The Comprehensive Aramaic Lexicon

43:00	ܐܓܪܬܐ ܕܡܪܐ ܒܪ ܣܪܦܝܘܢ܂
43:01	ܡܪܐ ܒܪ ܣܪܦܝܘܢ ܠܣܪܦܝܘܢ ܒܪܝ ܫܠܡ܂ ܟܕ ܐܓܪܬܐ ܟܬܼܒ ܠܝ ܪܒܟ
43:02	ܘܡܪܒܝܢܟ܃ ܘܚܘܝܢܝ ܕܛܒ ܚܦܝܛ ܐܢܬ ܒܝܘܠܦܢܐ ܒܪ ܫ̈ܢܝܐ ܙܥܘܪ̈ܝܬܐܼ܂
43:03	ܠܐܠܗܐ ܒܪܟܬ܂ ܕܐܢܬ ܛܠܝܐ ܙܥܘܪܐ ܕܠܐ ܡܕܒܪܢܐ ܒܪܢܝܐ ܛܒܿܐ ܫܪܝܬ܂ ܘܠܝ
43:04	ܕܝܠܝ ܗܕܐ ܩܘܪܬ ܪܘܚܐ ܗܘܬ ܠܝܼ܂ ܕܥܠܝܟ ܛܠܝܐ ܙܥܘܪܐ܂ ܗܕܐ ܪܒܘܬ ܪܥܝܢܐ
43:05	ܘܬܐܪܬܐ ܛܒܬܐ ܫܡܿܥܬ܂ ܐܝܕܐ ܕܠܐ ܥܓܠ ܠܘܬ ܣܓ̈ܝܐܐ ܫܪܟܬ܂ ܡܛܠ ܗܢܐ ܗܐ
43:06	ܟܬܒܬ ܠܟ ܗܢܐ ܥܘܗܕܢܐܼ܂ ܡܕܡ ܕܒܨܝܬ ܒܥܠܡܐ܂ ܒܨܐ ܗܘ ܠܝ ܓܝܪ
43:07	ܥܘܡܪܐ ܕܒܢ̈ܝܢܫܐܼ܂ ܘܡܗܠܟ ܠܝ ܒܝܘܠܦܢܐ܂ ܘܗܠܝܢ ܟܘܠܗܝܢ ܡܢ
43:08	ܝܘܠܦܢܐ ܗܘ ܕܝܘܢܝܘܬܐ ܐܫܟܚܬ ܐܢ̈ܝܼܢ܂ ܟܕ ܥܡ ܡܘܠܕܐ ܕܚ̈ܝܐ ܡ̈ܢܘܓܢ܂ ܐܬܚܦܛ
43:09	ܡܟܝܠ ܒܪܝܼ܂ ܒܐܝܠܝܢ ܕܙܕܩ̈ܢ ܠܒܢ̈ܝ ܚܐܪ̈ܐ܂ ܒܣܦܪܐ ܠܡܪܢܐܼ ܘܒܬܪ ܚܟܡܬܐ
43:10	ܠܡܪܕܦ܂ ܘܗܟܢܐ ܐܬܚܫܒ ܠܡܫܬܪܪܘ ܒܡܐ ܕܫܪܝܬ ܡܢܗ܃ ܘܬܗܘܐ ܥܗܝܕ
43:11	ܦܘܩ̈ܕܢܝ ܒܚܦܝܛܘܬܐ܂ ܐܝܟ ܒܪܢܫܐ ܫܠܝܐ܂ ܕܪܚܿܡ ܡܪܕܘܬܐ܂ ܘܐܦܢ ܛܒ
43:12	ܡܬܚܙܝܐ ܠܟ ܕܡܪܝܪܐ܃ ܠܙܒܢܐ ܙܥܘܪܐ ܟܕ ܬܒܨܝܗܿ܂ ܛܒ ܬܒܣܡ ܠܟ܂ ܕܐܦ
43:13	ܥܠܝ ܗܟܢܐ ܥܪܨܬ܂ ܠܐܢܫ ܕܝܢ ܟܕ ܥܘܢܕܢܐ ܢܗܘܐ ܠܗ ܡܢ ܒܝܬ ܐܢ̈ܫܘܗܝ܃
43:14	ܘܐܣܟܡܗ ܢܫܟܚ ܠܡܛܪ܂ ܘܒܙܕܩܐ ܢܥܒܕ ܡܕܡ ܕܘܿܠܐ ܠܗܼ܂ ܗܼܘ ܗܿܘ ܒܪܢܫܐ
43:15	ܓܒܝܐ ܕܡܬܩܪܐ ܒܘܪܟܬܐ ܕܐܠܗܐ܂ ܘܐܝܢܐ ܕܠܐ ܡܫܟܚ ܡܕܡ ܐܚܪܝܢ܂
43:16	ܠܡܦܚܡܘ ܥܡ ܚܐܪܘܬܗ܂ ܒܢ̈ܝܢܫܐ ܓܝܪ ܐܝܠܝܢ ܕܠܘܬ ܡܪܕܘܬܐ ܡܬܩܪܝܼܢ܂
43:17	ܡܢ ܐܓܘܢܗ ܗܘ ܕܙܒܢܐ ܒܥܝܢ ܠܡܬܦܪܩܘ܂ ܘܐܝܠܝܢ ܕܒܚܟܝܡܘܬܐ ܐܚܝܕܝܼܢ܂
43:18	ܒܣܒܪܐ ܗܘ ܕܟܐܢܘܬܐ ܕܡܬܬܠܝܢ܂ ܘܐܝܠܝܢ ܕܒܫܪܪܐ ܩܝܡܝܼܢ܂ ܢܝܫܐ ܗܘ
43:19	ܕܛܝܒܘܬܗܘܢ ܡܚܘܝܢ܂ ܘܐܝܠܝܢ ܕܒܦܝܠܣܦܘܬܐ ܡܬܥܢܝܼܢ܂ ܡܢ ܥܩ̈ܬܗ ܗܘ
