The Comprehensive Aramaic Lexicon

13:01 [ai]	ܘܫܡܥ ܫܡܥܘܢ ܕܟܢܫ ܛܪܝܦܘܢ ܚܝܠܐ ܣܓܝܐܐ ܕܢܐܬܐ ܠܐܪܥܐ ܕܝܗܘܕ ܘܢܥܛܝܗ܂
13:02 [ai]	ܘܚܙܝܗܝ ܠܥܡܐ ܕܕܚܝܠ ܘܪܬܝܬ ܘܣܠܩ ܠܐܘܪܫܠܡ܂
13:03 [ai]	ܘܟܢܫ ܠܥܡܐ ܘܒܝܐ ܐܢܘܢ ܘܐܡܪ ܠܗܘܢ ܝܕܥܝܢ ܐܢܬܘܢ ܟܠ ܡܕܡ ܕܥܒܕܬ ܐܢܐ ܘܐܚ̈ܝ ܘܟܠܗ ܒܝܬ ܐܒܝ ܥܠ ܐ̈ܦܝ ܢܡܘܣܐ ܘܥܠ ܒܝܬ ܡܩܕܫܐ ܩܪ̈ܒܐ ܘܐܘ̈ܠܨܢܐ ܕܚܙܝܢ܂
13:04 [ai]	ܘܡܛܠ ܗܕܐ ܗܘ ܡܝܬܘ ܟܠܗܘܢ ܐ̈ܚܝ ܥܠ ܐ̈ܦܝ ܟܠܗ ܐܝܣܪܐܝܠ ܘܐܫܬܚܪܬ ܐܢܐ ܒܠܚܘܕܝ܂
13:05 [ai]	ܘܗܫܐ ܚܣ ܠܝ ܕܐܚܘܣ ܥܠ ܢܦܫܝ ܒܟܠ ܙܒ̈ܢܐ ܕܐܘܠܨܢܐ ܡܛܠ ܕܠܐ ܗܘܝܬ ܡܝܬܪ ܡܢ ܐ̈ܚܝ܂
13:06 [ai]	ܒܪܡ ܕܝܢ ܐܬܟܬܫ ܥܠ ܐ̈ܦܝ ܥܡܐ ܘܥܠ ܒܝܬ ܡܩܕܫܢ ܘܥܠ ܐ̈ܦܝ ܒܢ̈ܝܢ ܡܛܠ ܕܐܬܟܢܫܘ ܟܠܗܘܢ ܥܡ̈ܡܐ ܠܡܓܡܪܘܬܢ ܡܛܠ ܒܥܠܕܒܒܘܬܗܘܢ܂
13:07 [ai]	ܘܐܬܬܥܝܪܬ ܘܪܬܚܬ ܪܘܚܗ ܕܥܡܐ ܒܪܫܥܬܗ ܕܫܡܥܘ ܡ̈ܠܘܗܝ܂
13:08 [ai]	ܘܥܢܘ ܒܩܠܐ ܪܡܐ ܘܐܡܪܘ ܠܗ ܐܢܬ ܗܘ ܡܕܒܪܢܢ ܚܠܦ ܝܗܘܕܐ ܘܝܘܢܬܢ ܐܚ̈ܝܟ܂
13:09 [ai]	ܐܩܪܒ ܩܪ̈ܒܝܢ ܘܟܘܠ ܕܬܐܡܪ ܠܢ ܢܥܒܕ܂
13:10 [ai]	ܘܟܢܫ ܫܡܥܘܢ ܠܟܠܗܘܢ ܓܒܪ̈ܐ ܩܪ̈ܒܬܢܐ ܘܣܪܗܒ ܠܡܫܠܡܘ ܘܠܡܫܟܠܠܘ ܫܘܪܗ ܕܐܪܫܠܡ ܘܐܥܫܢܗ ܠܟܠܗ ܟܕ ܚܕܪ܂
13:11 [ai]	ܘܫܕܪ ܠܝܘܢܬܢ ܒܪ ܐܒܝܫܠܘܡ ܘܥܡܗ ܚܝܠܐ ܣܓܝܐܐ ܠܝܘܦܐ ܘܐܦܩ ܠܐܝܠܝܢ ܕܐܝܬ ܗܘܘ ܒܗ ܘܫܪܐ ܬܡܢ ܗܘ܂
