The Comprehensive Aramaic Lexicon

08:01 [ai]	ܘܒܝܘܡ̈ܬܐ ܗܢܘܢ܂ ܥܡܪܐ ܗܘܬ ܒܡܕܝܢܬܐ ܝܗܘܕܝܬ ܒܪܬ ܡܪܪܝ ܒܪܬ ܥܘܨ܂ ܒܪ ܝܘܣܦ ܒܪ ܥܘܙܝܠ܂ ܒܪ ܐܠܩܢܐ܂ ܒܪ ܚܢܢ܂ ܒܪ ܓܒܥܘܢ܂ ܒܪ ܕܦܢܝܢ܂ ܒܪ ܐܚܝܛܘܒ܂ ܒܪ ܢܐܝܢ܂ ܒܪ ܡܠܟܝܐ ܒܪ ܥܝܪ܂ ܒܪ ܢܬܢܝܐ܂ ܒܪ ܫܠܘܡܐܝܠ܂ ܒܪ ܫܡܥܘܢ ܒܪ ܐܝܣܪܝܠ܂
08:02 [ai]	ܘܒܥܠܗ ܡܢܫܐ ܡܢ ܫܪܒܬܗ܂ ܘܡܝܬ ܒܚܨܕܐ ܕܣܥܪ̈ܐ܂
08:03 [ai]	ܕܩܐܡ ܗܘܐ ܥܠ ܚܨܘ̈ܕܐ ܒܚܩܠܐ܂ ܘܨܚ ܚܘܡܐ ܒܪܝܫܗ ܘܢܦܠ ܥܠ ܥܪܣܗ܂ ܘܡܝܬ ܒܝܬ ܦܠܘ ܡܕܝܢܬܗ܂ ܘܩܒܪܘܗܝ ܥܡ ܐܒܗܘܗܝ܂ ܒܚܩܠܐ ܕܒܝܬ ܪܘܬܝܡ ܘܒܝܬ ܒܥܠܡܘܢ ܃
08:04 [ai]	ܘܗܘܬ ܝܗܘܕܝܬ ܡܪܡܠܐ܂ ܒܒܝܬܗ ܬܠܬ ܫܢܝܢ ܘܐܪܒܥܐ ܝܪ̈ܚܝܢ܂
08:05 [ai]	ܘܥܒܕܬ ܠܗ ܡܛܠܬܐ ܥܠ ܐܓܪܐ ܕܒܝܬܗ܂ ܘܐܣܪܬ ܣܩܐ ܒܚܨܝܗ܂ ܘܠܒܝܫܐ ܗܘܬ ܡܐ̈ܢܝ ܐܪܡܠܘܬܗ
08:06 [ai]	ܘܨܝܡܐ ܗܘܬ ܟܠ ܝܘܡ̈ܝ ܐܪܡܠܘܬܗ܂ ܣܛܪ ܡܢ ܫܒ̈ܐ ܘܪܝܫ ܝܪ̈ܚܐ܂ ܘܥܐ̈ܕܐ ܘܚܘܕ̈ܬܐ ܘܥܘܗ̈ܕܢܐ ܕܒܝܬ ܐܝܣܪܝܠ܂
08:07 [ai]	ܘܗܘܬ ܫܦܝܪܐ ܒܚܙܘܗ܂ ܘܝܐܐ ܩܘܒܠܠܗ܂ ܘܚܟܝܡ ܠܒܗ ܘܛܒܐ ܘܣܟܘܠܬܢܝܐ܂ ܘܗܘܬ ܥܬܝܪܐ ܛܒ܂ ܡܛܠ ܕܫܒܩ ܠܗ ܡܢܫܐ ܒܥܠܗ܂ ܕܗܒܐ ܘܟܣܦܐ ܘܥ̈ܒܕܐ ܘܐܡܗ̈ܬܐ܂ ܘܒܥܝܪ̈ܐ ܘܩܘܪ̈ܝܐ܂ ܘܩܡܬ ܒܗܝܢ܂
08:08 [ai]	ܘܠܝܬ ܗܘܐ ܕܐܡܪ ܠܗ ܡܠܐ ܒܝܫܐ܂ ܡܛܠ ܕܕܚܠܐ ܗܘܬ ܡܢ ܐܠܗܐ ܛܒ܂
