← Back
The Comprehensive Aramaic Lexicon
← Return to the Text Browser
click on the file description for more information
62041: P Mk

Click on a word for lexical analysis.
Click on a red-colored coordinate for comments and/or translations of the line
View in Estrangelo
Ask AI about a passage
Hide manuscript variants

previous chapter


06:01 [ai]ܘܰܢܦܼܰܩ ܡܶܢ ܬܰܡܳܢ܂ ܘܶܐܬܼܳܐ ܠܰܡܕܼܺܝܢ̱ܬܿܶܗ܂ ܘܕܼܰܒܺܝܩܺܝܢ ܗ̱ܘܰܘ ܠܶܗ ܬܰܠܡܺܝܕܼܰܘܗ̱ܝ̈܂
06:02 [ai]ܘܟܼܰܕܼ ܗܘܳܬܼ ܫܰܒܿܬܼܳܐ܃ ܫܰܪܺܝ ܠܡܰܠܳܦܼܽܘ ܒܰܟܼܢܽܘܫܬܳܐ܂ ܘܣܰܓܿܺܝܶܐܐ̈ ܕܰܫܡܰܥܘ܂ ܐܶܬܿܕܰܡܰܪܘ܂ ܘܳܐܡܪܺܝܢ ܗ̱ܘܰܘ܃ ܐܰܝܡܶܟܿܳܐ ܠܶܗ ܗܳܠܶܝܢ ܠܗܳܢܳܐ܂ ܘܰܐܝܕܼܳܐ ܗ̱ܝ ܚܶܟܼܡܬܼܳܐ ܕܶܐܬܼܝܰܗܒܿܰܬܼ ܠܶܗ܂ ܕܚܰܝܠܶܐ̈ ܕܰܐܝܟܼ ܗܳܠܶܝܢ ܒܺܐܝܕܼܰܘܗ̱ܝ̈ ܢܶܗܘܽܘܢ܂
06:03 [ai]ܠܳܐ ܗ̱ܘܳܐ ܗܳܢܳܐ ܢܰܓܿܳܪܳܐ ܒܪܳܗ ܕܡܰܪܝܰܡ܂ ܘܰܐܚܽܘܗ̱ܝ ܕܝܰܥܩܽܘܒܼ ܘܰܕܼܝܳܘܣܺܐ ܘܰܕܼܫܶܡܥܽܘܢ܃ ܘܠܳܐ ܗܳܐ ܐܰܚܘܳܬܼܶܗ̈ ܬܢܳܢ ܠܘܳܬܼܰܢ܃ ܘܡܶܬܼܟܿܰܫܠܺܝܢ ܗ̱ܘܰܘ ܒܶܗ܀
06:04 [ai]ܘܶܐܡܰܪ ܠܗܽܘܢ ܝܶܫܽܘܥ܂ ܠܰܝܬܿ ܢܒܼܺܝܳܐ ܕܰܨܥܺܝܪ܂ ܐܶܠܳܐ ܐܶܢ ܒܰܡܕܼܺܝܢ̱ܬܿܶܗ܃ ܘܒܼܶܝܬܼ ܐ̱ܚܝܳܢܰܘܗ̱ܝ̈܂ ܘܰܒܒܼܰܝܬܿܶܗ܂
