The Comprehensive Aramaic Lexicon

16:01 [ai]	ܬܫܒܘܚܬܗ ܕܝܗܘܕܝܬ܀ ܘܐܡܪܬ ܝܗܘܕܝܬ܂ ܫܒܚܘ ܠܡܪܝܐ ܒܦ̈ܠܓܐ܂ ܙܡܪܘ ܠܗ ܒܨܨ̈ܠܐ܂ ܫܒܚܘ ܠܗ ܬܫܒܘܚܬܐ ܚܕܬܐ܂ ܘܪܡܪܡܘܗܝ ܘܩܪܘ ܒܫܡܗ܂
16:02 [ai]	ܐܢܬ ܗܘ ܐܠܗܐ ܕܡܫܚܩ ܩܪ̈ܒܐ܂ ܡܪܝܐ ܕܣܡܬ ܡܫܪܝܬܐ ܒܓܘ ܥܡܟ܂ ܠܡܦܪܩ ܐܢܘܢ ܡܢ ܐܝܕܐ ܕܐܠܘܨ̈ܝܗܘܢ ܃
16:03 [ai]	ܐܬܐ ܐܬܘܪܝܐ ܡܢ ܛܘܪ̈ܝ ܓܪܒܝܐ܂ ܐܬܐ ܒܪ̈ܒܘܬܐ ܕܚܝܠܗ܂ ܒܣܘܓܐܗܘܢ ܣܟܪܘ ܢܚ̈ܠܐ܂ ܘܪ̈ܟܫܗܘܢ ܟܣܝܘ ܪ̈ܡܬܐ܂
16:04 [ai]	ܐܡܪܘ ܠܡܘܩܕܘ ܬܚܘ̈ܡܝ܂ ܘܠܓܕ̈ܘܕܝ ܢܩܛܠ ܒܚܪܒܐ܂ ܘܠܝܠܘ̈ܕܐ ܢܫܩܦ ܥܠ ܐܪܥܐ܂ ܘܛ̈ܠܝܐ ܢܬܠ ܠܫܒܝܐ܂ ܘܒܬܘ̈ܠܬܝ ܠܒܙܬܐ܂
16:05 [ai]	ܡܪܝܐ ܚܝܠܬܢܐ ܛܠܡ ܐܢܘܢ ܃ ܒܐܝܕܐ ܕܢܩܒܬܐ ܐܒܗܬ ܐܢܘܢ ܃
16:06 [ai]	ܡܛܠ ܕܠܐ ܗܘܐ ܡܢ ܓܕܘ̈ܕܐ ܢܦܠܘ ܚܝ̈ܠܬܢܝܗܘܢ ܃ ܘܐܦܠܐ ܡܢ ܒ̈ܢܝ ܥܫܝ̈ܢܐ ܡܚܐܘܗܝ܂ ܘܐܦܠܐ ܓܒܪ̈ܐ ܕܪܡܝܢ ܒܩܘܡ̈ܬܐ ܐܪܡܝܘ ܥܠܝܗܘܢ ܃ ܐܠܐ ܝܗܘܕܝܬ ܒܪܬ ܡܪܪܝ܂ ܒܫܘܦܪܐ ܕܐ̈ܦܝܗ ܫܕܠܬܗ܂
16:07 [ai]	ܫܠܚܬ ܡܐ̈ܢܝ ܐܪܡܠܘܬܗ܂ ܠܬܫܒܘܚܬܐ ܕܟܐܒܘ̈ܗܝ ܕܐܝܣܪܝܠ܂ ܡܫܚܬ ܐܦܝ̈ܗ ܒܒܣܡܐ܂
16:08 [ai]	ܐܣܪܬ ܓܕ̈ܘܠܝܗ ܒܣܪܝܓܬܐ܂ ܘܠܒܫܬ ܢܚܬ̈ܝܗ ܠܡܛܥܝܘܬܗ܂
16:09 [ai]	ܘܡܣ̈ܢܝܗ ܚܛܦ ܥܝܢ̈ܘܗܝ ܘܫܘܦܪܗ ܫܒܐ ܢܦܫܗ܂ ܦܣܩ ܢܐܢܪܗ ܨܘܪܗ܂
