← Back
The Comprehensive Aramaic Lexicon
← Return to the Text Browser
click on the file description for more information
62078: P 1Mac7a1

Click on a word for lexical analysis.
Click on a red-colored coordinate for comments and/or translations of the line
View in Serto
Ask AI about a passage
Hide manuscript variants

16:01 [ai]ܘܣܠܩ ܝܘܚܢܢ ܡܢ ܓܙܪ ܘܚܘܝ ܠܐܒܘܗܝ ܟܘܠ ܡܕܡ ܕܥܒܕ ܩܢܕܒܝܣ܂
16:02 [ai]ܘܩܪܐ ܐܢܘܢ ܠܬܪ̈ܝܗܘܢ ܒܢܘ̈ܗܝ ܩܫܝ̈ܫܐ ܠܝܗܘܕܐ ܘܠܝܘܚܢܢ ܘܐܡܪ ܠܗܘܢ ܐܢܐ ܘܐ̈ܚܝ ܘܒܝܬ ܐܒܝ ܐܩܪܒܢ ܩܪ̈ܒܘܗܝ ܕܐܝܣܪܝܠ ܡܢ ܛܠܝܘܬܢ ܘܥܕܡܐ ܠܝܘܡܢܐ ܘܐܬܝܗܒ ܒܐܝܕܝܢ ܕܢܦܪܘܩ ܠܐܝܣܪܝܠ ܙܒܢ̈ܬܐ ܣܓܝܐ̈ܬܐ܂
16:03 [ai]ܗܫܐ ܕܝܢ ܣܐܒܬ ܠܝ ܘܐܢܬܘܢ ܒܪ̈ܚܡܘܗܝ ܕܐܠܗܐ ܚܝܠܬܢܝܢ ܐܢܬܘܢ ܩܘܡܘ ܘܗܘܘ ܚܠܦܝ ܘܚܠܦ ܐܚ̈ܝ ܘܦܘܩܘ ܘܐܬܟܬܫܘ ܥܠ ܐ̈ܦܝ ܥܡܢ ܘܥܘܕܪܢܐ ܕܡܢ ܫܡܝܐ ܢܗܘܐ ܥܡܟܘܢ܂
16:04 [ai]ܘܓܒܐ ܝܘܚܢܢ ܡܢ ܐܪܥܐ ܥܣܪܝܢ ܐ̈ܠܦܝܢ ܓܒܪ̈ܐ ܡܓܒܝ̈ܐ ܠܩܪܒܐ ܘܦܪ̈ܫܐ ܘܐܙܠܘ ܥܠ ܩܢܕܒܝܘܣ ܘܒܬܘ ܒܡܘܪܥܝܡ܂
16:05 [ai]ܘܩܕܡܘ ܒܨܦܪܐ ܘܐܙܠܝܢ ܗܘܘ ܒܦܩܥܬܐ ܘܗܐ ܚܝܠܐ ܣܓܝܐܐ ܐܪܥ ܐܢܘܢ ܕܪ̈ܓܠܝܐ ܘܕܦܪ̈ܫܐ ܘܐܝܬ ܗܘܐ ܢܚܠܐ ܒܝܢܬܗܘܢ܂
