← Back
The Comprehensive Aramaic Lexicon
← Return to the Text Browser
click on the file description for more information
62072: P 4Ezra

Click on a word for lexical analysis.
Click on a red-colored coordinate for comments and/or translations of the line
View in Serto
Ask AI about a passage
Hide manuscript variants

previous chapter


12:001 [ai]ܘܗܼܘܐ ܕܟܕ ܡܠܠ ܗܘܐ ܐܪܝܐ ܡ̈ܠܐ ܗܠܝܢ ܠܘܬ ܢܫܪܐܼ܂ ܚܙܝܿܬ
12:002 [ai]ܘܗܐ ܪܝܫܐ ܗܿܘ ܕܐܫܬܚܪ ܐܬܚܒܠ ܡܢ ܫܠܝܐ܂ ܘܗܿܝܕܝܢ ܗܿܢܘܢ ܬܪܝܢ ܓܦ̈ܐ ܕܐܙܼܠܘ ܠܘܬܗܼ܂ ܩܡܿܘ ܐܝܟ ܕܢܫܬܠܛܘܢ ܘܠܪ̈ܝܫܢܘܬܗܘܢ ܢܗܘܐ ܫܘܠܡܐ܂ ܘܫܓܘܫܝܐ ܬܗܘܐ ܡܠܝܼܐ܂
12:003 [ai]ܘܚܿܙܝܬ ܕܐܦ ܗܼܢܘܢ ܐܬܚܒܠܘ܂ ܘܟܠܗ ܦܓܪܗ ܕܢܫܪܐ ܝܩܿܕ ܗܘܐ܂ ܐܪܥܐ ܕܝܢ ܬܡܝܗܐ ܗܘܬ ܣܿܓܝ܂ ܐܢܐ ܕܝܢ ܡܢ ܣܘܓܐܐ ܕܙܘܥܬܐ ܘܡܢ ܕܚܠܬܐ ܪܒܬܐ ܐܬܿܬܥܝܪܬ܂ ܘܐܡܿܪܬ ܠܪܘܚܝ܂
12:004 [ai]ܕܐܢܬܝ ܥܒܼܕܬܝ ܠܝ ܗܠܝܢ ܟܠܗܝܢܿ ܡܛܠ ܕܡܥܩܒܐ ܐܢܬ ܥܠ ܐܘܪ̈ܚܬܗ ܕܡܪܝܡܐ܂
12:005 [ai]ܘܗܐ ܡܫܪܝ ܐܢܐ ܒܢܦܫܝ܂ ܘܪܘܚܝ ܒܨܪܬ ܣܿܓܝ܂ ܘܠܐ ܐܫܬܚܪ ܒܝ ܚܝܠܐ ܐܦܠܐ ܩܠܝܠ ܡܢ ܕܚܠܬܐ ܣܓܝܐܬܐ ܕܕܚܿܠܬ ܒܗܢܐ
12:006 [ai]ܘܗܫܐ ܐܒܿܥܐ ܡܢ ܡܪܝܡܐ ܘܢܚܝܠܢܝ ܥܕܡܐ ܠܚܪܬܐ܂