13:12 [ai]	ܘܫܩܠ ܛܪܝܦܘܢ ܡܢ ܦܛܘܠܡܐܝܣ ܒܚܝܠܐ ܣܓܝܐܐ ܠܡܥܠ ܠܐܪܥܐ ܕܝܗܘܕ ܘܝܘܢܬܢ ܥܡܗ ܗܘܐ ܟܕ ܡܬܢܛܪ܂
13:13 [ai]	ܫܡܥܘܢ ܕܝܢ ܫܪܐ ܥܠ ܥܕܝܪܐ ܠܘܩܒܠ ܦܩܥܬܐ܂
13:14 [ai]	ܘܝܕܥ ܛܪܝܦܘܢ ܕܩܡ ܫܡܥܘܢ ܚܠܦ ܝܘܢܬܢ ܐܚܘܗܝ ܘܕܥܬܝܕ ܗܘ ܠܡܩܪܒܘ ܥܡܗ ܘܫܕܪ ܠܘܬܗ ܐܝ̈ܙܓܕܐ ܘܐܡܪ ܠܗ܂
13:15 [ai]	ܚܠܦ ܟܣܦܐ ܗܘ ܕܚܝܒ ܗܘܐ ܝܘܢܬܢ ܐܚܘܟ ܒܝܬ ܡܠܟܐ ܡܛܠ ܨܒܘ̈ܬܐ ܕܐܚܝܕ ܗܘܐ ܟܪܝܟܝܢ ܐܢܚܢܢ ܠܗ܂
13:16 [ai]	ܘܗܫܐ ܫܕܪ ܡܐܐ ܟܟܪܝܢ ܕܣܐܡܐ ܘܬܪ̈ܝܢ ܒܢܘ̈ܗܝ ܠܗܡܝܪ̈ܐ ܕܕܠܡܐ ܟܕ ܢܫܪܝܘܗܝ ܢܣܛܐ ܘܢܦܪܘܩ ܠܗ ܡܢܢ ܘܫܪܝܢ ܚܢܢ ܠܗ܂
13:17 [ai]	ܘܝܕܥ ܫܡܥܘܢ ܕܒܢܟܠܐ ܗܘ ܡܡܠܠܝܢ ܥܡܗ ܘܫܕܪ ܟܣܦܐ ܘܛ̈ܠܝܐ ܕܕܠܡܐ ܢܥܒܕ ܒܥܠܕܒܒܘܬܐ ܪܒܬܐ ܠܐܝܣܪܝܠ܂
13:18 [ai]	ܥܠ ܕܠܐ ܫܕܪ ܟܣܦܐ ܘܛ̈ܠܝܐ ܗܢܘܢ ܕܐܒܕܘ܂
13:19 [ai]	ܘܫܕܪ ܛ̈ܠܝܐ ܘܡܐܐ ܟܟܪ̈ܝܢ ܘܕܓܠ ܘܠܐ ܫܕܪܗ ܠܝܘܢܬܢ܂
13:20 [ai]	ܘܡܢ ܒܬܪ ܗܠܝܢ ܐܬܐ ܛܪܝܦܘܢ ܠܡܗܠܟܘ ܒܐܪܥܐ ܕܝܗܘܕ ܐܝܟ ܕܢܥܛܝܗ ܘܐܙܠ ܒܐܘܪܚܐ ܕܥܕܘܪܐ ܘܫܡܥܘܢ ܘܡܫܪܝܬܗ ܩܕܡ ܗܘܐ ܠܗ ܠܟܠ ܐܬܪ ܕܐܙܠ ܗܘܐ܂
13:21 [ai]	ܝܬ̈ܒܝ ܡܪܕܐ ܕܝܢ ܫܕܪܘ ܠܘܬ ܛܪܝܦܘܢ ܐܝ̈ܙܓܕܐ ܕܢܐܬܐ ܠܘܬܗܘܢ ܚܦܝܛܐܝܬ ܡܕܒܪܝܬܐ ܘܕܢܫܕܪ ܠܗܘܢ ܐܣܢܐ܂
13:22 [ai]	ܘܛܝܒ ܛܪܝܦܘܢ ܟܠܗܘܢ ܦܪ̈ܫܘܗܝ ܕܢܐܬܐ ܒܗܘ ܠܠܝܐ ܘܗܘܐ ܬܠܓܐ ܪܒܐ ܘܠܐ ܐܫܟܚ ܕܢܐܬܐ ܡܛܠ ܬܠܓܐ ܘܫܩܠ ܘܐܬܐ ܠܓܠܥܕ܂
13:23 [ai]	ܟܕ ܕܝܢ ܡܛܝ ܛܪܝܦܘܢ ܠܒܣܩ̈ܡܐ ܩܛܠܗ ܠܝܘܢܬܢ ܘܐܬܩܒܪ ܬܡܢ܂
