← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information
62069: P Baruch

Click on a word for lexical analysis.
Click on a red-colored coordinate for comments and/or translations of the line
View in Serto
Ask AI about a passage
Hide manuscript variants

01:01 [ai]ܘܗܠܝܢ ܡ̈ܠܝܗܿ ܕܐܓܪܬܐ ܗܕܐܼ܂ ܕܟܬܼܒ ܒܪܘܟ ܒܪ ܢܪܝܐ ܒܪ ܡܥܣܝܐܿ܂ ܒܪ ܨܕܩܝܐ ܒܪ ܫܼܪܝܐ ܒܪ ܚܠܩܝܐ܂ ܗܠܝܢ ܟܬܼܒ ܠܒܒܠܿ܂
01:02 [ai]ܒܫܢܬ ܚܡܫ ܒܫܒܥܬܐ ܒܝܪܚܐ܂ ܒܙܒܢܐ ܗܘܿ ܕܫܒܘ ܟ̈ܠܕܝܐ ܠܐܘܪܫܠܡ܂ ܘܐܘܩܕܘܗܿ ܒܢܘܪܐ܂
01:03 [ai]ܘܩܼܪܐ ܒܪܘܟ ܦܬ̈ܓܡܐ ܗܠܝܢ ܕܟܬܝܒܝܢ ܒܟܪܟܐ ܗܢܐܿ܂ ܒܐ̈ܕܢܝ ܝܘܟܢܝܐ ܒܪ ܝܘܝܩܝܡ ܡܿܠܟܐ ܕܝܗܘܕܐ܂ ܘܒܐ̈ܕܢܝ ܟܠܗ ܥܡܐ ܕܐܬܿܝܢ ܠܡܫܡܥ ܠܗܢܐ ܟܪܟܐ܂
01:04 [ai]ܘܒܐ̈ܕܢܝ ܪ̈ܘܪܒܢܐ ܪ̈ܘܪܒܢܝ ܡܿܠܟܐ܂ ܘܒܐ̈ܕܢܝ ܣܒ̈ܐ܂ ܘܒܐ̈ܕܢܝ ܟܠܗ ܥܡܐ܂ ܡܢ ܙܥܘܪܐܼ ܘܥܕܡܐ ܠܪܒܐ܂ ܟܠܗܘܢ ܐܝܠܝܢ ܕܥܡܪܝܢ ܒܒܒܠ܂ ܘܥܠ ܢܗܪܐ ܕܨܘܪ܂
01:05 [ai]ܘܒܟܿܝܢ ܗܘܘܿ ܘܨܿܡܝܢ ܘܡܨܠܝܢ ܩܕܡ ܡܪܝܐ܂
01:06 [ai]ܘܟܢܿܫ ܟܣܦܐ ܐܢܫ ܐܝܟ ܕܡܿܛܐ ܗܘܐ ܒܐ̈ܝܕܘܗܝ܂ ܘܐܝܟ ܕܡܫܟܚܼ܂