06:05 [ai]ܘܠܳܐ ܡܶܫܟܿܰܚ ܗ̱ܘܳܐ܂ ܕܢܶܥܒܿܶܕܼ ܬܰܡܳܢ܂ ܐܳܦܼ ܠܳܐ ܚܰܕܼ ܚܰܝܠܳܐ܂ ܐܶܠܳܐ ܐܶܢ ܕܥܰܠ ܟܿܪ̈ܺܝܗܶܐ ܩܰܠܺܝܠ܂ ܣܳܡ ܐܺܝܕܼܶܗ܂ ܘܰܐܣܺܝ܂
06:06 [ai]ܘܡܶܬܿܕܰܡܰܪ ܗ̱ܘܳܐ ܒܚܰܣܺܝܪܽܘܬܼ ܗܰܝܡܳܢܽܘܬܼܗܽܘܢ܀ ܘܡܶܬܼܟܿܪܶܟܼ ܗ̱ܘܳܐ ܒܩܽܘܪ̈ܝܳܐ܂ ܟܰܕܼ ܡܰܠܶܦܼ܀܀
06:07 [ai]ܘܰܩܪܳܐ ܠܰܬܼܪܶܥܣܰܪܬܿܶܗ܃ ܘܫܰܪܺܝ ܕܰܢܫܰܕܿܰܪ ܐܶܢܽܘܢ܂ ܬܿܪ̈ܶܝܢ ܬܿܪ̈ܶܝܢ܂ ܘܝܰܗ̱ܒܼ ܠܗܽܘܢ ܫܽܘܠܛܳܢܳܐ ܥܰܠ ܪ̈ܽܘܚܶܐ ܛܰܢܦܼܳܬܼܳܐ̈ ܕܢܰܦܿܩܽܘܢ܂
06:08 [ai]ܘܦܼܰܩܶܕܼ ܐܶܢܽܘܢ܂ ܕܠܳܐ ܢܶܫܩܠܽܘܢ ܡܶܕܶܡ ܠܽܐܘܪܚܳܐ܃ ܐܶܠܳܐ ܐܶܢ ܫܰܒܼܛܳܐ ܒܰܠܚܽܘܕܼ܂ ܠܳܐ ܬܰܪܡܳܠܳܐ܂ ܘܠܳܐ ܠܰܚܡܳܐ܂ ܘܠܳܐ ܢܚܳܫܳܐ ܒܟܺܝܣܰܝܗܽܘܢ̈܂
06:09 [ai]ܐܶܠܳܐ ܢܶܣܶܐܢܽܘܢ ܛܶܠܳܪ̈ܶܐ܂ ܘܠܳܐ ܢܶܠܒܿܫܽܘܢ ܬܿܰܪ̈ܬܿܶܝܢ ܟܽܘܬܿܺܝܢܝܳܢ̈܀
06:10 [ai]ܘܶܐܡܰܪ ܠܗܽܘܢ܂ ܕܠܰܐܝܢܳܐ ܒܰܝܬܳܐ ܕܥܳܐܠܺܝܢ ܐܢ̱ܬܿܽܘܢ܃ ܬܰܡܳܢ ܗܘܰܘ܂ ܥܕܼܰܡܳܐ ܕܢܳܦܼܩܺܝܢ ܐܢ̱ܬܿܽܘܢ ܡܶܢ ܬܰܡܳܢ܂
06:11 [ai]ܘܟܼܽܠ ܡܰܢ ܕܠܳܐ ܢܩܰܒܿܠܽܘܢܳܟܼܽܘܢ܂ ܘܠܳܐ ܢܶܫܡܥܽܘܢܳܟܼܽܘܢ܃ ܡܳܐ ܕܢܳܦܼܩܺܝܢ ܐܢ̱ܬܿܽܘܢ ܡܶܢ ܬܰܡܳܢ܃ ܦܶܨܘ ܚܶܠܳܐ ܕܰܒܼܬܼܰܚܬܿܳܝܳܐ ܕܿܪ̈ܶܓܼܠܰܝܟܿܽܘܢ ܠܣܳܗܕܿܽܘܬܼܗܽܘܢ܂ ܘܰܐܡܺܝܢ ܐܳܡܰܪ ܐ̱ܢܳܐ ܠܟܼܽܘܢ܃ ܕܢܶܗܘܶܐ ܢܺܝܚ܂ ܠܰܣܕܼܽܘܡ ܘܰܠܥܳܡܽܘܪܳܐ ܒܝܰܘܡܳܐ ܕܕܼܺܝܢܳܐ܂ ܐܰܘ ܠܰܡܕܼܺܝܢ̱ܬܳܐ ܗܳܝ܀