13:24 [ai]	ܘܗܦܟ ܛܪܝܦܘܢ ܘܐܙܠ ܠܐܪܥܗ܂
13:25 [ai]	ܘܫܕܪ ܫܡܥܘܢ ܘܫܩܠ ܓܪ̈ܡܘܗܝ ܕܝܘܢܬܢ ܐܚܘܗܝ ܘܩܒܪܗ ܒܡܘܪܥܝܡ ܒܡܕܝܢܬܐ ܕܐܒܗܘܗܝ܂
13:26 [ai]	ܘܐܬܐܒܠܘ ܘܒܟܘ ܥܠܘܗܝ ܟܠܗ ܐܝܣܪܐܝܠ ܝܘ̈ܡܬܐ ܣܓ̈ܝܐܐ܂
13:27 [ai]	ܘܒܢܐ ܫܡܥܘܢ ܠܥܠ ܡܢ ܩܒܪܐ ܕܐܒܘܗܝ ܘܕܐܚ̈ܘܗܝ ܘܪܡܪܡܗ ܒܚܙܬܗ ܒܟܐ̈ܦܐ ܦܠܝܚ̈ܬܐ ܕܓ̈ܠܝܦܢ ܡܢ ܬܪܝܗܘܢ ܓܒ̈ܝܗܝܢ܂
13:28 [ai]	ܘܐܩܝܡ ܫܒܥ ܢܦܫ̈ܢ ܚܕܐ ܠܘܩܒܠ ܚܕܐ ܠܐܒܘܗܝ ܘܠܐܡܗ ܘܠܐܪܒܥܬܝܗܘܢ ܐܚܘ̈ܗܝ܂
13:29 [ai]	ܘܥܒܕ ܡܐܟ̈ܢܘܣ ܘܐܩܝܡ ܠܗܝܢ ܐܣ̈ܛܘܢܐ ܪ̈ܘܪܒܐ ܘܓܠܦ ܥܠ ܐܣ̈ܛܘܢܐ ܟܠ ܡܐ̈ܢܝ ܙܝܢܐ ܕܩܪܒܐ ܠܫܡܐ ܕܠܥܠܡ ܘܥܠ ܓܢܒ ܡܐ̈ܢܝ ܙܝܢܐ ܥܒܕ ܐ̈ܠܦܐ ܓܠܝ̈ܦܬܐ ܘܪܡܪܡ ܕܗ̈ܘܝ ܡܬ̈ܚܙܝܢ ܠܟܠ ܢ̈ܚܬܝ ܝܡܐ܂
13:30 [ai]	ܗܢܐ ܩܒܪܐ ܕܥܒܕ ܫܡܥܘܢ ܒܡܘܪܥܝܡ ܥܕܡܐ ܠܝܘܡܢܐ܂
13:31 [ai]	ܛܪܝܦܘܢ ܕܝܢ ܡܗܠܟ ܗܘܐ ܒܢܟܠܐ ܥܡ ܐܢܛܝܟܘܣ ܡܠܟܐ ܪܒܐ ܘܩܛܠܗ܂
13:32 [ai]	ܘܐܡܠܟ ܚܠܦܘܗܝ ܘܩܛܪ ܬܓܐ ܕܐܣܝܐ ܘܥܒܕ ܡܚܘܬܐ ܪܒܬܐ ܒܐܪܥܐ܂
13:33 [ai]	ܘܒܢܐ ܫܡܥܘܢ ܚܣ̈ܢܝܗ ܕܝܗܘܕܐ ܘܐܚܕܪ ܒܡ̈ܓܕܠܐ ܪ̈ܡܐ ܘܒܫܘܪ̈ܐ ܪ̈ܘܪܒܐ ܘܒܬܪ̈ܥܐ ܘܒܡ̈ܘܟܠܐ ܘܣܡ ܐܣܢܐ ܒܚ̈ܣܢܐ܂
13:34 [ai]	ܘܓܒܐ ܫܡܥܘܢ ܓܒܪ̈ܐ ܘܫܕܪ ܠܘܬ ܕܡܛܪܝܘܣ ܡܠܟܐ ܠܡܥܒܕ ܫܘܒܩܢܐ ܠܐܪܥܐ ܡܛܠ ܕܟܠܗܘܢ ܣܘܥܪ̈ܢܘܗܝ ܕܛܪܝܦܘܢ ܚܛܘܦܝܐ ܐܝܬܝܗܘܢ ܗܘܘ܂
