← Back
The Comprehensive Aramaic Lexicon
← Return to the Text Browser
click on the file description for more information
62041: P Mk

Click on a word for lexical analysis.
Click on a red-colored coordinate for comments and/or translations of the line
View in Estrangelo
Ask AI about a passage
Hide manuscript variants

01:01 [ai]ܪܺܫܳܐ ܕܶܐܘܰܢܓܿܶܠܺܝܳܘܢ ܕܝܶܫܽܘܥ ܡܫܺܝܚܳܐ܃ ܒܪܶܗ ܕܰܐܠܳܗܳܐ ܀܀
01:02 [ai]ܐܰܝܟܼ ܕܰܟܼܬܼܺܝܒܼ ܒܶܐܫܰܥܝܳܐ ܢܒܼܺܝܳܐ܂ ܗܳܐ ܡܫܰܕܿܰܪ ܐ̱ܢܳܐ ܡܰܠܰܐܟܼܝ܂ ܩܕܼܳܡ ܦܰܪܨܽܘܦܿܳܟܼ܂ ܕܢܰܬܼܩܶܢ ܐܽܘܪܚܳܟܼ܀
01:03 [ai]ܩܳܠܳܐ ܕܩܳܪܶܐ ܒܡܰܕܼܒܪܳܐ܂ ܛܰܝܶܒܼܘ ܐܽܘܪܚܶܗ ܕܡܳܪܝܳܐ܂ ܘܰܐܫܘܰܘ ܫܒܼܺܝܠܰܘܗ̱ܝ̈܀
01:04 [ai]ܗܘܳܐ ܝܽܘܚܰܢܳܢ ܒܡܰܕܼܒܪܳܐ܃ ܡܰܥܡܶܕܼ ܘܡܰܟܼܪܶܙ ܡܰܥܡܽܘܕܼܺܝܬܼܳܐ ܕܰܬܼܝܳܒܼܽܘܬܼܳܐ܂ ܠܫܽܘܒܼܩܳܢܳܐ ܕܰܚܛܳܗܶܐ̈܀
01:05 [ai]ܘܢܳܦܼܩܳܐ ܗ̱ܘܳܬܼ ܠܘܳܬܼܶܗ ܟܽܠܳܗ ܟܳܘܪ ܕܺܝܗܽܘܕܼ܃ ܘܟܼܽܠܗܽܘܢ ܒܢܰܝ ܐܽܘܪܺܫܠܶܡ܂ ܘܡܰܥܡܶܕܼ ܗ̱ܘܳܐ ܠܗܽܘܢ ܒܝܽܘܪܕܿܢܳܢ܃ ܟܰܕܼ ܡܰܘܕܶܝܢ̈ ܒܰܚܛܳܗܰܝܗܽܘܢ̈܀