06:12 [ai]ܘܰܢܦܼܰܩܘ ܗ̱ܘܰܘ܂ ܘܰܐܟܼܪܶܙܘ ܕܰܢܬܼܽܘܒܼܽܘܢ܂
06:13 [ai]ܘܫܺܐܕܼܶܐ̈ ܣܰܓܿܺܝܶܐܐ̈ ܡܰܦܿܩܺܝܢ ܗ̱ܘܰܘ܂ ܘܡܳܫܚܺܝܢ ܗ̱ܘܰܘ ܒܡܶܫܚܳܐ ܟܿܪ̈ܺܝܗܶܐ ܣܰܓܿܺܝܶܐܐ̈܂ ܘܡܰܐܣܶܝܢ ܗ̱ܘܰܘ܀
06:14 [ai]ܘܰܫܡܰܥ ܗܶܪܳܘܕܼܶܣ ܡܰܠܟܿܳܐ ܥܰܠ ܝܶܫܽܘܥ܂ ܐܶܬܼܺܝܕܼܰܥ ܗ̱ܘܳܐ ܠܶܗ ܓܶܝܪ ܫܡܶܗ܂ ܘܶܐܡܰܪ ܗ̱ܘܳܐ܂ ܝܽܘܚܰܢܳܢ ܡܰܥܡܕܼܳܢܳܐ ܩܳܡ ܡܶܢ ܒܶܝܬܼ ܡܺܝܬܼܶܐ̈܃ ܡܶܛܽܠ ܗܳܢܳܐ ܚܰܝܠܶܐ̈ ܡܶܣܬܿܰܥܪܺܝܢ ܒܶܗ܀
06:15 [ai]ܐ̱ܚܪ̈ܳܢܶܐ ܐܳܡܪܺܝܢ ܗ̱ܘܰܘ܂ ܕܺܐܠܺܝܳܐ ܗܽܘ܂ ܘܰܐ̱ܚܪ̈ܳܢܶܐ܂ ܕܰܢܒܼܺܝܳܐ ܗܽܘ܂ ܐܰܝܟܼ ܚܰܕܼ ܡܶܢ ܢܒܼܺܝܶܐ̈܂
06:16 [ai]ܟܰܕܼ ܫܡܰܥ ܕܶܝܢ ܗܶܪܳܘܕܼܶܣ܂ ܐܶܡܰܪ܂ ܝܽܘܚܰܢܳܢ ܗܰܘ ܕܶܐܢܳܐ ܦܶܣܩܶܬܼ ܪܺܫܶܗ܃ ܗܽܘ ܩܳܡ ܡܶܢ ܒܶܝܬܼ ܡܺܝܬܼܶܐ̈܀
06:17 [ai]ܗܽܘ ܓܶܝܪ ܗܶܪܳܘܕܼܶܣ ܫܰܕܿܰܪ ܗ̱ܘܳܐ ܐܰܚܕܿܶܗ ܠܝܽܘܚܰܢܳܢ܂ ܘܰܐܣܪܶܗ ܒܶܝܬܼ ܐܰܣܺܝܪ̈ܶܐ܃ ܡܶܛܽܠ ܗܶܪܳܘܕܼܺܝܰܐ ܐܰܢ̱ܬܿܰܬܼ ܦܼܺܝܠܺܝܦܿܳܘܣ ܐܰܚܽܘܗ̱ܝ܂ ܗܳܝ ܕܰܢܣܰܒܼ܂
06:18 [ai]ܐܶܡܰܪ ܗ̱ܘܳܐ ܓܶܝܪ ܝܽܘܚܰܢܳܢ ܠܗܶܪܳܘܕܼܶܣ܃ ܕܠܳܐ ܫܰܠܺܝܛ ܠܳܟܼ ܕܬܶܣܰܒܼ ܐܰܢ̱ܬܿܰܬܼ ܐܰܚܽܘܟܼ܂
06:19 [ai]ܗܺܝ ܕܶܝܢ ܗܶܪܳܘܕܼܺܝܰܐ ܠܚܺܝܡܳܐ ܗ̱ܘܳܬܼ ܠܶܗ܂ ܘܨܳܒܼܶܝܢ ܗ̱ܘܳܬܼ ܠܡܶܩܛܠܶܗ܂ ܘܠܳܐ ܡܶܫܟܿܚܳܐ ܗ̱ܘܳܬܼ܂
