← Back
The Comprehensive Aramaic Lexicon
← Return to the Text Browser
click on the file description for more information
62066: Sirach

Click on a word for lexical analysis.
Click on a red-colored coordinate for comments and/or translations of the line
View in Serto
Ask AI about a passage
Hide manuscript variants

previous chapter


39:01 [ai]ܒܪܡ ܗܘ ܕܝܗܒ ܢܦܫܗ ܠܡܕܚܠ ܠܐܠܗܐ܃ ܘܠܡܣܬܟܠܘ ܢܡܘܣܐ ܕܚܝ̈ܐ܂ ܐܝܟ ܚܟܡܬܐ ܕܟܠܗܘܢ ܩܕܡ̈ܝܐ ܢܒܥܐ܂ ܘܠܘܬ ܢܒ̈ܝܐ ܩܕܡ̈ܝܐ ܢܬܦܢܐ܂
39:02 [ai]ܘܫܘ̈ܥܝܬܐ ܕܟܠ ܐܢܫܐ ܕܥܠܡܐ ܢܐܠܦ܂ ܘܕܥܡ̈ܝܩܢ ܢܬܚܫܒ܂
39:03 [ai]ܚܟܡܬܐ ܕܡ̈ܬܠܐ ܢܐܠܦ܂ ܘܒܟܠ ܣܬܝܪ̈ܬܐ ܢܣܬܟܠ܂
39:04 [ai]ܘܒܝܢܬ ܫܠܝ̈ܛܢܐ ܢܗܠܟ܂ ܘܒܝܢܬ ܡ̈ܠܟܐ ܘܪ̈ܘܪܒܢܐ ܢܫܡܫ܂ ܒܡܕܝ̈ܢܬܐ ܕܥܠܡܐ ܢܗܠܟ܂ ܛܒ ܘܒܝܫ ܒܐܢܫܐ ܢܟܣܐ܂
39:05 [ai]ܘܒܠܒܗ ܢܣܝܡ ܠܡܨܠܝܘ܂ ܘܡܢ ܩܕܡ ܐܠܗܐ ܢܒܥܐ ܪ̈ܚܡܐ܂ ܢܦܬܚ ܦܘܡܗ ܒܨܠܘܬܗ܃ ܘܥܠ ܚܛܗ̈ܘܗܝ ܢܒܥܐ ܛܒܬܐ܂
39:06 [ai]ܘܒܪܘܚܐ ܕܣܟܘܠܬܢܘܬܐ ܢܬܚܟܡ܂ ܘܗܘ ܢܦܩ ܡ̈ܬܠܐ ܚܕ ܬܪ̈ܝܢ܂ ܘܢܘܕܘܢ ܠܗ ܒܬܪ̈ܥܝܬܗܘܢ܂
39:07 [ai]ܗܘ ܢܣܬܟܠ ܒܡ̈ܬܠܐ ܕܚܟ̈ܝܡܐ܂ ܘܒܣܬܝܪ̈ܬܐ ܢܣܬܟܠ܂
39:08 [ai]ܗܘ ܢܦܩ ܝܘܠܦܢܐ ܕܚܟܡܬܐ܂ ܘܒܢܡܘܣܐ ܕܚܝ̈ܐ ܢܫܬܒܚ܂