01:06 [ai]ܗܽܘ ܕܶܝܢ ܝܽܘܚܰܢܳܢ܂ ܠܒܼܺܝܫ ܗ̱ܘܳܐ ܠܒܼܽܘܫܳܐ ܕܣܰܥܪܳܐ ܕܓܰܡܠܶܐ̈܂ ܘܰܐܣܺܝܪ ܗ̱ܘܳܐ ܥܶܪܰܩܬܼܳܐ ܕܡܶܫܟܿܳܐ ܒܚܰܨܰܘܗ̱ܝ̈܂ ܘܡܶܐܟܼܽܘܠܬܿܶܗ܂ ܐܺܝܬܼܶܝܗ ܗ̱ܘܳܬܼ ܩܰܡܨܶܐ̈܂ ܘܕܼܶܒܼܫܳܐ ܕܒܰܪܳܐ܀
01:07 [ai]ܘܡܰܟܼܪܶܙ ܗ̱ܘܳܐ܂ ܘܳܐܡܰܪ܂ ܗܳܐ ܐܳܬܼܶܐ ܒܳܬܼܰܪܝ܂ ܕܚܰܝܠܬܼܳܢ ܡܶܢܝ܂ ܗܰܘ ܕܠܳܐ ܫܳܘܶܐ ܐ̱ܢܳܐ ܕܶܐܓܼܗܰܢ ܐܶܫܪܶܐ ܥܰܪ̈ܩܶܐ ܕܰܡܣܳܢܰܘܗ̱ܝ̈܂
01:08 [ai]ܐܶܢܳܐ ܐܰܥܡܶܕܿܬܿܟܼܽܘܢ܂ ܒܡܰܝܳܐ̈܂ ܗܽܘ ܕܶܝܢ ܢܰܥܡܶܕܼܟܼܽܘܢ܂ ܒܪܽܘܚܳܐ ܕܩܽܘܕܼܫܳܐ܀
01:09 [ai]ܘܰܗܘܳܐ ܒܝܰܘܡܳܬܼܳܐ̈ ܗܳܢܽܘܢ܃ ܐܶܬܼܳܐ ܝܶܫܽܘܥ܂ ܡܶܢ ܢܳܨܪܰܬܼ ܕܰܓܼܠܺܝܠܳܐ܂ ܘܶܐܬܼܥܡܶܕܼ ܒܝܽܘܪܕܿܢܳܢ ܡܶܢ ܝܽܘܚܰܢܳܢ܀
01:10 [ai]ܘܡܶܚܕܼܳܐ ܕܰܣܠܶܩ ܡܶܢ ܡܰܝܳܐ̈܃ ܚܙܳܐ ܕܶܐܣܬܿܕܼܶܩܘ ܫܡܰܝܳܐ̈܂ ܘܪܽܘܚܳܐ ܐܰܝܟܼ ܝܰܘܢܳܐ ܕܢܶܚܬܿܰܬܼ ܥܠܰܘܗ̱ܝ܂
01:11 [ai]ܘܩܳܠܳܐ ܗܘܳܐ ܡܶܢ ܫܡܰܝܳܐ̈܃ ܐܰܢ̱ܬܿ ܗ̱ܽܘ ܒܶܪܝ ܚܰܒܺܝܒܼܳܐ܂ ܒܳܟܼ ܐܶܨܛܒܼܺܝܬܼ܀
01:12 [ai]ܘܡܶܚܕܼܳܐ ܐܰܦܿܶܩܬܿܶܗ ܪܽܘܚܳܐ ܠܡܰܕܼܒܪܳܐ܂
01:13 [ai]ܘܰܗܘܳܐ ܬܰܡܳܢ ܒܡܰܕܼܒܪܳܐ܂ ܝܰܘܡܳܬܼܳܐ̈ ܐܰܪ̈ܒܥܺܝܢ܂ ܟܰܕܼ ܡܶܬܼܢܰܣܶܐ ܡܶܢ ܣܳܛܳܢܳܐ܂ ܘܺܐܝܬܼܰܘܗ̱ܝ ܗ̱ܘܳܐ ܥܰܡ ܚܰܝܘܳܬܼܳܐ̈܂ ܘܰܡܫܰܡܫܺܝܢ ܗ̱ܘܰܘ ܠܶܗ ܡܰܠܰܐܟܼܶܐ̈܀
