The Comprehensive Aramaic Lexicon

08:001 [ai]	ܘܥܢܼܐ ܘܐܡܼܪ ܠܝ܂ ܗܢܐ ܥܠܡܐ ܥܼܒܕ ܡܪܝܡܐ ܡܛܘܠ ܣܓ̈ܝܐܐ܂ ܘܗܿܘ ܕܝܢ ܕܥܬܝܕ ܡܛܠ ܙܥܘܪ̈ܐ܂
08:002 [ai]	ܐܦܫܩ ܕܝܢ ܡܠܬܐ ܩܕܡܝܟ ܐܘ ܥܙܪܐ܂ ܐܝܟ ܕܬܫܐܠܝܗܿ ܠܐܪܥܐ ܘܬܐܡܪ ܠܟ ܕܐܝܿܢܐ ܥܦܪܐ ܝܗܿܒܐ܂ ܣܿܓܝ ܗܿܘ ܕܗܿܘܐ ܡܢܗ ܚܨܦܐ܂ ܐܘ ܗܿܘ ܕܗܿܘܐ ܡܢܗ ܕܗܒܐܼ܂ ܗܟܢܐ ܐܝܬܘܗܝ ܥܿܒܕܗ ܕܗܢܐ ܥܠܡܐ܂
08:003 [ai]	ܣܓ̈ܝܐܐ ܐܬܒܪܝܘ ܐܠܐ ܙܥܘܪܝܢ ܗܘܘ ܚ̈ܝܝܢ ܀ܿ܃܂܂܂܃ܿ
08:004 [ai]	ܘܥܿܢܝܬ ܘܐܡܿܪܬ܂ ܣܪܘܦܝ ܢܦܫܝ ܡܕܥܐܼ܂ ܘܐܫܬܝ ܠܒܝ ܒܘܝܢܐ܂
08:005 [ai]	ܐܬܿܝܬ ܓܝܪ ܕܠܐ ܒܨܒܝܢܟܝ܂ ܘܐܿܙܠܐ ܐܢܬܝ ܟܕ ܠܐ ܨܒܝܬܝ܂ ܠܐ ܓܝܪ ܐܬܝܗܒ ܠܟܝ ܫܘܠܛܢܐ܂ ܐܠܐ ܐܢ ܒܠܚܘܕ ܒܚܝ̈ܐ ܕܙܒܢܐ ܙܥܘܪܐ ܀
08:006 [ai]	ܐܘ ܡܪܝܐ ܡܪܝ܂ ܐܢ ܦܩܿܕ ܐܢܬ ܠܥܒܕܟܼ܂ ܐܒܿܥܐ ܩܕܡܝܟ܂ ܘܬܬܠ ܠܢ ܙܪܥܐ ܘܦܘܠܚܢܐ ܕܠܒܐ ܚܕܬܐ ܡܢ ܐܝܿܟܐ ܕܗܿܘܝܢ ܦܐܪ̈ܐ ܐܝܟ ܕܢܫܟܚ ܠܡܚܐ ܟܠ ܕܡܬܚܒܠ ܿ ܗܿܘ ܕܠܒܼܫ ܕܡܘܬܗ ܕܒܪܢܫܐ܂
08:007 [ai]	ܚܕ ܓܝܪ ܐܝܬܝܟܼ ܘܓܒܝܠܬܐ ܚܕܐ܂ ܐܝܬܝܢ ܚܢܢ ܥܒܕ ܐܝ̈ܕܝܟ ܐܝܟ ܕܐܡܼܪܬ܂
08:008 [ai]	ܘܡܚܝܘ ܡܿܚܐ ܐܢܬ ܠܢܿ܂ ܗܫܐ ܒܡܪܒܥܐ ܠܦܓܪܐ ܕܓܒܼܠܬ ܘܡܪܟܒ ܐܢܬ ܗܕ̈ܡܐ܂ ܘܡܬܢܛܪܐ ܒܪܝܬܟ܂ ܒܢܘܪܐ ܘܡ̈ܝܐ܂ ܘܬܫܥܐ ܝܪܚܝܢ ܡܣܝܒܪܐ ܓܒܝܠܬܟ ܠܒܼܪܝܬܐ ܕܒܪܼܝܬ ܒܓܘܗܿ܂
