The Comprehensive Aramaic Lexicon

09:01 [ai]	ܘܫܡܥ ܕܡܛܪܝܘܣ ܕܢܦܠ ܢܝܩܢܘܪ ܘܚܝܠܗ ܒܩܪܒܐ ܘܐܘܣܦ ܬܘܒ ܠܡܫܕܪܘ ܠܒܝܟܪܝܘܣ ܘܠܐܠܩܝܡܘܣ ܕܬܪ̈ܬܝܢ ܙܒ̈ܢܝܢ ܠܐܪܥܐ ܕܝܗܘܕܐ ܘܚܝܠܐ ܕܡܢ ܝܡܝܢܐ ܥܡܗܘܢ܂
09:02 [ai]	ܘܐܙܠܘ ܕܒܝܬ ܒܝܟܪܝܘܣ ܒܐܘܪܚܐ ܕܓܠܥܕ ܘܫܪܘ ܥܠ ܡܣܠܘܬ ܕܒܐܪܒܠܐ ܘܟܒܫܘܗ ܘܐܘܒܕܘ ܒܗ ܢܦ̈ܫܬܐ ܕܐܢܫܐ ܣܓ̈ܝܐܐ܂
09:03 [ai]	ܘܒܫܢܬ ܡܐܐ ܘܚܡܫܝܢ ܘܬܪ̈ܬܝܢ ܒܝܪܚܐ ܩܕܡܝܐ ܫܪܘ ܥܠ ܐܘܪܫܠܡ܂
09:04 [ai]	ܘܫܩܠܘ ܘܐܙܠܘ ܠܒܝܪܙܬ ܒܥܣܪܝܢ ܐ̈ܠܦܝܢ ܪ̈ܓܠܝܐ ܘܬܪ̈ܝܢ ܐ̈ܠܦܝܢ ܦܪ̈ܫܐ܂
09:05 [ai]	ܘܝܗܘܕܐ ܫܪܐ ܗܘܐ ܒܐܠܣܐ ܘܥܡܗ ܬܠܬܐ ܐܠܦܝܢ ܓܒܪ̈ܐ ܡܓܒ̈ܝܐ܂
09:06 [ai]	ܘܚܙܘ ܠܡܫܪܝܬܐ ܕܒܥܠܕܒ̈ܒܝܗܘܢ ܕܣܓܝ ܥܫܝܢܐ ܘܕܚܠܘ ܛܒ ܘܫܢܝܘ ܣܓ̈ܝܐܐ ܡܢ ܡܫܪܝܬܐ ܘܠܐ ܐܫܬܚܪܘ ܐܠܐ ܬܡܢܡܐܐ ܓܒܪ̈ܝܢ ܒܠܚܘܕ܂
09:07 [ai]	ܘܚܙܐ ܝܗܘܕܐ ܕܐܬܒܕܪܬ ܠܗ ܡܫܪܝܬܗ ܘܩܪܒܐ ܐܠܨ ܠܗ ܘܐܫܬܚܩ ܒܠܒܗ ܘܐܫܬܪܝ ܡܛܠ ܕܠܐ ܐܝܬ ܗܘܐ ܠܗ ܙܒܢܐ ܠܡܟܢܫܘ ܐܢܘܢ܂
09:08 [ai]	ܘܐܡܪ ܠܐܝܠܝܢ ܕܐܫܬܚܪܘ ܠܘܬܗ ܩܘܡܘ ܢܣܩ ܥܠ ܒܥ̈ܠܕܒܒܝܢ ܟܒܪ ܢܫܟܚ ܠܡܩܪܒܘ ܥܡܗܘܢ܂