01:07 [ai]ܘܫܕܪ ܠܐܘܪܫܠܡ ܠܝܘܝܩܝܡ ܒܪ ܚܠܩܝܐ ܒܪ ܫܠܘܡ ܟܗܢܐ܂ ܘܠܘܬ ܟܗ̈ܢܐܼ ܘܠܘܬ ܟܠܗ ܥܡܐܿ܂ ܐܝܠܝܢ ܕܐܫܬܟܼܚܘ ܥܡܗ ܒܐܘܪܫܠܡܿ܂
01:08 [ai]ܟܕ ܫܩܼܠ ܡܐ̈ܢܐ ܕܒܝܬܗ ܕܡܪܝܐ ܐܝܠܝܢ ܕܐܦܩ ܡܢ ܗܝܟܠܐܿ܂ ܐܝܟ ܕܢܗܦܟ ܐܢܘܢ ܠܐܪܥܐ ܕܝܗܘܕܐ ܒܥܣܪܬܐ ܒܢܝܣܢ܂ ܡܐ̈ܢܐ ܕܥܒܼܕ ܨܕܩܝܐ ܒܪ ܝܘܫܝܐ ܡܿܠܟܐ ܕܝܗܘܕܐ܂
01:09 [ai]ܡܢ ܒܬܪ ܕܫܒܼܐ ܢܒܘܟܕܢܨܪ ܡܿܠܟܐ ܠܝܘܟܢܝܐܿ܂ ܘܠܪ̈ܘܪܒܢܐ ܘܠܕܚܫ̈ܐܿ܂ ܘܠܐܘ̈ܡܢܐ ܘܠܚ̈ܝܠܘܬܐ ܕܡܢ ܐܘܪܫܠܡܿ܂ ܘܐܘܒܠܼ ܐܢܘܢ ܠܒܒܠ܂
01:10 [ai]ܘܐܡܪܝܢ܂ ܗܐ ܫܕܪܢ ܠܟܘܢ ܟܣܦܐ܂ ܙܒܢܼܘ ܒܟܣܦܐ ܝܩܕܐ ܫܠܡܐ ܚܠܦ ܚܛܗܐ ܘܠܒܘܢܬܐܼ܂ ܘܥܒܕܘ ܩܘܪܒܢܐܼ ܘܐܣܩܘ ܥܠ ܡܕܒܚܗ ܕܡܪܝܐ ܐܠܗܢ܂
01:11 [ai]ܘܨܠܘ ܥܠ ܚ̈ܝܘܗܝ ܕܢܒܘܟܕܢܨܪ ܡܿܠܟܐ ܕܒܒܠܼ܂ ܘܥܠ ܚ̈ܝܘܗܝ ܕܒܠܛܫܨܪ ܒܪܗܼ܂ ܘܢܗܘܘܢ ܝܘܡ̈ܬܗܘܢ ܥܠ ܐܪܥܐܼ ܐܝܟ ܝܘܡ̈ܬܐ ܕܫܡܝܐ܂
01:12 [ai]ܘܢܬܠ ܠܢ ܡܪܝܐ ܚܝܠܐ ܕܢܦܠܚܝܘܗܝܼ ܘܢܢܗܪ̈ܢ ܥܝܢ̈ܝܢ܂ ܘܢܚܼܐ ܬܚܝܬ ܛܠܠܗ ܕܢܒܘܟܕܢܨܪ ܡܿܠܟܐ ܕܒܒܠܼ ܘܕܒܠܛܫܨܪ ܒܪܗ܂ ܘܕܢܦܠܘܚ ܐܢܘܢ ܝܘ̈ܡܬܐ ܣܓ̈ܝܐܐܼ܂ ܘܢܫܟܼܚ ܪ̈ܚܡܼܐ ܩܕܡܝܗܘܢ܂
01:13 [ai]ܘܨܠܘܼ ܘܒܥܼܘ ܥܠܝܢ ܡܢ ܡܪܝܐ ܐܠܗܢ܂ ܡܛܠ ܕܚܼܛܝܢ ܩܕܡ ܡܪܝܐ ܐܠܗܢܼ܂ ܘܠܐ ܗܦܟܼܬ ܚܡܬܗ ܕܡܪܝܐ ܐܿܠܗܢ ܘܪܘܓܙܗ ܡܢܢܿ܂ ܥܕܡܐ ܠܝܘܡܐ ܕܝܘܡܢܐ܂