12:007 [ai]ܘܐܡܿܪܬ܂ ܐܘ ܡܪܝܐ ܡܪܝ܂ ܐܢ ܐܫܟܿܚܬ ܪ̈ܚܼܡܐ ܒܥ̈ܝܢܝܟ܃ ܘܐܢ ܫܪܝܪܐܝܬ ܐܝܬ ܠܝ ܛܘܒܐ ܠܘܬܟ ܝܬܝܪ ܡܢ ܣܓ̈ܝܐܐ܃ ܘܐܢ ܒܩܘܫܬܐ ܣܠܸܩܬ ܒܥܘܬܝ ܩܕܡ ܪܒܘܬܐ ܕܦܪܨܘܦܟܼ܂
12:008 [ai]ܚܝܠܝܢܝ ܘܐܘܕܥܝܢܝ ܠܝ ܠܥܼܒܕܟ ܦܘܫܩܗ ܘܦܘܪܫܢܗ ܕܚܙܘܐ ܗܢܐ ܕܚܿܙܝܬ܂ ܡܛܠ ܕܡܠܝܐܝܬ ܬܒܝܐܗܿ ܠܢܦܫܝ܂
12:009 [ai]ܠܘ ܓܝܪ ܕܫܿܘܐ ܐܢܐܿ܂ ܚܫܒܬܢܝ ܕܬܓܠܐ ܠܝ ܫܘܠܡܗܘܢ ܕܙܒ̈ܢܐ܂ ܘܚܪܬܗܘܢ ܕܥܕ̈ܢܐ ܿ܃ܿ ܀ ܘܥܢܼܐ ܘܐܡܼܪ ܠܝ܂
12:010 [ai]ܗܢܘ ܦܘܫܩܗ ܕܚܙܘܐ ܕܚܼܙܝܬ܂
12:011 [ai]ܢܫܪܐ ܕܚܙܼܝܬ ܕܣܠܼܩ ܡܢ ܝܡܐܼ܂ ܗܕܐ ܗܝ ܡܿܠܟܘܬܐ ܪܒܝܥܝܬܐ ܗܿܝ ܕܐܬܸܚܙܝܬ ܒܚܙܘܐ ܠܐܚܘܟ ܕܢܝܐܝܠ܂
12:012 [ai]ܐܠܐ ܠܐ ܐܬܦܫܸܩܬ ܠܗ ܐܝܟ ܕܡܦܫܩ ܐܢܐ ܠܟ ܗܫܐ܂ ܐܘܼ ܐܝܟ ܕܦܫܿܩܬ ܠܟ ܿ܃ܿ ܀ܿ܃ܿ
12:013 [ai]ܗܐ ܝܘܡ̈ܬܐ ܐܬܿܝܢ܂ ܘܬܩܘܡ ܡܠܟܘܬܐ ܥܠ ܐܪܥܐ܂ ܘܬܗܘܐ ܕܚܝܠܐ ܡܢ ܟܠܗܝܢ ܡܠܟܘ̈ܬܐ ܕܗ̈ܘܝ ܡܢ ܩܕܡܝܗܿ܂
12:014 [ai]ܘܢܡܠܟܘܢ ܒܗܿ ܬܪܥܣܪ ܡ̈ܠܟܿܝܢ ܚܕ ܒܬܪ ܚܕ܂
12:015 [ai]ܬܢܝܢܐ ܕܝܢ ܟܕ ܢܡܠܟܼ܂ ܗܼܘ ܢܐܚܘܕ ܙܒܢܐ ܝܬܝܪ ܡܢ ܗܿܢܘܢ ܬܪܥܣܪ܂
12:016 [ai]ܣܢܘ ܦܘܫܩܐ ܕܬܪܥܣܪ ܓ̈ܦܐ ܕܚܼܙܝܬ܂
12:017 [ai]ܘܡܛܠ ܕܚܼܙܝܬ ܩܠܐ ܕܡܡܠܠ ܗܘܐ ܘܠܐ ܢܦܿܩ ܗܘܐ ܡܢ ܪܝܫܗ ܕܢܫܪܐ ܐܠܐ ܡܢ ܡܨܥܬܗ ܕܦܓܪܗܼ܂
12:018 [ai]ܗܕܐ ܗܝ ܡܠܬܐ܂ ܡܛܠ ܕܒܝܢܬ ܙܒܢܗܿ ܕܡܠܟܘܬܐ ܗܿܝܼ ܗ̈ܘܝܢ ܦܠܓܘ̈ܬܐ ܣܓܝܐ̈ܬܐ܂ ܘܩܝܢܕܘܢܘܣ ܬܥܒܕ܂ ܕܬܦܼܠ ܠܐ ܬܦܼܠ܂ ܗܝܿܕܝܢ ܐܠܐ ܕܬܘܒ ܬܬܩܢ ܠܪܝܫܢܘܬܗܿ ܩܕܡܝܬܐ܂