09:09 [ai]	ܘܗܦܟܘ ܠܗܘܢ ܡܢܗ ܘܐܡܪܝܢ ܠܗ ܠܐ ܡܬܡܨܝܢ ܐܢܚܢܢ ܐܠܐ ܗܫܐ ܢܦܠܛ ܢܦܫ̈ܬܢ ܘܢܗܦܘܟ ܘܢܐܬܐ ܥܡ ܐܚ̈ܝܢ ܘܢܩܪܒ ܥܡܗܘܢ ܡܛܠ ܕܐܢܚܢܢ ܙܥܘܪ̈ܐ ܚܢܢ܂
09:10 [ai]	ܘܐܡܪ ܝܗܘܕܐ ܚܣ ܠܝ ܕܐܥܒܕ ܗܕܐ ܘܐܥܪܘܩ ܡܢ ܩܕܡܝܗܘܢ ܘܐܢ ܡܛܝ ܙܒܢܢ ܢܡܘܬ ܓܢܒܪܐܝܬ ܥܠ ܐ̈ܦܝ ܐ̈ܚܝܢ ܘܠܐ ܢܫܒܘܩ ܡܘܡܐ ܒܬܫܒܘܚܬܢ܂
09:11 [ai]	ܘܫܩܠ ܚܝܠܐ ܡܢ ܡܫܪܝܬܐ ܘܩܡܘ ܠܘܩܒܠ ܩܪܒܐ ܘܐܬܦܠܓܘ ܦܪ̈ܫܐ ܠܬܪ̈ܬܝܢ ܡܢ̈ܘܢ ܘܩܫ̈ܬܐ ܘܫ̈ܕܝܝ ܒܩ̈ܠܥܐ ܐܙܠܝܢ ܗܘܘ ܩܕܡ ܚܝܠܐ ܘܟܠܗܘܢ ܚܝ̈ܠܬܢܐ ܘܩܪ̈ܒܬܢܐ ܥܡܗܘܢ܂
09:12 [ai]	ܘܒܝܟܪܝܘܣ ܐܝܬܘܗܝ ܗܘܐ ܒܟܢܦܐ ܕܝܡܝܢܐ ܘܩܪܒ ܦ̈ܠܓܐ ܡܢ ܬܪ̈ܝܗܘܢ ܓܒ̈ܐ ܘܩܪܝܢ ܗܘܘ ܒܩܪ̈ܢܬܐ ܐܦ ܕܒܝܬ ܝܗܘܕܐ ܩܪܝܢ ܗܘܘ ܒܩܪ̈ܢܬܗܘܢ܂
09:13 [ai]	ܘܐܬܬܙܝܥܬ ܐܪܥܐ ܡܢ ܩܠܐ ܕܡܫܪ̈ܝܬܐ ܘܫܪܝܘ ܠܡܩܪܒܘ ܡܢ ܨܦܪܐ ܘܥܕܡܐ ܠܪܡܫܐ܂
09:14 [ai]	ܘܚܙܐ ܝܗܘܕܐ ܕܒܝܟܪܝܘܣ ܘܥܘܫܢܗ ܕܡܫܪܝܬܐ ܒܓܒܐ ܗܘ ܕܝܡܝܢܐ ܘܐܫܠܡܘ ܚܒܪ̈ܘܗܝ ܢܦܫܗܘܢ ܡܢ ܟܠܗ ܠܒܗܘܢ܂
09:15 [ai]	ܘܐܬܬܒܪ ܘܐܫܬܚܩ ܡܢ ܩܕܡܝܗܘܢ ܓܒܐ ܕܝܡܝܢܐ ܘܪ̈ܕܦ ܗܘܐ ܒܬܪܗܘܢ ܥܕܡܐ ܠܛܘܪܐ ܕܙܘܛܘܣ܂
09:16 [ai]	ܘܗܠܝܢ ܕܡܢ ܓܒܐ ܕܣܡܠܐ ܟܕ ܚܙܘ ܕܐܙܕܟܝ ܠܗ ܓܒܐ ܕܝܡܝܢܐ ܗܦܟܘ ܒܬܪ ܝܗܘܕܐ ܘܐܝܠܝܢ ܕܥܡܗ ܡܢ ܒܣܬܪܗܘܢ܂
