The Comprehensive Aramaic Lexicon

1.001:03	ܟܐܒܐ ܕܐܡܪ ܐܿܠܨ ܠܝ ܛܟܣܐ ܕܐܫܬܘܩ ܦܿܩܕ ܠܝ
1.001:04	ܡܕܡ ܓܝܪ ܕܣܓܝܐܐ ܗܘ ܐܦܢ ܒܣܝܡ ܠܐ ܒܣܝܡ
1.001:05	ܟܠ ܡܕܡ ܒܟܝܠܐ ܗܢܝ ܟܠ ܡܕܡ ܒܟܝܠܐ ܒܣܝܡ
1.001:06	ܟܪܣܐ ܡܛܠ ܕܙܥܘܪܝܐ ܒܟܝܠܐ ܕܬܣܒ ܥܿܕܪ ܠܗܿ
1.001:07	ܬܪܥܝܬܐ ܠܘ ܐܝܟ ܟܪܣܐ ܗܝ ܥܘܒܗܿ ܪܒ ܗܘ ܡܢ ܟܝܠܐ
1.001:08	ܐܦ ܒܟܝܠܐ ܘܕܠܐ ܟܝܠܐ ܡܨܝܐ ܠܡܣܒ ܝܘܠܦܢܐ
1.001:09	ܒܡܐܝܢܘܬܐ ܕܝܢ ܙܥܿܪ ܥܘܒܐ ܪܒܐ ܕܬܪܥܝܬܐ
1.001:10	ܐܢ ܬܥܪܘܩ ܡܐܝܢܘܬܐ ܡܢ ܐܡܘܪܐ ܘܫܡܘܥܐ
1.001:11	ܝܪܒܐ ܡܠܬܐ ܘܡܬܦܫܛܐ ܝܪܒܐ ܐܕܢܐ ܘܡܬܡܬܚܐ
1.001:12	ܠܐ ܬܡܐܢ ܠܗܿ ܠܡܫܡܥܬܢ ܒܫܪ̈ܒܝܗܿ ܕܡܕܝܢܬܐ ܕܐܒܕܬ
1.001:13	ܡܼܠܝܢ ܐܢܘܢ ܫܪ̈ܒܝܗܿ ܥܘܕܪ̈ܢܐ ܛܒܝܢ ܐܢܘܢ ܡܢ ܣܡܡ̈ܢܐ
1.001:14	ܣܡܡ̈ܢܐ ܠܦܓܪܐ ܡܐܣܝܢ ܗܠܝܢ ܕܝܢ ܦܓܪܐ ܘܪܘܚܐ
1.001:15	ܡܕܝܢܬܐ ܐܒܕܬ ܘܐܒܕ ܒܗܿ ܒܝܫ̈ܬܐ ܕܟܣܝܢ ܗ̈ܘܝ ܒܗܿ
1.001:16	ܬܘ ܟܝܬ ܢܘܒܕ ܒܝܫ̈ܬܢ ܕܠܐ ܢܐܒܕ ܥܡ ܒܝܫ̈ܬܢ
1.001:17	ܚܢܝܩ ܒܗܿ ܚܣܡܐ ܒܚܢܝܩܐ̈ ܕܠܝܬ ܬܡܢ ܕܡܚܿܐ ܒܣܬܪܐ
1.001:18	ܦܓ ܛܢܢܐ ܕܠܝܬ ܬܡܢ ܥܪ̈ܬܐ ܘܕܪ̈ܘܟܬܐ
1.001:19	ܚܡܬܐ ܚܡܝܡܬܐ ܩܪܬ ܕܩܪܬ ܠܗܿ ܟܠܗܿ ܡܕܝܢܬܐ
1.001:20	ܪܓܬܐ ܝܩܕܬܐ ܫܗܝܬ ܒܫ̈ܠܕܐ ܩܪܝܪ̈ܬܐ
1.001:21	ܩܕܡ ܩܠܝܠ ܣܦܝܦܐ ܗܘܬ ܘܕܚܪ ܒܗܿ ܪܘܓܙܐ ܕܥܼܟܬ
1.001:22	ܫܼܕܐ ܒܗܿ ܚܘܬܪܐ ܫܝܛܐܝܬ ܕܠܝܬ ܕܒܢܚ̈ܬܐ ܠܒܫܿ ܠܗ
1.001:23	ܠܬܪ̈ܝܢ ܠܒܫܿ ܙܠܝܠܐ ܠܠܒܘܫܐ ܘܚܘܬܪܐ ܥܡܗ
1.001:24	ܐܒܕ ܒܗܿ ܣܩܠܐ ܕܣܟ̈ܠܬܐ ܡܠܘܐܐ ܕܟܠܗ ܚܘܣܪܢܐ ܗܘ
1.002:01	ܐܒܕ ܚܫ̈ܠܬܐ ܕܓܐܝܬܐ̈ ܚܙܬܐ ܕܡܠܝܐ ܬܘܩܠܬܐ̈
1.002:02	ܒܗܠܝܢ ܟܐ̈ܦܐ ܫܝ̈ܛܬܐ ܪ̈ܓܠܐ ܒܐܪܥܐ ܡܬܬܩܠܢ
1.002:03	ܒܛܒ̈ܥܐ̈ ܘܟܐ̈ܦܐ ܕܓܐ̈ܝܬܐ ܥܝ̈ܢܐ ܕܫܒܪ̈ܐ ܡܬܬܩܠܢ
1.002:04	ܡܣܢܐ ܣܩܝܠܐ ܝܩܼܪ ܠܗܿ ܠܗܿܝ ܐܪܥܐ ܛܥܝܢܬ ܛܘܪ̈ܐ
1.002:05	ܠܐ ܝܩܼܪܘ ܠܗܿ ܛܘܪ̈ܐ ܐܝܟ ܗܿܘ ܣܐܘܢܐ ܙܠܝܠܐ ܕܥܠܝܗܿ
1.002:06	ܫܒܼܩ ܗܘܐ ܢܒܝܐ ܟܠ ܨ̈ܒܬܝܢ ܘܠܣܐܘܢܐ ܒܠܚܘܕ ܐܿܟܣ
1.002:07	ܡܛܠ ܠܡ ܡܣܢܐ ܛܡܐܐ ܠܙܕܝܩܐ ܒܟܣܦܐ ܙܒܿܢܘ
1.002:08	ܒܗܢܐ ܦܬܓܡܐ ܐܨܿܕܝ ܐܘ ܕܙܠܝܠܐ ܘܣܩܝܠܐ
1.002:09	ܐܠܐ ܩܝܡܬ ܥܠ ܚܝܠܗ ܙܠ ܫܐܿܠ ܥܠ ܦܘܫܩܗ
1.002:10	ܠܘ ܡܛܥܐ ܛܥܬܟܝ ܗܕܐ ܡܛܠ ܗܿܘ ܗܘ ܙܠܝܠܬܝ
1.002:11	ܚܝܠܗ ܕܡܣܢܐ ܝܕܥܬܝ ܡܛܠ ܗܿܘ ܒܗ ܐܙܕܝܢܬܝ
1.002:12	ܡܣܢܐ ܕܪܩܕ ܒܣܡܟܐ ܦܣܩܗ ܪܫܗ ܕܝܘܚܢܢ
1.002:13	ܡܣܢܐ ܕܛܠܝܬܐ ܩܛܠܗ ܠܟܪܘܙܐ ܒܪܗܿ ܕܥܩܪܬܐ
1.002:14	ܡܢ ܟܠܗܘܢ ܢܒܝܐ̈ ܪܒ ܗܘܐ ܘܡܣܢܐ ܙܥܘܪܐ ܩܛܠܗ
1.002:15	ܡܣܢܐ ܣܩܝܠܐ ܗܘܐ ܦܚܐ ܘܠܟܠܗ ܣܡܟܐ ܨܕܗ
1.002:16	ܥܠ ܚܘܒܗ ܠܓܘ ܪܥܝܢܐ ܘܢܣܒ ܡܢܗ ܡܫܟܢܐ
