The Comprehensive Aramaic Lexicon

17:00 [ai]	ܙܡܝܼܪܬܐ ܕܫܬܝܢ
17:01 [ai]	ܡܪܝܐ ܐܢܬ ܗܼܘ ܡܼܿܠܟܢ܂ ܗܫܐ ܘܠܥܿܠܡ܂ ܡܛܠ ܕܒܟ ܐܠܗܐ ܬܫܼܬܒܗܪܝ ܢܦܫܢ
17:02 [ai]	ܘܡܢܐ ܐܢܘܢܿ ܚܝ̈ܘܗܝ ܕܒܪܐܢܫܐ ܥܠ ܐܪܥܐ܂ ܐܝܟ ܙܼܿܒܢܗ ܓܝܪ ܗܟܢܐ ܐܦ ܒܣܼܪܗ
17:03 [ai]	ܚܢܢ ܕܝܢ ܡܣܒܪܝܢܢ ܥܠ ܐܠܗܐ ܦܿܪܘܩܢ܂ ܡܛܠ ܕܐܘܚܕܢܗ ܕܐܠܗܢ ܠܥܿܠܡ ܒܪ̈ܚܼܡܐ
17:04 [ai]	ܘܡܠܟܘܼܬܗ ܕܐܠܗܢ ܠܥܠܡ ܥܠ ܥܡܼ̈ܡܐ ܒܕܝܼܢܐ
17:05 [ai]	ܐܢܬ ܡܪܝܐ ܓܒܼܝܬ ܠܕܘܝܕ ܡܠܟܐ ܥܠ ܝܼܣܪܐܝܠ܂ ܘܐܢܬ ܝܡܼܝܬ ܠܗ ܥܠ ܙܪܥܗ܂ ܕܠܐ ܬܬܥܼܿܛܐ ܡܼܢ ܩܕܡܿܝܟ ܡܼܿܠܟܘܬܗܘܢܿ
17:06 [ai]	ܘܒܚ̈ܛܗܝܢ ܕܝܢ ܩܡܼܘ ܥܠܝܢ ܚ̈ܛܝܐ܂ ܘܣܼܡܘ ܥܠܝܢ ܘܐܪܚܩܘܼܢܝ ܗܿܢܘܢܿ ܕܠܐ ܦܩܼܕܬ ܠܗܘܢܿ܂ ܒܩܛܝܼܪܐ ܢܣܼܒܘ
17:07 [ai]	ܘܠܐ ܫܒܚܘ ܠܫܡܟ ܡܝܩܪܐ ܒܬܫܒܼ̈ܚܬܐ܂ ܘܣܼܡܘ ܡܠܟܘܬܐ ܚܠܼܦ ܪܘܡܗܘܢܿ
17:08 [ai]	ܐܚܼܪܒܘ ܟܘܪܣܝܗ ܕܕܘܝܕ ܒܫܘܼܒܗܪܐ ܕܫܘܼܚܠܦܗܘܢܿ܂ ܘܐܢܬ ܕܝܢ ܬܣܚܘܦ ܐܢܘܢܿ܂ ܘܬܪܝܼܡ ܙܪܥܗܘܢ ܡܼܢ ܐܪܥܐ
17:09 [ai]	ܘܟܕ ܢܩܘܼܡ ܥܠܝܗܘܢܿ ܓܒܪܐ ܢܘܼܟܪܝܐ ܡܼܢ ܫܪܒܬܐ ܕܝܼܠܢ
17:10 [ai]	ܐܝܟ ܚܛܗ̈ܝܗܘܢܿ ܬܼܦܪܘܥ ܐܢܘܢܿ ܐܠܗܐ܂ ܘܬܫܼܬܟܚ ܠܗܘܢ ܐܝܟ ܥܒܿܕ̈ܝܗܘܢܿ
17:11 [ai]	ܘܠܐ ܬܪܚܡ ܥܠܝܗܘܿܢ ܐܠܗܐ܂ ܦܩܘܕ ܙܪܥܗܘܢ ܘܠܐ ܬܫܼܒܘܿܩ ܡܢܗܘܢ ܘܠܐ ܚܕ
