The Comprehensive Aramaic Lexicon

07:01 [ai]	ܘܠܝܘܡܐ ܐܚܪܢܐ ܦܩܕ ܐܠܦܪܢܐ ܠܟܠܗ ܚܝܠܗ܂ ܘܠܟܠ ܕܐܬܘ ܥܡܗ ܠܥܕܪܗ܂ ܕܢܫܩܠܘܢ ܠܒܝܬ ܦܠܘ܂ ܘܠܡܐܚܕ ܟܠ ܡܣ̈ܩܢܐ ܕܛܘܪ̈ܐ܂ ܘܠܡܩܪܒܘ ܥܡ ܒ̈ܢܝ ܐܝܣܪܝܠ܂
07:02 [ai]	ܘܫܩܠܘ ܒܝܘܡܐ ܗܘ ܟܠܗܘܢ ܓܒܪ̈ܐ ܘܟܠܗ ܚܝܠܗܘܢ܂ ܡܐܐ ܘܫܒܥܝܢ ܘܬܪ̈ܝܢ ܐܠܦ̈ܝܢ܂ ܘܦܪ̈ܫܐ ܥܣܪܝܢ ܘܬܪ̈ܝܢ ܐܠܦ̈ܝܢ܂ ܣܛܪ ܡܢ ܝܩܪܬܗܘܢ ܘܣܛܪ ܡܢ ܐܢ̈ܫܐ ܕܢܩܦܘ ܠܗܘܢ ܣܘܓܐܐ ܕܛܒ܂
07:03 [ai]	ܘܫܪܘ ܒܐܘܠܘܢܐ ܕܥܠ ܓܢܒ ܡܕܝܢܬܐ܂ ܥܠ ܥܝܢܐ ܕܡ̈ܝܐ܂ ܘܗܘܐ ܦܬܝܗ ܕܡܫܪܝܬܐ ܡܢ ܪܘܬܝܡ܂ ܘܥܕܡܐ ܠܐܒܠ ܡܚܘܠܐ܂ ܘܐܘܪܟܗ ܥܕܡܐ ܠܩܪܡܘܢ ܕܠܘܩܒܠ ܐܝܙܪܥܐܝܠ܂
07:04 [ai]	ܘܒ̈ܢܝ ܐܝܣܪܝܠ ܟܕ ܚܙܘ ܣܘܓܐܗܘܢ ܐܬܕܠܚܘ ܛܒ܂ ܘܐܡܪܘ ܐܢܫ ܠܩܪܝܒܗ܂ ܗܫܐ ܐܦ ܠܐ ܟܠ ܐ̈ܦܝ ܐܪܥܐ܂ ܘܐܦܠܐ ܛܘܪ̈ܐ ܪ̈ܡܐ܂ ܘܐܦ ܠܐ ܪ̈ܡܬܐ ܢܣܝܒܪܘܢ ܝܘܩܪ‍{‍ܢ‍}‍ܗܘܢ܂
07:05 [ai]	ܘܫܩܠܘ ܓܒܪ ܡܐ̈ܢܝ ܩܪܒܗ܂ ܘܐܘܚܕܘ ܢܘܪܐ ܒܡ̈ܓܕܠܐ ܕܫܘܪ̈ܝܗܘܢ ܃ ܘܗܘܘ ܢܛܪܝܢ ܟܠܗ ܠܠܝܐ ܗܘ܂
07:06 [ai]	ܘܠܝܘܡܐ ܕܬܪܝܢ܂ ܐܦܩ ܐܠܦܪܢܐ ܟܘܠܗ ܚܝܠܗ܂ ܠܘܩܒܠ ܒ̈ܢܝ ܐܝܣܪܝܠ ܕܝܬܒܝܢ ܗܘܘ ܒܝܬ ܦܠܘ܂
07:07 [ai]	ܘܓܫܘ ܡܣܩܢܐ ܕܡܕܝܢܬܐ܂ ܘܗܠܟܘ ܥܠ ܥ̈ܝܢܬܐ ܕܡܝܐ܂ ܘܐܚܕܘ ܐ̈ܢܝܢ܂ ܘܦܠܓܘ ܐܢ̈ܝܢ ܠܟܠ ܡܫܪ̈ܝܬܐ ܕܓܒܪ̈ܐ ܚܝܠܬܢܐ܂ ܘܗܘ ܗܦܟ ܠܘܬ ܥܡܗ܂
