← Back
The Comprehensive Aramaic Lexicon
← Return to the Text Browser
click on the file description for more information
62072: P 4Ezra

Click on a word for lexical analysis.
Click on a red-colored coordinate for comments and/or translations of the line
View in Serto
Ask AI about a passage
Hide manuscript variants

previous chapter


11:001 [ai]ܘܗܼܘܐ ܒܠܠܝܐ ܬܢܝܢܐ ܚܿܙܝܬ ܚܙܘܐ܂ ܘܗܐ ܣܿܠܩ ܗܘܐ ܡܢ ܝܡܐ ܢܫܪܐ ܕܪܒ ܒܪܒܘܬܗ ܣܿܓܝ܂ ܘܐܝܬ ܗܘܘ ܠܗ ܬܪܥܣܪ ܓ̈ܦܝܢ ܘܬܠܬܐ ܪ̈ܝܫܝܢ܂
11:002 [ai]ܘܚܙܿܝܬ ܘܗܐ ܡܬܼܚ ܓܦ̈ܘܗܝ ܒܟܠܗܿ ܐܪܥܐ܂ ܘܟܘܠܗܝܢ ܪ̈ܘܚܐ ܕܫܡܝܐ ܠܘܬܗ ܢܫܒ̈ܢ ܗ̈ܘܝ܂ ܘܥܢ̈ܢܐ ܠܘܬܗ ܡ̈ܬܟܢܫܢ ܗ̈ܘܝ܂
11:003 [ai]ܘܚܿܙܝܬ ܡܢ ܓܦ̈ܘܗܝ ܕܡܬܝܠܕܝܢ ܗܘܘ ܓ̈ܦܐ ܕܩܕܩ̈ܐ ܘܩܛܝܢ̈ܐ ܘܙܥܘܪ̈ܐ܂
11:004 [ai]ܘܪ̈ܝܫܘܗܝ ܕܝܢ ܫܼܠܝܢ ܗܘܘ܂ ܪܝܫܐ ܕܝܢ ܡܨܥܝܐ ܪܒ ܗܘܐ ܡܢ ܗܠܝܢ ܐܚܪ̈ܢܐ܂ ܒܪܡ ܕܝܢ ܐܦ ܗܼܘ ܫܼܠܐ ܗܘܐ ܥܡܗܘܢ܂
11:005 [ai]ܘܚܙܿܝܬ ܘܗܐ ܢܫܪܐ ܦܼܩܕ ܠܓܦܘ̈ܗܝ ܐܝܟ ܕܢܫܬܠܛܘܢ ܥܠ ܟܠܗܿ ܐܪܥܐ ܘܥܠ ܥܿܡܘܪ̈ܝܗܿ܂
