← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information
62040: P Mt

Click on a word for lexical analysis.
Click on a red-colored coordinate for comments and/or translations of the line
View in Estrangelo
Ask AI about a passage
Hide manuscript variants

previous chapter


04:01 [ai]ܗܳܝܕܶܝܢ ܝܶܫܽܘܥ ܐܶܬܼܕܒܰܪ ܡܶܢ ܪܽܘܚܳܐ ܕܩܽܘܕܼܫܳܐ ܠܡܰܕܼܒܪܳܐ܃ ܕܢܶܬܼܢܰܣܶܐ ܡܶܢ ܐܳܟܼܶܠܩܰܪܨܳܐ܀
04:02 [ai]ܘܨܳܡ ܐܰܪ̈ܒܥܺܝܢ ܝܰܘܡܺܝܢ̈ ܘܰܐܪ̈ܒܥܺܝܢ ܠܰܝܠܰܘܳܢ̈܂ ܐ̱ܚܪܳܝܰܬܼ ܕܶܝܢ ܟܦܼܶܢ܂
04:03 [ai]ܘܰܩܪܶܒܼ ܗܰܘ ܕܰܡܢܰܣܶܐ܂ ܘܶܐܡܰܪ ܠܶܗ܂ ܐܶܢ ܒܪܶܗ ܐܰܢ̱ܬܿ ܕܰܐܠܳܗܳܐ܃ ܐܶܡܰܪ ܕܗܳܠܶܝܢ ܟܺܐܦܼܶܐ̈ ܢܶܗܘܝܳܢ̈ ܠܰܚܡܳܐ܂
04:04 [ai]ܗܽܘ ܕܶܝܢ ܥܢܳܐ ܘܶܐܡܰܪ܂ ܟܬܼܺܝܒܼ܂ ܕܠܳܐ ܗ̱ܘܳܐ ܒܠܰܚܡܳܐ ܒܰܠܚܽܘܕܼ ܚܳܝܶܐ ܒܰܪܢܳܫܳܐ܃ ܐܶܠܳܐ ܒܟܽܠ ܡܶܠܳܐ ܕܢܳܦܼܩܳܐ ܡܶܢ ܦܽܘܡܶܗ ܕܰܐܠܳܗܳܐ܀
04:05 [ai]ܗܳܝܕܶܝܢ ܕܰܒܼܪܶܗ ܐܳܟܼܶܠܩܰܪܨܳܐ ܠܰܡܕܼܺܝܢܰܬܼ ܩܽܘܕܼܫܳܐ܃ ܘܰܐܩܺܝܡܶܗ ܥܰܠ ܟܶܢܦܼܳܐ ܕܗܰܝܟܠܳܐ܃
04:06 [ai]ܘܶܐܡܰܪ ܠܶܗ܂ ܐܶܢ ܒܪܶܗ ܐܰܢ̱ܬܿ ܕܰܐܠܳܗܳܐ܃ ܫܕܼܺܝ ܢܰܦܼܫܳܟܼ ܠܬܼܰܚܬܿ܂ ܟܬܼܺܝܒܼ ܓܶܝܪ܂ ܕܰܠܡܰܠܰܐܟܼܰܘܗ̱ܝ̈ ܢܦܼܰܩܶܕܼ ܥܠܰܝܟܿ܂ ܘܥܰܠ ܐܺܝܕܼܰܝܗܽܘܢ̈ ܢܶܫܩܠܽܘܢܳܟܼ܃ ܕܠܳܐ ܬܶܬܿܩܶܠ ܒܟܺܐܦܼܳܐ ܪܶܓܼܠܳܟܼ܂
04:07 [ai]ܐܳܡܰܪ ܠܶܗ ܝܶܫܽܘܥ܂ ܬܽܘܒܼ ܟܬܼܺܝܒܼ܃ ܕܠܳܐ ܬܢܰܣܶܐ ܠܡܳܪܝܳܐ ܐܰܠܳܗܳܟܼ܀