43:20	ܕܥܠܡܐ ܚܝܪܝܢ ܠܡܬܦܠܛܘ܂ ܘܐܢ‍<‍ܬ‍>‍ ܕܝܢ ܒܪܝܼ܂ ܒܗܠܝܢ ܗܟܢܐ ܚܟܝܡܐܝܬ
43:21	ܐܬܕܒܼܪ܂ ܐܝܟ ܒܪܢܫܐ ܚܟܝܡܐ܂ ܕܒܥܐ ܥܘܡܪܐ ܕܟܝܐ ܠܡܕܒܪܘ܂ ܘܠܡܐ ܢܒܗܠܟ
43:22	ܩܢܝܢܐ ܗܿܘ ܕܣܓ̈ܝܐܐ ܟܦܢܝܢ ܠܗܼ܂ ܘܢܬܦܢܐ ܪܥܝܢܟ ܠܡܪܓ ܢܟܣ̈ܐ܂ ܡܕܡ ܕܠܐ
43:23	ܗܘܐ ܫܪܝܪ܂ ܠܐ ܓܝܪ ܟܕ ܒܥܬܐ ܡܬܩܢܝܢ ܡܩܘܝܼܢ܂ ܘܐܦܠܐ ܟܕ ܒܟܐܢܘܬܐ
43:24	ܡܟܬܪܝܢ܂ ܘܗܠܝܢ ܟܘܠܗܝܢ ܨܒܘ̈ܬܐ ܕܡܬܚܙܝܢ ܠܟ ܒܥܠܡܐ ܐܝܟ ܕܡܢ
44:01	ܠܙܒܢ ܙܥܘܪ܂ ܐܝܟ ܚܠܡܐ ܠܡܫܬܪܝܘ ܠܗܘܢ܂ ܡ̈ܣܩܬܐ ܐܢܝܢ ܓܝܪ
44:02	ܘܡ̈ܚܬܬܐ ܐܢܝܢ ܕܙܒܢ̈ܐ܂ ܘܬܫܒܘܚܬܐ ܣܪܝܩܬܐ ܕܡܠܐ ܥܘܡܪܐ ܕܒܢ̈ܝܢܫܐ܂ ܠܐ ܪܢܐ
44:03	ܐܢܬ ܕܡܢ ܨܒܘ̈ܬܐ ܐܝܠܝܢ ܕܡܚܕܝܢ ܠܢ܃ ܥܓܠ ܗܿܘܐ ܠܢ ܢܟܝܢܐܼ܂ ܐܦ ܝܬܝܪܐܝܬܼ
44:04	ܝܠܕܐ ܕܒܢ̈ܝܐ ܪ̈ܚܝܡܐ܂ ܒܬܪ̈ܬܝܗܝܢ ܓܝܪ ܨܒ̈ܘܬܐܼ܂ ܚܫܩܒܘܠ ܡܟܐ ܠܢ܂ ܕܬܩ̈ܢܐ
44:05	ܓܝܪ ܚܘܒܗܘܢ ܡܫܢܩ ܠܼܢ܂ ܘܒܥܝܕܗܘܢ ܡܬܢܓܕܝܢܢ܂ ܘܕܣܪܝܚܐ ܒܡܪܕܘܬܗܘܢ
44:06	ܠܐܝܢܢ ܘܒܣܪܝܚܘܬܗܘܢ ܡܬܢܘܠܝܢܢ܂ ܫܡܿܥܬ ܓܝܪ ܥܠ ܚܒܪ̈ܝܼܢ܂ ܕܟܕ ܢܦܩܝܢ
44:07	ܡܢ ܫܡܝܫܼܛ܂ ܟܪܝܬ ܠܗܘܢ܂ ܘܐܝܟ ܡܬܥܕܠܝܢ ܒܙܒܢܐܼ܂ ܘܗܟܢܐ ܐܡܪܝܢ܂
44:08	ܐܬܪܚܩܢ ܡܟܝܠ ܡܢ ܒܝܬ ܐܢ̈ܫܝܼܢ܂ ܘܠܐ ܐܝܬ ܠܢ ܠܡܗܦܟ ܠܡܕܝܢܬܢܿ܂
44:09	ܘܐܢ̈ܫܝܢ ܠܡܚܙܐ܂ ܘܐܠܗܝܢ ܠܡܩܒܠܘ ܒܫܘܒܚܐ܂ ܘܿܠܐ ܗܘܐ ܕܗܿܘ ܝܘܡܐܼ܂
44:10	ܕܚܢܓܬܐ ܢܬܩܪܐ܂ ܡܛܠ ܕܠܟܠܗܘܢ ܫܘܝܐܝܬ ܚܕ ܟܐܒܐ ܝܩܝܪܐ ܐܚܝܕ ܗܘܐ܂ ܟܕ
44:11	ܒܟܝܢ ܓܝܪ ܐܒ̈ܗܝܗܘܢ ܥܗܕܘ܂ ܘܟܕ ܡܬܚܢܓܝܢ ܐܡܘܬܗܘܢ܂ ܘܟܪܝܐ ܠܗܘܢ
44:12	ܥܠ ܐܚ̈ܝܗܘܢ܂ ܟܐܒ ܠܗܘܢ ܥܠ ܡܟܝܪ̈ܬܐ ܕܫܒܩܘ܂ ܘܟܕ ܛܒ‍<‍ܐ‍>‍ ܕܚܒܪ̈ܝܗܘܢ
44:13	ܩ̈ܕܡܝܐ ܫܡܥܢ ܕܠܣܠܘܩܝܐ ܐܙܠܝܢ܂ ܡܓܢܒܐܝܬ ܠܐܘܪܚܐ ܠܘܬܗܘܢ ܐܙܠܢ܂
44:14	ܘܒܝܫܬܢ ܠܕܝܠܗܘܢ ܙܘܓܢ܂ ܗܝܕܝܢ ܪܘܪܒܐܝܬ ܚܣܢ ܟܐܒܼܢ܂ ܘܒܙܕܩܐ ܣܓܝܬ
44:15	ܒܟܬܢ ܒܐܒܕܢܢ܂ ܘܥܪܦܠܐ ܩܛܪܬ ܚܢܓܬܢ܂ ܘܡܢ ܛܘܪܐ ܝܪܒܬ ܒܝܫܬܢ܂ ܠܐ ܓܝܪ
