The Comprehensive Aramaic Lexicon

70:01 [ai]	ܫܡܼܥ ܗܟܝܠ ܦܘܫܩܐ ܕܡ̈ܝܐ ܐܘܟܡ̈ܐ ܐܚܪ̈ܝܐ ܗܠܝܢ ܕܥܬܝܕܝܢ ܕܢܐܬܘܢ ܡܢ ܒܬܪ ܐܘܟ̈ܡܐ܂ ܗܕܐ ܗܝ ܡܠܬܐ܂
70:02 [ai]	ܗܐ ܝܘܡ̈ܬܐ ܐܬܿܝܢ܂ ܘܢܗܘܐ ܟܕ ܢܒܫܠ ܙܒܢܗ ܕܥܠܡܐ܂ ܘܢܐܬܐ ܚܨܕܐ ܕܙܪ̈ܥܘܗܝ ܕܒ̈ܝܼܫܐ ܘܕܛ̈ܒܐ܂ ܢܝܬܐ ܚܝܠܬܢܐ ܥܠ ܐܪܥܐ ܘܥܡܘܪ̈ܝܗܿ܂ ܘܥܠ ܡܕܒܪ̈ܢܝܗܿ ܫܓܝܫܘܬܐ ܕܪ̈ܘܚܐ ܘܬܘܗܬܐ ܕܠܒܐ܂
70:03 [ai]	ܘܢܣܢܘܢ ܚܕ ܠܚܕ܂ ܘܢܬܓܪܓܘܢ ܚܕ ܥܠ ܚܕ ܠܩܪܒܐ܂ ܘܢܫܬܠܛܘܢ ܡܨܥܪ̈ܐ ܥܠ ܡܝܩܪ̈ܐ‍[‍܂‍]‍ ܘܢܬܬܪܝܡܘܢ ܒܨܝܪ̈ܐ ܥܠ ܡܫܒ̈ܚܐ܂
70:04 [ai]	ܘܢܫܬܠܡܘܢ ܣܓ̈ܝܐܐ ܠܙܥܘܪ̈ܐ܂ ܘܢܫܬܠܛܘܢ ܐܝܠܝܢ ܕܠܐ ܗܘܘ ܡܕܡ ܥܠ ܥܫܝ̈ܢܐ܂ ܘܢܬܝܬܪܘܢ ܡܣ̈ܟܢܐ ܥܠ ܥܬܝܪ̈ܐ܂ ܘܢܫܬܩܠܘܢ ܪ̈ܫܝܥܐ ܥܠ ܓܢܒܪ̈ܐ܂
70:05 [ai]	ܘܢܫܬܩܘܢ ܚܿܟܝܡ̈ܐ܂ ܘܣ̈ܟܠܐ ܢܡܠܠܘܢ܂ ܘܠܐ ܬܫܬܪܪ ܗܝܿܕܝܢ ܡܚܫܒܬܐ ܕܒ̈ܢܝ ܐܢܫܐ܂ ܐܦ ܠܐ ܬܪܥܝܬܐ ܕܚܝ̈ܠܬܢܐ܂ ܘܠܐ ܢܫܬܪܪ ܣܒܪܗܘܢ ܕܐܝܠܝܢ ܕܡܣܒܪܝܢ܂
70:06 [ai]	ܘܢܗܘܐ ܕܝܢ ܡܐ ܕܗ̈ܘܝ ܗܠܝܢ ܕܡܩ̈ܕܡܢ ܐܡܝܪ̈ܢܼ܂ ܢܦܠ ܚܒܟܐ ܒܟܘܠܗܘܢ ܒܢܝܢܫܐ܂ ܘܡܢܗܘܢ ܒܩܪܒܐ ܢܦܠܘܢ܂ ܘܡܢܗܘܢ ܒܥܩ̈ܬܐ ܢܬܚܒܠܘܢ܂ ܘܡܢܗܘܢ ܡܢ ܐܝܠܝܢ ܕܕܝܠܗܘܢ ܐܢܘܢ ܢܬܥܿܘܟܘܢ܂
70:07 [ai]	ܢܓܠܐ ܕܝܢ ܡܪܝܡܐ ܠܗܢܘܢ ܥܡܡ̈ܐ ܕܩܿܕܡ ܥܬܕ܂ ܘܢܐܬܘܢ ܘܢܩܪܒܘܢ ܥܡ ܡܕܒܪ̈ܢܐ ܕܡܫܬܚܪܝܢ ܗܝܿܕܝܢ܂
70:08 [ai]	ܘܢܗܘܐ ܕܟܠ ܡܿܢ ܕܡܬܦܨܐ ܡܢ ܩܪܒܐ ܒܙܘܥܐ ܢܡܘܬ܂ ܘܕܡܬܦܨܐ ܡܢ ܙܘܥܐ ܒܢܘܪܐ ܢܐܩܕ܂ ܘܐܝܿܢܐ ܕܡܬܦܨܐ ܡܢ ܢܘܪܐ ܒܟܦܢܐ ܢܣܘܦ܂
70:09 [ai]	ܘܢܗܘܐ ܕܟܠ ܡܿܢ ܕܡܬܦܨܐ ܘܥܿܪܩ ܡܢ ܟܠܗܝܢ ܐܝܠܝܢ ܕܡܩ̈ܕܡܢ ܐܡܝܪ̈ܢ ‍[‍܂‍]‍ ܡܢ ܐܝܠܝܢ ܕܙܟܘ ܘܐܙܕܟܝܘܼ܂ ܢܫܬܠܡܘܢ ܠܐܝܕ̈ܘܗܝ ܕܥܒܼܕܝ ܡܫܝܚܐܼ܂
70:10 [ai]	ܬܐܟܘܠ ܓܝܪ ܟܠ ܐܪܥܐ ܠܥ̈ܡܘܪܝܗܿ܀

next chapter