39:09 [ai]ܘܢܐܠܦܘܢ ܣܓܝ̈ܐܐ ܡܢ ܚܟܡܬܗ܃ ܘܒܥܠܡܐ ܠܐ ܢܬܛܥܐ ܫܡܗ܃ ܘܠܐ ܢܒܛܠ ܕܘܟܪܢܗ ܥܕܡܐ ܠܥܠܡ܂ ܘܫܡܗ ܠܐ ܢܬܛܥܐ ܡܢ ܕܪ ܠܕܪ܂
39:10 [ai]ܚܟܡܬܗ ܢ̈ܬܢܿܝܢ ܟܢܘ̈ܫܬܐ܂ ܘܬܫܒ̈ܚܬܗ ܢܐܡܪ ܥܡܐ܂
39:11 [ai]ܐܢ ܢܨܒܐ ܒܐܠܦ ܢܫܬܒܚ܃ ܘܐܢ ܢܫܬܘܩ ܒܥܡܐ ܙܥܘܪܐ܂
39:12 [ai]ܐܣܬܟܠܘ ܘܐܡܪܘ ܝܘܠܦܢܝ܃ ܐܝܟ ܣܗܪܐ ܒܝܘܡܝ̈ ܬܪ̈ܥܣܪܐ܂
39:13 [ai]ܫܘܡܥܘܢܝ ܙܕܝܩ̈ܐ ܘܢܦܪܥ ܒܣܪܟܘܢ ܐܝܟ ܫܘܫ̈ܢܐ܂ ܘܐܝܟ ܐܪ̈ܙܐ ܕܫܬܝܠܝܢ ܥܠ ܡܝ̈ܐ܂ ܘܐܝܟ ܒܣ̈ܡܐ ܛܒ̈ܐ ܢܒܣܡ ܪܝܚܟܘܢ܂
39:14 [ai]ܐܝܟ ܪܝܚܐ ܕܠܒ̈ܢܢ ܒܐܪ̈ܙܘܗܝ܃ ܘܐܝܟ ܥܩܪܐ ܕܫܘܫܢܬ ܡܠܟܐ܂
39:15 [ai]ܐܪܝܡܘ ܩܠܟܘܢ ܘܫܒܚܘ ܐܟܚܕܐ܂ ܘܐܘܕܘ ܠܐܠܗܐ ܥܠ ܟܠܗܘܢ ܥ̈ܒܿܕܘܗܝ܂ ܡܢܘ ܓܒܪ̈ܘܬܗ ܒܬܫܒ̈ܚܬܐ܂ ܘܒܬܘܕܝܬܐ ܘܒܩܠܐ ܪܡܐ܃ ܘܗܟܢܐ ܐܡܪܘ܂
39:16 [ai]ܟܠܗܘܢ ܥܒ̈ܕܘܗܝ ܕܐܠܗܐ ܝܐܝܢ ܐܟܚܕܐ܂ ܘܟܠܗܘܢ ܠܨܒܘܬܗܘܢ ܐܬܒܪܝܘ܂
39:17 [ai]ܘܠܝܬ ܕܢܐܡܪ ܗܢܐ ܠܡܢܐ ܘܗܢܐ ܠܡܢܐ܂ ܡܛܘܠ ܕܟܠܗܘܢ ܒܘܠܝܬܐ ܥܒܝܕܝܢ܂ ܘܠܝܬ ܕܢܐܡܪ ܕܗܢܐ ܒܝܫ ܘܗܢܐ ܛܒ܃ ܡܛܠ ܕܟܘܠܗܘܢ ܒܥܕܢܗܘܢ ܡܬܓܒܪܝܢ܂ ܒܡܐܡܪܗ ܡܕܢܚ ܫܡܫܐ ܘܒܡܐܡܪܗ ܗܘ ܡܥܪܒ ܠܗ܂
39:18 [ai]ܒܚܕܘܬܐ ܨܒܝܢܗ ܡܬܥܒܕ܂ ܘܠܝܬ ܕܡܫܘܚܪ ܠܦܘܩܕܢܗ܃
39:19 [ai]ܥܒ̈ܕܝܗܘܢ ܕܟܠ ܒ̈ܢܝ ܒܣܪܐ ܠܩܘܒܠܗ܃ ܘܠܝܬ ܕܛܫܐ ܡܢ ܩܕܡܘܗܝ܂
39:20 [ai]ܠܝܬ ܕܩܠܝܠ ܘܣܓܝ ܩܕܡܘܗܝ܃ ܘܠܝܬ ܕܥܫܝܢ ܘܩܫܐ ܠܩܘܒܠܗ܂
39:22 [ai]ܒܘܪܟܬܗ ܐܝܟ ܢܗܪܐ ܕܪܕܐ܃ ܘܐܝܟ ܢܗܪܐ ܥܠܡ̈ܐ ܡܫܩܝܐ܂