09:17 [ai]	ܘܐܥܫܢܘ ܩܪܒܐ ܘܢܦܠܘ ܡܢ ܗܠܝܢ ܘܡܢ ܗܠܝܢ܂
09:18 [ai]	ܐܦ ܝܗܘܕܐ ܢܦܠ ܘܕܐܫܬܚܪܘ ܥܪܩܘ܂
09:19 [ai]	ܘܢܣܒܘ ܝܘܢܬܢ ܘܫܡܥܘܢ ܠܝܗܘܕܐ ܐܚܘܗܘܢ ܘܩܒܪܘܗܝ ܒܩܒܪܐ ܕܐܒܗ̈ܘܗܝ ܒܡܘܪܥܝܡ܂
09:20 [ai]	ܘܒܟܘ ܘܐܪܩܕܘ ܥܠ ܝܗܘܕܐ ܟܠܗ ܐܝܣܪܝܠ ܘܐܬܐܒܠܘ ܥܠܘܗܝ ܐܒܠܐ ܪܒܐ ܝܘ̈ܡܬܐ ܣܓ̈ܝܐܐ ܘܐܡܪܘ܂
09:21 [ai]	ܐܝܟܢܐ ܢܦܠ ܓܢܒܪܐ ܘܚܝܠܬܢܐ ܦܪܘܩܗ ܕܐܝܣܪܐܝܠ܂
09:22 [ai]	ܘܫܪܟܐ ܕܡ̈ܠܘܗܝ ܕܝܗܘܕܐ ܘܩܪ̈ܒܘܗܝ ܘܢܨܚ̈ܢܘܗܝ ܘܓܢܒܪܘܬܗ ܘܚܝܠܬܢܘܬܗ ܠܐ ܐܬܟܬܒܘ ܣܓܝܐܝܢ ܗܘܘ ܓܝܪ ܣܓܝ܂
09:23 [ai]	ܘܗܘܐ ܡܢ ܒܬܪ ܡܘܬܗ ܕܝܗܘܕܐ ܐܕܝܩܘ ܘܐܬܚܙܝܘ ܓܒܪ̈ܐ ܥܘ̈ܠܐ ܒܟܠܗ ܬܚܘܡܗܘܢ ܕܒ̈ܢܝ ܐܝܣܪܐܝܠ ܘܐܬܓܠܝܘ ܟܠܗܘܢ ܪ̈ܫܝܥܐ ܘܥܒܪ̈ܝ ܢܡܘܣܐ܂
09:24 [ai]	ܘܒܗܢܘܢ ܝܘ̈ܡܬܐ ܗܘܐ ܟܦܢܐ ܪܒܐ ܘܐܬܚܒܠܬ ܐܦ ܐܪܥܐ ܥܡܗܘܢ܂
09:25 [ai]	ܘܓܒܐ ܒܝܟܪܝܘܣ ܠܐܢܫܐ ܪ̈ܫܝܥܐ ܘܐܩܝܡ ܐܢܘܢ ܡܪ̈ܘܬܐ ܘܫ̈ܠܝܛܢܐ ܥܠ ܐܪܥܐ܂
09:26 [ai]	ܘܡܥܩܒܝܢ ܗܘܘ ܘܒܥܝܢ ܠܪ̈ܚܡܘܗܝ ܕܝܗܘܕܐ ܘܡܝܬܝܢ ܗܘܘ ܠܗܘܢ ܠܘܬ ܒܝܟܪܝܘܣ ܘܡܒܙܚ ܗܘܐ ܘܡܫܬܢܕ ܒܗܘܢ܂
09:27 [ai]	ܘܗܘܐ ܐܘܠܨܢܐ ܪܒܐ ܠܐܝܣܪܐܝܠ ܕܠܐ ܗܘܐ ܐܟܘܬܗ ܡܢ ܝܘܡܐ ܕܠܐ ܐܬܚܙܝ ܢܒܝܐ ܒܝܢܬܗܘܢ܂
