← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information
62072: P 4Ezra

Click on a word for lexical analysis.
Click on a red-colored coordinate for comments and/or translations of the line
View in Serto
Ask AI about a passage
Hide manuscript variants

03:001 [ai]ܒܫܢܬ ܬܠܬܝܢ ܕܡܦܘܠܬܗܿ ܕܡܕܝܢܬܢ ܐܢܐܿ ܫܠܬܐܝܠ ܕܐܝܬܝ ܥܙܪܐܼ܂ ܐܝܿܬܝ ܗܘܿܝܬ ܒܒܒܠ܂ ܘܪܡܼܐ ܗܿܘܝܬ ܥܠ ܬܫܘܝܬܝ ܘܬܘܝܗ ܗܿܘܝܬ܂ ܘܡܚܫ̈ܒܬܐ ܣܠܩܢ ܗ̈ܘܝ ܥܠ ܠܒܝ܂
03:002 [ai]ܡܛܠ ܕܚܿܙܝܬ ܚܘܪܒܗܿ ܕܨܗܝܘܢ܂ ܘܟܗܝܢܘܬܗܘܢ ܕܥܘܡܪ̈ܝ ܒܒܠ܂
03:003 [ai]ܘܐܬܕܡܸܪܬ ܪܘܚܝ ܣܓܝ܂ ܘܫܿܪܝܬ ܐܡܿܠܠ ܠܘܬ ܡܪܝܡܐ ܡܠ̈ܐ ܕܚܝ̈ܠܬܐ
03:004 [ai]ܘܐܡܿܪܬ܂ ܐܘ ܡܪܝܐ ܡܪܝ܂ ܠܐ ܗܘܐ ܐܢܬ ܐܡܼܪܬ ܡܢ ܪܝܫ ܟܕ ܓܒܠܬܗܿ ܠܐܪܥܐ ܘܗܕܐ ܒܠܚܘܕܝܟ܂ ܘܦܼܩܕܬ ܠܥܦܪܐ
03:005 [ai]ܘܝܗܼܒ ܠܟ ܠܐܕܡ ܦܓܪܐ ܡܝܬܐ܂ ܘܗܼܘ ܓܒܝܠܬܐ ܗܘܐ ܕܐ̈ܝܕܝܟ܂ ܘܢܦܚܼܬ ܒܗ ܪܘܚܐ ܕܚ̈ܝܐ܂ ܘܗܼܘܐ ܚܿܝܐ ܩܕܡܝܟ܂
03:006 [ai]ܘܐܼܥܠܬܝܗܝ ܠܦܪܕܝܣܐܿ ܗܿܘ ܕܢܸܨܒܬ ܝܡܝܢܟܿ܂ ܡܢ ܩܕܡ ܕܬܐܬܐ ܐܪܥܐ܂