17:12 [ai]	ܡܗܝܡܼܢ ܡܪܝܐ ܒܟܠܗܘܢܿ ܕܝܼ̈ܢܘܗܝ ܕܥܒܼܕ ܥܠ ܐܪܥܐ
17:13 [ai]	ܐܚܼܪܒ ܥܘܿܠܐ ܐܪܥܢ ܡܼܢ ܒܠܝ ܕܝܬܿܒ ܥܠܝܗܿ܂ ܚܒܠܘ ܛܠ̈ܝܐ ܘܣ̈ܒܐ ܘܒܢ̈ܝܗܘܢܿ ܐܟܚܕܐ
17:14 [ai]	ܒܫܘܼܦܪܐ ܕܪܘܓܙܗ ܫܼܿܕܪ ܐܢܘܢܿ ܥܕܡܐ ܠܡܥܪܒܐ܂ ܘܠܪܝܫܗܿ ܕܐܪܥܐ ܠܒܘܼܙܚܐ ܘܠܐ ܚܼܣ
17:15 [ai]	ܒܢܘܼܟܪܝܬܐ ܡܫܬܒܗܪ ܒܥܠܕܒܒܐ܂ ܘܠܒܼܗ ܢܘܼܟܪܝ ܗܼܘ ܡܼܢ ܐܠܗܢ
17:16 [ai]	ܘܟܠܡܕܡ ܥܒܼܕܬ ܐܘܿܪܫܠܡ܂ ܐܝܟ ܕܐܦ ܥܡܼ̈ܡܐ ܥܒܼܕܘ ܒܡܕ̈ܝܢܬܗܘܢܿ ܠܐܠ̈ܗܝܗܘܢܿ
17:17 [ai]	ܘܐܚܝܼܕܝܢ ܗܼܘܘ ܠܗܘܢܿ ܒܢ̈ܝܗܿ ܕܕܝܬܝܩܝ ܒܝܢܬܸ܂ ܥܡܼ̈ܡܐ ܚܠ̈ܝܼܛܐ܂ ܘܠܝܬ ܗܼܘܐ ܒܝܢܬܗܘܢ ܕܥܼܒܕ ܪ̈ܚܼܡܐ ܘܫܪܪܐ ܒܐܘܿܪܫܠܡ
17:18 [ai]	ܥܪܼܩܘ ܡܢܗܘܢܿ ܐܝܠܝܢ ܕܪܚܿܡܝܢ ܗܼܘܘ ܟܢܘܼܫܬܐ ܕܚ̈ܣܝܐ܂ ܘܦܼܪܚܘ ܐܝܟ ܨܦܪ̈ܐ ܕܦܪ̈ܚܢ ܡܼܢ ܩܢܝ̈ܗܝܢ
17:19 [ai]	ܘܛܥ̈ܝܢ ܗܼ̈ܘܝ ܒܡܕܒܪܐ܂ ܠܡܼܦܪܩ ܢܦܫܗܘܢܿ ܡܼܢ ܒܝܼܫܐ܂ ܘܝܩܝܪܐ ܗܼܘܬ ܒܥ̈ܝܢܝܗܘܢܿ ܬܘܬܒܘܬܗܿ ܕܢܦܫܐ ܕܡܼܬܦܪܩܐ ܗܼܘܬܸ܂ ܡܢܗܘܢܿ
17:20 [ai]	ܒܟܠܗܿ ܐܪܥܐ ܗܼܘܐ ܒܘܕܪܗܘܢܿ ܡܼܢ ܥܿܘ̈ܠܐ܂ ܡܛܠܗܢܐ ܐܬܬܚܼܕܘ ܫܡܿܝܐ ܕܠܐ ܢܿܚܼܬܘܢ ܡܼܛܪܐ ܥܠ ܐܪܥܐ