44:16	ܐܢܫ ܡܢܢ ܡܘܦܐ ܥܩ̈ܬܐ ܕܠܘܬܗ ܠܡܙܓܪܘ܂ ܐܬܚܦܛ ܓܝܪ ܚܘܒܐ ܕܚ̈ܝܐ ܥܡ
44:17	ܚܫܐ ܕܡ̈ܝܬܐ܂ ܘܕܠܐ ܫܒܝܠ ܡܕܒܪܢ ܗ̈ܘܝ ܠܢ ܒܝ̈ܫܬܢ܂ ܚܙܝܢ ܐܚ̈ܝܢ ܓܝܪ
44:18	ܘܒ̈ܢܝܢ ܐܝܟ ܫܒ̈ܝܐ܂ ܘܥܗܕܢ ܚܒܪ̈ܝܢ ܡ̈ܝܬܐ܂ ܕܒܐܬܪܐ ܫܐܝܠܐ ܣܝܡܝܢ܂ ܘܐܦ
44:19	ܐܢܫ ܡܢܢ ܥܠ ܢܦܫܗ ܝܨܦ ܗܘܐ܂ ܕܕܠܡܐ ܒܝܫܬܐ ܥܠ ܚܒܪܬܗܿ ܬܬܘܣܦ
44:20	ܠܗ܂ ܐܘ ܒܝܫܬܐ ܐܚܪܬܐ ܬܕܪܟ ܠܕܩܕܡܝܗ܂ ܡܢܐ ܐܬܗܢܝܘ ܐܢܫܐ ܚܒ̈ܝܫܐ
44:21	ܕܒܗܠܝܢ ܐܬܚܫܚܘ܂ ܠܟ ܕܝܢ ܚܒܝܒܝܼ܂ ܠܐ ܬܟܪܐ ܠܟ ܕܒܐܬܪ ܐܬܪ ܝܚܝܕܝܘܬܟ
44:22	ܐܬܕܒܪܬ܂ ܠܗܠܝܢ ܗܘ ܓܝܪ ܡܬܝܠܕܝܢ ܒܢ̈ܝܢܫܐ܂ ܕܡ̈ܦܘܠܝܬܗ ܕܙܒܢܐ
44:23	ܠܡܩܒܠܘ܂ ܐܠܐ ܗܟܢܐ ܐܬܚܫܒܼ܂ ܕܠܒ̈ܢܝܢܫܐ ܚܟ̈ܝܡܐ ܟܠ ܐܬܪ ܫܘܐ܂ ܘܒܟܠ
44:24	ܡܕܝܢܐ ܠܛܒ̈ܐ܂ ܣܓ̈ܝܐܝܢ ܐܒܗ̈ܐܼ ܘܐܡ̈ܗܬܐ܂ ܘܐܠܐ ܡܢ ܢܦܫܟܼ ܣܒ ܠܟ ܢܣܝܢܐ܂
44:25	ܕܟܡܐ ܐܢ̈ܫܝܢ ܕܠܐ ܝܕܥܝܢ ܠܟ܂ ܐܝܟ ܒܢ̈ܝܗܘܢ ܪܚܡܝܢ ܠܟ܂ ܘܣܘܓܐܐ ܕܢܫ̈ܐܼ ܐܝܟ
44:26	ܕܠܚܒ̈ܝܒܝܗܝܢ ܡ̈ܩܒܠܢ ܠܟ܂ ܐܠܐ ܐܝܟ ܐܢܫ ܢܘܟܪܝ ܐܬܟܫܪܬ܂ ܐܠܐ ܠܚܘܒܟ
44:27	ܙܥܘܪܐ ܣ̈ܓܝܐܐ ܒܢ̈ܝ ܐܢܫܐ ܐܬܐܘܒܘ ܠܟ܂ ܡܢܐ ܡܟܝܠ ܐܝܬ ܠܢ ܠܡܐܡܪ ܥܠ
45:01	ܛܘܥܝܝ ܕܫܪܬ ܒܥܠܡܐ܂ ܘܒܥܠܡܐ ܝܩܝܪ ܡܪܕܝܐ ܠܗ܂ ܘܒܙ̈ܘܥܘܗܝ ܐܝܟ
45:02	ܩܢܝܐ ܡܢ ܐܝ̈ܕܝ ܪܘܚܐܼ ܡܬܪܘܛܝܢ ܚܢܢ܂ ܬܡܗܬ ܓܝܪ ܒܣܓܝ̈ܐܐ ܕܫܕܝܢ ܝ̈ܠܕܝܗܘܢܼ܂
45:03	ܘܐܬܕܡܪܬ ܒܐܚܪ̈ܢܐ ܕܕܠܐ ܕܝܠܗܘܢ ܡܪܒܝܢ܂ ܐܝܬ ܐܢܫܐ ܕܒܥܠܡܐ ܢܟ̈ܣܐ ܩܢܝܢ܂
45:04	ܘܐܦ ܐܬܕܡܪܬ ܒܐܚܪ̈ܢܐ܂ ܕܕܠܐ ܕܝܠܗܘܢ ܝܪ̈ܬܝܢ܂ ܗܟܢܐ ܐܣܬܟܠ ܘܚܙܝ܃
45:05	ܕܒܡܪܕܘܬܐ ܗܘ ܕܛܘܥܝܝ ܡܗܠܟܝܢܢ܀
45:06	ܫܪܐ ܠܡܐܡܪ ܠܢ ܚܟܝܡܐ ܕܒܢ̈ܝܢܫܐ܂ ܥܠ ܐܝܢܐ ܡܢ ܩ̈ܢܝܢܐ ܢܬܬܟܠ
45:07	ܒܪܢܫܐ܂ ܐܘ ܥܠ ܐܝܠܝܢ ܨ̈ܒܘܢ ܢܡܠܠ܃ ܕܐܝܟ ܕܡܩܘܝܢ܂ ܥܠ ܣܘܓܐܐ ܕܢܟ̈ܣܐܼ
45:08	ܡ̈ܬܚܛܦܝܢ܂ ܥܠ ܟܪ̈ܟܐ ܡ̈ܬܒܙܝܢ܂ ܥܠ ܡ̈ܕܝܢܬܐܼ ܚܪ̈ܒܢ܂ ܥܠ ܪܒܘܬܐ