03:007 [ai]ܘܠܗܢܐ ܦܩܕܬܝܗܝ ܦܘܩܕܢܐ ܘܥܒܪܗ܂ ܘܒܪ ܫܥܬܗ ܓܙܼܪܬ ܥܠܘܗܝ ܡܘܬܐ ܘܥܠ ܬܘ̈ܠܕܬܗ܂ ܘܡܢܗ ܐܬܝܠܕܘ ܥܡ̈ܡܐ ܘܫ̈ܒܛܐ܂ ܘܠܫ̈ܢܐ ܘܐܡ̈ܘܬܐ ܘܫܪ̈ܒܬܐ܂ ܐܝܠܝܢ ܕܠܝܬ ܠܗܝܢ ܡܢܝܢܐ܂
03:008 [ai]ܘܐܙܠܘ ܟܠ ܥܡ ܒܥ̈ܒܕܝܗܘܢ܂ ܘܡܪܫܥܝܢ ܗܘܘ ܘܡܥܘܠܝܢ ܩܕܡܝܟ܂ ܘܐܢܬ ܠܐ ܟܠܼܝܬ ܐܢܘܢ܂
03:009 [ai]ܬܘܒ ܕܝܢ ܒܙܒܢ ܐܝܬܼܝܬ ܛܘܦܢܐ ܥܠ ܐܪܥܐ ܘܥܠ ܥܡܘܪ̈ܘܗܝ ܕܥܠܡܐܼ܂ ܘܐܼܘܒܕܬ ܐܢܘܢ܂
03:010 [ai]ܘܗܼܘܐ ܐܟܚܕܐ ܐܒܕܢܗܘܢ܂ ܘܐܝܟ ܕܠܐܕܡ ܡܘܬܐܼ܂ ܗܟܢܐ ܐܦ ܠܗܿܢܘܢ ܡܘܬܐ ܕܛܘܦܢܐ܂
03:011 [ai]ܐܘܬܼܪܬ ܕܝܢ ܚܕ ܡܢܗܘܢ ܥܡ ܒܝܬܗ܂ ܘܡܢܗ ܙܕܝ̈ܩܐ ܟܠܗܘܢ ܪܕܘ܂
03:012 [ai]ܘܗܼܘܐ ܕܟܕ ܫܪܝܘ ܢܣܓܘܢ ܥܡܘܪ̈ܝܗܿ ܕܐܪܥܐ܂ ܘܐܣܓܝܘ ܒܢ̈ܝܐ ܘܥܡܡ̈ܐ ܘܟܢ̈ܫܐ ܣܓܝܐ̈ܐ܃ ܘܫܪܝܘ ܬܘܒ ܕܢܪܫܥܘܢ ܝܬܝܪ ܡܢ ܩ̈ܕܡܝܐ܂
03:013 [ai]ܘܗܼܘܐ ܕܟܕ ܐܪܫܥܘ ܩܕܡܝܟ܃ ܓܒܼܝܬ ܠܟ ܚܕ ܡܢܗܘܢ ܕܫܡܗ ܐܒܪܗܡ܃
03:014 [ai]ܘܐܚܒܬܝܗܝ ܘܚܘܝܬܝܗܝ ܫܘܠܡܗܘܢ ܕܙܒ̈ܢܐ ܠܗ ܒܠܚܘܕܘܗܝ܃ ܒܝܢܬ ܠܟ ܘܠܗ ܒܠܠܝܐ܃
03:015 [ai]ܘܐܩܝܡܬ ܠܗ ܩܝܡ̈ܐ ܕܠܥܠܡ܃ ܘܐܡܼܪܬ ܠܗ ܕܠܐ ܡܡܬܘܡ ܬܫܒܩܝܘܗܝ ܠܙܪܥܗ܂ ܘܝܗܼܒܬ ܠܗ ܠܐܝܣܚܩ܂ ܘܠܐܝܣܚܩ ܝܗܼܒܬ ܠܝܥܩܘܒ ܘܠܥܝܣܘ܂
03:016 [ai]ܘܓܒܼܝܬ ܠܟ ܠܝܪܬܘܬܐ ܠܝܥܩܘܒ܂ ܘܠܥܝܣܘ ܣܢܼܝܬ܂ ܘܗܼܘܐ ܝܥܩܘܒ ܠܥܡܐ ܣܓܝܐܐ܂