12:019 [ai]ܘܡܛܠ ܕܚܼܙܝܬ ܓ̈ܦܐ ܙܥܘܪ̈ܐ ܬܡܢܝܐ ܕܝܥܘ ܬܚܝܬ ܓܦܘ̈ܗܝܼ܂
12:020 [ai]ܗܕܐ ܗܝ ܡܠܬܐ܂ ܢܩܘܡܘܢ ܒܗܿ ܓܝܪ ܬܡܢܝܐ ܡ̈ܠܟܿܝܢܿ܂ ܗܠܝܢ ܕܗܿܘܝܢ ܙܒܢܝܗܘܢ ܩܠܝܠܝܢ܂ ܘܥܕܢ̈ܝܗܘܢ ܡܣܪܗܒܝܢ܂ ܘܬܪܝܢ ܡܢܗܘܢ ܢܐܒܕܘܢ
12:021 [ai]ܟܕ ܢܡܛܐ ܙܒܢܐ ܕܢܦܠܓ܂ ܘܐܪܒܥܐ ܢܬܢܛܪܘܢ ܠܙܒܢܐ܂ ܕܟܕ ܢܡܛܐ ܙܒܢܗ ܕܢܫܠܡ܂ ܬܪܝܢ ܕܝܢ ܢܬܢܛܪܘܢ ܠܫܘܠܡܐ܂
12:022 [ai]ܘܡܛܠ ܕܚܼܙܝܬ ܒܗ ܬܠܬܐ ܪ̈ܝܫܝܢ ܕܫܼܠܝܢܼ܂
12:023 [ai]ܗܕܐ ܗܝ ܡܠܬܐ܂ ܒܚܪܬܗܘܢ ܕܙܒ̈ܢܐ ܢܩܝܡ ܡܪܝܡܐ ܬܠܬܐ ܡ̈ܠܟܿܝܢ܂ ܘܢܚܕܬܘܢ ܒܗܿ ܣܓܝܐ̈ܬܐ܂ ܘܢܫܚܩܘܢܝܗܿ ܠܐܪܥܐ
12:024 [ai]ܠܥܡܘܪ̈ܝܗܿ ܒܥܡܠܐ ܣܓܝܐܐ܂ ܝܬܝܪ ܡܢ ܟܠܗܘܢ ܐܝܠܝܢ ܕܗܘܘ ܡܢ ܩܕܡܝܗܘܢ܂ ܡܛܠ ܗܢܐ ܗܼܢܘܢ ܐܬܩܪܝܘ ܪ̈ܝܫܘܗܝ ܕܢܫܪܐ܂
12:025 [ai]ܗܼܢܘܢ ܐܢܘܢ ܓܝܪ ܕܡܚܕܬܝܢ ܪܘܫܥܗ܂ ܘܗܼܢܘܢ ܡܫܠܡܝܢ ܠܗ ܠܚܪܬܗ܂
12:026 [ai]ܘܡܛܠ ܕܚܼܙܝܬ ܠܗܿܘ ܚܕ ܪܫܐ ܪܒܐ ܕܐܬܚܒܠܼ܂ ܡܛܠ ܕܚܕ ܡܢܗܘܢ ܢܡܘܬ ܒܠܚܘܕ ܥܠ ܥܪܣܗ܂ ܐܦ ܗܼܘ ܕܝܢ ܟܕ ܡܫܬܢܩ܂
12:027 [ai]ܗܿܢܘܢ ܕܝܢ ܬܪܝܢ ܕܐܫܬܚܪܘܼ ܚܪܒܐ ܬܐܟܘܠ ܐܢܘܢ܂
12:028 [ai]ܡܛܠ ܕܚܪܒܗ ܕܚܕ ܬܐܟܘܠ ܠܚܒܪܗ܂ ܐܠܐ ܕܝܢ ܐܦ ܗܼܘ ܒܚܪܬܐ ܒܚܪܒܐ ܢܿܦܠ܂
12:029 [ai]ܘܡܛܠ ܕܚܙܼܝܬ ܓ̈ܦܐ ܬܪܝܢ ܕܐܙܠܘ ܠܘܬ ܪܝܫܐ ܕܒܓܒܐ ܕܝܡܝܢܐ܂
12:030 [ai]ܗܕܐ ܗܝ ܡܠܬܐ܂ ܗܠܝܢ ܐܢܘܢ ܕܦܼܪܫ ܡܪܝܡܐ ܠܫܘܠܡܗ܂ ܘܠܡܠܟܘܬܗܘܢ ܢܗܘܐ ܫܘܠܡܐ܂ ܘܫܓܘܫܝܐ ܬܗܘܐ ܡܠܼܝܐ
