← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information
62077: P 1Mac

Click on a word for lexical analysis.
Click on a red-colored coordinate for comments and/or translations of the line
View in Serto
Ask AI about a passage
Hide manuscript variants

07:01 [ai]ܒܫܢܬ ܡܐܐ ܘܚܡܫܝܢ ܘܚܕܐ ܢܦܩ ܕܡܛܪܝܘܣ ܒܪ ܣܠܘܩܘܣ ܡܢ ܪܗܘܡܐ ܘܣܠܩ ܒܐܢܫܐ ܙܥܘܪ̈ܐ ܥܠ ܡܕܝܢ̈ܬܐ ܕܥܠ ܣܦܪ̈ܝ ܝܡܐ ܘܐܡܠܟ ܬܡܢ܂
07:02 [ai]ܘܗܘܐ ܕܟܕ ܥܐܠ ܗܘܐ ܠܒܝܬ ܡܠܟܘܬܐ ܕܐܒܗ̈ܘܗܝ ܐܚܕܘ ܚܝ̈ܠܐ ܠܐܢܛܝܟܘܣ ܘܠܠܘܣܝܐ ܕܢܣܩܘܢ ܐܢܘܢ ܠܘܬܗ܂
07:03 [ai]ܘܐܬܝܕܥܬ ܠܗ ܨܒܘܬܐ ܘܐܡܪ ܠܐ ܬܚܘܘܢܢܝ ܐ̈ܦܝܗܘܢ܂
07:04 [ai]ܘܩܛܠܘ ܐܢܘܢ ܚ̈ܝܠܐ ܘܝܬܒ ܕܡܛܪܝܘܣ ܥܠ ܟܘܪܣܝܐ ܕܡܠܟܘܬܗ܂
07:05 [ai]ܘܐܬܘ ܠܘܬܗ ܟܠܗܘܢ ܓܒܪ̈ܐ ܥܘ̈ܠܐ ܘܪ̈ܫܝܥܐ ܡܢ ܐܝܣܪܐܝܠ ܘܐܠܩܝܡܘܣ ܗܘ ܗܘܐ ܡܕܒܪܢܗܘܢ ܕܨܒܐ ܗܘܐ ܕܢܗܘܐ ܪܒ ܟܗ̈ܢܐ܂
07:06 [ai]ܘܐܟܠܘ ܩܪ̈ܨܘܗܝ ܕܥܡܐ ܩܕܡ ܡܠܟܐ ܘܐܡܪܘ ܐܘܒܕܘ ܝܗܘܕܐ ܘܐܚ̈ܘܗܝ ܠܪ̈ܚܡܝܟ ܘܠܢ ܒܕܪܘܢ ܡܢ ܐܪܥܢ܂
07:07 [ai]ܗܫܐ ܫܕܪ ܓܒܪܐ ܐܝܢܐ ܕܡܗܝܡܢ ܠܟ ܘܢܐܙܠ ܘܢܚܙܐ ܟܠܗ ܐܒܕܢܐ ܕܥܒܕܘ ܒܢ ܘܒܐܪܥܗ ܕܡܠܟܐ ܕܐܝܟܢܐ ܫܢܩ ܐܢܘܢ ܘܠܟܠܗܘܢ ܡܥܕܪ̈ܢܝܗܘܢ܂