11:006 [ai]ܘܚܿܙܝܬ ܕܐܝܿܟܢ ܡܫܬܥܒܕ ܗܘܐ ܠܗ ܟܠܡܕܡ ܕܬܚܝܬ ܫܡܝܐ܂ ܘܡܕܡ ܠܐ ܥܿܨܐ ܗܘܐ ܠܗ ܡܢ ܒܪܼ̈ܝܬܐ ܕܥܠ ܐܪܥܐ܂
11:007 [ai]ܘܚܿܙܝܬ ܘܗܐ ܩܡ ܢܫܪܐ ܥܠ ܛܦܪ̈ܘܗܝ܂ ܘܫܒܼܩ ܩܠܐ ܠܓܦܘ̈ܗܝ ܘܐܡܼܪ ܠܗܘܢ܂ ܙܠܘ ܐܫܬܠܛܘ ܥܠ ܟܠܗܿ ܐܪܥܐ܂ ܗܫܐ ܕܝܢ ܫܠܘ܂
11:008 [ai]ܘܠܐ ܬܨܒܘܢ ܕܬܬܥܝܪܘܢ ܟܠܟܘܢ ܐܟܚܕܐ܂ ܐܠܐ ܕܡܟܘ ܟܠ ܚܕ ܚܕ ܡܢܟܘܢ ܒܕܘܟܬܗ܂ ܘܒܙܒܢ ܙܒܢ ܬܬܥܝܪܘܢ܂
11:009 [ai]ܪ̈ܝܫܐ ܕܝܢ ܠܐܚܪܝܬܐ ܢܬܢܛܪܘܢ ܀
11:010 [ai]ܘܚܿܙܝܬ ܕܩܠܗ ܠܐ ܢܦܿܩ ܗܘܐ ܡܢ ܪ̈ܝܫܘܗܝ܂ ܐܠܐ ܡܢ ܡܨܥܬ ܦܓܪܗ܂
11:011 [ai]ܘܡܿܢܝܬ ܐܢܘܢ ܠܓܦ̈ܘܗܝ ܙܥܘܪ̈ܐ܂ ܘܐܦ ܗܼܢܘܢ ܗܿܘܝܢ ܗܘܘ ܬܡܢܝܐ܂ ܀
11:012 [ai]ܘܚܿܙܝܬ ܘܗܐ ܩܡ ܡܢ ܓܒܐ ܕܝܡܝܢܐ ܓܦܐ ܚܕ܂ ܘܐܫܬܠܛ ܥܠ ܟܘܠܗܿ ܐܪܥܐ܂
11:013 [ai]ܘܚܿܙܝܬ ܕܐܬܼܐ ܫܘܠܡܗ ܘܐܬܚܒܠܼ܂ ܐܝܟ ܕܠܐ ܬܬܝܕܥ ܐܦ ܠܐ ܕܘܟܬܗ ܀
11:014 [ai]ܘܚܿܙܝܬ ܩܡ ܓܦܐ ܬܢܝܢܐ܂ ܘܐܫܬܠܛ ܐܦ ܗܼܘ ܒܟܠܗܿ ܐܪܥܐܼ܂ ܙܒܢܐ ܣܓܝܐܐ܂ ܘܗܼܘܐ ܕܟܕ ܐܫܬܠܛ ܐܬܼܐ ܫܘܠܡܗ ܕܢܬܚܒܠ ܐܝܟ ܩܕܡܝܐ ܀
11:015 [ai]ܘܗܐ ܩܠܐ ܐܫܬܡܥ ܠܗ ܕܐܡܿܪ
11:016 [ai]ܫܡܼܥ܂ ܐܢܬ ܗܘ ܕܟܘܠܗ ܙܒܢܐ ܗܢܐ ܐܚܕܬܗܿ ܠܐܪܥܐ܂ ܗܕܐ ܣܒܪܬܐ ܐܣܬܒܪ܂ ܡܢ ܩܕܡ ܕܬܬܚܒܠ܂
11:017 [ai]ܠܐ ܐܢܫ ܡܢ ܐܝܠܝܢ ܕܒܬܪܟ ܢܐܚܘܕ ܐܝܟ ܗܢܐ ܟܠܗ ܙܒܢܐ ܐܦ ܠܐ ܐܝܟ ܦܠܓܗ܂
