← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information
63403: JS-Elijah 4 (Jacob of Saroug: The Fourth Homily on Elijah the Prophet and on the Fire He Brought Down on the Captains)

Click on a word for lexical analysis.
Click on a red-colored coordinate for comments and/or translations of the line
View in Serto
Ask AI about a passage
Hide manuscript variants

Page 1 of 11   (517 lines total)   next page »   show all

004:000 ܕܩܲܕܝܼܫܵܐ ܡܵܪܝ ܝܲܥܩܽܘܒ ܡܹܐܡܪܵܐ ܕܲܐܪܒܲܥ ܕܥܲܠ ܐܸܠܝܼܵܐ ܢܒܝܼܵܐ ܘܥܲܠ ܢܽܘܪܵܐ ܕܲܐܚܸܬ ܥܲܠ ܬܪܸܝܢ ܪܲܘܪ̈ܒܵܢܸܐ ܕܚܲܡܫܝܼܢ܃ ܘܥܲܠ ܚܲܡܫܝܼܢ ܘܚܲܡܫܝܼܢ ܕܥܲܡܗܽܘܢ
004:001 ܬܽܘܒ ܐܸܠܝܼܵܐ ܪܲܒܵܐ ܘܓܲܒܝܵܐ ܒܬܸܗܪܸܗ ܫܲܩܠܲܢܝ܃
004:002 ܗܲܒܠܝܼ ܡܵܪܲܢ ܐܸܬܢܸܐ ܫܽܘܦܪ̈ܲܘܗ̄ܝ ܦܵܪܽܘܫܵܐܝܼܬ܀
004:003 ܗܲܘ ܓܲܢ̄ܒܵܪܵܐ ܠܒܝܼܫ ܙܵܟܽܘܬܵܐ ܒܡܼܐܡܪܸܗ ܢܲܓܕܲܢܝ܃
004:004 ܪܲܒ ܙܲܟܵܝܸ̈ܐ ܐܲܢ̄ܬ ܡܲܠܸܠ ܒܝܼ ܡܸܛܽܠܵܬܸܗ܀
004:005 ܪܵܡ ܓܸܠܝ̈ܵܢܸܐ ܫܒܝܼܚ ܒܲܢܒ̈ܝܼܸܐ ܩܪܵܢܝ ܕܸܐܙܡܲܪ ܠܸܗ܃
004:006 ܒܵܟ ܝܵܗܸܒ ܟܽܠ ܐܸܡܛܸܐ ܠܫܽܘܦܪ̈ܲܘܗ̄ܝ ܪ̈ܽܘܚܵܢܵܝܸܐ܀
004:007 ܪܵܡ ܗ̄ܽܘ ܡܼܐܡܪܸܗ ܡܸܢ ܠܸܫܵܢܵܐ ܒܵܟ ܢܸܬܡܲܠܲܠ܃
004:008 ܘܪܲܒܵܐ ܡܸܠܬܸܗ ܡܸܢ ܣܸܦ̈ܘܵܬܵܐ ܐܲܢ̄ܬ ܐܲܫܡܲܥܸܝܗܿ܀
004:009 ܗܘܝܼ ܠܝܼ ܦܽܘܡܵܐ ܘܡܲܕܥܵܐ ܘܩܵܠܵܐ ܘܗܲܘܢܵܐ ܪܲܒܵܐ