09:28 [ai]	ܘܐܬܟܢܫܘ ܟܠܗܘܢ ܪ̈ܚܡܘܗܝ ܕܝܗܘܕܐ ܘܐܡܪܘ ܠܝܘܢܬܢ܂
09:29 [ai]	ܡܢ ܝܘܡܐ ܕܡܝܬ ܝܗܘܕܐ ܐܚܘܟ ܠܐ ܐܝܬ ܓܒܪܐ ܕܕܡܐ ܠܗ ܕܢܦܘܩ ܠܘܩܒܠ ܒ̈ܥܠܕܒܒܝܢ ܘܠܘܩܒܠ ܒܝܟܪܝܘܣ ܘܠܘܩܒܠ ܟܠܗܘܢ ܐܝܠܝܢ ܕܡܬܟܬܫܝܢ ܥܡܢ ܘܣܢܝܢ ܠܢ ܡܢ ܒܢ̈ܝ ܥܡܢ܂
09:30 [ai]	ܗܫܐ ܒܟ ܡܨܛܒܝܢ ܐܢܚܢܢ ܝܘܡܢܐ ܕܬܗܘܐ ܠܢ ܪܫܐ ܘܡܕܒܪܢܐ ܠܡܩܪܒܘ ܩܪ̈ܒܝܢ܂
09:31 [ai]	ܘܩܒܠ ܝܘܢܬܢ ܒܗܘ ܙܒܢܐ ܕܢܗܘܐ ܡܕܒܪܢܐ ܘܩܡ ܚܠܦ ܝܗܘܕܐ ܐܚܘܗܝ܂
09:32 [ai]	ܘܝܕܥ ܒܝܟܪܝܘܣ ܘܨܒܐ ܗܘܐ ܕܢܩܛܠܝܘܗܝ܂
09:33 [ai]	ܘܝܕܥ ܝܘܢܬܢ ܘܫܡܥܘܢ ܐܚܘܗܝ ܘܟܠܗܘܢ ܐܝܠܝܢ ܕܐܝܬ ܗܘܘ ܥܡܗ ܘܥܪܩܘ ܠܗܘܢ ܠܡܕܒܪܐ ܕܬܩܘܥ ܘܫܪܘ ܥܠ ܡ̈ܝܐ ܕܓܘܒܐ ܕܐܣܦܪ܂
09:34 [ai]	ܘܝܕܥ ܒܝܟܪܝܘܣ ܒܝܘܡܐ ܕܫܒܬܐ ܘܐܬܐ ܗܘ ܘܟܠܗ ܚܝܠܗ ܠܥܒܪ̈ܘܗܝ ܕܝܘܪܕܢܢ܂
09:35 [ai]	ܘܫܕܪ ܝܘܢܬܢ ܠܝܘܚܢܢ ܐܚܘܗܝ ܕܢܗܘܐ ܡܕܒܪܢܐ ܠܥܡܐ ܘܒܥܐ ܡܢ ܢܒ̈ܛܝܐ ܪ̈ܚܡܘܗܝ ܕܢܫܒܘܩ ܠܘܬܗܘܢ ܟܠܗ ܐܝܩܪܬܗܘܢ܂
09:36 [ai]	ܘܢܦܩܘ ܒ̈ܢܝ ܐܡܒܪܝ ܡܢ ܡܐܕܒܐ ܘܐܚܕܘܗܝ ܠܝܘܚܢܢ ܘܠܟܠ ܕܐܝܬ ܗܘܐ ܥܡܗ ܘܕܒܪܘ ܘܐܙܠܘ܂
09:37 [ai]	ܡܢ ܒܬܪ ܕܝܢ ܗܠܝܢ ܡ̈ܠܐ ܐܡܪܘ ܠܝܘܢܬܢ ܘܠܫܡܥܘܢ ܐܚܘܗܝ ܕܒ̈ܢܝ ܐܡܒܪܝ ܥܒܕܝܢ ܡܫܬܘܬܐ ܪܒܬܐ ܘܡܝܬܝܢ ܟܠܬܐ ܡܢ ܢܒܛ ܒܪܬ ܪ̈ܫܐ ܕܚܕ ܡܢ ܪ̈ܘܪܒܢܐ ܕܟܢܥܢ ܒܬܫܒܘܚܬܐ ܪܒܬܐ ܘܒܥܡܐ ܣܓܝܐܐ܂
