The Comprehensive Aramaic Lexicon

003:000	ܕܡܵܪܝ ܝܲܥܩܽܘܒ ܡܲܠܦܵܢܵܐ܃ ܕܥܲܠ ܢܵܒܽܘܬ ܐܝܼܙܲܪܥܠܵܝܵ
003:001	ܪܵܚܸܡ ܐ̄ܢܵܫܵܐ ܕܨܵܒܸܐ ܒܚܲܝܸ̈ܐ ܕܲܒܢܲܝܢܵܫܵܐ܃
003:002	ܐܲܙܝܼܥ ܡܸܠܲܬܝ ܥܲܠ ܗܸܓܝܵܢܵܟ ܦܵܪܽܘܫܵܐܝܼܬ܀
003:003	ܡܹܐܡܪܵܐ ܕܫܽܘܦܪܵܐ ܐܲܢ̄ܬ ܗ̄ܽܘ ܡܵܪܲܢ ܠܲܕܪܵܚܸܡ ܠܵܟ܃
003:004	ܐܲܢ̄ܬ ܡܲܠܸܠ ܒܝܼ ܩ̈ܵܠܸܐ ܕܫܵܦܪܝܼܢ ܠܲܐܠܵܗܽܘܬܵܟ܀
003:005	ܠܵܐ ܡܵܪܝ ܢܸܗܘܸܐ ܙܲܘܥܵܗܿ ܕܡܸܠܲܬܝ ܣܲܢܝܲܬ ܟܽܠܵܗܿ܃
003:006	ܘܒܵܟ ܬܸܨܛܲܒܲܬ ܬܸܫܦܲܪ ܟܽܠܝܽܘܡ ܡܸܢ ܦܲܐܝܽܘܬܵܟ܀
003:007	ܥܠܲܝܟ ܐܸܡܲܠܸܠ ܕܡܸܠܬܵܐ ܕܲܥܠܲܝܟ ܠܵܐ ܡܸܣܬܲܒܥܵܐ܃
003:008	ܒܵܟ ܠܵܟ ܐܸܙܡܲܪ ܕܸܐܠܵܐ ܐܸܢ ܒܵܟ ܚܲܝܸ̈ܐ ܠܵܐ ܐܝܼܬ܀
003:009	ܬܸܠܒܲܫ ܡܸܠܬܵܐ ܚܲܝܠܵܐ ܡܸܢܵܟ ܘܲܬܡܲܠܸܠ ܒܵܟ܃
003:010	ܕܸܐܠܵܐ ܒܚܲܝܠܵܟ ܠܵܐ ܐܝܼܬ ܡܸܠܬܵܐ ܕܡܵܛܝܵܐ ܫܲܪܒܵܟ܀
003:011	ܪܚܝܼܡܵܐ ܗ̄ܝ ܡܸܠܬܵܐ ܕܡܲܠܦܵܢܽܘܬܵܐ ܥܲܠ ܦܵܪ̈ܽܘܫܸܐ܃
003:012	ܘܢܽܘܗܪܵܐ ܡܲܠܝܵܐ ܠܲܐܝܢܵܐ ܕܡܲܚܸܒ ܟܲܕ ܫܵܡܲܥ ܠܵܗܿ܀
003:013	ܚܲܝܸ̈ܐ ܕܢܲܦܫܵܐ ܟܬܵܒܸ̈ܐ ܐܸܢܽܘܢ ܐܲܠܵܗܵܝܸ̈ܐ܃
003:014	ܘܕܲܒܗܽܘܢ ܚܵܝܸܐ ܪܵܡܝܼܢ ܚܲܝܲܘ̈ܗ̄ܝ ܡܸܢ ܢܸܟܝ̈ܵܢܸܐ܀
003:015	ܢܽܘܗܪܵܐ ܪܲܒܵܐ ܩܒܸܐ ܒܓܲܘ ܣܸܦܪܵܐ ܕܲܢܒܝܼܽܘܬܵܐ܃
003:016	ܘܲܒܙܲܠܝܼܩܲܘ̈ܗ̄ܝ ܢܵܗܪܵܐ ܢܲܦܫܵܐ ܐܲܝܟ ܒܼܐܝܡܵܡܵܐ܀
