The Comprehensive Aramaic Lexicon

001:0001	܂܂܂܂܂܂܂܂܂܂܂܂܂܂܂܂܂‍]‍ ܒܲܫܝܽܘܠ܃
001:0002	ܕܸܐܼܠܽܘܼ ܠܵܐ ܢܦܼܲܠ ܡܝܼ̈ܬܸܐ ܠܵܐ ܩܵܡܼܘ ܕܲܣܚܝܼܦܝܼܢ ܗ̱ܘܲܘ܀
001:0003	ܢܒܝܼܵܐ ܚܲܝܵܐ ܐܲܩܸܦ ܢܲܦܫܸܗ ܠܛܲܠܝܵܐ ܡܝܼܬܵܐ܃
001:0004	ܘܲܐܝܟ ܡܸܫܟܵܢܵܐ ܣܵܡܵܗܿ ܚܠܵܦܲܘܗ̱ܝ ܥܲܕ ܫܵܩܸܠ ܠܵܗܿ܀
001:0005	ܠܵܐ ܡܵܝܽܘܬܵܐ ܡܲܫܟܸܢ ܢܲܦܫܸܗ ܘܦܲܪܩܸܗ ܠܲܐܕܲܡ܃
001:0006	ܘܲܕܢܲܚ ܪܵܐܙܵܐ ܗܲܘ ܕܸܐܼܠܝܼܵܐ ܨܵܪ ܥܲܠ ܛܲܠܝܵܐ܀
001:0007	ܐܬܡܲܫܟܲܢ ܗ̱ܘܵܐ ܒܪܵܐܙܵܐ ܢܒܝܼܵܐ ܥܠܵܗܿ ܕܲܫܠܵܕܵܐ܃
001:0008	ܘܟܸܢ ܦܲܪܩܸܗܿ ܗ̱ܘܵܐ ܟܲܕ ܣܵܡ ܢܲܦܫܸܗ ܬܠܵܬ ܙܲܒ̈ܢܵܬܵܐ܀܀
001:0009	ܘܚܲܘܝܼ ܕܲܐܝܟܲܢ ܣܵܐܸ‍{‍ܿ‍}‍ܡ ܢܲܦܫܸܗ ܒܲܪܐܲܠܵܗܵܐ܃
001:0010	ܝܲܘܡܸ̈ܐ ܬܠܵܬܵܐ ܘܟܸܢ ܫܵܩܸܠ ܠܸܗ ܒܚ̈ܲܝܸܐ ܠܲܐܕܲܡ܀
001:0011	ܐܲܦܸܼܠ ܢܲܦܫܸܗ ܗܲܘܿ ܛܲܢܵܢܵܐ ܥܠܸܝܗܿ ܕܲܫܠܲܕܵܐ܃
001:0012	ܘܩܵܡܼܲܬܸ ܥܲܡܸܗ ܟܲܕ ܩܵܐܸܡ ܗ̱ܘܵܐ ܒܽܐܘܪܚܵܐ ܕܲܬܠܵܬ܀
001:0013	ܗܲܟܵܢܵܐ ܢܦܲܠ ܒܲܪܐܲܠܵܗܵܐ ܥܠܲܘܗ̱ܝ ܥܲܠ ܐܵܕܵܡ܃
001:0014	ܘܲܢܓܲܕ ܢܲܦܫܸܗ ܒܚܲܝܠܵܐ ܕܲܢܩܽܘܡ ܘܵܐܦ ܠܸܗ ܐܲܩܝܼܡ܀
001:0015	ܢܒܝܼܵܐ ܘܡܵܪܸܗ ܒܝܲܕ ܡܲܦܽܘܠܬܵܐ ܠܢܵܦ̈ܠܸܐ ܐܲܩܝܼܡܘ܂
001:0016	ܕܲܨܒܼܲܘ ܢܸܦܼܠܽܘܢ ܕܬܸܗܘܸܐ ܩܝܵܡܬܵܐ ܠܛܲܠܝܵܐ ܘܵܐܕܵܡܼ܀
001:0017	ܒܲܝܬܵܐ ܕܪ̈ܵܐܙܸܐ ܢܸܩܪܝܼܘܗ̱ܝ ܗܵܫܵܐ ܠܒܸܝܬ ܐܲܪܡܲܠܬܵܐ܃
