← Back
The Comprehensive Aramaic Lexicon
← Return to the Text Browser
click on the file description for more information
63404: JSBhom 8: on the baptism of Jesus in the Jordan

Click on a word for lexical analysis.
Click on a red-colored coordinate for comments and/or translations of the line
View in Serto
Ask AI about a passage
Hide manuscript variants

Page 1 of 11   (534 lines total)   next page »   show all

008:0000 ܕܝܼܠܸܗ ܟܲܕܼ ܕܝܼܠܸܗ ܕܩܲܕܝܼܫܵܐ ܡܵܪܝ ܝܲܥܩܽܘܒܼ ܕܥܲܠ ܥܡܵܕܼܸܗ ܕܦܵܪܽܘܩܲܢ ܕܲܒܼܝܽܘܪܕܢܵܢ
008:0001 ܚܲܬܼܢܵܐ ܡܫܝܼܚܵܐ ܚܠܽܘܠܵܐ ܥܒܲܕܼ ܠܵܗܿ ܠܥܼܕܲܬܼ ܥܲܡܡܸ̈ܐ܃
008:0002 ܘܲܒܼܡܸܫܬܿܽܘܬܼܵܐ ܕܲܐܬܼܩܲܢ ܗ̱ܘܵܐ ܠܵܗܿ ܥܵܠܡܵܐ ܐܲܪܓܸܫ܀
008:0003 ܒܲܪ ܡܲܠܟܿܽܘܬܼܵܐ ܨܒܼܵܐ ܗ̱ܘܵܐ ܕܢܸܡܟܿܽܘܪ ܠܲܡܛܲܪܲܦܬܵܐ܃
008:0004 ܘܫܲܕܪܵܗܿ ܕܬܼܐܙܲܠ ܨܸܝܕܼ ܡܲܒܿܽܘܥܵܐ ܕܲܬܼܫܝܼܓ ܚܸܠܵܗܿ܀
008:0005 ܚܙܵܗܿ ܠܲܪܕܝܼܦܬܵܐ ܕܲܡܚܝܼܠܵܐ ܗ̱ܘܵܬܼ ܢܲܚܒܵܐ ܘܠܲܐܝܵܐ܃
008:0006 ܘܲܡܙܲܓ ܡܲܝ̈ܵܐ ܘܫܲܕܪܵܗܿ ܕܬܸܣܚܸܐ ܘܟܸܢ ܡܸܬܼܡܲܟܼܪܵܐ܀
008:0007 ܚܵܪ ܒܸܗ ܒܫܽܘܦܪܵܗܿ ܕܸܐܫܬܲܢܝܼ ܗ̱ܘܵܐ ܒܥܸܛܪܵܐ ܕܨܲܠܡܸ̈ܐ܃
008:0008 ܘܲܙܠܲܚ ܫܸܦ̈ܥܸܐ ܕܢܲܗܪܵܐ ܒܲܐܦܸܝ̈ܗܿ ܕܢܸܫܦܲܪ ܓܲܘܢܵܗܿ܀
008:0009 ܠܡܲܝ̈ܵܐ ܒܚܝܼܪܸ̈ܐ ܐܲܚܬܼܵܗܿ ܠܽܘܩܕܲܡ ܟܲܕܼ ܡܵܟܲܪ ܠܵܗܿ܃
008:0010 ܕܲܠܙܵܢܝܽܘܬܼܵܐ ܢܸܡܪܽܘܩ ܡܸܢܵܗܿ ܒܩܲܕܝܼܫܽܘܬܼܵܐ܀
008:0011 ܟܵܪ ܒܵܗܿ ܪܝܼܚܵܐ ܗܲܘܿ ܕܲܣܘܵܬܼܵܐ ܕܡܸܢ ܕܸܒܼ̈ܚܵܬܼܵܐ܃
