The Comprehensive Aramaic Lexicon

01:01 [ai]	ܘܗܘܐ ܡܢ ܒܬܪ ܕܩܛܠ ܐܠܟܣܢܕܪܘܣ ܒܪ ܦܝܠܝܦܘܣ ܡܩܕܘܢܝܐ ܕܢܦܩ ܡܢ ܐܪܥܐ ܕܟܬ̈ܝܐ ܘܡܚܐ ܠܕܪܝܘܫ ܡܠܟܐ ܕܦܪܣ ܘܕܡܕܝ ܘܐܡܠܟ ܚܠܦܘܗܝ ܗܘ ܠܘܩܕܡ ܒܝܘܢ܂
01:02 [ai]	ܘܥܒܕ ܩܪ̈ܒܐ ܣܓ̈ܝܐܐ ܘܐܚܕ ܚܣ̈ܢܐ ܘܩܛܠ ܡ̈ܠܟܐ ܕܐܪܥܐ܂
01:03 [ai]	ܘܐܙܠ ܥܕܡܐ ܠܣܘ̈ܦܝܗ ܕܐܪܥܐ ܘܢܣܒ ܒܙܬܐ ܕܥܡ̈ܡܐ ܣܓ̈ܝܐܐ ܘܫܠܝܬ ܐܪܥܐ ܩܕܡܘܗܝ ܘܐܬܪܝܡ ܠܒܗ܂
01:04 [ai]	ܘܟܢܫ ܚܝܠܐ ܕܥܫܝܢ ܛܒ ܘܐܫܬܠܛ ܒܐܪ̈ܥܬܐ ܕܥܡ̈ܡܐ ܘܛܪ̈ܘܢܐ ܘܗܘܘ ܠܗ ܠܡܕܐܬܐ܂
01:05 [ai]	ܘܡܢ ܒܬܪ ܗܠܝܢ ܢܦܠ ܒܟܘܪܗܢܐ ܘܝܕܥ ܕܡܐܬ ܠܗ܂
01:06 [ai]	ܘܩܪܐ ܠܥܒ̈ܕܘܗܝ ܡܝܩܪ̈ܐ ܐܝܠܝܢ ܕܐܬܪܒܝܘ ܥܡܗ ܡܢ ܛܠܝܘܬܗ ܘܦܠܓ ܠܗܘܢ ܡܠܟܘܬܗ ܥܕ ܗܘ ܚܝ܂
01:07 [ai]	ܘܐܡܠܟ ܐܠܟܣܢܕܪܘܣ ܫ̈ܢܝܢ ܬܪܬܥܣܪܐ ܘܡܝܬ܂
01:08 [ai]	ܘܐܚܕܘ ܥܒ̈ܕܘܗܝ ܚܕ ܚܕ ܡܢܗܘܢ ܒܐܬܪܗ܂
01:09 [ai]	ܘܩܛܪܘ ܟܠܗܘܢ ܬܓ̈ܐ ܡܢ ܒܬܪ ܡܘܬܗ ܘܒܢܝܗܘܢ ܒܬܪܗܘܢ ܫ̈ܢܝܐ ܣܓܝܐ̈ܬܐ ܘܐܣܓܝܘ ܒܝܫ̈ܬܐ ܒܐܪܥܐ܂
01:10 [ai]	ܘܢܦܩ ܡܢܗܘܢ ܥܩܪܐ ܕܪܘܫܥܐ ܐܢܛܝܘܟܘܣ ܐܦܝܦܢܘܣ ܒܪ ܐܢܛܝܘܟܘܣ ܡܠܟܐ ܕܐܝܬܘܗܝ ܗܘܐ ܗܡܝܪܐ ܒܪܗܘܡܝ ܘܐܡܠܟ ܒܫܢܬ ܡܐܐ ܘܬܠܬܝܢ ܘܫܒܥ ܫ̈ܢܝܢ ܠܡܠܟܘܬܐ ܕܝܘ̈ܢܝܐ܂
01:11 [ai]	ܒܗܘܢ ܒܝܘܡ̈ܬܐ ܗܢܘܢ ܢܦܩܘ ܡܢ ܐܝܣܪܐܝܠ ܐܢܫܐ ܥܘ̈ܠܐ ܘܓܪܓܘ ܠܣܓܝܐ̈ܐ ܘܐܡܪܝܢ ܠܗܘܢ ܢܐܙܠ ܢܩܝܡ ܩܝܡܐ ܥܡ ܥܡ̈ܡܐ ܕܚܕܪ̈ܝܢ ܡܛܠ ܕܗܐ ܡܢ ܕܦܪ̈ܫܢ ܡܢܗܘܢ ܐܕܪ̈ܟܢ ܒܝܫ̈ܬܐ ܣܓܝܐ̈ܬܐ܂