07:08 [ai]ܘܓܒܐ ܡܠܟܐ ܠܒܝܟܪܝܘܣ ܪܚܡܗ ܕܡܫܠܛ ܗܘܐ ܒܗܘ ܥܒܪܗ ܕܢܗܪܐ ܘܪܒܐ ܗܘܐ ܘܡܗܝܡܢܐ ܒܡܠܟܘܬܗ܂
07:09 [ai]ܘܫܕܪܗ ܘܠܐܠܩܝܡܘܣ ܪܫܝܥܐ ܘܐܩܝܡ ܠܗ ܟܗܢܘܬܐ ܘܦܩܕܗ ܕܢܥܒܕ ܦܘܪܥܢܐ ܒܒ̈ܢܝ ܐܝܣܪܐܝܠ܂
07:10 [ai]ܘܫܩܠܘ ܘܐܬܘ ܠܐܪܥܐ ܕܝܗܘܕܐ ܒܚܝܠܐ ܣܓܝܐܐ ܘܫܕܪܘ ܡܠܐ̈ܟܐ ܠܘܬ ܝܗܘܕܐ ܘܐܚ̈ܘܗܝ ܒܡ̈ܠܐ ܕܫܠܡܐ ܒܢܟܠܐ܂
07:11 [ai]ܘܚܪܘ ܘܐܣܬܟܠܘ ܒܡ̈ܠܝܗܘܢ ܚܙܘ ܓܝܪ ܕܐܬܘ ܠܘܬܗܘܢ ܒܚܝܠܐ ܪܒܐ܂
07:12 [ai]ܘܐܬܟܢܫܘ ܠܘܬ ܐܠܩܝܡܘܣ ܘܒܝܟܪܝܘܣ ܟܢܘܫܬܐ ܕܣܦܪ̈ܐ ܠܡܦܩܕ ܘܠܡܒܥܐ ܟܐܢܘܬܐ܂
07:13 [ai]ܘܩܕܡ̈ܝܐ ܐܝܬܝܗܘܢ ܗܘܘ ܡܫܒ̈ܚܢܐ ܒܒ̈ܢܝ ܐܝܣܪܝܠ ܘܒܥܝܢ ܗܘܘ ܡܢܗܘܢ ܫܠܡܐ܂
07:14 [ai]ܐܡܪܘ ܓܝܪ ܕܓܒܪܐ ܟܗܢܐ ܐܬܐ ܡܢ ܙܪܥܗ ܕܐܗܪܘܢ ܥܡ ܚܝܠܐ ܘܠܐ ܡܒܐܫܝܢ ܠܢ܂
07:15 [ai]ܘܡܠܠ ܥܡܗܘܢ ܡ̈ܠܐ ܕܫܠܡܐ ܘܐܝܡܐ ܠܗܘܢ ܘܐܡܪ ܕܠܐ ܢܒܥܐ ܘܠܐ ܢܬܚܫܒ ܥܠܝܟܘܢ ܒܝܫܬܐ ܘܠܪ̈ܚܡܝܟܘܢ܂
07:16 [ai]ܘܗܝܡܢܘܗܝ ܘܐܚܕ ܡܢܗܘܢ ܐܫܬܝܢ ܓܒܪ̈ܝܢ ܘܩܛܠ ܐܢܘܢ ܒܚܕ ܝܘܡܐ ܐܝܟ ܡܠܬܐ ܕܐܡܪ ܢܒܝܐ܂
07:17 [ai]ܕܒܣܪܐ ܕܚܣ̈ܝܝܟ ܘܕܡܗܘܢ ܐܫܕܘ ܚܕܪ̈ܝܗ ܕܐܘܪܫܠܡ ܘܠܐ ܐܝܬ ܗܘܐ ܠܗܘܢ ܕܩܒܪ܂
07:18 [ai]ܘܢܦܠܬ ܕܚܠܬܗܘܢ ܥܠ ܟܠܗ ܥܡܐ ܐܡܪܘ ܓܝܪ ܕܠܝܬ ܠܗܘܢ ܫܪܪܐ ܐܦܠܐ ܕܝܢܐ ܥܒܪܘ ܓܝܪ ܥܠ ܕܝܢܐ ܘܡܘ̈ܡܬܐ ܘܩܝܡܐ ܕܐܩܝܡܘ܂
07:19 [ai]ܘܫܩܠ ܒܝܟܪܝܘܣ ܡܢ ܐܘܪܫܠܡ ܘܫܪܘ ܥܠ ܒܝܬ ܙܪ̈ܐ ܘܫܕܪ ܘܐܚܕ ܡܢ ܐܢܫܐ ܕܡܪܕܘ ܥܠܘܗܝ ܐܦ ܡܢ ܥܡܐ ܘܢܟܣ ܐܢܘܢ ܥܠ ܒܪܐ ܪܒܬܐ܂
