The Comprehensive Aramaic Lexicon

10:01 [ai]	ܘܗܼܘܐ ܡܢ ܒܬܪ ܫܒܥܐ ܝܘܡ̈ܝܢܼ܂ ܗܼܘܐ ܥܠܝ ܦܬܓܡܗ ܕܐܠܗܐ ܘܐܡܼܪ ܠܝ܂
10:02 [ai]	ܐܡܼܪ ܠܐܪܡܝܐ܂ ܕܢܐܙܠ ܘܢܩܝܡ ܫܒܝܬܗ ܕܥܡܐ ܥܕܡܐ ܠܒܒܠ܂
10:03 [ai]	ܐܢܬ ܕܝܢ ܟܬܪ ܗܪܟܐ ܒܚܘܪܒܗܿ ܕܨܗܝܘܢ܂ ܘܐܢܐ ܡܚܘܐ ܐܢܐ ܠܟ ܡܢ ܒܬܪ ܗܠܝܢ ܝܘܡ̈ܬܐܼ܂ ܡܕܡ ܕܥܬܝܕ ܕܢܓܕܫ ܒܐܚܪܝܬ ܝܘܡ̈ܬܐ܂
10:04 [ai]	ܘܐܿܡܪܬ ܠܐܪܡܝܐ ܐܝܟ ܕܦܩܕܢܝ ܡܪܝܐ܂
10:05 [ai]	ܘܗܼܘ ܕܝܢ ܐܼܙܠ ܥܡ ܥܡܐ܂ ܐܢܐ ܕܝܢ ܒܪܘܟܼ ܗܿܦܟܬ ܐܬܿܝܬ܂ ܘܝܬܿܒܬ ܩܕܡ ܬܪ̈ܥܘܗܝ ܕܗܝܟܠܐ܂ ܘܐܿܠܝܬ ܐܘܠܝܬܐ ܗܕܐ ܥܠ ܨܗܝܘܢ ܘܐܡܿܪܬ
10:06 [ai]	ܛܘܒܘܗܝ ܠܗܿܘ ܕܠܐ ܐܬܝܠܕ܂ ܐܘܿ ܠܗܿܘ ܕܐܬܝܠܕ ܘܡܝܬ܂
10:07 [ai]	ܠܢ ܕܝܢ ܠܐܝܠܝܢ ܕܚܝ̈ܝܢ ܘܝ ܠܢ܂ ܕܚ̈ܙܝܢ ܥܩ̈ܬܗܿ ܕܨܗܝܘܢ܂ ܘܡܕܡ ܕܓܕܫܗܿ ܠܐܘܪܫܠܡ܂
10:08 [ai]	ܐܩܿܪܐ ܠܣܝܪܝܢܘܣ ܡܢ ܝܡܐ ܘܐܢܬܝܢ ܠܠܝ̈ܬܐ ܡܢ ܡܕܒܪܐ ܐܬ̈ܝܢ ܘܫܐ̈ܕܐ ܘܝܪ̈ܘܪܐ ܡܢ ܥܒ̈ܐ܂ ܐܬܬܥܝܪܘ ܘܐܣܘܪܘ ܚܨ̈ܝܟܘܢ ܠܡܪܩܘܕܬܐ܂ ܘܣܒܘ ܥܡܝ ܐܘ̈ܠܝܬܐ ܘܐܪܩܕܘܿ ܥܡܝ܂
10:09 [ai]	ܐܢܬܘܢ ܦܠܚ̈ܐ ܠܐ ܬܙܪܥܘܢ ܬܘܒ܂ ܘܐܢܬ ܐܪܥܐܼ ܠܡܢܐ ܝܗܿܒܬ ܦܐܪ̈ܐ ܕܥ̈ܠܠܬܟܝ܂ ܐܚܘܕܝ ܒܓܘܟܝ ܚܠܝܘܬܐ ܕܡܙܘܢܝ̈ܟܝ܂
10:10 [ai]	ܘܐܢܬ ܓܦܬܐ ܠܡܢܐ ܡܿܘܣܦܬܝ ܕܬܬܠܝܢ ܚܡܼܪܟܝ܂ ܕܠܐ ܬܘܒ ܡܬܩܪܒ ܡܢܗܿ ܒܨܗܝܘܢ܂ ܘܠܐ ܬܘܒ ܪܝܫ ܦܐܪ̈ܐ ܡܬܩܪܒܝܢ܂