45:09	ܡܬܬܚܬܝܐ܂ ܥܠ ܓܐܝܘܬܐ ܡܣܬܚܦܐ܂ ܥܠ ܫܘܦܪܐ ܚܡܐ܂ ܘܥܠ ܢܡ̈ܘܣܐ
45:10	ܥܒܪܝܢ܂ ܘܥܠ ܡܣܟܢܘܬܐ ܡܬܫܝܛܐ܂ ܘܥܠ ܒܢ̈ܝܐܼ ܡܝܬܝܢ܂ ܘܥܠ ܪ̈ܚܡܐ
45:11	ܡܟܕܒܝܢ܂ ܘܥܠ ܬܫܒܚ̈ܬܐܼ܂ ܚܣܡܐ ܡܩܕܡ ܠܗܝܢ܀
45:12	ܢܚܕܐ ܐܢܫ ܡܟܝܠ ܒܡܠܟܘܬܗ ܐܝܟ ܕܪܝܘܫ܂ ܘܒܓܕܢܘܬܗ ܐܝܟ ܦܠܘܩܪܛܣ܂ ܐܘ
45:13	ܒܚܠܝܨܘܬܗ ܐܝܟ ܐܟܠܘܣ܂ ܐܘ ܒܐܢܬܬܗ ܐܝܟ ܐܓܡܡܢܘܢ܂ ܐܘ ܒܝܠܕܗܼ ܐܝܟ
45:14	ܦܪܝܡܘܣ܂ ܐܘ ܒܐܘܡܢܘܬܗܼ ܐܝܟ ܐܪܟܝܡܕܣ܂ ܐܘ ܒܚܟܝܡܘܬܗܼ ܐܝܟ ܣܘܩܪܛܘܣ܂
45:15	ܐܘ ܒܝܘܠܦܢܗܼ ܐܝܟ ܦܬܘܪܓܘܣ܂ ܐܘ ܒܢܗܝܪܘܬܗܼ ܐܝܟ ܦܘܠܘܡܕܣ܂ ܥܢܕܝܢ
45:16	ܒܪܝ ܚ̈ܝܐ ܕܒܢ̈ܝܢܫܐ ܡܢ ܥܠܡܐܼ܂ ܘܬܫ̈ܒܚܬܗܘܢ ܘܛܝܒܘ̈ܬܗܘܢ ܠܥܠܡ
45:17	ܡ̈ܩܘܝܢ܀
45:18	ܐܢܬ ܕܝܢ ܒܪܝ ܙܥܘܪܐ ܓܒܝ ܠܟ ܡܕܡ ܕܠܐ ܒܿܠܐ܂ ܐܝܠܝܢ ܓܝܪ ܕܒܗܠܝܢ
45:19	ܡܬܚܫܚܝܼܢ܂ ܢܟ̈ܦܐ ܘܪ̈ܚܝܡܐ ܘܪ̈ܚܡܝ ܫܡܐ ܛ̤ܒܐ ܡܬܩܪܝܢ܂ ܐܡܬܝ ܕܨܒܘ
45:20	ܕܝܢ ܒܝܫܐ ܡܣܬܩܒܠܐ ܠܟ܂ ܠܐ ܬܬܥܕܠ ܒܐܢܫ܂ ܘܠܐ ܥܠ ܐܠܗܐ ܬܪܓܙ܂ ܘܠܐ
45:21	ܥܠ ܙܒܢܟ ܬܬܪܥܡ܂ ܐܢ ܒܗܢܐ ܪܥܝܢܐ ܬܟܬܪ܂ ܠܐ ܗܘܬ ܙܥܘܪܝܐ ܡܘܗܒܬܟܿ܂ ܐܝܕܐ
45:22	ܕܡܢ ܐܠܗܐ ܩܒܠܬ܂ ܐܝܕܐ ܕܠܐ ܥܠ ܢܟ̈ܣܐ ܣܢܝܩܐܼ܂ ܘܠܐ ܥܠ ܡܣܟܢܘܬܐ
45:23	ܡܬܩܪܒܐ܂ ܕܠܐ ܕܚܠܐ ܓܝܪ ܬܕܒܪܝܘܗܝ ܥܠܡܟ܂ ܟܕ ܬܗܘܐ ܚܕܐ܂ ܕܚܠܬܐ ܓܝܪ
45:24	ܘܡܦܩ ܒܪܘܚܐ ܕܡܟܼܢ ܠܐ ܡܛܠ ܚ̈ܟܝܡܐ܂ ܐܠܐ ܡܛܠ ܐܝܠܝܢ ܕܠܒܪ ܡܢ
45:25	ܢܡܘܣܐ ܡܗܠܟܝܢ܂ ܠܐ ܓܝܪ ܐܢܫ ܡܢ ܡܬܘܡ ܐܫܬܪܝ ܡܢ ܚܟܡܬܗܿ܂ ܐܝܟ
45:26	ܕܡܢ ܩܢܝܢܗ܂ ܝܬܝܪ ܡܢ ܢܟ̈ܣܐ ܒܣܦܪܐ ܐܬܚܦܛ܂ ܟܡܐ ܕܩܢܝܢܐ ܓܝܪ ܣܓܐܼ܂
45:27	ܒܝܫܬܐ ܗܟܢܐ ܣܓܝܐܐ܂ ܐܢܐ ܓܝܪ ܚܙܝܬܼ܂ ܕܐܝܢܐ ܕܣ̈ܓܝܢ ܛܒ̈ܬܐܼ܂ ܗܟܢܐ ܐܦ
46:01	ܥܩ̈ܬܐ ܡ̈ܣܬܩܒܠܢ܂ ܘܐܝܟܐ ܕܡܬܕܒܪ̈ܢ ܓ̈ܐܘܬܐ ܗܪܬܡܼܢ ܐܦ ܟ̈ܐܒܐ ܡܬܟܢܫܝܢ܂
46:02	ܘܐܝܟܐ ܕܝܬܝܪ̈ܝܢ ܢܟ̈ܣܐܼ܂ ܗܪܬܡܼܢ ܡܪܬ ܫ̈ܢܝܐ ܣ̈ܓܝܐܐ܂ ܐܢ ܗܟܝܠ ܬܣܬܟܠ