08:009 [ai]	ܗܼܘ ܕܝܢ ܗܿܘ ܕܢܛܿܪ ܘܗܿܘ ܕܡܬܢܛܪ ܬܪ̈ܝܗܘܢ ܒܢܛܘܪܬܟ ܕܝܠܟ ܡܬܢܛܪܝܢ܂ ܘܡܐ ܕܝܗܿܒ ܬܘܒ ܡܪܒܥܐ ܡܕܡ ܕܗܼܘܐ ܒܗ܂
08:010 [ai]	ܦܩܼܕܬ ܕܡܢܗܘܢ ܡܢ ܗܕ̈ܡܐ ܢܗܘܐ ܚܠܼܒܐ܂ ܦܐܪ̈ܐ ܕܬ̈ܕܝܐ ܕܡܠܝܘܬܐ܂
08:011 [ai]	ܕܗܿܘ ܡܕܡ ܕܐܬܓܒܠ ܢܬܪܒܐܼ܂ ܥܕܡܐ ܠܙܒܢܐ ܩܠܝܠ܂ ܘܡܢ ܒܬܪܟܢ ܡܕܒܪ ܐܢܬ ܠܗ ܒܪ̈ܚܼܡܝܟ܂
08:012 [ai]	ܘܿܙܐܢ ܐܢܬ ܠܗ ܒܙܕܝܩܘܬܟ܂ ܘܪܕܿܐ ܐܢܬ ܠܗ ܒܢܡܘܣܟ܂ ܘܡܪܬܐ ܐܢܬ ܠܗ ܒܣܟܘܠܬܢܘܬܟ܂
08:013 [ai]	ܘܡܡܝܬ ܐܢܬ ܠܗ ܐܝܟ ܒܼܪܝܬܟ܂ ܘܡܚܐ ܐܢܬ ܠܗ ܐܝܟ ܥܒܿܕܟ܂
08:014 [ai]	ܐܢ ܗܟܝܠ ܒܥܓܠ ܘܩܠܝܠܐܝܬ ܡܘܒܕ ܐܢܬ ܠܗ ܠܗܢܐ܂ ܕܒܗܕܐ ܟܠܗܿ ܠܐܘܬܐ ܣܓܝܐܬܐ ܐܬܓܒܠ ܒܦܘܩܕܢܟ܂ ܘܥܠ ܡܢܐ ܗܟܝܠ ܗܼܘܐ ܀܀
08:015 [ai]	ܐܦ ܗܫܐ ܡܐܡܪ ܐܡܿܪܬ ܥܠ ܟܘܠ ܐܢܫ܂ ܝܬܝܪܐܝܬ ܕܝܼܢ܂ ܐܢܬ ܝܕܿܥ ܐܢܬܼ܂ ܕܥܠ ܥܡܟ ܗܘ ܚܐܿܫ ܐܢܐ܂
08:016 [ai]	ܘܥܠ ܝܪܬܘܬܟ ܕܥܠܝܗܿ ܡܬܐܒܠ ܐܢܐ܂ ܘܥܠ ܐܝܣܪܝܠ ܕܥܠܘܗܝ ܟܼܪܝܐ ܠܝ܂ ܘܥܠ ܙܪܥܗ ܕܝܥܩܘܒ ܕܥܠܘܗܝ ܡܬܙܝܥ ܐܢܐ܂
08:017 [ai]	ܡܛܠ ܗܕܐ ܐܫܿܪܐ ܕܐܒܿܥܐ ܘܐܬܟܫܦ ܩܕܡܝܟ ܥܠܝ ܘܥܠܝܗܘܢ܂ ܡܛܠ ܕܗܐ ܚܿܙܐ ܐܢܐ ܫܘܪ̈ܥܬܢ ܕܐܝܠܝܢ ܕܥܡܿܪܝܢ ܒܥܠܡܐ܂
08:018 [ai]	ܐܠܐ ܐܦ ܗܫܐ ܫܡܥܼܬ ܓܙܪܗ ܕܕܝܢܼܐ ܕܥܬܝܕ܂
08:019 [ai]	ܡܛܠ ܗܢܐ ܫܡܼܥ ܒܩܠܝ܂ ܘܨܘܬ ܠܡ̈ܠܝ ܨܠܘܬܝܼ܂ ܘܐܡܿܠܠ ܩܕܡܝܟ ܡܪܝܐ ܐܠܗܝ܂ ܪܝܫ ܡ̈ܠܝ ܨܠܘܬܗ ܕܥܙܪܐ ܕܨܿܠܝ ܡܢ ܩܕܡ ܕܢܬܥܠܐ܂܂
