← Back
The Comprehensive Aramaic Lexicon
← Return to the Text Browser
click on the file description for more information
60402: SugMgab 2 Abraham/Isaac

Click on a word for lexical analysis.
Click on a red-colored coordinate for comments and/or translations of the line
View in Estrangelo
Ask AI about a passage
Hide manuscript variants

02:00 ܣܘܓܝܬܐ ܕܥܠ ܐܒܪܗܡ ܘܐܝܣܚܩ
02:01 ܐܰܒܳܐ ܕܠܰܐܒܪܡ ܕܶܒܚܳܐ ܫܶܐܼܠ ܗܒ ܠܝܼ ܕܺܐܡܰܪ ܬܰܫܥܝܼܬܗܘܿܢܿ ܕܰܐܒܪܡ ܘܺܐܝܣܚܩ ܕܐ̄ܪܳܙܳܐ ܪܫܰܡܘ ܕܰܐܒܳܐ ܘܰܒܪܳܐ ܒܰܝܢܳܬܗܘܿܢ܀
02:02 ܐܝܼܬܝܳܐ ܕܰܪܫܰܡ ܝܘܼܩܢܶܗ ܒܗܰܘ ܐܝܼܣܚܩ ܕܝܼܥܳܐ ܠܰܡܳܐܐ ܫܢܝܼ̈ܢܿ ܗܰܒ ܠܝܼ ܡܶܠܬܳܐ ܕܠܳܐ ܕܶܚܠܳܐ ܐܺܡܰܪ ܬܶܗܪܳܐ ܕܚܰܝܠܳܟ ܣܥܰܪ܀
02:03 ܐܶܡܰܪ ܐܰܒܳܐ ܐܰܒܪܳܡ ܫܡܰܥ ܕܰܒܪܳܝܗܝ ܠܺܐܝܣܚܰܩ ܕܠܶܗ ܪܳܚܡܰܬܿ ܘܕܶܒܚܳܐ ܫܰܠܡܳܐ ܩܰܪܶܒ ܠܝܼ ܠܝܼܚܝܼܕܳܝܳܟ ܕܠܳܐ ܥܳܩܬܳܐ܀
02:04 ܐܰܒܪܳܡ ܟܺܐܢܳܐ ܒܚܘܼܒܶܗ ܪܬܰܚ ܘܗܰܝܡܳܢܘܼܬܳܐ ܒܠܶܒܶܗ ܫܪܳܬ ܘܫܰܪܝܼ ܡܰܬܩܶܢ ܡܘܿܢ ܕܡܶܬܒܥܶܐ ܠܕܶܒܚܳܐ ܕܰܒܪܶܗ ܐܰܝܟ ܕܶܐܬܦܩܶܕ܀
02:05 ܣܰܪܳܐ ܃ ܐܳܡܪܳܐ ܣܰܪܳܐ ܡܘܿܢ ܥܳܒܕܰܬܿ ܒܩܰܝ̈ܣܶܐ ܕܒܺܐܝ̈ܕܰܝܟ ܗܳܐ ܨܳܠܚܰܬܿ ܕܰܠܡܳܐ ܠܰܒܪܳܐ ܟܰܝ ܕܳܒܚܰܬܿ ܒܗܳܝ ܣܰܟܝܼܢܳܐ ܕܠܳܗܿ ܠܳܛܫܰܬܿ܀
