← Back
The Comprehensive Aramaic Lexicon
← Return to the Text Browser
click on the file description for more information
62040: P Mt

Click on a word for lexical analysis.
Click on a red-colored coordinate for comments and/or translations of the line
View in Estrangelo
Ask AI about a passage
Hide manuscript variants

previous chapter


24:01 [ai]ܘܰܢܦܼܰܩ ܝܶܫܽܘܥ ܡܶܢ ܗܰܝܟܠܳܐ ܠܡܺܐܙܰܠ܃ ܘܰܩܪܶܒܼܘ ܬܰܠܡܺܝܕܼܰܘܗ̱ܝ̈܂ ܡܚܰܘܶܝܢ ܗ̱ܘܰܘ ܠܶܗ ܒܶܢܝܳܢܶܗ ܕܗܰܝܟܠܳܐ܂
24:02 [ai]ܗܽܘ ܕܶܝܢ ܐܶܡܰܪ ܠܗܽܘܢ܂ ܠܳܐ ܗܳܐ ܚܳܙܶܝܢ ܐܢ̱ܬܿܽܘܢ ܗܳܠܶܝܢ ܟܽܠܗܶܝܢ܂ ܐܰܡܺܝܢ ܐܳܡܰܪ ܐ̱ܢܳܐ ܠܟܼܽܘܢ܃ ܕܠܳܐ ܬܶܫܬܿܒܼܶܩ ܗܳܪܟܿܳܐ ܟܺܐܦܼ ܥܰܠ ܟܺܐܦܼ܃ ܕܠܳܐ ܬܶܣܬܿܬܼܰܪ܀
24:03 [ai]ܘܟܼܰܕܼ ܺܝܬܼܶܒܼ ܝܶܫܽܘܥ ܥܰܠ ܛܽܘܪܳܐ ܕܙܰܝܬܿܶܐ̈܃ ܩܪܶܒܼܘ ܬܰܠܡܺܝܕܼܰܘܗ̱ܝ̈܂ ܘܳܐܡܪܺܝܢ ܒܰܝܢܰܝܗܽܘܢ ܘܠܶܗ܂ ܐܶܡܰܪ ܠܰܢ ܐܶܡܰܬܼܝ ܗܳܠܶܝܢ ܢܶܗܘܝܳܢ̈܂ ܘܡܳܢܳܐ ܗ̱ܝ ܐܳܬܼܳܐ ܕܡܶܐܬܼܺܝܬܼܳܟܼ ܘܰܕܼܫܽܘܠܳܡܶܗ ܕܥܳܠܡܳܐ܂
24:04 [ai]ܥܢܳܐ ܝܶܫܽܘܥ܂ ܘܶܐܡܰܪ ܠܗܽܘܢ܂ ܐܶܙܕܿܰܗ̱ܪܘ ܠܳܐ ܐ̱ܢܳܫ ܢܰܛܥܶܝܟܼܽܘܢ܂
24:05 [ai]ܣܰܓܿܺܝܶܐܐ̈ ܓܶܝܪ ܢܺܐܬܼܽܘܢ ܒܫܶܡܝ܃ ܘܢܺܐܡܪܽܘܢ܂ ܕܶܐܢܳܐ ܐ̱ܢܳܐ ܡܫܺܝܚܳܐ܂ ܘܣܰܓܿܺܝܶܐܐ̈ ܢܶܛܥܽܘܢ܂