08:09 [ai]	ܘܫܡܥܬ ܦܬܓ̈ܡܘܗܝ ܕܥܡܐ ܒܝ̈ܫܐ ܕܐܡܪܘ ܠܪܒܐ܂ ܡܛܠ ܕܥܩܬ ܢܦܫܗܘܢ ܒܒܨܝܪܘܬ ܡ̈ܝܐ܂ ܘܫܡܥܬ ܝܗܘܕܝܬ ܟܠ ܦܬܓܡ̈ܐ ܕܐܡܪ ܠܗܘܢ ܃ ܥܘܙܝܐ ܕܨܬ ܐܢܘܢ܂ ܘܝܡܐ ܠܗܘܢ ܕܒܬܪ ܚܡܫܐ ܝܘ̈ܡܝܢ ܢܫܠܡܘܢ ܡܕܝܢܬܐ ܠܒ̈ܢܝ ܐܬܘܪ܂
08:10 [ai]	ܘܫܕܪܬ ܦܪܣܬܘܝܬܗ ܕܩܝܡܐ ܥܠ ܒܝܬܡܕܢ̈ܝܗ܂ ܘܩܪܬ ܠܥܘܙܝܐ ܘܠܚܒܪܝ ܘܠܟܪܡܝ ܩܫ̈ܝܫܐ ܕܡܕܝܢܬܐ܂
08:11 [ai]	ܘܐܬܘ ܠܘܬ ܝܗܘܕܝܬ ܘܐܡܪܬ ܠܗܘܢ܂ ܫܘܡܥܘܢܝ ܥܡܘܪ̈ܐ ܘܥܡܘܪ̈ܐ ܕܒܝܬ ܦܠܘ܂ ܡܛܠ ܕܠܐ ܗܘܐ ܛܒ ܦܬܓܡܐ ܕܡܠܠܬܘܢ ܩܕܡ ܥܡܐ ܝܘܡܢܐ܂ ܘܐܩܝܡܬܘܢ ܡܘܡ̈ܬܐ ܕܐܝܡܘ ܒܝܢܝܟܘܢ ܘܠܐܠܗܐ܂ ܘܐܡܪܬܘܢ ܠܡܫܠܡܘ ܡܕܝܢܬܐ ܠܒܥ̈ܠܕܒܒܝܢ ܐܠܐ ܡܬܦܢܐ ܒܗܘܢ ܡܪܝܐ ܐܠܗܢ ܠܥܕܪܢ ܃
08:12 [ai]	ܘܗܫܐ ܐܢܬܘܢ ܡܢ ܐܢܬܘܢ ܕܡܢܣܝܢ ܐܢܬܘܢ ܠܐܠܗܐ܂ ܘܗܘܝܬܘܢ ܐܢܬܘܢ ܐܠܗ̈ܐ ܒܝܬ ܒ̈ܢܝ ܐܢܫܐ܂
08:13 [ai]	ܘܡܢܣܝܢ ܐܢܬܘܢ ܬܪܥܝܬܗ ܕܡܪܝܐ ܚܝܠܬܢܐ܂ ܘܠܐ ܐܢܫ ܝܕܥ ܠܥܠܡ
08:14 [ai]	ܥܘܡܩܐ ܕܠܒܗܘܢ ܕܒܢܝܢ̈ܫܐ܂ ܠܐ ܡܫܬܟܚ܂ ܘܡܚܫܒܬܐ ܕܒܥܝ̈ܪܝܗܘܢ ܠܐ ܡܬܕܪ̈ܟܝܢ ܐܢܬܘܢ܂ ܘܐܝܟܢܐ ܠܐܠܗܐ ܕܥܒܕ ܗܠܝܢ ܟܠܗܝܢ ܡܕܪܟܝܢ ܐܢܬܘܢ ܃ ܐܘ ܬܪܥܝܬܗ ܬܕܥܘܢ ܘܡܚܒܫܬܗ ܬܣܬܟܠܘܢ܂ ܠܐ ܐܚ̈ܝ܂ ܠܐ ܬܪܓܙܘܢ ܠܡܪܝܐ ܐܠܗܢ܂
08:15 [ai]	ܡܛܠ ܕܐܠܐ ܨܒܐ ܠܡܥܕܪܘܬܢ ܒܓܘ ܚܡܫܐ ܝܘܡ̈ܝܢ܂ ܗܘ ܫܠܝܛ ܕܐܡܬܝ ܕܢܨܒܐ܂ ܢܓܢ ܥܠܝܢ ܘܢܬܒܪ ܒܥ̈ܠܕܒܒܝܢ ܩܕܡܝܢ܂
08:16 [ai]	ܐܢܬܘܢ ܕܝܢ ܠܐ ܬܡܣܟܢܘܢ ܬܪܥܝܬܗ ܕܡܪܝܐ ܐܠܗܐ܂ ܡܛܠ ܕܠܐ ܗܘܐ ܐܝܟ ܐܢܫܐ ܐܠܗܐ ܕܢܬܓܠܐ܂ ܘܠܐ ܐܝܟ ܒܪ ܐܢܫܐ ܕܢܬܒܨܪ܂