1.002:17	ܡܘܡܬܐ ܕܠܐ ܡܫܬܪܝܐ ܥܠ ܥܘܠܐ ܕܠܐ ܡܬܚܣܐ
1.002:18	ܫܕܪ ܪܫܗ ܕܣܡܟܐ ܘܐܝܬܝ ܪܫܗ ܕܟܪܘܙܐ
1.002:19	ܬܫܘܛܝܘܗܝ ܪܓܠܐ ܠܣܐܘܢܐ ܕܪ̈ܓܠܐ ܐܪܓܙ ܒܣܡܟܐ
1.002:20	ܕܚܠܝ ܚܨܝܦܬܐ ܡܢ ܪܘܓܙܐ ܘܒܨܘܪܝ ܩܠܝܠ ܡܢ ܨܒܬܐ
1.002:21	ܠܐ ܬܚܘܪܝܢ ܒܗ ܒܡܣܢܐ ܕܚܛܗܐ ܫܚܝܡܐ ܐܝܬܘܗܝ
1.002:22	ܐܠܐ ܝܕܥܬܝ ܢܟܝܢܗ ܫܡܼܥܝ ܥܠ ܓܘܢܚܐ ܕܗܘܐ ܒܗ
1.002:23	ܒܟܠ ܐܘܡ̈ܢܘܢ ܪܗܛܬ ܗܘܬ ܗܪܘܕܝܐ ܘܐܙܕܟܝܬ
1.002:24	ܦ̈ܚܐ ܣܓܝ̈ܐܐ ܛܡܪܬ ܘܠܝܘܚܢܢ ܠܐ ܨܕܬ
1.002:25	ܟܣܦܐ ܘܕܗܒܐ ܫܚܕܬ ܗܘܬ ܘܠܟܪܘܙܐ ܠܐ ܩܛܠܬ
1.002:26	ܪܫܐ ܕܕܗܒܐ ܠܐ ܙܒܢܗ ܡܣܢܐ ܒܪܩܕܐ ܦܣܩܗ ܗܘܐ
1.002:27	ܕܗܒܐ ܩܛܿܠ ܙܟ̈ܝܐ ܚܝܠ ܝܘܚܢܢ ܠܐ ܐܫܟܚ
1.002:28	ܚܒ ܫܘܚܕܐ ܡܥܘܪ ܥܝ̈ܢܐ ܕܡܣܢܐ ܥܘܪ ܥܝ̈ܢܐ
1.002:29	ܐܢ ܥܝ̈ܢܐ ܕܡܠܟܐ ܥܘܪ ܘܠܐ ܒܚܪ ܗܘܐ ܠܡܢ ܩܿܛܠ ܗܘܐ
1.003:01	ܟܡܐ ܡܥܘܪ ܠܐܝܠܝܢ ܕܛܠܼܝܢ ܕܒܓܘܡܨܐ ܢܣܬܚܦܘܢ
1.003:02	ܫܡܼܥܝܢ ܘܙܘܥܝܢ ܓܐܝܼ̈ܬܐ ܡܛܠ ܡܿܢ ܡܝܬ ܝܘܚܢܢ
1.003:03	ܒܚܛܗܐ ܕܗܿܝ ܬܡܝܗܬܝ ܘܣܐܘܢܐ ܕܗܿܝ ܣܐܝܢܬܝ
1.003:04	ܓܘܢܚܐ ܕܥܒܕܬ ܡܿܕܚܠ ܠܟܝ ܘܕܡܿܐ ܡܣܢܟܝ ܠܡܣܢܗܿ
1.003:05	ܚܡܝܬܐ ܠܟܝ ܥܠ ܪܩܕܗܿ ܘܡܕܡܝܬܝ ܒܗ̈ܠܟܬܗܿ
1.003:06	ܚܕ ܗܘ ܬܒܪܐ ܬܒܪܬ ܗܿܝ ܠܐ ܬܟܝܢ ܐܢܬܝ ܣܓ̈ܝܐܐ
1.003:07	ܡܚܒܠܝܢ ܠܗܿ ܪ̈ܥܘܬܐ ܠܚܝܘܬܐ ܕܡܟܝܐ ܒܓܙܪܐ
1.003:08	ܪ̈ܥܘܬܢ ܕܝܢ ܐܦ ܠܐ ܟܐܦܐ ܫܿܕܝܢ ܒܚܝ̈ܘܬܐ
1.003:09	ܡܢܗܿ ܐܢܬܝ ܕܥܢܐ ܘܐܦ ܐܢܬܝ ܠܐ ܬܗܘܝܢ ܠܟܝ ܕܠܩܘܒܠܗܿ
1.003:10	ܗܘܝ ܒܗ ܢܩܝܐ ܒܓܙܪܐ ܠܐ ܬܗܝܢ ܒܗ ܚܝܘܬ ܫܢܐ
1.003:11	ܟܡܐ ܢܣܝܒܪ ܗܿܘ ܪܥܿܐ ܟܠ ܕܚܿܙܐ ܢܟܝܢ ܡܪܥܝܬܗ
1.003:12	ܠܚܝܡܢ ܠܢ ܐܦ ܒܪ̈ܝܬܐ ܕܠܒܪܘܝܐ ܐܪܓܙܢܢ
1.003:13	ܗܐ ܙܥܬ ܐܪܥܐ ܬܚܘܬܝܢ ܕܠܐ ܙܥܢܢ ܡܢ ܥܠܝܐ
1.003:14	ܫܩܝ̈ܦܐ ܪ̈ܡܐ ܐܬܬܠܚܘ ܕܥܼܒܪܬ ܐܢܘܢ ܪܡܘܬܢ
1.003:15	ܐܬܬܚܬܝܘ ܪ̈ܘܡܐ ܕܚܢܢ ܢܬܬܚܬܐ ܡܢ ܪܡܘܬܐ
1.003:16	ܐܬܥܩܪܘ ܐܦ ܐܝ̈ܠܢܐ ܕܥܝ̈ܕܐ ܒܝܼ̈ܫܐ ܢܥܩܘܪ
1.003:17	ܪܘܓܙܐ ܥܩܿܪ ܢܨܒ̈ܬܐ ܕܚܢܢ ܢܥܩܘܪ ܣܢܝ̈ܬܐ
1.003:18	ܡܚܘ ܒܪ̈ܩܐ ܘܐܘܒܫܘ ܡܢ ܫܠܝ ܕܠܒܐ ܕܟܐܦܐ ܢܬܪܟܿܟ
1.003:19	ܚܫܟܘ ܢܗܝܪ̈ܐ ܒܫܡܝܐ ܕܢܚܙܐ ܒܚܫܟܐ ܬܘ̈ܩܠܬܢ
1.003:20	ܒܗܿܘ ܥܕܢ ܕܚܫܼܟ ܢܘܗܪܐ ܟܠ ܐܢܫ ܡܘܡ̈ܘܗܝ ܚܿܙܐ ܗܘܐ
1.003:21	ܕܒܢܘܗܪܐ ܕܠܐ ܚܿܙܝܢ ܗܘܝܢ ܚܼܫܟ ܢܗܝܪܐ ܕܢܚܙܐ ܒܗ
1.003:22	ܗܘܝ̈ ܗܠܝܢ ܒܩܘܪܒܐ ܨܐܕܝܢ ܕܢܫܪ ܛܒܐ ܪܚܝܩܐ
1.003:23	ܒܕܘܼ̈ܚܠܐ ܙܥܘܪ̈ܐ ܢܕܚܠ ܕܡ ܢܓܕܐ ܩܫܝܐ ܢܐܬܐ
1.003:24	ܕܘ̈ܚܠܐ ܙܥܘܪ̈ܐ ܐܟܪܙܘ ܕܬܝܒܘܬܐ ܡܬܒܥܝܐ
1.003:25	ܠܐ ܬܝܒܘܬܐ ܕܝܘܡ̈ܬܐ ܐܠܐ ܕܝܪ̈ܚܐ ܘܕܫ̈ܢܝܐ
1.003:26	ܠܐ ܚܕ ܝܘܡ ܢܛܥܢ ܝܘܩܪܐ ܘܠܝܘܡܐ ܐܚܪܢܐ ܢܫܕܝܘܗܝ