16:06 [ai]ܘܫܪܐ ܠܘܩܒܠܗܘܢ ܗܘ ܘܥܡܗ ܘܚܙܝܗܝ ܠܥܡܐ ܕܕܚܝܠ ܕܢܥܒܪ ܠܢܚܠܐ ܘܥܒܪ ܗܘ ܒܩܕܡܐ ܘܚܙܐܘܗܝ ܕܥܒܪ ܘܥܒܪܘ ܐܦ ܗܢܘܢ ܒܬܪܗ܂
16:07 [ai]ܘܦܠܓܗ ܠܥܡܐ ܘܠܦܪ̈ܫܐ ܒܝܢܬ ܡܫܪ̈ܝܬܗܘܢ ܦܪ̈ܫܐ ܕܝܢ ܕܒܥܠܕܒ̈ܒܝܗܘܢ ܣܓܝܐܝܢ ܗܘܘ ܣܓܝ܂
16:08 [ai]ܘܩܪܘ ܒܩܪ̈ܢܬܐ ܘܐܙܕܟܝ ܩܢܕܒܝܘܣ ܘܡܫܪܝܬܗ ܘܢܦܠܘ ܡܢܗܘܢ ܩܛܝ̈ܠܐ ܣܓܝܐ̈ܐ ܫܪܟܐ ܕܝܢ ܕܐܫܬܚܪܘ ܥܪܩܘ ܠܚܣ̈ܢܐ܂
16:09 [ai]ܝܗܘܕܐ ܕܝܢ ܐܚܘܗܝ ܕܝܘܚܢܢ ܒܠܥ ܝܘܚܢܢ ܕܝܢ ܪܕܦ ܗܘܐ ܒܬܪܗܘܢ ܥܕܡܐ ܠܚܒܪܘܢ ܗܝܿ ܕܒܢܘ܂
16:10 [ai]ܘܥܪܩܘ ܥܕܡܐ ܠܡܓܕܠܐ ܕܒܙܘܛܘܣ ܘܐܘܩܕܗ ܒܢܘܪܐ ܘܢܦܠܘ ܡܢܗܘܢ ܐܝܟ ܬܠܬܐ ܐ̈ܠܦܝܢ ܓܒܪ̈ܐ ܘܕܒܝܬ ܝܘܚܢܢ ܗܦܟܘ ܠܝܗܘܕܐ ܒܫܠܡܐ܂
16:11 [ai]ܦܛܠܡܐܘܣ ܕܝܢ ܒܪ ܚܒܘܒܐ ܗܘ ܕܡܩܡ ܗܘܐ ܪܝܫܐ ܘܡܕܒܪܢܐ ܒܦܩܥܬܐ ܕܝܪܝܚܘ ܘܩܢܐ ܕܗܒܐ ܘܣܐܡܐ ܣܓܝܐܐ܂
16:12 [ai]ܐܝܬ ܗܘܐ ܓܝܪ ܚܬܢܗ ܕܪܒ ܟܗ̈ܢܐ܂
16:13 [ai]ܘܐܬܪܝܡ ܠܒܗ ܘܨܒܐ ܕܢܐܚܘܕ ܘܢܫܬܠܛ ܥܠ ܐܪܥܐ ܘܡܬܚܫܒ ܗܘܐ ܢܟܠܐ ܥܠ ܫܡܥܘܢ ܘܥܠ ܒܢܘ̈ܗܝ ܕܐܝܟܢܐ ܢܩܛܘܠ ܐܢܘܢ܂
16:14 [ai]ܫܡܥܘܢ ܕܝܢ ܡܬܟܪܟ ܗܘܐ ܘܣܥܪ ܡܕܝ̈ܢܬܗ ܕܐܬܪܐ ܘܝܨܦ ܗܘܐ ܕܟܠܡܕܡ ܕܡܬܒܥܐ ܗܘܐ ܠܗܝܢ ܘܢܚܬ ܠܐܝܪܝܚܘ ܗܘ ܘܡܬܝܬܐ ܘܝܗܘܕܐ ܒܢܘ̈ܗܝ ܒܫܢܬ ܡܐܐ ܘܫܒܥܝܢ ܘܫܒܥ ܒܝܪܚܐ ܕܚܕܥܣܪ ܕܐܝܬܘܗܝ ܫܒܛ܂
