The Comprehensive Aramaic Lexicon

01:01 [ai]	ܺܝܗܽܘܕܼܳܐ ܥܰܒܼܕܿܳܐ ܕܝܶܫܽܘܥ ܡܫܺܝܚܳܐ܃ ܐܰܚܳܐ ܕܹܝܢ ܕܝܰܥܩܽܘܒܼ܃ ܠܥܰܡ̱ܡܶܐ̈ ܩܪ̈ܰܝܳܐ ܕܒܰܐܠܳܗܳܐ ܐܰܒܼܳܐ ܪܚܺܝܡܺܝܢ܃ ܘܰܒܼܝܶܫܽܘܥ ܡܫܺܝܚܳܐ ܢܛܺܝܪܺܝܢ܂
01:02 [ai]	ܪ̈ܰܚܡܶܐ ܘܰܫܠܳܡܳܐ ܘܚܽܘܒܿܳܐ܂ ܢܶܣܓܿܶܐ ܠܟܼܽܘܢ܀
01:03 [ai]	ܚܰܒܺܝܒܼܰܝ̈܃ ܟܰܕܼ ܟܽܠܳܗ ܝܰܨܺܝܦܼܽܘܬܼܳܐ ܥܳܒܼܶܕܼ ܐ̱ܢܳܐ ܠܡܶܟܼܬܿܰܒܼ ܠܟܼܽܘܢ܂ ܥܰܠ ܚܰܝ̈ܶܐ ܕܺܝܠܰܢ ܕܓܰܘܳܐ܃ ܐܰܢܰܢܩܺܐ ܐܺܝܬܼ ܠܺܝ ܠܡܶܟܼܬܿܰܒܼ ܠܟܼܽܘܢ܃ ܟܰܕܼ ܡܦܿܺܝܣ ܐ̱ܢܳܐ܃ ܕܰܐܓܼܽܘܢܳܐ ܬܶܥܒܿܕܼܽܘܢ ܚܠܳܦܼ ܗܰܝܡܳܢܽܘܬܼܳܐ܃ ܐܰܝܕܼܳܐ ܕܰܚܕܼܳܐ ܙܒܼܰܢ ܐܶܫܬܿܰܠܡܰܬܼ ܠܩܰܕܿܺܝܫܶܐ̈܂
01:04 [ai]	ܩܢܰܘ ܓܹܝܪ ܐ̱ܢܳܫܺܝܢ̈ ܡܰܥܠܳܢܽܘܬܼܳܐ܃ ܐܰܝܠܶܝܢ ܕܡܶܢ ܫܽܘܪܳܝܳܐ ܩܰܕܶܡܘ ܐܶܬܼܟܿܬܼܶܒܼ ܘܒܿܚܽܘܝܳܒܼܳܐ ܗܳܢܳܐ܂ ܐ̱ܢܳܫܳܐ ܪ̈ܰܫܺܝܥܶܐ܂ ܕܰܠܛܰܝܒܿܽܘܬܼܶܗ ܕܰܐܠܳܗܰܢ ܡܰܗܦܿܟܼܺܝܢ ܠܛܰܢܦܿܽܘܬܼܳܐ܂ ܘܰܒܼܗܰܘ ܕܺܐܝܬܼܰܘܗ̱ܝ ܒܰܠܚܽܘܕܼܰܘܗ̱ܝ ܡܳܪܳܐ ܐܰܠܳܗܳܐ ܘܡܳܪܰܢ ܝܶܫܽܘܥ ܡܫܺܝܚܳܐ܂ ܟܳܦܼܪܺܝܢ܂
01:05 [ai]	ܠܡܰܥ̱ܗܳܕܼܽܘܬܼܟܼܽܘܢ ܕܹܝܢ ܨܳܒܼܶܐ ܐ̱ܢܳܐ܃ ܟܰܕܼ ܝܳܕܼܥܺܝܢ ܐܢ̱ܬܿܽܘܢ ܟܽܠܗܶܝܢ܃ ܕܰܐܠܳܗܳܐ ܟܰܕܼ ܚܕܼܳܐ ܙܒܼܰܢ ܠܥܰܡܳܐ ܡܶܢ ܡܶܨܪܶܝܢ ܦܪܰܩ܃ ܗܳܝ ܕܿܬܼܰܪ̈ܬܿܶܝܢ ܠܰܐܝܠܶܝܢ ܕܠܳܐ ܗܰܝܡܶܢܘ ܐܰܘܒܿܶܕܼ܂