24:06 [ai]ܥܬܼܺܝܕܼܺܝܢ ܐܢ̱ܬܿܽܘܢ ܕܶܝܢ ܠܡܶܫܡܰܥ܂ ܩܺܐܪ̈ܣܶܐ ܘܫܶܡܥܳܐ ܕܿܰܩܪ̈ܳܒܼܶܐ܂ ܚܙܰܘ ܠܳܐ ܬܶܬܿܕܿܰܘܕܼܽܘܢ܂ ܘܳܠܶܐ ܓܶܝܪ ܕܟܽܠܗܶܝܢ ܢܶܗܘܝܳܢ̈܂ ܐܶܠܳܐ ܠܳܐ ܥܕܼܰܟܿܺܝܠ ܫܽܘܠܳܡܳܐ܂
24:07 [ai]ܢܩܽܘܡ ܓܶܝܪ ܥܰܡܳܐ ܥܰܠ ܥܰܡܳܐ܃ ܘܡܰܠܟܿܽܘܬܼܳܐ ܥܰܠ ܡܰܠܟܿܽܘܬܼܳܐ܂ ܘܢܶܗܘܽܘܢ ܟܰܦܼܢܶܐ̈ ܘܡܰܘܬܿܳܢܶܐ̈ ܘܙܰܘܥܶܐ̈܂ ܒܕܽܘܟܿܳܐ ܕܽܘܟܿܳܐ܂
24:08 [ai]ܗܳܠܶܝܢ ܕܶܝܢ ܟܽܠܗܶܝܢ ܪܺܫܳܐ ܐܶܢܶܝܢ̈ ܕܚܶܒܼܠܶܐ̈܀
24:09 [ai]ܗܳܝܕܶܝܢ ܢܰܫܠܡܽܘܢܳܟܼܽܘܢ ܠܽܐܘܠܨܳܢܶܐ̈܂ ܘܢܶܩܛܠܽܘܢܳܟܼܽܘܢ܂ ܘܬܼܶܗܘܽܘܢ ܣܢܺܝܐܺܝܢ̈ ܡܶܢ ܟܽܠܗܽܘܢ ܥܰܡ̱ܡܶܐ̈܂ ܡܶܛܽܠ ܫܶܡܝ܂
24:10 [ai]ܗܳܝܕܶܝܢ ܢܶܬܼܟܿܰܫܠܽܘܢ ܣܰܓܿܺܝܶܐܐ̈܂ ܘܢܶܣܢܽܘܢ ܚܰܕܼ ܠܚܰܕܼ܂ ܘܢܰܫܠܡܽܘܢ ܚܰܕܼ ܠܚܰܕܼ܂
24:11 [ai]ܘܣܰܓܿܺܝܶܐܐ̈ ܢܒܼܺܝܶܐ̈ ܕܰܓܳܠܶܐ̈ ܢܩܽܘܡܽܘܢ܃ ܘܢܰܛܥܽܘܢ ܠܣܰܓܿܺܝܶܐܐ̈܂
24:12 [ai]ܘܡܶܛܽܠ ܣܰܓܿܺܝܐܽܘܬܼ ܥܰܘܠܳܐ܃ ܢܦܼܽܘܓܼ ܚܽܘܒܿܳܐ ܕܣܰܓܿܺܝܶܐܐ̈܂
24:13 [ai]ܡܰܢ ܕܿܰܢܣܰܝܒܰܪ ܕܶܝܢ ܥܕܼܰܡܳܐ ܠܚܰܪܬܼܳܐ܂ ܗܽܘ ܢܺܚܶܐ܀
24:14 [ai]ܘܬܼܶܬܼܟܿܪܶܙ ܗܳܕܼܶܐ ܣܒܼܰܪܬܼܳܐ ܕܡܰܠܟܿܽܘܬܼܳܐ܂ ܒܟܽܠܶܗ ܥܳܠܡܳܐ܃ ܠܣܳܗܕܿܽܘܬܼܳܐ ܕܟܽܠܗܽܘܢ ܥܰܡ̱ܡܶܐ̈܃ ܘܗܳܝܕܶܝܢ ܢܺܐܬܼܶܐ ܫܽܘܠܳܡܳܐ܀
24:15 [ai]ܡܳܐ ܕܶܝܢ ܕܰܚܙܰܝܬܿܽܘܢ ܐܳܬܼܳܐ ܛܰܢܦܼܬܼܳܐ ܕܚܽܘܪܒܿܳܐ܃ ܕܶܐܬܼܶܐܡܰܪ ܒܕܼܳܢܺܝܐܝܶܠ ܢܒܼܺܝܳܐ܃ ܕܩܳܝܡܳܐ ܒܕܽܘܟܿܬܼܳܐ ܩܰܕܿܺܝܫܬܳܐ܃ ܗܰܘ ܕܩܳܪܶܐ ܢܶܣܬܿܰܟܿܰܠ܂
