The Comprehensive Aramaic Lexicon

05:01 [ai]	ܘܐܬܐܡܪ ܠܐܠܦܪܢܐ ܪܒ ܚܝܠܐ ܕܐܬܘܪ܂ ܕܐܬܘܥܕܘ ܒ̈ܢܝ ܐܝܣܪܝܠ ܠܩܪܒܐ܂ ܘܡܥܠܢܐ ܕܛܘܪܐ ܐܚܕܘ܂ ܘܥܫܢܘ ܟܠ ܪܝܫܝ ܛܘܪ̈ܐ ܪ̈ܡܐ܂ ܘܝܗܒܘ ܟܡܐ̈ܢܐ ܒܚܩ̈ܠܬܐ
05:02 [ai]	ܘܐܬܚܡܬ ܪܘܓܙܗ ܕܐܠܦܪܢܐ ܛܒ܂ ܘܩܪܐ ܠܟܠܗܘܢ ܪ̈ܘܪܒܢܐ ܕܡܘܐܒ܂ ܘܠܫ̈ܠܝܛܢܐ ܕܒ̈ܢܝ ܥܡܘܢ܂ ܘܠܟܠܗܘܢ ܪ̈ܝܫܝ ܡܕܝܢ̈ܬܐ ܕܥܠ ܝܕ ܝܡܐ܂
05:03 [ai]	ܘܐܡܪ ܠܗܘܢ܂ ܐܡܪܘ ܠܝ ܒ̈ܢܝ ܟܢܥܢ܂ ܡܢܘ ܥܡܐ ܗܢܐ ܕܝܬܒܝܢ ܒܛܘܪܐ܂ ܘܡܢܐ ܐ̈ܢܝܢ ܡܕܝܢ̈ܬܐ ܘܣܘܓܐܬ ܚܝܠܗܘܢ܂ ܘܡܢܐ ܚܝܠܗܘܢ ܘܥܘܫܢܗܘܢ܂ ܘܡܢܘ ܪܒܐ ܕܩܐܡ ܥܠܝܗܘܢ܂
05:04 [ai]	ܘܠܡܢܐ ܠܐ ܨܒܘ ܠܡܐܬܐ ܠܐܘܪܥܝ܂ ܝܬܝܪ ܡܢ ܟܘܠ ܐܝܠܝܢ ܕܥܡܪܝܢ ܒܡܥܪ̈ܐ܂
05:05 [ai]	ܘܐܡܪ ܠܗ ܐܚܝܘܕ ܪܒܐ ܕܒ̈ܢܝ ܥܡܗܘܢ ܃ ܢܫܡܥ ܡܪܝ ܡܠܬ ܦܘܡܐ ܕܥܒܕܗ܂ ܘܐܡܪ ܠܟ ܫܪܝܪܐܝܬ܂ ܥܠ ܥܡܐ ܕܥܡܪ ܥܠ ܓܒܟ ܒܛܘܪܐ ܗܢܐ܂ ܘܠܐ ‍{‍ܘܠܐ‍}‍ ܬܦܘܩ ܡܠܬܐ ܕܓܠܬܐ ܡܢ ܦܘܡܗ ܕܥܒܕܟ܂
05:06 [ai]	ܡܛܠ ܕܥܡܐ ܗܢܐ ܡܢ ܛܘܗܡܐ ܗܘ ܕܟ̈ܠܕܝܐ܂
05:07 [ai]	ܘܝܬܒ ܠܘܩܕܡ ܒܝܬ ܢܗܪ̈ܘܬܐ܂ ܡܛܠ ܕܠܐ ܨܒܘ ܠܡܐܙܠ ܒܬܪ ܐܠܗ̈ܐ ܕܐܒܗ̈ܝܗܘܢ ܃ ܕܗܘܘ ܡܝܩܪܝܢ ܒܐܪܥܐ ܕܟ̈ܠܕܝܐ܂
