← Back
The Comprehensive Aramaic Lexicon
← Return to the Text Browser
click on the file description for more information
60040: OS Mt

Click on a word for lexical analysis.
Click on a red-colored coordinate for comments and/or translations of the line
View in Estrangelo
Ask AI about a passage
Hide manuscript variants

previous chapter


11:01 ܘܗܘܐ ܕܟܕ ܫܠܡ ܡܪܢ ܠܡܦܩܕܘ ܠܬܪ̈ܥܣܪ ܬܠܡܝܕܘܗܝ ܫܢܝ ܠܗ ܡܢ ܬܡܢ ܠܡܠܦܘ ܘܠܡܟܪܙܘ ܒܡܕܝܢܬܗܘܢ
11:02 ܝܘܚܢܢ ܕܝܢ ܟܕ ܫܡܥ ܒܝܬ ܐܣܝܪܐ ܥܒܕܘܗܝ ܕܡܪܢ ܫܕܪ ܠܬܠܡܝܕܘܗܝ
11:03 ܘܫܠܚ ܠܗ ܐܢܬ ܗܘ ܗܘ ܕܐܬܐ ܐܘ ܠܐܚܪܝܢ ܡܣܟܝܢ ܐܢܚܢܢ
11:04 ܘܥܢܐ ܡܪܢ ܘܐܡܪ ܠܗܘܢ ܙܠܘ ܚܘܘ ܠܝܘܚܢܢ ܡܕܡ ܕܚܙܝܢ ܐܢܬܘܢ ܘܡܕܡ ܕܫܡܥܝܢ ܐܢܬܘܢ
11:05 ܗܐ ܓܝܪ ܣܡܝܐ ܚܙܝܢ ܘܚܓܝܪܐ ܡܗܠܟܝܢ ܘܓܪ̈ܒܐ ܡܬܕܟܝܢ ܘܚܪܫܐ ܫܡܥܝܢ ܘܡܝܬܐ ܩܝܡܝܢ
11:06 ܘܛܘܒܘܗܝ ܠܡܢ ܕܠܐ ܢܬܟܫܠ ܒܝ
11:07 ܘܡܢ ܒܬܪ ܗܠܝܢ ܫܪܝ ܡܪܢ ܠܡܐܡܪ ܠܟܢܫܐ ܥܠ ܝܘܚܢܢ ܡܢܐ ܢܦܩܬܘܢ ܠܚܘܪܒܐ ܠܡܚܙܐ ܩܢܝܐ ܕܒܪܘܚܐ ܡܬܙܝܥܐ
11:08 ܘܐܠܐ ܡܢܐ ܢܦܩܬܘܢ ܠܡܚܙܐ ܓܒܪܐ ܕܢܚܬܐ ܪܟܝܟܐ ܠܒܝܫ ܗܐ ܐܝܠܝܢ ܕܪܟܝܟܐ ܠܒܝܫܝܢ ܒܝܬ ܡ̈ܠܟܐ ܐܢܘܢ
11:09 ܘܐܠܐ ܡܢܐ ܢܦܩܬܘܢ ܠܡܚܙܐ ܢܒܝܐ ܐܝܢ ܐܡܪܢܐ ܠܟܘܢ ܕܡܝܬܪ ܗܘ ܡܢ ܢܒܝܐ
11:10 ܗܢܘ ܕܥܠܘܗܝ ܟܬܝܒ ܕܗܐ ܡܫܕܪܢܐ ܡܠܐܟܝ ܩܕܡ ܐܦܝ̈ܟ ܕܢܬܩܢ ܐܘܪܚܐ ܩܕܡܝܟ
11:11 ܐܡܝܢ ܐܡܪܢܐ ܠܟܘܢ ܕܠܐ ܩܡ ܒܝ̈ܠܝܕܝ ܢܫܐ ܕܪܒ ܡܢ ܝܘܚܢܢ ܡܥܡܕܢܐ ܙܥܘܪܐ ܕܝܢ ܒܡܠܟܘܬܐ ܕܫܡܝܐ ܪܒ ܗܘ ܡܢܗ
11:12 ܡܢ ܝܘܡܝ ܝܘܚܢܢ ܡܥܡܕܢܐ ܥܕܡܐ ܠܗܫܐ ܐܠܝܨܐ ܗܝ ܡܠܟܘܬܐ ܕܫܡܝܐ ܘܐܠܘܨܝܗ ܡܚܛܦܝܢ ܠܗ