06:20 [ai]ܗܶܪܳܘܕܼܶܣ ܓܶܝܪ ܕܳܚܶܠ ܗ̱ܘܳܐ ܡܶܢ ܝܽܘܚܰܢܳܢ܃ ܥܰܠ ܕܝܳܕܼܰܥ ܗ̱ܘܳܐ ܕܓܰܒܼܪܳܐ ܗ̱ܘ ܙܰܕܿܺܝܩܳܐ܂ ܘܩܰܕܿܺܝܫܳܐ܂ ܘܰܡܢܰܛܰܪ ܗ̱ܘܳܐ ܠܶܗ܂ ܘܣܰܓܿܺܝܳܐܬܼܳܐ̈ ܫܳܡܰܥ ܗ̱ܘܳܐ ܠܶܗ܂ ܘܥܳܒܼܶܕܼ܂ ܘܒܼܰܣܺܝܡܳܐܺܝܬܼ ܫܳܡܰܥ ܗ̱ܘܳܐ ܠܶܗ ܿ܀ܿ܀ܿ
06:21 [ai]ܘܰܗܘܳܐ ܝܰܘܡܳܐ ܺܝܕܼܺܝܥܳܐ܃ ܟܰܕܼ ܗܶܪܳܘܕܼܶܣ ܒܒܼܶܝܬܼ ܝܰܠܕܿܶܗ܂ ܚܫܳܡܺܝܬܼܳܐ ܥܒܼܰܕܼ ܗ̱ܘܳܐ ܠܪ̈ܰܘܪܒܼܳܢܰܘܗ̱ܝ܂ ܘܰܠܟܿܺܝܠܺܝܰܪ̈ܟܼܶܐ܂ ܘܰܠܪ̈ܺܫܶܐ ܕܰܓܼܠܺܝܠܳܐ܃
06:22 [ai]ܘܥܶܠܰܬܼ ܒܰܪܬܼܳܗ ܕܗܶܪܳܘܕܼܺܝܰܐ܂ ܪܰܩܕܼܰܬܼ܃ ܘܫܶܦܼܪܰܬܼ ܠܶܗ ܠܗܶܪܳܘܕܼܶܣ܂ ܘܠܰܐܝܠܶܝܢ ܕܰܣܡܺܝܟܼܺܝܢ ܥܰܡܶܗ܂ ܘܶܐܡܰܪ ܡܰܠܟܿܳܐ ܠܰܛܠܺܝܬܼܳܐ܂ ܫܰܐܠܝ ܡܶܢܝ ܡܶܕܶܡ ܕܨܳܒܼܝܳܐ ܐܰܢ̱ܬܿܝ܃ ܘܶܐܬܿܶܠ ܠܶܟܼܝ܂
06:23 [ai]ܘܺܝܡܳܐ ܠܳܗ ܕܿܡܶܕܶܡ ܕܬܶܫܶܐܠܺܝܢ܂ ܐܶܬܿܶܠ ܠܶܟܼܝ܃ ܥܕܼܰܡܳܐ ܠܦܼܶܠܓܿܳܗ ܕܡܰܠܟܿܽܘܬܼܝ܂
06:24 [ai]ܗܺܝ ܕܶܝܢ ܢܶܦܼܩܰܬܼ܂ ܘܳܐܡܪܳܐ ܠܶܐܡܳܗ܂ ܡܳܢܳܐ ܐܶܫܶܐܠܺܝܘܗ̱ܝ܂ ܐܳܡܪܳܐ ܠܳܗ܂ ܪܺܫܶܗ ܕܝܽܘܚܰܢܳܢ ܡܰܥܡܕܼܳܢܳܐ܂
06:25 [ai]ܘܡܶܚܕܼܳܐ ܥܶܠܰܬܼ ܒܰܒܼܛܺܝܠܽܘܬܼܳܐ܂ ܠܘܳܬܼ ܡܰܠܟܿܳܐ܂ ܘܳܐܡܪܳܐ ܠܶܗ܂ ܨܳܒܼܝܳܐ ܐ̱ܢܳܐ ܒܗܳܕܼܶܐ ܫܳܥܬܼܳܐ܃ ܕܬܶܬܿܶܠ ܠܺܝ ܥܰܠ ܦܺܝܢܟܿܳܐ܂ ܪܺܫܶܗ ܕܝܽܘܚܰܢܳܢ ܡܰܥܡܕܼܳܢܳܐ܂