01:14 [ai]ܘܬܩܪܘܢ ܟܪܟܐ ܗܢܐ ܕܫܕܪܢ ܠܘܬܟܘܢܼ܂ ܬܘܕܘܢ ܚܠܦܝܢ ܒܒܝܬܗ ܕܡܪܝܐ ܩܕܡ ܡܪܝܐܿ܂ ܒܝܘܡܐ ܕܥܕܥܐܕܐ ܘܒܝ̈ܘܡܬܗ ܕܡܪܝܐ܂
01:15 [ai]ܘܬܐܡܪܘܢ ܕܕܡܪܝܐ ܗܝ ܐܠܗܢ ܙܕܝܩܘܬܐ܂ ܘܕܝܠܢ ܒܗܬܬ ܐ̈ܦܐܼ ܐܝܟ ܝܘܡܐ ܗܢܐ ܕܝܘܡܢܐ܂ ܠܓܒܪ̈ܐ ܕܝܗܘܕܐ ܘܠܥܡܘܪ̈ܝܗܿ ܕܐܘܪܫܠܡ܂
01:16 [ai]ܘܠܡ̈ܠܟܝܢܿ ܘܠܪ̈ܘܪܒܢܝܢ܂ ܘܠܟܗ̈ܢܝܢܿ ܘܠܢܒ̈ܝܝܢܼ ܘܠܐܒ̈ܗܝܢ܂
01:17 [ai]ܐܝܠܝܢ ܕܚܛܝܢ ܩܕܡ ܡܪܝܐ ܐܠܗܢ ܘܠܐ ܫܡܥܢܝܗܝܼ ܘܫܛܢ ܦܘܩ̈ܕܢܘܗܝ܂
01:18 [ai]ܘܠܐ ܐܬܛܦܝܣܢܼ ܘܠܐ ܫܡܥܼܢ ܒܩܠܗ ܕܡܪܝܐ ܐܠܗܢܿ܂ ܕܢܗܿܠܟ ܒܦܘܩ̈ܕܢܘܗܝ ܕܡܪܝܐ ܐܠܗܢ ܕܝܗܼܒ ܩܕܡ ܐ̈ܦܝܢ܂
01:19 [ai]ܡܛܠ ܕܡܢ ܝܘܡܐ ܕܐܦܩ ܡܪܝܐ ܠܐ̈ܒܗܝܢ ܡܢ ܐܪܥܐ ܕܡܨܪܝܢ ܘܥܕܡܐ ܠܝܘܡܐ ܗܢܐܼ܂ ܗܘܼܝܢ ܗܘܝܢܼ ܕܠܐ ܡܬܛܦܝܣܝܢ ܠܡܪܝܐ ܐܠܗܢ܂ ܘܡܪܕܢܼ ܐܝܟ ܕܠܐ ܢܫܡܼܥ ܒܩܠܗ܂
01:20 [ai]ܘܐܬܬ ܥܠܝܢ ܒܝܫܼܬܐ ܘܠܘܛܬܐܿ܂ ܗܿܝ ܕܦܩܿܕ ܡܪܝܐ ܠܡܘܫܐ ܥܒܕܗܿ܂ ܒܝܘܡܐ ܕܐܦܼܩ ܠܐ̈ܒܗܬܢ ܡܢ ܐܪܥܐ ܕܡܨܪܝܢܿ܂ ܠܡܬܠ ܠܢ ܐܪܥܐ ܕܡܪܕܝܐ ܚܠܒܐ ܘܕܒܫܐ܂
01:21 [ai]ܘܠܐ ܫܡܥܼܢ ܒܩܠܗ ܕܡܪܝܐ ܐܠܗܢܿ܂ ܠܡܥܒܕ ܟܠܗܘܢ ܦܬ̈ܓܡܐ ܕܥܒܼ̈ܕܘܗܝ ܢܒ̈ܝܐ ܕܫܕܪ ܠܘܬܢ܂
01:22 [ai]ܘܗܠܟܢ ܐܢܫ ܐܢܫ ܒܨܒܝܢ̈ܝ ܠܒܗ ܒܝܼܫܐܿ܂ ܠܡܿܦܠܚ ܠܐ̈ܠܗܐ ܢܘܟܪ̈ܝܐܿ܂ ܕܢܥܒܕ ܒܝܫܼܬܐ ܩܕܡ ܥܝ̈ܢܘܗܝ ܕܡܪܝܐ ܐܠܗܢ܂

next chapter