02:06 ܐܒܪܡ ܃ ܐܳܡܰܪ ܐܰܒܪܳܡ ܣܰܪܳܐ ܫܠܳܝ ܟܰܕܘܼ ܡܥܳܩܰܬܿܝ ܘܠܝܼ ܫܳܚܩܰܬܿܝ ܕܐ̄ܪܳܙܳܐ ܗ̄ܘ ܟܰܣܝܳܐ ܘܠܳܐ ܡܶܫܟܚܳܐ ܪ̈ܳܚܡܰܝ ܐ̄ܢܳܫܳܐ ܕܒܶܗ ܢܶܪܓܫܘܼܢ܀
02:07 ܣܰܪܳܐ ܃ ܐܰܢ̄ܬ ܠܳܐ ܪܓܝܼܫܰܬ ܟܡܳܐ ܣܰܝܒܪܶܬ ܟܺܐܒ̈ܶܐ ܘܚܶܒ̈ܠܶܐ ܕܰܒܗܘܿܢ ܗܘܳܐܿ ܝܺܡܝܼ ܠܝܼ ܒܶܗ ܕܠܳܐ ܡܶܬܬܥܝܼܩ ܕܗܘܼܝܘܼ ܣܘܼܟܳܝ ܘܰܕܒܰܪ ܘܙܶܠ܀
02:08 ܐܒܪܡ ܃ ܐܝܼܠ ܓܰܢ̄ܒܳܪܳܐ ܕܒܶܗ ܗܰܝܡܢܶܬ ܥܳܪܶܒ ܠܶܟܝ ܒܝܼ ܐܶܢ ܡܰܫܪܰܬܝܿ ܕܒܰܥܓܰܠ ܦܳܢܶܐ ܐܝܼܣܚܩ ܒܪܶܟܝ ܘܰܒܛܰܠܝܘܼܬܶܗ ܡܶܬܒܰܝܰܐܬܿܝ܀
02:09 ܐܰܒܪܳܡ ܢܦܰܩ ܡܶܢ ܡܰܫܟܢܳܐ ܘܥܰܠ ܐܰܬܳܢܳܐ ܐܝܼܣܚܩ ܪܟܶܒܿ ܛܘܼܦܣܶܗ ܕܰܒܪܳܐ ܕܥܝܼܠܳܐ ܪܟܶܒ ܟܰܕ ܥܳܐܶܠ ܗ̄ܘܳܐ ܠܽܐܘܪܺܫܠܶܝܡ܀
02:10 ܐܰܒܪܳܡ ܘܺܐܝܣܚܩ ܒܽܐܘܪܚܳܐ ܪܕܰܘ ܘܰܬܪܶܝܢ ܥܠܰܝ̈ܡܝܼܢ ܥܰܡܗܘܿܢ ܕܒܰܪܘܿ ܐܰܝܟ ܕܰܡܫܝܼܚܳܐ ܠܛܘܼܪܳܐ ܣܠܶܩ ܘܰܬܪܶܝܢ ܫܠܝܼ̈ܚܝܼܢ ܥܰܡܶܗ ܕܒܰܪ܀
02:11 ܐܒܪܡ ܃ ܐܰܢ̄ܬ ܒܳܟ ܝܼܺܡܝܼܬ ܕܠܳܐ ܡܶܬܡܢܶܐ ܙܰܪܥܶܗ ܕܺܐܝܣܚܩ ܡܶܢ ܣܘܓܳܐܶܗܿ ܘܶܐܢܗܘܼ ܕܡܳܐܶܬ ܡܶܬܕܰܓܠܳܐ ܬܰܢܘܰܝ ܕܰܗܘܳܬ ܒܶܝܬ ܠܝܼ ܘܠܳܟ܀
02:12 ܐܒܪܡ ܃ ܐܝܼܕܳܟ ܪܶܫܡܰܬ ܘܦܘܼܡܳܟ ܫܐܶܠ ܕܺܐܝܣܚܩ ܕܶܒܚܳܐ ܠܳܟ ܡܶܬܒܥܶܐܿ ܒܗܰܘ ܨܶܒܝܳܢܳܐ ܕܒܶܗ ܐܶܬܬܨܝܼܪ ܚܰܘܳܢܝ ܛܘܼܪܳܐ ܕܒܶܗ ܡܶܬܕܒܰܚ܀
02:13 ܐܰܒܪܳܡ ܥܰܝ̈ܢܰܘܗܝ ܠܪܰܘܡܳܐ ܬܠܳܐ ܘܨܰܠܝܼ ܘܰܒܥܳܐ ܩܕܳܡ ܡܳܪܝܳܐܿ ܕܰܐܢ̄ܬ ܡܳܪܝ ܝܰܗ̄ܒܬܳܝܗܝ ܘܠܳܟ ܡܶܬܒܥܶܐ ܚܰܘܳܢܝ ܕܘܼܟܬܳܐ ܕܒܳܗܿ ܐܶܕܒܚܝܼܘܗܝ܀