01:06 [ai]	ܘܰܠܡܰܠܰܐܟܼܶܐ̈ ܐܰܝܠܶܝܢ ܕܠܳܐ ܢܛܰܪܘ ܪܺܝܫܳܢܽܘܬܼܗܽܘܢ܃ ܐܶܠܳܐ ܫܒܼܰܩܘ ܥܽܘܡܪܳܐ ܕܺܝܠܗܽܘܢ܃ ܠܕܼܺܝܢܳܐ ܕܝܰܘܡܳܐ ܪܰܒܿܳܐ܂ ܒܰܐܣܽܘܪ̈ܶܐ ܠܳܐ ܺܝܕܼܺܝܥܶܐ̈܂ ܬܚܶܝܬܼ ܥܰܡܛܳܢܳܐ܂ ܢܳܛܰܪ܂
01:07 [ai]	ܐܰܝܟܿܰܢܳܐ ܕܰܣܕܼܽܘܡ ܘܥܳܡܽܘܪܳܐ ܘܰܡܕܼܺܝܢܳܬܼܳܐ̈ ܕܿܰܚܕܼܳܪ̈ܰܝܗܶܝܢ܃ ܕܒܳܗ ܒܰܕܼܡܽܘܬܼܳܐ ܕܗܳܠܶܝܢ ܙܰܢܺܝ̈ ܘܶܐܙܰܠ ܒܳܬܼܰܪ ܒܶܣܪܳܐ ܐ̱ܚܪܺܢܳܐ܃ ܣܺܝܡܳܢ̈ ܬܚܶܝܬܼ ܬܰܚܘܺܝܬܼܳܐ ܕܢܽܘܪܳܐ ܕܰܠܥܳܠܰܡ܂ ܟܰܕܼ ܡܚܰܝܒܼܳܢ̈ ܠܕܼܺܝܢܳܐ܂
01:08 [ai]	ܒܿܳܗ ܒܰܕܼܡܽܘܬܼܳܐ ܐܳܦܼ ܗܳܠܶܝܢ ܕܰܒܼܚܶܠܡܶܐ̈ ܡܶܫܬܿܪܰܓܼܪܓܼܺܝܢ܃ ܠܒܼܶܣܪܳܐ ܡܰܢ ܡܛܰܢܦܼܺܝܢ܂ ܠܡܳܪܽܘܬܼܳܐ ܕܹܝܢ ܛܳܠܡܺܝܢ܂ ܘܰܠܬܼܶܫܒܿܽܘܚܬܳܐ ܡܓܼܰܕܿܦܼܺܝܢ܂
01:09 [ai]	ܡܺܝܟܼܳܐܝܶܠ ܕܹܝܢ ܪܺܝܫ ܡܰܠܰܐܟܼܶܐ̈܃ ܗܰܘ ܕܥܰܡ ܐܳܟܼܶܠܩܰܪܨܳܐ ܟܰܕܼ ܕܳܐܶܢ܂ ܡܡܰܠܶܠ ܗ̱ܘܳܐ ܡܶܛܽܠ ܦܰܓܼܪܶܗ ܕܡܽܘܫܶܐ܃ ܠܳܐ ܐܰܡܪܰܚ ܕܢܰܝܬܿܶܐ ܥܠܰܘܗ̱ܝ ܕܺܝܢܳܐ ܕܓܽܘܕܿܳܦܼܳܐ܂ ܐܶܠܳܐ ܐܶܡܰܪ܃ ܕܢܶܓܼܥܽܘܪ ܒܳܟܼ ܡܳܪܝܳܐ܂
01:10 [ai]	ܗܳܠܶܝܢ ܕܶܝܢ܂ ܒܰܐܝܠܶܝܢ ܕܠܳܐ ܝܳܕܼܥܺܝܢ܂ ܡܓܼܰܕܿܦܼܺܝܢ܂ ܒܰܐܝܠܶܝܢ ܕܹܝܢ ܕܰܟܼܝܳܢܳܐܺܝܬܼ ܐܰܝܟܼ ܚܰܝܘܳܬܼܳܐ̈ ܚܰܪ̈ܫܳܬܼܳܐ ܡܦܿܳܣܺܝܢ܃ ܒܗܶܝܢ ܡܶܬܼܚܰܒܿܠܺܝܢ܂
01:11 [ai]	ܘܳܝ ܠܗܽܘܢ ܕܒܽܐܘܪܚܶܗ ܕܩܳܐܝܶܢ ܐܶܙܰܠܘ܂ ܘܒܼܳܬܼܰܪ ܛܳܥܝܽܘܬܼܶܗ ܕܒܼܶܠܥܰܡ ܒܰܐܓܼܪܳܐ ܐܶܫܬܿܰܪܰܚܘ܂ ܘܰܒܼܥܶܨܝܳܝ/ܢ/ܽܘܬܼܶܗ ܕܩܽܘܪܳܚ ܐܶܒܼܰܕܼܘ܂