16:15 [ai]ܘܩܒܠ ܐܢܘܢ ܦܛܠܡܐܘܣ ܒܪ ܚܒܘܒܐ ܒܢܟܠܐ ܒܚܣܢܐ ܕܡܬܩܪܐ ܕܘܐܝܩ ܗܘ ܕܒܢܐ ܗܘܐ ܘܥܒܕ ܠܗܘܢ ܡܫܬܝܐ ܪܒܐ ܘܛܫܝ ܬܡܢ ܓܒܪ̈ܐ܂
16:16 [ai]ܘܟܕ ܐܫܬܝܘ ܘܐܬܒܣܡܘ ܫܡܥܘܢ ܘܒܢܘ̈ܗܝ ܩܡ ܦܛܠܡܐܘܣ ܘܐܝܠܝܢ ܕܥܡܗ ܘܢܣܒܘ ܙܝܢܗܘܢ ܘܥܠܘ ܥܠ ܫܡܥܘܢ ܠܒܝܬ ܡܫܬܝܐ ܘܩܛܠܘܗܝ ܠܗ ܘܠܒܢ̈ܘܗܝ ܘܠܐܢ̈ܫܝܢ ܡܢ ܥܒ̈ܕܘܗܝ܂
16:17 [ai]ܘܥܒܕ ܒܝܫܬܐ ܪܒܬܐ ܘܦܪܥ ܒܝܫܬܐ ܚܠܦ ܛܒܬܐ܂
16:18 [ai]ܘܟܬܒ ܘܫܕܪ ܗܠܝܢ ܦܛܠܡܐܘܣ ܠܡܠܟܐ ܕܢܫܕܪ ܠܗ ܚܝܠܐ ܠܥܘܕܪܢܐ ܘܕܢܫܠܡ ܠܗ ܐܪ̈ܥܬܐ ܘܡܕܝ̈ܢܬܐ܂
16:19 [ai]ܘܫܕܪ ܓܒܪ̈ܐ ܐܚܪ̈ܢܐ ܠܓܙܪ ܕܢܩܛܠܘܢܝܗܝ ܠܝܘܚܢܢ ܘܠܪ̈ܝܫܝ ܐ̈ܠܦܐ ܕܝܢ ܟܬܒ ܕܢܐܬܘܢ ܨܐܕܘܗܝ ܕܢܬܠ ܠܗܘܢ ܕܗܒܐ ܘܣܐܡܐ ܘܡܘܗ̈ܒܬܐ܂
16:20 [ai]ܘܠܐܚܪ̈ܢܐ ܫܕܪ ܕܢܐܚܕܘܢ ܠܐܘܪܫܠܡ ܘܠܛܘܪܗ ܕܗܝܟܠܐ܂
16:21 [ai]ܘܐܙܠܘ ܘܐܘܕܥܘܗܝ ܠܝܘܚܢܢ ܒܓܙܪ ܕܡܝܬ ܠܗ ܐܒܘܗܝ ܘܐܚ̈ܘܗܝ ܘܫܕܪ ܕܐܦ ܠܟ ܢܩܛܘܠ܂
16:22 [ai]ܘܟܕ ܫܡܥ ܝܘܚܢܢ ܙܥ ܘܬܡܗ ܣܓܝ ܘܐܚܕ ܐܢܘܢ ܠܓܒܪ̈ܐ ܕܐܙܠ ܥܠܘܗܝ ܘܩܛܠ ܐܢܘܢ ܝܕܥ ܗܘܐ ܓܝܪ ܝܘܚܢܢ ܕܠܡܩܛܠܗ ܗܘ ܨܒܝܢ ܗܘܘ܂
16:23 [ai]ܘܫܪܟܐ ܕܡ̈ܠܘܗܝ ܕܝܘܚܢܢ ܘܩܪ̈ܒܘܗܝ ܘܢܨܚ̈ܢܘܗܝ ܕܐܬܢܨܚ ܘܙܟܐ ܘܒܢܝܢܐ ܕܫܘܪܐ ܕܒܢܐ ܘܥܒܕܘ̈ܗܝ܂
16:24 [ai]ܗܐ ܗܠܝܢ ܟܘܠܗܝܢ ܟܬܝ̈ܒܢ ܒܟܬܒܐ ܕܝܘܡ̈ܬܐ ܕܪܒܘܬ ܟܗܢܘܬܗ ܕܗܘܐ ܪܒ ܟܗ̈ܢܐ ܚܠܦ ܐܒܘܗܝ ܡܢ ܒܬܪܗ܂
16:xx [ai]ܫܠܡ ܣܦܪܐ ܩܕܡܝܐ ܕܡ̈ܩܒܝܐ܂