02:14 ܐܶܙܰܠܘ ܘܰܡܛܰܘ ܘܗܳܐ ܣܳܠܩܝܼܢ ܘܒܰܫܦܘܼܠ ܛܘܼܪܳܐ ܥܠܰܝ̈ܡܶܐ ܫܒܰܩܘܿ ܘܪܘܼܚܳܐ ܫܰܪܝܼ ܙܳܡܰܪ ܒܗܘܿܢ ܒܪܝܼܟ ܗ̄ܘܼ ܐ̄ܪܳܙܳܐ ܕܒܰܢ ܡܶܬܬܨܝܼܪ܀
02:15 ܐܝܼܣܚܩ ܃ ܐܳܡܰܪ ܐܝܼܣܚܩ ܩܰܝ̈ܣܶܐ ܥܠܰܝ ܘܢܘܼܪܳܐ ܥܰܡܰܢ ܘܠܰܝܬ ܐܶܡܪܳܐܿ ܐܳܦܠܳܐ ܥܠܳܬܳܐ ܕܒܰܢܝܳܐ ܬܢܳܢ ܘܰܐܝܟܰܢ ܕܶܒܚܳܐ ܟܰܝ ܡܰܣܩܰܬ܀
02:16 ܐܒܪܡ ܃ ܐܳܡܰܪ ܐܰܒܪܳܡ ܐܝܼܬ ܡܳܪܝܳܐ ܕܢܶܬܶܠ ܥܠܳܬܳܐ ܐܳܦ ܐܶܡܪܳܐܿ ܘܰܐܢ̄ܬ ܚܳܙܶܝܬܿ ܠܶܗ ܕܰܒܣܰܘܟܿܬܼܳܐ ܬܠܶܐ ܒܩܰܪ̈ܢܳܬܶܗ ܟܰܕ ܠܳܐ ܒܛܝܼܢ܀
02:17 ܐܝܼܣܚܩ ܃ ܒܝܼ ܘܒܰܫܡܰܝܳܐ ܠܡܘܿܢ ܚܳܝܪܰܬ ܘܥܰܠ ܣܰܟܝܼܢܳܐ ܐܝܼܕܳܟ ܫܕܰܝܬܿ ܕܳܐܦܠܳܐ ܐܶܡܪܳܐ ܕܒܳܗ ܡܶܬܕܒܰܚ ܐܶܬܳܐ ܥܰܡܰܢ ܠܡܘܿܢ ܡܰܪܗܒܰܬ܀
02:18 ܐܒܪܡ ܃ ܒܶܪܝ ܠܳܐ ܥܕܰܟܝܼܠ ܐܰܕܪܶܟܢܰܢ ܕܘܼܟܬܳܐ ܕܕܶܒܚܳܐ ܒܳܗܿ ܡܶܬܕܒܰܚܿ ܩܰܠܝܼܠ ܛܘܼܪܳܐ ܩܰܝܳܡ ܠܰܢ ܘܡܰܛܝܼܢܰܢ ܠܰܢ ܘܶܐܬܬܢܝܼܚܢܰܢ܀
02:19 ܐܝܼܣܚܩ ܃ ܓܠܝܼ ܘܦܰܫܶܩ ܠܝܼ ܐܶܢ ܡܶܫܟܚܳܐ ܕܠܶܐܡܝ ܣܰܪܳܐ ܠܡܘܿܢ ܠܳܐ ܓܠܰܝܬܿ ܐ̄ܪܳܙܳܐ ܕܒܶܝܬ ܠܳܟ ܘܰܠܡܳܪܝܳܐ ܘܶܐܡܪܳܐ ܥܰܡܰܢ ܠܡܘܿܢ ܠܳܐ ܕܒܰܪܬ܀
02:20 ܐܒܪܡ ܃ ܓܢܝܼܙܳܐ ܕܰܩܪܳܢܝ ܢܺܐܬܶܐ ܠܟܳܐ ܢܶܚܙܶܐ ܐܶܡܪܳܐ ܕܠܶܗ ܡܶܬܒܥܶܐܿ ܚܳܙܶܐ ܐܰܢ̄ܬ ܠܶܗ ܟܰܕ ܠܳܐ ܒܛܝܼܢ ܘܦܺܐܪܳܐ ܒܥܘܼܒܳܐ ܠܳܐ ܐܶܬܢܣܶܒ܀
