← Back
The Comprehensive Aramaic Lexicon
← Return to the Text Browser
click on the file description for more information
63404: JSBhom 18: on Palm Sunday

Click on a word for lexical analysis.
Click on a red-colored coordinate for comments and/or translations of the line
View in Serto
Ask AI about a passage
Hide manuscript variants

Page 1 of 7   (306 lines total)   next page »   show all

018:000 ܬܽܘܒܼ ܡܹܐܡܪܵܐ ܕܥܲܠ ܚܲܕܼ ܒܫܲܒܵܐ ܕܽܐܘܫܲܥ̈ܢܸܐ ܕܲܐܡܝܼܪ ܠܡܵܪܝ ܝܲܥܩܽܘܒ
018:001 ܢܸܒܼܥܵܐ ܕܚܲܝܸ̈ܐ ܕܸܐܫܬܝܼܘ ܡܸܢܸܗ ܡܝܼ̈ܬܼܸܐ ܘܲܚܝܲܘ܃
018:002 ܬܪܽܘܥ ܠܝܼ ܢܲܦܼܫܵܟܼ ܐܲܦܝܼܓܼ ܨܲܗܝܽܘܬܼܝ ܡܸܢ ܡܲܒܽܘܥܵܟܼ܀
018:003 ܫܸܩܝܵܐ ܕܲܪܕܵܐ ܒܲܐܪܥܵܐ ܨܗܝܼܬܼܵܐ ܘܦܼܐܪܸ̈ܐ ܝܸܗܒܲܬܼܸ܃
018:004 ܐܸܫܬܸܐ ܡܸܢܵܟܼ ܘܸܐܩܥܸܐ ܒܓܸܠܝܵܐ ܟܡܵܐ ܒܲܣܝܼܡ ܐܲܢ̄ܬ܀
018:005 ܒܼܪܵܐ ܚܕܲܬܵܐ ܕܢܲܩܪܽܘܗܿ ܒܪ̈ܽܘܡܚܸܐ ܥܲܠ ܓܵܓܼܽܘܠܬܵܐ܃
018:006 ܣܲܩܝ ܗܲܒܼܝ ܫܸܩܝܵܐ ܠܪܸܥܝܵܢܝ ܕܲܣܢܝܼܩ ܥܲܠ ܡܲܒܽܘܥܸܟܼܝ܀
018:007 ܒܲܪ ܐܲܠܵܗܵܐ ܕܲܩܪܵܐ ܢܲܦܼܫܸܗ ܡܲܝ̈ܵܐ ܚܲܝܸ̈ܐ܃
018:008 ܗܲܒܼ ܠܝܼ ܐܸܫܬܸܐ ܘܸܐܣܒܲܥ ܡܸܢܵܟܼ ܘܸܐܡܲܠܸܠ ܠܵܟܼ܀
018:009 ܢܸܒܼܥܵܐ ܕܲܢܚܸܬܼ ܡܸܢ ܪܝܼܫܝܼܬܼܵܐ ܕܪܲܘܡܵܐ ܠܲܐܪܥܵܐ܃
018:010 ܒܫܸܩܝܵܟܼ ܬܲܘܥܸܐ ܬܲܪܥܝܼܬܼܝ ܦܼܐܪܸ̈ܐ ܕܫܽܘܒܼܚܵܐ ܠܲܐܒܼܽܘܟܼ܀
018:011 ܗܲܒܼ ܠܝܼ ܐܼܡܪܵܟܼ ܠܲܘ ܐܸܣܲܝܟܵܟܼ ܕܲܕܼܠܵܐ ܣܵܟܼ ܐܲܢ̄ܬ܃
