← Back
The Comprehensive Aramaic Lexicon
← Return to the Text Browser
click on the file description for more information
62072: P 4Ezra

Click on a word for lexical analysis.
Click on a red-colored coordinate for comments and/or translations of the line
View in Serto
Ask AI about a passage
Hide manuscript variants

previous chapter


14:001 [ai]ܘܗܼܘܐ ܡܢ ܒܬܪ ܗܠܝܢܼ܂ ܘܐܢܐ ܝܬܿܒ ܗܿܘܝܬ ܬܚܝܬ ܒܠܘܛܐ܂
14:002 [ai]ܘܗܐ ܩܠܐ ܢܦܩܼ ܡܢ ܣܢܝܐ ܕܠܘܩܒܠܝܼ ܘܥܢܐ ܘܐܡܼܪ ܠܝ܂ ܥܙܪܐ ܥܙܪܐܼ܂ ܘܐܡܿܪܬ ܗܐ ܐܢܐ܂ ܘܩܡܿܬ ܥܠ ܪ̈ܓܠܝ܂ ܘܐܡܼܪ ܠܝ܂
14:003 [ai]ܡܬܓܠܝܘ ܐܬܿܓܠܝܬ ܡܢ ܣܢܝܐܿ܂ ܘܡܿܠܠܬ ܥܡ ܡܘܫܐ ܟܕ ܡܫܥܒܕ ܗܘܐ ܥܡܝ ܒܡܨܪܝܢ܂
14:004 [ai]ܘܫܿܕܪܬܗ ܘܐܦܩܗ ܠܥܡܝ ܡܢ ܡܨܪܝܢ܂ ܘܐܝܬܝܗ ܠܡܕܒܪܐ ܘܐܣܩܗ ܠܛܘܪ ܣܝܢܝ܂ ܘܐܚܿܕܬܗ ܠܘܬܝ ܝܘܡ̈ܬܐ ܣܓܝܐ̈ܐ܂
14:005 [ai]ܘܦܫܿܩܬ ܠܗ ܬܕܡܪ̈ܬܐ ܣܓܝܐ̈ܬܐ܂ ܘܐܘܿܕܥܬܗ ܪ̈ܐܙܐ ܕܙܒ̈ܢܐ܂ ܘܚܿܘܝܬܗ ܫܘܠܡܗܘܢ ܕܥ̈ܕܢܐ܂ ܘܦܩܕܬܗ ܘܐܡܿܪܬ ܠܗ܂
14:006 [ai]ܕܗܠܝܢ ܡ̈ܠܐܼ܂ ܡܢܗܝܢ ܬܟܣܐ ܘܡܢܗܝܢ ܬܓܠܐ ܀
14:007 [ai]ܘܗܫܐ ܠܟ ܐܡܿܪ ܐܢܐ ܥܙܪܐ܂
14:008 [ai]ܐܬ̈ܘܬܐ ܕܩܕܡܬ ܚܿܘܝܬܟ܂ ܘܚܙ̈ܘܢܐ ܕܚܙܼܝܬ ܘܦܘܫܩܗܘܢ ܕܫܡܼܥܬ܂ ܣܝܼܡ ܐܢܘܢ ܒܠܒܟ ܘܛܫܐ ܐܢܘܢ܂
