The Comprehensive Aramaic Lexicon

59:01 [ai]	ܘܡ̈ܝܐ ܪ̈ܒܝܥܝܐ ܢܗܝܪ̈ܐ ܕܚܙܼܝܬܼ܂ ܗܼܝ ܗܝ ܡܐܬܝܬܗ ܕܡܘܫܐ ܘܕܐܗܪܘܢ ܘܕܡܪܝܡ܂ ܘܕܝܫܘܥ ܒܪܢܘܢ ܘܕܟܠܒܼ܂ ܘܕܟܠܗܘܢ ܐܝܠܝܢ ܕܕܡܿܝܢ ܠܗܘܢ܂
59:02 [ai]	ܒܗܿܘ ܓܝܪ ܙܒܢܐ ܫܪܓܗ ܕܢܡܘܣܐ ܕܠܥܠܡ ܐܢܗܪ ܠܟܠ ܐܝܠܝܢ ܕܝܬܿܒܝܢ ܗܘܘ ܒܚܫܘܟܐ܂ ܕܠܐܝܠܝܢ ܕܡܗܝܡܢܝܢ ܢܘܕܥ ܡܘܠܟܢܗ ܕܐܓܪܗܘܢ܂ ܘܠܐܝܠܝܢ ܕܟܦܪܝܢ ܬܫܢܝܩܐ ܕܢܘܪܐ ܕܢܛܝܪ ܠܗܘܢ܂
59:03 [ai]	ܐܠܐ ܐܦ ܫܡܝܐ ܒܗܿܘ ܙܒܢܐ ܐܬܬܚܕܘ ܡܢ ܐܬܪܗܘܢ܂ ܘܕܬܚܝܬ ܬܪܘܢܘܣ ܕܚܝܠܬܢܐ ܐܬܬܙܝܥܘ܂ ܟܕ ܐܚܝܕ ܗܘܐ ܠܡܘܫܐ ܠܘܬܗ܂
59:04 [ai]	ܚܘܝܗ ܓܝܪ ܙܘܗܪ̈ܐ ܣܓܝܐ̈ܐ ܥܡ ܕܘܒܪ̈ܐ ܕܢܡܘ̈ܣܐ ܘܫܘܠܡܐ ܕܙܒܢܐ ܐܝܟ ܕܐܦ ܠܟ܂ ܘܬܘܒ ܕܝܢ ܕܡܘܬܗܿ ܕܨܗܝܘܢ ܘܡܘܫܚ̈ܬܗܿ ܕܡܬܥܒܕܐ ‍[‍܂‍]‍ ܘܕܡܘܬܐ ܕܒܝܬ ܡܩܕܫܐ ܕܗܫܐ܂
59:05 [ai]	ܐܠܐ ܐܦ ܗܝܿܕܝܢ ܚܘܝܗ ܗܘܐ ܡܘܫ̈ܚܬܗܿ ܕܢܘܪܐ܂ ܐܦ ܥܘ̈ܡܩܘܗܝ ܕܬܗܘܡܐ܂ ܘܝܘܩܪܗܝܢ ܕܪ̈ܘܚܐ܂ ܘܡܢܝܢܐ ܕܛܘ̈ܦܝ ܡܛܪܐ܂
59:06 [ai]	ܘܐܚܕܗ ܕܪܘܓܙܐ܂ ܘܣܘܓܐܐ ܕܢܓܝܪܘܬ ܪܘܚܐ܂ ܘܫܪܪܗ ܕܕܝܼܢܐ܂
59:07 [ai]	ܘܥܿܩܪܗܿ ܕܚܟܡܬܐ܂ ܘܥܘܬܪܐ ܕܣܟܘܠܬܢܘܬܐ܂ ܘܡܒܘܥܐ ܕܐܝܕܥܬܐ܂
59:08 [ai]	ܘܪܘܡܗ ܕܐܐܪ܂ ܘܪܒܘܬܗ ܕܦܪܕܝܣܐ܂ ܘܫܘܠܡܗܘܢ ܕܥܠܡ̈ܐ܂ ܘܪܝܫ ܝܘܡܐ ܕܕܝܢܼܐ܂
59:09 [ai]	ܘܡܢܝܢܐ ܕܩܘܪ̈ܒܢܐ܂ ܘܐܪ̈ܥܬܐ ܕܥܕܟܝܠ ܠܐ ܐܬ̈ܝ܂
59:10 [ai]	ܘܦܘܡܗܿ ܕܓܗܢܐ܂ ܘܩܝܡܐ ܕܬܒܥܬܐ܂ ܘܐܬܪܐ ܕܗܝܡܢܘܬܐ܂ ܘܕܘܟܬܐ ܕܣܒܪܐ ‍[‍܂
59:11 [ai]	ܘܕܡܘܬܐ ܕܬܫܢܝܩܐ ܕܥܬܝܕ܂ ܘܣܘܓܐ ܕܡܠܐ̈ܟܐ ܕܡܢܝܢ ܠܝܬ ܠܗܘܢ܂ ܘܚܝ̈ܠܘܬܐ ܕܫܠܗܒܝܬܐ܂ ܘܙܗܪܗܘܢ ܕܒܪ̈ܩܐ܂ ܘܩܠܐ ܕܪ̈ܥܡܐ܂ ܘܣܕܪ̈ܝ ܪ̈ܝܫܐ ܕܡܠܐ̈ܟܐ܂ ܘܐܘܨܪ̈ܐ ܕܢܘܗܪܐ܂ ܘܚܘ̈ܠܦܐ ܕܙܒ̈ܢܐ܂ ܘܥܘ̈ܩܒܐ ܕܢܡܘܣܐ܂
59:12 [ai]	ܗܠܝܢ ܐܢܘܢ ܡ̈ܝܐ ܪ̈ܒܝܥܝܐ ܘܢܗܝܪ̈ܐ ܕܚܼܙܝܬ܀

next chapter