008:0012 ܘܲܐܥܒܲܪ ܥܠܸܝܗܿ ܡܲܝ̈ܵܐ ܢܲܩ̈ܕܸܐ ܕܢܸܒܼܣܲܡ ܓܽܘܫܡܵܗܿ܀
008:0013 ܐܸܣܬܲܪܝܲܬܸ ܗ̱ܘܵܬܼ ܡܸܢ ܙܲܗܡܽܘܬܼܵܐ ܕܲܥ̈ܠܲܘܵܬܼܵܐ܃
008:0014 ܘܪܲܣ ܒܵܗܿ ܩܽܘܕܼܫܵܐ ܕܬܸܬܼܢܲܩܲܕܼ ܒܸܗ ܡܸܢ ܛܲܡܐܽܘܬܼܵܐ܀
008:0015 ܣܵܡ ܗ̱ܘܵܐ ܒܥܽܘܒܵܐ ܕܡܲܥܡܽܘܕܼܝܼܬܼܵܐ ܐܸܣܛܲܠ ܫܽܘܒܼܚܵܐ܃
008:0016 ܘܫܲܕܪܵܗܿ ܠܟܲܠܬܼܵܐ ܕܬܸܚܽܘܬܼ ܬܸܠܒܲܫ ܡܸܢ ܓܲܘ ܡܲܝ̈ܵܐ܀
008:0017 ܩܪܵܐ ܠܫܲܪܝܼܪܸܗ ܒܲܪ ܥܲܩܪܽܘܬܵܐ ܘܫܲܕܪܸܗ ܩܽܘܕܼܡܲܘܗܝ܃
008:0018 ܕܢܼܐܙܲܠ ܢܲܘܒܸܿܠ ܨܸܒܼܬܼܵܐ ܠܟܲܠܬܼܵܐ ܥܲܕܼ ܐܵܬܸܐ ܗܽܘ܀
008:0019 ܢܦܲܩ ܝܽܘܚܲܢܵܢ ܘܲܛܥܝܼܢ ܥܽܘܬܼܪܵܐ ܕܓܲܙܵܐ ܪܲܒܵܐ܃
008:0020 ܕܲܢܨܲܒܸܬܼ ܗ̱ܘܵܐ ܒܲܪ̱ܬܼ ܡܸܣ̈ܟܿܝܼܢܸܐ ܐܲܝܟܼ ܕܸܐܬܼܦܲܩܲܕܼ܀
008:0021 ܫܩܲܠ ܗ̱ܘܵܐ ܦܲܬܼܚܵܗܿ ܠܥܲܝܒܵܐ ܕܪܽܘܚܵܐ ܠܥܸܠ ܡܸܢ ܡܲܝ̈ܵܐ܃
008:0022 ܘܲܐܦܸܩ ܢܲܚ̈ܬܸܐ ܕܬܸܠܒܲܫ ܥܼܕܬܵܐ ܒܩܲܕܝܼܫܽܘܬܼܵܐ܀
008:0023 ܚܲܘܝܼ ܗ̱ܘܵܐ ܠܵܗܿ ܢܲܚ̈ܬܸܐ ܬܡܝܼ̈ܗܸܐ ܕܠܵܐ ܚܙܸܝܢ ܗ̱ܘܲܘ ܠܵܗܿ܃
008:0024 ܕܲܒܼܗܲܘ ܢܲܘܠܵܐ ܕܒܸܝܬܼ ܐܲܠܵܗܵܐ ܐܸܬܼܥܲܬܲܕܼܘ ܗ̱ܘܲܘ܀
008:0025 ܫܒܼܵܗܿ ܒܲܣܘܵܕܸܗ ܫܲܓܽܘܫܬܼܵܢܵܐ ܛܥܝܼܢ ܫܽܘܘ̈ܕܵܝܸܐ܃
008:0026 ܟܲܕܼ ܡܲܟܼܪܸܙ ܠܵܗܿ ܠܒܲܪ̱ܬܼ ܚܵܕܼܽܘܪܸ̈ܐ ܡܲܠܟܿܽܘܬܼ ܪܲܘܡܵܐ܀
008:0027 ܗܵܐ ܡܲܠܟܿܽܘܬܼܵܐ ܩܸܪܒܲܬܸ ܠܵܗܿ ܠܲܡ ܗܵܝ ܕܲܫܡܲܝܵܐ܃
008:0028 ܙܵܚ ܠܸܗ ܚܲܬܼܢܵܐ ܕܢܼܐܬܸܐ ܠܘܵܬܸܟܼܝ ܕܬܸܬܼܚܲܕܸܝܢ ܒܸܗ܀
008:0029 ܩܪܵܗܿ ܠܲܛܠܝܼܬܼܵܐ ܘܝܸܗܒܲܬܸ ܢܲܦܼܫܵܗܿ ܠܡܸܨܛܲܒܵܬܼܽܘ܃
008:0030 ܕܝܸܠܦܲܬܸ ܗ̱ܘܵܬܼ ܠܵܗܿ ܕܚܲܬܼܢܵܐ ܡܲܠܟܲܐ ܗ̱ܘ ܕܵܐܬܸܐ ܨܸܐܕܸܝܗܿ܀