08:020 [ai]	ܡܪܝܐ ܕܥܿܡܪ ܐܢܬ ܠܥܠܡ܂ ܗܿܘ ܕܡܪ̈ܘܡܘܗܝ ܪܡܿܝܢ ܘܡܕܝܪ̈ܘܗܝ ܒܐܐܪ܂
08:021 [ai]	ܗܿܘ ܕܟܘܪܣܝܗ ܠܐ ܡܣܬܝܟ ܘܬܫܒܘܚܬܗ ܠܐ ܡܬܕܪܟܐ܂ ܗܿܘ ܕܚܝ̈ܠܘܬܐ ܒܕܚܠܬܐ ܩܝܿܡܝܢ ܩܕܡܘܗܝ܂
08:022 [ai]	ܗܘ ܕܒܡܠܬܗ ܠܢܘܪܐ ܘܠܪܘܚܐ ܡܬܚܠܦܝܢ܂ ܗܿܘ ܕܡܠܬܗ ܡܗܝܡܢܐ܂ ܘܡܐܡܪܗ ܡܩܘܐ܂
08:023 [ai]	ܗܿܘ ܕܦܘܩܕܢܗ ܫܪܝܪ܂ ܘܦܬܓ̈ܡܘܗܝ ܕܚܝܠܝܢ܂ ܗܿܘ ܕܚܙܘܗ ܡܘܒܫ ܬܗܘܡܐ܂ ܘܟܐܬܗ ܛܘܼܪ̈ܐ ܡܿܫܚܐ܂ ܗܿܘ ܕܫܪܪܗ ܡܣܗܕܼ܂
08:024 [ai]	ܫܡܼܥ ܒܩܠܗ ܕܥܼܒܕܟ܂ ܘܨܘܬ ܠܒܥܘܬܐ ܕܓܒܝܠܬܟ܂ ܘܚܘܪ ܒܡ̈ܠܝ܂
08:025 [ai]	ܥܕ ܚܝ ܐܢܐ ܓܝܪ ܐܡܿܠܠ܂ ܘܥܕ ܐܝܬ ܒܝ ܡܕܥܐ ܐܬܝܒ ܦܬܓܡܐܼ܂
08:026 [ai]	ܠܐ ܬܚܘܪ ܒܫܘܪ̈ܥܬܗ ܕܥܡܟ܂ ܐܠܐ ܒܐܝܠܝܢ ܕܐܫܬܥܒܕܘ ܠܟ ܒܩܘܫܬܐ܂
08:027 [ai]	ܘܠܐ ܬܚܘܪ ܒܣܟ̈ܠܘܬܐ ܕܨܢܥ̈ܬܗܘܢ ܕܥ̈ܘܿܠܐ܂ ܐܠܐ ܒܐܝܠܝܢ ܕܒܨܥܪܐ ܢܛܪܼܘ ܩܝܡ̈ܝܟ܂
08:028 [ai]	ܘܠܐ ܬܬܚܫܒ ܥܠ ܐܝܠܝܢ ܕܒܝܫܼܐܝܬ ܐܬܗܦܟܘ ܩܕܡܝܟ܂ ܐܠܐ ܐܬܕܟܪ ܠܐܝܠܝܢ ܕܒܨܒܝܢܐ ܛܿܒܐ ܝܕܥܘ ܕܚܠܬܟ܂
08:029 [ai]	ܘܠܐ ܬܨܒܐ ܕܬܘܒܕ ܐܢܘܢ ܠܐܝܠܝܢ ܕܐܬܕܡܝܘ ܠܒܥܝܪܐ܂ ܐܠܐ ܚܘܪ ܒܐܝܠܝܢ ܕܩܿܒܠܘ ܢܗܝܪܘܬܗ ܕܢܡܘܣܟ܂
08:030 [ai]	ܘܠܐ ܬܪܓܙ ܥܠ ܐܝܠܝܢ ܕܐܒܫܘ ܝܬܝܪ ܡܢ ܚܝ̈ܘܬܐ܂ ܐܠܐ ܐܼܚܒ ܠܐܝܠܝܢ ܕܐܡܝܢܐܝܬ ܥܠ ܬܫܒܘܚܬܟ ܬܟܝܠܝܢ ܗܘܘ܂
08:031 [ai]	ܡܛܠ ܕܚܢܢ ܘܐܝܠܝܢ ܕܡܢ ܩܕܡܝܢ ܥܿܒ̈ܕܐ ܕܚܿܒܠܐ ܥܒܕܢ ܘܦܩܪܢ ܀