14:009 [ai]ܐܢܬ ܓܝܪ ܡܫܬܩܠ ܐܢܬ ܡܢ ܒܢܝܢܫܐ܂ ܘܬܗܘܐ ܡܟܝܠ ܥܡ ܒܪܝ܂ ܘܥܡ ܐܝܠܝܢ ܕܕܡܿܝܢ ܠܟ ܥܕܡܐ ܕܢܫܠܡܘܢ ܙܒ̈ܢܐ܂
14:010 [ai]ܥܠܡܐ ܓܝܪ ܐܘܒܕܗܿ ܠܥܠܝܡܘܬܗ܂ ܘܙܒ̈ܢܐ ܩܼܪܒܘ ܠܡܐܣܒ܂
14:013 [ai]ܗܫܐ ܗܟܝܠ ܦܩܕܝܗܝ ܠܒܝܬܟ܂ ܘܐܪܬܝܗܝ ܠܥܡܟ܂ ܘܒܝܐܐ ܐܢܘܢ ܠܥܢܘܝ̈ܝܗܘܢ܂ ܘܣܟܠ ܠܚܟܝܡ̈ܝܗܘܢ܂ ܘܫܒܘܩ ܡܟܝܠ ܚ̈ܝܐ ܗܠܝܢ ܕܚܒܠܐ܂
14:014 [ai]ܘܫܪܝ ܡܢܟ ܝܘܩܪܐ ܕܒܢܝܢܫܐ܂ ܘܫܕܝ ܡܚܫ̈ܒܬܐ ܕܡܘܬܐ܂ ܘܫܠܘܚ ܡܟܝܠ ܟܝܢܐ ܕܟܪܝܗܘܬܐ܂ ܘܣܼܝܡ ܠܚܕ ܓܒܐ ܡܚܫ̈ܒܬܐ ܗܠܝܢ ܕܐ̈ܠܨܢ ܠܟ܂ ܘܐܣܬܪܗܒ ܕܬܫܢܐ ܡܢ ܗܠܝܢ ܙܒ̈ܢܐ܂
14:015 [ai]ܒܝܫܼ̈ܬܐ ܓܝܪ ܕܚܼܙܝܬ ܕܗ̈ܘܝ ܗܫܐܼ܂ ܬܘܒ ܡܢ ܒܬܪܟܢ ܕܒܝ̈ܫܢ ܡܢܗܝܢ ܗ̈ܘܝܢ܂
14:016 [ai]ܟܡܐ ܓܝܪ ܕܒܨܪ ܥܠܡܐ ܡܢ ܣܝܒܘܬܗܼ܂ ܗܟܢܐ ܣ̈ܓܝܢ ܒܝܫܼ̈ܬܐ ܥܠ ܥܡܘܪ̈ܝܗܿ ܕܐܪܥܐ܂
14:017 [ai]ܝܬܝܪܐܝܬ ܓܝܪ ܡܬܪܚܩ ܫܪܪܐ܂ ܘܕܓܠܘܬܐ ܡܬܩܪܒܐ܂ ܡܢ ܟܕܘ ܓܝܪ ܗܐ ܡܣܬܪܗܼܒ ܕܢܐܬܐ ܢܫܪܐ ܗܿܘ ܕܚܙܝܬ ܒܚܙܘܐ ܀
14:018 [ai]ܘܥܢܿܝܬ ܘܐܡܿܪܬ܂ ܐܡܿܠܠ ܩܕܡܝܟ ܡܪܝܐ܂
14:019 [ai]ܗܐ ܐܢܐ ܐܙܿܠ ܐܢܐ ܐܝܟ ܕܦܩܕܬܢܝ܂ ܘܐܪܬܝܘܗܝ ܠܥܡܐ ܗܢܐ ܕܩܿܝܡ܂ ܠܐܝܠܝܢ ܕܝܢ ܕܬܘܒ ܡܬܝܠܕܝܢܼ܂ ܡܼܢܘ ܡܪܬܐ ܠܗܘܢ܂
14:020 [ai]ܥܠܡܐ ܓܝܪ ܣܼܝܡ ܒܚܫܘܟܐ܂ ܘܥܡܘܪ̈ܘܗܝ ܕܠܐ ܢܘܗܪܐ܂
14:021 [ai]ܢܡܘܣܟ ܓܝܪ ܐܝܩܪ܂ ܘܐܢܫ ܠܐ ܝܕܿܥ ܥܿܒ̈ܕܐ ܕܥܒܼܕܬ܂ ܐܘ ܡܕܡ ܕܥܬܝܕ ܐܢܬ ܕܬܥܒܕ܂