11:018 [ai]ܘܚܿܙܝܬ ܘܗܐ ܩܡܿ ܓܦܐ ܬܠܝܬܝܐ ܘܐܫܬܠܛ ܐܦ ܗܼܘ ܐܝܟ ܚܒܪ̈ܘܗܝ ܩܕܡ̈ܝܐ ܥܠ ܟܠܗܿ ܐܪܥܐ܂ ܘܐܬܚܒܠ ܐܦ ܗܼܘ ܐܝܟ ܩܕܡ̈ܝܐ܂
11:019 [ai]ܘܗܟܢܐ ܓܕܫ ܗܘܐ ܠܟܠܗܘܢ ܓ̈ܦܐ ܕܚܕ ܚܕ ܡܢܗܘܢ ܢܫܬܠܛܘܢ ܘܬܘܒ ܢܬܚܒܠܘܢ ܀
11:020 [ai]ܘܚܿܙܝܬ ܘܗܐ ܒܙܒܢ ܓ̈ܦܐ ܙܥܘܪ̈ܐ ܐܦ ܗܼܢܘܢ ܩܡܿܘ ܡܢ ܓܒܐ ܕܝܡܝܢܐ܂ ܐܝܟ ܕܢܐܚܕܘܢܗܿ ܠܐܪܥܐ܂ ܘܡܢܗܘܢ ܐܚܿܕܝܢ ܗܘܘ܂ ܐܠܐ ܕܝܢ ܒܥܓܠ ܡܬܚܒܠܝܢ ܗܘܘ܂
11:021 [ai]ܘܡܢܗܘܢ ܩܝܿܡܝܢ ܗܘܘ ܐܠܐ ܠܐ ܐܚܝܕܝܢ ܗܘܘ ܫܘܠܛܢܐ܂
11:022 [ai]ܘܚܿܙܝܬ ܡܢ ܒܬܪ ܗܠܝܼܢ܂ ܘܬܪܥܣܪ ܓܦ̈ܘܗܝ ܐܬܚܒܠܘ ܗܘܘ܂ ܘܬܪܝܢ ܡܢ ܓ̈ܦܐ ܙܥܘܪ̈ܐ܂
11:023 [ai]ܘܠܐ ܐܫܬܚܪ ܡܕܡ ܡܢ ܦܓܪܗ ܕܢܫܪܐ܂ ܐܠܐ ܒܠܚܘܕ ܬܠܬܝܗܘܢ ܪ̈ܫܐ ܕܫܼܠܝܢ ܗܘܘ܂ ܘܫܬܐ ܓ̈ܦܐ ܙܥܘܪ̈ܐ܂
11:024 [ai]ܘܚܿܙܝܬ ܘܗܐ ܡܢܗܘܢ ܡܢ ܓܦ̈ܐ ܙܥܘܪ̈ܐ ܐܬܦܪܫܘ ܬܪ̈ܝܢ ܓ̈ܦܐ܂ ܘܐܙܠܘ ܘܩܿܡܘ ܬܚܝܬ ܪܝܫܐ ܕܒܓܒܐ ܕܝܡܝܢܐ܂ ܐܪܒܥܐ ܕܝܢ ܩܘܝܘ ܒܕܘܟܬܗܘܢ܂
11:025 [ai]ܘܚܿܙܝܬ ܘܗܐ ܗܿܢܘܢ ܐܪܒܥܐ ܓ̈ܦܐ ܙܥܘܪ̈ܐ ܡܬܚܫܒܝܢ ܗܘܘ ܕܢܩܘܡܘܢ ܘܢܐܚܕܘܢ ܫܘܠܛܢܐ܂
11:026 [ai]ܘܚܿܙܝܬ ܘܗܐ ܩܡ ܚܕ܂ ܐܠܐ ܒܥܓܠ ܐܬܚܒܠ܂
11:027 [ai]ܘܬܘܒ ܬܢܝܢܐ܂ ܐܠܐ ܐܦ ܗܼܘ ܐܬܚܒܠ ܒܥܓܠ ܝܬܝܪ ܩܕܡܝܐ܂