04:08 [ai]ܬܽܘܒܼ ܕܰܒܼܪܶܗ ܐܳܟܼܶܠܩܰܪܨܳܐ ܠܛܽܘܪܳܐ ܕܛܳܒܼ ܪܳܡ܂ ܘܚܰܘܝܶܗ ܟܽܠܗܶܝܢ ܡܰܠܟܿܘܳܬܼܳܐ̈ ܕܥܳܠܡܳܐ܂ ܘܫܽܘܒܼܚܗܶܝܢ܂
04:09 [ai]ܘܶܐܡܰܪ ܠܶܗ܂ ܗܳܠܶܝܢ ܟܽܠܗܶܝܢ ܠܳܟܼ ܐܶܬܿܶܠ܂ ܐܶܢ ܬܶܦܿܶܠ ܬܶܣܓܿܽܘܕܼ ܠܺܝ܂
04:10 [ai]ܗܳܝܕܶܝܢ ܐܶܡܰܪ ܠܶܗ ܝܶܫܽܘܥ܂ ܙܶܠ ܠܳܟܼ ܣܳܛܳܢܳܐ܃ ܟܬܼܺܝܒܼ ܓܶܝܪ܂ ܕܰܠܡܳܪܝܳܐ ܐܰܠܳܗܳܟܼ ܬܶܣܓܿܽܘܕܼ܃ ܘܠܶܗ ܒܰܠܚܽܘܕܼܰܘܗ̱ܝ ܬܶܦܼܠܽܘܚ܀
04:11 [ai]ܗܳܝܕܶܝܢ ܫܰܒܼܩܶܗ ܐܳܟܼܶܠܩܰܪܨܳܐ܂ ܘܗܳܐ ܡܰܠܰܐܟܼܶܐ̈ ܩܪܶܒܼܘ ܘܰܡܫܰܡܫܺܝܢ ܗ̱ܘܰܘ ܠܶܗ܀܀
04:12 [ai]ܟܰܕܼ ܫܡܰܥ ܕܶܝܢ ܝܶܫܽܘܥ ܕܝܽܘܚܰܢܳܢ ܐܶܫܬܿܠܶܡ܃ ܫܰܢܺܝ ܠܶܗ ܠܰܓܼܠܺܝܠܳܐ܂
04:13 [ai]ܘܫܰܒܼܩܳܗ ܠܢܳܨܪܰܬܼ܃ ܘܶܐܬܼܳܐ ܥܡܰܪ ܒܰܟܼܦܼܰܪܢܰܚܽܘܡ܂ ܥܰܠ ܝܰܕܼ ܝܰܡܳܐ܃ ܒܰܬܼܚܽܘܡܳܐ ܕܰܙܒܼܳܘܠܽܘܢ ܘܰܕܼܢܰܦܼܬܿܳܠܺܝ܀
04:14 [ai]ܕܢܶܬܼܡܰܠܶܐ ܡܶܕܶܡ ܕܶܐܬܼܶܐܡܰܪ ܒܝܰܕܼ ܐܶܫܰܥܝܳܐ ܢܒܼܺܝܳܐ܂ ܕܶܐܡܰܪ܃
04:15 [ai]ܐܰܪܥܳܐ ܕܰܙܒܼܳܘܠܽܘܢ܂ ܐܰܪܥܳܐ ܕܢܰܦܼܬܿܳܠܺܝ܂ ܐܽܘܪܚܳܐ ܕܝܰܡܳܐ܃ ܥܶܒܼܪ̈ܰܘܗ̱ܝ ܕܝܽܘܪܕܿܢܳܢ܃ ܓܠܺܝܠܳܐ ܕܥܰܡ̱ܡܶܐ̈܂
04:16 [ai]ܥܰܡܳܐ ܕܝܳܬܼܶܒܼ ܒܚܶܫܽܘܟܼܳܐ ܢܽܘܗܪܳܐ ܪܰܒܿܳܐ ܚܙܳܐ܂ ܘܰܐܝܠܶܝܢ ܕܿܝܳܬܼܒܺܝܢ ܒܰܐܬܼܪܳܐ܂ ܘܰܒܛܶܠܳܠܶܐ̈ ܕܡܰܘܬܳܐ܃ ܢܽܘܗܪܳܐ ܕܢܰܚ ܠܗܽܘܢ܀܀
04:17 [ai]ܡܶܢ ܗܳܝܕܶܝܢ ܫܰܪܺܝ ܝܶܫܽܘܥ ܠܡܰܟܼܪܳܙܽܘ܂ ܘܰܠܡܺܐܡܰܪ܃ ܬܽܘܒܼܘ܃ ܩܶܪܒܿܰܬܼ ܠܳܗ ܓܶܝܪ ܡܰܠܟܿܽܘܬܼܳܐ ܕܰܫܡܰܝܳܐ܀܀