1.003:27	ܢܡܿܙܓ ܢܛܥܢ ܕܘܒܪ̈ܐ ܕܙܘ̈ܕܐ ܠܐܘܪܚܢ ܢܗܘܘܢ
1.003:28	ܛܒ ܪܗܛܐ ܙܥܘܪܐ ܕܐܡܝܢ ܡܢ ܣܓܝܐܐ ܕܚܕ ܝܘܡܐ
1.004:01	ܝܘܬܪܢܐ ܙܥܘܪܐ ܕܐܡܝܢ ܡܨܐ ܗܿܘܐ ܓܙܐ ܪܒܐ
1.004:02	ܐܝܟܢܐ ܕܡܢ ܢܘ̈ܛܦܬܐ ܡܡܘܠܐ ܪܒܐ ܥܿܫܢ
1.004:03	ܬܘ ܢܒܨܘܪ ܩܠܝܠ ܩܠܝܠ ܡܢ ܗܿܢܘܢ ܥܝ̈ܕܐ ܩܕܡ̈ܐ
1.004:04	ܠܐ ܡܼܨܝܬ ܕܬܗܘܐ ܨܝܿܡܐ ܠܐ ܬܗܘܐ ܠܟ ܐܣܘܛܐ
1.004:05	ܒܨܘܪ ܩܠܝܠ ܡܢ ܡܐܟܘܠܬܟ ܘܗܐ ܨܘܡܟ ܥܠ ܦܬܘܪܟ
1.004:06	ܠܐ ܬܛܪܝܗܝ ܠܟ ܠܡܚܪ ܠܗܿܘ ܕܒܨܪܬܝܗܝ ܡܢ ܟܪܣܟ
1.004:07	ܗܒܝܗܝ ܟܠ ܝܘܡ ܠܣܢܝ̈ܩܐ ܘܗܐ ܡܠܝܬ ܕܘܟܬ ܨܘܡܐ
1.004:08	ܠܐ ܡܼܨܝܬ ܕܬܨܘܡ ܡܢ ܚܡܪܐ ܠܐ ܢܫܬܝܟ ܚܡܪܐ ܕܐܫܬܝܬ
1.004:09	ܠܐ ܫܿܠܐ ܚܡܪܐ ܒܓܘܟ ܐܝܟ ܕܫܠܐ ܗܘܐ ܒܡܐܢܗ
1.004:10	ܠܐܚܪ̈ܢܝܬܐ ܡܿܝܬܐ ܠܟ ܫܿܬܐ ܠܟ ܡܐ ܕܐܫܬܝܬܝܗܝ
1.004:11	ܕܥ ܕܐܝܢܐ ܕܩܫܼܐ ܡܢ ܚܕ ܒܝܬ ܣܓܝ̈ܐܐ ܡܫܬܦܠ
1.004:12	ܠܐ ܬܩܪܘܒ ܐܢܬ ܒܠܚܘܕܝܟ ܠܘܬ ܚܡܪܐ ܕܩܫܼܐ ܡܢܟ
1.004:13	ܢܫܬܘܢܝܗܝ ܥܡܟ ܝܬܡ̈ܐ ܘܗܐ ܙܟܝܬܝܗܝ ܥܡ ܣܓܝ̈ܐܐ
1.004:14	ܚܐܿܒ ܠܗ ܚܡܪܐ ܙܥܘܪܐ ܒܝܬ ܫ̈ܬܝܐ ܣܓܝ̈ܐܐ
1.004:15	ܐܝܟܢܐ ܕܗܘܝܘ ܙܿܟܐ ܡܐ ܕܣܿܓܝ ܡܢ ܫ̈ܬܝܘܗܝ
1.004:16	ܙܡܿܢ ܥܠܘܗܝ ܠܣܢܝ̈ܩܐ ܕܢܫܬܦܠ ܒܝܬ ܣ̈ܓܝܐܐ
1.004:17	ܣܩܐ ܠܡܠܒܫ ܢܟܿܦ ܐܢܬ ܙܥܘܪ ܗܘ ܠܟ ܡܐ ܕܠܒܫܬܝܗܝ
1.004:18	ܙܥܘܪ ܗܘ ܣܩܐ ܠܚܛܗ̈ܝܢ ܘܩܛܡܐ ܠܚܘܪ ܟܘܬܡ̈ܬܢ
1.004:19	ܢܟܿܦ ܐܢܬ ܒܣܘܡܥܠܐ ܒܨܒܬܐ ܕܙܠܝܠ ܐܬܟܚܕ
1.004:20	ܣܒ ܩܠܝܠ ܡܢ ܣܘܡܥܠܐ ܘܚܘܬ ܩܠܝܠ ܡܢ ܬܨܒܝܬܐ
1.004:21	ܠܒܘܫܐ ܡܨܥܝܐ ܣܒ ܠܟ ܠܐ ܕܙܠܝܠ ܐܦ ܠܐ ܕܬܚܘܒ
1.004:22	ܫܒܘܩ ܡܟ̈ܬܐ ܘܪ̈ܡܬܐ ܘܓܒܝ ܠܟ ܡܨܼ̈ܥܝܬܐ
1.004:23	ܠܐ ܚܕ ܝܘܡ ܥܠ ܡܘܟܟܐ ܘܐܚܪܢܐ ܥܠ ܦܘܢܩܐ
1.004:24	ܠܐ ܚܕ ܝܘܡܐ ܥܠ ܩܛܡܐ ܘܐܚܪܢܐ ܥܠ ܦܘܪܦܥܐ
1.004:25	ܐܘ ܐܬܥܠܝܬ ܠܫܡܝܐ ܐܘ ܐܬܬܚܬܝܬ ܠܬܗܘܡܐ
1.005:01	ܩܫܝܐ ܠܟ ܚܦܝܝܘܬܐ ܠܐ ܬܣܐܢ ܙܠܝܠܐܝܬ
1.005:02	ܠܐ ܬܫܡܫ ܚܦܝܝܘܬܐ ܐܦ ܠܐ ܣܐܘܢܐ ܙܠܝܠܐ
1.005:03	ܚܕ ܝܘܡܐ ܫܦܠܐ ܪܒܐ ܘܐܚܪܢܐ ܣܩܠܐ ܪܒܐ
1.005:04	ܚܕ ܥܕܢ ܒܟܝܐ ܬܟܝܒܐ ܘܐܚܪܢܐ ܓܘܚܟܐ ܣܪܝܚܐ
1.005:05	ܗܠܝܢ ܡܘܫ̈ܚܬܐ ܣܒ ܠܟ ܕܐܬܬܩܢ ܡܢ ܦܪ̈ܘܫܐ
1.005:06	ܣܐܘܢܐ ܢܟܦܐ ܝܐܿܐ ܠܗܿ ܠܪܓܠܐ ܕܐܬܝܐ ܠܨܠܘܬܐ
1.005:07	ܐܬܝܐ ܠܡܣܒ ܥܘܕܪܢܐ ܠܐ ܬܟܐ ܗܝ ܚ̈ܙܝܐ
1.005:08
1.005:09	ܒܕܪ ܠܗܿ ܡܢܘ ܠܟ
1.005:10	ܐܘ ܠܒܐ ܘܡܦܪܣܐ ܠܟ ܥܫܝܩܐ ܥܝܢܐ ܘܛܠܝܡܐ
1.005:11	ܕܡܢ ܟܠ ܪ̈ܓܫܝܢ ܙܠܝܠܐ ܟܕ ܐܝܬ ܗܘ ܕܒܝܫܝܢ ܡܢܗܿ
1.005:12	ܗܕܡ̈ܐ ܕܒܓܘ ܦܓܪܐ ܗܐ ܟܠ ܗܕܡ̈ܝܢ ܐܟܚܕ
1.005:13	ܦܘܪܣܝܗ ܕܠܒܐ ܓܿܠܝܢ ܦܠܝܓܝܢ ܐܢܘܢ ܗܕܡ̈ܐ