07:08 [ai]	ܘܩܪܒܘ ܠܗ ܟܠܗܘܢ ܪ̈ܘܪܒܢܐ ܕܒ̈ܢܝ ܥܣܘ܂ ܘܟܠ ܫ̈ܠܝܛܐ ܕܡܘܐܒ܂ ܪ̈ܝܫܝ ܡܕܝܢܬܐ܂ ܕܥܠ ܓܒ ܝܡܐ܂ ܘܐܡܪܘ ܠܗ܂
07:09 [ai]	ܢܫܡܥ ܡܪܢ ܦܬܓܡܐ ܗܢܐ܂ ܕܠܐ ܢܗܘܐ ܬܒܪܐ ܒܚܝܠܟ܂
07:10 [ai]	ܡܛܠ ܕܥܡܐ ܗܢܐ ܠܐ ܬܟܝܠ ܥܠ ܢܝܙܟܐ܂ ܐܠܐ ܥܠ ܪܘܡܐ ܕܛܘܪ̈ܐ ܕܗܢܘܢ ܥܡܪܝܢ ܒܗܘܢ ܬܟܝܠܝܢ܂ ܡܛܠ ܕܠܐ ܗܘܐ ܦܫܝܩ ܠܡܬܩܪܒܘ ܠܪ̈ܫܝܗܘܢ ܕܛܘܪ̈ܐ܂
07:11 [ai]	ܗܫܐ ܡܪܢ ܠܐ ܬܩܪܒ ܥܡܗܘܢ ܐܝܟ ܕܡܬܥܒܕ ܩܪܒܐ܂ ܘܠܐ ܢܦܠ ܓܒܪ ܡܢ ܥܡܟ܂
07:12 [ai]	ܐܠܐ ܩܘܐ ܒܡܫܪܝܬܟ܂ ܘܢܛܪ ܟܠܗܘܢ ܓܒܪ̈ܐ ܕܚܝܠܟ ܘܢܐܚܕܘܢ ܥ̈ܒܕܝܟ ܥܝܢܐ ܕܡܝ̈ܐ܂ ܕܢܦܩܐ ܡܢ ܬܚܝܬ ܥܩܪܗ ܕܛܘܪܐ܂
07:13 [ai]	ܡܛܠ ܕܡܢ ܬܡܢ ܡܠܝܢ ܟܠܗܘܢ ܥܡܘܪ̈ܝܗ ܕܒܝܬ ܦܠܘ܂ ܘܢܣܝܦ ܐܢܘܢ ܨܗܝܐ܂ ܘܢܫܠܡܘܢ ܡܕܝ̈ܢܬܗܘܢ ܃ ܘܚܢܢ ܕܥܡܟ ܢܣܩ ܠܪ̈ܝܫܝ ܛܘܪ̈ܐ ܕܩܪܝܒܝܢ ܠܢ܂ ܘܢܫܪܐ ܥܠܝܗܘܢ ܃ ܘܢܬܢܛܪܘܢ ܕܠܐ ܢܦܘܩ ܡܢ ܡܕܝܢܬܐ܂ ܐܦ ܠܐ ܐܢܫ܂
07:14 [ai]	ܘܢܣܘܦܘܢ ܒܟܦܢܐ ܘܒܨܗܝܐ܂ ܗܢܘܢ ܘܢܫ̈ܝܗܘܢ ܘܒܢܝܗܘܢ܂ ܥܕ ܐܬܝܐ ܥܠܝܗܘܢ ܚܪܒܐ ܘܢܦܠܝܢ ܒܫܘܩ̈ܐ܂
07:15 [ai]	ܘܬܦܪܘܥ ܐܢܘܢ ܦܘܪܥܢܐ ܒܝܫܐ܂ ܥܠ ܕܐܣܠܝܘܟ ܘܠܐ ܢܦܩܘ ܠܐܘܪܥܟ ܒܫܠܡܐ܂
07:16 [ai]	ܘܫܦܪܘ ܦܬܓܡ̈ܝܗܘܢ ܩܕܡ ܐܠܦܪܢܐ ܘܩܕܡ ܟܠܗܘܢ ܥܒܕܘܗܝ ܘܦܩܕ ܕܢܗܘܐ ܐܝܟ ܕܐܡܪܘ܂
07:17 [ai]	ܘܫܩܠܬ ܡܫܪܝܬܐ ܕܒ̈ܢܝ ܡܘܐܒ܂ ܘܥܡܗܘܢ ܚܡܫܐ ܐ̈ܠܦܝܢ ܪ̈ܓܠܝܐ ܡܢ ܒܢ̈ܝ ܐܬܘܪ܂ ܘܫܪܘ ܒܐܘܠܘܢܐ܂ ܘܐܚܕܘ ܡ̈ܝܐ ܕܥܝܢ̈ܬܐ ܕܒ̈ܢܝ ܐܝܣܪܝܠ܂