14:022 [ai]ܐܢ ܗܟܝܠ ܐܫܟܿܚܬ ܪ̈ܚܡܐ ܩܕܡܝܟܼ܂ ܐܪܡܐ ܒܝ ܡܪܝ ܪܘܚܐ ܩܕܝܫܐ܂ ܘܐܟܬܘܒ ܟܘܠ ܡܕܡ ܕܗܼܘܐ ܒܥܠܡܐ܂ ܡܢ ܪܝܫ ܟܠ ܕܟܬܝܒ ܗܘܐ ܒܢܡܘܣܟ ܕܢܬܡܨܘܢ ܒ̈ܢܝ ܐܢܫܐ ܢܫܟܚܘܢ ܫܒܝܠܐ܂ ܘܐܝܠܝܢ ܕܨܿܒܝܢ ܕܢܐܚܘܢܼ ܒܐܚܪܝܬܐ ܢܕܥܘܢ ܐܘܪܚܐ ܀
14:023 [ai]ܘܥܼܢܐ ܘܐܡܼܪ ܠܝ܂ ܙܠ ܘܟܢܫܝܗܝ ܠܥܡܟ ܘܐܡܼܪ ܠܗܘܢܼ܂ ܕܠܐ ܢܒܥܘܢܟ ܐܪܒܥܝܢ ܝܘܡ̈ܝܢ܂
14:024 [ai]ܐܢܬ ܕܝܢ ܥܬܕ ܠܟ ܠܘܚ̈ܐ ܣܓܝܐ̈ܬܐ܂ ܘܕܒܼܪ ܥܡܟ ܠܣܪܝܐ ܘܠܕܪܝܐ ܘܠܫܠܡܝܐ ܥܡ ܗܠܩܢܐ܂ ܘܠܫܝܐܝܠ܂ ܠܗܠܝܢ ܚܡܫܐ ܓܒܪ̈ܝܢ܂ ܡܛܠ ܕܥܬܝܕܝܢ ܐܢܘܢ ܠܡܟܬܒ ܩܠܝܠܐܝܬ܂
14:025 [ai]ܘܬܐܬܐ ܠܗܪܟܐ܂ ܘܐܢܐ ܐܕܠܩ ܒܠܒܟ ܫܪܓܐ ܕܒܘܝܢܐ܂ ܗܿܘ ܕܠܐ ܢܕܥܟ ܥܕܡܐ ܕܬܫܿܠܡ ܡܕܡ ܕܥܬܝܕ ܐܢܬ ܠܡܟܬܒ܂
14:026 [ai]ܘܡܐ ܕܫܠܼܡܬܼ܂ ܡܢܗܘܢ ܬܣܝܡ ܒܓܠܝܐ ܘܡܢܗܘܢ ܬܟܣܐ܂ ܘܬܫܠܡ ܐܢܘܢ ܠܚܟܝܡ̈ܐ܂ ܠܡܚܪ ܓܝܪ ܒܗܢܐ ܥܕܢܐ ܡܫܪܐ ܐܢܬ ܠܡܟܬܒ ܀
14:027 [ai]ܘܐܿܙܠܬ ܐܝܟ ܕܦܩܕܢܝ܂ ܘܟܢܫܬܗ ܠܟܠܗ ܥܡܐ܂ ܘܐܡܿܪܬ ܠܗܘܢ܂
14:028 [ai]ܫܡܼܥܘ ܐܝܣܪܐܝܠ ܦܬܓ̈ܡܐ ܗܠܝܢ܂
14:029 [ai]ܬܘ̈ܬܒܐ ܗܘܘ ܐܒܗ̈ܬܢ ܡܢ ܩܕܝܡ ܒܐܪܥܐ ܕܡܨܪܝܢ ܘܐܬܦܪܩܘ ܡܢ ܬܡܢܿ܂
14:030 [ai]ܘܢܣܒܘ ܢܡܘܣܐ ܕܚ̈ܝܐ܂ ܘܠܐ ܢܛܪܘܗܝ܂ ܗܿܘ ܕܐܦ ܐܢܬܘܢ ܡܢ ܒܬܪܗܘܢ ܐܥܒܪܬܘܢܝܗܝ܂