16:10 [ai]	ܙܥܘ ܦܪ̈ܣܝܐ ܡܢ ܡܪܚܘܬܗ܂ ܘܡܕ̈ܝܐ ܡܢ ܥܘܫܢܗ ܐܬܒܪܘ܂
16:11 [ai]	ܗܝܕܝܢ ܝܒܒܘ ܡܟ̈ܝܟܝ܂ ܘܩܥܘ ܟܪ̈ܝܗܝ ܘܢܦܠܘ܂ ܘܐܪܝܡܘ ܩܠܗܘܢ ܘܐܬܬܒܪܘ܂
16:12 [ai]	ܐܝܟ ܕܠܥܠܝܡ̈ܬܐ ܕܓܫܘ ܐܢܘܢ ܃ ܘܐܝܟ ܕܠܥܒ̈ܕܐ ܡܪ̈ܘܕܐ ܩܛܠܘ ܐܢܘܢ ܃ ܐܒܕܘ ܐܝܟ ܕܡܢ ܡܫܪܝܬܗ ܕܡܪܝܐ ܐܠܗܢ ܃
16:13 [ai]	ܐܫܒܚ ܠܐܠܗܝ ܬܫܒܘܚܬܐ ܚܕܬܐ܂ ܡܪܝܐ ܚܝܠܬܢܐ܂ ܪܒ ܐܢܬ ܘܫܒܝܚ܂ ܘܓܢܒܪ ܒܚܝܠܐ܂ ܘܠܐ ܡܙܕܟܐ ܐܢܬ܂
16:14 [ai]	ܠܟ ܢܦܠܚܘܢ ܟܠܗܘܢ ܥܡܡ̈ܐ܂ ܘܠܟ ܬܫܬܥܒܕ ܟܠܗ ܐܪܥܐ ܒܪܝܬܟ܂ ܡܛܠ ܕܐܢܬ ܐܡܪܬ ܘܗܘܘ܂ ܘܣܕܪܬ ܐܢܘܢ ܘܐܬܩܝܡܘ܂ ܘܠܝܬ ܡܢ ܕܠܘܩܒܠ ܡܠܬܟ ܢܩܘܡ܂
16:15 [ai]	ܛܘܪ̈ܐ ܡܢ ܫܬܐ̈ܣܝܗܘܢ ܥܡ ܡܝܝ̈ܗܘܢ ܢܙܘܥܘܢ ܃ ܘܫܘ̈ܥܐ ܐܝܟ ܫܥܘܬܐ ܢܬܦܫܪܘܢ ܡܢ ܩܕܡܝܟ܂ ܘܥܠ ܕܚܠܝܟ ܬܚܣܐ܂
16:16 [ai]	ܡܛܘܠ ܕܙܥܘܪܝܐ ܗܝ ܟܠ ܕܒܚܬܐ ܠܪܝܚ ܣܘܬܐ܂ ܘܒܨܝܪ ܗܘ ܟܠ ܬܪܒܐ ܠܝܩ̈ܕܐ ܫܠܡ̈ܐ܂ ܘܐܝܢܐ ܕܕܚܠ ܠܡܪܝܐ܂ ܪܒ ܗܘ ܠܘܬܗ ܒܟܘܠ ܙܒܢ܂
16:17 [ai]	ܘܝ ܠܥܡܐ ܕܩܐܡ ܥܠ ܥܡܝ܂ ܡܪܝܐ ܚܝܠܬܢܐ ܡܬܬܒܥ ܡܢܗܘܢ܂ ܒܝܘܡܐ ܕܕܝܢܐ ܢܬܒܥ ܐܢܘܢ ܘܢܣܥܘܪ ܐܢܘܢ ܃ ܘܢܬܠ ܒܣܪܗܘܢ ܠܢܘܪܐ ܘܠܬܘܠܥܐ܂ ܘܢܐܩܪܘܢ ܒܪܘܫܥܐ ܥܕܡܐ ܠܥܠܡ܂