07:18 [ai]	ܘܣܠܩܘ ܒ̈ܢܝ ܥܣܘ ܘܒ̈ܢܝ ܥܡܘܢ܂ ܘܥܡܗܘܢ ܡܢ ܒܢ̈ܝ ܐܬܘܪ܂ ܬܪܥܣܪ ܐ̈ܠܦܝܢ܂ ܘܫܪܘ ܒܛܘܪܐ ܕܠܘܩܒܠ ܪܘܬܝܡ܂ ܘܫܪܘ ܡܢܗܘܢ ܠܬܝܡܢܐ ܘܠܡܕܢܚܐ܂ ܠܘܩܒܠ ܥܩܪܒܘܬ ܕܠܘܩܒܠ ܟܘܫ܂ ܕܥܠ ܢܚܠܐ ܕܦܥܘܪ܂ ܘܫܪܟܐ ܕܚܝܠܐ ܕܒ̈ܢܝ ܐܬܘܪ ܫܪܘ ܒܦܩܥܬܐ܂ ܘܟܣܝܘ ܐ̈ܦܝܗ ܕܐܪܥܐ܂ ܘܡܫ̈ܟܢܝܗܘܢ ܘܡܐ̈ܢܝܗܘܢ ܫܪܝܢ ܒܝܢܬܗܘܢ ܃ ܣܓܝܐ̈ܝܢ ܗܘܘ ܛܒ܂
07:19 [ai]	ܘܒ̈ܢܝ ܐܝܣܪܝܠ ܓܥܘ ܠܘܬ ܐܠܗܗܘܢ܂ ܘܐܬܟܪܝܬ ܪܘܚܗܘܢ ܃ ܡܛܠ ܕܚܕܪܘ ܐܢܘܢ ܒܥܠܕ̈ܒܒܝܗܘܢ ܃ ܘܠܝܬ ܗܘܐ ܠܡܥܪܩ ܡܢ ܒܝܢܬܗܘܢ ܃
07:20 [ai]	ܘܩܘܝܘ ܚܕܪ̈ܝܗܘܢ ܡܫܪ̈ܝܬܐ ܕܒ̈ܢܝ ܐܬܘܪ܂ ܪ̈ܓܠܝܐ ܘܡܪ̈ܟܒܬܐ ܘܦܪ̈ܫܐ܂ ܬܪ̈ܝܢ ܝܪ̈ܚܝܢ ܘܐܪ̈ܒܥܐ ܝܘܡ̈ܝܢ܂ ܘܣܦܩܘ ܥܡܘܪ̈ܐ ܕܒܝܬ ܦܠܘ ܓܘ̈ܒܐ ܕܡܝ̈ܝܗܘܢ ܃
07:21 [ai]	ܘܓܪ̈ܒܝܗܘܢ ܐܣܬܦܩܘ܂ ܘܠܐ ܐܫܬܚܪ ܠܗܘܢ ܡ̈ܝܐ ܠܡܫܬܐ܂ ܘܐܬܛܪܦܘ ܝܠܘ̈ܕܝܗܘܢ ܘܢܫ̈ܝܗܘܢ܂ ܕܠܐ ܐܫܬܚܪܘ ܠܗܘܢ ܡ̈ܝܐ ܠܡܫܬܐ܂ ܘܠܡܣܒܥ ܚܕ ܝܘܡ܂ ܡܛܠ ܕܒܟܝܠܬܐ ܝܗܒܝܢ ܗܘܘ ܠܗܘܢ ܡ̈ܝܐ܂
07:22 [ai]	ܘܐܬܛܪܦܘ ܛܒ ܝܠܘܕܝ̈ܗܘܢ ܘܢܫܝ̈ܗܘܢ ܃ ܘܓܕܘ̈ܕܝܗܘܢ ܘܣܦܘ ܡܢ ܨܗܝܐ܂ ܘܢܦܠܘ ܒܫܘܩ̈ܐ ܕܡܕܝܢ̈ܬܐ܂ ܘܒܡܥ̈ܠܢܐ ܕܬܪ̈ܥܐ܂ ܘܠܐ ܗܘܐ ܒܗܘܢ ܚܝܠܐ܂
07:23 [ai]	ܘܐܬܟܢܫܘ ܥܠ ܥܘܙܝܐ ܘܟܠ ܪ̈ܘܪܒܢܐ ܕܡܕܝܢܬܐ ܥܠܝܡ̈ܐ ܘܢܫ̈ܐ ܘܛ̈ܠܝܐ܂ ܘܓܥܘ ܒܩܠܐ ܪܡܐ ܘܐܡܪܘ ܠܥܝܢ ܣܒ̈ܐ܂