46:03	ܘܚܦܝܛܐܝܬ ܬܛܼܪ܂ ܠܐ ܐܠܗܐ ܦܪܩ ܡܢ ܥܘܕܪܢܟܼ܂ ܘܠܐ ܒܢ̈ܝܢܫܐ ܡܢ ܪܚܡܘܬܟ܂
46:04	ܡܕܡ ܕܡܫܟܚ ܐܢܬ ܠܡܩܢܐܼ ܢܣܦܩ ܠܟ ܘܐܢ ܡܫܟܚ ܐܢܬ ܕܝܢ ܕܕܠܐ ܩܢܝܢ
46:05	ܠܡܥܒܕ ܗܝܕܝܢ ܛܘܒܢܐ ܬܬܩܪܐ܂ ܟܕ ܐܦܠܐ ܐܢܫ ܢܚܣܘܡ ܒܟ܂ ܘܐܦ ܗܕܐ
46:06	ܥܗܕ܂ ܕܡܕܡ ܠܐ ܡܕܘܕ ܠܥܘܡܪܟ ܛܒ ܛܒ ܐܠܐ ܩܢܝܢܐ܂ ܕܐܢܫ ܡܢ ܒܬܪ
46:07	ܡܘܬܗ ܡܪܐ ܩܢܝܼܢ ܠܐ ܐܬܩܪܝ܂ ܡܛܠ ܕܠܪܓܬܗ ܗܘ ܡܫܬܒܝܢ ܒܢ̈ܝܢܫܐ
46:08	ܚ̈ܠܫܐܼ܂ ܘܠܐ ܝܕܥܝܢ ܕܒܕܡܘܬܐ ܗܘ ܕܥܪܨܐ܂ ܫܿܪܐ ܐܢܫ ܒܩܢܝܢܗ܂ ܘܩ̈ܢܝܛܝܢ
46:09	ܡܛܠ ܕܠܐ ܫܪܝܪ ܠܗܘܢܿ ܫܒܩܘ ܓܝܪ ܕܝܠܗܘܢܼ ܘܕܠܐ ܕܝܠܗܘܢ ܒܥܝܢ܂܀
46:10	ܡܢܐ ܓܝܪ ܐܚܪܝܢ ܐܝܬ ܠܢ ܠܡܐܡܪ܂ ܟܕ ܒܩܛܝܪܐ ܡܬܕܒܪܝܢ ܚ̈ܟܝܡܐ ܡܢ
46:11	ܐܝ̈ܕܝ ܛܪ̈ܘܢܐ܂ ܘܡܫܬܒܝܐ ܚܟܝܡܘܬܗܘܢ ܡܢ ܡܐܟܠ ܩܪܨܐ܂ ܘܡܬܓܠܙܝܢ
46:12	ܒܢܗܝܪܘܬܗܘܢ ܕܠܐ ܡܦܩ ܒܪܘܚܐ܂ ܡܢܐ ܓܝܪ ܐܬܗܢܝܘ ܐܬܢ̈ܝܐ ܒܩܛܠܗ
46:13	ܕܣܘܩܪܛܣܿ܂ ܕܦܘܪܥܢܗ ܟܦܢܐ ܘܡܘܬܢܐ ܩܒܠܘ܂ ܐܘ ܒܢ̈ܝ ܣܡܘܣ ܒܝܩܕܢܗ
46:14	ܕܦܬܘܓܪܣ܂ ܕܒܚܕܐ ܫܥܐ ܒܟܠܗ ܐܬܪܗܘܢ ܒܚܠܐ ܐܬܟܣܝ܂ ܐܘ ܝܗ̈ܘܕܝܐ
46:15	ܕܡܠܟܗܘܢ ܚܟܝܡܐ܂ ܕܡܢܗ ܡܢ ܙܒܢܐ ܐܬܕܒܪܬ ܡܠܟܘܬܗܘܢܿ ܒܙܕܩܐ ܓܝܪ ܥܒܕ
46:16	ܐܠܗܐ ܦܘܪܥܢܐ ܠܚܟܝܡܘܬܐ ܕܬܠܬܝܗܘܢ܂ ܟܕ ܟܦܢܝܢ ܓܝܪ ܐܬܢ̈ܝܐ ܡܝܬܘ܂
46:17	ܘܒܢ̈ܝ ܣܡܘܣ ܕܠܐ ܚܠܡ ܒܝܡܐ ܐܬܟܣܝܘ܂ ܘܝ̈ܗܘܕܝܐ ܟܕ ܚܪ̈ܝܒܝܢ ܘܪܕܝܦܝܢ
46:18	ܡܢ ܡܠܟܘܬܗܘܢܼ܂ ܒܟܠ ܐܬܪ ܡܒܕܪܝܢ܂ ܠܐ ܡܝܬ ܣܘܩܪܛܣ ܡܛܠ ܦܠܛܘܢ܂
46:19	ܘܐܦ ܠܐ ܦܬܘܓܪܘܣ ܡܛܘܠ ܬܦܢܟܐ ܕܗܐܪܐ܂ ܘܐܦ ܠܐ ܡܠܟܐ ܚܟܝܡܐ ܡܛܠ
46:20	ܢܡ̈ܘܣܐ ܚ̈ܕܬܐ ܕܣܡ܂ ܐܢܐ ܕܝܢ ܒܪܝܼ܂ ܒܨܝܬ ܐܢܘܢ ܠܒ̈ܢܝܢܫܐ ܒܐܝܢܐ ܣܘܚܦܐ
46:21	ܒܝܼܫܐ ܩܝܡܝܼܢ܂ ܘܬܡܗܬ ܕܠܐ ܐܫܬܟܦܝܘ ܒܒ̈ܝܫܬܐ ܕܚܕܝܪ̈ܢ ܠܗܘܢ܂ ܘܐܦܠܐ ܩ̈ܪܣܐ
46:22	ܣܦܩܘ ܠܗܘܢ܂ ܘܠܐ ܟ̈ܐܒܐ ܘܠܐ ܟܘܪ̈ܗܢܐ܂ ܘܠܐ ܡܘܬܐ ܘܠܐ ܡܣܟܢܘܬܐ܂ ܐܠܐ ܐܝܟ