05:08 [ai]	ܐܠܐ ܣܛܘ ܡܢ ܐܠܗ̈ܐ ܕܐܒܗ̈ܝܗܝܢ ܃ ܘܣܓܕܘ ܠܐܠܗܐ ܕܫܡܝܐ܂ ܠܐܠܗܐ ܕܝܕܥܘܗܝ܂ ܘܐܦܩ ܐܢܘܢ ܡܢ ܩܕܡ ܐܠܗ̈ܝܗܘܢ ܃ ܘܥܪܩܘ ܠܒܝܬ ܢܗܪ̈ܘܬܐ܂ ܘܥܡܪܘ ܬܡܢ ܝܘܡ̈ܬܐ ܣܓܝܐ̈ܐ܂
05:09 [ai]	ܘܐܡܪ ܠܗܘܢ ܐܠܗܗܘܢ܂ ܕܢܦܩܘܢ ܡܢ ܒܝܬ ܝܪ̈ܬܘܬܗܘܢ ܃ ܠܡܐܙܠ ܠܐܪܥܐ ܕܟܢܥܢ܂ ܘܥܡܪܘ ܬܡܢ ܘܥܬܪܘ ܒܕܗܒܐ ܘܒܟܣܦܐ܂ ܘܒܒܥܝܪ̈ܐ ܣܘܓܐ̈ܐ ܕܛܒ܂
05:10 [ai]	ܘܢܚܬܘ ܠܡܨܪܝܢ ܡܛܠ ܟܦܢܐ ܕܗܘܐ ܒܐܪܥܐ ܕܟܢܥܢ܂ ܘܝܬܒܘ ܬܡܢ ܘܐܬܬܪܣܝܘ܂ ܘܣܓܝܘ ܬܡܢ ܛܒ܂ ܘܠܝܬ ܗܘܐ ܡ̈ܢܝܢ ܠܫܪ̈ܒܬܗܘܢ ܃
05:11 [ai]	ܘܩܡܘ ܥܠܝܗܘܢ ܡܨܪ̈ܝܐ܂ ܘܐܬܚܟܡܘ ܠܗܘܢ܂ ܘܫܥܒܕܘ ܐܢܘܢ ܒܛܝܢܐ ܘܒܠܒ̈ܢܐ܂ ܘܡܟܟܘܗܝ ܠܥܡܐ ܕܥܒܕܘ ܐܢܘܢ ܥܒ̈ܕܐ܂
05:12 [ai]	ܘܓܥܘ ܠܘܬ ܐܠܗܗܘܢ܂ ܘܡܚܐ ܠܟܘܠܗ ܐܪܥܐ ܕܡܨܪܝܢ܂ ܒ‍<‍ܡ‍>‍ܚ‍{‍ܘ‍}‍ܘ̈ܬܐ ܕܠܝܬ ܠܗܝܢ ܐܣܝܘ܂ ܘܐܦܩܘ ܐܢܘܢ ܡܨܪ̈ܝܐ ܡܢ ܐܪܥܗܘܢ ܃
05:13 [ai]	ܘܐܘܒܫ ܐܠܗܐ ܝܡܐ ܕܣܘܦ ܡܢ ܩܕܡܝܗܘܢ ܃
05:14 [ai]	ܘܐܝܬܝ ܐܢܘܢ ܠܐܘܪܚܐ ܕܛܘܪ ܣܝܢܝ܂ ܘܠܩܕܫ܂ ܘܐܦܩܘ ܠܟܠܗܘܢ ܥܡܘܪ̈ܐ ܕܡܕܒܪܐ܂
05:15 [ai]	ܘܠܟܠ ܕܥܡܪܝܢ ܒܐܪܥܐ ܕܐܡܘܪ̈ܝܐ܂ ܘܠܒ̈ܢܝ ܚܫܒܘܢ ܐܘܒܕܘ ܒܥܘܫܢܗܘܢ ܃ ܘܥܒܪܘ ܝܘܪܕܢܢ܂ ܘܝܪܬܘ ܟܠ ܛܘܪ̈ܐ܂
05:16 [ai]	ܘܐܦܩܘ ܡܢ ܩܕܡܝܗܘܢ܂ ܠܟܢܥ̈ܢܝܐ ܘܠܦܪ̈ܙܝܐ܂ ܘܠܚܘ̈ܝܐ ܘܠܝܒܘܣ̈ܝܐ܂ ܘܠܟܠܗܘܢ ܓܪ̈ܓܘܣܝܐ܂ ܘܥܡܪܘ ܒܗ ܝܘܡ̈ܬܐ ܣܓܝ̈ܐܐ܂
