The Comprehensive Aramaic Lexicon

005:000	ܕܝܼܠܸܗ ܕܩܲܕܝܼܫܵܐ ܘܓܲܒܝܵܐ ܡܵܪܝ ܝܲܥܩܽܘܒ
005:00x	ܕܥܲܠ ܩܲܕܝܼܫܵܐ ܡܵܪܝ ܐܸܠܝܼܵܐ ܢܒܝܼܵܐ ܘܥܲܠ ܡܲܣܲܩܬܸܗ ܕܠܲܫܡܲܝܵܐܿ
005:001	ܡܲܠܸܠ ܒܝܼ ܡܵܪܝ ܥܲܬܝܼܪܵܐܝܼܬ ܠܲܡܥܲܕܵܪܽܘ܃
005:002	ܠܲܐܝܢܵܐ ܕܫܵܡܲܥ ܦܵܪܽܘܫܵܐܝܼܬ ܠܲܡܫܲܒܵܚܽܘ܀
005:003	ܡܠܝܼܢܝ ܝܽܘܠܦܵܢܵܐ ܕܲܡܠܸܐ ܚܲܝܸ̈ܐ ܠܲܕܫܵܡܲܥ ܠܸܗ܃
005:004	ܘܢܸܗܘܸܐ ܠܫܽܘܒܚܵܟ ܦܼܐܪܵܐ ܕܡܸܠܲܬܝ ܝܵܗܸܒ ܚܲܝܸ̈ܐ܀
005:005	ܢܙܝܼܥ ܠܸܫܵܢܝ ܩ̈ܵܠܸܐ ܕܫܽܘܒܚܵܐ ܕܲܡܢܝܼܚܝܼܢ ܠܵܟ܃
005:006	ܘܟܲܟܪܵܐ ܕܢܸܣܒܸܬ ܒܲܥܣܲܪ ܐܲܪܡܝܼܗܿ ܥܲܠ ܦܵܬܽܘܪܵܟ܀
005:007	ܠܵܐ ܡܵܪܝ ܢܸܚܢܽܘܩ ܫܸܬܩܵܐ ܠܡܸܠܲܬܝ ܕܲܡܚܲܦܸܐ ܠܵܗܿ܃
005:008	ܓܠܝܼ ܠܵܗܿ ܐܲܦܸ̈ܝܗܿ ܘܲܐܪܝܼܡ ܩ̈ܵܠܸܝܗܿ ܒܲܙܡܝܼܪ̈ܵܬܵܟ܀
005:009	ܠܘܲܥܕܸܗ ܕܫܲܪܒܵܟ ܬܸܗܘܸܐ ܪܵܗܛܵܐ ܒܚܽܘܒܵܐ ܡܸܠܲܬܝ܃
005:010	ܕܢܸܗܘܸܐ ܐܝܼܬ ܠܵܗܿ ܥܒܵܕܵܐ ܒܒܲܝܬܵܟ ܡܵܐ ܕܡܸܬܕܲܢܚܵܐ܀
005:011	ܬܸܗܘܸܐ ܡܸܠܲܬܝ ܡܫܲܒܚܵܢܝܼܬܵܟ ܒܸܝܬ ܚܲܒܪ̈ܵܬܵܗܿ܃
005:012	ܘܠܵܐ ܬܸܗܘܸܐ ܡܡܲܠܠܵܢܝܼܬܵܐ ܕܠܵܐ ܦܽܘܪܫܵܢܵܐ܀
005:013	ܡܥܲܕܪܵܢܝܼܬܵܐ ܬܸܗܘܸܐ ܡܸܠܲܬܝ ܠܲܕܫܵܡܲܥ ܠܵܗܿ܃
005:014	ܘܠܵܐ ܡܨܲܒܲܬܬܵܐ ܕܲܣܦܝܼܩ ܫܽܘܦܪܵܗܿ ܡܸܢ ܝܽܘܬܪ̈ܵܢܸܐ܀
005:015	ܟܲܕ ܛܵܒ ܣܲܢܝܵܐ ܬܸܗܘܸܐ ܪܚܝܼܡܵܐ ܥܲܠ ܝܽܘܬܪ̈ܵܢܸܝܗܿ܃