46:23	ܚܝ̈ܘܬܐ ܒܝܫ̈ܬܐ ܚܕ ܥܠ ܚܕ ܣܥܝܢ ܒܒܥܠܕܒܒܘܬܐ܂ ܕܐܝܢܐ ܡܢܗܘܢ ܒܝܫܬܐ
46:24	ܝܬܝܪܬܐ ܠܚܒܪܗ ܢܣܒܠ܂ ܢܦܩܘ ܠܗܘܢ ܓܝܪ ܡܢ ܬܚܘܡܐ ܕܫܪܪܐܼ܂ ܘܟܠܗܘܢ
46:25	ܢܡ̈ܘܣܐ ܫܦܝܪ̈ܐܼ܂ ܥܒܪ̈ܝܢ܂ ܡܛܠ ܕܬܠܝܢ ܒܪܓܬܐ ܕܢܦܫܗܘܢܿ ܟܡܐ ܕܣܘܐ ܓܝܪ
46:26	ܒܪܢܫܐ ܠܡܕܡ ܕܪܐܓܼ܂ ܐܝܟܢܐ ܡܫܟܚ ܡܕܡ ܕܘܿܠܐ ܠܗ ܒܙܕܩܐ ܠܡܥܒܕ܂
46:27	ܘܠܐ ܡܫܬܘܕܥܝܢ ܡܫܘܚܬܐ܂ ܘܩܠܝܠ ܡܫܘܫܛܝܢ ܐܝ̈ܕܝܗܘܢ ܠܘܬ ܫܪܪܐ
47:01	ܘܛܝܒܘܬܐ܂ ܐܠܐ ܐܝܟ ܚܪ̈ܫܐ ܘܥܘܝܪ̈ܐ ܒܥܘܡܪܗܘܢܼ ܡܬܕܒܪܝܢ܂ ܥܘ̈ܠܐ ܕܝܢ ܚܕܝܢ܂
47:02	ܘܟ̈ܐܢܐ ܡܬܛܪ̈ܦܝܢ܂ ܕܐܝܬ ܠܗ ܟܦܪ ܘܕܠܝܬ ܠܗ ܡܬܟܬܫ ܠܡܩܢܐ܂ ܡ̈ܣܟܢܐ
47:03	ܒܥܝܢ܂ ܘܥܬܝܪ̈ܐ ܡܛܫܝܢ܂ ܘܟܠܢܫ ܥܠ ܚܒܪܗ ܓܚܟ܂ ܕܪܘܝܼܢ ܬܘܝܪܝܢ܂
47:04	ܘܕܚܠܡܘ ܢܦܫܗܘܢ ܡܬܘܚܝܢ܂ ܡܢܗܘܢ ܒܟܝܼܢ܂ ܘܡܢܗܘܢ ܙܡܪܝܢ܂ ܘܐܚܪ̈ܢܐ
47:05	ܓܚܟܝܼܢ܂ ܘܐܚܪ̈ܢܐ ܨܦܬܐ ܐܚܝܕܐ ܠܗܘܢܿ ܒܨ̈ܒܘܬܐ ܒܝ̈ܫܬܐ ܚܕܝܼܢ܂ ܘܠܒܪ ܐܢܫܐ
47:06	ܕܡܡܠܠ ܫܪܝܪܬܐ ܡܣܠܝܢ ܠܗ܂ ܢܬܡܗ ܡܟܝܠ ܐܢܫܼ܂ ܟܕ ܒܡܘܝܩܐ
47:07	ܡܒܠܐ ܠܗ ܥܠܡܐ ܟܕ ܚܕ ܥܘܡܪܐ ܠܝܬ ܠܗܘܢ܂ ܒܗܠܝܢ ܒܛܝܠ ܠܗܘܢ܂
47:08	ܘܚܐܪ ܐܢܫ ܡܢܗܘܢ ܐܡܬܝ ܕܒܩܐܪܣܐ܂ ܫܡܐ ܕܙܟܘܬܐ ܢܩܒܠ܂ ܘܠܐ ܚܝܪܝܢ
47:09	ܚ̈ܠܝܨܐ ܠܟܡܐ ܪ̈ܓܝܓܢ ܫ̈ܛܝܢ ܡܫܬܒܐ ܐܢܫ ܒܥܠܡܐ܂ ܘܐܫܬܘܦ ܕܝܢ
47:10	ܩܠܝܠ ܦܓܥܬ ܒܗܘܢ ܬܘܬ ܢܦܫܐ܂ ܕܙܟܝܢ ܒܚܝܠܗܘܢܼ܂ ܘܚܝܒܝܢ ܡܢ ܐܝ̈ܕܝ
47:11	ܝܥܢܘܬܐ܂ ܢܣܝܬ ܐܢܘܢ ܓܝܪ ܠܒ̈ܢܝܢܫܐܼ܂ ܘܗܟܢܐ ܢܣܝܬ ܐܢܘܢ܂ ܕܠܗܕܐ ܚܕܐ ܚܝܪܝܢ܂
47:12	ܠܣܘܓܐܐ ܕܢܟ̈ܣܐ܂ ܡܛܘܠ ܗܿܘܼ ܐܦܠܐ ܡܿܠܟܐ ܫܪܝܪܐ ܐܝܬ ܠܗܘܢܿ ܐܠܐ ܒܫܘܚܠܦܐ
47:13	ܕܪ̈ܥܝܢܝܗܘܢܼ܂ ܚܪܝܦܐܝܬ ܡܫܬܕܐ ܐܢܫ ܒܟܪܝܘܬܐܼ ܠܡܬܒܠܥܘ܂ ܘܠܐ ܚܝܪܝܢ
47:14	ܒܥܘܬܪܗ ܪܒܐ ܕܥܠܡܐ܂ ܕܟܠܢ ܫܘܝܐܝܬ ܟܠܡܕܡ ܕܛܘܪܦܐ ܠܗ ܠܙܒܢܐ