02:21 ܐܝܼܣܚܩ ܃ ܕܳܡܶܐ ܐܰܢ̄ܬ ܠܝܼ ܕܩܳܠܳܐ ܫܡܰܥܬ ܕܕܳܡܶܐ ܠܰܕܗܰܘ ܕܰܒܡܰܫܟܢܳܐܿ ܟܰܕ ܡܶܢ ܒܰܩܪܳܐ ܥܶܓܠܳܐ ܢܟܰܣܬ ܠܳܐܪ̈ܚܶܐ ܕܒܰܪܟܘܼܟ ܘܰܗܘܝܼܬ ܠܳܟ܀
02:22 ܐܒܪܡ ܃ ܕܳܡܝܳܐ ܗܼܝ ܐܘܼܪܚܳܐ ܕܰܒܛܘܼܦܣܳܗܿ ‍{‍ܠܗܰܘ‍}‍ ܕܒܶܐܣܟܝܼܡ ܐܳܪ̈ܚܶܐ ܨܶܐܕܰܝ ܫܪܳܐܿ ܘܥܰܠ ܦܳܬܘܼܪܰܢ ܠܰܚܡܳܐ ܠܥܶܣ ܘܩܰܒܶܠ ܥܶܓܠܳܐ ܘܝܰܗܒܳܟ ܠܝܼ܀
02:23 ܐܝܼܣܚܩ ܃ ܗܳܕܶܐ ܥܰܣܩܳܐ ܕܶܐܗܰܝܡܢܳܟ ܕܕܶܒܚܳܐ ܕܠܳܐ ܕܡܳܐ ܠܳܐ ܫܡܝܼܥ ܠܝܼܿ ܕܩܰܪܶܒ ܐ̄ܢܳܫ ܡܬܘܡ ܘܶܐܬܥܢܝܼ ܐܰܝܟ ܕܳܐܦ ܗܳܫܳܐ ܐܰܢ̄ܬ ܣܳܥܪܰܬ܀
02:24 ܐܒܪܡ ܃ ܗܳܕܶܐ ܕܥܰܣܩܳܐ ܒܳܗܿ ܗܳܘܝܳܐ ܐܳܬܳܐ ܬܡܝܼܗܬܳܐ ܘܒܳܗܿ ܬܳܗܪܝܼܢܿ ܥܝܼܪ̈ܶܐ ܘܐ̄ܢܳܫ̈ܳܐ ܘܢܳܦܶܩ ܫܡܳܗܿ ܠܕܳܪ̈ܶܐ ܐ̄ܚܪ̈ܳܢܶܐ ܡܶܢ ܒܳܬܪܰܢ܀
02:25 ܐܝܼܣܚܩ ܃ ܘܶܐܢ ܬܶܕܡܘܼܪܬܳܐ ܡܶܫܬܰܡܫܳܐ ܘܥܝܼܪ̈ܶܐ ܘܐ̄ܢܳܫ̈ܳܐ ܒܳܗܿ ܬܳܗܪܝܼܢܿ ܡܳܢܳܐ ܚܛܳܬ ܠܳܟ ܐܶܡܝ ܣܳܒܬܳܐ ܕܠܳܐ ܐܰܘܕܰܥܬܳܗܿ ܡܘܿܢ ܥܳܒܕܰܬ܀
02:26 ܐܒܪܡ ܃ ܘܰܚܠܳܦ ܕܶܐܢܳܐ ܠܳܐ ܓܠܝܼܬ ܠܳܗܿ ܐ̄ܪܳܙܳܐ ܕܒܶܝܬ ܠܝܼ ܘܰܠܡܳܪܝܳܐܿ ܡܳܐ ܕܰܚܙܳܬܳܟ ܟܰܕ ܚܳܕܝܳܐ ܬܳܢܶܝܬ ܩܘܼܕܡܶܝܗܿ ܘܡܶܬܕܰܡܪܳܐ܀
02:27 ܐܝܼܣܚܩ ܃ ܙܰܕܝܼܩ ܡܳܪܝܳܐ ܕܠܶܗ ܐܰܓܥܠܘܼܢܝ ܪ̈ܰܚܡܶܝܗܿ ܕܣܰܪܳܐ ܘܶܐܬܝܼܬ ܠܟܳܐܿ ܕܗܘܼ ܡܰܦܨܰܚ ܠܳܗܿ ܠܰܟܡܝܼܪܬܳܐ ܘܰܡܚܰܪܰܪ ܠܳܗܿ ܡܶܢ ܬܶܢܚܬܳܐ܀
02:28 ܐܒܪܡ ܃ ܙܰܒܢܳܐ ܕܒܰܛܢܳܟ ܒܥܶܓܠܳܐ ܒܣܶܡܘ ܥܝܼܪ̈ܶܐ ܕܣܰܒܪܘܼܟ ܐܰܝܟ ܐܳܪ̈ܚܶܐܿ ܘܰܒܢܘܼܚܳܡܳܟ ܡܶܬܒܰܣܡܝܼܢ ܒܶܐܡܪܳܐ ܕܝܼܠܝܼܕ ܟܰܕ ܠܳܐ ܒܛܝܼܢ܀