39:23 [ai]ܗܟܢܐ ܒܪܘܓܙܗ ܥܡ̈ܡܐ ܕܐܢ܂ ܘܗܦܟ ܐܪܥܐ ܕܫܩܝܗܘܢ ܠܡܠܚܐ܂
39:24 [ai]ܐܘܪ̈ܚܬܗܘܢ ܕܙܕܝܩ̈ܐ ܬܪ̈ܝܨܢ ܩܕܡ ܐܦܘ̈ܗܝ܃ ܘܐܦ ܠܪ̈ܫܝܥܐ ܗܢ̈ܝܢ ܡܬܦ̈ܢܝܢ܂
39:25 [ai]ܛܒܬܐ ܡܢ ܒܪܫܝܬ ܠܛܒ̈ܐ ܐܬܒܪܝܬ܂ ܘܐܦ ܠܥܘ̈ܠܐ܂ ܐܢ ܠܛܒ ܘܐܢ ܠܒܝܫ܂
39:26 [ai]ܪܝܫ ܟܠܗܝܢ ܨܒ̈ܘܬܐ ܕܡܬܒ̈ܥܝܢ ܠܚܝ̈ܐ ܕܒܢܝܢ̈ܫܐ܂ ܡܝ̈ܐ ܘܢܘܪܐ܂ ܘܦܪܙܠܐ ܘܡܠܚܐ܂ ܘܬܪܒܐ ܘܚ̈ܛܐ܂ ܘܚܠܒܐ ܘܕܒܫܐ܂ ܘܥ̈ܢܒܐ ܘܚܡܪܐ ܘܡܫܚܐ܂ ܘܬܟܣܝܬܐ ܘܠܒܘܫܐ܂
39:27 [ai]ܟܠܗܝܢ ܗܠܝܢ ܠܛܒ̈ܐ ܡܛܐ̈ܒܢ܂ ܘܠܒܝ̈ܫܐ ܠܠܘܛܬܐ ܡܬܗ̈ܦܟܢ܃
39:28 [ai]ܐܝܬ ܪܘܚܐ ܕܠܦܪ̈ܥܐ ܐܬܒܪܝ܂ ܘܒܪܘܓܙܗܝܢ ܛܘܪ̈ܐ ܥܩܪ̈ܢ܂ ܒܥܕܢ ܪܘܓܙܐ ܚܝܠܗܝܢ ܡܚ̈ܘܝܢ܂ ܘܪܘܚܐ ܕܡܢ ܕܒܪܐ ܐܢ̈ܝܢ ܡܢܝ̈ܚܢ܃
39:29 [ai]ܢܘܪܐ ܘܒܪܕܐ ܘܟܐܦ̈ܐ ܕܡܘܬܐ܂ ܟܠܗܝܢ ܗܠܝܢ ܠܕܝܢܐ ܐܬܒܪܝ܂
39:30 [ai]ܚܝܘܬ ܫܢܐ܂ ܘܥܩܪ̈ܒܐ ܘܚܘܘ̈ܬܐ ܚܪܒܐ ܕܦܘܪܥܢܐ ܠܡܘܒܕܘ ܠܪ̈ܫܝܥܐ܂
39:31 [ai]ܒܥܕܢܐ ܕܦܩܕ ܠܗܘܢ ܚܕܝܢ܂ ܘܟܘܠ ܝܘ̈ܡܝܗܘܢ ܠܐ ܡܥܒܪܝܢ ܡܠܬܗ܂
39:32 [ai]ܡܛܠ ܕܡܢ ܒܪܫܝܬ ܐܬܒܪܝܘ܂ ܐܣܬܟܠܘ ܒܢܝܢܫܐ ܕܒܟܬܒܐ ܟܬ̈ܝܒܢ ܟܠܗܝܢ ܗܠܝܢ܂
39:33 [ai]ܘܟܠܗܘܢ ܥܒܕ̈ܘܗܝ ܛܒܝܢ܂ ܘܟܘܠ ܨܒܘ ܠܙܒܢܗ ܐܬܒܪܝܬ܂
39:34 [ai]ܘܠܝܬ ܕܢܐܡܪ ܗܢܐ ܒܝܫ ܡܢ ܗܢܐ܂ ܡܛܠ ܕܟܠܗܘܢ ܩܦܝܣܝܢ ܒܐܘܨܪ̈ܐ܂ ܘܠܥܕܢ ܙܒܢܗܘܢ ܡܬܓܒܪܝܢ܀
39:35 [ai]ܡܟܝܠ ܒܟܘܠܗ ܠܒܟܘܢ ܒܪܟܘ ܠܐܠܗܐ܂ ܘܫܒܚܘ ܠܫܡܗ܂

next chapter