11:13 ܟܠܗܘܢ ܓܝܪ ܢܒܝܐ ܥܕܡܐ ܠܝܘܚܢܢ ܐܬܢܒܝܘ
11:14 ܘܐܢ ܨܒܝܢ ܐܢܬܘܢ ܠܡܩܒܠܘ ܗܘܝܘ ܐܠܝܐ ܕܥܬܝܕ ܠܡܐܬܐ
11:15 ܡܢ ܕܐܝܬ ܠܗ ܐܕܢܐ ܢܫܡܥ܀
11:16 ܠܡܢ ܕܝܢ ܐܕܡܝܗ ܫܪܒܬܐ ܗܕܐ܂ ܕܡܝܐ ܠܛܠܝܐ ܕܝܬܒܝܢ ܒܫܘܩܐ ܘܫܠܚܝܢ ܠܚܒܪܝܗܘܢ܂
11:17 ܙܡܪܢ ܠܟܘܢ ܘܠܐ ܪܩܕܬܘܢ ܘܐܠܝܢ ܠܟܘܢ ܘܠܐ ܐܪܩܕܬܘܢ܂
11:18 ܐܬܐ ܓܝܪ ܠܗ ܝܘܚܢܢ ܠܐ ܐܟܠ ܘܠܐ ܫܬܐ ܘܐܡܪ̈ܝܢ ܫܐܕܐ ܒܗ
11:19 ܘܐܬܐ ܒܪܗ ܕܐܢܫܐ ܐܟܠ ܘܫܬܐ ܘܐܡܪܝܢ ܗܐ ܓܒܪܐ ܐܟܘܠܐ ܘܫܬܝܐ ܘܪܚܡܐ ܕܡܟܣܐ ܘܕܚ̈ܛܝܐ ܘܐܙܕܕܩܬ ܚܟܡܬܐ ܡܢ ܒܢܝܗ܀
11:20 ܗܝܕܝܢ ܫܪܝ ܗܘܐ ܝܫܘܥ ܠܡܚܣܕܘ ܡܕܝܢܬܐ ܐܝܠܝܢ ܕܚܘܝ ܒܗܝܢ ܚܝܠܐ ܣܓܝܐܐ ܘܠܐ ܬܒܘ
11:21 ܘܐܡܪ ܘܝ ܠܟܝ ܟܘܪܙܝܢ ܘܝ ܠܟܝ ܒܝܬ ܨܝܕܐ ܕܐܠܘ ܒܨܘܪ ܘܒܨܝܕܢ ܗܘܘ ܚܝܠܐ ܕܗܘܘ ܒܟܝܢ ܟܒܪ ܕܝܢ ܒܣ̈ܩܐ ܘܒܩܛܡܐ ܬܒܘ
11:22 ܡܛܠ ܗܢܐ ܐܡܪܢܐ ܠܟܝܢ ܕܠܨܘܪ ܘܠܨܝܕܘܢ ܢܗܘܐ ܦܫܝܚ ܒܝܘܡܐ ܕܕܝܢܐ ܝܬܝܪ ܡܢ ܕܠܟܝܢ
11:23 ܘܐܢܬܝ ܟܦܪܢܚܘܡ ܕܐܬܪܝܡܬܝ ܠܫܡܝܐ ܥܕܡܐ ܠܫܝܘܠ ܬܚܬܝܢ ܕܐܠܘ ܒܣܕܘܡ ܐܬܚܙܝܘ ܚܝ̈ܠܐ ܕܒܟܝܢ ܐܬܚܙܝܘ ܩܝܡܐ ܗܝ ܠܝܘܡܢܐ
11:24 ܐܡܪܢܐ ܕܠܐܪܥܐ ܕܣܕܘܡ ܢܗܘܐ ܢܝܚ ܒܝܘܡܐ ܕܕܝܢܐ ܝܬܝܪ ܡܢ ܕܠܟܝ܀
11:25 ܒܗܘ ܙܒܢܐ ܥܢܐ ܝܫܘܥ ܘܐܡܪ ܡܘܕܐ ܐܢܐ ܠܟ ܐܒܐ ܡܪܐ ܕܫܡܝܐ ܘܕܐܪܥܐ ܕܟܣܝܬ ܗܠܝܢ ܡܢ ܚܟܝܡ̈ܐ ܘܓܠܝܬ ܐܢܝܢ ܠܛܠܝܐ
11:26 ܐܝܢ ܐܒܝ ܕܗܟܢܐ ܗܘܐ ܨܒܝܢܐ ܩܕܡܝܟ
11:27 ܟܠ ܡܕܡ ܐܫܬܠܡ ܠܝ ܡܢ ܐܒܝ ܘܠܐ ܐܢܫ ܝܕܥ ܠܒܪܐ ܐܠܐ ܐܢ ܐܒܐ ܘܠܐ ܠܐܒܐ ܐܢܫ ܝܕܥ ܐܠܐ ܐܢ ܒܪܐ ܘܡܢ ܕܨܒܐ ܒܪܐ ܕܢܓܠܐ ܠܗ
11:28 ܐܬܘ ܠܘܬܝ ܟܠܟܘܢ ܠܐܝܐ ܘܫܩܝܠܝ ܡܘܒܠܐ ܘܐܢܐ ܐܢܝܚܟܘܢ
11:29 ܘܫܩܘܠܘ ܢܝܪܝ ܥܠܝܟܘܢ ܘܝܠܦܘ ܡܢܝ ܕܢܝܚ ܐܢܐ ܡܟܝܟ ܐܢܐ ܒܠܒܝ ܘܬܫܟܚܘܢ ܢܝܚܐ ܠܢܦܫ̈ܬܟܘܢ
11:30 ܢܝܪܝ ܓܝܪ ܒܣܝܡ ܗܘ ܘܡܘܒܠܝ ܩܠܝܠܐ܀

next chapter