The Comprehensive Aramaic Lexicon

46:01 [ai]	ܓܒܪܐ ܓܢܒܪ ܚܝܠܐ ܝܫܘܥ ܒܪܢܘܢ܂ ܒܢܒܝܘܬܐ ܐܬܢܛܪ ܠܡܗܘܐ ܐܝܟ ܡܘܫܐ ܪܒܐ܂ ܠܡܝܬܝܘ ܒܐܝܕܗ ܦܘܪܩܢܐ ܠܪ̈ܚܡܘܗܝ܂ ܘܠܡܬܦܪܥܘ ܡܢ ܓܒܪ̈ܐ ܣ̈ܢܐܐ܂ ܘܠܡܘܪܬܘ ܠܒܢܝ ܐܝܣܪܝܠ ܐܪܥܐ ܕܡܘܠܟܢܐ܂
46:02 [ai]	ܡܐ ܝܐܐ ܠܗ ܟܕ ܡܪܝܡ ܒܢܝܙܟܐ ܕܒܐܝܕܗ܂ ܘܟܕ ܡܢܝܦ ܥܠ ܡܕܝܢܬܐ܂
46:03 [ai]	ܡܢܘ ܡܫܟܚ ܠܡܩܡ ܩܕܡܘܗܝ܂ ܡܛܠ ܕܩܪܒܗ ܕܡܪܝܐ ܗܘ ܥܒܕ܂
46:04 [ai]	ܡܛܠ ܕܒܐܝ̈ܕܘܗܝ ܩܡ ܫܡܫܐ܂ ܘܗܘܐ ܝܘܡܐ ܚܕ ܬܪ̈ܝܢ ܝܘ̈ܡܝܢ܂
46:05 [ai]	ܡܛܠ ܕܨܠܝ ܩܕܡ ܡܪܝܐ܂ ܘܥܢܝܗܝ ܘܝܗܒ ܒܐܝܕܗ ܬܘܩܦܐ ܘܥܢܝܗܝ ܒܟܐܦ̈ܐ ܕܒܪܕܐ܂ ܘܟܒܪܝܬܐ ܡܢ ܫܡܝܐ ܐܚܬ܂
46:06 [ai]	ܘܚܒܛ ܥܠ ܥܡܐ ܣܢܐܐ ܘܐܘܒܕ ܠܟܠܗܘܢ܂ ܘܝܕܥܘ ܟܠܗܘܢ ܥܡ̈ܡܐ ܚܪ̈ܡܐ܂ ܕܐܠܗܐ ܗܘ܃ ܐܩܪܒ ܥܡܗܘܢ܂ ܘܐܦ ܗܘ ܫܠܡ ܒܬܪ ܐܠܗܐ܂
46:07 [ai]	ܘܒܝܘ̈ܡܝ ܡܘܫܐ ܥܒܕ ܛܝܒܘܬܐ܂ ܗܘ ܘܟܠܒ ܒܪ ܝܘܦܢܐ܂ ܠܡܩܡ ܒܬܘܪܥܬܐ ܕܥܡܐ ܠܡܗܦܟܘ ܟܢܘܫܬܐ܂ ܘܠܡܒܛܠܘ ܛܒܐ ܒܝܫܐ ܡܢ ܐܪܥܐ ܕܡܘܠܟܢܐ܂
46:08 [ai]	ܘܗܢܘܢ ܒܠܚܘܕܝܗܘܢ ܐܬܦܨܝܘ ܡܢ ܫܬܡܐܐ ܐ̈ܠܦܝܢ܂ ܠܡܥܠܘ ܐܢܘܢ ܠܝܪܬܘܬܗܘܢ܂ ܠܐܪܥܐ ܕܡܪܕܝܐ ܚܠܒܐ ܘܕܒܫܐ܂