01:12 [ai]	ܘܛܐܒܬ ܡܠܬܐ ܒܥܝܢܝ̈ܗܘܢ܂
01:13 [ai]	ܘܐܬܓܪܓܘ ܐܢ̈ܫܝܢ ܡܢ ܥܡܐ ܘܐܙܠܘ ܠܘܬ ܡܠܟܐ ܘܝܗܒ ܠܗܘܢ ܫܘܠܛܢܐ ܠܡܬܕܒܪܘ ܒܢܡܘܣܐ ܕܥܡ̈ܡܐ܂
01:14 [ai]	ܘܒܢܘ ܓܡܢܣܝܘܢ ܒܐܘܪܫܠܡ ܐܝܟ ܥܒ̈ܝܕܬܐ ܕܥܡ̈ܡܐ܂
01:15 [ai]	ܘܢܓܕܘ ܠܗܘܢ ܠܥܘܪܠܘܬܐ ܘܗܦܟܘ ܡܢ ܩܝܡܐ ܕܩܘܕܫܐ ܘܐܫܬܘܝܘ ܠܥܡ̈ܡܐ ܘܐܙܕܡܢܘ ܠܡܥܒܕ ܕܒܝܫ܂
01:16 [ai]	ܘܬܩܢܬ ܡܠܟܘܬܐ ܩܕܡ ܐܢܛܝܘܟܘܣ ܘܣܒܪ ܠܡܡܠܟܘ ܥܠ ܡܨܪܝܢ ܐܝܟ ܕܢܡܠܟ ܥܠ ܬܪܬܝܢ ܡܠܟܘܢ܂
01:17 [ai]	ܘܥܠ ܠܡܨܪܝܢ ܒܥܡ̈ܡܐ ܥܫ̈ܝܢܐ ܘܒܡܪ̈ܟܒܬܐ ܘܦܝ̈ܠܐ ܘܦܪ̈ܫܐ ܘܒܐ̈ܠܦܐ ܣܓܝܐ̈ܬܐ܂
01:18 [ai]	ܘܣܕܪ ܩܪܒܐ ܠܘܩܒܠ ܦܛܘܠܡܐܘܣ ܡܠܟܐ ܕܡܨܪܝܢ ܘܗܦܟ ܦܛܘܠܡܐܘܣ ܡܢ ܩܕܡ ܐܦܘ̈ܗܝ ܘܥܪܩ܂
01:19 [ai]	ܘܐܚܕ ܡܕܝ̈ܢܬܐ ܥܫ̈ܝܢܬܐ ܒܡܨܪܝܢ ܘܢܣܒ ܒܙܬܐ ܕܐܪܥܐ ܕܡܨܪܝܢ܀܀
01:20 [ai]	ܘܗܦܟ ܐܢܛܝܘܟܘܣ ܡܢ ܒܬܪ ܕܡܚܐ ܠܡܨܪܝܢ ܒܫܢܬ ܡܐܐ ܘܐܪܒܥܝܢ ܘܬܠܬ ܫ̈ܢܝܢ ܘܣܠܩ ܥܠ ܐܝܣܪܐܝܠ ܘܐܘܪܫܠܡ ܒܥܡܐ ܥܫܝܢܐ܂
01:21 [ai]	ܘܥܠ ܠܒܝܬ ܡܩܕܫܐ ܒܓܐܝܘܬܐ ܘܢܣܒ ܠܡܕܒܚܐ ܕܕܗܒܐ ܘܠܡܢܪܬܐ ܕܢܗܪܐ ܘܠܟܘܠܗܘܢ ܡܐ̈ܢܝܗ܂
01:22 [ai]	ܘܐܦ ܠܦܬܘܪܐ ܕܐ̈ܦܐ ܘܢܘܩܝܐ ܘܦܝ̈ܠܣܐ ܘܟ̈ܦܐ ܕܕܗܒܐ ܘܦܪܣܐ ܘܟܠܝܠܐ ܘܨܒܬܐ ܕܕܗܒܐ ܕܐ̈ܦܝ ܗܝܟܠܐ ܘܩܠܦ ܟܠ ܡܕܡ܂
01:23 [ai]	ܘܢܣܒ ܣܐܡܐ ܘܕܗܒܐ ܘܡܐ̈ܢܐ ܕܪܓܬܐ ܘܢܣܒ ܣܝܡ̈ܬܐ ܡܛܫ̈ܝܬܐ ܕܐܫܟܚ܂
