The Comprehensive Aramaic Lexicon

36:01 [ai]	ܘܟܕ ܐܡܿܪܬ ܗܠܝܢ ܕܡܿܟܬ ܬܡܢ܂ ܘܚܙܿܝܬ ܒܠܠܝܐ ܚܙܘܐܼ܂
36:02 [ai]	ܗܘܐ ܥܒܐ ܕܐܝ̈ܠܢܐ ܕܢܨܝܒ ܒܦܩܥܬܐ܂ ܘܚܕܝܪܝܢ ܗܘܘ ܠܗ ܛܘܪ̈ܐ ܪ̈ܡܿܐ ܘܩܫ̈ܝܐ ܕܫܩܝ̈ܦܐ܂ ܘܐܬܪܐ ܣܓܝܐܐ ܐܚܝܕ ܘܗܐ ܗܿܘ ܥܒܐ܂
36:03 [ai]	ܘܗܐ ܡܢ ܠܩܘܒܠܗ ܣܠܸܩܬ ܓܦܬܐ ܚܕܐ܂ ܘܡܢ ܬܚܘܬܝܗܿ ܢܦܩܿ ܗܘܐ ܡܒܘܥܐ ܒܢܝܚܐ܂
36:04 [ai]	ܘܡܼܛܐ ܕܝܢ ܗܿܘ ܡܒܘܥܐ ܥܕܡܐ ܠܥܒܐ܂ ܘܗܼܘܐ ܠܓ̈ܠܠܐ ܪ̈ܘܪܒܐ܂ ܘܐܛܝܦܘ ܗܠܝܢ ܓ̈ܠܠܐ ܠܗܿܘ ܥܿܒܐ܂ ܘܡܢ ܫܠܝܐ ܥܩܼܪܘ ܠܣܘܓܐܗ ܕܥܒܐ ܗܿܘ܂ ܘܣܚܼܦܘ ܠܟܠܗܘܢ ܛܘܼܪ̈ܐ ܕܚܕܪ̈ܘܗܝ܂
36:05 [ai]	ܘܪܘܡܗ ܕܥܒܐ ܡܬܡܟܟ ܗܘܐ܂ ܘܪܝܫܗܘܢ ܕܛܘܼܪ̈ܐ ܐܬܡܟܟ܂ ܘܛܒ ܐܬܚܝܠ ܡܒܘܥܐ ܗܿܘ܂ ܕܠܐ ܢܫܒܘܩ ܡܕܡ ܡܢ ܗܿܘ ܥܿܒܐ ܣܓܝܐܐ ܐܠܐ ܚܕ ܐܪܙܐ ܒܠܚܘܕ܂
36:06 [ai]	ܐܦ ܠܗ ܟܕ ܐܪܡܝ܂ ܘܠܣܘܓܐܗ ܕܥܒܐ ܗܿܘ ܐܘܒܕ ܘܥܼܩܪ܂ ܕܡܕܡ ܠܐ ܢܫܬܒܩ ܡܢܗ܂ ܐܦ ܠܐ ܐܬܪܗ ܢܬܝܕܥ܂ ܗܼܝ ܕܝܢ ܗܿܝ ܓܦܬܐ ܐܿܬܝܐ ܗܘܬ ܥܡ ܡܒܘܥܐ ܒܫܠܝܐ ܘܒܢܝܚܐ ܣܓܝܐܐ܂ ܘܐܬܬ ܥܕܡܐ ܠܐܬܪܐ ܚܕ ܕܠܐ ܪܚܝܩ ܗܘܐ ܡܢ ܐܪܙܐ܂ ܘܠܐܪܙܐ ܟܕ ܪܡܼܐ ܩܪܒܘܗܝ ܠܘܬܗܼܿ܂
36:07 [ai]	ܘܚܿܙܝܬ ܘܗܐ ܦܬܚܬܸ ܦܘܡܗܿ ܓܦܬܐ ܗܿܝ܂ ܘܡܠܠܬܸ ܘܐܡܪܬܸ ܠܐܪܙܐ ܗܿܘ܂ ܠܐ ܗܘܐ ܐܢܬ ܗܘ ܐܪܙܐ ܕܐܫܬܼܚܪܬ ܡܢ ܥܒܐ ܕܒܝܼܫܬܐ܂ ܘܒܐܼܝܕܟ ܐܡܝܢܐ ܗܘܬ ܒܝܼܫܬܐ ܘܡܬܥܒܕܐ ܗܠܝܢ ܟܘܠܗܝܢ ܫܢ̈ܝܐ܂ ܘܛܿܒܬܐ ܠܐ ܡܡܬܘܡ܂
36:08 [ai]	ܘܡܬܚܝܠ ܗܼܘܝܬ ܥܠ ܕܠܐ ܕܝܠܟ܂ ܐܦ ܠܐ ܥܠ ܕܝܠܟ ܡܢ ܡܬܘܡ ܪܚܡܬ܂ ܘܡܿܬܚ ܗܼܘܝܬ ܐܘܚܕܢܟ ܥܠ ܐܝܠܝܢ ܕܪܚܝܩܝܢ ܡܢܟ܂ ܘܠܐܝܠܝܢ ܕܡܬܩܪܒܝܢ ܠܟ ܒܡܨܝ̈ܕܬܐ ܕܪܘܫܥܟ ܐܚܿܕ ܗܼܘܝܬ ܘܡܪܝܡ ܗܼܘܝܬ ܢܦܫܟ ܒܟܠ ܙܒܢ܂ ܐܝܟ ܗܿܘ ܕܠܐ ܡܫܟܚ ܕܢܬܥܩܪ܂
36:09 [ai]	ܗܫܐ ܕܝܢ ܣܪܗܒ ܙܒܢܟ ܘܡܛܝ ܥܕܢܟ܂
36:10 [ai]	ܙܠ ܗܟܝܠ ܐܦ ܐܢܬ ܐܪܙܐ ܒܬܪ ܥܒܐ܂ ܕܐܙܼܠ ܩܕܡܝܟ܂ ܘܗܼܘܝ ܥܡܗ ܚܠܼܐ܂ ܘܥܦܪܟܘܢ ܢܬܚܠܛ ܐܟܚܕܐ܂ ܘܕܡܼܟܘ ܗܫܐ ܒܥܩܬܐ ܘܫܠܘ ܒܬܫܢܝܩܐ܂ ܥܕܡܐ ܕܢܐܬܐ ܙܒܢܟ ܐܚܪܝܐ ܕܒܗ ܬܘܒ ܬܐܬܐ܂ ܘܝܬܝܪܐܝܬ ܬܫܬܢܩ ܃܃܀

next chapter