01:14 [ai]ܒܳܬܼܰܪ ܕܶܐܫܬܿܠܶܡ ܕܶܝܢ ܝܽܘܚܰܢܳܢ܃ ܐܶܬܼܳܐ ܠܶܗ ܝܶܫܽܘܥ ܠܰܓܼܠܺܝܠܳܐ܂ ܘܡܰܟܼܪܶܙ ܗ̱ܘܳܐ ܣܒܼܰܪܬܼܳܐ ܕܡܰܠܟܿܽܘܬܼܶܗ ܕܰܐܠܳܗܳܐ܂
01:15 [ai]ܘܶܐܡܰܪ܂ ܫܠܶܡ ܠܶܗ ܙܰܒܼܢܳܐ܂ ܘܰܡܛܳܬܼ ܡܰܠܟܿܽܘܬܼܳܐ ܕܰܐܠܳܗܳܐ܂ ܬܽܘܒܼܘ܂ ܘܗܰܝܡܶܢܘ ܒܰܣܒܼܰܪܬܼܳܐ܂
01:16 [ai]ܘܟܼܰܕܼ ܡܗܰܠܶܟܼ ܚܕܼܳܪ̈ܰܝ ܝܰܡܳܐ ܕܰܓܼܠܺܝܠܳܐ܃ ܚܙܳܐ ܠܫܶܡܥܽܘܢ ܘܠܰܐܢܕܿܪܶܐܘܳܣ ܐܰܚܽܘܗ̱ܝ܂ ܕܪܳܡܶܝܢ ܡܨܺܝܕܼܳܬܼܳܐ̈ ܒܝܰܡܳܐ܂ ܐܺܝܬܼܰܝܗܽܘܢ ܗ̱ܘܰܘ ܓܶܝܪ ܨܰܝܳܕܼܶܐ̈܂
01:17 [ai]ܘܶܐܡܰܪ ܠܗܽܘܢ ܝܶܫܽܘܥ܂ ܬܰܘ ܒܳܬܼܰܪܝ܂ ܘܶܐܥܒܿܶܕܼܟܼܽܘܢ܂ ܨܰܝܳܕܼܶܐ̈ ܕܿܰܒܼܢܰܝܐ̱ܢܳܫܳܐ̈܂
01:18 [ai]ܘܡܶܚܕܼܳܐ ܫܒܼܰܩܘ ܡܨܺܝܕܼܳܬܼܗܽܘܢ̈܂ ܘܶܐܙܰܠܘ ܒܳܬܼܪܶܗ܂
01:19 [ai]ܘܟܼܰܕܼ ܥܒܼܰܪ ܩܰܠܺܝܠ܃ ܚܙܳܐ ܠܝܰܥܩܽܘܒܼ ܒܰܪ ܙܰܒܼܕܼܰܝ܂ ܘܰܠܝܽܘܚܰܢܳܢ ܐܰܚܽܘܗ̱ܝ܂ ܘܳܐܦܼ ܠܗܽܘܢ ܒܰܣܦܼܺܝܢ̱ܬܳܐ܂ ܕܰܡܬܼܰܩܢܺܝܢ ܡܨܺܝܕܼܳܬܼܗܽܘܢ̈܂
01:20 [ai]ܘܰܩܪܳܐ ܐܶܢܽܘܢ܂ ܘܡܶܚܕܼܳܐ ܫܒܼܰܩܘ ܠܙܰܒܼܕܼܰܝ ܐܰܒܼܽܘܗܽܘܢ܂ ܒܰܣܦܼܺܝܢ̱ܬܳܐ ܥܰܡ ܐܰܓܼܺܝܪ̈ܶܐ܂ ܘܶܐܙܰܠܘ ܒܳܬܼܪܶܗ܀
01:21 [ai]ܘܟܼܰܕܼ ܥܰܠܘ ܠܰܟܼܦܼܰܪܢܰܚܽܘܡ܃ ܡܶܚܕܼܳܐ ܡܰܠܶܦܼ ܗ̱ܘܳܐ ܒܫܰܒܿܶܐ̈ ܒܰܟܼܢܽܘܫܳܬܼܗܽܘܢ̈܂