06:26 [ai]ܘܟܼܶܪܝܰܬܼ ܠܶܗ ܣܰܓܿܺܝ ܠܡܰܠܟܿܳܐ܂ ܡܶܛܽܠ ܕܶܝܢ ܡܰܘܡܳܬܼܳܐ̈܂ ܘܡܶܛܽܠ ܣܡܺܝܟܼܶܐ̈܂ ܠܳܐ ܨܒܼܳܐ ܕܢܶܓܼܠܙܺܝܗ܂
06:27 [ai]ܐܶܠܳܐ ܡܶܚܕܼܳܐ ܫܰܕܿܰܪ ܡܰܠܟܿܳܐ ܐܶܣܦܽܘܩܠܰܛܪܳܐ܃ ܘܰܦܼܩܰܕܼ ܕܢܰܝܬܿܶܐ ܪܺܫܶܗ ܕܝܽܘܚܰܢܳܢ܂ ܘܶܐܙܰܠ ܦܰܣܩܶܗ ܪܺܫܶܗ ܕܝܽܘܚܰܢܳܢ ܒܶܝܬܼ ܐܰܣܺܝܪ̈ܶܐ܃
06:28 [ai]ܘܰܐܝܬܿܺܝ ܒܦܺܝܢܟܿܳܐ܂ ܘܝܰܗ̱ܒܼ ܠܰܛܠܺܝܬܼܳܐ܂ ܘܗܺܝ ܛܠܺܝܬܼܳܐ ܝܶܗܒܿܰܬܼ ܠܶܐܡܳܗ܂
06:29 [ai]ܘܰܫܡܰܥܘ ܬܰܠܡܺܝܕܼܰܘܗ̱ܝ̈܃ ܘܶܐܬܼܰܘ ܫܩܰܠܘ ܫܠܰܕܿܶܗ܂ ܘܣܳܡܘ ܒܒܼܶܝܬܼ ܩܒܼܽܘܪܳܐ܀
06:30 [ai]ܘܶܐܬܼܟܿܰܢܰܫܘ ܫܠܺܝܚܶܐ̈ ܠܘܳܬܼ ܝܶܫܽܘܥ܂ ܘܶܐܡܰܪܘ ܠܶܗ ܟܽܠ ܡܳܐ ܕܰܥܒܼܰܕܼܘ܂ ܘܟܼܽܠ ܡܳܐ ܕܰܐܠܶܦܼܘ܂
06:31 [ai]ܘܶܐܡܰܪ ܠܗܽܘܢ܂ ܬܰܘ ܠܟܼܽܘܢ܂ ܢܺܐܙܰܠ܂ ܠܕܼܰܒܼܪܳܐ ܒܰܠܚܽܘܕܼܰܝܢ܂ ܘܶܐܬܿܬܿܢܺܝܚܘ ܩܰܠܺܝܠ܂ ܐܺܝܬܼ ܗ̱ܘܰܘ ܓܶܝܪ ܣܰܓܿܺܝܶܐܐ̈܂ ܕܳܐܙܺܠ̱ܝܢ ܘܳܐܬܼܶܝܢ܃ ܘܠܰܝܬܿ ܗ̱ܘܳܐ ܠܗܽܘܢ ܐܰܬܼܪܳܐ܂ ܐܳܦܼ ܠܳܐ ܠܡܶܐܟܼܰܠ܀
06:32 [ai]ܘܶܐܙܰܠܘ ܠܰܐܬܼܪܳܐ ܚܽܘܪܒܿܳܐ ܒܰܣܦܼܺܝܢ̱ܬܳܐ ܒܰܠܚܽܘܕܼܰܝܗܽܘܢ܂
06:33 [ai]ܘܰܚܙܰܘ ܐܶܢܽܘܢ ܣܰܓܿܺܝܶܐܐ̈܂ ܟܰܕܼ ܐܳܙܺܠ̱ܝܢ܃ ܘܶܐܫܬܰܘܕܰܥܘ ܐܶܢܽܘܢ܂ ܘܰܒܝܰܒܼܫܳܐ ܪܗܶܛܘ ܡܶܢ ܟܽܠܗܶܝܢ ܡܕܼܺܝܢܳܬܼܳܐ̈܃ ܩܕܼܳܡܰܘܗ̱ܝ ܠܬܼܰܡܳܢ܀