09:38 [ai]	ܘܐܝܬܕܟܪ ܝܘܢܬܢ ܠܝܘܚܢܢ ܐܚܘܗܝ ܘܣܠܩܘ ܘܐܬܛܫܝܘ ܒܟܢܦܗ ܕܛܘܪܐ܂
09:39 [ai]	ܘܐܪܝܡܘ ܥܝ̈ܢܝܗܘܢ ܘܚܙܘ ܘܗܐ ܪܘܒܐ ܕܟܢܫܐ ܣܓܝܐܐ ܘܚܬܢܐ ܘܪ̈ܚܡܘܗܝ ܢܦܩܘ ܓܝܪ ܪ̈ܚܡܘܗܝ ܘܐܚ̈ܘܗܝ ܠܐܘܪܥܗ ܒܩܝܬܪ̈ܐ ܘܒܟܢܪ̈ܐ ܘܒܡ̈ܐܢܝ ܙܝܢܐ ܣܓܝܐܐ܂
09:40 [ai]	ܘܩܡܘ ܥܠܝܗܘܢ ܡܢ ܟܡܐܢܐ ܕܒܝܬ ܝܘܢܬܢ ܘܩܛܠܘ ܐܢܘܢ ܘܢܦܠܘ ܩ̈ܛܝܠܐ ܣ̈ܓܝܐܐ ܘܫܪܟܐ ܕܐܚܪ̈ܢܐ ܥܪܩܘ ܠܛܘܪܐ ܘܢܣܒܘ ܟܠܗ ܒܙܬܗܘܢ܂
09:41 [ai]	ܘܐܬܗܦܟܬ ܡܫܬܘܬܐ ܠܐܒܠܐ ܘܩܠܐ ܕܙܡܪܗܘܢ ܠܡܪܩܘܕܬܐ܂
09:42 [ai]	ܘܐܬܬܒܥܘ ܬܒܥܬܐ ܕܕܡܗ ܕܐܚܘܗܘܢ ܘܗܦܟܘ ܠܥܒܪܐ ܕܝܘܪܕܢܢ܂
09:43 [ai]	ܘܫܡܥ ܒܝܟܪܝܘܣ ܕܗܦܟ ܘܐܬܐ ܝܘܢܬܢ ܘܐܬܐ ܠܬܚܘ̈ܡܘܗܝ ܕܝܘܪܕܢܢ ܒܝܘܡܐ ܕܫܒܬܐ ܒܚܝܠܐ ܣܓܝܐܐ܂
09:44 [ai]	ܘܐܡܪ ܝܘܢܬܢ ܠܐܝܠܝܢ ܕܥܡܗ ܩܘܡܘ ܘܢܬܟܬܫ ܥܠ ܐ̈ܦܝ ܢܦܫ̈ܬܢ ܠܐ ܓܝܪ ܐܝܬܘܗܝ ܝܘܡܢܐ ܐܝܟ ܕܐܬܡܠܝ ܘܐܝܟ ܕܡܢ ܩܕܡܘܗܝ܂
09:45 [ai]	ܡܛܠ ܕܗܐ ܩܪܒܐ ܡܛܝܒ ܠܩܘܒܠܢ ܡܢ ܩܕܡܝܢ ܘܡܢ ܒܣܬܪܢ ܘܡܘ̈ܗܝ ܕܝܘܪܕܢܢ ܚܕܝܪܝܢ ܠܢ ܡܟܐ ܘܡܟܐ ܘܥܒܐ ܒܡܨܥܬܐ ܘܠܐ ܐܝܬ ܐܬܪܐ ܠܡܪܟܢܘ ܡܢܗ܂