003:017	ܦܬܲܚ ܠܲܟܬܵܒܵܐ ܐܵܘ ܦܵܪܽܘܫܵܐ ܟܲܕ ܪܵܚܸܡ ܐܲܢ̄ܬ܃
003:018	ܘܗܽܘ ܡܚܲܘܸܐ ܠܵܟ ܫܽܘܦܪܸ̈ܐ ܚܠܲܝ̈ܵܐ ܕܠܵܐ ܡܸܣܬܲܒܥܝܼܢ܀
003:019	ܐܵܣܲܘ̈ܵܬܵܐ ܕܢܲܦܫܵܐ ܟܪܝܼܗܬܵܐ ܟܬܵܒܸ̈ܐ ܐܸܢܽܘܢ܃
003:020	ܘܦܸܬܓܵܡܲܝ̈ܗܽܘܢ ܐܲܝܟ ܥܸܩܵܪܸ̈ܐ ܛܵܒܸ̈ܐ ܣܝܼܡܝܼܢ܀
003:021	ܗܵܐ ܦܽܘܩܕ̈ܵܢܸܐ ܐܲܝܟ ܣܲܡ̈ܡܵܢܸܐ ܠܽܘܩܒܲܠ ܫܽܘܚܢܸ̈ܐ܃
003:022	ܡܲܕܸܟ ܐܵܣܝܵܐ ܡܠܸܐ ܚܸܟ̈ܡܵܬܵܐ ܘܣܵܡ ܒܲܟܬܵܒܸ̈ܐ܀
003:023	ܠܽܘܩܒܲܠ ܪܸܓܬܵܐ ܕܼܐܝܬܸܝܗܿ ܒܢܲܦܫܵܐ ܫܽܘܚܢܵܐ ܪܲܒܵܐ܃
003:024	ܣܝܼܡ ܦܽܘܩܕܵܢܵܐ ܕܡܸܬܚܲܠܡܵܐ ܒܸܗ ܕܠܵܐ ܠܲܡ ܬܸܪܲܓ܀
003:025	ܘܲܐܝܢܵܐ ܕܗܵܢܵܐ ܥܨܵܒܵܐ ܡܲܣܠܸܐ ܒܡܲܪܥܵܐ ܢܵܦܸܠ܃
003:026	ܘܫܵܪܟܵܐ ܡܚܽܘܬܸܗ ܠܚܲܠܵܕܝܼܬܵܐ ܘܠܵܐ ܡܸܬܚܲܠܡܵܐ܀
003:027	ܠܵܐ ܠܲܡ ܬܸܪܲܓ ܐܲܢ̄ܬܬܸܗ ܕܚܲܒܪܵܟ ܐܵܦܠܵܐ ܬܲܘܪܸܗ܃
003:028	ܐܵܦ ܠܵܐ ܚܡܵܪܸܗ ܘܠܵܐ ܟܽܠܡܸܕܸܡ ܕܲܩܢܸܐ ܚܲܒܪܵܟ܀
003:029	ܐܵܚܵܒ ܡܲܠܟܵܐ ܟܲܪܡܵܐ ܪܲܓ ܗ̄ܘܵܐ ܕܠܲܘ ܕܝܼܠܸܗ ܗ̄ܘܵܐ܃
003:030	ܘܒܸܠܥܲܬ ܢܲܦܫܸܗ ܒܟܼܐܒܵܐ ܕܪܸܓܬܵܐ ܡܲܪܝܼܪܵܐܝܼܬ܀
003:031	ܥܲܠ ܩܸܢܝܵܢܵܐ ܕܚܲܒܪܸܗ ܫܕܵܐ ܗ̄ܘܵܐ ܒܪܸܓܬܵܐ ܥܲܝܢܸܗ܃
003:032	ܘܲܐܝܟ ܟܽܘܪܗܵܢܵܐ ܪܲܒܵܐ ܐܲܚܕܸܗ ܚܲܡܝܼܡܵܐܝܼܬ܀
003:033	ܐܸܠܽܘ ܫܡܲܥ ܗ̄ܘܵܐ ܗܲܘ ܦܽܘܩܕܵܢܵܐ ܕܠܵܐ ܢܸܪܲܓ ܗ̄ܘܵܐ܃