01:24 [ai]	ܘܢܣܒ ܟܠ ܘܐܙܠ ܠܐܪܥܗ ܘܥܒܕ ܒܗܘܢ ܚܪܒܐ ܪܒܬܐ܂
01:25 [ai]	ܘܗܘܐ ܐܒܠܐ ܪܒܐ ܥܠ ܐܝܣܪܝܠ ܒܟܘܠܗܘܢ ܐܬܪ̈ܘܬܗܘܢ܂
01:26 [ai]	ܡܛܠ ܗܢܐ ܪ̈ܘܪܒܢܐ ܐܬܬܢܚܘ ܘܣ̈ܒܐ ܘܥ̈ܠܝܡܐ ܘܒܬܘ̈ܠܬܐ ܐܬܟܪܗܘ ܘܫܘܦܪܐ ܕܢܫ̈ܐ ܐܬܚܒܠ܂
01:27 [ai]	ܟܘܠ ܚܬܢܐ ܢܣܒ ܐܘܠܝܬܐ ܘܕܝܬܒܐ ܒܓܢܘܢܐ ܚܕܬܬ ܐܒܠܐ܂
01:28 [ai]	ܘܐܬܬܙܝܥܬ ܐܪܥܐ ܥܠ ܥܡܘܪ̈ܝܗ ܘܟܘܠܗ ܒܝܬ ܝܥܩܘܒ ܠܒܫܘ ܒܗܬܬܐ܂
01:29 [ai]	ܡܢ ܒܬܪ ܬܪ̈ܬܝܢ ܫ̈ܢܝܢ ܕܝܘܡ̈ܬܐ ܫܕܪ ܡܠܟܐ ܫܠܝ̈ܛܐ ܕܡܕܬܐ ܠܡܕܝ̈ܢܬܐ ܕܝܗܘܕܐ ܘܐܬܐ ܠܐܘܪܫܠܡ ܒܥܡܐ ܥܫܝܢܐ܂
01:30 [ai]	ܘܡܠܠ ܠܗܘܢ ܡ̈ܠܐ ܕܫܠܡܐ ܒܢܟܠܐ ܘܗܝܡܢܘܗܝ ܘܢܦܠ ܥܠ ܡܕܝܢܬܐ ܡܢ ܫܠܝܐ ܘܡܚܗ ܡܚܘܬܐ ܪܒܬܐ ܘܐܘܒܕ ܥܡܐ ܣܓܝܐܐ ܡܢ ܐܝܣܪܐܝܠ܂
01:31 [ai]	ܘܢܣܒ ܒܙܬܐ ܣܓܝܐܬܐ ܘܐܘܩܕܗ ܒܢܘܪܐ ܘܥܩܪ ܒ̈ܬܐ ܕܐܘܪܫܠܡ ܟܕ ܚܕܪܝܢ܂
01:32 [ai]	ܘܫܒܐ ܢܫ̈ܐ ܘܛ̈ܠܝܐ ܘܒܥܝܪܐ ܝܪܬ܂
01:33 [ai]	ܘܒܢܐ ܠܡܕܝܢܬܗ ܕܕܘܝܕ ܫܘܪ̈ܐ ܪ̈ܡܐ ܘܥܫ̈ܝܢܐ ܘܡܓ̈ܕܠܐ ܕܥܫܝܢܝܢ ܘܗܘܬ ܠܗܘܢ ܠܚܣܢܐ܂
01:34 [ai]	ܘܣܡܘ ܬܡܢ ܥܡܐ ܚܛܝܐ ܓܒܪ̈ܐ ܥܒ̈ܪܝ ܢܡܘܣܐ ܘܐܬܚܝܠܘ ܒܗ܂
01:35 [ai]	ܘܐܣܢܘ ܙܝܢܐ ܘܬܘܪܣܝܐ ܘܟܢܫܘ ܒܙܬܐ ܕܐܘܪܫܠܡ ܣܡܘ ܬܡܢ ܘܗܘܘ ܠܦܚܐ ܪܒܐ܂
01:36 [ai]	ܘܠܡܟܪܢܘܬܐ ܕܩܘܕܫܐ ܘܠܡܐܟܠ ܩܪ̈ܨܐ ܕܐܝܣܪܝܠ ܒܟܠܙܒܢ܂
01:37 [ai]	ܘܐܫܕܘ ܕܡܐ ܙܟܝܐ ܚܕܪ̈ܝ ܩܘܕܫܐ ܘܛܘܫܘ ܒܝܬ ܡܩܕܫܐ܂