09:46 [ai]	ܗܫܐ ܓܥܘ ܠܘܬ ܥܡܘܪܐ ܕܫܡܝܐ ܕܐܝܟܢܐ ܬܬܦܪܩܘܢ ܡܢ ܐܝܕܐ ܕܒܥ̈ܠܕܒܒܝܟܘܢ܂
09:47 [ai]	ܘܫܪܝܘ ܠܡܩܪܒܘ ܘܐܪܝܡ ܝܘܢܬܢ ܐܝܕܗ ܕܢܡܚܝܘܗܝ ܠܒܝܟܪܝܘܣ ܘܐܪܟܢ ܠܗ ܡܢܗ ܠܒܣܬܪܗ܂
09:48 [ai]	ܘܗܦܟܘ ܘܥܒܪܘܗܝ ܠܝܘܪܕܢܢ ܒܣܚܘܐ ܝܘܢܬܢ ܘܐܝܠܝܢ ܕܥܡܗ ܘܠܐ ܥܒܪܘ ܒܬܪܗܘܢ܂
09:49 [ai]	ܢܦܠܘ ܕܝܢ ܡܢ ܕܒܝܬ ܒܝܟܪܝܘܣ ܒܗܘ ܝܘܡܐ ܐܝܟ ܐܠܦ ܓܒܪ̈ܝܢ܂
09:50 [ai]	ܘܗܦܟ ܒܝܟܪܝܘܣ ܠܐܘܪܫܠܡ ܘܒܢܐ ܡܕܝ̈ܢܬܐ ܥܫܝ̈ܢܬܐ ܒܝܗܘܕ ܠܚܣܢܐ ܕܒܐܝܪܝܚܘ ܘܠܥܡܐܘܣ ܘܠܒܝܬ ܚܘܪ̈ܢ ܘܠܒܝܬ ܐܝܠ ܘܠܬܡܢܬ ܘܠܦܪܬ ܘܠܛܦܘܣ ܒܫܘܪ̈ܐ ܪ̈ܡܐ ܘܒܬܪ̈ܥܐ ܘܒܡܘ̈ܟܠܐ܂
09:51 [ai]	ܘܐܩܝܡ ܒܗܝܢ ܢܛܘܪ̈ܐ ܠܒܥ̈ܠܕܒܒܘܗܝ ܕܐܝܣܪܐܝܠ܂
09:52 [ai]	ܘܐܥܫܢܗ ܠܒܝܬ ܫܘܪ̈ܐ ܡܕܝܢܬܐ ܘܠܓܙܝܪܐ ܘܠܒܝܬ ܡܪܕܐ ܘܐܘܬܒ ܒܗܝܢ ܚܝܠܐ ܘܣܡ ܠܗܘܢ ܒܗܝܢ ܐܣܢܐ܂
09:53 [ai]	ܘܢܣܒ ܒܝܟܪܝܘܣ ܠܒ̈ܢܝ ܪ̈ܘܪܒܢܝܗ ܕܐܪܥܐ ܠܗܡܝܪ̈ܐ ܘܣܡ ܐܢܘܢ ܒܢܛܘܪܬܐ ܒܡܪܕܐ ܕܐܘܪܫܠܡ܂
09:54 [ai]	ܘܒܫܢܬ ܡܐܐ ܘܚܡܫܝܢ ܘܬܠܬ ܒܝܪܚܐ ܕܬܪ̈ܝܢ ܦܩܕ ܐܠܩܝܡܘܣ ܕܢܣܬܪܘܢ ܫܘܪܐ ܕܕܪܬܐ ܓܘܝܬܐ ܕܒܝܬ ܡܩܕܫܐ ܘܣܚܦ ܥܒ̈ܕܝܗܘܢ ܕܢܒ̈ܝܐ ܘܫܪܝ ܕܢܓܡܪ܂