08:032 [ai]	ܐܢܬ ܕܝܢ ܡܛܠܬܢ ܕܝܠܢ ܕܚܿܛܝܢ ܡܪܚܡܢܐ ܐܬܩܪܝܬ܂ ܥܠܝܢ ܓܝܪ ܥܠ ܐܝܠܝܢ ܕܠܝܬ ܠܢ ܥܿܒ̈ܕܐ܂ ܐܢ ܬܨܒܐ ܕܬܪܚܡ ܚܢܿܢܐ ܡܫܬܡܗ ܐܢܬ܂
08:033 [ai]	ܙܕܝܩ̈ܐ ܓܝܪ ܐܝܠܝܢ ܕܐܝܬ ܠܗܘܢ ܥܿܒ̈ܕܐ ܕܣܝܼܡܝܢ ܠܘܬܟ ܡܢ ܥܿܒ̈ܕܝܗܘܢ ܕܝܠܗܘܢ ܐܝܬ ܠܗܘܢ ܕܢܣܒܘܢ܂
08:034 [ai]	ܐܘ ܡܢܐ ܗܘ ܓܝܪ ܒܪܢܫܐ ܕܬܪܓܙ ܥܠܘܗܝ܂ ܐܘ ܓܢܣܐ ܕܡܬܚܒܠ ܕܬܬܚܡܬ ܥܠܘܗܝ܂
08:035 [ai]	ܫܪܝܪܐܝܬ ܓܝܪ ܠܝܬ ܡܢ ܝܠܝ̈ܕܐ ܕܠܐ ܐܥܘܠ܂ ܘܠܐ ܡܢ ܐܝܠܝܢ ܕܗܘܘ ܕܠܐ ܚܼܛܐ܂
08:036 [ai]	ܒܗܕܐ ܗܘ ܓܝܪ ܡܬܝܕܥܐ ܛܒܘܬܟ ܡܪܝܐ ܡܪܝ܂ ܐܡܬܝ ܕܡܬܪܚܡ ܐܢܬ ܥܠ ܐܝܠܝܢ ܕܠܝܬ ܠܗܘܢ ܚܝܠܐ ܕܥܿܒ̈ܕܐ ܀
08:037 [ai]	ܘܥܼܢܐ ܘܐܡܼܪ ܠܝ܂ ܡܢܗܝܢ ܬܪܝܨܐܝܬ ܡܠܼܠܬ܂ ܘܐܝܟ ܡ̈ܠܝܟ ܗܟܢܐ ܢܗܘܐ܂
08:038 [ai]	ܡܛܠ ܕܫܪܝܪܐܝܬ ܠܐ ܡܬܚܫܒ ܐܢܐ ܥܠ ܓܒܝܠܬܗܘܢ ܕܥ̈ܘܿܠܐ܂ ܐܘ ܥܠ ܡܘܬܗܘܢ܂ ܐܘ ܥܠ ܕܝܢܗܘܢ܂ ܐܘ ܥܠ ܐܒܕܢܗܘܢ܂
08:039 [ai]	ܐܠܐ ܡܬܒܣܡ ܐܢܐ ܥܠ ܡܐܬܝܬܐ ܕܓܒܝܠܬܗܘܢ ܕܙܕܝ̈ܩܐ܂ ܘܥܠ ܚܝܝ̈ܗܘܢ ܘܥܠ ܦܘܪܥܢܗ ܕܐܓܪܗܘܢ܂
08:040 [ai]	ܐܝܟܿܢܐ ܓܝܪ ܕܡܿܠܠܬ ܗܟܢܐ ܢܗܘܐ܂
08:041 [ai]	ܐܝܟܿܢܐ ܓܝܪ ܐܟܪܐ ܕܙܿܪܥ ܙܪ̈ܥܘܢܐ ܣܓܝܐ̈ܐ܂ ܘܢܨܒ̈ܬܐ ܣܓܝܐ̈ܬܐ ܢܿܨܒܼ܂ ܐܠܐ ܠܐ ܗܘܐ ܒܙܒܢ ܟܘܠܗܘܢ ܙܪ̈ܥܘܢܐ ܚܝ̈ܝܢ܂ ܐܦܠܐ ܟܠܗܝܢ ܢܨܒ̈ܬܐ ܝܗ̈ܒܢ ܥܿܩܼܪܐ܂ ܗܟܢܐ ܐܦ ܐܝܠܝܢ ܕܐܬܘ ܠܥܠܡܐ܂ ܠܐ ܗܘܐ ܟܘܠܗܘܢ ܚܐܿܝܢ ܀