03:017 [ai]ܘܟܕ ܐܣܼܩܬ ܠܙܪܥܗ ܡܢ ܡܨܪܝܢ ܘܐܩܝܡܬ ܠܗ ܩܝܡ̈ܐ ܕܠܥܠܡ܂ ܘܐܝܬܼܝܬ ܐܢܘܢ ܠܛܘܪ ܣܝܢܝ܂
03:018 [ai]ܘܐܪܟܼܢܬ ܫܡܝܐ ܘܐܙܼܝܥܬ ܠܐܪܥܐ܂ ܘܐܢܝܕܬܗܿ ܠܬܒܝܠ܂ ܘܥܒܼܕܬ ܠܬܗܘ̈ܡܐ ܕܢܪܬܘܢ܂ ܘܫܓܼܫܬ ܥܠܡ̈ܐ܂
03:019 [ai]ܘܥܒܼܪܬ ܬܫܒܘܚܬܟ ܬܪ̈ܥܐ ܐܪܒܥܐ ܕܢܘܪܐ ܘܕܙܘ̈ܥܐ ܘܕܪܘܚܐ ܘܕܥܪܝܐܼ܂ ܕܬܬܠ ܠܙܪܥܗ ܕܝܥܩܘܒ ܢܡܘܣܐ܂ ܘܠܓܢܣܗ ܕܐܝܣܪܐܝܠ ܦܘܩ̈ܕܢܐ܂
03:020 [ai]ܘܠܐ ܐܪܝܡܼܬ ܡܢܗܘܢ ܠܒܐ ܒܝܫܼܐ܂ ܡܛܠ ܕܢܥܼܒܕ ܒܗܘܢ ܢܡܘܣܟ ܦܐܪ̈ܐ܂
03:021 [ai]ܠܒܐ ܓܝܪ ܒܝܼܫܐ ܠܒܼܫ ܐܕܡ ܩܕܡܝܐ܂ ܘܐܥܒܪ ܘܐܙܕܟܝ܂ ܐܠܐ ܐܦ ܟܠ ܐܝܠܝܢ ܕܐܬܝܠܕܘ ܡܢܗܿ܂
03:022 [ai]ܘܩܘܝ ܒܗܘܢ ܚܫܐ ܘܢܡܘܣܐ ܒܠܒܗ ܕܥܡܐ܂ ܥܡ ܥܩܪܐ ܒܝܼܫܐ܂ ܗܝܿܕܝܢ ܐܪܚܸܩܬ ܛܿܒܬܐ ܘܐܬܬ ܒܝܼܫܬܐ܂
03:023 [ai]ܘܥܼܒܪܘ ܙܒܢ̈ܐ ܘܫܠܡܿܘ ܥܕ̈ܢܐ ܀
03:024 [ai]ܘܐܩܼܝܡܬ ܠܟ ܥܼܒܕܐ ܕܫܡܗ ܕܘܝܕ܂ ܘܐܡܼܪܬ ܠܗ ܕܢܒܢܐ ܡܕܝܢܬܐ ܠܫܡܟ܂ ܘܒܝܬܐܼ ܕܢܬܩܪܒܘܢ ܠܟ ܒܗ ܩܘܪ̈ܒܢܐ ܡܢ ܕܝܠܟ܂
03:025 [ai]ܘܗܘܬ ܗܕܐ ܫܢ̈ܝܐ ܣܓܝܐ̈ܬܐ܂ ܘܚܛܘ ܠܟ ܥܡܘܪ̈ܝܗܿ ܕܡܕܝܢܬܐ܂
03:026 [ai]ܘܡܕܡ ܚܕܬ ܠܐ ܥܒܼܕܘ ܥܠ ܡܕܡ ܕܥܒܼܕ ܐܕܡ ܘܟܘܠܗܝܢ ܬܘ̈ܠܕܬܗ܂ ܠܒܝܫܝܢ ܗܘܘ ܓܝܪ ܐܦ ܗܼܢܘܢ ܠܒܐ ܒܝܫܼܐ܂
03:027 [ai]ܘܐܫܠܡܬܗܿ ܠܡܕܝܢܬܟ ܒܝܕ ܒܥܠܕܒ̈ܒܝܟ܂
