The Comprehensive Aramaic Lexicon

001	ܬܐ ܡܪܝ ܨܝܕܝ ܘܐܝܬܐ ܚܢܢܐ ܕܒܣܝܡܘܬܟ
002	ܪܘܣ ܥܠ ܡܢ̈ܝ ܘܢܗ̈ܠܠܢ ܠܟ ܒܙܡܝܪ̈ܬܗܝܢ܂
003	ܬܐ ܡܪܝ ܘܐܠܗܝ ܘܐܝܟ ܕܒܩܢܝܐ ܣܦܝܩܐ ܦܘܚ ܒܝ
004	ܘܐܬܠ ܩ̈ܠܐ ܒܙܘܥܐ ܕܚܘܒܐ ܕܠܐ ܕܘܘܕܐ܂
005	ܬܐ ܡܪܝ ܗܒ ܠܝ ܡܠܬܐ ܦܐܝܬܐ ܕܡܠܝܐ ܫܘܦܪܐ
006	ܐܡܠܠ ܒܗܿ ܟܕ ܣܓܿܕ ܐܢܐ ܒܬܗܪܐ ܪܒܐ܂
007	ܬܐ ܕܠܐ ܪܚܝܩ ܢܬܠ ܟܠܝܘܡ ܟܘܠ ܛܒ̈ܬܐ
008	ܠܐܝܢܐ ܕܒܥܿܐ ܕܢܣܒ ܡܓܢ ܥܘܬܪܐ ܡܢܗ܂
009	ܩܪܝܒ ܐܢܬ ܗܘ ܒܪ ܐܠܗܐ ܩܪܝܒ ܐܢܬ ܗܘ
010	ܕܬܬܠ ܟܠܝܘܡ ܟܠ ܫ̈ܐܠܬܐ ܠܫܐܘ̈ܠܝܗܝܢ܂
011	ܩܪܝܒܬ ܗܘ ܘܗܐ ܥܡܢ ܐܢܬ ܥܡܢܘܐܝܠ
012	ܠܐܝܬ ܠܟ ܘܐܝܬܝܬ ܛܘ̈ܒܐ ܘܥܘܬܪ̈ܐ ܠܥܠܡܐ ܟܠܗ܂
013	ܗܘܝܬ ܠܟ ܥܡܢ ܐܦ ܐܟܘܬܢ ܡܛܠܬܢ
014	ܘܗܐ ܣܓܕܝܢ ܠܟ ܪ̈ܘܡܐ ܘܥܘܡ̈ܩܐ ܒܬܚܘܡ̈ܝܗܘܢ܂
015	ܫܕܪܟ ܪܘܡܐ ܘܩܒܠܟ ܥܘܡܩܐ ܒܬܗܪܐ ܪܒܐ
016	ܘܗܐ ܡܠܐ ܡܢܟ ܪܘܡܐ ܘܥܘܡܩܐ ܕܕܠܐ ܣܟ ܐܢܬ܂
017	ܐܬܝܬ ܠܗ ܠܥܠܡܐ ܘܠܐ ܕܐܣܬܦܩܘ ܪ̈ܘܡܐ ܡܢܟ
018	ܫܪܝܬ ܒܒܬܘܠܬܐ ܘܡܠܝܐ ܫܡܝܐ ܡܢ ܬܫܒܘܚܬܟ܂
019	ܘܠܐ ܣܦܩܝܢ ܠܟ ܟܠܗܘܢ ܪ̈ܘܡܐ ܒܬܚܘܡ̈ܝܗܘܢ
020	ܘܗܐ ܡܙܝܚܝܢ ܠܟ ܟܠܗܘܢ ܥܘܡ̈ܩܐ ܘܥܡܘܪ̈ܝܗܘܢ܂
021	ܐܬܝܬ ܡܢ ܐܒܐ ܕܢܚܬ ܡܢ ܐܡܐ ܗܘܝܬ ܝܠܘܕܐ
022	ܘܚܠܛܘܟ ܪ̈ܚܡܐ ܒܒܢܝ̈ܢܫܐ ܕܬܦܪܘܩ ܐܢܘܢ܂
023	ܕܪܝܬ ܣܝܡ̈ܬܟ ܥܠ ܡܣܟ̈ܢܐ ܘܐܥܬܪܬ ܐܢܘܢ܂
024	ܚܝܘ ܒܟ ܡܝ̈ܬܐ ܘܬܩܢ ܥܠܡܐ ܕܡܚܒܠ ܗܘܐ܂
025	ܗܘܝܬ ܐܝܡܡܐ ܘܢܗܪܬ ܡܢܟ ܐܪܥܐ ܟܠܗܿ