47:15	ܡܡܛܐ܂ ܐܬܬܠܝܘ ܓܝܪ ܒܪܒܘܬ ܟܪܣܐܼ ܡܘܡܐ ܓܡܝܪܐ ܕܣܪ̈ܝܚܐ܂ ܐܢܐ ܕܝܢ ܗܢܐ
47:16	ܡܕܡ ܕܐܬܼܐ ܥܠ ܪܥܝܢܝ ܠܡܟܬܒ ܠܟܼ܂ ܠܐ ܡܣܬ ܕܠܡܩܪܐܼ܂ ܐܠܐ ܕܒܥܿܒܕܐ
47:17	ܢܗܘܐ ܡܩܕܡ ܒܗ܂ ܐܦ ܐܢܐ ܓܝܪ ܝܿܕܥ ܐܢܐܼ܂ ܕܟܕ ܬܒܨܝܘܗܝ ܗܢܐ ܥܘܡܪܐܼ܂ ܛܒ
47:18	ܢܒܣܡ ܠܟ܂ ܘܬܗܘܐ ܒܪܐ ܡܢ ܥܝܛܐ ܒܝܫܐ܂ ܕܡܛܠ ܒܢ̈ܝܐ ܢܟ̈ܣܐ ܡܣܝܒܪܝܢܢ܂
47:19	ܐܦܪܩ ܡܟܝܠ ܡܢܟ ܟܪܝܘܬܐ ܪܚܝܡܐ ܕܒܢ̈ܝ ܐܢܫܐ܂ ܨܒܘܬܐ ܕܡܢ ܡ̈ܬܘܡܝܗܿ
47:20	ܡܕܡ ܠܐ ܡܗܢܝܐ܂ ܘܙܓܘܪ ܡܢܟ ܨܦܬܐ ܐܝܕܐ ܕܡܕܡ ܠܐ ܡܘܬܪܐ܂ ܦܪܘܣ ܓܝܪ
47:21	ܘܦܘܪܫܢ ܠܝܬ ܠܼܢ܂ ܐܠܐ ܐܢ ܪܥܝܢ ܪܒ ܠܡܘܦܝܘ ܒܝ̈ܫܬܐ܂ ܘܠܡܣܝܒܪܘ
47:22	ܥܩ̈ܬܐ܂ ܕܒܟܠܙܒܢ ܡܢ ܐܝ̈ܕܝ ܙܒܢ̈ܐ ܡܩܒܠܝܢܢ܂ ܒܗܠܝܢ ܓܝܪ ܘܿܠܐ ܠܡܚܪ܂
47:23	ܘܠܐ ܒܐܝܠܝܢ ܕܡ̈ܠܝܢ ܚܕܘܬܐ ܘܫܡܐ ܛܒܐ܂ ܐܓܥܠ ܢܦܫܟ ܠܚܟܡܬܐ܂ ܡܥܝܢܐ
47:24	ܕܟܘܠܗܝܢ ܛܒ̈ܬܐ܂ ܘܣܝܡܬܐ ܕܠܐ ܓܝܙܐ܂ ܘܬܡܢ ܬܣܡܘܟ ܪܝܫܟܼ ܘܬܬܢܝܚ܂ ܗܼܝ
47:25	ܓܝܪ ܬܗܘܐ ܠܟ ܐܒܐܼ ܘܐܡܐ܂ ܘܠܘܝܬܐ ܛܒܬܐ ܠܥܘܡܪܟ܂ ܟܠܗ ܥܢܝܢܐ ܢܗܘܐ
47:26	ܠܟ ܒܡܚܡܣܢܢܘܬܐ܂ ܘܒܡܣܝܒܪܢܘܬܐ܂ ܗܠܝܢ ܕܡܫܟܚܢ ܠܡܩܒܠܘ
47:27	ܥܩ̈ܬܗܘܢ ܕܚ̈ܠܫܐ ܒܢ̈ܝܢܫܐ܂ ܗܟܢܐ ܓܝܪ ܣܿܓܐ ܚܝܠܗܝܼܢ܂ ܕܟܦܢܐ ܡܘܦܝܢ
48:01	ܘܨܗܝܐ ܡܣܝܒܪ̈ܢ ܘܟܠ ܥܩܐ ܡܦܝܓܢ܂ ܒܥܡܠܐ ܕܝܢ ܘܒܥܘܢܕܢܐܼ ܐܦ ܡܫܬܥܝܘ
48:02	ܡ̈ܫܬܥܝܢ܂ ܒܗܠܝܢ ܐܬܚܦܛ܂ ܘܥܘܡܪܐ ܒܗܝܠܐ ܬܕܒܪ ܘܠܝܼ ܬܗܘܐ ܩܘܪܬ
48:03	ܪܘܚܐ܂ ܟܕ ܬܨܒܝܬܐ ܕܐܒܗ̈ܘܗܝ ܬܬܩܪܐ܂ ܒܗܿܘ ܓܝܪ ܙܒܢܐ ܩܕܡܝܐܼ܂ ܟܕ ܡܕܝܢܬܢ
48:04	ܒܪܒܘܬܗܿ ܩܝܡܐ ܗܘܬܼ܂ ܡܫܟܚ ܐܢܬ ܠܡܕܥܼ܂ ܕܥܠ ܐܢ̈ܫܝܢ ܣܓ̈ܝܐܝܼܢ܂ ܒܿܢܬ
48:05	ܩ̈ܠܐ ܣܢ̈ܝܬܐ ܐܫܬܕܝ܂ ܘܚܢܢ ܕܝܢ ܐܘܕܝܢ ܡܢ ܙܒܢܐܼ܂ ܕܓܡܝܪܐܝܬ ܚܘܒܐ ܫܘܝܐ܃
48:06	ܘܦܐܝܘܬܐ ܩܒܠܢ ܡܢ ܪܒܘܬܗ܂ ܐܠܐܼ ܟܠܐ ܙܒܢܐ ܠܡܓܡܪ ܐܢܝܢ܂ ܐܝܠܝܢ ܕܣܥܝܪ̈ܢ
48:07	ܗ̈ܘܝ ܒܪܥܝܢܢ܂ ܘܐܦ ܗܪܟܐ ܒܝܬ ܐܣܝܪ̈ܐ ܡܘܕܝܢܢ ܠܐܠܗܐܼ ܕܚܘܒܐ ܕܣܓ̈ܝܐܐ