1.005:14	ܥܠ ܠܒܐ ܡܠܟܐ ܕܪ̈ܓܫܐ ܐܢ ܦܠܛܿ ܠܒܐ ܩܿܛܪ
1.005:15	ܐܪܙܐ ‍[‍ܕܚ‍]‍ܘܒܐ ܥܡ ܡܕܡ ܐܪܙܗ ܓܠܝܢ ܗܕܡ̈ܐ
1.005:16	ܕܐܠܝܠܗ ܡܢ ‍[‍ܒܝ‍]‍ܬܝܐ ܗܘ ܦܘܡܐ ܒܫܪܒܐ
1.005:17	܂܂܂܂
1.005:18	ܒܗܘܿ ܡܡܠܠܐ ܕܨܗܝܢ ܠܡܨܬ ܐܟܪܙ ܡܿܢܘ ܪܥܝܢܐ
1.005:19	ܬܫܥܝܬܐ ܕܠܗܠܝ̈ܢ ܒܣܡܟ‍[‍ܐ‍]‍ ܡܚܙܝܬܗ ܗܝ ܕܪܥ‍[‍ܝܢܐ
1.005:20	ܒܗ ܗܘ ܚܙܐܘܗܝ ܟܣܝ̈‍[‍ܬܐ‍]‍ ܢܣܼ̈ܝܘ ܡܢܐ ܒܣܿܡ ܠܗ
1.005:21	ܨܗܝܗ ܗܘ ܕܪܥܝܢܐ ܘܡܥܠܐ ܡܫܡܥܬܐ
1.005:22	ܬܫܥܝ ܪܚܿܡ ܗܘ ܕܢܣ ܠܗ ܡܐ ܕܪܚܼܡ
1.005:23	ܫܿܦܥ ܓܝܪ ܡܢ ܐܕܢܐ ܂ ܂ ܂ ܂ ܂ ܂ ܂ ܂
1.005:24	ܡܦܪܣܝܢ ܠܗ ܡ̈ܫܚܐ ܘܒܣܡ̈ܐ ܕܢܚܘܘܢ ܬܙܝܙܘܬܗ
1.005:25	ܡܦܪܣܐ ܠܗ ܣܩܠܐ ܕܪܫܐ ܕܢܚܘܐ ܪܟܢ ܪܫܐ ܗܘ
1.005:26	ܡܦܪܣܐ ‍[‍ܠܗܚ‍]‍ܘܠܦ ܢܚ̈ܬܐ ܕܢܚܘܐ ‍[‍ܙܠܝܠܘ‍]‍ܬܗ
1.005:27	ܟܠܗ ܩܿܥܐ ܥܠ ܕܐܝܬܘܗܝ ܥܒܕܐ ܬܐ
1.006:01	ܠܒܐ ܡܠܟܐ ܐ ܥܒܝܕ ܥܒܕܐ ܬܐ
1.006:02	ܗܕܡ̈ܐ ܕܠܒܪ ‍[‍ܪܓ‍]‍ܫܗܘܢ ܕܠܓܘ ܐܫܬܦܠ
1.006:03	܂܂܂܂
1.006:04	ܡܚܙܝܬܐ ܗܝ ܕܬܪܥܝܬܗ ܨܝܪܢ ܐܢܝܢ ܠܦܪ̈ܘܫܐ
1.006:05	ܟܣܝ̈ܬܗ ܒܓܘ ܓܠܝ̈ܬܗ ܐܦ ܢܦܫܐ ܕܠܐ ܡܬܚܙܝܐ
1.006:06	ܒܦܓܪܐ ܡܨܝܐ ܡܬܚܙܝܐ ܐܝܠܝܢ ܐܢܘܢ ܟܝ̈ܢܐ ܕܢܦܫܐ
1.006:07	ܦܓܪܐ ܡܫܟܚ ܡܠܦ ܠܟ ܐܢ ܐܝܬ ܪܓܬܐ ܒܟܝܢܗܿ
1.006:08	ܦܓܪܐ ܡܫܟܚ ܓܿܠܐ ܠܟ ܐܢ ܐܝܬ ܒܗ ܐܦ ܫܘܒܗܪܐ
1.006:09	ܓܘܫܡܐ ܡܫܟܚ ܕܢܒܕܩ ܩܪܘܒ ܠܟ ܨܝܕ ܦܓܪܐ ܕܠܒܪ
1.006:10	ܘܗܐ ܚܙܝܬܗܿ ܟܠܗܿ ܒܟܠܗ ܚܙܝ ܐܢ ܛܒܐ ܒܟܝܢܗܿ
1.006:11	ܒܨܝ ܐܢ ܒܝܫܐ ܒܟܝܢܗܿ ܠܐ ܕܝܢ ܒܝܫܐ ܐܘ ܛܒܐ
1.006:12	ܕܨܒܝܢܗܿ ܗܘ ܛܒ ܐܘ ܒܝܫ ܩܪܘܒ ܨܝܕ ܪ̈ܓܫܐ ܒ̈ܪܝܐ
1.006:13	ܘܗܐ ܡܢܘ ܠܟ ܡܘܡ̈ܐ ܕܠܓܘ ܠܐ ܬܥܩܒ ܥܠ ܟܣ̈ܝܬܐ
1.006:14	ܕܡܦܝܣܢ ܠܟ ܓܠܝ̈ܬܐ ܩܥܼܐ ܢܒܝܐ ܕܒܢ̈ܬ ܨܗܝܘܢ
1.006:15	ܒܡܣܢܐ ܘܪܩܕܐ ܐܪܓܙ ܚܫܼܒ ܘܡܼܢܐ ܬܨܒܝ̈ܬܝܗܝܢ
1.006:16	ܘܦܚܿܡ ܣܡ ܐܘ̈ܠܨܢܝܗܝܢ ܕܢܫܘܛܢ ܬܨܒܝ̈ܬܝܗܝܢ
1.006:17	ܡܢ ܕܚܠܐ ܕܐܘ̈ܠܨܢܝܗܝܢ ܐܘܦܝ ܘܡܢܐ ܨܒ̈ܬܝܗܝܢ
1.006:18	ܘܩܼܪܐ ܥܠܝܗܝܢ ܫܒ̈ܝܐ ܦܚܿܡ ܣܡ ܚܠܐ ܕܐܘܪܚܐ
1.006:19	ܠܘܩܒܠ ܒܕܪܐ ܕܒܣܡ̈ܢܐ ܚܠܦ ܒܠܘܪ̈ܐ ܕܪܓܝܓܝܢ
1.006:20	ܥܠ ܩܘܕ̈ܚܬܐ ܕܢܕܝܕܢ ܚܠܦ ܟܘܠܠܐ ܕܓܕܘ̈ܠܐ
1.006:21	ܝܗܼܒ ܗܘܐ ܠܗܝܢ ܪܫܐ ܦܪܝܥܐ ܚܠܦ ܬ̈ܟܐ ܘܐܣܪ ܚ̈ܨܐ
1.006:22	ܒܡܝܙܪ̈ܢܐ ܐܣܪ ܚܨ̈ܝܗܝܢ ܡܼܠܟ ܗܘܐ ܠܗܝܢ ܚܦܝܝܘܬܐ
1.006:23	ܚܠܦ ܣܩܠܐ ܕܡܣ̈ܢܝܗܝܢ ܕܦܠܼܚ ܪܘܫܥܐ ܟܣܝܐܝܬ
1.006:24	ܫܒܝܐ ܦܪܣܝ ܓܠܝܐܝܬ ܙܢܝܘܬܐ ܗܿܝ ܕܪܚܡ ܗ̈ܘܝ
1.006:25	ܝܗܒܗܿ ܗܘܐ ܠܗܝܢ ܒܫܒܝܬܐ ܙܢܝܘܬܐ ܒܫܒܝܐ ܚܫܬ
1.006:26	ܕܚܘܫܚܐ ܗܘܐ ܕܠܐ ܛܟܣܐ ܣܘܥܪܢܐ ܗܘܐ ܕܠܐ ܢܡܘܣ