06:34 [ai]ܘܰܢܦܼܰܩ ܝܶܫܽܘܥ ܚܙܳܐ ܟܶܢܫܶܐ̈ ܣܰܓܿܺܝܶܐܐ̈܃ ܘܶܐܬܼܪܰܚܰܡ ܥܠܰܝܗܽܘܢ܂ ܕܕܼܳܡܶܝܢ ܗܘܰܘ ܠܥܶܪ̈ܒܿܶܐ܂ ܕܠܰܝܬܿ ܠܗܽܘܢ ܪܳܥܝܳܐ܂ ܘܫܰܪܺܝ ܗ̱ܘܳܐ ܠܡܰܠܳܦܼܽܘ ܐܶܢܽܘܢ ܣܰܓܿܺܝܳܐܬܼܳܐ̈܀
06:35 [ai]ܘܟܼܰܕܼ ܗܘܳܐ ܥܶܕܳܢܳܐ ܣܰܓܿܺܝܳܐܐ܃ ܩܪܶܒܼܘ ܠܘܳܬܼܶܗ ܬܰܠܡܺܝܕܼܰܘܗ̱ܝ̈ ܘܳܐܡܪܺܝܢ ܠܶܗ܂ ܕܗܳܢܳܐ ܐܰܬܼܪܳܐ܂ ܚܽܘܪܒܿܳܐ ܗ̱ܘ܃ ܘܥܶܕܳܢܳܐ ܣܰܓܿܺܝ܂
06:36 [ai]ܫܪܺܝ ܐܶܢܽܘܢ܂ ܕܢܺܐܙܽܠ̱ܘܢ ܠܳܐܓܼܽܘܪ̈ܣܶܐ ܕܿܰܚܕܼܳܪ̈ܰܝܢ܂ ܘܰܠܩܽܘܪ̈ܝܳܐ܃ ܘܢܶܙܒܿܢܽܘܢ ܠܗܽܘܢ ܠܰܚܡܳܐ܂ ܠܰܝܬܿ ܠܗܽܘܢ ܓܶܝܪ ܡܶܕܶܡ ܠܡܶܐܟܼܰܠ܂
06:37 [ai]ܗܽܘ ܕܶܝܢ ܐܶܡܰܪ ܠܗܽܘܢ܂ ܗܰܒܼܘ ܠܗܽܘܢ ܐܰܢ̱ܬܿܽܘܢ ܠܡܶܠܥܰܣ܂ ܐܳܡܪܺܝܢ ܠܶܗ܂ ܢܺܐܙܰܠ ܢܶܙܒܿܶܢ܃ ܕܡܰܐܬܼܶܝܢ ܕܺܝܢܳܪ̈ܺܝܢ ܠܰܚܡܳܐ܂ ܘܢܶܬܿܶܠ ܠܗܽܘܢ ܠܳܥܣܺܝܢ܂
06:38 [ai]ܗܽܘ ܕܶܝܢ ܐܶܡܰܪ ܠܗܽܘܢ܂ ܙܶܠܘ ܚܙܰܘ ܟܡܳܐ ܠܰܚܡܺܝܢ̈ ܐܺܝܬܼ ܠܟܼܽܘܢ ܗܳܪܟܿܳܐ܂ ܘܟܼܰܕܼ ܚܙܰܘ܂ ܐܳܡܪܺܝܢ ܠܶܗ܂ ܚܰܡܫܳܐ ܠܰܚܡܺܝܢ̈܃ ܘܰܬܼܪܶܝܢ ܢܽܘܢܺܝܢ̈܂
06:39 [ai]ܘܰܦܼܩܰܕܼ ܠܗܽܘܢ ܕܢܰܣܡܟܼܽܘܢ ܠܟܼܽܠܢܳܫ܂ ܣܡܳܟܼܺܝܢ̈ ܣܡܳܟܼܺܝܢ̈܂ ܥܰܠ ܥܶܣܒܿܳܐ܂
06:40 [ai]ܘܶܐܣܬܿܡܶܟܼܘ܂ ܣܡܳܟܼܺܝܢ̈ ܣܡܳܟܼܺܝܢ̈܂ ܕܰܡܳܐܐ ܡܳܐܐ܂ ܘܰܕܼܚܰܡܫܺܝܢ̈ ܚܰܡܫܺܝܢ̈܂