09:55 [ai]	ܘܒܗ ܒܗܘ ܙܒܢܐ ܒܠܥ ܐܠܩܝܡܘܣ ܘܒܛܠܘ ܥܒ̈ܕܘܗܝ ܘܐܫܬܪܝ ܘܐܣܬܟܪ ܦܘܡܗ ܘܠܐ ܐܫܟܚ ܠܡܡܠܠܘ ܐܦܠܐ ܚܕܐ ܡܠܬܐ ܐܦܠܐ ܠܡܦܩܕܘ ܥܠ ܒܝܬܗ܂
09:56 [ai]	ܘܡܝܬ ܐܠܩܝܡܘܣ ܒܗܘ ܙܒܢܐ ܒܬܫ̈ܢܝܩܐ ܪ̈ܘܪܒܐ܂
09:57 [ai]	ܘܚܙܐ ܒܝܟܪܝܘܣ ܕܡܝܬ ܠܗ ܐܠܩܝܡܘܣ ܘܗܦܟ ܠܘܬ ܡܠܟܐ ܘܫܠܝܬ ܘܐܬܢܝܚܬ ܐܪܥܐ ܕܝܗܘܕܐ ܬܪ̈ܬܝܢ ܫ̈ܢܝܢ܂
09:58 [ai]	ܘܐܬܡܠܟܘ ܟܠܗܘܢ ܐܢܫܐ ܥܘ̈ܠܐ ܘܐܡܪܘ ܗܐ ܝܘܢܬܢ ܘܐܝܠܝܢ ܕܥܡܗ ܝܬܒܝܢ ܬܟܝܠܐܝܬ ܒܫܠܝܐ ܗܫܐ ܢܝܬܐ ܠܒܝܟܪܝܘܣ ܘܢܐܚܘܕ ܐܢܘܢ ܒܚܕ ܠܠܝܐ܂
09:59 [ai]	ܘܐܙܠܘ ܘܡܠܟܘܗܝ܂
09:60 [ai]	ܘܫܩܠ ܒܝܟܪܝܘܣ ܕܢܐܬܐ ܒܚܝܠܐ ܪܒܐ ܘܫܕܪ ܐܓܪ̈ܬܐ ܡܛܫܝܐܝܬ ܠܟܠܗܘܢ ܡܥܕܪ̈ܢܘܗܝ ܕܒܝܗܘܕ ܕܢܐܚܕܘܢܝܗܝ ܠܝܘܢܬܢ ܘܠܟܠܗܘܢ ܕܥܡܗ ܘܠܐ ܡܫܟܚܝܢ ܗܘܘ ܡܛܠ ܕܐܬܓܠܝܬ ܗܘܬ ܠܗ ܡܚܫܒܬܗܘܢ ܠܝܘܢܬܢ܂
09:61 [ai]	ܘܐܚܕܘ ܕܒܝܬ ܝܘܢܬܢ ܚܡܫܝܢ ܓܒܪ̈ܝܢ ܡܢ ܒ̈ܢܝ ܐܪܥܐ ܪ̈ܫܢܝܗ ܕܒܝܫܬܐ ܘܩܛܠܘ ܐܢܘܢ܂
09:62 [ai]	ܘܫܢܝ ܝܘܢܬܢ ܘܫܡܥܘܢ ܘܐܝܠܝܢ ܕܥܡܗ ܠܒܝܬ ܝܫܢ ܕܒܡܕܒܪܐ ܘܒܢܘ ܡܣ̈ܚܦܬܗ ܘܫܪܪܘܗ܂
09:63 [ai]	ܘܝܕܥ ܒܝܟܪܝܘܣ ܘܟܢܫ ܠܟܠܗ ܚܝܠܗ ܘܦܩܕ ܠܐܝܠܝܢ ܕܐܝܬ ܒܝܗܘܕ܂
09:64 [ai]	ܘܢܦܩ ܘܝܬܒ ܥܠ ܒܝܬ ܝܫܢ ܘܐܩܪܒ ܥܡܗ ܝܘܡ̈ܬܐ ܣܓ̈ܝܐܐ ܘܥܒܕ ܡܐ̈ܟܢܘܣ܂