01:22 [ai]ܘܬܼܰܡܺܝܗܺܝܢ ܗܘܰܘ ܒܝܽܘܠܦܿܳܢܶܗ܂ ܡܰܠܶܦܼ ܗ̱ܘܳܐ ܠܗܽܘܢ ܓܶܝܪ ܐܰܝܟܼ ܡܫܰܠܛܳܐ܃ ܘܠܳܐ ܐܰܝܟܼ ܣܳܦܼܪ̈ܰܝܗܽܘܢ܀
01:23 [ai]ܘܺܐܝܬܼ ܗ̱ܘܳܐ ܒܰܟܼܢܽܘܫܬܿܗܽܘܢ܃ ܓܰܒܼܪܳܐ ܕܺܐܝܬܼ ܒܶܗ܂ ܪܽܘܚܳܐ ܛܰܡܰܐܬܼܳܐ܂ ܘܰܩܥܳܐ܂
01:24 [ai]ܘܶܐܡܰܪ܂ ܡܳܐ ܠܰܢ ܘܠܳܟܼ܂ ܝܶܫܽܘܥ܃ ܢܳܨܪܳܝܳܐ܂ ܐܶܬܼܰܝܬܿ ܠܡܰܘܒܿܳܕܼܽܘܬܼܰܢ܂ ܝܳܕܼܰܥ ܐ̱ܢܳܐ ܠܳܟܼ ܡܰܢ ܐܰܢ̱ܬܿ ܩܰܕܿܺܝܫܶܗ܃ ܕܰܐܠܳܗܳܐ܂
01:25 [ai]ܘܰܟܼܐܳܐ ܒܶܗ ܝܶܫܽܘܥ܂ ܘܶܐܡܰܪ܂ ܣܟܼܽܘܪ ܦܽܘܡܳܟܼ܂ ܘܦܼܽܘܩ ܡܶܢܶܗ܂
01:26 [ai]ܘܰܫܕܼܳܬܼܶܗ ܪܽܘܚܳܐ ܛܰܢܦܼܬܼܳܐ܂ ܘܰܩܥܳܬܼ ܒܩܳܠܳܐ ܪܳܡܳܐ܂ ܘܢܶܦܼܩܰܬܼ ܡܶܢܶܗ܂
01:27 [ai]ܘܶܐܬܿܕܰܡܰܪܘ ܟܽܠܗܽܘܢ܂ ܘܒܼܳܥܶܝܢ ܗ̱ܘܰܘ ܚܰܕܼ ܥܰܡ ܚܰܕܼ ܘܳܐܡܪܺܝܢ܂ ܕܡܳܢܳܐ ܗ̱ܝ ܗܳܕܼܶܐ܂ ܘܡܰܢܽܘ ܝܽܘܠܦܿܳܢܳܐ ܗܳܢܳܐ ܚܰܕܼ̱ܬܼܳܐ܃ ܕܰܒܼܫܽܘܠܛܳܢܳܐ ܘܳܐܦܼ ܠܪ̈ܽܘܚܶܐ ܛܰܢܦܼܳܬܼܳܐ̈ ܦܳܩܶܕܼ܂ ܘܡܶܫܬܿܰܡܥܳܢ̈ ܠܶܗ܂
01:28 [ai]ܘܡܶܚܕܼܳܐ ܢܦܼܰܩ ܛܶܒܶܗ܂ ܒܟܽܠܶܗ ܐܰܬܼܪܳܐ ܕܰܓܼܠܺܝܠܳܐ܀
01:29 [ai]ܘܰܢܦܼܰܩܘ ܡܶܢ ܟܢܽܘܫܬܳܐ܃ ܘܶܐܬܼܰܘ ܠܒܼܰܝܬܿܶܗ ܕܫܶܡܥܽܘܢ ܘܕܼܰܐܢܕܿܪܶܐܘܳܣ܃ ܥܰܡ ܝܰܥܩܽܘܒܼ ܘܝܽܘܚܰܢܳܢ܂
