← Back
The Comprehensive Aramaic Lexicon
← Return to the Text Browser
click on the file description for more information
62067: Tobit

Click on a word for lexical analysis.
Click on a red-colored coordinate for comments and/or translations of the line
View in Serto
Ask AI about a passage
Hide manuscript variants

previous chapter


14:01 [ai]ܘܫܠܝ ܡܢ ܕܠܡܘܕܝܘ ܛܘܒܝܛ܂܂܂
14:02 [ai]ܘܐܝܬܘܗܝ ܗܘ ܒܪ ܫ̈ܢܝܐ ܚܡܫܝܢ ܘܬܡܢܐܼ ܟܕ ܐܘܒܕ ܚܙܝܐ܂ ܘܒܬܪ ܫ̈ܢܝܐ ܬܡܢܐ ܚܼܙܐ܂ ܘܥܿܒܕ ܗܘܐ ܡܪ̈ܚܡܢܘܬܐܼ܂ ܘܐܘܣܦ ܠܡܕܚܠ ܠܡܪܝܐ ܐܠܗܐ܂ ܘܡܘܕܐ ܗܘܐ ܠܗ܂܂
14:03 [ai]ܪܘܪܒܐܝܬ ܕܝܢ ܣܐܒܼ܂ ܘܩܪܐ ܠܒܪܐ ܕܝܠܗܼ܂ ܘܐܡܪ ܠܗ܂ ܒܪܝ܂ ܗܐ ܣܐܒܬ܂ ܘܠܘܬ ܗܿܝ ܕܐܚܙܘܩ ܡܢ ܚܝ̈ܐ ܐܿܝܬܝ܂ ܣܒ ܠܒܢ̈ܝܐ ܕܝܠܟܼ܂܂
14:04 [ai]ܘܙܠ ܠܡܕܝ ܒܪܝ܂ ܡܛܠ ܕܡܦܣ ܐܢܐ ܒܟܠܗܝܢ ܗܢܝܢ ܕܡܠܠ ܝܘܢܢ܂ ܗܿܘ ܢܒܝܐ ܡܛܠ ܢܝܢܘܐ܂ ܡܛܠ ܕܡܬܗܦܟܐ܂ ܒܡܕܝ ܕܝܢ ܢܗܘܐ ܐܝܬ ܫܝܢܐ ܡܠܘܢ܂ ܥܕܡܐ ܠܙܒܢܐ܂ ܘܕܐܚ̈ܐ ܕܝܠܢ܂ ܒܐܪ̈ܥܬܐ ܢܬܒܕܪܘܢ ܡܢ ܐܪܥܐ ܛܒܬܐ܂ ܘܐܘܪܫܠܡ ܬܗܘܐ ܚܪܒܬܐܼ܂ ܘܗܝܟܠܐ ܕܐܠܗܐ ܕܒܗܿ ܢܐܩܕܼ܂܂ ܘܚܪܒܐ ܢܗܘܐ ܥܕܡܐ ܠܙܒܢܐ܂܂
14:05 [ai]ܘܬܘܒ ܢܪܚܡ ܥܠܝܗܘܢ ܐܠܗܐܼ܂ ܘܢܗܦܟ ܐܢܘܢ ܠܐܪܥܐ܂ ܘܢܒܢܘܢܝܗܝ ܠܒܝܬܐܼ܂ ܠܘ ܐܝܟ ܗܿܘ ܩܕܡܝܐ ܥܕܡܐ ܕܢܬܡܠܘܢ ܙܒ̈ܢܐ ܕܥܠܡܐ܂܂ ܘܒܬܪ ܗܠܝܢ ܢܗܦܟܘܢ ܡܢ ܫ̈ܒܝܐܼ܂ ܘܢܒܢܘܢ ܠܐܘܪܫܠܡ ܡܝܩܪܐܝܬ܂ ܘܒܝܬܗ ܕܐܠܗܐ ܒܗܿ ܢܬܒܼܢܐ ܠܟܠܗܘܢ ܕܪ̈ܐ ܕܥܠܡܐ܃ ܒܒܢܝܢܐ ܡܫܒܚܐܼ܂ ܐܝܟܢܐ ܕܡܠܠܘ ܡܛܠܬܗܿ ܢܒܝ̈ܐ܂
14:06 [ai]ܘܟܠܗܘܢ ܥܡ̈ܡܐ ܢܬܦܿܢܘܢ ܫܪܝܪܐܝܬ ܠܡܕܚܠ ܠܡܪܝܐ ܐܠܗܐ܂ ܢܛܡܪܘܢ ܓܝܪ ܠܦܬܟܪ̈ܐ ܕܝܠܗܘܢ܂܂