17:21 [ai]	ܘܡܼܿܒ̈ܘܥܐ ܕܡܼܢ ܥܿܠܡ܂ ܘܐܬܬܚܼܕܘ ܡܢ ܬܗܘ̈ܡܐ ܘܡܼܢ ܛܘܪ̈ܐ ܪ̈ܡܐ܂ ܡܛܠ ܕܠܝܬ ܗܼܘܐ ܒܗܘܢܿ ܕܥܿܒܕ ܙܕܝܩܘܬܐ ܘܕܝܼܢܐ܂ ܡܢ ܪ̈ܝܫܢܝܗܘܢܿ ܘܥܕܡܐ ܠܙܥܘܪ̈ܝܗܘܢܿ܂ ܐܝܬܝܗܘܢܿ ܒܟܠ ܚܛ̈ܗܝܢ
17:22 [ai]	ܡܼܿܠܟܐ ܒܥܘܠܐ ܐܝܬܘ‍[‍ܗܝ‍]‍܂ ܘܕܝܿܢܐ ܒܡܼܿܪܓܙܢܘܬܐ܂ ܘܥܡܼܐ ܒܚܛܝܼܬܐ
17:23 [ai]	ܚܙܝܼ ܡܪܝܐ ܘܐܩܝܼܡ ܠܗܘܢܿ ܠܡܠܟܗܘܢܿ ܠܒܪܗ ܕܕܘܝܕ܂ ܒܙܒܢܐ ܗܿܘ ܕܚܿܙܐ ܐܢܬ ܐܠܗܐ܂ ܕܢܡܠܟ ܥܠ ܝܼܣܪܐܝܠ ܥܒܼܕܟ
17:24 [ai]	ܘܚܼܿܙܩܝܗܝ ܒܚܝܠܐ܂ ܕܢܡܟܟ ܪ̈ܝܫܢܐ ܕܥܘܠܐ
17:25 [ai]	ܕܢܕܟܝܗܿ ܠܐܘܿܪܫܠܡ ܡܼܢ ܥܡܼ̈ܡܐ ܕܡܕܝܫܝܢ ܠܗܿ ܠܐܒܕܢܐ
17:26 [ai]	ܠܡܘܒܕܘ ܥܿܘ̈ܠܐ ܡܼܢ ܝܿܪܬܘܬܟ܂ ܠܡܫܼܚܩ ܫܘܼܒܗܪܐ ܐܝܟ ܚܼܨܦܐ ܕܦܚܪܐ܂ ܠܡܫܼܚܩ ܒܫܒܛܐ ܕܦܪܙܠܐ ܟܠܗ ܫܘܪܪܗܘܢܿ
17:27 [ai]	ܠܡܼܿܘܒܕܘ ܥܡܼ̈ܡܐ ܥܿܘ̈ܠܐ ܒܡܼܠܬܸ܂ ܦܘܼܡܗ܂ ܒܟܐܬܗ ܢܥܼܪܩܘܢ ܥܡܼ̈ܡܐ ܡܼܢ ܩܕܡ ܐܦ̈ܘܗܝ܂ ܘܠܡܟܘܢܘ ܠܚܛ̈ܝܐ ܒܡܼܠܬܐ ܕܠܒܼܗܘܢܿ
17:28 [ai]	ܕܢܟܢܫ ܥܡܼܐ ܩܕܝܫܐ ܗܿܘ ܕܢܼܫܬܒܗܪ ܒܙܕܝܩܘܬܐ܂ ܘܢܕܘܢ ܫܪ̈ܒܬܐ ܕܥܡܼܐ ܕܡܩܕܫ ܡܪܝܐ ܐܠܗܗ
17:29 [ai]	ܘܠܐ ܬܘܼܒ ܢܫܒܘܩ ܕܬܒܘܬܝ ܚܛܝܬܐ ܒܝܢܬܗܘܢܿ܂ ܘܠܐ ܬܘܼܒ ܢܥܼܡܪ ܒܼܿܝܢܬܗܘܢܿ ܓܒܪܐ ܕܝܿܕܥ ܒܝܼܫܬܐ
17:30 [ai]	ܝܼܕܥ ܐܢܘܢܿ ܓܝܪ ܡܛܠ ܕܟܠܗܘܢܿ ܒܢ̈ܝܐ ܐܢܘܢܿ ܕܐܠܗܐ܂ ܘܢܦܠܓ ܐܢܘܢܿ ܒܫܪ̈ܒܬܗܘܢܿ ܒܐܪܥܐ