01:38 [ai]	ܘܥܪܩܘ ܥܡܘܪ̈ܐ ܕܐܘܪܫܠܡ ܡܛܠܬܗܘܢ ܘܗܘܬ ܒܝܬ ܡܥܡܪܐ ܠܢܘܟܪ̈ܝܐ ܘܗܘܬ ܢܘܟܪܝܐ ܠܦܐܪ̈ܝܗ ܘܒ̈ܢܝܗ ܫܒܩܘܗ܂
01:39 [ai]	ܘܩܘ̈ܕܫܝܗ ܐܬܚܪܒܘ ܐܝܟ ܡܕܒܪܐ ‍{‍ܣ‍}‍‍<‍ܫ̈‍>‍ܒܝܗ ܠܚܣܕܐ ܘܝܩܝܪ̈ܝܗ ܠܫܝܛܘܬܐ܂
01:40 [ai]	ܐܝܟ ܬܫܒܘܚܬܗ ܣܓܝ ܨܥܪܗ ܘܪܘܡܗ ܐܬܗܦܟ ܠܐܒܠܐ܂
01:41 [ai]	ܘܟܬܒ ܡܠܟܐ ܒܟܠܗ ܡܠܟܘܬܗ ܕܢܗܘܘܢ ܟܠܗܘܢ ܥܡܐ ܚܕ܂
01:42 [ai]	ܘܕܢܫܒܩܘܢ ܟܠ ܐܢܫ ܢܡܘ̈ܣܘܗܝ ܘܩܒܠܘ ܟܠܗܘܢ ܐܝܟ ܡܠܬܗ ܕܡܠܟܐ܂
01:43 [ai]	ܘܣ̈ܓܝܐܐ ܡܢ ܐܝܣܪܐܝܠ‍{‍ ܐܝܣܪܐܝܠ‍}‍ ܐܨܛܒܝܘ ܒܦܘܠܚܢܗ ܕܡܠܟܐ ܘܕܒܚܘ ܠܦܬܟܪ̈ܐ ܘܐܚܠܘ ܫܒܬܐ܂
01:44 [ai]	ܘܫܕܪ ܡܠܟܐ ܐܓܪ̈ܬܐ ܒܝܕ ܐܝܙܓ̈ܕܐ ܠܐܘܪܫܠܡ ܘܠܡ̈ܕܝܢܬܐ ܕܝܗܘܕܐ ܠܡܐܙܠ ܒܬܪ ܢܡ̈ܘܣܐ ܢܘܟܪ̈ܝܐ ܕܐܪܥܐ܂
01:45 [ai]	ܘܠܡܟܠܐ ܕܒܚ̈ܐ ܫܠܡ̈ܐ ܘܢܘ̈ܩܝܐ ܡܢ ܩܘܕܫܐ ܘܠܡܚܠܘ ܫ̈ܒܐ ܘܥܕܥ̈ܕܐ܂
01:46 [ai]	ܘܠܡܛܡܐܘ ܩܘܕܫܐ ܘܩܘ̈ܕܫܐ܂
01:47 [ai]	ܘܠܡܒܢܐ ܦܪ̈ܟܐ ܘܢܘ̈ܣܐ ܠܦܬܟܪ̈ܐ ܘܠܡܕܒܚܘ ܚܙܝܪ̈ܐ ܘܒܥܝܪ̈ܐ ܛܡܐܬܐ܂
01:48 [ai]	ܘܠܡܫܒܩ ܒܢܝܗܘܢ ܥܘܪ̈ܠܐ ܘܠܡܛܡܐܘ ܢܦܫܗܘܢ ܒܟܘܠ ܕܛܡܐ ܘܡܛܘܫ܂
01:49 [ai]	ܐܝܟ ܕܢܛܥܘܢ ܢܡܘܣܐ ܘܠܡܚܠܦܘ ܟܠܗܘܢ ܢܡܘ̈ܣܐ܂
01:50 [ai]	ܘܟܠ ܡܢ ܕܠܐ ܢܥܒܕ ܐܝܟ ܢܡܘܣܐ ܕܡܠܟܐ ܢܡܘܬ܂
01:51 [ai]	ܐܝܟ ܡ̈ܠܐ ܗܠܝܢ ܟܬܒ ܒܟܘܠܗ ܡܠܟܘܬܗ ܘܐܩܝܡ ܦܩܘ̈ܕܐ ܥܠ ܟܘܠܗ ܡܠܟܘܬܗ ܘܥܠ ܟܠܗ ܥܡܐ ܘܦܩܕ ܠܡܕܒܚܘ ܒܡܕ̈ܝܢܬܐ ܕܝܗܘܕܐ ܒܟܠ ܡܕܝܢܐ ܘܡܕܝܢܐ܂