14:031 [ai]ܘܐܬܝܗܸܒܬ ܠܟܘܢ ܐܪܥܐ ܠܝܪܬܘܬܐ܂ ܒܐܪܥܗܿ ܕܨܗܝܘܢ܂ ܘܐܢܬܘܢ ܕܝܢ ܘܐܒܗ̈ܝܟܘܢ ܐܥܘܠܬܘܢ܂ ܘܠܐ ܢܛܪܬܘܢ ܐܘܪ̈ܚܬܐ ܕܦܩܕܟܘܢ ܡܘܫܐ ܥܼܒܕܗ ܕܡܪܝܐ܂
14:032 [ai]ܡܪܝܡܐ ܕܝܢ ܕܐܝܬܘܗܝ ܕܝܿܢܐ ܕܩܘܫܬܐ ܐܪܝܡ ܡܢܟܘܢ ܡܕܡ ܕܠܙܒܢܐ ܐܬܝܗܒ ܠܟܘܢ܂
14:033 [ai]ܘܗܫܐ ܐܢܬܘܢ ܐܝܬܝܟܘܢ ܗܪܟܐ ܒܐܘܠܨܢܐ ܘܐܚ̈ܝܟܘܢ ܠܓܘ ܡܢܟܘܢ ܒܐܪܥܐ ܐܚܪܬܐ܂
14:034 [ai]ܐܢ ܗܟܝܠ ܬܐܪܬܘܢ ܢܦܫܟܘܢ ܘܬܪܕܘܢ ܠܒܟܘܢ ܒܚܝ̈ܝܟܘܢ ܬܬܢܛܪܘܢ܂ ܘܡܢ ܒܬܪ ܡܘܬܐ ܢܗܘܘܢ ܥܠܝܟܘܢ ܪ̈ܚܼܡܐ܂
14:035 [ai]ܕܝܼܢܐ ܓܝܪ ܐܿܬܐ ܡܢ ܒܬܪ ܡܘܬܐ ܐܡܬܝ ܕܬܘܒ ܚܝܝܢ ܚܢܢ܂ ܘܗܝܿܕܝܢ ܫܡܐ ܕܙܕܝܩ̈ܐ ܢܬܓܠܐ܂ ܘܥܿܒ̈ܕܝܗܘܢ ܕܪ̈ܫܝܥܐ ܢܬܚܙܘܢ܂
14:036 [ai]ܠܘܬܝ ܕܝܢ ܐܢܫ ܠܐ ܢܬܩܪܒ܂ ܘܠܐ ܬܒܥܘܢܢܝ ܥܕܡܐ ܠܐܪܒܥܝܢ ܝܘܡ̈ܝܢ ܀
14:037 [ai]ܐܢܐ ܕܝܢ ܕܒܿܪܬ ܠܗܠܝܢ ܚܡܫܐ ܓܒܪܝܢ ܐܝܟ ܕܦܩܕܢܝ܂ ܘܐܙܿܠܬ ܠܦܩܥܬܐ܂ ܘܟܬܪܢ ܬܡܢ ܐܝܿܟܢܐ ܕܐܡܼܪ ܠܝ ܀
14:038 [ai]ܘܗܼܘܐ ܠܝܘܡܐ ܕܡܚܪܼ ܘܗܐ ܩܠܐ ܩܿܪܐ ܠܝ ܘܐܡܼܪ܂ ܥܙܪܐ ܥܙܪܐ܂ ܦܬܼܚ ܦܘܡܟ ܘܐܫܬܝ ܡܕܡ ܕܡܫܩܐ ܐܢܐ ܠܟ܂
14:039 [ai]ܘܦܬܿܚܬ ܦܘܡܝ ܘܚܿܙܝܬ ܃ ܃ ܗܘܐ ܠܝ ܟܣܐ ܕܡܼܠܐ܂ ܡܠܼܐ ܗܘܐ ܕܝܢ ܐܝܟ ܡ̈ܝܐ܂ ܘܕܡܘܬܗ ܕܡܿܝܐ ܗܘܬ ܠܢܘܪܐ܂
14:040 [ai]ܘܢܣܿܒܬ ܘܐܫܿܬܝܬ܂ ܘܗܼܘܐ ܕܟܕ ܫܬܐ ܗܿܘܝܬ ܠܗ܃ ܗܐ ܠܒܝ ܡܒܥ ܗܘܐ ܒܘܝܢܐ܂ ܘܚܕܝ ܕܝܢ ܓܣܐ ܗܘܐ ܚܟܡܬܐ܂ ܘܪܘܚܝ ܢܛܿܪܐ ܗܘܬ ܥܘܗܕܢܐ܂