17:31 [ai]	ܘܬܘܬܒܐ ܘܢܘܼܟܪܝܐ ܠܐ ܢܥܼܡܪ ܥܡܗܘܢܿ܂ ܡܛܠ ܕܕܐܿܢ ܥܡܼ̈ܡܐ ܘܐܡܼ̈ܘܬܐ ܒܚܼܟܡܬܐ ܕܙܕܝܩܘܬܗ
17:32 [ai]	ܘܢܩܼܢܐ ܥܡܼܐ ܡܼܢ ܥܡܼ̈ܡܐ܂ ܕܢܼܦܠܚܝܘܗܝ ܬܚܝܼܬ ܢܝܪܗ܂ ܘܢܫܒܚܘܢܝܗܝ ܠܡܪܝܐ ܓܠܝܐܝܼܬ ܒܟܠܗܿ ܐܪܥܐ
17:33 [ai]	ܘܢܕܟܝܗܿ ܠܐܿܘܪܫܠܡ ܒܩܕܝܫܘܬܐ ܐܝܟ ܕܡܢܩܕܝܡ
17:34 [ai]	ܕܢܐܼܬܘܢ ܥܡܼ̈ܡܐ ܡܼܢ ܣܘ̈ܦܝܗܿ ܕܐܪܥܐ܂ ܠܡܼܚܙܐ ܬܫܒܘܿܚܬܗ܂ ܟܕ ܡܼܿܝܬܝܢ ܐܝܼܩܿܪܐ ܠܒܢ̈ܝܗܿ܂ ܗܿܢܘܢܿ ܕܐܬܒܕܪܘ ܡܢܗܿ
17:35 [ai]	ܘܠܡܼܚܙܐ ܬܫܒܘܿܚܬܗ ܕܡܪܝܐ܂ ܗܿܝ ܕܫܒܚܗܿ ܐܠܗܐ܂ ܘܗܼܘ ܡܠܟܐ ܙܕܝܩܐ ܡܠܦ ܡܼܢ ܐܠܗܐ ܥܠܝܗܘܢܿ
17:36 [ai]	ܘܠܝܬ ܥܘܠܐ ܒܝܘܡ̈ܬܗ ܒܝܢܬܗܘܢܿ܂ ܡܛܠ ܕܟܠܗܘܢܿ ܩܕܝܫܝܢ܂ ܘܡܠܟܗܘܢܿ ܡܫܝܼܚܐ ܡܪܝܐ
17:37 [ai]	ܡܛܠ ܕܠܐ ܓܝܪ ܡܼܿܣܒܪ ܥܠ ܣܘܼܣܝܐ ܘܠܐ ܥܠ ܪܟܒܗ܂ ܘܠܐ ܥܠ ܩܼܫܬܐ܂ ܐܦܠܐ ܡܣܓܐ ܠܗ ܕܗܒܐ ܘܣܐܡܐ ܠܩܪܒܐ܂ ܘܠܐ ܢܣܒܪ ܥܠ ܣ̈ܓܝܐܐ ܒܝܘܡܐ ܕܩܪܒܐ
17:38 [ai]	ܡܪܝܐ ܓܝܪ ܡܿܠܟܗܼ ܗܼܘܝܘ ܣܒܪܗ܂ ܘܚܝܠܗ ܥܠ ܣܒܪܗ ܕܐܠܗܗ܂ ܘܢ‍[‍܂܂‍]‍ܡ ܥܠ ܟܠܗܘܢ ‍[‍܂܂܂܂܂‍]‍ ‍[‍ܒܕܚ‍]‍ܠܬܐ
17:39 [ai]	ܢܡܚܝܗܿ ܓܝܪ ܠܐܪܥܐ ܒܡܠܬ ܦܘܡܗܼ ܠܥܠܡ
17:40 [ai]	ܘܢܒܪܟ ܥܡܗ ܕܡܪܝܐ ܒܚ‍[‍ܟܡܬܐ ܘܒ‍]‍ܒܘܣܡܐ
17:41 [ai]	ܘܗܼܘ ܡܕܟܝ ‍[‍܂܂܂܂܂‍]‍ܡܐ֯ ܪܝܫܐ ܠܥܡܐ ܪܒܐ܂ ܠܡܟܘܢܘ ܠܪ̈ܝܫܢܐ ܘܠܡܘܒܕܘ ܠܚܛܝ̈ܐ ܒܡܠܬܗ