02:29 ܐܝܼܣܚܩ ܃ ܚܙܳܬܳܟ ܐܰܒܪܳܡ ܗܳܐ ܕܳܡܝܳܐ ܕܚܰܪܒܳܐ ܕܩܶܛܠܳܐ ܥܠܰܝ ܫܳܡܛܰܬܿ ܚܙܝܼ ܥܰܪܳܒܳܐ ܕܝܰܗ̄ܒܬ ܠܳܗܿ ܠܶܐܡܝ ܕܥܰܝ̈ܢܶܝܗܿ ܟܽܠ ܫܳܥ ܠܝܼ ܚܳܝܪ̈ܳܢ܀
02:30 ܐܒܪܡ ܃ ܚܰܝ ܗ̄ܘܼ ܒܪܰܘܡܳܐ ܗܰܘ ܕܰܐܦܩܰܢܝ ܡܶܢ ܚܰܢܦܘܼܬܳܐ ܕܰܪܒܝܼܬ ܒܳܗܿܿ ܕܠܳܐ ܡܶܬܕܰܓܠܳܐ ܕܝܼܡܝܼܬ ܠܳܗܿ ܠܣܰܪܳܐ ܕܒܰܥܓܰܠ ܦܳܢܶܐ ܒܪܶܟܝ܀
02:31 ܐܝܼܣܚܩ ܃ ܛܘܼܪܳܐ ܡܓܰܙܰܝ ܘܰܐܬܪܳܐ ܕܚܝܼܠ ܘܢܘܼܪܳܐ ܘܩܰܝ̈ܣܶܐ ܗܳܐ ܡܛܰܝܒܝܼܢܿ ܥܠܳܬܳܐ ܘܶܐܡܪܳܐ ܕܗܰܘ ܡܰܕܒܚܳܐ ܐܰܝܟܳܐ ܐܶܢܘܿܢ ܐܶܗܰܝܡܢܳܟ܀
02:32 ܐܒܪܡ ܃ ܛܘܼܪܳܐ ܕܰܚܪܘܼܒ ܘܨܳܕܝܳܐ ܡܠܶܐ ܘܨܰܘܬܳܐ ܕܐ̄ܢܳܫܳܐ ܠܳܐ ܐܝܼܬ ܒܶܗܿ ܥܝܼܪ̈ܶܐ ܕܪܰܘܡܳܐ ܠܶܗ ܢܳܚܬܝܼܢ ܘܚܳܙܶܝܢ ܬܶܗܪܳܐ ܘܡܶܬܕܰܡܪܝܼܢ܀
02:33 ܐܝܼܣܚܩ ܃ ܝܰܘ̈ܡܶܐ ܬܠܳܬܳܐ ܗܳܐ ܝܳܬܒܳܐ ܣܰܪܳܐ ܒܶܐܒܠܳܐ ܘܠܰܢ ܚܳܝܪܳܐܿ ܩܰܪܶܒ ܕܶܒܚܳܐ ܐܰܝܟ ܕܶܐܬܦܩܶܕܬ ܡܘܿܢ ܒܰܛܝܼܠܰܬܿ ܘܠܝܼ ܚܳܝܪܰܬܿ܀
02:34 ܐܒܪܡ ܃ ܝܰܘ̈ܡܶܐ ܬܠܳܬܳܐ ܗܳܘܶܐ ܒܪܳܐ ܒܠܶܒܳܗܿ ܕܰܐܪܥܳܐ ܥܰܡ ܫܳܟ̈ܒܶܐܿ ܘܒܰܕܡܘܼܬ ܣܰܪܳܐ ܡܶܬܒܰܝܰܐܐ ܡܰܪܝܰܡ ܐܶܡܶܗ ܒܰܩܝܳܡܬܶܗ܀
02:35 ܐܝܼܣܚܩ ܃ ܟܰܢܶܫ ܟܺܐܦ̈ܶܐ ܘܰܐܝܬܳܐ ܒܢܝܼ ܥܠܳܬܳܐ ܠܕܶܒܚܳܟ ܐܰܝܟ ܟܳܗܢܳܐܿ ܕܐ̄ܪܳܙܳܐ ܪܡܰܙ ܠܝܼ ܕܠܝܼ ܕܳܒܚܰܬ ܘܠܳܐ ܟܰܪܝܳܐ ܠܝܼ ܕܒܝܼ ܝܳܪܒܰܬ܀