001:0018	ܕܲܡܠܸܐ ܩܝܵܡܬܵܐ ܘܣܲܒܼܥܵܐ ܘܛܘܽܦܣܸ̈ܐ ܕܫܲܪܝܼܪ̈ܵܬܵܐ܀
001:0019	ܒܩܽܘܠܬܵܐ ܕܢܸܒܥܲܬܸ ܦܲܓܪܸܗ ܕܡܵܪܲܢ ܡܸܬܢܲܨܲܪ ܗ̱ܘܵܐ܃
001:0020	ܕܟܽܠܝܽܘܡ ܣܵܓܸܐ ܠܟܽܠ ܕܵܐܟܸܠ ܠܸܗ ܡܸܢ ܦܵܬܽܘܪܸܗ܀
001:0021	ܪܸܫܡܲܬܸ ܩܲܪܢܵܐ ܠܡܲܥܡܽܘܕܝܼܬܵܐ ܕܢܵܒܥܵܐ ܚܲܝܸ̈ܐ܃
001:0022	ܕܡܸܫܚܵܗܿ ܙܲܗܝܵܐ ܠܵܐ ܡܬܽܘܡ ܚܵܣܲܪ ܟܲܕ ܡܵܫܬܲܦܲܥ܀
001:0023	ܨܼܵܪ ܗ̱ܘܵܐ ܡܸܫܚܵܐ ܠܗܵܕܸܐ ܡܥܝܼܢܵܐ ܕܲܡܫܝܼܚܽܘܬܵܐ܃
001:0024	ܕܫܵܩܸܠ ܡܸܢܵܗܿ ܟܽܠܸܗ ܥܵܠܡܵܐ ܘܲܐܝܟ ܕܼܐܝܬܸܝܗܿ ܗܝܼ܀
001:0025	ܘܩܲܡܚܵܐ ܠܦܲܓܪܵܐ ܕܵܐܟܠܝܼܢ ܥܲܡܡܸ̈ܐ ܘܥܵܠ̈ܡܸܐ ܡܸܢܸܗ܃
001:0026	ܘܗܽܘ ܠܵܐ ܡܲܘܦܸܐ ܕܣܲܒܥܵܐ ܗ̱ܽܘ ܪܲܒܵܐ ܠܲܒܢܲܝܢ̈ܵܫܸܐ܀
001:0027	ܐܲܝܟ ܗܵܝܿ ܐܲܢ̱ܬܬܵܐ ܫܼܲܪܝܵܐ ܥܼܕ̱ܬܵܐ ܒܣܲܒܥܵܐ ܝܲܘܡܵܢ܃
001:0028	ܘܗܸܢܽܘܢ ܗܵܠܸܝܢ ܪ̈ܵܐܙܸܐ ܣܲܡܟܽܘܗܿ ܠܗܵܝ ܬܼܐܚܼܸܐ ܗ̱ܘܵܬ܀
001:0029	ܠܒܲܪ ܡܸܢ ܥܼܕ̱ܬܵܐ ܝܲܘܡܵܢ ܚܲܝܸ̈ܐ ܒܥܵܠܡܵܐ ܠܵܐ ܐܝܼܬ܃
001:0030	ܘܠܵܐ ܠܗܵܠ ܣܲܒܥܵܐ ܠܒܲܪ ܡܸܢ ܒܲܝܬܵܗܿ ܕܗܵܝ ܐܸܫܬܵܡܵܗ܀
001:0031	ܒܬܽܘܠܵܐ ܡܲܠܝܼ ܕܽܘܟܲܬܿ ܓܲܒܪܵܗܿ ܕܗܵܝܿ ܐܲܪܡܲܠܬܵܐ܃
001:0032	ܘܲܐܚܝܼ ܐܵܦ ܠܵܗܿ ܘܠ̈ܲܒܢܲܝ ܒܲܝܬܵܗܿ ܒܗܲܘܿ ܡܲܿܙܽܘܢܵܐ܀
001:0033	ܕܡܽܘܬܸܗ ܕܡܵܪܲܢ ܕܲܐܫܼܪܝܼ ܒܥܼܕ̱ܬܸܗ ܣܲܒܥܵܐ ܪܲܒܵܐ܃