24:16 [ai]ܗܳܝܕܶܝܢ ܐܰܝܠܶܝܢ ܕܒܺܝܗܽܘܕܼ ܐܶܢܽܘܢ܂ ܢܶܥܪܩܽܘܢ ܠܛܽܘܪܳܐ܂
24:17 [ai]ܘܗܰܘ ܕܒܶܐܓܿܳܪܳܐ ܗܽܘ܃ ܠܳܐ ܢܶܚܽܘܬܼ ܠܡܶܣܰܒܼ ܕܰܒܼܒܼܰܝܬܿܶܗ܂
24:18 [ai]ܘܰܐܝܢܳܐ ܕܰܒܼܚܰܩܠܳܐ ܗܽܘ܃ ܠܳܐ ܢܶܬܼܗܦܼܶܟܼ ܠܒܼܶܣܬܿܪܶܗ ܠܡܶܣܰܒܼ ܠܒܼܳܫܶܗ܀
24:19 [ai]ܘܳܝ ܕܶܝܢ ܠܒܼܰܛܢܳܬܼܳܐ̈܂ ܘܠܰܐܝܠܶܝܢ ܕܡܰܝܢܩܳܢ̈ ܒܗܳܢܽܘܢ ܝܰܘܡܳܬܼܳܐ̈܀
24:20 [ai]ܨܰܠܰܘ ܕܶܝܢ ܕܠܳܐ ܢܶܗܘܶܐ ܥܪܽܘܩܺܝܟܼܽܘܢ ܒܣܰܬܼܘܳܐ܂ ܘܠܳܐ ܒܫܰܒܿܬܼܳܐ܂
24:21 [ai]ܢܶܗܘܶܐ ܓܶܝܪ ܗܳܝܕܶܝܢ ܐܽܘܠܨܳܢܳܐ ܪܰܒܿܳܐ܃ ܐܰܝܢܳܐ ܕܠܳܐ ܗܘܳܐ ܡܶܢ ܪܺܫܺܝܬܼܶܗ ܕܥܳܠܡܳܐ܂ ܘܰܥܕܼܰܡܳܐ ܠܗܳܫܳܐ܂ ܘܠܳܐ ܢܶܗܘܶܐ܂
24:22 [ai]ܘܶܐܠܽܘ ܠܳܐ ܐܶܬܼܟܰܪܺܝܘ ܝܰܘܡܳܬܼܳܐ̈ ܗܳܢܽܘܢ܃ ܠܳܐ ܚܳܝܶܐ ܗ̱ܘܳܐ ܟܽܠ ܒܣܰܪ܂ ܡܶܛܽܠ ܓܒܼܰܝܳܐ̈ ܕܶܝܢ܂ ܢܶܬܼܟܰܪܽܘܢ ܝܰܘܡܳܬܼܳܐ̈ ܗܳܢܽܘܢ܀
24:23 [ai]ܗܳܝܕܶܝܢ ܐܶܢ ܐ̱ܢܳܫ ܢܺܐܡܰܪ ܠܟܼܽܘܢ܃ ܗܳܐ ܗܳܪܟܿܳܐ ܗܽܘ ܡܫܺܝܚܳܐ ܃ ܐܰܘ ܗܳܪܟܿܳܐ܂ ܠܳܐ ܬܗܰܝܡܢܽܘܢ܂
24:24 [ai]ܢܩܽܘܡܽܘܢ ܓܶܝܪ ܡܫܺܝܚܶܐ̈ ܕܰܓܳܠܶܐ̈܂ ܘܰܢܒܼܺܝܶܐ̈ ܕܟܰܕܿܳܒܼܽܘܬܼܳܐ܂ ܘܢܶܬܿܠܽܘܢ ܐܳܬܼܘܳܬܼܳܐ̈ ܪ̈ܰܘܪܒܼܳܬܼܳܐ܃ ܐܰܝܟܼ ܕܢܰܛܥܽܘܢ ܐܶܢ ܡܶܫܟܿܚܳܐ܂ ܐܳܦܼ ܠܰܓܼܒܼܰܝܳܐ̈܂
24:25 [ai]ܗܳܐ ܩܰܕܿܡܶܬܼ ܐܶܡܪܶܬܼ ܠܟܼܽܘܢ܀