02:36 ܐܒܪܡ ܃ ܟܰܢܶܫ ܟܺܐܦ̈ܶܐ ܐܰܒܪܳܡ ܘܣܳܡ ܘܰܐܘܚܶܕ ܢܘܼܪܳܐ ܘܠܰܒܪܶܗ ܦܟܰܪܿ ܘܩܳܠܳܐ ܩܪܳܐ ܠܶܗ ܕܠܳܐ ܬܶܩܛܠܝܼܘܗܝ ܚܙܝܼ ܕܥܰܪܳܒܶܗ ܐܶܢܳܐ ܗܘܝܼܬ܀
02:37 ܐܒܪܡ ܃ ܠܳܐ ܚܰܒܝܼܒ ܠܝܼ ܕܢܺܐܚܶܐ ܒܶܪܝ ܡܶܢ ܦܘܼܩܕܳܢܳܟ ܘܰܐܢ̄ܬ ܝܳܕܥܰܬܿ ܚܘܼܪ ܒܰܦܟܳܪ̈ܰܘܗܝ ܘܪܶܥܝܳܢܝ ܒܩܝܼ ܕܰܡܛܰܝܰܒ ܐ̄ܢܳܐ ܕܠܳܟ ܐܶܕܒܚܝܼܘܗܝ܀
02:38 ܐܠܗܐ ܃ ܠܰܘ ܩܘܼܪܒܳܢܳܟ ܠܳܐ ܩܰܒܠܶܬ ܠܥܝܼܪ̈ܶܐ ܘܐ̄ܢܳܫ̈ܳܐ ܚܘܼܒܳܟ ܓܠܰܝܬܿ ܕܰܗܘܰܘ ܝܳܕܥܝܼܢ ܬܶܓܡ̈ܶܐ ܠܥܶܠ ܘܐ̄ܢܳܫ̈ܳܐ ܒܰܐܪܥܳܐ ܕܠܝܼ ܪܳܚܡܰܬ܀
02:39 ܐܒܪܡ ܃ ܡܳܪܝ ܠܳܐ ܬܰܗܦܶܟ ܐܰܦܰܝ̈ܟ ܡܶܢܝ ܚܘܼܪ ܒܰܥܠܳܬܳܐ ܕܗܳܐ ܝܳܩܕܳܐܿ ܕܶܐܢ ܢܳܚܶܬ ܐ̄ܢܳܐ ܕܠܳܐ ܕܶܒܚܬܳܐ ܚܶܣܕܳܐ ܐܶܗܘܶܐ ܒܓܰܘ ܥܳܠܡܳܐ܀
02:40 ܐܠܗܐ ܃ ܡܰܘܬܶܗ ܕܰܒܪܳܟ ܣܰܓܝܼ ܡܚܝܼܠ ܢܶܦܪܘܿܩ ܥܰܡ̈ܡܶܐ ܡܶܢ ܠܰܘܛܬܳܐܿ ܒܶܪܝ ܕܝܼܠܝ ܢܳܚܶܬ ܘܗܘܼ ܡܶܬܕܒܰܚ ܒܦܰܓܪܳܐ ܕܰܠܒܶܫ ܡܶܢ ܡܰܪܒܥܳܐ܀
02:41 ܐܒܪܡ ܃ ܢܦܝܼ̈ܣܳܢ ܬܘܼ̈ܩܠܳܬܝ ܕܠܳܐ ܬܶܬܓܠܶܐ ܥܠܳܬܳܐ ܕܰܒܢܝܼܬ ܡܶܢ ܕܶܒܚܬܳܐܿ ܘܒܶܟܝܶܗ ܕܺܐܝܣܚܩ ܕܰܟܡܳܐ ܚܢܝܼܓ ܕܰܡܣܰܟܶܐ ܗ̄ܘܳܐ ܕܗܘܼ ܢܶܬܕܒܰܚ܀
02:42 ܐܠܗܐ ܃ ܢܶܟܣܶܬ ܐܶܡܪܳܐ ܘܟܶܢ ܢܶܚܬܶܬ ܠܳܐ ܬܰܣܒܰܪ ܠܳܟ ܕܠܳܐ ܩܰܒܠܶܬܿ ܚܘܼܪ ܒܺܐܝܠܳܢܳܐ ܟܰܕ ܠܳܐ ܒܛܝܼܢ ܐܰܦܪܝܼ ܦܺܐܪܳܐ ܕܠܳܐ ܐܶܬܢܣܶܒ܀
02:43 ܐܒܪܡ ܃ ܣܓܘܼܠܳܐ ܐܝܼܣܚܩ ܠܰܡܳܐܐ ܫܢܝܼ̈ܢ ܒܣܰܬܳܐ ܥܩܰܪܬܳܐ ܪܶܡܙܳܟ ܬܠܳܝܗܝܿ ܘܗܳܐ ܒܰܥܠܳܬܳܐ ܩܕܳܡܰܝܟ ܦܟܝܼܪ ܕܳܒܰܚ ܐ̄ܢܳܐ ܠܶܗ ܐܶܢ ܦܳܩܕܰܬ܀