17:42 [ai]	ܘܠܐ ܢܬܒܿܨܪ ܒܝܘ̈ܡܬܗ ܡܢ ܐܠܗܗ܂ ܡܛܠ ‍[‍܂܂܂܂܂܂ ܩ‍]‍ܕܝܫܐ܂ ܘܚܟܝܡܐ ܒܡܼܠܟܐ ܕܦܛܢܐ܂ ܒܥܘܫܢܐ ܘܒܙܕܝܩܘܬܼܐ
17:43 [ai]	ܘܒܒܘܪܟܬܗ ܕܡܪܝܐ܂ ܥܡܗ܂ ܒܚܝܿܠܐ
17:44 [ai]	ܘܠܐ ܢܬܟܪܗ܂ ‍[‍ܣܒܪܗ ܒ‍]‍ܡܪܝܐܼ ܗܼܘ ܘܡܢܼܘ ܢܩܘܡ ܠܩܘܒܠܗ܂ ܡܚܿܝܠ ܓܝܪ ܒܥܿܒ̈ܕܘܗܝ܂ ܘܥܫܝܢ ܒܕܚܠܬܗ ܕܐܠܗܗ
17:45 [ai]	ܪܥܐ ܡܪܥܝܬܗ ܕܡܪܝܐ ܒܙܕܝܩܘܬܐ ܘܒܗܝܡܢܘܬܐ܂ ܘܠܐ ܢܫܒܘܩ ܕܐܢܫ ܢܬܟ֯ܪܗ ܒܡܪܥܝܬܗ
17:46 [ai]	ܠܟܠܗܘܢ ܢܟܢܫ ܒܫܦܝܘܬܐܼ܂ ܘܠܐ ܬܫܬܟܚ ܒܗܘܢ ܫܒܗܪܢܘܬܐ ܕܬܥܫܢ ܥܠܝܗܘܢ
17:47 [ai]	ܗܕܐ ܗܝ ܝܐܝܘܬܗ ܕܡܿܠܟܗ ܕܐܝܣܪܐܝܠ܂ ‍[‍܂܂܂܂܂܂ ܠܡ‍]‍ܩܡܘ ܥܠ ܒܝܬܗ ܕܐܝܣܪܐܝܠ ܠ‍[‍ܡܪܕܝ‍]‍ܗ
17:48 [ai]	ܦܬܓܡ̈ܘܗܝ ܒܩܼܝܢ ܝܬܝܪ ܡܢ ܕܗܒܐ܂ ܘܡܝܩܪ̈ܐ ܒܟܢܘܫ̈ܬܐ ܠܡܦ‍[‍ܪܫܘ‍]‍ ܫܪ̈ܒܬܐ ܡܢ ܥܡܐ ܩܕܝܫܐ
17:49 [ai]	ܦܬܓܡ̈ܘܗܝ ܐܝܟ ܦܬܓܡ̈ܐ ܕܩܕ̈ܝܫܐ ܒܝܢܬ ܥܡܐ ܩܕܝܫܐ
17:50 [ai]	ܛܘܒܝܗܘܢ ܠܐܝܠܝܢ ܕܗܿܘܝܢ ܒܝܘܡ̈ܬܐ ܗܿܢܘܢ܂ ܠܡܚܙܐ ܛܒ̈ܐ ܕܐܝܣܪܐܝܠܼ ܒܟܢܘܫܬܐ ܕܥܡܐ܂ ܕܥ‍[‍ܒܕ‍]‍ ܐܠܗܐ
17:51 [ai]	ܠܡܣܪܗܒܘ ܪ̈ܚܡܼܘܗܝ ܥܠ ܐܝܣܪܐܝܠ ܕܢܦܨܝܢ ܡܢ ܛܡܐܘܬܐ ܕܥܡ̈ܡܐ ܡܣܝ̈ܒܐ܂ ܡܪܝܐ ܗܘ ܓܝܪ ܡܠܟܢ܂ ܗܫ‍[‍ܐ ܘ‍]‍ܠܥܠܡ

next chapter