08:042 [ai]	ܘܥܿܢܝܬ ܘܐܿܡܿܪܬ܂ ܐܢ ܐܫܟܿܚܬ ܪ̈ܚܼܡܐ ܒܥܝ̈ܢܝܟ ܐܿܡܠܠ ܩܕܡܝܟ܂
08:043 [ai]	ܙܪܥܗ ܓܝܪ ܕܐܟܪܐ܂ ܐܢ ܡܣܒ ܠܐ ܢܣܿܒ ܡܛܪܟ ܒܙܒܢܗ܂ ܕܠܡܐ ܚܝܐ܂ ܐܦ ܡܢ ܡܛܪܐ ܕܝܢ ܣܓܝܐܐ ܡܬܚܒܠ܂
08:044 [ai]	ܒܪܢܫܐ ܕܝܢ ܕܒܐܝ̈ܕܝܟ ܐܬܓܒܠ ܘܠܝܘܩܢܟ ܐܬܕܡܝ ܕܡܛܠܬܗ ܒܪܝܬ ܟܠܐ܂ ܕܡܝܬܝܗܝ ܠܙܪܥܗ ܕܐܟܪܐܼ܂
08:045 [ai]	ܠܐ܂ ܒܥܿܐ ܐܢܐ ܡܢܟ ܡܪܝܐ ܡܪܝܼ܂ ܚܘܣ ܥܠ ܥܡܟ܂ ܘܐܬܪܚܡ ܥܠ ܝܪ̈ܬܘܬܟ܂ ܥܠ ܒܪ̈ܝܬܟ ܗܼܘ ܓܝܪ ܕܝܠܟ ܡܬܪܚܡ ܐܢܬ ܀
08:046 [ai]	ܘܥܼܢܐ ܘܐܡܼܪ ܠܝ܂ ܐܝܠܝܢ ܕܗܫܐ ܐ̈ܢܝܢ ܠܐܝܠܝܢ ܕܗܫܐ ܐܢܘܢ܂ ܘܐܝܠܝܢ ܕܥܬܝ̈ܕܢ ܠܐܝܠܝܢ ܕܥܬܝܕܝܢ܂
08:047 [ai]	ܣܿܓܝ ܓܝܪ ܚܣܝܪ ܠܟ ܕܬܫܟܚ ܬܚ‍{‍ܝ‍}‍ܒܗܿ ܠܒܼܪܝܬܝ ܝܬܝܪ ܡܢܝ܂ ܐܢܬ ܕܝܢ ܣܿܓܝ ܕܡܝܬ ܢܦܫܟ ܠܪ̈ܫܝܥܐ܂ ܠܐ ܢܗܘܐ ܗܟܢܐ܂
08:048 [ai]	ܐܠܐ ܐܦ ܒܗܕܐ ܬܫܬܒܚ ܩܕܡ ܡܪܝܡܐ܂
08:049 [ai]	ܡܛܠ ܕܐܬܡܼܟܟܬ ܐܝܟ ܕܙܿܕܩ ܠܟ܂ ܘܠܐ ܦܚܼܡܬ ܢܦܫܟ ܥܠ ܙܕܝ̈ܩܐ܂ ܡܛܠ ܗܢܐ ܝܬܝܪܐܝܬ ܬܫܬܒܚ
08:050 [ai]	ܡܛܠ ܕܕܘܝܘܬܐ ܣܓܝܐܬܐ ܢܬܕܘܘܢ ܥܡܘܪ̈ܘܗܝ ܕܥܠܡܐ ܒܐܚܪܝܬܐ܂ ܚܠܦ ܫܘܒܗܪܐ ܣܓܝܐܐ ܕܐܫܬܒܗܪ܂
08:051 [ai]	ܐܢܬ ܕܝܢ ܕܥܠ ܢܦܫܟ ܐܣܬܼܟܠ܂ ܘܥܠ ܬܫܒܚ̈ܬܗܘܢ ܕܐܝܠܝܢ ܕܕܡܿܝܢ ܠܟ ܒܥܝ܂