12:031 [ai]ܐܝܟ ܕܚܼܙܝܬ ܿ܃ܿ ܀ ܘܕܚܙܝܬ ܐܪܝܐ ܕܐܬܬܥܝܪ ܡܢ ܥܒܐ܂ ܕܿܓܥܐ ܘܢܗܿܡ ܘܡܡܠܠ ܠܘܬ ܢܫܪܐ܂ ܘܡܟܣ ܗܘܐ ܠܗ ܥܠ ܥܼܘܠܗ܂ ܘܟܠܗܝܢ ܡ̈ܠܐ ܐܝܟ ܕܫܡܼܥܬ܂
12:032 [ai]ܗܼܘܝܘ ܡܫܝܚܐܿ܂ ܗܿܘ ܕܢܛܿܪ ܡܪܝܡܐ ܠܫܘܠܡܗܘܢ ܕܝܘܡ̈ܬܐ܂ ܗܿܘ ܕܕܢܿܚ ܡܢ ܙܪܥܗ ܕܕܘܝܕ܂ ܘܢܐܬܐ ܘܢܡܠܠ ܥܡܗܘܢ܂ ܘܢܟܣ ܐܢܘܢ ܥܠ ܪܘܫܥܗܘܢ܂ ܘܥܠ ܡܒܐܫܢܘܬܗܘܢ ܢܟܘܢ ܐܢܘܢ܂ ܘܢܣܕܘܪ ܩܕܡܝܗܘܢ ܥܼܘܠܗܘܢ܂
12:033 [ai]ܢܩܝܡ ܐܢܘܢ ܓܝܪ ܩܕܡܝ ܒܕܝܼܢܗܘܢ ܟܕ ܚ̈ܝܝܢ܂ ܘܢܗܘܐ ܟܕ ܢܟܣ ܐܢܘܢ ܗܿܝܕܝܢ ܢܚܿܒܠ ܐܢܘܢ܂
12:034 [ai]ܠܥܡܝ ܕܝܢ ܕܐܫܬܚܪ ܢܦܪܘܩ ܒܼܪ̈ܚܡܐ ܠܐܝܠܝܢ ܕܩܼܘܝܘ ܒܬܚ̈ܘܡܝ܂ ܘܢܒܣܡ ܐܢܘܢ ܥܕܡܐ ܕܢܐܬܐ ܫܘܠܡܐ ܕܝܘܡܗ ܕܕܝܼܢܐ ܥܠ ܗܿܘ ܕܡܿܠܠܬ ܥܡܟ ܡܢ ܩܕܝܡܼ܂
12:035 [ai]ܗܢܘ ܚܙܘܐ ܕܚܙܼܝܬ܂ ܘܗܢܘ ܦܘܫܩܗ܂
12:036 [ai]ܘܐܢܬ ܗܘ ܒܠܚܘܕܝܟ ܐܫܬܘܼܝܬ ܕܬܕܥ ܪܐܙܗ ܕܡܪܝܡܐ܂
12:037 [ai]ܟܬܘܒ ܗܟܝܠ ܒܣܦܪܐ ܗܠܝܢ ܟܠܗܝܢ ܕܚܙܼܝܬ܂ ܘܣܼܝܡ ܐ̈ܢܝܢ ܒܕܘܟܬܐ ܕܟܣܝܐ܂
12:038 [ai]ܘܐܠܦ ܐ̈ܢܝܢ ܠܚܟܝ̈ܡܘܗܝ ܕܥܡܟ܂ ܐܝܠܝܢ ܕܝܼܕܥܬ ܕܡܫܟܚܝܢ ܠܒܘ̈ܬܗܘܢ ܐܚܿܕܝܢ ܠܡܛܪ ܪ̈ܐܙܐ ܗܠܝܢ܂
12:039 [ai]ܐܢܬ ܕܝܢ ܣܝܒܪ ܗܪܟܐ ܬܘܒ ܫܒܥܐ ܝܘܡ̈ܝܢ ܐܚܪ̈ܢܝܢ܃ ܡܛܠ ܕܢܬܓܠܐ ܠܟ ܡܕܡ ܕܨܿܒܐ ܡܪܝܡܐ ܕܢܓܠܐ ܠܟ܂
12:040 [ai]ܘܐܼܙܠ ܠܗ ܡܢ ܠܘܬܝ܀ ܘܗܼܘܐ ܕܟܕ ܚܙܘ ܥܡܐ ܕܥܼܒܪܘ ܫܒܥܐ ܝܘܡ̈ܝܢ܃ ܘܠܐ ܐܿܬܝܬ ܠܡܕܝܢܬܐܼ܂ ܐܬܟܢܫܘ ܟܠܗ ܥܡܐ܂ ܡܢ ܙܥܘܪܐܼ ܥܕܡܐ ܠܪܒܐ܂ ܘܩܿܡܘ ܘܐܬܘ ܠܘܬܝ܂ ܘܥܢܘ ܘܐܡܿܪܝܢ ܠܝ܂