005:016	ܘܲܕܠܵܐ ܐܝܼܬ ܠܵܗܿ ܫܽܘܦܪܸ̈ܐ ܬܸܗܘܸܐ ܡܲܠܝܵܐ ܚܽܘܒܵܐ܀
005:017	ܬܸܗܘܸܐ ܕܵܡܝܵܐ ܠܠܲܝܵܐ ܕܣܲܢܝܵܐ ܘܲܦܸܐܝܢ ܝܲܠܕܸ̈ܝܗܿ܃
005:018	ܘܠܲܘ ܐܲܝܟ ܪܵܚܸܝܠ ܬܸܗܘܸܐ ܪܚܝܼܡܵܐ ܘܥܲܩܪܵܐ ܡܸܠܲܬܝ܀
005:019	ܗܘܝܼ ܠܵܗܿ ܦܼܐܪܵܐ ܐܲܝܟ ܕܲܠܠܲܝܵܐ ܒܲܪܒܸܝܥܵܝܵܐ܃
005:020	ܘܡܸܛܽܠܵܬܵܟ ܬܸܗܘܸܐ ܡܩܲܒܠܵܐ ܣܢܝܼܬܵܐ ܡܸܠܲܬܝ܀
005:021	ܠܵܟ ܡܵܪܝ ܬܼܐܠܲܕ ܒܫܲܪ̈ܒܸܐ ܘܡܼܐܡܪܸ̈ܐ ܘܲܙܡܝܼܪ̈ܵܬܵܐ܃
005:022	ܕܟܲܕ ܛܵܒ ܣܲܢܝܵܐ ܬܸܗܘܸܐ ܪܚܝܼܡܵܐ ܒܵܟ ܫܵܦܝܼܪܵܐ܀
005:023	ܝܲܠܕܸ̈ܝܗܿ ܕܠܲܝܵܐ ܡܲܦܸܐܝܢ ܗ̄ܘܲܘ ܠܵܗܿ ܟܲܕ ܣܲܢܝܵܐ ܗ̄ܘܵܬ܃
005:024	ܘܡܸܛܽܠܵܬܵܟ ܬܸܫܦܲܪ ܡܸܠܲܬܝ ܕܲܛܥܝܼܢܵܐ ܠܵܟ܀
005:025	ܒܚܸܒ̈ܠܸܐ ܕܚܽܘܒܵܟ ܢܼܐܠܕܵܟ ܠܸܫܵܢܝ ܥܲܠ ܡܲܫܡܲܥܬܵܐ܃
005:026	ܘܲܐܢ̄ܬ ܡܸܢ ܣܸܦ̈ܘܵܬܝ ܐܲܘܠܸܕ ܝܵܬܵܟ ܨܹܝܕ ܫܵܡܽܘ̈ܥܸܐ܀
005:027	ܐܲܢ̄ܬ ܗܽ̄ܘ ܡܹܐܡܪܵܐ ܕܲܡܠܸܐ ܫܽܘܦܪܸ̈ܐ ܠܲܕܫܵܡܲܥ ܠܸܗ܃
005:028	ܐܲܢ̄ܬ ܗܽ̄ܘ ܩܵܠܵܐ ܕܲܡܠܸܐ ܚܲܝܸ̈ܐ ܠܲܕܨܵܐܸܬ ܠܸܗ܀
005:029	ܐܲܢ̄ܬ ܗܽ̄ܘ ܡܸܠܬܵܐ ܕܟܽܠܵܗܿ ܢܽܘܗܪܵܐ ܠܲܕܢܵܩܸܦ ܠܵܗܿ܃
005:030	ܐܲܢ̄ܬ ܗܽ̄ܘ ܫܲܪܒܵܐ ܕܲܕܗܵܪܸܓ ܒܸܗ ܚܲܝܸ̈ܐ ܡܸܫܟܲܚ܀
005:031	ܐܸܠܵܐ ܚܵܪ ܒܵܟ ܗܲܘܢܵܐ ܠܵܐ ܢܗܲܪ ܕܲܢܡܲܠܸܠ ܠܵܟ܃