02:44 ܣܰܪܳܐ ܥܩܰܪܬܳܐ ܝܶܠܕܰܬ ܒܪܳܐ ܕܟܰܕ ܚܰܝ ܡܳܐܶܬ ܘܐ̄ܪܳܙܳܐ ܥܛܝܼܦܿ ܘܡܰܪܝܰܡ ܒܬܘܼܠܬܳܐ ܝܶܠܕܰܬ ܒܪܳܐ ܕܚܰܝ ܟܰܕ ܡܳܐܶܬ ܘܫܘܼܒܚܳܐ ܥܛܝܼܦ܀
02:45 ܥܰܡ ܒܰܪ ܐܰܒܪܳܡ ܥܠܰܝ̈ܡܐ ܬܪܶܝܢ ܠܫܘܦܠ ܛܘܪܳܐ ܥܰܡܗ ܣܠܶܩܘܿ ܘܰܠܒܪ ܡܰܪܝܡ ܟܰܕ ܐܶܙܕܩܦ ܬܪܶܝܢ ܓܰܝܳܣ̈ܶܐ ܥܰܡܗ ܢܩܶܦܼܘ܀
02:46 ܥܰܡ̈ܡܶܐ ܒܰܐܒܪܡ ܘܒܺܐܝܣܚܩ ܬܗܰܪܘ ܕܬܰܡܝܼܡ ܘܰܫܠܶܐ ܟܰܕ ܐܶܬܦܟܰܪܿ ܩܳܠܳܐ ܩܶܛܠܶܗ ܗܘܼ ܐܰܚܝܶܗ ܕܰܐܒܳܐ ܠܣܘܼܓܳܐܐ ܕܥܰܡ̈ܡܶܐ ܢܗܶܐ܀
02:47 ܦܟܝܪ ܗ̄ܘܳܐ ܐܝܼܣܚܩ ܘܩܠܐ ܫܪܝܗܝ ܕܗܘܿ ܥܪܒܐ ܕܗܘܼ ܦܨܝܗܿ ܕܒܗ ܗ̄ܘܼ ܥܡ̈ܡܐ ܢܶܬܒܰܪܟܘܢ ܘܐ̄ܪܳܙܐ ܠܡܳܪܶܗ ܗܘܼ ܢܛܝܼܪ ܗ̄ܘܳܐ܀
02:48 ܦܰܓܪܶܗ ܕܡܳܪܰܢ ܕܰܟܪܝܼܟ ܗ̄ܘܳܐ ܒܢܰܚ̈ܬܶܐ ܢܰܩ̈ܕܶܐ ܘܰܡܒܰܣ̈ܡܶܐܿ ܕܠܳܐ ܚܒܳܠܳܐ ܣܠܶܩ ܡܶܢ ܓܰܘ ܫܝܘܠ ܘܥܹܕܬܳܐ ܚܙܳܬܶܗ ܘܶܐܬܒܰܝܐܬ܀
02:49 ܨܝܼܪ ܗ̄ܘܳܐ ܐܰܒܪܳܡ ܘܺܐܝܣܚܩ ܒܪܶܗ ܒܛܘܼܦܣܶܗ ܕܰܐܒܳܐ ܘܰܕܡܶܠܬܶܗ܂ ܘܰܚܠܳܦ ܥܹܕܬܳܐ ܥܠܳܬܳܐ ܗܘܳܬ ܦܳܬܘܼܪ ܩܘܼܕܫܳܐ ܕܚܰܝ̈ܶܐ ܡܠܶܐ܀
02:50 ܨܠܝܼܒܐ ܕܰܒܪܳܐ ܓܹܝܫܪܳܐ ܗܘܳܐ ܕܰܠܒܶܝܬ ܚܰܝ̈ܶܐ ܒܶܗ ܢܶܥܒܪܘܼܢܿ ܥܰܡ̈ܡܶܐ ܕܗܰܝܡܶܢܘ ܘܰܡܗܰܝܡܢܝܼܢ ܕܡܶܛܽܠܳܬܰܢ ܡܰܘܬܳܐ ܛܥܶܡ܀
02:51 ܩܛܝܼܠ ܗܿܘܐ ܐܝܣܚܳܩ ܡܼܢ ܟܰܕ ܫܼܡܰܥ ܐܰܒܪܡ ܩܳܠܐ ܕܰܩܛܘܠ ܒܪܳܟ܂ ܘܡܳܪܝܐ ܦܰܨܝܗ ܕܠܐ ܢܡܘܽܬ ܗܘܐ ܘܒܿܝܰܐ ܠܣܰܪܐ ܘܒܗ ܗܘ ܚܝܳܬ܀