008:0031 ܩܪܵܬܸ ܠܸܐܫܲܥܝܵܐ ܕܬܼܐܠܲܦ ܡܸܢܸܗ ܥܲܠ ܝܽܘܚܲܢܵܢ܃
008:0032 ܕܡܲܢܽܘ ܗܵܢܵܐ ܕܲܡܣܲܒܲܪ ܠܝܼ ܡܲܠܟܿܽܘܬܼ ܪܲܘܡܵܐ܀
008:0033 ܬܵܐ ܠܵܟܼ ܢܒܼܝܼܵܐ ܬܵܐ ܦܲܫܸܩ ܠܝܼ ܥܲܠ ܟܵܪܽܘܙܵܐ܃
008:0034 ܕܲܣܢܝܼܩܵܐ ܐ̱ܢܵܐ ܕܡܸܢܵܟܼ ܐܼܠܲܦ ܫܲܪܝܼܪܵܐܝܼܬܼ܀
008:0035 ܡܩܲܒܠܵܐ ܐ̱ܢܵܐ ܠܸܗ ܠܩܵܠܵܟܼ ܕܝܼܠܵܟܼ ܕܲܚܠܵܦܲܝ ܗ̱ܽܘ܃
008:0036 ܫܡܝܼܥ ܗ̱ܽܘ ܠܝܼ ܓܹܝܪ ܡܼܐܡܪܸܗ ܕܫܲܪܒܵܟܼ ܗܵܐ ܡܸܢ ܢܽܘܓܪܵܐ܀
008:0037 ܐܲܢ̱ܬܿ ܐܲܬܼܟܸܠܬܲܢܝ ܥܲܠ ܦܽܘܢܵܝܵܐ ܒܲܢܒܼܝܼܽܘܬܼܵܟܼ܃
008:0038 ܬܵܐ ܚܙܝܼ ܕܲܠܡܵܐ ܡܛܵܐ ܠܸܗ ܙܲܒܼܢܵܐ ܕܥܵܐܠܵܐ ܐ̱ܢܵܐ ܒܸܗ܀
008:0039 ܚܙܝܼ ܡܵܐ ܛܸܒܸܗ ܕܗܵܢܵܐ ܕܡܲܟܼܪܸܙ ܝܲܩܝܼܪ̈ܵܬܼܵܐ܃
008:0040 ܟܲܕܼ ܗܽܘ ܩܢܽܘܡܸܗ ܡܸܣܟܝܼܢܽܘܬܼܵܐ ܡܸܬܼܚܲܙܝܵܐ ܒܸܗ܀
008:0041 ܡܣܲܪܲܩ ܚܸܙܘܸܗ ܘܥܲܬܿܝܼܪ ܩܵܠܵܐ ܕܟܼܵܪܽܘܙܽܘܬܸܗ܃
008:0042 ܒܨܝܼܪ ܐܸܣܟܝܼܡܸܗ ܘܪܲܒܵܐ ܡܸܠܬܸܗ ܒܸܐܕܢܲܝ̈ ܟܽܠܢܵܫ܀
008:0043 ܠܲܘ ܒܲܡܫܽܘܚܬܸܗ ܡܡܲܠܸܠ ܓܲܒܼܪܵܐ ܡܸܢ ܕܲܚܙܝܼܬܸܗ܃
008:0044 ܘܠܲܘ ܐܲܟܼܘܵܬܸܗ ܒܨܝܼܪ ܫܽܘܘܕܵܝܵܐ ܕܙܵܪܲܥ ܒܸܐܕܼܢܲܝ̈܀
008:0045 ܡܲܘܪܸܒܼ ܡܸܠܬܸܗ ܟܲܕܼ ܗܽܘ ܠܲܓܡܵܪ ܠܵܐ ܩܢܸܐ ܡܸܕܸܡ܃
008:0046 ܦܵܗܸܐ ܒܚܽܘܪܒܵܐ ܘܲܡܣܲܒܲܪ ܠܝܼ ܡܲܠܟܿܽܘܬܼ ܪܲܘܡܵܐ܀
008:0047 ܐ̱ܡܲܪ ܠܝܼ ܢܒܝܼܵܐ ܐܸܢ ܫܲܪܝܼܪ ܗ̱ܽܘ ܐܸܫܡܲܥ ܡܸܠܲܘܗ̈ܝ܃
008:0048 ܘܸܐܢ ܠܵܐ ܫܲܪܝܼܪ ܠܵܐ ܐܸܛܥܸܐ ܒܸܗ ܐܲܝܟܼ ܕܲܒܼܫܲܪܟܵܐ܀
008:0049 ܡܵܪܵܟܼ ܐܵܬܸܐ ܘܲܡܛܲܝܒܵܐ ܐ̱ܢܵܐ ܐܸܥܽܘܠ ܩܽܘܕܼܡܲܘܗܝ܃
Page 1 of 11   next page »   show all