13:35 [ai]	ܘܫܕܪ ܕܡܛܪܝܘܣ ܡܠܟܐ ܐܝܟ ܗܠܝܢ ܡ̈ܠܐ ܘܟܬܒ ܠܗ ܥܢܝܢܐ ܒܐܓܪܬܐ ܗܟܢܐ܂
13:36 [ai]	ܕܡܛܪܝܘܣ ܡܠܟܐ ܠܫܡܥܘܢ ܪܒ ܟܗ̈ܢܐ ܘܪܚܡܐ ܕܡܠܟܐ ܘܠܣ̈ܒܐ ܘܠܥܡܐ ܕܝܗ̈ܘܕܝܐ ܫܠܡ܂
13:37 [ai]	ܟܠܝܠܐ ܕܕܗܒܐ ܘܫܠܝܚܘܬܐ ܕܫܕܪܬܘܢ ܠܢ ܩܒܠܢ ܘܥܬܝܕܝܢ ܐܢܚܢܢ ܠܡܥܒܕ ܠܟܘܢ ܫܠܡܐ ܪܒܐ ܘܕܢܟܬܘܒ ܠܐܝܠܝܢ ܕܥܒܝܕܝܢ ܥܠ ܨܒܘ̈ܬܐ ܕܢܫܒܩܘܢ ܠܟܘܢ ܫܩ̈ܠܐ܂
13:38 [ai]	ܘܟܠ ܕܫܠܚܢ ܠܟܘܢ ܩܝܡ ܘܚܣ̈ܢܐ ܕܒܢܝܬܘܢ ܕܝܠܟܘܢ ܢܗܘܘܢ܂
13:39 [ai]	ܘܫܒܩܝܢ ܐܢܚܢܢ ܕܝܢ ܐܦ ܚܛܗ̈ܐ ܘܣ̈ܟܠܘܬܐ ܕܥܕܡܐ ܠܝܘܡܢܐ ܘܟܠܝܠܐ ܗܘ ܕܚܝܒܝܢ ܗܘܝܬܘܢ ܘܟܠ ܡܢ ܕܝܗܒ ܗܘܐ ܡܟܣܐ ܒܐܘܪܫܠܡ ܡܟܝܠ ܠܐ ܢܗܘܐ ܝܗܒ܂
13:40 [ai]	ܘܟܠ ܡܢܘ ܡܢ ܕܝܠܟܘܢ ܕܨܒܝܢ ܕܢܬܟܬܒܘܢ ܥܡ ܕܝܠܢ ܢܬܟܬܒܘܢ ܘܢܗܘܐ ܒܝܢܬܢ ܫܠܡܐ܂
13:41 [ai]	ܒܫܢܬ ܡܐܐ ܘܫܒܥܝܢ ܐܬܪܝܡ ܢܝܪܐ ܕܥܡ̈ܡܐ ܡܢ ܐܝܣܪܝܠ܂
13:42 [ai]	ܘܫܪܝܘ ܥܡܐ ܟܬܒܝܢ ܘܫܩܠܝܢ ܘܝܗܒܝܢ ܒܫܢܬܐ ܩܕܡܝܬܐ ܒܫܡܗ ܕܫܡܥܘܢ ܪܒ ܟ̈ܗܢܐ ܪܒܐ ܘܪܫܐ ܘܡܕܒܪܢܐ ܕܝܗ̈ܘܕܝܐ܂
13:43 [ai]	ܒܗܢܘܢ ܝܘ̈ܡܬܐ ܝܬܒ ܫܡܥܘܢ ܥܠ ܥܐܙܐ ܘܚܕܪܗ ܒܡܫܪܝܬܐ ܘܥܒܕ ܡܓ̈ܕܠܐ ܕܩܝܣܐ ܥܫ̈ܝܢܐ ܘܩܪܒ ܠܫܘܪܐ ܕܡܕܝܢܬܐ ܘܗܓܡ ܚܕ ܡܓܕܠܐ ܘܐܚܕܗ ܠܡܕܝܢܬܐ܂
13:44 [ai]	ܘܫܘܪܘ ܘܢܦܩܘ ܡܢ ܓܘ ܡܓ̈ܕܠܐ ܕܩܝܣܐ ܓܒܪ̈ܐ ܕܚܝܠܐ ܘܢܚܬܘ ܠܡܕܝܢܬܐ ܘܗܘܐ ܙܘܥܐ ܪܒܐ ܒܓܘ ܡܕܝܢܬܐ܂
13:45 [ai]	ܘܣܠܩܘ ܒ̈ܢܝ ܡܕܝܢܬܐ ܥܡ ܢܫ̈ܝܗܘܢ ܘܒܢ̈ܝܗܘܢ ܟܕ ܡܣܕܩܝܢ ܢܚ̈ܬܝܗܘܢ ܘܓܥܘ ܒܩܠܐ ܪܡܐ ܘܒܥܘ ܡܢ ܫܡܥܘܢ ܕܢܬܠ ܠܗܘܢ ܝܡܝܢܐ܂