05:17 [ai]	ܘܟܡܐ ܕܠܐ ܚܛܝܢ ܗܘܘ ܩܕܡ ܐܠܗܗܘܢ܂ ܥܡܗܘܢ ܗܘ̈ܝ ܛܒ̈ܬܐ܂ ܡܛܠ ܕܐܠܗܐ ܗܘ ܕܣܢܐ ܥܘܠܐ܂
05:18 [ai]	ܘܟܕ ܥܒܪܘ ܥܠ ܐܘܪܚܐ ܕܦܩܕ ܐܢܘܢ܂ ܐܘܒܕܘ ܒܩܪ̈ܒܐ ܣܓ̈ܝܐܐ܂ ܘܐܫܬܒܝܘ ܠܐܪܥܐ ܕܠܐ ܕܝܠܗܘܢ ܃ ܘܗܝܟܠܗ ܕܐܠܗܗܘܢ ܗܘܐ ܠܕܝܫܐ܂ ܘܡܕܝܢܬܗܘܢ ܐܬܬܚܕܬ ܡܢ ܒܥܠܕܒ̈ܒܐ܂
05:19 [ai]	ܘܗܫܐ ܐܬܦܢܝܘ ܠܘܬ ܐܠܗܗܘܢ܂ ܘܐܬܟܢܫܘ ܡܢ ܐܬܪ̈ܘܬܐ ܕܐܬܒܕܪܘ ܠܬܡܢ܂ ܘܐܫܬܠܛܘ ܒܐܘܪܫܠܡ ܐܬܪ ܕܒܝܬ ܡܩܕܫܗܘܢ ܬܡܢ܂ ܘܥܡܪܘ ܒܛܘܪܐ ܕܚܪܒ ܗܘܐ܂
05:20 [ai]	ܘܗܫܐ ܡܪܝ ܐܢ ܐܝܬ ܚܛܗܐ ܒܥܡܐ ܗܢܐ ܘܡܣܟܠܝܢ ܒܐܠܗܗܘܢ ܢܬܪܥܐ ܕܗܘܝܐ ܠܗܘܢ ܠܬܘܩܠܬܐ ܗܕܐ܂ ܘܢܣܩ ܘܢܩܪܒ ܥܡܗܘܢ ܃
05:21 [ai]	ܘܐܢ ܠܝܬ ܥܘܠܐ ܒܥܡܗܘܢ܂ ܢܥܒܪ ܐܢܘܢ ܡܪܝ܂ ܕܠܡܐ ܢܣܝܥ ܐܢܘܢ ܐܠܗܗܘܢ ܃ ܘܢܗܘܐ ܚܣܕܐ ܥܠ ܐ̈ܦܝ ܟܠܗ ܐܪܥܐ܂
05:22 [ai]	ܘܗܘܐ ܕܟܕ ܫܠܝ ܐܚܝܘܕ ܡܢ ܕܠܡܡܠܠܘ ܦܬܓܡ̈ܐ ܗܠܝܢ܂ ܪܛܢܘ ܟܠܗ ܥܡܐ ܕܩܝܡܝܢ ܚܕܪ ܡܫܟܢܐ܂ ܘܐܡܪܘ ܪ̈ܘܪܒܢܐ ܕܐܠܦܪܢܐ܂ ܘܥܡܘܪ̈ܐ ܕܥܠ ܓܢܒ ܝܡܐ܂ ܘܥܡܘܪ̈ܝܗ ܕܡܘܐܒ ‍{‍ܠܡܦܩ‍}‍ ܠܡܦܩܘܬܗ ܠܐܚܝܘܕ܂
05:23 [ai]	ܡܛܠ ܕܐܡܪܘ ܠܐ ܕܚܠܝܢܢ ܡܢ ܒ̈ܢܝ ܐܝܣܪܝܠ܂ ܥܡܐ ܗܘ ܓܝܪ ܕܠܝܬ ܒܗ ܚܝܠܐ ܠܩܪܒܐ܂
05:24 [ai]	ܡܛܠ ܗܢܐ ܢܣܩ ܥܠܝܗܘܢ ܃ ܘܢܗܘܘܢ ܠܚܝܠܟ ܡܪܢ ܐܠܦܪܢܐ܂

next chapter