48:08	ܩܒܠܢ܂ ܡܢܣܝܢܢ ܓܝܪ ܢܦܫܢ ܒܚܟܝܡܘܬܐ܂ ܘܒܚܕܘܬܐ ܠܡܩܡ܂ ܐܢ ܐܢܫ ܕܝܢ
48:09	ܒܩܛܝܪܐ ܢܕܒܪܢܼ܂ ܗܘ ܢܚܘܐ ܥܠ ܢܦܫܐ ܣܗܕܘܬܐܼ܂ ܕܡܢ ܟܠܗܝܢ ܛܒ̈ܬܐ ܪܚܝܩ
48:10	ܗܘ܂ ܘܚܣܕܐ ܘܒܗܬܬܐ ܢܩܒܠ܂ ܡܢ ܢܝܫܐ ܛܡܐܐܼ ܕܒܗܬܬܐ܂ ܚܢܢ ܓܝܪ ܚܘܝܢ
48:11	ܫܪܪܢܼ܂ ܕܒܡܠܟܘ ܣܘܪܚܼܢ ܠܝܬ ܠܢ܂ ܐܢ ܢܦܣܘܢ ܠܢ ܕܝܢ ܪ̈ܗܘܡܝܐ ܠܐܬܪܢ
48:12	ܠܡܥܠܼ܂ ܒܙܕܩܐ ܘܒܟܐܢܘܬܐܼ܂ ܐܝܟ ܐܢܫ̈ܐ ܪ̈ܕܝܐ ܢܥܒܕܘܢܿ ܘ̈ܛܒܐ ܘܟ̈ܐܢܐ ܢܬܩܪܘܢ
48:13	ܥܡ ܐܬܪܐ ܫܠܝܐ ܕܩܝܡܝܢ ܒܗ܂ ܢܚܘܘܢ ܓܝܪ ܪܒܘܬܗܘܢܼ ܟܕ ܢܫܒܩܘܢܢ ܒܢ̈ܝ
48:14	ܚܐܪ̈ܝܢ܂ ܢܫܬܡܥ ܠܡܠܟܘܬܐ ܐܝܕܐ ܕܙܒܢܐ ܝܗܼܒ ܠܼܢ܂ ܘܠܐ ܐܝܟ ܛܪ̈ܘܢܐ
48:15	ܢܕܒܪܘܢܢ ܐܝܟ ܥܒܕ̈ܐ܂ ܘܐܢ ܦܣܝܩ ܗܘ ܡܕܡ ܕܢܗܘܐܼ܂ ܠܐ ܡܕܡ ܝܬܝܪ ܢܩܒܠ܂
48:16	ܡܢ ܡܘܬܐ ܢܝܚܐ ܕܢܛܝܪ ܠܢ܂ ܐܢܬ ܕܝܢ ܒܪܝ ܙܥܘܪܐܼ܂ ܐܢ ܨܒܝܬ ܕܚܦܝܛܐܝܬ
48:17	ܠܡܕܥ ܐܢܝܢ ܠܨܒ̈ܘܬܐܼ܂ ܠܘܩܕܡ ܐܦܝܣ ܠܪܓܬܐ܂ ܘܡܫܘܚܬܐ ܣܝܡ ܠܡܐ
48:18	ܕܩܐܡ ܐܢܬ ܒܗ ܐܘܦܐܼ܂ ܡܣܬ ܕܠܐ ܬܪܓܙ܂ ܘܚܠܦ ܦܘܪܬܐ ܒܛܝܒܘܬܐ ܐܫܬܡܥ܂
48:19	ܐܢܐ ܓܝܪ ܡܟܝܠܼ ܒܗܕܐ ܗܘ ܪܢܐ ܐܢܐ ܐܝܟܢܐ ܕܥܗܕ ܐܢܐ܂ ܣܦܪܐ ܐܫܒܘܩ ܠܝ܂
48:20	ܘܒܪܥܝܢ ܚܟܝܡ ܐܘܪܚܐ ܕܡܬܬܚܝܒ ܐܢܐܼ ܐܫܠܡ܂ ܘܕܠܐ ܥܩܐ ܐܬܦܪܩ ܡܢ
48:21	ܐܒܕܢܗ ܒܝܫܐ ܕܥܠܡܐ܂ ܠܫܪܝܬܐ ܗܘ ܓܝܪ ܡܨܠܐ ܐܢܐ ܠܡܩܒܠܘ܂ ܘܐܝܢܐ
48:22	ܡܘܬܐܼ ܠܐ ܩܛܪ ܠܝ܂ ܘܐܢ ܐܢܫ ܕܝܢ ܬܟܪܐ ܠܗ ܐܘ ܢܐܨܦܼ܂ ܠܐ ܡܿܠܟ ܐܢܐ ܠܗ܂
48:23	ܬܡܢ ܓܝܪ ܒܥܘܡܪܗ ܕܥܠܡܐ ܟܠܗܼ܂ ܩܕܡܘܗܝ ܢܫܟܚܢ܂ ܀
48:24	ܠܡܪܐ ܒܪ ܣܪܦܝܘܢ ܫܐܠܗ ܚܕ ܡܢ ܪ̈ܚܡܘܗܝ ܟܕ ܐܣܝܪ ܥܠ ܐܝܕܗܼ܂
48:25	ܒܚ̈ܝܝܟ ܡܪܐܼ܂ ܐܠܐ ܬܐܡܪ ܠܝ ܡܢܐ ܕܓܘܚܟܐ ܐܬܚܙܝ ܠܟ ܕܓܚܿܟ ܐܢܬ܂ ܐܡܪ ܠܗ
48:26	ܡܪܐ܂ ܓܚܿܟ ܐܢܐܼ ܥܠ ܙܒܢܐ܂ ܕܟܕ ܠܐ ܝܙܝܦܐ ܠܗ ܡܢܝ ܒܝܫܬܐܼ ܦܪܥ ܠܝ܂
48:27	ܫܠܡܬ ܐܓܪܬܐ ܕܡܪܐ ܒܪ ܣܪܦܝܘܢ܀܀