1.006:27	ܕܩܛܝܪܐ ܘܠܐ ܕܨܒܝܢܐ ܝܗܒ ܙܢܝܘܬܐ ܠܛܡܐ̈ܬܐ
1.006:28	ܘܠܘ ܐܝܟ ܨܒܝܢܗܝܢ ܝܗܒܗܿ ܠܐ ܝܗܒܗܿ ܠܗܝܢ ܐܝܟ ܕܪܚܡ
1.006:29	ܕܠܐ ܢܒܛܠ ܠܗ ܢܘܩܡܐ ܠܘ ܐܝܟ ܨܒܝܢܗܝܢ ܙܢܝ
1.007:01	ܕܐܝܟ ܨܒܝܢܗܝܢ ܙܢܝ ܗܘ̈ܝ ܗܿܝ ܕܐܝܬ ܗܘܐ ܠܗܝܢ ܠܢܝܚܐ
1.007:02	ܐܝܟ ܕܠܫܘܢܩܐ ܝܗܒܗܿ ܒܡܕܡ ܕܐܪܓܙ ܐܫܬܢܩ
1.007:03	ܕܚܟܝܡ ܘܨܢܝܥ ܦܪܘܥܐ ܣܛܘ ܒܫܒܝܐ ܦܓܪ̈ܝܗܝܢ
1.007:04	ܘܣܪܝܘ ܒܗ ܒܣܡ̈ܢܝܗܝܢ ܐܬܚܒܠܘ ܒܗ ܫܘܦܪ̈ܝܗܝܢ
1.007:05	ܘܚܡܝܘ ܘܐܒܕ ܓܘܢܝ̈ܗܝܢ ܠܐ ܝܕܝܥܢ ܗܘܝ̈ ܒܫܒܝܬܐ
1.007:06	ܕܐܝܕܝܥܢ ܗܘ̈ܝ ܒܡܕܝܢܬܐ ܠܝܬ ܕܝܕܥ ܐܢܝܢ ܡܢ ܥܝܢ
1.007:07	ܕܒܫܒܝܐ ܫܢܘ ܙܝ̈ܘܝܗܝܢ ܒܫܡܗ̈ܝܗܝܢ ܫܡܘܥܐ
1.007:08	ܝܿܕܥ ܗܘܐ ܠܗܝܢ ܡܐ ܕܥܢܝ ܫܒܝܐ ܫܿܦܠ ܓܐܝ̈ܬܐ
1.007:09	ܕܒܓܘ ܫܝܢܐ ܐܬܦܪܦܥ ܕܠܡܪܐ ܫܝܢܐ ܐܪܓܙ
1.007:10	ܚܘܪܒܐ ܡܢܗܝܢ ܐܬܢܩܡ ܐܝܕܐ ܕܓܐܝܬ ܦܪܨܘܦܗܿ
1.007:11	ܐܦܝܗܿ ܕܝܠܗܿ ܣܛ ܐܣܓܝ ܩܕܡ ܚܕ ܛܗܪܐ ܠܐ ܥܙܝ
1.007:12	ܗܿܘ ܡܘܪܩܐ ܕܫ̈ܢܝܐ ܦܩ̈ܚܐ ܦܐܼ̈ܝܐ ܓܘܢܝ̈ܗܝܢ
1.007:13	ܡܛܠ ܚܘܡܐ ܘܚܡܼܝܘ ܐܟܚܕ ܣܛܘ ܒܫܡܫܐ ܨܒ̈ܬܝܗܝܢ
1.007:14	ܘܗܒ̈ܒܐ ܒ̈ܢܝ ܛܠܠܐ ܒܨܒܬܐ ܕܫܝܢܐ ܣܢܝܢ ܗ̈ܘܝ
1.007:15	ܠܪܡܐ ܪܚܿܡ ܡܟܝ̈ܟܐ ܕܒܥܘܼܠܐ ܕܫܒܝܐ ܫܦܪ ܗܘ̈ܝ
1.007:16	ܠܟܐܢܐ ܪܚܿܡ ܬܝܒ̈ܐ ܒܫܝܢܐ ܦܓܪܐ ܡܦܪܓ ܗܘܐ
1.007:17	ܒܫܒܝܐ ܪܘܚܐ ܦܐܝܐ ܗܘܬ ܣܩܼܠ ܐܢܝܢ ܒܝܫܼܐ ܒܫܝܢܐ
1.007:18	ܕܒܨܒ̈ܬܝܗܝܢ ܢܣܬܢܝܢ ܛܒܐ ܒܫܒܝܐ ܐܣܢܝ ܐܢܝܢ
1.007:19	ܕܢܨܛܒܬܢ ܠܗ ܒܬܘܬܐ ܒܒܒܠ ܘܐܬܘܪ ܕܐܝܬܝܗܝܢ
1.007:20	ܫܒܒ̈ܬܢ ܩܪ̈ܝܒܬܐ ܗܠܝܢ ܕܠ ܘܣܠܼܩ ܘܫܒܝ
1.007:21	ܠܒ̈ܢܬ ܨܗܝܘܢ ܥܠ ܕܐܪܫܥ ܐܢ ܡܢ ܪܘܚܩܐ ܐܙܠܘ ܘܫܒܘ
1.007:22	ܟܡܐ ܟܝ ܫܿܒܝܢ ܡܢ ܩܘܪܒܐ ܟܐܝ ܢܨܝܒܝܢ ܒܒܢ̈ܬܟܝ
1.007:23	ܕܠܐ ܟܐܬ ܨܗܝܘܢ ܒܒܢ̈ܬܗܿ ܐܡ̈ܗܬܟܝ ܗܐ ܙܠܝܠܢ
1.007:24	ܚܐܪ̈ܬܟܝ ܠܐ ܝܩܝܪܢ̈ ܗܐ ܒܬܘ̈ܠܬܟܝ ܡܪ̈ܚܢ
1.007:25	ܗܐ ܢܟ̈ܦܬܟܝ ܚܨܝܦܢ ܠܒܘܫܐ ܕܢܚ̈ܬܝܗܝܢ ܚܨܝܦ
1.007:26	ܣܐܘܢܐ ܕܪ̈ܓܠܝܗܝܢ ܙܠܝܠ ܗܠܝܢ ܕܐܙܠܢ ܠܚܠܘܠܐ
1.007:27	ܠܐ ܣܩܝܠܢ ܐܝܟ ܢܟ̈ܦܬܢ ܒܣܘܡܥܠܐ ܗ̈ܘܝ ܕܠܒܘܫܐ
1.007:28	ܥܕܠܐ ܢܐܬܝܢ ܠܬܘܠܡܕܐ ܡܢ ܕܐܬܬܠܡܕ ܐܨܛܒܬ
1.007:29	ܡܢ ܕܐܬܢܟܦ ܐܙܕܠܠ ܒܬܘ̈ܠܬܐ ܗܘ̈ܝ ܢܟ̈ܦܬܐ
1.008:01	ܚܒܝܫ̈ܬܐ ܕܒܬܘ̈ܢܐ ܩܢܝ ܦܗܝܐ ܚܠܦ ܟܘܢܟܐ
1.008:02	ܐܦ ܫܘܩ̈ܐ ܚܠܦ ܬܘ̈ܢܐ ܬܚܝܬ ܐܝܕܐ ܕܐܒܐ ܘܐܡܐ
1.008:03	ܡܬܢܛܪܢ ܗ̈ܘܝ ܡܢ ܠܘܩܕܡ ܓܒܝ ܕܝܢ ܥܕܬܐ ܚܠܦ ܐܡܐ
1.008:04	ܘܡ̈ܠܦܢܐ ܚܠܦ ܐܒܗ̈ܐ ܒܗܢܐ ܦܪܨܘܦܐ ܫܪܝ
1.008:05	ܒܗܕܐ ܬܢܘܝ ܠܐ ܩܘܝ ܡܼܪܕ ܡܢ ܥܕܬܐ ܘܡܢ ܐܡܐ
1.008:06	ܘܡܢ ܡ̈ܠܦܢܐ ܘܐܒܗ̈ܐ ܥܕ ܠܐ ܢܐܬܝܢ ܨܝܕ ܢܝܪܐ
1.008:07	ܬܚܝܬ ܐܝܕܐ ܡܬܢܛܪܢ ܗ̈ܘܝ ܗܫܐ ܕܝܢ ܒܫܡ ܢܝܪܐ