13:46 [ai]	ܘܐܡܪܘ ܠܗ ܠܐ ܬܥܒܕ ܠܢ ܐܝܟ ܒܝܫܘܬܢ ܐܠܐ ܐܝܟ ܛܝܒܘܬܟ܂
13:47 [ai]	ܘܫܒܩ ܐܢܘܢ ܫܡܥܘܢ ܘܠܐ ܐܩܪܒ ܥܡܗܘܢ ܘܐܦܩ ܐܢܘܢ ܡܢ ܡܕܝܢܬܐ ܘܕܟܝ ܒܬ̈ܐ ܐܝܟܐ ܕܐܝܬ ܗܘܐ ܦܬܟܪ̈ܐ ܘܗܟܢܐ ܥܠ ܠܗ ܟܕ ܡܫܒܚ ܘܡܒܪܟ܂
13:48 [ai]	ܘܐܦܩ ܡܢܗ ܟܠܗ ܛܡܐܘܬܐ ܘܐܘܬܒ ܬܡܢ ܓܒܪ̈ܐ ܐܝܠܝܢ ܕܡܨܛܒܝܢ ܒܢܡܘܣܐ ܘܒܢܐ ܒܗ ܚܣܢܐ ܘܥܒܕ ܠܗ ܒܗ ܒܝܬܐ܂
13:49 [ai]	ܝܬ̈ܒܝ ܡܪܕܐ ܕܝܢ ܕܒܐܘܪܫܠܡ ܡܬܟܠܝܢ ܗܘܘ ܠܡܥܠ ܘܠܡܦܩ ܘܠܡܙܒܢ ܘܠܡܙܒܢܘ ܘܟܦܢܘ ܣܓܝ ܘܡܝܬܘ ܡܢܗܘܢ ܣܓ̈ܝܐܐ ܡܢ ܟܦܢܐ܂
13:50 [ai]	ܘܒܥܘ ܡܢ ܫܡܥܘܢ ܕܢܬܠ ܠܗܘܢ ܝܡܝܢܐ ܘܝܗܒ ܠܗܘܢ ܘܐܦܩ ܐܢܘܢ ܡܢ ܬܡܢ ܘܕܟܝܗ ܠܒܝܬ ܡܪܕܐ ܡܢ ܟܠܗ ܛܡܐܘܬܐ܂
13:51 [ai]	ܘܥܠܘ ܠܒܝܬ ܡܪܕܐ ܒܥܣܪܝܢ ܘܬܠܬܐ ܒܝܪܚܐ ܕܬܪܝܢ ܒܫܢܬ ܡܐܐ ܘܫܒܥܝܢ ܘܚܕܐ ܒܚܕܘܬܐ ܘܒܬܫܒܚ̈ܬܐ ܘܒܐ̈ܘܫܥܢܐ ܘܒܩܝܬܪ̈ܐ ܘܒܟܢܪ̈ܐ ܡܛܠ ܕܐܬܬܒܪ ܒܥܠܕܒܒܐ ܪܒܐ ܡܢ ܐܝܣܪܐܝܠ ܘܫܠܝ ܢܘܟܪܝܐ ܡܢ ܕܠܡܩܪܒܘ ܥܡ ܐܝܣܪܐܝܠ܂
13:52 [ai]	ܘܐܩܝܡܘ ܕܗܘܘ ܥܒܕܝܢ ܠܗ ܠܗܢܐ ܝܘܡܐ ܒܟܠ ܫܢܐ ܘܫܢܐ ܒܒܘܣܡܐ ܘܒܚܕܘܬܐ܂
13:53 [ai]	ܘܐܥܫܢܘ ܠܛܘܪܐ ܕܗܝܟܠܐ ܕܥܠ ܓܢܒ ܒܝܬ ܡܪܕܐ ܘܥܡܪ ܗܘܐ ܬܡܢ ܫܡܥܘܢ ܗܘ ܘܒ̈ܢܝ ܒܝܬܗ ܥܡܗ܂
13:54 [ai]	ܘܚܙܐ ܫܡܥܘܢ ܠܝܘܚܢܢ ܒܪܗ ܕܓܢܒܪ ܗܘ ܘܐܩܝܡܗ ܡܕܒܪܢܐ ܕܟܘܠܗܘܢ ܚ̈ܝܠܐ ܘܥܡܪ ܗܘ ܒܓܙܝܪܐ܂