24:26 [ai]ܐܶܢ ܗܳܟܼܺܝܠ ܢܺܐܡܪܽܘܢ ܠܟܼܽܘܢ܂ ܗܳܐ ܒܚܽܘܪܒܿܳܐ ܗܽܘ܂ ܠܳܐ ܬܶܦܿܩܽܘܢ܂ ܐܰܘ ܕܗܳܐ ܒܬܰܘܳܢܳܐ ܗܽܘ܂ ܠܳܐ ܬܗܰܝܡܢܽܘܢ܂
24:27 [ai]ܐܰܝܟܿܰܢܳܐ ܓܶܝܪ ܕܒܰܪܩܳܐ ܢܳܦܼܶܩ ܡܶܢ ܡܰܕܼܢܚܳܐ܃ ܘܡܶܬܼܚܙܶܐ ܥܕܼܰܡܳܐ ܠܡܰܥܪܒܼܳܐ܃ ܗܳܟܼܰܢܳܐ ܬܶܗܘܶܐ ܡܶܐܬܼܺܝܬܼܶܗ ܕܰܒܼܪܶܗ ܕܐ̱ܢܳܫܳܐ܀
24:28 [ai]ܐܰܝܟܿܳܐ ܕܶܐܢ ܢܶܗܘܶܐ ܦܰܓܼܪܳܐ܃ ܬܰܡܳܢ ܢܶܬܼܟܿܰܢܫܽܘܢ ܢܶܫܪ̈ܶܐ܀
24:29 [ai]ܡܶܚܕܼܳܐ ܕܶܝܢ ܒܳܬܼܰܪ ܐܽܘܠܨܳܢܳܐ ܕܝܰܘܡܳܬܼܳܐ̈ ܗܳܢܽܘܢ܂ ܫܶܡܫܳܐ ܢܶܚܫܰܟܼ܂ ܘܣܰܗܪܳܐ ܠܳܐ ܢܚܰܘܶܐ ܢܽܘܗܪܶܗ܂ ܘܟܼܰܘܟܿܒܼܶܐ̈ ܢܶܦܿܠܽܘܢ ܡܶܢ ܫܡܰܝܳܐ܂ ܘܚܰܝܠܶܐ̈ ܕܰܫܡܰܝܳܐ ܢܶܬܿܬܿܙܺܝܥܽܘܢ܂
24:30 [ai]ܘܗܳܝܕܶܝܢ ܢܶܬܼܚܙܶܐ ܢܺܝܫܶܗ ܕܰܒܼܪܶܗ ܕܐ̱ܢܳܫܳܐ ܒܰܫܡܰܝܳܐ܂ ܘܗܳܝܕܶܝܢ ܢܰܪ̈ܩܕܼܳܢ ܟܽܠܗܶܝܢ ܫܰܪ̈ܒܿܳܬܼܳܐ ܕܰܐܪܥܳܐ܃ ܘܢܶܚܙܽܘܢ ܠܰܒܼܪܶܗ ܕܐ̱ܢܳܫܳܐ܂ ܕܳܐܬܼܶܐ ܥܰܠ ܥܢܳܢܰܝ̈ ܫܡܰܝܳܐ܃ ܥܰܡ ܚܰܝܠܳܐ ܘܫܽܘܒܼܚܳܐ ܣܰܓܿܺܝܳܐܐ܂
24:31 [ai]ܘܰܢܫܰܕܿܰܪ ܡܰܠܰܐܟܼܰܘܗ̱ܝ̈܂ ܥܰܡ ܫܺܝܦܼܽܘܪܳܐ ܪܰܒܿܳܐ܃ ܘܰܢܟܼܰܢܫܽܘܢ ܠܰܓܼܒܼܰܝܳܐ̈ ܕܺܝܠܶܗ܂ ܡܶܢ ܐܰܪ̈ܒܿܥܳܬܼ ܪ̈ܽܘܚܶܐ܂ ܡܶܢ ܪܺܫܗܽܘܢ ܕܰܫܡܰܝܳܐ܂ ܘܰܥܕܼܰܡܳܐ ܠܪܺܫܗܽܘܢ܀
24:32 [ai]ܡܶܢ ܬܿܺܬܳܐ ܕܶܝܢ ܺܝܠܰܦܼܘ ܦܶܠܶܐܬܼܳܐ܂ ܕܡܶܚܕܼܳܐ ܕܣܰܘܟܿܶܝܗ̈ ܪ̈ܳܟܼܳܢ ܘܦܼܳܪܥܺܝܢ ܛܰܪ̈ܦܼܶܝܗ܃ ܝܳܕܼܥܺܝܢ ܐܢ̱ܬܿܽܘܢ܂ ܕܰܡܛܳܐ ܩܰܝܛܳܐ܂