1.008:08	ܪܫܗܝܢ ܐܦܠܛ ܡܢ ܢܝܪܐ ܠܬܘܠܡܕܐ ܘܛܟܣܐ ܩܪܒ ܗ̈ܘܝ
1.008:09	ܘܠܩܪܝܢܐ ܘܝܘܠܦܢܐ ܠܐ ܠܫܢܗܝܢ ܒܩܪܝܢܐ
1.008:10	ܘܠܐ ܪܥܝܢܗܝܢ ܒܟܬܒܐ ܒܗܓܝܢܐ ܐܚܪܢܐ ܠܐܝܢ
1.008:11	ܒܥܢܝܢܐ ܐܚܪܢܐ ܪܡܝܢ ܫܠܚܢܗܿ ܠܟܠܗܿ ܢܟܦܘܬܐ
1.008:12	ܫܡܗܿ ܒܠܚܘܕ ܩܿܝܡ ܨܐܕܝܢ ܫܡܐ ܕܝܩܝܪ ܡܢ ܟܠ ܒܪ̈ܝܢ
1.008:13	ܐܙܠܝܗܝ ܣܿܓܝ ܣܟ̈ܠܬܐ ܠܝܬ ܕܚܿܙܐ ܘܡܫܒܚ
1.008:14	ܕܟܠ ܐܢܫ ܚܿܙܐ ܘܡܒܙܚ ܬܠܡ̈ܝܕܐ ܒܿܥܐ ܟܠ ܐܢܫ
1.008:15	ܒܟܠ ܦܘܪ̈ܣܝܢ ܕܢܟܿܢܫ ܠܗ ܩܕܡ ܕܢܐܠܦ ܗܐ ܡܠܦ
1.008:16	ܩܕܡ ܕܢܗܓܐ ܗܐ ܡܩܪܐ ܒܟܠ ܥ̈ܠܠܢ ܗܕܐ ܒܿܥܐ
1.008:17	ܕܫܡ ܪ̈ܒܢܐ ܢܣܒ ܠܗ ܠܝܬ ܒܢ ܕܒܚܫܐ ܡܠܦ
1.008:18	ܐܦܠܐ ܕܒܟܐܒܐ ܝܿܠܦ ܕܡܠܦ ܡܛܠ ܫܘܒܗܪܐ
1.008:19	ܕܝܠܦ ܡܛܠ ܐܝܩܪܐ ܐܦ ܗܼܘ ܐܝܢܐ ܕܡܬܬܠܡܕ
1.008:20	ܦܬܝܠ ܗܘ ܡܢܗ ܕܫܘܪܝܐ ܐܢ ܡܣܟܝܢ ܐܬܪܘܪܒ ܠܗ
1.008:21	ܘܐܢ ܬܚܘܒ ܐܬܓܐܝ ܠܗ ܦܥܠܐ ܕܐܬܡܠܝ ܐܬܬܠܡܕ
1.008:22	ܫܪܝ ܡܓܐܐ ܨܒܥ̈ܬܗ ܛܠܝܐ ܕܝܘܡܢ ܐܬܬܠܡܕ
1.008:23	ܫܪܝ ܦܩܿܕ ܒܝܬ ܣ̈ܒܐ ܘܐܢ ܥܒܕܐ ܗܘ ܘܬܚܝܬ ܢܝܪܐ ܗܘ
1.008:24	ܢܦܼܩ ܠܗ ܕܢܗܘܐ ܓܒܿܝܐ ܠܘ ܠܐܘܪܚܐ ܗܿܝ ܕܐ̈ܘܢܐ
1.008:25	ܬܼܪܨܘ ܘܢܦܩܘ ܬܘ̈ܠܡܕܝܗܘܢ ܠܒܪ ܡܢܗܿ ܕܐܘܪܚܐ ܪܗܿܛ
1.008:26	ܬܘܠܡܕܐ ܕܗܘܐ ܒܫ̈ܢܝܢ ܗܦܟܐܝܬ ܫܡܼܥܢ ܐܢܝܢ
1.008:27	ܠܗܠܝܢ ܕܟܠ ܝܘܡ ܡܬܩܪܝܢ ܬܩܢܐܝܬ ܕܝܢ ܡܬܟܬܒܢ
1.008:28	ܘܬܩܢܐܝܬ ܐܦ ܡܬܩܪܝܢ ܗܦܟܐܝܬ ܕܝܢ ܡܫܬܡܥܢ
1.008:29	ܒܕܗܦܟܐܝܬ ܡܣܬܥܪܢ ܩܡ ܐܠܗܐ ܒܝܬ ܕܝܢܼܐ
1.008:30	ܘܒܠܼܥ ܦܟܐ ܡܢ ܥܒܕܐ ܐܢܚܢܢ ܠܐ ܡܨܝܐ ܡܫܡܥܬܢ
1.009:01	ܡܠ‍<‍ܬ‍>‍ܐ ܙܥܘܪܬܐ ܕܬܣܝܒܪ ܡܢ ܕܠܩܐ ܙܥܘܪܐ ܪܬܚ
1.009:02	ܘܐܫܿܕ ܚܡܬܗ ܪܥܝܢܢ ܣܡܢ ܥܠܝܢ ܫܡܐ ܬܩܢܐ
1.009:03	ܘܗܦܟܝܝܢ ܐܢܚܢܢ ܒܥܒܕܐ ܗܿܘ ܕܪܘܩܗ ܦܬܚ ܣܡܝܐ
1.009:04	ܥܘܝܪ̈ܐ ܒܐ̈ܦܘܗܝ ܪܩܘ ܗܘܘ ܠܗ ܗܿܘ ܕܢܦܚ ܪܘܚܐ ܕܩܘܕܫܐ
1.009:05	ܪܘܩܐ ܛܡܐܐ ܩܒܿܠ ܗܘܐ ܐܨܛܥܪ ܗܿܘ ܦܪܨܘܦܐ
1.009:06	ܕܡܪܗܒ ܙܝܘܗ ܠܣܪ̈ܦܐ ܚܢܢ ܩܨܝܨܐ ܦܐܬܐ ܕܒ̈ܢܝܢ
1.009:07	ܣܩܝܠܢ ܐ̈ܦܐ ܕܒ̈ܢܬܢ ܠܐ ܝܕܥܢܢ ܠܐܝܟܐ ܐܬܝܢܢ
1.009:08	ܠܐ ܝܕܥܢܢ ܠܐܝܟܐ ܩܪܐܘܢ ܐܝܟ ܕܠܒܝܬ ܚܠܘܠܐ ܐܬܝܢܢ
1.009:09	ܠܨܒܬܐ ܫܢܝܐ ܘܒܣܡܿܐ ܐܝܢܐ ܕܦܿܓܥ ܒܩܛܝܠܐ
1.009:10	ܓܘܢܗ ܡܢ ܫܠܝ ܡܬܚܒܠ ܒܢܒ̈ܝܐ ܩܛܝ̈ܠܐ ܗܓܝܬ
1.009:11	ܒܫ̈ܠܝܚܐ ܪ̈ܓܝܡܐ ܩܪܝܬ ܟܕ ܓܚܟܝܢ ܚܢܢ ܩܿܪܝܢ ܚܢܢ
1.009:12	ܒܢܒ̈ܝܐ̈ ܐܦ ܒܫ̈ܠܝܚܐ ܐܠܗܐ ܬܠܐ ܥܠ ܩܝܣܐ
1.009:13	ܘܩܛܝܪ ܐܒܠܐ ܠܒܪ̈ܝܬܐ ܘܠܢ ܫܬܝܐ ܠܢ ܡܐܪܝܬܐ
1.009:14	ܘܪܟܝܒܐ ܠܢ ܪܡܘܬܐ ܢܫ̈ܝ ܓܒܪ̈ܐ ܐܣܬܡܥܠ
1.009:15	ܘܗܐ ܡܣܬܩܠܢ ܢܟ̈ܦܬܢ ܣܩܝܠ ܦܪܨܘܦܐ ܒܪܝܐ