08:17 [ai]	ܐܠܐ ܢܩܘܐ ܠܦܘܪܩܢܗ܂ ܘܢܩܪܝܘܗܝ ܠܡܥܕܪܘܬܢ ܃ ܘܐܢ ܢܨܒܐ ܢܫܡܥ ܒܩܠܢ܂
08:18 [ai]	ܡܛܠ ܕܠܐ ܩܡ ܒܫܪܒܬܢ܂ ܘܐܦܠܐ ܗܘܐ ܒܝܘܡ̈ܝܢ܂ ܠܐ ܫܒܛܐ ܘܐܦ ܠܐ ܫܪܒܬܐ܂ ܘܐܦ ܠܐ ܥܡܐ܂ ܘܐܦܠܐ ܡܕܝܢܬܐ ܡܢܟܘܢ ‍{‍ܡܢܟܘܢ#2#‍}‍ ܃ ܕܣܓܕܝܢ ܠܐܠܗܐ ܥܒܕ ܐܝܕ̈ܝܐ ܕܒܢܝܢܫܐ ܐܝܟ ܕܗܘܐ ܒܝܘܡ̈ܬܐ ܕܩܕܡܝܢ܂
08:19 [ai]	ܡܛܘܠ ܗܢܐ ܐܬܝܗܒܘ ܐ̈ܒܗܝܢ ܠܒܙܬܐ ܘܠܚܪܒܐ܂ ܘܢܦܠܘ ܩܕܡ ܒܥܠܕܒ̈ܒܝܗܘܢ ܃ ܡܦܘܠܬܐ ܪܒܬܐ܂
08:20 [ai]	ܚܢܢ ܕܝܢ ܠܐ ܝܕܥܢ ܠܐܠܗ ܠܒܪ ܡܢܗ܂ ܕܢܗܦܟ ܐܦܘ̈ܗܝ ܡܢ ܥܡܢ܂
08:21 [ai]	ܡܛܠ ܕܐܢ ܢܫܬܠܡ ܚܢܢ ܐܦ ܟܠܗ ܝܗܘܕܐ ܬܫܬܠܡ܂ ܘܢܬܒܙܘܢ ܩܘܕ̈ܫܝܢ܂ ܘܢܬܒܥ ܡܪܝܐ ܛܡܐܘܬܗܘܢ ܡܢ ܕܡܢ܂
08:22 [ai]	ܘܩܛܠܐ ܕܐܚ̈ܝܢ ܘܫܒܝܬܐ ܕܐܪܥܐ ܘܛܡܐܘܬܐ ܕܝܪܬܘܬܢ ܃ ܢܗܦܟ ܥܠ ܪܝܫܢ܂ ܒܝܬ ܥ̈ܡܡܐ ܕܢܦܠܘܚ ܬܡܢ܂ ܘܢܗܘܐ ܠܬܘܩܠܬܐ ܘܠܚܣܕܐ ܒܝܬ ܟܠܗܘܢ ܫܒ̈ܝܢ܂
08:23 [ai]	ܡܛܠ ܕܠܐ ܢܗܘܐ ܫܘܥܒܕܢ ܠܛܝܒܘ܂ ܐܠܐ ܢܥܒܕܗ ܡܪܝܐ ܐܠܗܢ ܠܨܥܪܐ܂
08:24 [ai]	ܗܫܐ ܚܢܢ ܢܩܒܠ ܠܐܚܝܢ܂ ܡܛܠ ܕܒܢ ܬܠܝܐ ܢܦܫܗܘܢ ܃ ܘܩܘܕܫܐ ܘܗܝܟܠܐ ܘܡܕܒܚܐ ܒܢ ܗܘ ܩܝܡܝܢ܂
08:25 [ai]	ܘܝܬܝܪ ܡܢ ܗܠܝܢ ܟܠܗܝܢ ܢܫܦܪ ܠܐܠܗܐ܂ ܕܡܢܣܐ ܠܢ ܐܝܟ ܕܠܐܒܗ̈ܝܢ܂
08:26 [ai]	ܐܬܕܟܪܘ ܠܟܠ ܕܥܒܕ ܥܡ ܐܒܪܗܡ ܘܐܝܣܚܩ܂ ܘܠܟܠ ܕܗܘܐ ܠܝܥܩܘܒ ܒܝܬ ܢܗܪ̈ܝܢ܂ ܟܕ ܪܥܐ ܗܘܐ ܥܢܐ ܕܠܒܢ ܐܚܘܗ ܕܐܡܗ܂