10:11 [ai]	ܘܐܢܬܘܢ ܫܡܝܐ ܐܚܘܕܘ ܛܠܟܘܢ܂ ܘܠܐ ܬܦܬܚܘܢ ܐܘܨܪ̈ܐ ܕܡܛܪܐ܂
10:12 [ai]	ܘܐܢܬ ܫܡܼܫܐ ܐܚܘܕ ܢܘܗܪܗܘܢ ܕܙܠܝܩ̈ܝܟ܂ ܘܐܢܬ ܣܗܪܐ ܐܕܥܟ ܣܘܓܐܐ ܕܢܘܗܪܟ܂ ܠܡܢܐ ܓܝܪ ܬܘܒ ܢܕܢܚ ܢܘܗܪܐ ܐܝܿܟܐ ܕܢܘܗܪܗܿ ܕܨܗܝܘܢ ܚܼܫܟ܂
10:13 [ai]	ܘܐܢܬܘܢ ܚ̈ܬܢܐ ܠܐ ܬܥܠܘܢ܂ ܘܒܬܘ̈ܠܬܐ ܒܟ̈ܠܝܠܐܿ ܠܐ ܢܨܛܒ̈ܬܢ ܘܐܢܬܝܢ ܢܫ̈ܐ ܠܐ ܬܨ̈ܠܝܢ ܕܬܐ̈ܠܕܢ܂
10:14 [ai]	ܢܬܒ̈ܣܡܢ ܓܝܪ ܝܬܝܪܐܝܬ ܥܩܪ̈ܬܐ܂ ܘܢܚ̈ܕܝܢ ܐܝܠܝܢ ܕܠܝܬ ܠܗܝܢ ܒ̈ܢܝܐ܂ ܘܐܝܠܝܢ ܕܐܝܬ ܠܗܝܢ ܒܢ̈ܝܐ ܢܬܬܥ̈ܝܩܢ܂
10:15 [ai]	ܠܡܢܐ ܓܝܪ ܝܠܕ̈ܢ ܒܟܐܒ̈ܐ ܘܩܒܪ̈ܢ ܒܬܐܢ̈ܚܬܐ܂
10:16 [ai]	ܐܘ ܠܡܢܐ ܬܘܒ ܗܿܘܝܢ ܠܗܘܢ ܒ̈ܢܝܐ ܠܒܢܝܢܫܐ܂ ܐܘ ܙܪܥܗ ܕܟܝܢܗܘܢ ܠܡܢܐ ܬܘܒ ܡܫܬܡܗ܂ ܐܝܿܟܐ ܕܗܕܐ ܐܡܐ ܚܪܒܼܬ܂ ܘܒܢ̈ܝܗܿ ܐܫܬܒܝܘ܂
10:17 [ai]	ܡܢ ܗܫܐ ܠܐ ܬܘܒ ܬܐܡܪܘܢ ܥܠ ܫܘܦܪܐ܂ ܘܠܐ ܬܬܢܘܢ ܥܠ ܝܐܝܘܬܐ܂
10:18 [ai]	ܐܢܬܘܢ ܕܝܢ ܟܗ̈ܢܐ ܣܒܘ ܩܠܝ̈ܕܐ ܕܒܝܬ ܡܩܕܫܐ܂ ܘܫܕܘ ܐܢܘܢ ܠܪܘܡܗܘܢ ܕܫܡܝܐ܂ ܘܗܒܘ ܐܢܘܢ ܠܡܪܝܐ܂ ܘܐܡܼܪܘ܂ ܛܪ ܒܝܬܟ ܐܢܬ܂ ܚܢܢ ܓܝܪ ܗܐ ܐܫܬܟܚܢ ܪ̈ܒܝ ܒܬ̈ܐ ܕܓ̈ܠܐ܂
10:19 [ai]	ܘܐܢܬܝܢ ܒܬܘ̈ܠܬܐ ܕܥ̈ܙܠܢ ܒܘܨܐ܂ ܘܫܪ̈ܝܐ ܥܡ ܕܗܒܐ ܕܐܘܦܝܪ܂ ܐܣܬܪܗܒܝܢ ܘܣ̈ܒܝܢ ܟܠܡܕܡ ܘܫܼܕ̈ܝܢ ܒܢܘܪܐ܂ ܕܬܘܒܠ ܐܢܘܢ ܠܘܬ ܗܿܘ ܕܥܼܒܕ ܐܢܘܢ܂ ܘܫܠܗܒܝܬܐ ܬܫܕܪ ܐܢܘܢ ܠܘܬ ܗܿܘ ܕܒܼܪܐ ܐܢܘܢ܂ ܕܠܐ ܢܫܬܠܛܘܢ ܒܗܘܢ ܒܥܠܕܒ̈ܒܐ ܀

next chapter