46:09 [ai]	ܘܝܗܒ ܠܟܠܒ ܬܘܩܦܐ ܘܥܕܡܐ ܠܣܝܒܘܬܗ ܐܬܩܝܡ ܥܡܗ ܠܡܫܠܛܘܬܗ ܥܠ ܬܘܩܦܗ ܕܐܪܥܐ܂ ܘܐܦ ܙܪܥܗ ܢܐܪܬ ܝܘܪܬܢܐ܂
46:10 [ai]	ܡܛܠ ܕܢܕܥ ܙܪܥܗ ܕܝܥܩܘܒ܂ ܕܫܠܡ ܢܡܘܣܗ ܕܐܠܗܐ ܘܕܝܢܘ̈ܗܝ܂
46:11 [ai]	ܓܒܪ ܓܒܪ܂ ܟܠ ܕܠܐ ܛܥܐ ܠܒܗܘܢ ܘܠܐ ܗܦܟ ܡܢ ܢܡܘܣܗ ܕܐܠܗܐ܂ ܢܗܘܐ ܕܘܟܪܢܗܘܢ ܠܒܘܪܟܬܐ܂
46:12 [ai]	ܘܢܙܗܪܘܢ ܓܪ̈ܡܝܗܘܢ ܐܝܟ ܫܘ̈ܫܢܐ܂ ܘܢܫܒܩܘܢ ܫܡܗ ܛܒܐ ܠܒܢ̈ܝܗܘܢ܃ ܘܠܟܠܗ ܥܡܐ ܬܫܒܘܚܬܗܘܢ ܀ܸ
46:13 [ai]	ܘܪܚܝܡ ܠܒܪܝܗ ܡܢ ܕܐܫܬܐܠ ܡܢ ܟܪܣܗ ܕܐܡܗ܂ ܢܙܝܪܐ ܒܢܒܝܘܬܐ ܫܡܘܐܠ ܕܝܿܢܐ ܘܟܗܢܐ܂ ܕܒܡܠܬܗ ܬܩܢܬ ܡܠܟܘܬܐ ܘܡܫܚ ܫܠܝܛܢ̈ܐ ܘܡ̈ܠܟܐ ܠܥܡܐ܂
46:14 [ai]	ܒܢܡܘܣܗ ܦܩܕ ܟܢܘܫܬܐ܂ ܐܝܟܢܐ ܕܦܩܕ ܡܪܗ ܕܝܥܩܘܒ܂
46:16 [ai]	ܘܐܦ ܗܘ ܬܒܪ ܣܢ̈ܐܐ ܡܢ ܟܠܗܘܢ ܚܕܪ̈ܘܗܝ ܒܡܣܩܗ ܐܡܪܐ ܕܚܠܒܐ܂
46:17 [ai]	ܘܪܥܡ ܒܫܡܝܐ ܡܪܝܐ ܘܒܦܩܥܐ ܚܣܝܢܐ ܐܫܡܥ ܩܠܗ܂
46:18 [ai]	ܘܬܒܪ ܟܠܗܘܢ ܫ̈ܠܝܛܢܐ ܕܨܘܪ܂ ܘܐܘܒܕ ܟܠܗܘܢ ܛܪ̈ܘܢܐ ܕܦܠܫ̈ܬܝܐ܂
46:19 [ai]	ܘܒܙܒܢܐ ܕܡܬܢܝܚ ܥܠ ܥܪܣܗ܂ ܐܣܗܕ ܩܕܡ ܡܪܝܐ ܘܩܕܡ ܡܫܝܚܗ܂ ܕܫܘܚܕܐ ܘܩܘܪܒܢܐ ܡܢ ܐܢܫ ܠܐ ܢܣܒ܂ ܘܟܠܒܣܪ ܠܐ ܐܣܗܕ ܥܠܘܗܝ܂
46:20 [ai]	ܘܡܢ ܒܬܪ ܡܘܬܗ ܐܫܬܐܠ܂ ܘܚܘܝ ܠܡܠܟܐ ܐܘܪܚܗ܂ ܘܐܪܝܡ ܡܢ ܐܪܥܐ ܩܠܗ ܒܢܒܝܘܬܐ ܠܡܒܛܠܘ ܚܛܗ̈ܐ܂

next chapter