The Comprehensive Aramaic Lexicon

44:01 [ai]	ܘܐܿܙܠܬ ܡܢ ܬܡܢ ܐܢܐ ܒܪܘܟ܂ ܘܐܬܿܝܬ ܠܘܬ ܥܡܝ܂ ܘܩܿܪܝܬ ܠܒܪܝ ܒܘܟܪܝ܂ ܘܠܓܕܠܝܐ ܪܚܿܡܝ܂ ܘܠܫܒܥܐ ܡܢ ܣ̈ܒܐ ܕܥܡܐ܂ ܘܐܡܿܪܬ ܠܗܘܢ܂
44:02 [ai]	ܗܐ ܐܢܐ ܐܙܠ ܐܢܐ ܠܝ ܠܘܬ ܐܒܗ̈ܝ ܐܝܟ ܐܘܪܚܐ ܕܟܘܠܗܿ ܐܪܥܐ܂
44:03 [ai]	ܐܢܬܘܢ ܕܝܢ ܠܐ ܬܪܚܩܘܢ ܡܢ ܐܘܪܚܗ ܕܢܡܘܣܐ܂ ܐܠܐ ܢܛܿܪܘ ܘܙܗܪܘ ܠܥܡܐ ܕܐܫܬܚܪ܂ ܕܠܐ ܢܪܚܩܘܢ ܡܢ ܦܘܩܕܢ̈ܘܗܝ ܕܚܝܠܬܢܐ܂
44:04 [ai]	ܚܿܙܝܢ ܐܢܬܘܢ ܓܝܪ ܕܙܕܝܩ ܗܘ ܗܿܘ ܕܠܗ ܦܠܚܝܢ ܚܢܢ܂ ܘܒܐ̈ܦܐ ܠܐ ܢܣܿܒ ܓܒܘܠܢ܂
44:05 [ai]	ܘܚܙܘ ܡܕܡ ܕܓܕܫܗܿ ܠܨܗܝܘܢ܂ ܘܡܢܐ ܡܛܗܿ ܠܐܘܪܫܠܡ܂
44:06 [ai]	ܡܛܠ ܕܢܬܝܕܥ ܕܝܢܼܗ ܕܚܝܠܬܢܐܿ ܘܐܘܪ̈ܚܬܗ ܕܠܐ ܡܬܥ̈ܩܒܢ ܘܬܪ̈ܝܨܢ ܐܿܢ̈ܝܢ܂
44:07 [ai]	ܐܢ ܓܝܪ ܬܣܝܒܪܘܢ ܘܬܩܘܘܢ ܒܕܚܠܬܗ ܘܠܐ ܬܛܥܘܢ ܢܡܘܣܗ܂ ܡܬܚܠܦܝܢ ܥܠܝܟܘܢ ܙܒ̈ܢܐ ܠܛܿܒ̈ܬܐ܂ ܘܬܚܙܘܢ ܒܒܘܝܐܗܿ ܕܨܗܝܘܢ܂
44:08 [ai]	ܡܛܠ ܕܡܕܡ ܕܗܿܘܐ ܗܫܐ ܠܐ ܗܘܐ ܡܕܡ܂ ܡܕܡ ܕܝܢ ܕܥܬܝܕ ܕܢܗܘܐܼ܂ ܗܘܼܝܘ ܪܒ ܣܓܿܝ܂
44:09 [ai]	ܥܿܒܪ ܓܝܪ ܟܠܡܕܡ ܕܡܬܚܒܠ܂ ܘܐܙܿܠ ܟܠ ܡܐ ܕܡܐܿܬ ܘܡܬܛܥܐ ܟܘܠܗ ܙܒܢܐ ܕܗܫܐ܂ ܘܠܐ ܗܿܘܐ ܕܘܟܪܢ ܠܙܒܢܐ ܕܗܫܐ ܕܡܦܠܦܠ ܒܒܼܝ̈ܫܬܐ܂
44:10 [ai]	ܗܿܘ ܓܝܪ ܕܪܗܿܛ ܗܫܐ ܠܣܪܝܩܘܬܐ ܗܘ ܪܗܿܛ܂ ܘܗܿܘ ܕܡܨܠܚ ܒܥܓܠ ܢܦܿܠ ܘܡܬܡܟܟ܂
44:11 [ai]	ܡܕܡ ܓܝܪ ܕܥܬܝܕܼ ܗܿܘ ܗܘ ܡܬܒܥܐ܂ ܘܡܕܡ ܕܒܬܪ ܟܢ ܐܬܐܼ܂ ܥܠ ܗܿܘ ܗܘ ܡܿܣܒܪܝܢܢ܂ ܐܝܬ ܓܝܪ ܙܒܢܐ ܕܠܐ ܥܿܒܪ܂܂
44:12 [ai]	ܘܐܿܬܐ ܥܕܢܐ ܗܿܘ ܕܡܩܘܐ ܠܥܠܡ܂ ܘܥܠܡܐ ܚܕܬܐ܂ ܗܿܘ ܕܠܐܝܠܝܢ ܕܒܪܫܗ ܐܙܿܠܝܢ ܠܐ ܡܗܦܟ ܠܗܘܢ ܠܚܒܿܠܐ܂ ܘܥܠ ܐܝܠܝܢ ܕܐܿܙܠܝܢ ܠܬܫܢܝܩܐ ܠܐ ܡܪܚܡ܂ ܘܠܐܝܠܝܢ ܕܚ̈ܝܝܢ ܒܗ ܠܐ ܡܘܒܠ ܠܐܒܕܢܐ܂
44:13 [ai]	ܗܠܝܢ ܐܢܘܢ ܓܝܪ ܕܥܬܝܕܝܢ ܕܢܐܪܬܘܢ ܗܢܐ ܙܒܢܐ ܕܐܡܝܪ܂ ܘܕܝܠܗܘܢ ܗܝ ܝܪܬܘܬܐ ܕܙܒܢܐ ܕܡܿܠܝܟ܂
44:14 [ai]	ܗܠܝܢ ܐܝܠܝܢ ܕܐܬܩܢܘ ܠܗܘܢ ܐܘܨܪ̈ܐ ܕܚܟܡܬܐ܂ ܘܣܝ̈ܡܬܐ ܕܣܟܘܠܬܢܘܬܐ ܠܘܬܗܘܢ ܐܫܬܟܚ܂ ܘܡܢ ܪ̈ܚܡܼܐ ܠܐ ܐܪܚܩܘ܂ ܘܫܪܪܗ ܕܢܡܘܣܐ ܢܛܼܪܘ܂
44:15 [ai]	ܠܗܘܢ ܓܝܪ ܠܗܠܝܢ ܡܬܝܗܒ ܥܠܡܐ ܕܐܬܐ܂ ܡܥܡܪܗܘܢ ܕܝܢ ܕܫܪܟܐ ܕܣܓ̈ܝܐܐ ܒܢܘܪܐ ܗܿܘܐ ܀

next chapter