24:33 [ai]ܗܳܟܼܰܢܳܐ ܐܳܦܼ ܐܰܢ̱ܬܿܽܘܢ܂ ܡܳܐ ܕܰܚܙܰܝܬܿܽܘܢ ܗܳܠܶܝܢ ܟܽܠܗܶܝܢ܃ ܕܰܥܘ ܕܰܡܛܳܬܼ ܠܳܗ ܠܬܼܰܪܥܳܐ܂
24:34 [ai]ܐܰܡܺܝܢ ܐܳܡܰܪ ܐ̱ܢܳܐ ܠܟܼܽܘܢ܃ ܕܠܳܐ ܬܿܶܥܒܰܪ ܫܰܪܒܿܬܼܳܐ ܗܳܕܼܶܐ܃ ܥܕܼܰܡܳܐ ܕܗܳܠܶܝܢ ܟܽܠܗܶܝܢ ܢܶܗܘܝܳܢ̈܂
24:35 [ai]ܫܡܰܝܳܐ ܘܰܐܪܥܳܐ ܢܶܥܒܿܪܽܘܢ܃ ܘܡܶܠܰܝ̈ ܠܳܐ ܢܶܥܒܿܪ̈ܳܢ܀
24:36 [ai]ܥܰܠ ܝܰܘܡܳܐ ܕܶܝܢ ܗܰܘ ܘܥܰܠ ܫܳܥܬܼܳܐ ܗܳܝ܃ ܐ̱ܢܳܫ ܠܳܐ ܝܳܕܼܰܥ܂ ܐܳܦܼܠܳܐ ܡܰܠܰܐܟܼܶܐ̈ ܕܰܫܡܰܝܳܐ܂ ܐܶܠܳܐ ܐܰܒܼܳܐ ܒܰܠܚܽܘܕܼ܀
24:37 [ai]ܐܰܝܟܿܰܢܳܐ ܕܶܝܢ ܕܝܰܘܡܰܝ̈ ܢܽܘܚ܃ ܗܳܟܼܰܢܳܐ ܬܶܗܘܶܐ ܡܶܐܬܼܺܝܬܼܶܗ ܕܰܒܼܪܶܗ ܕܐ̱ܢܳܫܳܐ܂
24:38 [ai]ܐܰܝܟܿܰܢܳܐ ܓܶܝܪ ܕܺܐܝܬܼܰܝܗܽܘܢ ܗ̱ܘܰܘ ܩܕܼܳܡ ܛܰܘܦܼܳܢܳܐ܂ ܐܳܟܼܠܺܝܢ ܘܫܳܬܼܶܝܢ܃ ܘܢܳܣܒܺܝܢ ܢܶܫܶܐ̈ ܘܝܳܗܒܺܝܢ ܠܓܼܰܒܼܪ̈ܶܐ ܃ ܥܕܼܰܡܳܐ ܠܝܰܘܡܳܐ ܕܥܰܠ ܢܽܘܚ ܠܟܼܶܘܶܝܠܳܐ܃
24:39 [ai]ܘܠܳܐ ܺܝܕܼܰܥܘ܂ ܥܕܼܰܡܳܐ ܕܶܐܬܼܳܐ ܛܰܘܦܼܳܢܳܐ܂ ܘܰܫܩܰܠ ܠܟܼܽܠܗܽܘܢ܃ ܗܳܟܼܰܢܳܐ ܬܶܗܘܶܐ ܡܶܐܬܼܺܝܬܼܶܗ ܕܰܒܼܪܶܗ ܕܐ̱ܢܳܫܳܐ܀
24:40 [ai]ܗܳܝܕܶܝܢ ܬܿܪ̈ܶܝܢ ܢܶܗܘܽܘܢ ܒܰܩܪܺܝܬܼܳܐ܂ ܚܰܕܼ ܢܶܬܿܕܒܰܪ܂ ܘܚܰܕܼ ܢܶܫܬܿܒܼܶܩ܂
24:41 [ai]ܘܬܼܰܪ̈ܬܿܶܝܢ ܢܶܗܘܝܳܢ̈ ܛܳܚܢܳܢ̈ ܒܪܰܚܝܳܐ܂ ܚܕܼܳܐ ܡܶܬܿܕܰܒܼܪܳܐ܂ ܘܰܚܕܼܳܐ ܡܶܫܬܿܰܒܼܩܳܐ܂
24:42 [ai]ܐܶܬܿܬܿܥܺܝܪܘ ܗܳܟܼܺܝܠ܃ ܕܠܳܐ ܝܳܕܼܥܺܝܢ ܐܢ̱ܬܿܽܘܢ ܒܰܐܝܕܼܳܐ ܫܳܥܬܼܳܐ ܐܳܬܼܶܐ ܡܳܪܟܼܽܘܢ܀