01:30 [ai]ܘܰܚܡܳܬܼܶܗ ܕܫܶܡܥܽܘܢ ܪܰܡܝܳܐ ܗ̱ܘܳܬܼ ܒܶܐܫܳܬܼܳܐ܂ ܘܶܐܡܰܪܘ ܠܶܗ ܥܠܶܝܗ܂
01:31 [ai]ܘܰܩܪܶܒܼ ܐܰܚܕܿܳܗ ܒܺܐܝܕܼܳܗ܂ ܘܰܐܩܺܝܡܳܗ܂ ܘܡܶܚܕܼܳܐ ܫܒܼܰܩܬܼܳܗ ܐܶܫܳܬܼܳܗ܂ ܘܰܡܫܰܡܫܳܐ ܗ̱ܘܳܬܼ ܠܗܽܘܢ܀܀
01:32 [ai]ܒܪܰܡܫܳܐ ܕܶܝܢ܂ ܒܡܰܥܪ̈ܳܒܼܰܝ ܫܶܡܫܳܐ܃ ܐܰܝܬܿܺܝܘ ܠܘܳܬܼܶܗ ܟܽܠܗܽܘܢ ܐܰܝܠܶܝܢ ܕܒܺܝܫܳܐܺܝܬܼ ܥܒܼܺܝܕܼܺܝܢ܂ ܘܕܼܰܝܘܳܢܶܐ̈܂
01:33 [ai]ܘܰܡܕܼܺܝܢ̱ܬܳܐ ܟܽܠܳܗ܂ ܟܢܺܝܫܳܐ ܗ̱ܘܳܬܼ ܥܰܠ ܬܰܪܥܳܐ܂
01:34 [ai]ܘܰܐܣܺܝ ܠܣܰܓܿܺܝܶܐܐ̈ ܕܒܺܝܫܳܐܺܝܬܼ ܥܒܼܺܝܕܼܺܝܢ ܗ̱ܘܰܘ ܒܟܽܘܪ̈ܗܳܢܶܐ ܡܫܰܚܠܦܼܶܐ̈܂ ܘܕܼܰܝܘܶܐ̈ ܣܰܓܿܺܝܶܐܐ̈ ܐܰܦܿܶܩ܂ ܘܠܳܐ ܫܳܒܼܶܩ ܗ̱ܘܳܐ ܠܗܽܘܢ ܠܕܼܰܝܘܶܐ̈ ܕܰܢܡܰܠܠܽܘܢ܂ ܡܶܛܽܠ ܕܝܳܕܼܥܺܝܢ ܗ̱ܘܰܘ ܠܶܗ܀
01:35 [ai]ܘܰܒܨܰܦܼܪܳܐ ܩܰܕܶܡ ܩܳܡ ܛܳܒܼ܂ ܘܶܐܙܰܠ ܠܰܐܬܼܪܳܐ ܚܽܘܪܒܿܳܐ܂ ܘܬܼܰܡܳܢ ܡܨܰܠܶܐ ܗ̱ܘܳܐ܂
01:36 [ai]ܘܒܼܳܥܶܝܢ ܗ̱ܘܰܘ ܠܶܗ ܫܶܡܥܽܘܢ ܘܰܕܼܥܰܡܶܗ܂
01:37 [ai]ܘܟܼܰܕܼ ܐܶܫܟܿܚܽܘܗ̱ܝ܂ ܐܳܡܪܺܝܢ ܠܶܗ܂ ܟܽܠܗܽܘܢ ܐ̱ܢܳܫܳܐ̈ ܒܿܳܥܶܝܢ ܠܳܟܼ܂
01:38 [ai]ܐܳܡܰܪ ܠܗܽܘܢ܂ ܗܰܠܶܟܼܘ ܠܩܽܘܪ̈ܝܳܐ܂ ܘܠܰܡܕܼܺܝܢܳܬܼܳܐ̈ ܕܿܩܰܪ̈ܺܝܒܼܳܢ܃ ܕܳܐܦܼ ܬܰܡܳܢ ܐܰܟܼܪܶܙ܂ ܠܗܳܕܼܶܐ ܓܶܝܪ ܐܶܬܼܺܝܬܼ܂
