The Comprehensive Aramaic Lexicon

53:01 [ai]	ܘܚܿܙܝܬ ܚܙܘܐ܂ ܘܗܐ ܥܢܢܐ ܚܕܐ ܣܿܠܩܐ ܗܘܬ ܡܢ ܝܡܐ ܪܒܐ ܣܿܓܝ܂ ܘܚܐܿܪ ܗܿܘܝܬ ܒܗܿ܂ ܘܗܐ ܡܠܝܐ ܗܘܬ ܡ̈ܝܐ ܚܿܘܼܪ̈ܐ ܘܐܘܟܡ̈ܐ܂ ܘܓܘ̈ܢܐ ܣܓ̈ܝܐܐ ܐܝܬ ܗܘܐ ܒܗܘܢ ܒܡ̈ܝܐ ܗܠܝܢ܂ ܘܐܝܟ ܕܡܘܬܐ ܕܒܪܩܐ ܪܒܐܼ܂ ܡܬܚܙܐ ܗܘܐ ܒܪܝܫܗܿ܂
53:02 [ai]	ܘܚܙܝܬܗܿ ܠܥܢܢܐ ܗܿܝ ܕܥܿܒܪܐ ܚܪܝܦܐܝܬ ܒܪ̈ܗܛܐ ܩܠܝ̈ܠܐ܂ ܘܟܣܝܬܗܿ ܠܟܠܗܿ ܐܪܥܐ܂
53:03 [ai]	ܘܗܼܘܐ ܡܢ ܒܬܪ ܗܠܝܢ ܫܸܪܝܬ ܗܘܬ ܥܢܢܐ ܗܿܝ ܡܡܛܪܐ ܥܠ ܐܪܥܐܿ܂ ܡ̈ܝܐ ܕܐܝܬ ܗܘܐܿ ܒܗܿ܂
53:04 [ai]	ܘܚܿܙܝܬ ܕܠܐ ܗܘܐ ܚܕܐ ܗܘܬ ܕܡܘܬܗܘܢ ܕܡ̈ܝܐ ܗܿܢܘܢ ܕܢܚܬܿܝܢ ܗܘܘ ܡܢܗܿ܂
53:05 [ai]	ܫܘܪܝܐ ܓܝܪ ܩܕܡܝܐ ܐܘܟܡܝܢ ܗܘܘ ܣܿܓܝ ܥܕܡܐ ܠܥܕܢܐ܂ ܘܡܢ ܒܬܪܟܢ ܚܙܿܝܬ ܕܢܗܿܪܝܢ ܗܘܘ ܡ̈ܝܐ܂ ܐܠܐ ܠܐ ܣܓܝܐܝܢ ܗܘܘ܂ ܘܡܢ ܒܬܪ ܗܠܝܢ ܬܘܒܼ ܚܿܙܝܬ ܐܘܟܡ̈ܐ܂ ܘܡܢ ܒܬܪ ܗܠܝܢ ܬܘܒ ܢܗܝܪ̈ܐ܂ ܘܬܘܒ ܐܘܟܡ̈ܐ܂ ܘܬܘܒ ܢܗܝܪ̈ܐ܂
53:06 [ai]	ܗܕܐ ܕܝܢ ܗܘܬ ܥܕܡܐ ܠܬܪ̈ܬܥܣܪ̈ܐ ܙܒܢ̈ܝܢ܂ ܐܠܐ ܐܘܟ̈ܡܐ ܣܓܝܐ̈ܝܢ ܗܘܘ ܒܟܠܙܒܢ ܡܢ ܢܗܝܪ̈ܐ܂
53:07 [ai]	ܘܗܼܘܐ ܒܫܘܠܡܗܿ ܕܥܢܢܐ ܘܗܐ ܐܡܸܛܪܬ ܡ̈ܝܐ ܐܘܟܡ̈ܐ ‍[‍܂‍]‍ ܘܚܫܘܟܝܢ ܗܘܘ ܝܬܝܪ ܡܢ ܟܠܗܘܢ ܡ̈ܝܐ ܗܿܢܘܢ ܩܕ̈ܡܝܐ ܕܗܘܘ܂ ܘܢܘܪܐ ܡܚܠܛܐ ܗܘܬ ܒܗܘܢ܂ ܘܐܝܿܟܐ ܕܢܚܿܬܝܢ ܗܘܘ ܡ̈ܝܐ ܗܢܿܘܢ ܥܒܿܕܝܢ ܗܘܘ ܚܒܿܠܐ ܘܐܒܕܢܐ܂
53:08 [ai]	ܘܚܙܿܝܬ ܡܢ ܒܬܪ ܗܠܝܼܢ܂ ܠܗܿܘ ܒܪܩܐ ܕܚܙܿܝܬ ܗܘܿܝܬ ܒܪܝܫܗܿ ܕܥܢܢܐ ܕܐܚܕܗܿ ܘܐܚܬܗܿ ܥܕܡܐ ܠܐܪܥܐ܂
53:09 [ai]	ܘܝܬܝܪܝܬ ܕܝܢ ܢܗܼܪ ܗܘܐ ܒܪܩܐ ܗܿܘ܂ ܐܝܟ ܕܢܢܗܪ ܠܟܠܗܿ ܐܪܥܐ܂ ܘܐܣܝ ܠܗܿܢܘܢ ܐܬܪ̈ܘܬܐ܂ ܐܝܿܟܐ ܕܢܚܬܘ ܡ̈ܝܐ ܐܚܪ̈ܝܐ ܘܚܿܒܠܘ܂
53:10 [ai]	ܘܐܚܝܕ ܗܘܐ ܠܟܠܗܿ ܐܪܥܐ܂ ܘܐܫܬܠܛ ܥܠܝܗܿ܂
53:11 [ai]	ܘܚܿܙܝܬ ܡܢ ܒܬܪ ܗܠܝܢܼ܂ ܘܗܐ ܬܪ̈ܥܣܪ ܢܗܪ̈ܘܢ ܣܿܠܩܝܢ ܗܘܘ ܡܢ ܝܡܐ܂ ܘܚܕܝܪܝܢ ܗܘܘ ܠܗ ܠܗܿܘ ܒܪܩܐ ܘܡܫܬܥܒܕܿܝܢ ܗܘܘ ܠܗ܂
53:12 [ai]	ܘܐܢܐ ܡܢ ܕܚܠܬܝ ܐܬܬܿܥܝܪܬ܂ ܂܀܂

next chapter