11:028 [ai]ܘܚܿܙܝܬ ܘܗܐ ܗܿܢܘܢ ܬܪܝܢ ܕܡܢܗܘܢ ܐܫܬܚܪܘ܂ ܡܬܚܫܒܝܢ ܗܘܘ ܡܢܗܘܢ ܐܦ ܗܼܢܘܢ ܕܢܐܚܕܘܢ ܪܝܫܢܘܬܐ܂
11:029 [ai]ܘܥܕ ܗܼܢܘܢ ܡܬܚܫܒܝܢ ܗܘܘ ܕܢܫܬܠܛܘܢ ܥܠ ܐܪܥܐ܂ ܚܙܿܝܬ ܘܗܐ ܚܕ ܡܢ ܪ̈ܝܫܐ ܕܫܼܠܝܢ ܗܘܘ܂ ܡܨܥܝܐ ܐܬܬܥܝܪ܂ ܕܝܢ ܪܒ ܗܘܐ ܡܢ ܬܪ̈ܝܗܘܢ ܪ̈ܝܫܐ ܐܚܪ̈ܢܐ
11:030 [ai]‍<‍܂܂܂܂‍>‍ ܠܬܪ̈ܝܗܘܢ ܥܡܗ܂
11:031 [ai]ܘܥܡ ܬܪܝܗܘܢ ܕܥܡܗ ܐܬܗܦܟ܂ ܘܐܟܼܠ ܐܢܘܢ ܠܬܪ̈ܝܗܘܢ ܓ̈ܦܐ ܙܥܘܪ̈ܐ ܗܠܝܢ ܕܡܬܚܫܒܝܢ ܗܘܘ ܕܢܫܬܠܛܘܢ܂
11:032 [ai]ܗܼܘ ܕܝܢ ܗܿܘ ܪܝܫܐ ܐܚܕܗܿ ܠܟܠܗܿ ܐܪܥܐ܂ ܘܡܟܟ ܐܢܘܢ ܠܥܡܘܪ̈ܝܗܿ ܒܥܡܠܐ ܣܓܝܐܐ܂ ܘܐܬܚܝܠ ܥܠ ܬܒܝܠ ܝܬܝܪ ܡܢ ܟܠܗܘܢ ܓ̈ܦܐ ܕܗܘܘ܂
11:033 [ai]ܘܚܿܙܝܬ ܡܢ ܒܬܪ ܗܠܝܢ܂ ܘܗܐ ܡܢ ܫܠܝܐ ܪܝܫܐ ܗܿܘ ܡܨܥܝܐ ܐܬܚܒܠ܃ ܐܦ ܗܼܘ ܐܝܟ ܕܐܦ ܓܦ̈ܐ܂
11:034 [ai]ܐܫܬܚܪܘ ܕܝܢ ܬܪܝܢ ܪ̈ܝܫܐ܂ ܐܦ ܗܢܼܘܢ ܐܫܬܠܛܘ ܥܠ ܟܘܠܗܿ ܐܪܥܐ ܘܠܐ ܥܡ̈ܘܪܝܗܿ܂
11:035 [ai]ܘܚܿܙܝܬ ܘܗܐ ܐܟܼܠ ܪܝܫܐ ܕܒܓܒܐ ܕܝܡܝܢܐ ܠܗܿܘ ܕܒܣܡܠܐ ܀
11:036 [ai]ܘܫܡܿܥܬ ܩܠܐ ܕܐܡܿܪ ܠܝ܂ ܚܘܪ ܠܩܘܒܠܟ ܥܙܪܐ܂ ܘܚܙܝ ܡܢܐ ܚܿܙܐ ܐܢܬ ܫܘܠܡܐ܂܂
11:037 [ai]ܘܚܿܙܝܬ ܘܗܐ ܐܝܟ ܐܪܝܐ ܕܐܬܥܝܪ ܡܢ ܥܒܐ ܕܓܥܐ ܘܢܗܿܡ܂ ܘܫܡܿܥܬ ܕܐܝܿܟܢܐ ܫܒܼܩ ܩܠܐ ܕܒܪܢܫܐ ܠܘܬ ܢܫܐ܂ ܘܡܠܠ ܘܐܡܼܪ ܠܗ܂