07:20 [ai]ܘܐܫܠܡ ܐܪܥܐ ܠܐܠܩܝܡܘܣ ܘܫܒܩ ܠܘܬܗ ܚܝܠܐ ܠܥܘܕܪܢܗ ܘܐܬܐ ܒܝܟܪܝܘܣ ܠܘܬ ܡܠܟܐ܂
07:21 [ai]ܐܠܩܝܡܘܣ ܕܝܢ ܡܬܟܬܫ ܗܘܐ ܥܠ ܪܒܘܬ ܟܗܢܘܬܐ܂
07:22 [ai]ܘܐܬܟܢܫܘ ܠܘܬܗ ܟܠܗܘܢ ܐܝܠܝܢ ܕܫܓܫܝܢ ܗܘܘ ܠܥܡܗܘܢ ܘܐܚܕܗ ܠܐܪܥܐ ܕܝܗܘܕܐ ܘܥܒܕ ܡܚܘܬܐ ܪܒܬܐ ܒܐܝܣܪܝܠ܂
07:23 [ai]ܘܚܙܐ ܝܗܘܕܐ ܠܟܠܗ ܒܝܫܬܐ ܕܥܒܕ ܐܠܩܝܡܘܣ ܘܐܝܠܝܢ ܕܥܡܗ ܒܒ̈ܢܝ ܐܝܣܪܐܝܠ ܝܬܝܪ ܡܢ ܥܡ̈ܡܐ܂
07:24 [ai]ܘܢܦܩ ܠܟܠܗܘܢ ܬܚܘ̈ܡܝܗ ܕܝܗܘܕ ܟܕ ܚܕܪܝܢ ܘܥܒܕ ܕܝܢܐ ܒܓܒܪ̈ܐ ܐܝܠܝܢ ܕܡܪܕܘ ܘܐܫܬܕܪܘ ܕܢܗܠܟܘܢ ܒܐܪܥܐ܂
07:25 [ai]ܘܟܕ ܕܝܢ ܚܙܐ ܐܠܩܝܡܘܣ ܕܐܬܥ̈ܫܢ ܝܗܘܕܐ ܘܐܝܠܝܢ ܕܥܡܗ ܘܐܝܕܥ ܕܠܐ ܡܫܟܚ ܠܡܩܡ ܩܕܡܝܗܘܢ ܗܦܟ ܠܘܬ ܡܠܟܐ ܘܐܟܠ ܩܪ̈ܨܝܗܘܢ ܒܒܝ̈ܫܬܐ ܣܓܝܐ̈ܬܐ܂
07:26 [ai]ܘܫܕܪ ܡܠܟܐ ܕܡܛܪܝܘܣ ܠܢܝܩܢܘܪ ܚܕ ܡܢ ܡܫ̈ܒܚܐ ܕܪ̈ܘܪܒܢܘܗܝ ܕܒܣܢܐܬܐ ܘܒܒܥܠܕܒܒܘܬܐ ܐܝܬܘܗܝ ܗܘܐ ܠܘܬ ܐܝܣܪܐܝܠ ܘܦܩܕܗ ܕܢܥܛܝܘܗܝ ܘܢܪܝܡܝܘܗܝ ܠܥܡܐ܂
07:27 [ai]ܘܐܬܐ ܢܝܩܢܘܪ ܠܐܘܪܫܠܡ ܒܚܝܠܐ ܣܓܝܐܐ ܘܫܕܪ ܠܘܬ ܝܗܘܕܐ ܘܐ̈ܚܘܗܝ ܡ̈ܠܐ ܕܫܠܡܐ ܒܢܟܠܐ ܘܐܡܪ ܠܗܘܢ܂
07:28 [ai]ܠܐ ܬܗܘܐ ܡܨܘܬܐ ܒܝܢܝ ܘܠܟܘܢ ܘܐܬܐ ܒܓܒܪ̈ܐ ܙܥܘܪ̈ܐ ܘܐܚܙܐ ܐ̈ܦܝܟܘܢ ܒܫܠܡܐ܂