004:010 ܘܟܽܠܗܽܘܢ ܙܲܘܥܸ̈ܐ ܕܡܼܐܡܪܵܗܿ ܕܓܲܒܝܵܐ ܒܵܟ ܢܸܬܢܲܩܫܽܘܢ܀
004:011 ܨܸܒܝܵܢܝ ܒܲܠܚܽܘܕ ܐܸܬܸܠ ܠܵܟ ܡܵܪܝ ܟܲܕ ܣܿܵܓܸܕ ܐ̄ܢܵܐ܃
004:012 ܘܲܐܢ̄ܬ ܡܸܢ ܕܝܼܠܵܟ ܐܲܩܝܼܡ ܡܹܐܡܪܵܐ ܒܟܽܠܗܽܘܢ ܫܽܘܦܪ̈ܲܘܗ̄ܝ܀
004:013 ܕܝܼܠܵܟ ܬܸܗܘܸܐ ܡܸܠܬܵܐ ܘܩܵܠܵܐ ܐܵܦ ܠܸܫܵܢܵܐ܃
004:014 ܚܸܡܬܵܐ ܘܡܲܕܥܵܐ ܘܟܽܠܡܵܐ ܕܬܵܒܲܥ ܡܹܐܡܪܵܐ ܕܝܼܠܵܟ
004:015 ܠܲܘ ܡܸܢܝ ܐܸܠܵܐ ܡܸܢܵܟ ܕܝܼܠܵܟ ܢܸܗܘܸܐ ܫܲܪܒܵܐ܃
004:016 ܕܲܡܠܸܐ ܫܽܘܦܪܸ̈ܐ ܘܝܵܬܪܵܐ ܢܲܦܫܵܐ ܒܬܸܗܪܵܐ ܡܸܢܸܗ܀
004:017 ܐܸܠܽܘ ܡܸܢܝ ܗ̄ܘܵܐ ܡܹܐܡܪܵܐ ܒܦܽܘܡܝ ܕܝܼܠܝ ܐܵܦ ܡܲܣܠܲܝ ܗ̄ܘܵܐ܃
004:018 ܡܸܢܵܟ ܗ̄ܽܘ ܡܵܪܝ ܐܲܢ̄ܬ ܡܲܠܸܠܵܝܗ̄ܝ ܨܹܝܕ ܫܵܡܽܘ̈ܥܸܐ܀
004:019 ܫܽܘܦܪܸܗ ܕܥܲܒܕܵܟ ܒܵܟ ܢܸܬܡܲܠܲܠ ܥܲܬܝܼܪܵܐܝܼܬ܃
004:020 ܠܡܲܢܽܘ ܓܹܝܪ ܐܝܼܬ ܦܽܘܡܵܐ ܕܣܵܦܸܩ ܠܲܫܒܝܼܚ̈ܵܬܸܗ܀
004:021 ܚܲܕ ܐܸܠܝܼܵܐ ܕܼܐܝܬ ܠܸܗ ܫܽܘܦܪܸ̈ܐ ܝܼܚܝܼ̈ܕܵܝܸܐ܃
004:022 ܚܲܕ ܫܲܦܝܼܪܵܐ ܕܫܽܘܦܪܵܐ ܕܕܵܡܸܐ ܠܕܝܼܠܸܗ ܠܵܐ ܐܝܼܬ܀
004:023 ܚܲܕ ܪܲܒ ܚܲܝܠܲܐ ܕܒܲܠܚܽܘܕܲܘܗ̄ܝ ܗ̄ܽܘ ܒܓܲܢ̄ܒܵܪܽܘܬܵܐ܃
004:024 ܚܲܕ ܛܲܢܵܢܵܐ ܕܚܲܒܪܵܐ ܒܫܲܪܒܸܗ ܠܵܐ ܩܢܵܐ ܒܲܐܪܥܵܐ܀
004:025 ܚܲܕ ܨܲܪܵܡܵܐ ܒܬܽܘܠܵܐ ܙܲܗܝܵܐ ܘܪܲܒ ܢܸܨܚܵܢܵܐ܃
004:026 ܡܗܲܝܡܢܵܐ ܪܲܒܵܐ ܘܓܲܒܪܵܐ ܕܫܽܘܦܪܸ̈ܐ ܘܲܡܠܸܐ ܛܽܘܒܸ̈ܐ܀
004:027 ܬܡܝܼܗܵܐ ܒܚܲܝ̈ܠܸܐ ܘܲܒܣܽܘܥܪ̈ܵܢܸܐ ܐܲܠ̈ܵܗܵܝܸܐ܃
004:028 ܓܡܝܼܪܵܐ ܒܡܸ̈ܠܸܐ ܐܵܦ ܒܲܥ̈ܒܵܕܸܐ ܘܲܒܕܽܘܒܵܪܸ̈ܐ܀
004:029 ܢܒܝܼܵܐ ܒܩܽܘܫܬܵܐ ܘܲܒܓܸܠ̈ܝܵܢܸܐ ܚܲܕ ܪܽܘܚܵܢܵܐ܃