08:27 [ai]	ܟܕ ܒܚܪ ܐܢܘܢ ܠܗܘܢ ܠܢܣܝܘܢܐ ܕܠܒܗܘܢ ܃ ܘܐܦ ܠܢ ܠܐ ܗܘܐ ܠܬܒܥܬܐ܂ ܐܠܐ ܠܡܪܕܘܬܢ܂ ܡܚܐ ܠܢ ܡܪܝܐ܂ ܡܛܠ ܕܩܪܝܒܝܢܢ ܠܗ܂
08:28 [ai]	ܘܐܡܪ ܠܗ ܥܘܙܝܐ܂ ܟܠ ܕܐܡܪܬܝ ܒܠܒܐ ܛܒܐ ܛܒܐ ܐܡܪܬܝ܂ ܘܠܝܬ ܕܢܩܘܡ ܠܘܩܒܠ ܡܠܟܟܝ܂
08:29 [ai]	ܘܠܐ ܗܘܐ ܡܢ ܝܘܡܢܐ ܐܬܝܕܥܬ ܚܟܡܬܟܝ܂ ܐܠܐ ܡܢ ܝܘܡ̈ܬܐ ܩܕܡ̈ܝܐ܂ ܝܕܥ ܟܠܗ ܥܡܐ ܣܟܘܠܬܢܘܬܟܝ܂ ܡܛܠ ܕܛܒ ܚܘܫܒܐ ܕܠܒܟܝ܂
08:30 [ai]	ܐܠܐ ܥܡܐ ܨܗܝ ܛܒ܂ ܘܐܢܣܘܢ ܠܡܥܒܕ ܠܒܗܘܢ ܐܝܟ ܕܐܡܪܢ ܠܗܘܢ ܃ ܘܐܝܬܝܘ ܥܠܝܢ ܡܘܡܬܐ܂ ܘܠܐ ܡܫܟܚܝܢܢ ܠܡܥܒܪܗ܂
08:31 [ai]	ܘܗܫܐ ܒܥܝ ܥܠܝܢ܂ ܟܒܪ ܢܥܢܟܝ ܡܪܝܐ ܐܠܗܐ ܡܛܠ ܕܐܢܬܬܐ ܐܢܬܝ ܕܚܠܬ ܐܠܗܐ܂ ܘܢܫܕܪ ܡܪܝܐ ܐܠܗܢ ܡܛܪܐ܂ ܘܢܬܡܠܘܢ ܓܘܒ̈ܝܢ ܘܠܐ ܢܣܘܦ ܃
08:32 [ai]	ܘܐܡܪܬ ܠܗܘܢ ܝܗܘܕܝܬ܂ ܫܘܡܥܘܢܝ ܘܐܥܒܕ ܨܒܘܬܐ ܕܚܟܡܬܐ܂ ܘܬܫܬܒܩ ܠܫܪ̈ܒܢ ܘܠܫܪ̈ܒܢ ܠܒ̈ܢܝ ܥܡܢ܂
08:33 [ai]	ܩܘܡܘ ܐܢܬܘܢ ܒܬܪܥܐ ܒܠܠܝܐ ܗܢܐ ܘܐܢܐ ܘܛܠܝܬܝ܂ ܘܒܝܘܡ̈ܬܐ ܕܐܡܪܬܘܢ ܕܒܬܪܗܘܢ ܬܫܠܡܘܢ ܡܕܝܢܬܐ ܠܒܥܠܕܒ̈ܒܝܢ܂ ܢܦܪܘܩ ܡܪܝܐ ܠܐܣܝܪܝܠ ܒܐܝ̈ܕܝ ܒܡܐ/ܟܡܐ#2#/ ܕܬܟܝܠܐ ܐܢܐ܂
08:34 [ai]	ܘܐܢܬܘܢ ܠܐ ܬܒܨܘܢ ܥܒܕ̈ܝ܂ ܡܛܠ ܕܠܐ ܓܠܝܐ ܐܢܐ ܠܟܘܢ ܥܕܡܐ ܕܢܫܠܡ ܡܐ ܕܥܒܕܐ ܐܢܐ܂
08:35 [ai]	ܘܐܡܪܘ ܠܗ ܥܘܙܝܐ ܘܪ̈ܘܪܒܢܐ܂ ܙܠܝ ܒܫܠܡܐ܂ ܘܡܪܝܐ ܢܐܙܠ ܩܕܡܝܟܝ܂ ܘܢܬܒܥܢ ܡܢ ܒܥܠܕܒ̈ܒܝܢ܂
08:36 [ai]	ܘܐܬܦܢܝܘ ܘܢܦܩܘ ܡܢ ܡܛܠܬܐ܂ ܘܐܙܠܘ ܠܒܬܝ̈ܗܘܢ܂

next chapter