12:041 [ai]ܡܢܐ ܚܿܛܝܢܢ ܠܟ܂ ܐܘ ܡܢܐ ܐܒܫܢܢ ܠܟܿ܂ ܕܫܒܩܬܢ ܘܝܬܼܒܬ ܠܟ ܒܐܬܪܐ ܗܢܐ܂
12:042 [ai]ܐܢܬ ܗܘ ܓܝܪ ܐܫܬܚܼܪܬ ܠܢ ܡܢ ܟܘܠܗܘܢ ܢܒ̈ܝܐܼ܂ ܐܝܟ ܣܓܘܠܐ ܡܢ ܩܛܦܐ܂ ܘܐܝܟ ܫܪܓܐ ܒܐܬܪܐ ܚܫܘܟܐ܂ ܘܐܝܟ ܠܡܐܢܐ ܕܚ̈ܝܐ ܠܐܠܦܐ ܡܐ ܕܩܝܿܡܐ ܒܡܚܫܘܠܐ܂
12:043 [ai]ܐܘ ܠܐ ܣܿܦܩܢ ܠܢ ܒܝ̈ܫܼܬܐ ܕܓܕ̈ܫܢ܂ ܐܠܐ ܕܐܦ ܐܢܬ ܬܫܒܩܢ܂
12:044 [ai]ܘܐܢ ܕܝܢ ܫܒܿܩ ܐܢܬ ܠܢ܂ ܦܩܚ ܗܘܐ ܠܢ ܕܐܠܘ ܝܩ̈ܕܢ ܐܦ ܚܢܢ ܒܝܩܕܢܗܿ ܕܨܗܝܘܢ܂
12:045 [ai]ܠܐ ܗܘܐ ܓܝܪ ܡܝܬܿܪܝܢܢ ܡܢ ܗܿܢܘܢ ܕܡܝܬܘ ܬܡܢ܂܂ ܘܒܿܟܝܬ ܒܩܠܐ ܪܡܿܐ܂ ܘܥܿܢܝܬ ܘܐܡܿܪܬ ܠܗܘܢ܂
12:046 [ai]ܐܬܠܒܒ ܐܝܣܪܝܠ܂ ܘܠܐ ܬܟܪܐ ܠܟ ܒܝܬܗ ܕܝܥܩܘܒ܂
12:047 [ai]ܐܝܬܘܗܝ ܓܝܪ ܕܘܟܪܢܟܘܢ ܩܕܡ ܡܪܝܡܐ܂ ܘܚܝܠܬܢܐ ܠܐ ܛܥܿܐ ܠܟܘܢ ܠܥܠܡ܂
12:048 [ai]ܐܢܐ ܕܝܢ ܠܐ ܫܒܩܬܟܘܢ܂ ܘܠܐ ܫܿܒܩ ܐܢܐ ܠܟܘܢ܂ ܐܠܐ ܐܿܬܝܬ ܠܐܬܪܐ ܗܢܐ ܕܐܒܿܥܐ ܥܠ ܚܘܪܒܗܿ ܕܨܗܝܘܢ܂ ܘܕܐܫܐܠ ܪ̈ܚܼܡܐ ܥܠ ܡܘܟܟܗ ܕܒܝܬ ܡܩܕܫܢ܂
12:049 [ai]ܘܗܫܐܼ ܩܠܼܘ ܟܘܠ ܐܢܫ ܠܒܝܬܗ܂ ܘܐܢܐ ܐܿܬܐ ܐܢܐ ܠܘܬܟܘܢ ܡܢ ܒܬܪ ܗܠܝܢ ܝܘܡ̈ܬܐ܂
12:050 [ai]ܘܐܙܠܘ ܥܡܐ ܠܡܕܝܢܬܐ ܐܝܟ ܕܐܡܿܪܬ ܠܗܘܢ܂
12:051 [ai]ܐܢܐ ܕܝܢ ܝܬܿܒܬ ܒܦܩܥܬܐܼ ܫܒܥܐ ܝܿܘܡܝܢ܂ ܐܝܟ ܕܦܩܕܢܝ܂ ܘܐܿܟܠ ܗܿܘܝܬ ܡܢ ܗܒ̈ܒܐ ܕܕܒܪܐ ܒܠܚܘܕ܂ ܘܡܢ ܥܿܩܪ̈ܐ ܗܼܘܐ ܡܙܘܢܝ ܒܗܿܢܘܢ ܝܘܡ̈ܬܐ܀

next chapter