1.009:16	ܡܟܬܡ ܡܢ ܓܘ ܪܥܝܢܐ ܐܦ ܐܠܘ ܠܝܬ ܩܪܒܐ
1.009:17	ܩܪ̈ܒܐ ܡܥܝܪܝܢ ܨܒ̈ܬܝܗܝܢ ܗܫܐ ܕܫܒܝܐ ܥܠ ܬܪܥܐ
1.009:18	ܡܿܢܘ ܟܝ ܕܡܛܝܒ ܠܢ ܒ̈ܢܬ ܥܠܡܐ ܠܥܘܡܪܐ ܫܛܝܗܝ
1.009:19	ܘܗܐ ܚܢܝܩܢ ܒܗ ܣ̈ܟܠܬܐ ܟܠ ܡܐ ܕܫܠܚܘ ܒܪ̈ܝܐ
1.009:20	ܗܐ ܠܒܝܫܝܢ ܠܗ ܓܘ̈ܝܐ ܒ̈ܢܝ ܐܪܥܐ ܫܒܩܘܗܿ ܠܐܪܥܐ
1.009:21	ܘܗܐ ܬܥܫܝܢ ܒܗܿ ܩܕܝ̈ܫܐ ܫܛܘ ܥܢܐ ܡܪ̈ܝ ܥܢܐ
1.009:22	ܘܩܢܐܘܗܿ ܪ̈ܥܘܬܢ ܒܓܙܪ̈ܐ ܕܠܓܘ ܒܿܣܝܢ
1.009:23	ܘܒܗܿܢܘܢ ܕܠܒܪ ܠܐܿܝܢ ܚܠܦ ܥܢܐ ܥܢܐ ܩܿܢܝܢ
1.009:24	ܚܝܘ̈ܬܐ ܚܠܦ ܢܦܫ̈ܬܐ ܚܠܦ ܥܪ̈ܒܐ ܥܪ̈ܒܐ ܪܥܿܝܢ
1.009:25	ܥܒܘܪ̈ܐ ܚܠܦ ܫܪܝܪ̈ܐ ܟܘܠ ܥܠ ܐܝ̈ܕܝ ܡܢܝܐ
1.009:26	ܥܒܪܐ ܥܢܐ ܘܡܬܚܫܒܐ ܘܬܚܝܬ ܐܝܕܐ ܕܥ̈ܠܢܐ
1.009:27	ܡܬܦܩܕܐ ܐܦ ܡܣܬܥܪܐ ܥܢܐ ܕܢܟ̈ܦܐ ܘܢܟ̈ܦܬܐ
1.009:28	ܡܼܢܘ ܦܩܿܕ ܡܢܝܢܗ ܗܢܘܢ ܠܗܘܢ ܪܥܿܝܢ ܥܪ̈ܒܐ
1.009:29	ܒܟܠ ܐܝܟܐ ܕܨܒܘ ܦܗܝܢ ܗܼܝ ܠܗܿ ܢܛܪܐ ܡܪܥܝܬܐ
1.010:01	ܡܢ ܕܐ̈ܒܐ ܕܟܪܝܟܝܢ ܠܗܿ ܢܩܝܐ ܒܕܒܪܐ ܐܢ ܦܣܩܬ
1.010:02	ܡܼܢ ܚܒܪ̈ܬܗܿ ܡܬܦܩܕܐ ܠܢܩܘ̈ܬܗ ܕܡܫܝܚܐ
1.010:03	ܡܼܢܘ ܣܿܥܪ ܘܡܛܟܣ ܢܩܝܐ ܕܠܒܪ ܡܬܦܩܕܐ
1.010:04	ܬܒܥܝܢ ܪܘܫܡܗܿ ܐܢ ܬܐܒܕ ܪܘܫܡܐ ܘܫ̈ܠܚܐ ܡܬܬܒܥܝܢ
1.010:05	ܪܘܚܐ ܘܦܓܪܐ ܐܒܝܕܝܢ ܚܒܝܒܢ ܠܢ ܚܝܘ̈ܬܐ
1.010:06	ܡܢ ܪ̈ܘܚܬܐ ܘܢܦܫ̈ܬܐ ܫܒܩ ܒܪܘܝܐ ܟܠ ܒܪ̈ܝܢ
1.010:07	ܘܐܬܐ ܕܢܒܥܐ ܢܦܫ̈ܬܢ ܚܢܢ ܕܝܢ ܐܪܦܝܢ ܢܦܫ̈ܬܐ
1.010:08	ܠܒܥܝܪܐ ܥܒ̈ܕܐ ܗܘܝܢܢ ܡܿܢ ܠܐ ܢܨܪܐ ܬܟܣܝܬܗ
1.010:09	ܥܠ ܗܢܐ ܓܘܢܚܐ ܪܒܐ ܡܫܡܫ̈ܢܝܗܿ ܕܐܠܗܘܬܐ
1.010:10	ܠܒܥܝܪܐ ܗܘܼܘ ܫܡ̈ܫܐ ܗܿܘ ܪܥܿܐ ܟܠ ܕܐܬܼܐ ܗܘܐ
1.010:11	ܕܚܕ ܥܪܒܐ ܕܛܥܼܐ ܢܫܟܚ ܬܫܥܝܢ ܘܬܫܥܐ ܕܫܟܝܚܝܢ
1.010:12	ܐܢ ܛܿܥܝܢ ܠܐ ܡܬܦܩܕܝܢ ܛܒܝܢ ܠܢ ܐܡܪ̈ܐ ܕܠܒܪ
1.010:13	ܡܢ ܝܠܘ̈ܕܐ ܕܐܬܬܠܡܕܘ ܐܡܪ̈ܐ ܒܐܡܪ̈ܐ ܐܬܚܠܦܘ
1.010:14	ܘܒ̈ܓܕܝܐ ܒ̈ܢܝ ܡܠܟܘܬܐ ܚܘܪ̈ܐ ܒ̈ܢܝ ܝܡܝܢܐ
1.010:15	ܒܐܘܟܡ̈ܐ ܒܢ̈ܝ ܣܡܠܐ ܠܘܝ ܕܝܢ ܐܝܟ ܥܢܐ ܕܠܒܪ
1.010:16	ܡܬܢܛܪܐ ܥܢܐ ܕܠܓܘ ܥܢܐ ܕܥܪ̈ܒܐ ܐܬܢܛܪܬ
1.010:17	ܥܢܐ ܕܐܢܫܐ ܐܬܒܣܝܬ ܐܗܡܝܢܢ ܡܢ ܕܝܗܝܒܐ
1.010:18	ܘܒܕܠܐ ܝܗܝܒܐ ܐܬܦܫܚܢ ܚܫܒܝܢ ܛܒ ܪ̈ܥܘܬܢ
1.010:19	ܥܡ ܪ̈ܥܘܬܐ ܕܠܒܪ ܥܡܗܘܢ ܟܝ ܐܝܟܢ ܚܫܿܒ
1.010:20	ܗܿܘ ܪܒܐ ܕܪ̈ܥܘܬܐ ܕܥܢܐ ܒܥܢܗ ܚܠܦܢܢ
1.010:21	ܠܥܢܗ ܒܥܢܢ ܬܒܿܥ ܠܗܿ ܡܪܥܝܬܐ ܕܥܪ̈ܒܐ ܬܗܘܐ
1.010:22	ܡܚܙܝܬܐ ܠܥܢܐ ܕܠܓܘ ܟܪܡܐ ܗܿܘ ܕܗܘܐ ܠܚܒܝܒܝ
1.010:23	ܒܩܪܢܐ ܕܐܬܪܐ ܫܡܝܢܐ ܥܩܪܗ ܠܟܪܡܐ ܛܠܘܡܐ
1.010:24	ܘܢܼܨܒ ܠܗ ܚܕܬܐ ܚܠܦܘܗܝ ܟܪ̈ܡܐ ܕܙܒܢܐ ܡܬܦܠܚܝܢ
1.010:25	ܛܒ ܡܢ ܟܪܡܐ ܕܫܪܪܐ ܐܚܪܒ ܪܘܓܙܐ ܟܠ ܟܪ̈ܡܝܢ
1.010:26	ܕܒܟܪܡܐ ܕܩܘܫܬܐ ܢܦܠܘܚ ܚܛܬܐ ܦܠܝܚܐ ܘܙܪܝܥܐ