07:29 [ai]ܘܐܬܘ ܠܘܬ ܝܗܘܕܐ ܘܫܐܠܘ ܒܫܠܡܐ ܚܕ ܕܚܕ ܚܝ̈ܠܐ ܕܝܢ ܡܥܬܕܝܢ ܗܘܘ ܕܢܚܛܦܘܢܝܗܝ ܠܝܗܘܕܐ܂
07:30 [ai]ܘܐܬܝܕܥܬ ܡܠܬܐ ܠܝܗܘܕܐ ܕܒܢܟܠܐ ܐܬܘ ܨܐܕܘܗܝ ܘܐܪܚܩ ܠܗ ܡܢܗ ܘܬܘܒ ܠܐ ܨܒܐ ܗܘܐ ܕܢܚܙܐ ܐ̈ܦܘܗܝ܂
07:31 [ai]ܘܐܝܕܥ ܢܝܩܢܘܪ ܕܐܬܓܠܝܬ ܠܗ ܡܚܫܒܬܗ ܘܢܦܩ ܠܐܘܪܥܗ ܕܝܗܘܕܐ ܠܘܩܒܠ ܟܦܪ ܫܠܡܐ܂
07:32 [ai]ܘܢܦܠܘ ܡܢ ܓܒܪ̈ܐ ܕܥܡ ܢܝܩܢܘܪ ܐܝܟ ܚܡܫܡܐܐ ܘܥܪܩܘ ܠܡܕܝܢܬܗ ܕܕܘܝܕ܂
07:33 [ai]ܘܡܢ ܒܬܪ ܗܠܝܢ ܡ̈ܠܐ ܣܠܩ ܢܝܩܢܘܪ ܠܛܘܪܐ ܕܨܗܝܘܢ ܘܢܦܩܘ ܟܗ̈ܢܐ ܡܢ ܒܝܬ ܡܩܕܫܐ ܘܡܢ ܩܫܝ̈ܫܐ ܕܥܡܐ ܕܢܫܐܠܘܢ ܒܫܠܡܗ ܘܕܢܚܘܘܢܝܗܝ ܝܩ̈ܕܐ ܘܩܘܪ̈ܒܢܐ ܕܡܬܩܪܒܝܢ ܥܠ ܐ̈ܦܝ ܡܠܟܐ܂
07:34 [ai]ܘܡܝܩ ܘܒܙܚ ܒܗܘܢ ܘܫܛ ܐܢܘܢ ܘܡܠܠ ܒܫܒܗܪܢܘܬܐ܂
07:35 [ai]ܘܝܡܐ ܒܚܡܬܐ ܘܐܡܪ ܕܐܢ ܠܐ ܫܠܡ ܗܫܐ ܝܗܘܕܐ ܘܡܫܪܝܬܗ ܒܐܝ̈ܕܝ ܡܐ ܕܗܦܟܬ ܒܫܠܡܐ ܐܘܩܕܝܘܗܝ ܠܒܝܬܐ ܗܢܐ ܘܢܦܩ ܒܚܡܬܐ ܪܒܬܐ܂
07:36 [ai]ܘܥܠܘ ܟܗ̈ܢܐ ܘܩܡܘ ܩܕܡ ܡܕܒܚܐ ܘܩܣܛܪܘܡܐ ܘܒܟܘ ܘܐܡܪܘ܂
07:37 [ai]ܐܢܬ ܡܪܝܐ ܓܒܝܬ ܠܟ ܗܢܐ ܒܝܬܐ ܕܢܬܩܪܐ ܫܡܟ ܥܠܘܗܝ ܘܕܢܗܘܐ ܒܝܬ ܨܠܘܬܐ ܘܒܥܘܬܐ ܠܥܡܟ܂
07:38 [ai]ܥܒܕ ܦܘܪܥܢܐ ܡܢ ܓܒܪܐ ܗܢܐ ܘܡܢ ܡܫܪܝܬܗ ܘܢܦܠܘܢ ܒܪܘܡܚܐ ܘܐܬܕܟܪ ܓܘܕܦܗܘܢ ܘܠܐ ܬܬܠ ܒܗܘܢ ܚܝܠܐ ܘܡܣܝܒܪܢܘܬܐ܂
07:39 [ai]ܘܢܦܩ ܢܝܩܢܘܪ ܡܢ ܐܘܪܫܠܡ ܘܫܪܐ ܥܠ ܒܝܬ ܚܘܪܢ ܘܐܪܥܗ ܚܝܠܐ ܕܣܘܪܝܐ܂