14:07 [ai]ܘܢܒܪܟܘܢ ܟܠܗܘܢ ܥܡ̈ܡܐ ܠܡܪܝܐ܂ ܘܥܡܐ ܢܘܕܐ ܠܐܠܗܐ܂ ܘܢܪܡܪܡ ܡܪܝܐ ܠܥܡܐ ܕܝܠܗܼ܂ ܘܢܚܕܘܢ ܟܠܗܘܢ ܗܿܢܘܢ ܕܡܚܒܝܢ ܠܡܪܝܐ ܐܠܗܐܿ܂ ܒܫܪܪܐ ܘܒܙܕܝܩܘܬܐ܂ ܟܕ ܥܿܒܕܝܢ ܪ̈ܚܼܡܐ ܠܐܚ̈ܐ ܕܝܠܗܘܢ܂܂
14:08 [ai]ܘܗܫܐ ܒܪܝ܂ ܙܠ ܡܢ ܢܝܢܘܐ܂ ܡܛܠ ܕܡܢ ܟܠ ܦܪܘܣ ܢܗܘܝܢ܃ ܗܠܝܢ ܕܡܠܠ ܗܿܘ ܢܒܝܐ܂܂
14:09 [ai]ܐܢܬ ܕܝܢ ܛܪ ܠܢܡܘܣܐ ܘܠܦܘܩܕ̈ܢܐܼ܂ ܘܗܼܘܝ ܪܚܿܡ ܪ̈ܚܿܡܐܼ ܘܙܕܝܩܐ ܐܝܟܢܐ ܕܫܦܝܪ ܠܟ ܢܗܘܐ܂܂
14:10 [ai]ܘܩܒܘܪܝܢܝ ܛܒܐܝܬ܂ ܘܠܐܡܐ ܕܝܠܟ ܥܡܝ ܘܠܐ ܬܘܒ ܬܥܡܪܘܢ ܒܢܝܢܘܐ ܒܪܝ܂܂ ܚܙܝ ܡܢܐ ܥܒܼܕ ܐܕܡܿ܂ ܠܐܚܝܚܘܪ ܗܿܘ ܕܪܒܝܗܿ܂ ܟܕ ܡܢ ܢܘܗܪܐ ܐܝܬܝܗ ܠܚܫܘܟܐܿ܂ ܘܟܠܗܝܢ ܗܠܝܢ ܕܦܪܥܗ܂ ܘܠܐܚܝܚܘܪ ܡܿܢ ܫܘܙܒܼ܂ ܠܗܿܘ ܕܝܢ ܦܘܪܥܢܐ ܐܬܦܿܢܝ܂ ܘܗܼܘ ܢܚܼܬ ܠܚܫܘܟܐ܂ ܡܢܼܫܐ ܥܒܼܕ ܡܪܚܡܢܘܬܐܼ܂ ܘܐܫܬܘܙܒ ܡܢ ܦܚܐ ܕܡܘܬܐܿ܂ ܗܿܘ ܕܩܒܼܥ ܗܼܘ ܠܗ܂ ܐܕܡ ܕܝܢ ܢܦܼܠ ܒܦܚܐ ܘܐܒܕ܂܂܂
14:11 [ai]ܘܗܫܐ ܒܢ̈ܝ܂ ܚܙܘ ܡܢܐ ܡܪܚܡܢܘܬܐ ܥܿܒܕܐܼ܂ ܘܡܢܐ ܙܕܝܩܘܬܐ ܡܦܨܝܐ܂ ܘܟܕ ܗܠܝܢ ܗܼܘ ܐܡܿܪ ܗܼܘܐܼ܂ ܐܘܦܝܬ ܢܦܫܐ ܕܝܠܗ ܥܠ ܥܪܣܐ܂ ܐܝܬܘܗܝ ܗܘܝ ܕܝܢ ܒܪ ܫ̈ܢܝܐܿ܂ ܡܐܐܿ ܘܚܡܫܝܢ ܘܬܡܢܐ܂ ܘܩܒܪܗ ܒܪܗ ܡܫܒܚܐܝܬ܂܂
14:12 [ai]ܘܟܕ ܡܝܬܬ ܚܢܢܐܼ܂ ܩܒܪܗܿ ܥܡ ܐܒܐ ܕܝܠܗ܂ ܐܙܠ ܕܝܢ ܛܘܒܝܐ ܥܡ ܐܢܬܬܐ ܕܝܠܗ ܘܒܢ̈ܝܐ ܠܐܩܒܐܛܢܐ ܠܘܬ ܪܥܘܐܝܠ ܚܡܼܐ ܕܝܠܗܼ܂܂
14:13 [ai]ܘܣܐܒ ܡܝܩܪܐܝܬ܂ ܘܩܒܼܪ ܠܚܡ̈ܗܐ ܕܝܠܗ ܡܫܒܚܐܝܬܼ܂ ܘܝܪܬ ܠܐܘܣܝܐ ܕܝܠܗܘܢ܂ ܘܕܛܘܒܝܛ ܐܒܐ ܕܝܠܗ܂܂
14:14 [ai]ܘܡܝܬ ܒܪ ܫ̈ܢܝܐ ܡܐܐ ܘܫܒܥܿ ܒܐܩܒܐܛܢܐ ܕܡܕܝ܂܂
14:15 [ai]ܘܫܡܥ ܩܕܡ ܕܢܡܘܬ ܠܐܒܕܢܐ ܕܢܝܢܘܐܿ܂ ܠܗܿܝ ܕܫܒܗܿ ܗܼܘܐ ܢܒܘܟܕܢܨܪ ܘܐܚܫܝܪܫ܂ ܘܚܕܝ ܗܘܐ ܩܕܡ ܕܢܡܘܬ ܥܠ ܢܝܢܘܐ܂