01:12 [ai]	ܗܳܠܶܝܢ ܐܺܝܬܼܰܝܗܽܘܢ ܐܰܝܠܶܝܢ ܕܒܰܢܝܳܚܳܬܼܗܽܘܢ̈ ܟܰܕܼ ܡܟܼܰܬܿܡܺܝܢ܂ ܡܶܬܼܦܿܰܪܦܿܥܺܝܢ܂ ܟܰܕܼ ܕܠܳܐ ܕܶܚܠܬܼܳܐ ܢܰܦܼܫܗܽܘܢ ܪܳܥܶܝܢ܂ ܥܢܳܢܶܐ̈ ܕܠܳܐ ܡܶܛܪܳܐ ܕܡܶܢ ܪ̈ܽܘܚܶܐ ܦܳܗܝܳܢ̈܂ ܐܺܝܠܳܢܶܐ̈ ܕܰܐܘܦܿܺܝ ܐܶܒܗܽܘܢ܂ ܕܺܐܝܬܼܰܝܗܽܘܢ ܕܠܳܐ ܦܿܺܐܪ̈ܶܐ܂ ܕܡܺܝܬܼܘ ܬܶܢܝܳܢܽܘܬܼ܂ ܘܰܣܠܶܩܘ ܡܶܢ ܥܶܩܳܪ̈ܰܝܗܽܘܢ܂
01:13 [ai]	ܓܰܠ̱ܠܶܐ̈ ܥܰܙܺܝܙܶܐ̈ ܕܝܰܡܳܐ܃ ܕܰܒܼܝܰܕܼ ܪܽܘܥܬܿܗܽܘܢ ܡܚܰܘܶܝܢ ܒܶܗܬܿܰܬܼܗܽܘܢ܂ ܟܰܘܟܿܒܼܶܐ̈ ܡܰܛܥܝܳܢܶܐ̈܂ ܠܗܳܠܶܝܢ ܕܥܰܡܛܳܢܳܐ ܕܚܶܫܽܘܟܼܳܐ ܠܥܳܠܰܡ ܠܗܽܘܢ ܢܛܺܝܪ܂
01:14 [ai]	ܐܶܬܼܢܰܒܺܝ ܕܹܝܢ ܐܳܦܼ ܠܗܳܠܶܝܢ܃ ܗܰܘ ܕܺܐܝܬܼܰܘܗ̱ܝ ܕܫܰܒܼܥܳܐ ܡܶܢ ܐܳܕܼܳܡ܂ ܚܢܽܘܟܼ ܟܰܕܼ ܐܳܡܰܪ܃ ܕܗܳܐ ܡܳܪܝܳܐ ܐܳܬܼܶܐ ܒܪ̈ܶܒܿܘܳܬܼܳܐ ܕܩܰܕܿܺܝܫܶܐ̈܃
01:15 [ai]	ܕܢܶܥܒܿܶܕܼ ܕܺܝܢܳܐ ܥܰܠ ܟܽܠ܃ ܘܰܠܡܰܟܿܳܣܽܘ ܠܟܼܽܠ ܢܰܦܼܫܳܬܼܳܐ̈܃ ܡܶܛܽܠ ܟܽܠܗܽܘܢ ܥܒܼܳܕܼܶܐ̈ ܐܰܝܠܶܝܢ ܕܰܐܪܫܥܘ܃ ܘܡܶܛܽܠ ܟܽܠܗܶܝܢ ܡܶܠܶܐ̈ ܩܰܫܝܳܬܼܳܐ̈܂ ܐܰܝܠܶܝܢ ܕܡܰܠܶܠܘ܂ ܚܰܛܳܝܶܐ̈ ܪ̈ܰܫܺܝܥܶܐ܂
01:16 [ai]	ܗܳܠܶܝܢ ܐܶܢܽܘܢ ܕܡܰܪܛܢܺܝܢ ܘܥܳܕܼܠܺܝܢ ܒܟܽܠ ܨܶܒܼܘܳܢ̈܃ ܟܰܕܼ ܐܰܝܟܼ ܪ̈ܓܼܺܝܓܼܳܬܼܳܐ ܕܺܝܠܗܽܘܢ ܡܗܰܠܟܼܺܝܢ܂ ܘܦܼܽܘܡܗܽܘܢ ܡܡܰܠܶܠ ܓܢܺܝܚܳܬܼܳܐ̈܃ ܘܰܡܫܰܒܿܚܺܝܢ ܠܦܼܰܪ̈ܨܽܘܦܿܶܐ ܡܶܛܽܠ ܝܽܘܬܼܪ̈ܳܢܶܐ܀
01:17 [ai]	ܐܰܢ̱ܬܿܽܘܢ ܕܹܝܢ ܚܰܒܺܝܒܼܰܝ̈܃ ܐܶܬܿܕܿܰܟܼ̱ܪܘ ܠܡܶܠܶܐ̈ ܐܰܝܠܶܝܢ ܕܿܩܰܕܶܡ ܐܶܬܼܶܐܡܰܪ ܡܶܢ ܫܠܺܝܚܰܘܗ̱ܝ̈ ܕܡܳܪܰܢ ܝܶܫܽܘܥ ܡܫܺܝܚܳܐ܃