026	ܘܥܪܩ ܠܠܝܐ ܕܐܬܚܢܩܬ ܒܗ ܒܪܝܬܐ ܟܠܗܿ܂
027	ܢܚܬܬ ܐܝܟ ܡܛܪܐ ܥܠ ܐܪ̈ܥܬܐ ܚܪ̈ܘܒܬܐ
028	ܘܥܒܕܬ ܐܢܝܢ ܐܝܟ ܦܪܕܝܣܐ ܕܡܠܐ ܛܘܒ̈ܐ܂
029	ܕܢܚܬ ܐܝܟ ܫܡܫܐ ܕܙܕܝܩܘܬܐ ܒܐܪܥܐ ܟܠܗܿ
030	ܘܠܚܫܘܟܐ ܐܣܝܦ ܕܢܚܟ ܡܢ ܦܢܝ̈ܬܐ܂
031	ܠܚܡܐ ܕܚܝ̈ܐ ܐܢܬ ܕܐܟܠܘܟ ܡܝ̈ܬܐ ܘܐܬܢܚܡܘ ܒܟ
032	ܘܚܡܪܐ ܐܢܬ ܛܒܐ ܕܐܬܒܝܐܘ ܒܟ ܟܠ ܕܐܒܝܠܝܢ܂
033	ܒܡܫܚܐ ܐܫܝܬ ܥܘܠܗ ܕܐܕܡ ܕܡܛܪܦ ܗܘܐ
034	ܘܐܪܡܝܬ ܚܡܪܐ ܥܠ ܡܚ̈ܘܬܗ ܕܡܡܚܝ ܗܘܐ܂
035	ܒܡܝ̈ܐ ܚܝ̈ܐ ܡܪܩܬܗܿ ܠܨܐܬܗ ܕܡܟܬܡ ܗܘܐ
036	ܘܐܬܚܕܬ ܒܟ ܘܦܢܐ ܠܥܕܝܢ ܗܝܿ ܕܐܘܒܕ ܗܘܐ܂
037	ܒܪ ܐܠܗܐ ܐܘܪܚܟ ܪܡܐ ܗܝ ܘܡܠܝܐ ܛܘܒ̈ܐ
038	ܘܚܕܝܪܝܢ ܒܗܿ ܡܝ̈ܠܐ ܕܫܝܢܐ ܠܕܪܕܐ ܒܗܿ܂
039	ܢܘܗܪܐ ܐܢܬ ܡܪܝ ܚܝ̈ܐ ܐܢܬ ܡܪܝ ܢܘܚܡܐ ܐܢܬ
040	ܓܙܐ ܪܒܐ ܕܒܣܝܡ̈ܬܗ ܥܬܪܘ ܡܣܟ̈ܢܐ܂
041	ܐܒܘܟ ܪܚܡܢܐ ܟܕ ܓܒܠ ܠܗ ܒܨܠܡܗ ܠܐܕܡ
042	ܠܟ ܨܪ ܗܘܐ ܒܗ ܕܒܟ ܢܨܛܒܬ ܥܦܪܐ ܕܐܝܪܒ܂
043	ܕܡܘܬܟ ܝܗܒ ܠܗ ܠܐܕܡ ܕܢܠܒܫ ܟܕ ܒܿܪܐ ܠܗ
044	ܕܒܗܿ ܢܡܠܟ ܗܘܐ ܥܠ ܒܪ̈ܝܬܐ ܘܢܩܢܐ ܐܢܝ̈ܢ܂
045	ܒܡܦܘܚܝܬܐ ܡܫܝܚܐ ܥܒܕܗ ܟܕ ܥܒܿܕ ܠܗ
046	ܕܢܗܘܐ ܒܥܠܡܐ ܢܿܛܪ ܕܘܟܬܐ ܥܕ ܐܬܿܐ ܐܢܬ܂
047	ܟܣܐ ܗܘܝܬ ܒܐܒܘܟ ܘܓܠܟ ܒܐܕܡ ܟܕ ܒܿܪܐ ܠܗ
048	ܘܨܪ ܒܗ ܕܡܘܬܐ ܕܦܓܪܢܘܬܟ ܘܕܓܠܝܢܟ܂
049	ܘܪܕܬ ܘܐܬܬ ܨܘܪܬ ܡܠܟܐ ܒܟܠܗܘܢ ܕܪ̈ܐ
050	ܟܕ ܡܬܝܒܠܐ ܪܐܙܢܐܝܬ ܥܠ ܫܪ̈ܒܬܐ܂

Page 1 of 9 next page » show all