1.010:27	ܘܢܦܫܐ ܚܢܝܩܐ ܒܝܬ ܟܘ̈ܒܐ ܐܚܪܒ ܟܐܢܐ ܚܩ̈ܠܬܢ
1.010:28	ܐܒܕܬ ܩܪܢܐ ܘܪܒܝܬܐ ܕܢܐܬܐ ܙܪܥܢ ܓܘܝܐ
1.010:29	ܒܬܠܬܝܢ ܘܫܬܝܢ ܘܡܐܐ ܣܝܡ ܒܢܝܢܢ ܥܠ ܫܘܥܐ
1.010:30	ܘܥܠ ܚܠܐ ܒܢܐ ܪܥܝܢܢ ܣܥܐ ܪܘܓܙܐ ܘܥܩܪ ܟܪ̈ܟܐ
1.010:31	ܕܢܒܢܐ ܢܦܫܢ ܥܠ ܩܘܫܬܐ ܐܬܕܟܪܝܗܿ ܠܣܝܒܘܬܐ
1.011:01	ܐܘ ܛܠܝܘܬܐ ܡܨܒܬܬܐ ܕܩܦܠܐ ܡܢܟܝ ܬܚܦܝܬܐ
1.011:02	ܘܦܪܣܐ ܡܘܡ̈ܐ ܥܠ ܟܘܠܟܝ ܠܠܡܐܢܗܿ ܕܢܕܝܕܘܬܐ
1.011:03	ܟܢܫܐ ܟܠܗܿ ܓܐܝܘܬܟܝ ܚ̈ܙܝܐ ܕܒܗܢ ܙܒܢܐ
1.011:04	ܡܬܐܠܨܝܢ ܕܢܚܘܪܘܢ ܒܟܝ ܒܗܕܐ ܐܠ‍<‍ܝ‍>‍ܨܝܢ ܡܐ ܕܣܐܒܬܝ
1.011:05	ܕܢܦܢܿܘܢ ܡܢܟܝ ܐ̈ܦܝܗܘܢ ܐܬܕܟܪܝܘܗܝ ܠܟܘܪܗܢܐ
1.011:06	ܕܒܗ ܚܡܿܐ ܘܪܕܐ ܕܐ̈ܦܝܟܝ ܐܬܕܟܪܝܘܗܝ ܬܘܒ ܠܡܘܬܐ
1.011:07	ܫܪܘܝܐ ܕܟܠ ܗܕܡ̈ܝܟܝ ܡܐ ܢܕܝܕܝܢ ܒܬܪ ܩܠܝܠ
1.011:08	ܗܕܡ̈ܐ ܕܠܐܝܬ ܒܗܘܢ ܕܢܕܝܕܝܢ ܒܣܝܒܘܬܐ
1.011:09	ܘܢܕܝܕܝܢ ܒܓܘ ܩܒܪܐ ܡܢܐ ܠܐܝܬܝ ܛܠܝܘܬܐ
1.011:10	ܠܡܨܒܬܘ ܣܢܝܘܬܐ ܗܕܡ̈ܝܟܝ ܐܘ ܛܠܝܘܬܐ
1.011:11	ܟܣܝܢ ܒܗܘܢ ܪܒܘ ܡܘܡ̈ܝܢ ܘܣܘܚܝܢ ܘܢܦܩܝܢ ܡܢ ܓܘܗܿ
1.011:12	ܕܣܝܒܘܬܐ ܐܝܟ ܡܢ ܐܪܥܐ ܘܝܥܪܐ ܕܡܘ̈ܡܐ ܚܢܿܩ ܠܗ
1.011:13	ܠܦܩܚܐ ܦܐܝܐ ܕܛܠܝܘܬܐ ܐܪܟܢܝ ܐܕܢܟܝ ܛܠܝܘܬܐ
1.011:14	ܘܐܗܘܐ ܠܟܝ ܐܝܟ ܡܠܘܟܐ ܗܿܘ ܕܐܣܿܢܝ ܢܦܫܗ ܝܿܕܥ
1.011:15	ܕܢܣܿܓܐ ܢܙܗܪ ܠܦܐ̈ܝܐ ܗܿܘ ܕܢܦܼܠ ܒܝܬ ܓܝܣ̈ܐ
1.011:16	ܡܨܐ ܕܢܙܗܪ ܬܓܪ̈ܐ ܐܨܛܒܬܝ ܐܘ ܛܠܝܘܬܐ
1.011:17	ܒܫܘܦܪܐ ܕܡܡܬܘܡ ܠܐ ܚܡܿܐ ܗܘܝܘ ܡܗܕܪ ܘܡܨܒܬ
1.011:18	ܠܥܠܝܡܘܬܐ ܘܣܝܒܘܬܐ ܠܐ ܡܣܿܢܐ ܠܗ ܟܘܪܗܢܐ
1.011:19	ܒܟܘܪܗ ܫܿܦܪ ܐܝܟ ܕܗܒܐ ܠܐ ܡܟܝܐ ܠܗ ܣܝܒܘܬܐ
1.011:20	ܒܗܿ ܗܘ ܢܐܿܚ ܡܢ ܩܢܛܐ ܡܪܥܐ ܠܐ ܡܼܨܐ ܡܬܚܒ ܠܗ
1.011:21	ܕܚܝܠܐ ܩܿܢܐ ܡܢ ܨܐܕܘܗܝ ܡܣܟܢܘܬܐ ܐܪܥܗ ܗܝ
1.011:22	ܡܢܗܿ ܡܦܪܢ ܘܡܗܒܒ ܐܦܠܐ ܨܘܡܐ ܡܬܚܒ ܠܗ
1.011:23	ܡܪܐ ܗܘ ܓܝܪ ܕܦܘܠܚܢܗ ܫܗܪܐ ܘܒܟܝܐ ܐܝܬܝܗܘܢ
1.011:24	ܡܒܘ̈ܥܐ ܕܡܓܐܝܢ ܠܗ ܠܐ ܡܨܝܢ ܟܐ̈ܒܐ ܙܟܿܝܢ ܠܗ
1.011:25	ܕܡܢܗܘܢ ܠܒܫ ܚܘܠܡܢܐ ܠܐ ܡܩܦܚ ܠܗ ܢܣܝܘܢܐ
1.011:26	ܕܡܢܗ ܩܿܢܐ ܢܨܚ̈ܢܐ ܐܦ ܠܐ ܪܕܘܦܝܐ ܪܕܦ ܠܗ
1.011:27	ܕܡܢܗ ܟܠܝܠܐ ܓܕܠ ܠܗ ܡܘܬܐ ܠܐ ܡܨܐ ܕܢܡܝܬܝܘܗܝ
1.011:28	ܕܒܚܝܘܬܗ ܩܛܿܠ ܠܗ ܩܒܪܐ ܠܐ ܡܼܨܐ ܕܢܚܦܝܘܗܝ
1.011:29	ܕܒܢܘܚܡܗ ܨܿܪܐ ܠܗ ܐܐܪ ܠܐ ܡܼܨܐ ܟܿܠܐ ܠܗ
1.012:01	ܕܠܪܘܡܐ ܓܿܕܠ ܓܦܗ ܐܦܠܐ ܫܡܝܐ ܟܿܠܝܢ ܠܗ
1.012:02	ܕܩ̈ܠܝܕܐ ܕܪܘܡܐ ܥܡܗ ܥܠ ܥܝܪ̈ܐ ܕܠܥܠ ܥܒܿܪ
1.012:03	ܚܿܕܝܢ ܒܗ ܘܡܚܕܝܢ ܠܗ ܒܪܘܚ ܩܘܕܫܐ ܣܿܓܕ ܠܒܪܐ
1.012:04	ܕܝܒܿܠ ܥܠܝ ܘܐܪܝܡܗ ܒܗ ܡܘܕܐ ܠܐܒܘܗܝ ܕܫܘܐ
1.012:05	ܕܥܕܡܐ ܠܘܬܗ ܢܡܛܐ