02:52 ܩܛܝܼܠ ܗܘܳܐ ܡܳܪܰܢ ܒܰܚܣܳܡܗܘܿܢ ܕܝܼܗܘܼ̈ܕܳܝܶܐ ܘܟܶܢ ܐܶܙܕܩܶܦܿ ܘܩܶܛܠܶܗ ܥܰܩܪܳܗܿ ܠܽܐܘܪܺܫܠܶܝܡ ܘܰܒܢܳܐ ܠܥܹܕܬܳܐ ܘܒܶܗ ܗܰܝܡܢܰܬ܀
02:53 ܪܰܒ ܗ̄ܘܼ ܐ̄ܪܳܙܳܐ ܘܣܰܓܝܼ ܫܒܝܼܚ ܕܒܰܪ ܐܰܒܪܳܗܳܡ ܒܛܘܼܪܳܐ ܣܥܰܪܿ ܕܰܛܥܝܼܢ ܩܰܝ̈ܣܶܐ ܕܢܺܐܩܰܕ ܒܗܘܿܢ ܘܰܢܦܰܩ ܕܰܢܡܘܼܬ ܟܰܕ ܠܳܐ ܪܓܶܫ܀
02:54 ܪܰܒ ܦܘܼܪܫܳܢܳܐ ܘܣܰܓܝܼ ܬܡܝܼܗ ܕܒܰܪ ܐܰܠܳܗܳܐ ܒܰܐܪܥܳܐ ܣܥܰܪܿ ܕܰܛܥܝܼܢ ܩܰܝܣܳܐ ܕܒܶܗ ܢܶܙܕܩܶܦ ܘܰܢܦܰܩ ܕܰܢܡܘܼܬ ܕܢܶܦܪܘܿܩ ܠܟܽܠ܀
02:55 ܫܘܼܒܚܳܐ ܠܩܠܐ ܕܠܰܐܒܪܡ ܩܪܳܐ ܕܰܬܟܘܣ ܐܝܼܕܳܟ ܘܠܳܐ ܬܶܩܛܠܝܼܘܗܝܿ ܠܺܐܝܣܚܩ ܕܰܕܒܝܼܚ ܟܰܕ ܠܳܐ ܩܛܝܼܠ ܕܡܳܪܶܗ ܨܝܼܪ ܗ̄ܘܳܐ ܒܗܳܝ ܕܶܒܚܬܳܐ܀
02:56 ܫܘܼܒܚܳܐ ܠܰܒܪܳܐ ܕܠܰܐܒܘܼܗܝ ܩܪܳܐ ܕܒܺܐܝ̈ܕܰܝܟ ܣܳܐܶܡ ܐ̄ܢܳܐ ܠܳܗܿ ܠܢܰܦܫܝܿ ܘܰܙܟܳܐ ܠܡܰܘܬܳܐ ܘܠܰܫܝܘܠ ܥܩܰܪ ܘܰܒܬܶܫܒܘ܊ ܠܪܰܘܡܳܐ ܣܠܶܩ܀
02:57 ܬܰܘܕܶܐ ܣܰܪܳܐ ܘܺܐܝܣܚܩ ܒܪܳܗܿ ܠܳܟ ܒܰܪ ܚܰܝܳܐ ܕܒܶܗ ܐܶܬܦܪܶܩܿ ܘܰܐܒܪܡ ܟܺܐܢܳܐ ܕܛܘܼܦܣܳܟ ܪܫܰܡ ܢܫܰܒܚܳܟ ܕܝܼܪܶܒ ܘܐ̄ܪܳܙܳܟ ܓܠܳܐ܀
02:58 ܬܰܘܕܶܐ ܥܹܕܬܳܐ ܘܟܽܠܗܘܿܢ ܒܢܶܝ̈ܗܿ ܒܚܰܝ̈ܶܐ ܚܰܕ̈ܬܶܐ ܕܠܳܐ ܡܳܝܬܝܼܢܿ ܘܐ̄ܢܳܫ̈ܳܐ ܕܦܰܓܪܳܟ ܘܰܕܡܳܟ ܫܩܰܠܘ ܡܶܢ ܓܺܗܰܢܳܐ ܢܶܫܬܰܘܙܒܘܢ܀
02:59 ܡܳܪܝܳܐ ܕܝܳܬܶܒ ܒܪܰܘܡܳܐ ܠܥܶܠ ܘܚܳܙܶܐ ܒܥܘܼܡܩܳܐ ܘܠܳܐ ܡܶܬܚܙܶܐܿ ܫܰܝܢܳܟ ܢܰܡܠܶܟ ܥܰܠ ܥܳܠܡܳܐ ܡܫܝܼܚܳܐ ܕܦܰܪܩܰܢ ܠܳܟ ܬܶܫܒ̈ܚܳܢ܀