← Back
The Comprehensive Aramaic Lexicon
← Return to the Text Browser
click on the file description for more information
62066: Sirach

Click on a word for lexical analysis.
Click on a red-colored coordinate for comments and/or translations of the line
View in Serto
Ask AI about a passage
Hide manuscript variants

previous chapter


13:01 [ai]ܕܩܪܒ ܠܙܒܬܐ ܕܒܩܐ ܒܐܝܕܗ܂ ܘܕܡܫܬܘܬܦ ܠܥܘܠܐ ܠܒܫ ܡܢ ܐܘܪ̈ܚܬܗ܂
13:02 [ai]ܕܝܩܝܪ ܡܢܟ ܠܐ ܬܫܩܘܠ܂ ܘܠܕܥܬܝܪ ܡܢܟ ܠܐ ܬܫܬܘܬܦ܂ ܡܢܐ ܓܝܪ ܬܫܬܘܬܦ ܩܕܪܐ ܕܦܚܪܐ ܠܐܝܪܐ ܕܢܚܫܐ܂ ܕܢܩܫܐ ܠܗ ܘܬܒܪܐ ܠܗ܃ ܐܘ ܡܢܐ ܢܫܬܘܬܦ ܥܬܝܪܐ ܠܡܣܟܢܐ܂
13:03 [ai]ܥܬܝܪܐ ܓܝܪ ܚܛܐ ܘܡܗܡܐ܂ ܘܡܣܟܢܐ ܚܛܐ ܘܡܨܠܐ܂
13:04 [ai]ܐܢ ܬܗܘܐ ܟܫܝܪ ܠܗ܂ ܢܦܠܘܚ ܒܟ܂ ܘܐܢ ܬܬܡܣܟܢ ܢܫܒܩܟ܃
13:05 [ai]ܐܢ ܐܝܬ ܠܟ ܢܫܦܪ ܫܘ̈ܥܝܬܗ ܥܡܟ܂ ܘܢܣܪܩܟ܃ ܘܗܘ ܠܐ ܢܚܫ܂
13:06 [ai]ܥܕ ܥܒܕ ܨܒܝܢܗ ܥܡܟ܃ ܢܬܪܥܐ ܠܟ ܕܥܒܕ ܠܟ ܨܒܝܢܐ܂ ܘܢܟܠܟ ܘܓܒܪܐ ܟܫܝܪܐ ܢܩܪܝܟ܂
13:07 [ai]ܘܢܒܗܬܟ ܒܬܘܩ̈ܢܘܗܝ܂ ܥܕܡܐ ܕܢܥܒܕ ܨܒܝܢܗ ܒܟ܃ ܙܒܢܬܐ ܘܬܪ̈ܬܝܢ ܢܬܥܫܢ ܥܠܝܟ܃ ܘܗܝܕܝܢ ܢܚܙܝܟ ܘܢܬܛܫܐ ܡܢܟ܃ ܘܒܪܫܗ ܢܢܝܕ ܥܠܝܟ܂
13:08 [ai]ܐܙܕܗܪ̈ ܠܐ ܬܬܝܗܒ ܒܐܝܕܘ̈ܗܝ܃ ܘܠܐ ܬܛܥܐ ܒܚܣܝܪܘܬ ܡܕܥܗ܂
13:09 [ai]ܘܐܢ ܡܬܩܪܒ ܠܟ ܥܬܝܪܐ ܗܘܝܬ ܡܬܪܚܩ ܡܢܗ܃ ܘܒܟܠ ܙܒܢ ܗܘ ܢܩܪܒܟ܂