001:0034	ܨܼܵܪ ܐܸܠܝܼܵܐ ܕܚܲܙܵܝܵܐ ܗ̱ܘܵܐ ܕܫܲܪܝܼܪ̈ܵܬܵܐ܀
001:0035	ܘܲܒܛܸܠܵܠܵܐ ܕܗܵܠܸܝܢ ܪ̈ܵܐܙܸܐ ܚܝܵܐ ܐܵܦ ܛܲܠܝܵܐ܃
001:0036	ܒܝܲܕ ܐܸܠܝܼܵܐ ܕܲܛܥܸܢ ܨܽܘܪܬܸܗ ܕܒܲܪ ܐܲܠܵܗܵܐ܀
001:0037	ܡܫܲܚ ܗ̱ܘܵܐ ܗܵܟܝܼܠ ܢܲܦܫܸܗ ܢܒܝܼܵܐ ܬܠܵܬ ܙܲܒܢ̈ܵܬܵܐ܃
001:0038	ܘܲܚܼܝܵܐ ܛܲܠܝܵܐ ܘܝܲܗ̱ܒܸܗ ܠܸܐܡܸܗ ܬܸܬܒܲܝܲܐܐ ܒܸܗ܀
001:0039	ܢܦܲܠ ܛܸܠܵܠܵܗܿ ܕܨܽܘܪܬܸܗ ܕܡܵܪܵܢ ܥܲܠ ܗܵܘ ܡܝܼܬܵܐ܃
001:0040	ܘܙܸܠܥܲܬܸ ܚܲܝܸ̈ܐ ܥܠܸܝܗܿ ܕܲܫܠܲܕܵܐ ܠܡܸܬܢܲܚܵܡܽܘ܀
001:0041	ܢܨܲܚ ܐܸܠܝܼܵܐ ܒܕܲܐܪܵܐ ܕܲܥܒܲܕ ܥܲܡ ܐܲܒܕܵܢܵܐ܃
001:0042	ܕܡܸܢ ܒܸܝܬ ܫܸܢܸ̈ܐ ܕܡܲܘܬܵܐ ܫܠܲܕܵܐ ܫܩܼܲܠ ܒܲܛܢܵܢܸܗ܀
001:0043	ܕܠܲܩ ܗ̱ܘܵܐ ܫܪܵܓܵܗܿ ܕܲܡܓܲܙܲܝܬܵܐ ܕܚܸܫܽܘܟܵܐ ܗ̱ܘܵܬ܃
001:0044	ܘܲܢܗܲܪ ܡܸܢܸܗ ܟܽܠܸܗ ܒܲܝܬܵܐ ܕܠܸܗ ܚܵܐܲܪ ܗ̱ܘܵܐ܀
001:0045	ܪܥܸܡ ܒܸܗ ܥܽܘܡܪܵܐ ܒܝܵܪܬܵܐ ܕܲܦܢܵܐ ܠܚܲܝܸ̈ܐ ܚܲܕ̱ܬܸܐ܃
001:0046	ܘܪܸܘܼܙܲܬܸ ܐܲܢ̱ܬܬܵܐ ܒܝܼܚܝܼܕܵܝܵܗܿ ܕܲܐܒܝܼܠܵܐ ܗ̱ܘܵܬ܀
001:0047	ܕܢܲܚ ܢܽܘܚܵܡܵܐ ܒܸܝܬ ܐܲܪܡܲܠܬܵܐ ܚܲܒܝܼܒܵܐܝܼܬ܃
001:0048	ܘܲܐܦܨܲܚ ܐܸܢܽܘܢ ܕܲܟܡܝܼܪܝܼܢ ܗ̱ܘܲܘ ܥܲܠ ܥܲܢܝܼܕܵܐ܀
001:0049	ܫܬܸܩܝ̈ ܝܼ̈ܠܠܵܬܵܐ ܘܒܸܟܝܵܐ ܪܲܒܵܐ ܕܼܐܝܬ ܗ̱ܘܵܐ ܬܲܡܵܢ܃
001:0050	ܘܩܵܠ̈ܲܝ ܫܽܘܒܚܵܐ ܡܸܢ ܟܽܠ ܦܽܘܡ̈ܝܼܢ ܡܸܫܬܲܡܥܝܼܢ ܗ̱ܘܲܘ܀

Page 1 of 21 next page » show all