005:032	ܘܸܐܠܵܐ ܫܲܩܠܵܟ ܡܲܕܥܵܐ ܒܥܽܘܒܸܗ ܠܵܐ ܙܵܡܲܪ ܠܵܟ܀
005:033	ܐܵܦܠܵܐ ܢܲܦܫܵܐ ܡܙܝܼܥܵܐ ܡܼܐܡܪܵܟ ܒܸܠܥܵܕ ܚܽܘܒܵܐ܃
005:034	ܘܠܵܐ ܚܽܘ̈ܫܵܒܸܐ ܠܘܲܥܕܵܟ ܪܵܦܬܝܼܢ ܕܠܵܐ ܡܲܘܗܲܒܬܵܟ܀
005:035	ܡܸܠܬܵܐ ܕܦܽܘܡܵܐ ܘܫܸܡܥܵܐ ܕܸܐܕܢܵܐ ܕܝܼܠܵܟ ܐܸܢܽܘܢ܃
005:036	ܨܲܘܬܵܐ ܘܩܵܠܵܐ ܥܠܲܝܟ ܗܽ̄ܘ ܣܡܝܼܟܝܼܢ ܒܸܐܣܟܼܡܲܝ̈ܗܽܘܢ܀
005:037	ܡܵܐ ܕܚܵܪܲܬ ܒܵܟ ܢܲܦܫܵܐ ܢܸܗܪܲܬ ܠܲܡܡܲܠܵܠܽܘ܃
005:038	ܘܸܐܢ ܐܸܬܓܲܢܝܲܬ ܡܸܢܵܟ ܚܸܫܟܲܬ ܘܲܐܚܕܵܗܿ ܫܸܬܩܵܐ܀
005:039	ܒܵܟ ܚܵܝܪܝܼܢ ܗ̄ܘܲܘ ܟܼܐܢܸ̈ܐ ܕܲܢܗܲܪܘ ܒܲܥܒܵܕܲܝ̈ܗܽܘܢ܃
005:040	ܐܵܦ ܙܲܕܝܼ̈ܩܸܐ ܕܲܢܨܲܚܘ ܒܲܐܪܥܵܐ ܣܽܘܥܪ̈ܵܢܲܝܗܽܘܢ܀
005:041	ܠܵܟ ܒܵܥܸܝܢ ܗ̄ܘܲܘ ܒܲܡܝܲܬܪܽܘܬܵܐ ܕܲܩܢܽܘ̈ܡܲܝܗܽܘܢ܃
005:042	ܕܲܢܙܲܝܚܽܘܢܵܟ ܥܲܠ ܢܲܩܕܽܘܬܵܐ ܕܚܽܘܫܵܒܲܝ̈ܗܽܘܢ܀
005:043	ܡܸܛܽܠܵܬܵܟ ܡܸܨܛܲܠܠܝܼܢ ܗ̄ܘܲܘ ܪܸ̈ܥܝܵܢܲܝܗܽܘܢ܃
005:044	ܕܡܵܐ ܕܸܐܙܕܲܗܝܼܘ ܢܸܚܙܽܘܢ ܫܽܘܦܪܵܟ ܕܲܕܠܵܐ ܣܵܟܵܐ ܗ̄ܘ܀
005:045	ܡܸܛܽܠܵܬܵܟ ܩܵܡ ܐܸܠܝܼܵܐ ܒܲܒܬܽܘܠܽܘܬܵܐ܃
005:046	ܕܢܸܗܘܸܐ ܦܫܝܼܩ ܠܸܗ ܕܲܢܚܽܘܪ ܢܸܚܙܸܝܟ ܡܸܢ ܕܲܟܝܽܘܬܵܐ܀
005:047	ܐܸܙܕܲܗܝܼ ܗ̄ܘܵܐ ܕܡܵܐ ܕܛܵܥܸܢ ܠܵܟ ܥܲܠ ܚܽܘܫܵܒܲܘ̈ܗ̄ܝ܃
005:048	ܒܕܲܟܝܽܘܬ ܠܸܒܵܐ ܬܸܨܒܸܐ ܠܘܵܬܸܗ ܠܲܡܟܲܬܵܪܽܘ܀

Page 1 of 15 next page » show all