01:18 [ai]	ܕܳܐܡܪܺܝܢ ܗ̱ܘܰܘ ܠܟܼܽܘܢ܃ ܕܰܒܼܚܰܪܬܼܳܐ ܕܙܰܒܼܢܶܐ̈ ܢܶܗܘܽܘܢ ܐܰܝܠܶܝܢ ܕܰܡܒܼܰܙܚܺܝܢ܃ ܕܰܐܝܟܼ ܪ̈ܓܼܺܝܓܼܳܬܼܳܐ ܕܺܝܠܗܽܘܢ ܐܳܙܺܠ̱ܝܢ ܒܳܬܼܰܪ ܪܽܘܫܥܳܐ܂
01:19 [ai]	ܗܳܠܶܝܢ ܐܺܝܬܼܰܝܗܽܘܢ ܐܰܝܠܶܝܢ ܕܰܡܦܼܰܪܫܺܝܢ܂ ܢܰܦܼܫܳܢܳܝܶܐ̈܂ ܕܪܽܘܚܳܐ ܠܰܝܬܿ ܠܗܽܘܢ܂
01:20 [ai]	ܐܰܢ̱ܬܿܽܘܢ ܕܹܝܢ ܚܰܒܺܝܒܼܰܝ̈܃ ܒܗܰܝܡܳܢܽܘܬܼܳܐ ܕܺܝܠܟܼܽܘܢ ܩܰܕܿܺܝܫܬܳܐ܂ ܐܶܬܼܒܰܢܰܘ ܡܶܢ ܕܪܺܝܫ ܒܪܽܘܚܳܐ ܩܰܕܿܺܝܫܳܐ܂ ܟܰܕܼ ܡܨܰܠܶܝܢ܂
01:21 [ai]	ܢܰܦܼܫܰܢ ܕܹܝܢ ܒܚܽܘܒܿܳܐ ܕܰܐܠܳܗܳܐ ܢܶܛܰܪ܂ ܟܰܕܼ ܡܣܰܟܿܶܝܢܰܢ ܠܰܚܢܳܢܶܗ ܕܡܳܪܰܢ ܝܶܫܽܘܥ ܡܫܺܝܚܳܐ܃ ܠܚܰܝ̈ܶܐ ܕܺܝܠܰܢ ܕܰܠܥܳܠܰܡ܂
01:22 [ai]	ܘܰܠܡܶܢܗܽܘܢ ܡܰܢ ܡܶܢ ܢܽܘܪܳܐ ܚܛܽܘܦܼܘ܂
01:23 [ai]	ܟܰܕܼ ܕܹܝܢ ܡܶܬܿܬܿܘܶܝܢ܂ ܐܶܬܼܪܰܚܰܡܘ ܥܠܰܝܗܽܘܢ ܒܕܶܚܠܬܼܳܐ܃ ܟܰܕܼ ܣܳܢܶܝܢ ܐܢ̱ܬܿܽܘܢ ܐܳܦܼ ܠܟܼܽܘܬܿܺܝܢܳܐ ܕܡܶܢ ܒܶܣܪܳܐ ܕܰܡܟܼܰܬܿܡܳܐ܂
01:24 [ai]	ܠܗܰܘ ܕܹܝܢ ܕܡܶܫܟܿܰܚ ܕܰܢܢܰܛܰܪ ܠܰܢ ܕܠܳܐ ܫܽܘܪܰܥܬܼܳܐ ܘܰܕܼܠܳܐ ܟܽܘܬܼܡܳܐ܃ ܘܰܢܩܺܝܡ ܕܠܳܐ ܡܽܘܡܳܐ܃
01:25 [ai]	ܒܰܠܚܽܘܕܼܰܘܗ̱ܝ ܐܰܠܳܗܳܐ ܦܳܪܽܘܩܰܢ܂ ܒܝܰܕܼ ܝܶܫܽܘܥ ܡܫܺܝܚܳܐ ܡܳܪܰܢ܃ ܩܕܼܳܡ ܬܶܫܒܿܽܘܚܬܿܶܗ ܒܚܰܕܼܽܘܬܼܳܐ܃ ܠܶܗ ܫܽܘܒܼܚܳܐ ܘܽܐܘܚܕܳܢܳܐ ܘܺܐܝܩܳܪܳܐ ܘܪܰܒܿܽܘܬܼܳܐ܂ ܐܳܦܼ ܗܳܫܳܐ ܘܰܒܼܟܼܽܠܗܽܘܢ ܥܳܠܡܶܐ̈܂ ܐܰܡܺܝܢ܀