24:43 [ai]ܗܳܕܼܶܐ ܕܶܝܢ ܕܰܥܘ܂ ܕܶܐܠܽܘ ܝܳܕܼܰܥ ܗ̱ܘܳܐ ܡܳܪܶܐ ܒܰܝܬܳܐ܂ ܒܰܐܝܕܼܳܐ ܡܰܛܰܪܬܼܳܐ ܐܳܬܼܶܐ ܓܰܢܳܒܼܳܐ܃ ܡܶܬܿܬܿܥܺܝܪ ܗ̱ܘܳܐ܂ ܘܠܳܐ ܫܳܒܼܶܩ ܗ̱ܘܳܐ ܕܢܶܬܼܦܿܠܶܫ ܒܰܝܬܿܶܗ܂
24:44 [ai]ܡܶܛܽܠ ܗܳܢܳܐ܂ ܐܳܦܼ ܐܰܢ̱ܬܿܽܘܢ ܗܘܰܘ ܡܛܰܝܒܼܺܝܢ̈܂ ܕܰܒܼܫܳܥܬܼܳܐ ܕܠܳܐ ܣܳܒܼܪܺܝܢ ܐܢ̱ܬܿܽܘܢ܂ ܢܺܐܬܼܶܐ ܒܪܶܗ ܕܐ̱ܢܳܫܳܐ ܿ܀ܿ܀ܿ
24:45 [ai]ܡܰܢܽܘ ܟܰܝ ܐܺܝܬܼܰܘܗ̱ܝ ܥܰܒܼܕܿܳܐ ܡܗܰܝܡܢܳܐ ܘܚܰܟܿܺܝܡܳܐ܃ ܕܰܐܩܺܝܡܶܗ ܡܳܪܶܗ ܥܰܠ ܒܢܰܝ ܒܰܝܬܿܶܗ܃ ܕܢܶܬܿܶܠ ܠܗܽܘܢ ܣܰܝܒܿܳܪܬܳܐ ܒܙܰܒܼܢܳܗ܂
24:46 [ai]ܛܽܘܒܼܰܘܗ̱ܝ܂ ܠܥܰܒܼܕܿܳܐ ܗܰܘ܃ ܕܢܺܐܬܼܶܐ ܡܳܪܶܗ ܢܶܫܟܿܚܺܝܘܗ̱ܝ ܕܥܳܒܼܶܕܼ ܗܳܟܼܰܢܳܐ܂
24:47 [ai]ܐܰܡܺܝܢ ܐܳܡܰܪ ܐ̱ܢܳܐ ܠܟܼܽܘܢ܃ ܕܰܢܩܺܝܡܺܝܘܗ̱ܝ ܥܰܠ ܟܽܠ ܕܺܐܝܬܼ ܠܶܗ܂
24:48 [ai]ܐܶܢ ܕܶܝܢ ܢܺܐܡܰܪ ܥܰܒܼܕܿܳܐ ܗܰܘ ܒܺܝܫܳܐ ܒܿܠܶܒܶܗ܂ ܕܡܳܪܝ ܡܰܘܚܰܪ ܠܡܶܐܬܼܳܐ܃
24:49 [ai]ܘܰܢܫܰܪܶܐ ܠܡܶܡܚܳܐ ܟܢܰܘܳܬܼܶܗ̈܃ ܘܢܶܗܘܶܐ ܐܳܟܼܶܠ ܘܫܳܬܼܶܐ ܥܰܡ ܪ̈ܰܘܳܝܶܐ܃
24:50 [ai]ܢܺܐܬܼܶܐ ܡܳܪܶܗ ܕܥܰܒܼܕܿܳܐ ܗܰܘ ܒܝܰܘܡܳܐ ܕܠܳܐ ܣܳܒܼܰܪ܂ ܘܰܒܫܳܥܬܼܳܐ ܕܠܳܐ ܝܳܕܼܰܥ܃
24:51 [ai]ܘܢܶܦܼܠܓܼܺܝܘܗ̱ܝ܂ ܘܰܢܣܺܝܡ ܡܢܳܬܼܶܗ܂ ܥܰܡ ܢܳܣܒܰܝ̈ ܒܰܐܦܿܶܐ̈܂ ܬܰܡܳܢ ܢܶܗܘܶܐ ܒܶܟܼܝܳܐ܂ ܘܚܽܘܪܳܩ ܫܶܢܶܐ̈܀

next chapter