09:65 [ai]	ܘܫܒܩ ܝܘܢܬܢ ܠܫܡܥܘܢ ܐܚܘܗܝ ܒܓܘ ܡܕܝܢܬܐ ܘܢܦܩ ܗܘ ܠܐܬܪܐ ܘܢܦܩ ܒܡܢܝܢܐ܂
09:66 [ai]	ܘܡܚܝܗܝ ܠܥܕܘܪܐ ܘܠܐܚ̈ܘܗܝ ܘܠܒ̈ܢܝ ܦܫܝܪܘܢ ܒܡܫܟܢܗܘܢ ܘܫܪܝܘ ܡܚܝܢ ܘܣܠܩܝܢ ܒܚ̈ܝܠܘܬܐ܂
09:67 [ai]	ܘܫܡܥܘܢ ܘܐܝܠܝܢ ܕܥܡܗ ܢܦܩܘ ܡܢ ܡܕܝܢܬܐ ܘܐܘܩܕܘ ܐ̈ܢܝܢ ܠܡܐ̈ܟܢܘܣ܂
09:68 [ai]	ܘܐܩܪܒܘ ܥܡ ܒܝܟܪܝܘܣ ܘܐܬܬܒܪ ܩܕܡܝܗܘܢ ܘܐܠܨܝܢ ܗܘܘ ܠܗ ܣܓܝ ܡܛܘܠ ܕܐܣܬܪܩܬ ܗܘܬ ܠܗ ܡܚܫܒܬܗ ܘܡܐܬܝܬܗ܂
09:69 [ai]	ܘܐܬܚܡܬ ܒܝܟܪܝܘܣ ܒܪܘܓܙܐ ܥܠ ܓܒܪ̈ܐ ܥܘ̈ܠܐ ܗܢܘܢ ܕܡܠܟܘܗܝ ܗܘܘ ܕܢܐܬܐ ܥܠ ܐܪܥܐ ܘܩܛܠ ܡܢܗܘܢ ܣܓ̈ܝܐܐ ܘܐܬܚܫܒ ܕܢܐܙܠ ܠܗ ܠܐܪܥܗ܂
09:70 [ai]	ܘܝܕܥ ܝܘܢܬܢ ܘܫܕܪ ܠܘܬܗ ܐܝ̈ܙܓܕܐ ܠܡܥܒܕ ܥܡܗ ܫܠܡܐ ܘܕܢܬܠ ܠܗܘܢ ܫܒܝܬܗܘܢ܂
09:71 [ai]	ܘܩܒܠ ܒܝܟܪܝܘܣ ܘܥܒܕ ܐܝܟ ܡ̈ܠܘܗܝ ܘܝܡܐ ܠܗ ܕܠܐ ܢܒܥܐ ܠܗ ܒܝܫܬܐ ܟܠܗܘܢ ܝܘ̈ܡܬܐ ܕܚ̈ܝܘܗܝ܂
09:72 [ai]	ܘܝܗܒ ܠܗ ܫܒܝܬܐ ܗܝ ܕܫܒܐ ܗܘܐ ܡܢ ܩܕܝܡ ܡܢ ܐܪܥܐ ܕܝܗܘܕܐ ܘܗܦܟ ܘܐܙܠ ܒܝܟܪܝܘܣ ܠܐܪܥܗ ܘܠܐ ܬܘܒ ܐܘܣܦ ܠܡܚܙܐ ܬܚܘ̈ܡܝܗܘܢ܂
09:73 [ai]	ܘܫܠܝܬ ܪܘܡܚܐ ܡܢ ܐܝܣܪܝܠ ܘܥܡܪ ܝܘܢܬܢ ܒܡܟܡܣ ܘܫܪܝ ܝܘܢܬܢ ܠܡܕܢ ܠܥܡܐ ܕܐܝܣܪܝܠ ܘܠܡܚܒܠܘ ܘܠܡܘܒܕܘ ܡܢܗ ܠܐܢܫܐ ܪ̈ܫܝܥܐ܂