01:39 [ai]ܘܡܰܟܼܪܶܙ ܗ̱ܘܳܐ ܒܟܽܠܗܶܝܢ ܟܢܽܘܫܳܬܼܗܽܘܢ̈ ܒܟܽܠܳܗ ܓܠܺܝܠܳܐ܂ ܘܡܰܦܿܶܩ ܫܺܝܕܳܐ
01:40 [ai]ܘܶܐܬܼܳܐ ܠܘܳܬܼܶܗ ܓܰܪܒܿܳܐ܃ ܘܰܢܦܼܰܠ ܥܰܠ ܪ̈ܶܓܼܠܰܘܗ̱ܝ܂ ܘܒܼܳܥܶܐ ܗ̱ܘܳܐ ܡܶܢܶܗ܂ ܘܶܐܡܰܪ ܠܶܗ܂ ܐܶܢ ܨܳܒܼܶܐ ܐܰܢ̱ܬܿ܂ ܡܶܫܟܿܰܚ ܐܰܢ̱ܬܿ ܠܰܡܕܼܰܟܿܳܝܽܘܬܼܝ܂
01:41 [ai]ܗܽܘ ܕܶܝܢ ܝܶܫܽܘܥ܂ ܐܶܬܼܪܰܚܰܡ ܥܠܰܘܗ̱ܝ܂ ܘܰܦܼܫܰܛ ܐܺܝܕܼܶܗ ܩܪܶܒܼ ܠܶܗ܂ ܘܶܐܡܰܪ܂ ܨܳܒܼܶܐ ܐ̱ܢܳܐ܂ ܐܶܬܿܕܿܰܟܿܳܐ܂
01:42 [ai]ܘܒܼܳܗ ܒܫܳܥܬܼܳܐ܂ ܐܶܙܰܠ ܓܰܪܒܼܶܗ ܡܶܢܶܗ܂ ܘܶܐܬܿܕܰܟܿܺܝ܂
01:43 [ai]ܘܰܟܼܐܳܐ ܒܶܗ ܘܰܐܦܿܩܶܗ܂
01:44 [ai]ܘܶܐܡܰܪ ܠܶܗ܂ ܚܙܺܝ ܠܡܳܐ ܠܐ̱ܢܳܫ ܐܳܡܰܪ ܐܰܢ̱ܬܿ܂ ܐܶܠܳܐ ܙܶܠ܂ ܚܰܘܳܐ ܢܰܦܼܫܳܟܼ ܠܟܼܳܗܢܶܐ̈܃ ܘܩܰܪܶܒܼ ܩܽܘܪܒܿܳܢܳܐ ܚܠܳܦܼ ܬܰܕܼܟܿܺܝܬܼܳܟܼ܃ ܐܰܝܟܿܰܢܳܐ ܕܦܰܩܶܕܼ ܡܽܘܫܶܐ܂ ܠܣܳܗܕܿܽܘܬܼܗܽܘܢ܀
01:45 [ai]ܗܽܘ ܕܶܝܢ ܟܰܕܼ ܢܦܼܰܩ܃ ܫܰܪܺܝ ܗ̱ܘܳܐ ܡܰܟܼܪܶܙ ܣܰܓܿܺܝ܂ ܘܰܐܛܒܿܳܗ ܠܡܶܠܬܼܳܐ܃ ܐܰܝܟܿܰܢܳܐ ܕܠܳܐ ܢܶܫܟܿܰܚ ܗ̱ܘܳܐ ܝܶܫܽܘܥ ܓܰܠܝܳܐܺܝܬܼ ܕܢܶܥܽܘܠ ܠܰܡܕܼܺܝܢ̱ܬܳܐ܂ ܐܶܠܳܐ ܠܒܼܰܪ ܗܘܳܐ܂ ܒܰܐܬܼܪܳܐ ܚܽܘܪܒܿܳܐ܂ ܘܳܐܬܼܶܝܢ ܗ̱ܘܰܘ ܠܘܳܬܼܶܗ܂ ܡܶܢ ܟܽܠ ܕܽܘܟܿܳܐ܀

next chapter