16:18 [ai]	ܘܗܘܐ ܕܟܕ ܐܬܬ ܠܐܪܫܠܡ ܘܣܓܕܘ ܠܡܪܝܐ܂ ܘܟܕ ܐܬܕܟܝ ܥܡܐ܂ ܃ ܘܐܝܬܝܘ ܝܩ̈ܕܝܗܘܢ ܫ̈ܠܡܐ ܠܡܪܝܐ܂ ܃ ܘܕܒ̈ܚܐ ܐܡܝܢܐܝܬ܂
16:19 [ai]	ܘܐܝܬܝܬ ܝܗܘܕܝܬ ܡܐ̈ܢܘܗܝ ܕܐܠܦܪܢܐ܂ ܘܟܠܬܐ ܕܢܣܒܬ ܡܢ ܩܝܛܘܢܐ܂ ܘܝܗܒܬ ܐܢܘܢ ܚܪܡܐ ܠܡܪܝܐ܂ ܃
16:20 [ai]	ܘܗܘܘ ܥܡܐ ܚܕܝܢ ܒܐܘܪܫܠܡ ܩܕܡ ܒܝܬ ܡܩܕܫܐ ܝܪܚ ܝܘܡ̈ܝܢ܂ ܘܝܗܘܕܝܬ ܩܘܝܬ ܥܡܗܘܢ ܬܡܢ ܒܐܘܪܫܠܡ܂ ܂
16:21 [ai]	ܘܡܢ ܒܬܪ ܝܘܡ̈ܬܐ ܗܠܝܢ܂ ܗܦܟ ܐܢܫ ܠܡܫܟܢܗ܂ ܘܝܗܘܕܝܬ ܐܙܠܬ ܠܒܝܬ ܦܠܘ ܠܒܝܬ ܩܢܝܢܗ܂ ܘܗܘܬ ܡܝܩܪܐ ܠܟܠܗ ܐܪܥܐ܂
16:22 [ai]	ܘܣܓ̈ܝܐܐ ܐܬܪܓܪܓܘ ܠܡܣܒܗ܂ ܘܠܐ ܚܟܡܗ ܓܒܪ ܟܘܠܗܘܢ ܝܘܡ̈ܬܐ ܕܚ̈ܝܝܗ܂ ܡܢ ܝܘܡܐ ܕܡܝܬ ܡܢܫܐ ܒܥܠܗ܂
16:23 [ai]	ܘܟܡܐ ܕܐܬܝܐ ܡܐܪܒ ܝܪܒܐ ܗܘܬ܂ ܥܕܡܐ ܕܝܪܒܬ ܛܒ܂ ܘܣܐܒܬ ܒܒܝܬܗ ܕܡܢܫܐ ܒܥܠܗ܂ ܘܗܘܬ ܒܪܬ ܡܐܐ ܘܚܡܫ ܫ̈ܢܝܢ܂ ܘܡܝܬܬ ܒܝܬ ܦܠܘ܂ ܘܐܬܩܒܪܬ ܒܡܥܪܬܐ ܥܡ ܡܢܫܐ ܒܥܠܗ܂
16:24 [ai]	ܘܐܬܐܒܠ ܥܠܝܗ ܟܠܗ ܒܝܬ ܐܝܣܪܝܠ ܫܒܥܐ ܝܘ̈ܡܝܢ܂ ܘܦܠܓܬ ܢܟܣ̈ܝܗ ܡܢ ܩܕܡ ܡܘܬܗ܂ ܠܟܠܗܘܢ ܩܪ̈ܝܒܘܗܝ ܕܡܢܫܐ ܒܥܠܗ܂ ܘܠܐܝܠܝܢ ܕܩܪܝܒܝܢ ܠܫܪܒܬܗ܂ ܘܫܒܩܬ ܠܐܡ̈ܬܗ ܒܢ̈ܬ ܚܐܪ̈ܐ܂
16:25 [ai]	ܘܠܐ ܗܘܐ ܬܘܒ ܕܡܕܚܠ ܠܒ̈ܢܝ ܐܝܣܪܝܠ ܟܠܗܘܢ ܝܘܡ̈ܬܗ ܕܝܗܘܕܝܬ܂ ܘܐܦ ܡܢ ܒܬܪ ܡܘܬܗ ܝܘܡ̈ܬܐ ܣܓܝܐ̈ܐ܀ ̱̱܀ ܫܠܡ ܟܬܒܐ ܕܝܗܘܕܝܬ܀