01:52 [ai]	ܘܐܬܟܢܫܘ ܡܢ ܥܡܐ ܠܘܬܗܘܢ ܣܓܝܐ̈ܐ ܡܢ ܟܠܗ ܐܝܣܪܝܠ ܕܫܒܩܘ ܢܡܘܣܐ ܘܥܒܕܘ ܒܝܫܬܐ ܒܐܪܥܐ܂
01:53 [ai]	ܘܣܡܘܗܝ ܠܐܝܣܪܐܝܠ ܒܛܫܝ̈ܬܐ ܒܟܠ ܒܝܬ ܥܪܘܩܝܗܘܢ܂
01:54 [ai]	ܘܒܚܡܫܐ ܘܥܣܪܝܢ ܒܟܢܘܢ ܕܫܢܬ ܡܐܐ ܘܐܪܒܥܝܢ ܘܚܡܫ ܒܢܘ ܛܘܡܐܐ ܕܚܪܒܐ ܥܠ ܡܕܒܚܐ ܘܡܕܝ̈ܢܬܐ ܕܝܗܘܕܐ ܟܕ ܚܕܪ̈ܢ ܒܢܘ ܦܪ̈ܟܐ܂
01:55 [ai]	ܘܥܠ ܬܪ̈ܥܐ ܕܒ̈ܬܐ ܘܒܫܘ̈ܩܐ ܣܝܡܝܢ ܗܘܘ ܒܣܡ̈ܐ܂
01:56 [ai]	ܘܟܬ̈ܒܐ ܕܢܡܘܣܐ ܐܝܠܝܢ ܕܐܫܬܟܚܘ ܨܪܝܘ ܘܐܘܩܕܘ ܐܢܘܢ ܒܢܘܪܐ܂
01:57 [ai]	ܘܠܘܬ ܡܢ ܕܡܫܬܟܚ ܗܘܐ ܟܬܒܐ ܕܩܝܡܐ ܘܐܝܢܐ ܕܡܨܛܒܐ ܗܘܐ ܒܟܬܒܐ ܕܢܡܘܣܐ ܦܘܩܕܢܐ ܕܡܠܟܐ ܩܛܠ ܗܘܐ ܠܗ܂
01:58 [ai]	ܒܚܝܠܗܘܢ ܥܒܕܝܢ ܗܘܘ ܠܐܝܣܪܐܝܠ ܠܐܝܠܝܢ ܕܡܫܬܟܚܝܢ ܗܘܘ ܘܡܝܬܝܢ ܗܘܘ ܠܗܘܢ ܒܩܛܝܪܐ ܒܟܠ ܝܪܚ ܘܝܪܚ ܒܡܕܝ̈ܢܬܐ܂
01:59 [ai]	ܘܒܚܡܫܐ ܘܥܣܪܝܢ ܒܝܪܚܐ ܡܕܒܚܝܢ ܗܘܘ ܥܠ ܥܠܬܐ ܕܐܝܬ ܗܘܬ ܥܠ ܡܕܒܚܐ܂
01:60 [ai]	ܘܠܢܫܐ ܕܓܙܪ ܗ̈ܘܝ ܒܢܝܗܝܢ ܐܝܟ ܦܘܩܕܢܐ ܕܡܠܟܐ ܩܛܠܘ ܐ̈ܢܝܢ܂
01:61 [ai]	ܘܬܠܘ ܠܝܠܘ̈ܕܐ ܒܨܘܪ̈ܝܗܝܢ ܘܠܒ̈ܢܝ ܒܝܬܗܘܢ ܕܐܝܠܝܢ ܕܓܙܪܘ ܐܢܘܢ܂
01:62 [ai]	ܘܣܓ̈ܝܐܐ ܡܢ ܐܝܣܪܝܠ ܣܝܒܪܘ ܘܐܬܚܝܠܘ ܒܗܝܢ ܕܠܐ ܢܐܟܠܘܢ ܛܡܐܘܬܐ܂
01:63 [ai]	ܘܩܒܠܘ ܠܡܡܬ ܕܠܐ ܢܬܛܡܐܘܢ ܒܡܐ̈ܟܠܬܐ ܘܠܐ ܢܫܪܘܢ ܩܝܡܐ ܕܩܘܕܫܐ ܘܡܝܬܘ܂
01:64 [ai]	ܘܗܘܐ ܪܘܓܙܐ ܪܒܐ ܥܠ ܐܝܣܪܐܝܠ܀ ܀