13:10 [ai]ܠܐ ܬܬܩܪܒ ܕܠܐ ܬܬܪܚܩ܃ ܘܠܐ ܬܬܪܚܩ ܕܠܐ ܬܣܬܢܐ܂
13:11 [ai]ܠܐ ܬܬܟܠ ܠܡܡܠܠܘ ܥܡܗ܃ ܘܠܐ ܬܗܝܡܢ ܠܣܘܓܐܐ ܕܫܘ̈ܥܝܬܗ܃ ܡܛܠ ܕܣܘܓܐܐ ܕܫܘ̈ܥܝܬܗ ܢܣܝܘ̈ܢܐ܂ ܘܡܠܐܐ ܠܟ ܥܕܡܐ ܕܢܕܥ ܚܪܬܟ܂
13:12 [ai]ܘܕܠܐ ܪ̈ܚܡܐ ܢܬܦܪܥ ܦܘܪܥܢܐ܂ ܘܠܐ ܚܐܣ ܥܠ ܢܦ̈ܫܬܐ ܕܣܓܝ̈ܐܐ܂
13:13 [ai]ܐܙܕܗܪ ܘܗܘܝܬ ܙܗܝܪ܂ ܕܥܡ ܚܛܘ̈ܦܐ ܐܢܬ ܡܗܠܟ܂
13:15 [ai]ܟܠ ܒܣܪ ܢܪܚܡ ܓܢܣܗ܂ ܘܒܪܢܫܐ ܠܐܝܢܐ ܕܕܡܐ ܠܗ܂ ܡܢ ܟܠ ܒܣܪ ܠܘܬܗ܂ ܘܠܓܢܣܗ ܗܘ ܡܬܕܒܩ ܒܪܢܫܐ܂
13:17 [ai]ܡܢܐ ܢܫܬܘܬܦ ܕܐܒܐ ܠܐܡܪܐ܂ ܗܟܢܐ ܥܘܠܐ ܠܓܒܪܐ ܙܕܝܩܐ܂
13:18 [ai]ܡܢܐ ܬܫܠܡ ܐܦܥܐ ܠܟܠܒܐ܂ ܐܘ ܡܢܐ ܢܫܠܡ ܥܬܝܪܐ ܠܡܣܟܢܐ܂
13:19 [ai]ܡܐܟܘܠܬܗ ܕܐܪܝܐ ܥܪ̈ܕܐ ܕܒܡܕܒܪܐ܂ ܗܟܢܐ ܡܪܥܝܬܗ ܕܥܬܝܪܐ ܡܣܟ̈ܢܐ܂
13:21 [ai]ܥܬܝܪܐ ܢܦܠ܃ ܘܡܬܕܚܐ ܠܒܝܫ܂ ܘܡܣܟܢܐ ܢܦܠ܂ ܘܡܬܕܚܐ ܡܢ ܒܝܫ ܠܒܝܫ܂
13:22 [ai]ܥܬܝܪܐ ܡܡܠܠ ܘܣ̈ܓܝܐܝܢ ܥܕܘܪ̈ܘܗܝ܂ ܘܦܬܓܡ̈ܘܗܝ ܣܢܝ̈ܐ ܡܫܦܪܝܢ܂ ܡܣܟܢܐ ܡܡܠܠ܃ ܘܐܡܪܝܢ ܠܗ ܓܘܥ܂ ܘܐܢ ܐܡܪ ܕܫܦܝܪ ܠܐ ܝܗܒܝܢ ܠܗ ܐܬܪܐ܂
13:23 [ai]ܥܬܝܪܐ ܡܡܠܠ ܘܟܠܗܘܢ ܨܝܬܝܢ ܠܗ܂ ܘܡܛܐ̈ܒܢܘܗܝ ܥܕܡܐ ܠܥܢ̈ܢܐ ܡܡܛܝܢ ܠܗ܂ ܡܣܟܢܐ ܡܡܠܠ܃ ܘܐܡܪܝܢ ܡܢܐ ܐܡܪ܂ ܘܐܢ ܢܬܬܩܠ ܢܣܚܦܘܢܗ܃
13:24 [ai]ܛܒ ܥܘܬܪܐ ܕܠܐ ܚܘܒ̈ܐ܂ ܘܒܝܫܐ ܡܣܟܢܘܬܐ ܥܠ ܓܢܒ ܚܛܗ̈ܐ܂
13:25 [ai]ܠܒܗ ܕܒܪܢܫܐ ܢܫܢܐ ܐܦܘ̈ܗܝ܃ ܐܢ ܠܛܒ ܘܐܢ ܠܒܝܫ܂
13:26 [ai]ܥܩܒ̈ܬܗ ܕܠܒܐ ܛܒܐ ܐܦ̈ܐ ܢܗܝܪ̈ܬܐ܂ ܘܣܘܓܐܐ ܕܫܘ̈ܥܝܬܐ ܬܪ̈ܥܝܬܐ ܕܚ̈ܛܝܐ܀

next chapter