04:18 [ai]ܘܟܼܰܕܼ ܡܗܰܠܶܟܼ ܥܰܠ ܝܰܕܼ ܝܰܡܳܐ ܕܰܓܼܠܺܝܠܳܐ܃ ܚܙܳܐ ܬܿܪ̈ܶܝܢ ܐܰܚܺܝܢ̈܃ ܫܶܡܥܽܘܢ ܕܶܐܬܼܩܪܺܝ ܟܺܐܦܼܳܐ܂ ܘܰܐܢܕܿܪܶܐܘܳܣ ܐܰܚܽܘܗ̱ܝ܃ ܕܪܳܡܶܝܢ ܡܨܺܝܕܼܳܬܼܳܐ̈ ܒܝܰܡܳܐ܂ ܐܺܝܬܼܰܝܗܽܘܢ ܗ̱ܘܰܘ ܓܶܝܪ ܨܰܝܳܕܼܶܐ̈܂
04:19 [ai]ܘܶܐܡܰܪ ܠܗܽܘܢ ܝܶܫܽܘܥ܂ ܬܰܘ ܒܳܬܼܰܪܝ܃ ܘܶܐܥܒܿܶܕܼܟܼܽܘܢ ܕܬܶܗܘܽܘܢ ܨܰܝܳܕܼܶܐ̈ ܕܿܰܒܼܢܰܝ ܐ̱ܢܳܫܳܐ̈܂
04:20 [ai]ܗܶܢܽܘܢ ܕܶܝܢ ܡܶܚܕܼܳܐ ܫܒܼܰܩܘ ܡܨܺܝܕܼܳܬܼܗܽܘܢ̈܂ ܘܶܐܙܰܠܘ ܒܳܬܼܪܶܗ܀
04:21 [ai]ܘܟܼܰܕܼ ܥܒܼܰܪ ܡܶܢ ܬܰܡܳܢ܃ ܚܙܳܐ ܐ̱ܚܪ̈ܳܢܶܐ ܐܰܚܶܐ̈ ܬܿܪ̈ܶܝܢ܃ ܝܥܰܩܽܘܒܼ ܒܰܪ ܙܰܒܼܕܼܰܝ ܘܝܽܘܚܰܢܳܢ ܐܰܚܽܘܗ̱ܝ܃ ܒܶܐܠܦܼܳܐ ܥܰܡ ܙܰܒܼܕܼܰܝ ܐܰܒܼܽܘܗܽܘܢ܃ ܕܰܡܬܼܰܩܢܺܝܢ ܡܨܺܝܕܼܳܬܼܗܽܘܢ̈܂ ܘܰܩܪܳܐ ܐܶܢܽܘܢ܂
04:22 [ai]ܗܶܢܽܘܢ ܕܶܝܢ ܡܶܚܕܼܳܐ ܫܒܼܰܩܘ ܠܶܐܠܦܼܳܐ ܘܠܰܐܒܼܽܘܗܽܘܢ܃ ܘܶܐܙܰܠܘ ܒܳܬܼܪܶܗ܀
04:23 [ai]ܘܡܶܬܼܟܿܪܶܟܼ ܗ̱ܘܳܐ ܝܶܫܽܘܥ ܒܟܽܠܳܗ ܓܠܺܝܠܳܐ܃ ܘܡܰܠܶܦܼ ܗ̱ܘܳܐ ܒܰܟܼܢܽܘܫܳܬܼܗܽܘܢ̈܃ ܘܡܰܟܼܪܶܙ ܣܒܼܰܪܬܼܳܐ ܕܡܰܠܟܿܽܘܬܼܳܐ܃ ܘܡܰܐܣܶܐ ܟܽܠ ܟܺܐܒܼ ܘܟܼܽܘܪܗܳܢ ܒܥܰܡܳܐ܀
04:24 [ai]ܘܶܐܫܬܿܡܰܥ ܛܶܒܶܗ ܒܟܽܠܳܗ ܣܽܘܪܺܝܰܐ܂ ܘܩܰܪܶܒܼܘ ܠܶܗ ܟܽܠܗܽܘܢ ܐܰܝܠܶܝܢ ܕܒܺܝܫ ܒܺܝܫ ܥܒܼܺܝܕܼܺܝܢ܂ ܒܟܽܘܪ̈ܗܳܢܶܐ ܡܫܰܚܠܦܼܶܐ̈܂ ܘܰܐܝܠܶܝܢ ܕܰܐܠܺܝܨܺܝܢ̈ ܒܬܰܫܢܺܝܩܶܐ̈܃ ܘܕܼܰܝܘܳܢܶܐ̈܂ ܘܰܕܼܒܼܰܪ ܐܶܓܿܳܪ̈ܶܐ܂ ܘܰܡܫܰܪ̈ܰܝܳܐ܂ ܘܰܐܣܺܝ ܐܶܢܽܘܢ܂
04:25 [ai]ܘܶܐܙܰܠܘ ܒܳܬܼܪܶܗ ܟܶܢܫܶܐ̈ ܣܰܓܿܺܝܶܐܐ̈܃ ܡܶܢ ܓܠܺܝܠܳܐ܂ ܘܡܶܢ ܥܶܣܪܰܬܼ ܡܕܼܺܝ̈ܢܳܬܼܳܐ ܘܡܶܢ ܐܽܘܪܺܫܠܶܡ܂ ܘܡܶܢ ܺܝܗܽܘܕܼ܂ ܘܡܶܢ ܥܶܒܼܪܳܐ ܕܝܽܘܪܕܿܢܳܢ ܿ܀ܿ܀ܿ

next chapter