07:40 [ai]ܘܝܗܘܕܐ ܫܪܐ ܥܠ ܐܪܣܐ ܒܬܠܬܐ ܐܠܦܝܢ ܓܒܪ̈ܝܢ ܘܨܠܝ ܝܗܘܕܐ ܘܐܡܪ܂
07:41 [ai]ܡܪܝܐ ܐܢܬ ܗܘ ܕܟܕ ܓܕܦܘ ܥܠܝܟ ܚ̈ܝܠܐ ܕܡܠܟܐ ܕܐܬܘܪ ܢܦܩ ܡܠܐܟܟ ܘܚܪܒ ܐܢܘܢ ܠܡܐܐ ܘܬܡܢܐܝܢ ܘܚܡܫܐ ܐܠܦܝܢ܂
07:42 [ai]ܗܟܢܐ ܫܚܘܩ ܘܬܒܪ ܠܡܫܪܝܬܐ ܗܕܐ ܝܘܡܢܐ ܩܕܡܝܢ ܘܢܕܥܘܢ ܫܪܟܐ ܕܐܚܪ̈ܢܐ ܕܒܝܫܐܝܬ ܡܠܠܘ ܥܠ ܒܝܬ ܡܩܕܫܟ ܘܕܘܢ ܐܢܘܢ ܐܝܟ ܒܝܫܘܬܗܘܢ܂
07:43 [ai]ܘܫܪܝ ܡܫܪ̈ܝܬܐ ܕܢܩܪܒܢ ܒܬܠܬܥܣܪܐ ܒܐܕܪ ܝܪܚܐ ܘܐܬܬܒܪܬ ܡܫܪܝܬܗ ܕܢܝܩܢܘܪ ܘܢܦܠ ܗܘ ܒܩܕܡܐ ܒܩܪܒܐ܂
07:44 [ai]ܘܟܕ ܕܝܢ ܚܙܬ ܡܫܪܝܬܗ ܕܢܝܩܢܘܪ ܕܢܦܠ ܠܗ ܫܕܘ ܙܝܢܗܘܢ ܘܥܪܩܘ܂
07:45 [ai]ܘܪܕܦܝܢ ܗܘܘ ܠܗܘܢ ܕܒܝܬ ܝܗܘܕܐ ܡܪ̈ܕܐ ܝܘܡܐ ܚܕ ܡܢ ܐܪܣܐ ܘܥܕܡܐ ܕܐܬܘ ܠܓܙܝܪܐ ܘܩܪܘ ܒܬܪܗܘܢ ܒܩܪ̈ܢܬܐ ܐܝܕܝ̈ܥܬܐ܂
07:46 [ai]ܘܢܦܩܘ ܡܢ ܟܠܗܝܢ ܩܘܪ̈ܝܐ ܕܝܗܘܕܐ ܘܡܚܡܠܝܢ ܗܘܘ ܘܡܗܦܟܝܢ ܠܗܘܢ ܚܕ ܠܘܬ ܚܕ ܥܕܡܐ ܕܢܦܠܘ ܟܠܗܘܢ ܠܦܘܡܐ ܕܚܪܒܐ ܥܕܡܐ ܕܠܐ ܐܫܬܚܪ ܡܢܗܘܢ ܐܦܠܐ ܚܕ܂
07:47 [ai]ܘܢܣܒܘ ܒܙܬܗܘܢ ܘܫܒܝܬܗܘܢ ܘܫܩܠܘ ܪܫܗ ܕܢܝܩܢܘܪ ܘܝܡܝܢܗ ܗܝ ܕܐܪܝܡ ܗܘܐ ܒܫܘܒܗܪܐ ܘܐܝܬܝܘ ܘܬܠܘ ܐܢܘܢ ܒܐܘܪܫܠܡ܂
07:48 [ai]ܘܐܬܒܣܡ ܥܡܐ ܣܓܝ ܘܐܩܝܡܘܗܝ ܠܝܘܡܐ ܗܢܐ ܒܒܘܣܡܐ ܘܒܚܕܘܬܐ܂
07:49 [ai]ܘܣܡܘ ܕܗܘܘ ܥܒܕܝܢ ܠܗ ܡܢ ܫܢܐ ܠܫܢܐ ܒܬܠܬܥܣܪܐ ܒܐܕܪ ܝܪܚܐ܂
07:50 [ai]ܘܫܠܝܬ ܐܪܥܐ ܕܝܗܘܕܐ ܝܘ̈ܡܬܐ ܙܥܘܪ̈ܐ܂