018:012 ܐܸܠܵܐ ܐܲܟܼܪܸܙ ܠܲܕܫܵܡܲܥ ܠܝܼ ܕܠܵܐ ܡܸܬܕܲܪܟܲܬܿ܀
018:013 ܡܲܢ ܓܹܝܪ ܡܲܕܪܸܟܼ ܢܼܐܡܪܵܟܼ ܡܵܪܲܢ ܐܲܝܟܼ ܡܵܐ ܕܼܐܝܬܲܝܟ܃
018:014 ܐܸܠܵܐ ܚܽܘܒܵܐ ܕܪܵܡ ܗ̄ܽܘ ܫܲܪܒܸܗ ܡܸܢ ܡ̈ܲܠܵܠܸܐ܀
018:015 ܟܡܵܐ ܕܼܐܝܬܼ ܐܲܬܼܪܵܐ ܠܚܽܘܒܵܐ ܢܡܲܠܸܠ ܥܲܠ ܓܸܠܝܵܢܵܟܼ܃
018:016 ܗܲܒܼ ܠܝܼ ܡܸܠܬܼܵܐ ܕܬܼܵܢܝܵܐ ܫܽܘܦܪܵܐ ܕܡܲܟܝܼܟܼܽܘܬܼܵܟܼ܀
018:017 ܡܸܢ ܡܲܪܟܲܒܼܬܼܵܐ ܠܥܝܼܠܵܐ ܫܼܐܝܠܵܐ ܒܲܪ ܐܲܬܵܢܵܐ܃
018:018 ܐܲܚܬܼܵܟܼ ܚܽܘܒܵܟܼ ܘܡܲܢ ܣܵܦܸܩ ܠܵܟܼ ܢܬܲܢܸܐ ܫܲܪܒܵܟܼ܀
018:019 ܡܸܢ ܠܸܓܼܝܽܘܢܵܐ ܗܵܝ ܕܲܟܼܪ̈ܽܘܒܸܐ ܕܠܵܐ ܡܸܬܼܒܲܨܝܵܐ܃
018:020 ܪܟܼܽܘܒܼܵܐ ܡܡܲܟܟܼܵܐ ܙܲܝܚܵܟ ܒܲܐܬܼܪܲܢ ܘܲܐܝܟܲܢ ܐܲܘܦܸܝܟܼ܀
018:021 ܡܸܢ ܒܸܝܬܼ ܓܝܼ̈ܓܼܠܸܐ ܘܲܐܦܸ̈ܐ ܘܓܸܦܸ̈ܐ ܕܫܲܠܗܸܒܼܝܼܬܼܵܐ܃
018:022 ܫܲܩܠܽܘܟܼ ܪ̈ܲܚܡܸܐ ܘܗܵܐ ܡܙܲܝܲܚ ܠܵܟܼ ܒܲܪ ܐܲܬܵܢܵܐ܀
018:023 ܡܸܢ ܪܲܒܽܘܬܼܵܐ ܗܵܝ ܕܲܬܼܪܽܘܢܽܘܣ ܕܲܡܠܸܐ ܢܽܘܗܪܵܐ܃
018:024 ܠܲܙܥܽܘܪܽܘܬܼܵܐ ܕܲܦܫܝܼܛ ܚܽܘܒܵܗܿ ܥܲܡ ܝܲܠܽܘܕܸ̈ܐ܀
018:025 ܡܸܢ ܗܲܘ ܚܲܨܵܐ ܕܲܡܠܸܐ ܥܲܝ̈ܢܸܐ ܟܲܕ ܡܸܬܼܟܲܪ̈ܟܵܢ܃
018:026 ܠܗܵܢܵܐ ܪܟܼܽܘܒܼܵܐ ܕܲܕܫܝܼܛ ܡܸܢܸܗ ܒܥܵܠܡܵܐ ܠܵܐ ܐܝܼܬܼ܀
018:027 ܡܸܢ ܒܸܝܬܼ ܣܸܕܪܸ̈ܐ ܘܓܽܘ̈ܕܸܐ ܕܩܵܝ̈ܡܵܢ ܡܸܢ ܓܲܘܙܲܠܬܵܐ܃
018:028 ܠܟܸܢܫܵܐ ܙܥܽܘܪܵܐ ܕܲܛܥܝܼܢ ܣܲܘ̈ܟܸܐ ܒܫܽܘ̈ܩܲܝ ܨܸܗܝܽܘܢ܀
018:029 ܐܲܝܟܵܐ ܗܵܫܵܐ ܢܡܲܠܸܠ ܫܲܪܒܵܟܼ ܗܲܘ ܕܲܡܡܲܠܸܠ܃
018:030 ܘܒܲܐܝܢܵܐ ܐܲܬܼܪܵܐ ܢܼܐܡܪܵܟܼ ܦܽܘܡܵܐ ܐܸܢ ܐܵܡܲܪ ܠܵܟܼ܀