14:041 [ai]ܘܦܘܡܝ ܐܬܦܬܚ ܘܠܐ ܐܬܬܚܕ܂
14:042 [ai]ܡܪܝܡܐ ܕܝܢ ܝܗܼܒ ܣܘܟܠܐ ܠܗܿܢܘܢ ܚܡܫܐ ܓܒܪ̈ܝܢ܂ ܘܟܬܿܒܝܢ ܗܘܘ ܐܝܠܝܢ ܕܡܬܡ̈ܠܠܢ ܗ̈ܘܝ ܒܝܘܒܠܐܼ ܒܟܬ̈ܝܒܬܐ ܕܐܬ̈ܘܬܐ ܐܝܠܝܢ ܕܠܐ ܝܕܿܥܝܢ ܗܘܘ ܘܝܬܿܒܬ ܬܡܢ ܐܪܒܥܝܢ ܝܘܡ̈ܝܢ܂ ܗܼܢܘܢ ܕܝܢ ܒܐܝܡܡܐ ܟܬܿܒܝܢ ܗܘܘ܂
14:043 [ai]ܘܒܠܠܝܐ ܐܿܟܠܝܢ ܗܘܘ ܠܚܡܐ ܒܠܚܘܕ܂ ܐܢܐ ܕܝܢ ܒܐܝܡܡܐ ܡܡܠܠ ܗܿܘܝܬ܂ ܘܒܠܠܝܐ ܠܐ ܫܿܠܐ ܗܿܘܝܬ ܀
14:044 [ai]ܐܬܟܬܒܘ ܕܝܢ ܒܗܿܢܘܢ ܐܪܒܥܝܢ ܝܘܡ̈ܝܢܼ܂ ܬܫܥܝܢ ܘܐܪܒܥܐ ܟܬ̈ܒܝܢ ܀ܿ܃ܿ ܿ܃ܿ
14:045 [ai]ܘܗܼܘܐ ܕܟܕ ܫܠܡܘ ܐܪ̈ܒܥܝܢ ܝܘܡ̈ܝܢܼ܂ ܡܠܠ ܥܡܝ ܡܪܝܡܐ ܘܐܡܼܪ ܠܝ܂ ܡܠܝܢ ܥܣܪܝܢ ܘܐܪܒܥܐ ܟܬܿܒܝܢ ܕܟܬܼܒܬܘܢ ܩܕܡܝܼ܂ ܣܝܼܡ ܒܓܠܝܐ܂ ܘܢܩܪܘܢ ܒܗܘܢ ܐܝܠܝܢ ܕܫܿܘܝܢ ܘܐܝܠܝܢ ܕܠܐ ܫܿܘܝܢ ܡܢ ܥܡܐ܂
14:046 [ai]ܗܠܝܢ ܕܝܢ ܫܒܥܝܢ ܬܛܪ܂ ܘܬܫܠܡ ܐܢܘܢ ܠܚܟܝ̈ܡܘܗܝ ܕܥܡܟ܂
14:047 [ai]ܒܗܘܢ ܐܢܘܢ ܓܝܪ ܫܪ̈ܝܢܐ ܕܣܟܘܠܬܢܘܬܐ܂ ܘܡܒܘ̈ܥܐ ܕܚܟܡܬܐ܂ ܘܢܘܗܪܐ ܕܝܕܥܬܐ ܀܀
14:048 [ai]ܘܥܒܿܕܬ ܗܟܢܐ܃ ܒܫܢܬ ܫܒܥ ܒܫܒܘܥܐ ܫܬܝܬܝܐ ܡܢ ܒܬܪ ܚܡܫܐ ܐܠ̈ܦܝܢ ܫ̈ܢܝܢ ܕܒܼܪܝܬܐܿ܂ ܘܝܪ̈ܚܐ ܬܠܬܐ ܘܝܘܡ̈ܬܐ ܬܪܥܣܪ܂ ܘܒܗܘܢ ܐܬܚܛܦ ܥܙܪܐ ܘܐܬܕܒܪ ܠܐܬܪܐ ܕܐܝܠܝܢ ܕܕܡܿܝܢ ܠܗ܂ ܡܢ ܒܬܪ ܕܟܬܼܒ ܗܠܝܢ ܟܘܠܗܝܢ܂ ܗܼܘ ܕܝܢ ܐܬܩܪܝ ܣܦܿܪܐ ܕܝܕܥܬܗ ܕܡܪܝܡܐ ܥܕܡܐ ܠܥܠܡ ܥܠܡܝܢ܂ ܫܠܼܡ ܡܐܡܪܐ ܩܕܡܝܐ ܕܥܙܪܐ܀