03:028 [ai]ܘܐܢܐ ܐܡܿܪܬ ܗܿܝܕܝܢ ܒܠܒܝ ܕܠܡܐ ܫܦܝܪ ܥܿܒܕܝܢ ܥܡܘܪ̈ܝܗܿ ܕܒܒܠ܂ ܘܡܛܠ ܗܢܐ ܫܒܩܬܗܿ ܠܨܗܝܘܢ܂
03:029 [ai]ܘܗܼܘܐ ܕܟܕ ܐܬܝܿܬ ܠܗܪܟܐ ܚܙܝܬ ܪ̈ܘܫܥܐ ܣܓܝܐ̈ܐ ܕܠܝܬ ܠܗܘܢ ܡܢܝܢܐ܂ ܘܥܘܼ̈ܠܐ ܣܓܝܐ̈ܐ ܚܙܬ ܢܦܫܝ ܗܕܐ ܫܢܬܐ ܕܬܠܬܝܢ܂ ܘܐܬܬܙܝܥ ܠܒܝ
03:030 [ai]ܕܚܙܿܝܬ ܕܐܝܿܟܢܐ ܡܣܝܒܪ ܐܢܬ ܠܚ̈ܛܝܐ܂ ܘܚܐܿܣ ܐܢܬ ܥܠ ܪ̈ܫܝܥܐ܂ ܘܐܘܒܕܬ ܠܥܡܟ ܘܢܛܼܪܬ ܠܣܢܐ̈ܝܟ܂
03:031 [ai]ܘܠܐ ܐܘܼܕܥܬ ܠܐܢܫ ܕܐܝܿܟܢܐ ܡܬܕܪܟܐ ܐܘܪܚܟ܂ ܕܠܡܐ ܫܦܝܪ ܥܸܒܕܬ ܒܒܠ ܝܬܝܪ ܡܢ ܨܗܝܘܢ܂
03:032 [ai]ܐܘ ܠܥܡܐ ܐܚܪܢܐ ܝܿܕܥܬ ܝܬܝܪ ܡܢ ܐܝܣܪܝܠ܂ ܐܘ ܐܝܿܢܐ ܫܒܛܐ ܗܝܡܢ ܒܕܝܬܩܐ ܕܝܠܟ ܐܝܟ ܝܥܩܘܒ܂
03:033 [ai]ܗܠܝܢ ܕܐܓܪܗܘܢ ܠܐ ܐܬܚܙܝ܂ ܘܥܡܠܗܘܢ ܠܐ ܥܒܼܕ ܦܐܪ̈ܐ܂ ܡܥܒܪ ܓܝܪ ܥܒܿܪܬ ܥܠ ܥܡ̈ܡܐ܂ ܘܚܙܝܬ ܐܢܘܢ ܕܗܫܐ ܡܨܠܚܝܢ܂ ܘܠܐ ܡܬܕܟܪܝܢ ܦܘܩ̈ܕܢܝܟ ܿ܃ܿ܀
03:034 [ai]ܗܫܐ ܕܝܢ ܬܩܘܠ ܒܡܣܐܬܐ ܥܘܼܠܢ ܕܝܠܢ ܘܕܥܿܡܘܪ̈ܘܗܝ ܕܥܠܡܐ܂ ܘܢܬܚܙܐ ܢܬܥܗ ܕܩܢܝܐ ܕܠܐ ܡܪܟܢ܂
03:035 [ai]ܐܘ ܐܡܬܝ ܠܐ ܚܛܘ ܩܕܡܝܟ ܥܡܘܪ̈ܘܗܝ ܕܥܠܡܐ܂ ܐܘ ܐܿܝܢܐ ܥܡܐ ܢܛܪ ܗܟܢܐ ܦܘܩ̈ܕܢܝܟ܂
03:036 [ai]ܒܢܝܢܫܐ ܕܝܢ ܒܫܡ̈ܗܐ ܡܫܟܚ ܐܢܬ ܕܢܛܼܪܘ ܦܘܩ̈ܕܢܝܟ܂ ܥܡܐ ܕܝܢ ܠܐ ܡܫܟܚ ܐܢܬ ܿ܃ܿ ܀

next chapter