07:24 [ai]	ܢܕܘܢ ܡܪܝܐ ܒܝܢ̈ܝܢ ܘܠܟܘܢ܂ ܡܛܠ ܕܥܒܕܬܘܢ ܒܢ ܥܘܠܐ ܪܒܐ܂ ܕܠܐ ܡܠܠܬܘܢ ܫܠܡܐ ܥܡ ܒ̈ܢܝ ܐܬܘܪ܂
07:25 [ai]	ܘܗܫܐ ܠܝܬ ܠܢ ܡܢ ܕܡܥܕܪ ܠܢ܂ ܐܠܐ ܐܫܠܡܢ ܡܪܝܐ ܒܐܝ̈ܕܝܟܘܢ ܃ ܕܢܣܘܦ ܩܕܡܝܗܘܢ ܒܨܗܝܐ܂ ܘܒܐܒܕܢܐ ܪܒܐ܂
07:26 [ai]	ܘܗܫܐ ܩܪܘ ܐܢܘܢ ܘܐܫܠܡܘ ܠܗܘܢ ܡܕܝܢܬܐ ܠܫܒܝܐ ܘܠܒܙܬܐ ܠܥܡܗ ܕܐܠܦܪܢܐ ܘܠܟܠܗ ܚܝܠܗ܂
07:27 [ai]	ܡܛܠ ܕܛܒ ܠܢ ܕܢܗܘܐ ܠܗܘܢ ܥ̈ܒܕܐ ܘܐܡܗ̈ܬܐ ܘܬܚܐ ܢܦܫܢ܂ ܘܠܐ ܢܚܙܐ ܒܥ̈ܝܢܝܢ ܡܘܬܐ ܕܝ̈ܠܘܕܝܢ܂ ܘܕܢܫ̈ܝܢ ܘܕܒ̈ܢܝܢ܂ ܟܕ ܡܬܛܪܦܐ ܢܦܫܗܘܢ܂
07:28 [ai]	ܘܡܣܗܕܝܢܢ ܒܟܘܢ ܫܡܝܐ ܘܐܪܥܐ܂ ܘܡܪܝܐ ܐܠܗܗܘܢ ܕܐܒܗ̈ܬܢ܂ ܃ ܕܗܘ ܡܬܬܒܥ ܡܢܢ ܐܝܟ ܚܛܗ̈ܝܢ܂ ܠܡܥܒܕ ܐܝܟ ܦܬܓ̈ܡܐ ܗܠܝܢ ܒܝܘܡܐ ܕܝܘܡܢܐ܂
07:29 [ai]	ܘܗܘܬ ܒܟܬܐ ܒܓܘ ܟܢܘܫܬܐ܂ ܘܓܥܘ ܠܘܬ ܡܪܝܐ ܐܠܗܐ܂ ܒܩܠܐ ܪܡܐ ܟܘܠܗܘܢ ܐܟܚܕܐ܂
07:30 [ai]	ܘܐܡܪ ܠܗܘܢ ܥܘܙܝܐ܂ ܬܪܣܘ ܐܚ̈ܝ ܘܢܣܝܒܪ ܚܡܫܐ ܝܘܡ̈ܝܢ ܐܚܪ̈ܢܝܢ܂ ܛܟ ܢܦܢܐ ܠܢ ܡܪܝܐ ܐܠܗܐ ܪ̈ܚܡܘܗܝ܂ ܡܛܠ ܕܠܐ ܫܒܩ ܠܢ ܥܕܡܐ ܠܚܪܬܐ܂
07:31 [ai]	ܘܐܢ ܢܥܒܪܘܢ ܚܡܫܐ ܝܘܡ̈ܝܢ ܘܠܐ ܢܗܘܐ ܠܢ ܥܘܕܪܢܐ܂ ܢܥܒܕ ܐܝܟ ܦܬܓܡ̈ܐ ܗܠܝܢ܂
07:32 [ai]	ܘܕܒܪܗ ܠܥܡܐ ܐܢܫ ܠܡܫܟܢܗ܂ ܘܠܫܘܪ̈ܐ ܘܠܡܓܕ̈ܠܐ ܕܡܕܝܢܬܐ܂ ܘܢܫ̈ܐ ܘܛ̈ܠܝܐ ܫܪܐ ܐܢܘܢ ܠܒ̈ܬܝܗܘܢ ܘܗܘܘ ܒܡܘܟܟܐ ܪܒܐ ܕܛܒܼܿ܂

next chapter