11:038 [ai]ܫܡܼܥ ܐܢܬ ܢܫܪܐ ܘܐܿܡܪ ܠܟ܂ ܐܡܿܪ ܠܟ ܡܪܝܡܐ܂
11:039 [ai]ܠܐ ܗܘܐ ܐܢܬ ܗܘ ܕܐܫܬܼܚܪܬ ܡܢ ܐܪ̈ܒܥܬܝܗܝܢ ܚܝ̈ܘܬܐ ܗܠܝܢ ܕܥܒܼܕܬ ܗܼܘܝܬ ܕܢܫܬܠܛܢ ܥܠ ܥܠܡܝ܂ ܘܕܒܐ̈ܝܕܝܗܝܢ ܢܐܬܐ ܫܘܠܡܗܘܢ ܕܙܒ̈ܢܐ܂
11:040 [ai]ܐܢܬ ܕܝܢ ܪܒܝܥܝܐ ܐܼܬܝܬ܂ ܘܙܟܼܝܬ ܠܟܠܗܝܢ ܚܝܘ̈ܬܐ ܕܥܼܒܪ܂ ܘܐܬܚܼܝܠܬ ܥܠ ܥܠܡܐ ܒܥܡ̈ܠܐ ܣܓܝܐ̈ܐ܂ ܘܥܠ ܟܠܗܿ ܬܒܝܠ ܒܩܛܝܪܐ ܡܪܝܪܐ܂ ܘܒܢܟܠܐ ܥܡܼܪܬ ܒܬܒܝܠ ܙܒܢܐ ܣܓܝܐܐ܂
11:041 [ai]ܘܕܢܬܗܿ ܠܐܪܥܐ ܕܠܐ ܒܩܘܫܬܐ܂
11:042 [ai]ܒܙܬ ܓܝܪ ܘܚܛܦܼܬ ܠܥܢ̈ܘܝܐ ܘܫܪܝܪ̈ܐ܂ ܘܐܒܐܼܫܬ ܠܡܟ̈ܝܟܐ܂ ܘܣܢܝܬ ܠܬܪ̈ܝܨܐ܂ ܘܪܚܼܡܬ ܠܕܓ̈ܠܐ܂ ܘܣܚܼܦܬ ܚܣ̈ܢܐ ܕܐܝܠܝܢ ܕܟܗܝܢܝܢ܂ ܘܡܼܟܟܬ ܫܘܪ̈ܐ ܕܐܝܠܝܢ ܕܠܐ ܐܗܪܘܟ܂
11:043 [ai]ܘܣܼܠܩ ܨܥܪܟ ܠܘܬ ܡܪܝܡܐ܂ ܘܠܘܬ ܚܝܠܬܢܐ܂
11:044 [ai]ܘܚܪ ܡܪܝܡܐ ܒܙܒ̈ܢܘܗܝ ܘܗܐ ܫܠܼܡܘ܂ ܘܥܠܡ̈ܘܗܝ ܐܬܡܠܝܘ܂
11:045 [ai]ܡܛܠ ܗܢܐ ܡܬܚܒܠܘ ܬܬܚܒܠ ܐܢܬ ܢܫܪܐ܂ ܘܓ̈ܦܝܟ ܡܪ̈ܝܡܐ܂ ܘܓ̈ܦܝܟ ܙܥܘܪ̈ܐ ܘܒܝܼ̈ܫܐ܂ ܘܪ̈ܝܫܝܟ ܡܪ̈ܝܪܐ ܘܛܦܪ̈ܝܟ ܒܝܼ̈ܫܬܐ܂ ܘܟܘܠܗ ܦܓܪܟ ܣܼܢܝܐ ܘܒܝܼܫܐ܂
11:046 [ai]ܡܛܠ ܕܬܬܢܝܚ ܘܬܬܩܠܠ ܟܠܗܿ ܐܪܥܐ܂ ܡܐ ܕܝܢ ܕܐܬܸܦܨܝܬ ܡܢ ܩܛܝܪܐ ܕܡܣܟܝܐ ܠܕܝܼܢܐ ܘܠܪ̈ܚܼܡܘܗܝ ܕܥܿܒܘܕܗܿ ܀

next chapter