003:034	ܠܵܐ ܢܵܦܸܠ ܗ̄ܘܵܐ ܬܚܸܝܬ ܗܲܘ ܫܽܘܚܢܵܐ ܕܪܸܓܬܵܐ ܕܲܢܦܲܠ܀
003:035	ܐܸܠܽܘ ܩܪܵܐ ܗ̄ܘܵܐ ܒܣܸܦܪܸܗ ܕܡܽܘܫܸܐ ܘܲܫܩܲܠ ܡܸܢܸܗ܃
003:036	ܥܨܵܒܵܐ ܠܟܼܐܒܸܗ ܡܲܚܠܸܡ ܗ̄ܘܵܐ ܠܸܗ ܘܠܵܐ ܡܸܬܚܲܒܲܠ܀
003:037	ܪܸܓܬܵܐ ܬܲܪܥܵܐ ܗ̄ܝ ܕܥܵܐܠܵܐ ܒܝܼܫܬܵܐ ܠܢܲܦܫܵܐ ܡܸܢܵܗܿ܃
003:038	ܕܲܟܡܵܐ ܕܲܐܚܝܼܕ ܐܵܦ ܠܵܐ ܚܛܵܗܵܐ ܠܡܸܢܥܵܐ ܢܵܦܸܩ܀
003:039	ܡܸܢܵܗܿ ܡܫܲܪܸܐ ܚܛܵܗܵܐ ܕܢܸܬܬܨܝܼܪ ܒܲܕܡܽܘܬ ܥܽܘܠܵܐ܃
003:040	ܘܗܝܼ ܒܵܛܢܵܐ ܠܸܗ ܘܲܡܪܲܒܝܵܐ ܠܸܗ ܠܦܼܐܪܵܐ ܒܝܼܫܵܐ܀
003:041	ܪܸܓܬܵܐ ܡܪܲܚܦܵܐ ܘܒܵܪܝܵܐ ܚܛܵܗܸ̈ܐ ܚܲܡܝܼܡܵܐܝܼܬ܃
003:042	ܘܲܡܓܲܫܡܵܐ ܠܗܽܘܢ ܕܢܸܗܘܽܘܢ ܦܼܐܪܸ̈ܐ ܕܡܲܘܬܵܐ ܟܽܠܝܽܘܡ܀
003:043	ܡܸܢܵܗܿ ܡܫܲܪܸܐ ܫܽܘܚܢܵܐ ܕܥܲܘܠܵܐ ܕܢܽܘܡܼܐ ܢܸܐܚܽܘܕ܃
003:044	ܘܲܟܡܵܐ ܕܠܲܝܬܸܝܗܿ ܚܣܝܼܟܵܐ ܗ̄ܝ ܢܲܦܫܵܐ ܡܸܢ ܣܽܘܓܦܵܢܸ̈ܐ܀
003:045	ܐܲܝܟ ܫܲܬܐܸܣܬܵܐ ܗ̄ܝ ܕܲܥܠܸܝܗܿ ܒܵܢܝܵܐ ܒܝܼܫܬܵܐ ܢܲܦܫܵܗܿ܃
003:046	ܘܡܵܐ ܕܠܵܐ ܣܝܼܡܵܐ ܒܢܲܦܫܵܐ ܚܛܵܗܵܐ ܠܵܐ ܩܵܐܸܡ ܒܵܗܿ܀
003:047	ܕܪܵܐܸܓ ܐܲܢ̄ܬܬܵܐ ܓܵܪܵܗܿ ܒܠܸܒܸܗ ܘܸܐܠܵܐ ܡܸܫܟܲܚ܃
003:048	ܒܝܼܫܬܵܐ ܐ̄ܚܪܼܬܵܐ ܐܲܟܒܲܪ ܣܵܥܲܪ ܥܲܡ ܗܵܝ ܕܲܢܓܽܘܪ܀
003:049	ܪܲܓ ܗ̄ܘܵܐ ܐܵܚܵܒ ܕܢܸܣܲܒ ܟܲܪܡܵܐ ܘܲܕܠܵܐ ܐܸܫܟܲܚ܃

Page 1 of 22 next page » show all