004:030 ܩܲܕܝܼܫ ܦܲܓܪܵܐ ܘܲܙܗܸܐ ܢܲܦܫܵܐ ܕܲܒܟܽܠ ܫܲܦܝܼܪ܀
004:031 ܥܠܲܘܗ̄ܝ ܥܲܠ ܗܵܢܵܐ ܚܽܘܒܵܐ ܘܬܸܗܪܵܐ ܡܙܝܼܥ ܠܝܼ ܕܸܐܡܲܪ܃
004:032 ܐܲܝܢܵܐ ܕܡܲܚܸܒ ܢܸܫܡܲܥ ܡܵܕܸܝܢ ܟܲܕ ܬܵܗܲܪ ܒܸܗ܀
004:033 ܡܸܢ ܓܲܠ̈ܝܵܬܸܗ ܕܝܵܗ̈ܒܵܢ ܐܝܼܕܵܐ ܠܬܸܗܪܵܐ ܪܲܒܵܐ܃
004:034 ܢܸܬܝܲܒܲܠ ܐ̄ܢܵܫ ܕܲܒܟܲܣܝ̈ܵܬܸܗ ܕܓܲܒܪܵܐ ܢܚܽܘܪ܀
004:035 ܡܸܢ ܗܵܝ ܕܲܐܝܟܲܢ ܫܵܡܥܵܐ ܗ̄ܘܵܬܸ ܠܸܗ ܒܪܝܼܬܵܐ ܟܽܠܵܗܿ܃
004:036 ܡܸܣܬܲܟܲܠ ܐܲܢ̄ܬ ܟܡܵܐ ܩܲܪܝܼܒ ܗ̄ܘܵܐ ܨܹܝܕ ܐܲܠܵܗܵܐ܀
004:037 ܡܸܢ ܫܽܘܠܛܵܢܵܐ ܕܼܐܝܬ ܗ̄ܘܵܐ ܠܡܸܠܬܸܗ ܥܲܠ ܕܽܘܒܵܪܸ̈ܐ܃
004:038 ܦܫܝܼܩ ܠܵܟ ܕܬܼܐܠܲܦ ܕܪܲܒ ܒܲܝܬܲܐ ܗ̄ܽܘ ܕܲܐܠܵܗܽܘܬܵܐ܀
004:039 ܡܵܐ ܕܚܙܲܝܬܿܲܝܗ̄ܝ ܕܟܽܠܡܽܘܢ ܕܲܒܥܵܐ ܠܡܵܪܝܵܐ ܝܲܗ̄ܒ ܠܸܗ܃
004:040 ܕܲܥ ܡܸܢ ܗܵܕܸܐ ܕܲܟܡܵܐ ܝܲܩܝܼܪ ܥܲܠ ܐܲܠܵܗܵܐ܀
004:041 ܦܩܼܲܕ ܠܲܫܡܲܝܵܐ ܘܸܐܫܬܲܡܥܲܬܸ ܠܸܗ ܐܲܝܟ ܕܲܠܡܵܪܵܐ܃
004:042 ܪܡܲܙ ܠܲܥ̈ܢܵܢܸܐ ܘܲܕܚܼܸܠܝ̈ ܡܸܢܸܗ ܕܠܵܐ ܢܸܬܚ̈ܲܙܝܵܢ܀
004:043 ܡܸܛܪܵܐ ܘܛܲܐܠܵܐ ܥܪܲܩܘ ܡܸܢ ܩܵܠܸܗ ܥܕܲܡܵܐ ܕܲܨܒܵܐ܃
004:044 ܪܓܸܙ ܥܲܠ ܣܲܬܘܵܐ ܘܛܲܪܕܸܗ ܘܫܲܢܝܼ ܡܸܢ ܒܪܝܼܬܵܐ܀
004:045 ܒܪܸܟ ܒܲܨܠܽܘܬܵܐ ܘܲܐܩܝܼܡ ܡܝܼܬܵܐ ܘܝܲܗܒܸܗ ܠܸܐܡܸܗ܃
004:046 ܚܙܵܝܗ̄ܝ ܗ̄ܘܵܐ ܡܲܘܬܵܐ ܘܲܐܪܦܝܼ ܫܠܲܕܵܐ ܕܠܵܐ ܒܲܥܝܵܕܵܐ܀
004:047 ܩܪܵܐ ܗ̄ܘܵܐ ܠܢܽܘܪܵܐ ܘܕܵܠܲܬܸ ܢܸܚܬܲܬܸ ܥܲܠ ܩܽܘܪܒܵܢܸܗ܃
004:048 ܫܡܲܛ ܗ̄ܘܵܐ ܚܲܪܒܵܐ ܘܲܒܪܸܟܘ ܟܽܘܡܪܸ̈ܐ ܬܚܸܝܬ ܣܲܟܝܼܢܸܗ܀
Page 1 of 11   next page »   show all