018:031 ܗܵܐ ܒܡܲܪܟܲܒܬܼܵܐ ܡܲܓܼܗܲܪ ܙܝܼܘܵܟܼ ܠܲܫܡܲܝܵܢܸ̈ܐ܃
018:032 ܘܚܲܠܵܫ ܘܲܣܢܸܐ ܥܝܼܠܵܐ ܕܛܲܥܢܵܟܼ ܒܸܝܬܼ ܐܲܪ̈ܥܵܢܸܐ܀
018:033 ܐܲܢ̄ܬ ܡܸܬܼܒܲܪܲܟܼ ܒܙܲܘܥܵܐ ܕܓܝܼ̈ܓܠܸܐ ܡܲܠܵܠ̈ܵܬܼܵܐ܃
018:034 ܘܲܐܢ̄ܬ ܡܸܫܬܲܒܲܚ ܒܣܲܘ̈ܟܸܐ ܕܕܸܩ̈ܠܸܐ ܒܲܟܼܢܽܘ̈ܫܵܬܼܵܐ܀
018:035 ܠܥܸܠ ܐܲܢ̄ܬ ܘܲܠܬܲܚܬ ܘܲܒܼܪܲܒܽܘܬܼܵܐ ܘܒܲܙܥܽܘܪܽܘܬܼܵܐ܃
018:036 ܒܪܲܘܡܵܐ ܘܥܽܘܡܩܵܐ ܡܲܢ ܡܲܘܦܸܐ ܠܵܟܼ ܠܲܡܡܲܠܵܠܽܘ܀
018:037 ܥܲܡܲܢܽܘܐܸܝܠ ܡܸܛܽܠܵܬܲܢ ܐܲܟܼܘܵܬܲܢ ܐܲܢ̄ܬ܃
018:038 ܘܥܲܡ ܝܵܠܽܘܕܵܟܼ ܡܸܛܽܠܵܬܸܗ ܠܸܗ ܗ̄ܽܘ ܕܵܡܸܝܬܿ܀
018:039 ܗܵܐ ܡܒܲܪܟܼܝܼܢ ܠܵܟܼ ܟܪ̈ܽܘܒܲܝ ܢܽܘܪܵܐ ܒܪ̈ܽܘܚܵܦܲܝܗܽܘܢ܃
018:040 ܘܲܡܫܲܒܚܝܼܢ ܠܵܟܼ ܐܵܦ ܝܲܠܽܘܕܸ̈ܐ ܒܽܐܘܫܲܥܢܲܝ̈ܗܽܘܢ܀
018:041 ܟܽܠ ܐܲܬܼܪ̈ܲܘܵܢ ܗܵܐ ܡܙܲܝܚܝܼܢ ܠܵܟܼ ܒܸܐܣܟܼܡܲܝ̈ܗܽܘܢ܃
018:042 ܪܲܘܡܵܐ ܒܢܽܘܗܪܸܗ ܘܥܽܘܡܩܵܐ ܒܣܲܘ̈ܟܸܐ ܕܡܸܢ ܐܝܼܠܵܢܲܘ̈ܗܝ܀
018:043 ܠܥܸܠ ܥܲܙܝܼܙܵܐ ܕܕܵܚܠܵܐ ܡܸܢܸܗ ܫܲܠܗܸܒܼܝܼܬܼܵܐ܃
018:044 ܠܬܲܚܬ ܡܲܟܝܼܟܼܵܐ ܕܲܠܒܼܝܼܫ ܟܽܠܵܗܿ ܡܸܣܟܼܢܽܘܬܼܵܐ܀
018:045 ܥܝܼܪܸ̈ܐ ܕܪܲܘܡܵܐ ܒܒܲܪ̈ܩܸܐ ܕܢܽܘܪܵܐ ܕܵܪܫܝܼܢ ܐܽܘܪܚܸܗ܃
018:046 ܘܲܒܼ̈ܢܲܝ ܥܽܘܡܩܵܐ ܫܵܕܸܝܢ ܩܽܘܕܡܲܘܗܝ ܡܲܪ̈ܛܽܘܛܲܝܗܽܘܢ܀
018:047 ܕܵܠ ܓܲܢ̄ܒܵܪܵܐ ܡܸܢ ܒܸܝܬܼ ܐܲܒܼܽܘܗܝ ܢܸܣܥܽܘܪ ܐܲܬܼܪܲܢ܃
018:048 ܘܲܒܼܨܸܒܼܝܵܢܸܗ ܡܲܛܝܼ ܠܣܵܟܼܵܗܿ ܕܡܸܣܟܼܢܽܘܬܼܵܐ܀
018:049 ܩܵܛܲܪ ܬܵܓܸ̈ܐ ܫܐܸܠ ܠܸܗ ܥܝܼܠܵܐ ܕܢܸܥܽܘܠ ܠܨܸܗܝܽܘܢ܃
Page 1 of 7   next page »   show all