܒܚܽܘܒܿܳܐ܂
04:19 [ai]ܚܢܰܢ ܗܳܟܼܺܝܠ ܢܰܚܶܒܼ ܠܰܐܠܳܗܳܐ܃ ܡܶܛܽܠ ܕܗܽܘ ܩܰܕܼܡܳܝܰܬܼ ܐܰܚܒܼܰܢ܂
04:20 [ai]ܐܶܢ ܕܶܝܢ ܐ̱ܢܳܫ ܢܺܐܡܰܪ ܕܡܰܚܶܒܼ ܐ̱ܢܳܐ ܠܰܐܠܳܗܳܐ܃ ܘܠܰܐܚܽܘܗ̱ܝ ܣܳܢܶܐ܃ ܕܰܓܿܳܠܳܐ ܗܽܘ܂ ܗܰܘ ܓܶܝܪ ܕܠܰܐܚܽܘܗ̱ܝ ܕܡܶܬܼܚܙܶܐ ܠܳܐ ܡܰܚܶܒܼ܃ ܠܰܐܠܳܗܳܐ ܗܰܘ ܕܠܳܐ ܡܶܬܼܚܙܶܐ܂ ܐܰܝܟܿܰܢܳܐ ܡܶܫܟܿܰܚ ܕܢܰܚܶܒܼ܂
04:21 [ai]ܘܗܳܢܳܐ ܦܽܘܩܕܳܢܳܐ ܩܰܒܿܶܠܢ ܡܶܢܶܗ܃ ܕܟܽܠ ܕܡܰܚܶܒܼ ܠܰܐܠܳܗܳܐ܃ ܢܰܚܶܒܼ ܐܳܦܼ ܠܰܐܚܽܘܗ̱ܝ܂

next chapter