08:052 [ai]	ܠܟܘܢ ܓܝܪ ܐܬܦܬܚ ܦܪܕܝܣܐ܂ ܘܐܬܢܨܒ ܐܿܝܠܝܐ ܕܚ̈ܝܐ܂ ܘܐܬܥܬܕ ܥܠܡܐ ܕܥܬܝܕ܂ ܘܐܬܛܝܒ ܦܘܢܩܐ܂ ܘܐܬܸܒܢܝܬ ܡܕܝܢܬܐ܂ ܘܐܬܬܩܢ ܢܝܚܐ܂ ܘܐܫܬܸܟܠܠܬ ܛܒܿܘܬܐ ܘܫܸܠܡܬ ܚܟܡܬܐ܂
08:053 [ai]	ܘܥܩܪܐ ܐܬܚܬܡ ܡܢܟܘܢ ܘܟܘܪܗܢܐ ܕܥܿܟ ܡܢܟܘܢ܂ ܘܡܘܬܐ ܐܬܛܫܝ܂ ܘܫܝܘܠ ܥܪܸܩܬ܂ ܘܚܿܒܠܐ ܐܬܛܥܝ܂
08:054 [ai]	ܘܟܐ̈ܒܐ ܐܪܚܩܘ ܡܢܟܘܢ܂ ܘܒܫܘܠܡܐ ܐܬܚܙܝ ܣܝܡ̈ܬܐ ܕܚ̈ܝܐ܂
08:055 [ai]	ܠܐ ܗܟܝܠ ܬܘܣܦ ܬܘܒ ܕܬܒܥܐ ܥܠ ܣܓ̈ܝܐܐ ܐܝܠܝܢ ܕܐܒܿܕܝܢ܂
08:056 [ai]	ܡܛܠ ܕܗܼܢܘܢ ܢܣܼܒܘ ܚܐܪܘܬܐ ܘܐܣܠܝܘ ܠܡܪܝܡܐ܂ ܐܦ ܠܢܡܘܣܗ ܐܣܓܝܘ ܫܼܿܛܘ܂ ܘܠܐܘܪ̈ܚܬܗ ܒܛܿܠܘ܂
08:057 [ai]	ܐܦ ܠܚܣ̈ܝܘܗܝ ܕܫܿܘ܂
08:058 [ai]	ܘܐܡܼܪܘ ܒܠܒܗܘܢ ܕܠܝܬ ܐܠܗܐ܂ ܟܕ ܡܕܥ ܝܕܿܥܿܝܢ ܕܡܡܬ ܡܝܬܝܢ܂
08:059 [ai]	ܡܛܠ ܗܢܐ ܐܝܟ ܕܡܣܟܝܢ ܠܟܘܢ ܗܠܝܢ ܕܐܬܐܡܪ ܡܢ ܩܕܝܡ܂ ܗܟܢܐ ܐܦ ܠܗܿܢܘܢ ܨܗܝܐ ܘܬܫܢܝܩܐ ܕܥܬܝܕ܂ ܠܐ ܓܝܪ ܨܒܿܐ ܡܪܝܡܐ ܕܢܐܒܕܘܢ ܒ̈ܢܝ ܐܢܫܐ܂
08:060 [ai]	ܐܠܐ ܗܢܿܘܢ ܕܐܬܒܪܝܘ ܨܿܥܪܘ ܫܡܗ ܕܥܿܒܘܕܗܘܢ܂ ܘܒܛܝܒܘܬܐ ܟܦܪܘ ܘܠܐ ܐܘܕܝܘ ܠܝܿ܂ ܕܥܬܼܕܬ ܠܗܘܢ ܚ̈ܝܐ܂
08:061 [ai]	ܡܛܠ ܗܢܐ ܕܝܢܝ ܩܪܼܒ ܠܗ܂
08:062 [ai]	ܗܿܘ ܕܠܐ ܐܘܿܕܥܬ ܠܣܓ̈ܝܐܐ܂ ܐܠܐ ܐܢ ܠܟ ܘܠܙܥܘܪ̈ܐ ܐܝܠܝܢ ܕܕܡܿܝܢ ܠܟ ܀ ܘܥܿܢܝܬ ܘܐܡܿܪܬ܂
08:063 [ai]	ܗܐ ܗܫܐ ܡܪܝܐ ܐܘܿܕܥܬܢܝ ܣܘܓܐܐ ܕܐܬܘ̈ܬܐ ܕܥܬܝܕ ܐܢܬ ܠܡܥܒܕ ܒܝܘܡ̈ܬܐ ܐܚܪ̈ܝܐ܂ ܐܠܐ ܠܐ ܐܘܕܥܬܢܝ ܕܒܐܿܝܢܐ ܙܒܢܐ܂ ܀

next chapter