06:41 [ai]ܘܰܢܣܰܒܼ ܗܳܢܽܘܢ ܚܰܡܫܳܐ ܠܰܚܡܺܝܢ̈܂ ܘܰܬܼܪ̈ܶܝܢ ܢܽܘܢܺܝܢ̈܃ ܘܚܳܪ ܒܰܫܡܰܝܳܐ܂ ܘܒܼܰܪܶܟܼ ܘܰܩܨܳܐ ܠܰܚܡܳܐ܂ ܘܝܰܗ̱ܒܼ ܠܬܼܰܠܡܺܝܕܼܰܘܗ̱ܝ̈ ܕܰܢܣܺܝܡܽܘܢ ܠܗܽܘܢ܂ ܘܗܳܢܽܘܢ ܬܿܪ̈ܶܝܢ ܢܽܘܢܺܝܢ̈܂ ܦܰܠܶܓܼܘ ܠܟܼܽܠܗܽܘܢ܂
06:42 [ai]ܘܶܐܟܼܰܠܘ ܟܽܠܗܽܘܢ܂ ܘܰܣܒܼܰܥܘ܂
06:43 [ai]ܘܰܫܩܰܠܘ ܩܨܳܝܶܐ̈ ܬܪܶܥܣܰܪ ܩܽܘܦܼܺܝܢܺܝܢ̈ ܟܰܕܼ ܡܠܶܝܢ܂ ܘܡܶܢ ܢܽܘܢܶܐ̈܂
06:44 [ai]ܐܺܝܬܼܰܝܗܽܘܢ ܗ̱ܘܰܘ ܕܶܝܢ ܕܶܐܟܼܰܠܘ ܠܰܚܡܳܐ܃ ܚܰܡܫܳܐ ܐܰܠܦܼܺܝܢ̈ ܓܿܰܒܼܪ̈ܺܝܢ܀
06:45 [ai]ܘܡܶܚܕܼܳܐ ܐܶܠܰܨ ܠܬܼܰܠܡܺܝܕܼܰܘܗ̱ܝ̈ ܕܢܶܣܩܽܘܢ ܠܰܣܦܼܺܝܢ̱ܬܳܐ܃ ܘܢܺܐܙܽܠ̱ܘܢ ܩܕܼܳܡܰܘܗ̱ܝ ܠܥܶܒܼܪܳܐ܂ ܠܒܼܶܝܬܼ ܨܰܝܳܕܿܳܐ܃ ܥܰܕܼ ܫܳܪܶܐ ܗܽܘ ܠܟܼܶܢܫܶܐ̈܀
06:46 [ai]ܘܟܼܰܕܼ ܫܪܳܐ ܐܶܢܽܘܢ܃ ܐܶܙܰܠ ܠܛܽܘܪܳܐ ܠܰܡܨܰܠܳܝܽܘ܀
06:47 [ai]ܟܰܕܼ ܗܘܳܐ ܕܶܝܢ ܪܰܡܫܳܐ܃ ܣܦܼܺܝܢ̱ܬܳܐ ܐܺܝܬܼܶܝܗ ܗ̱ܘܳܬܼ ܡܶܨܥܰܬܼ ܝܰܡܳܐ܃ ܘܗܽܘ ܒܰܠܚܽܘܕܼܰܘܗ̱ܝ ܥܰܠ ܐܰܪܥܳܐ܂
06:48 [ai]ܘܰܚܙܳܐ ܐܶܢܽܘܢ ܕܡܶܫܬܿܰܢܩܺܝܢ ܟܰܕܼ ܪܳܕܼܶܝܢ܂ ܪܽܘܚܳܐ ܓܶܝܪ ܠܽܘܩܒܼܰܠܗܽܘܢ ܗ̱ܘܳܬܼ܂ ܘܰܒܡܰܛܰܪܬܼܳܐ ܪܒܼܺܝܥܳܝܬܳܐ ܕܠܺܠܝܳܐ܃ ܐܶܬܼܳܐ ܠܘܳܬܼܗܽܘܢ ܝܶܫܽܘܥ܂ ܟܰܕܼ ܡܗܰܠܶܟܼ ܥܰܠ ܡܰܝܳܐ̈܃ ܘܨܳܒܼܶܐ ܗ̱ܘܳܐ ܕܿܢܶܥܒܰܪ ܐܶܢܽܘܢ܂
06:49 [ai]ܗܳܢܽܘܢ ܕܶܝܢ ܚܙܰܐܘܽܗ̱ܝ ܕܰܡܗܰܠܶܟܼ ܥܰܠ ܡܰܝܳܐ̈܃ ܘܰܣܒܼܰܪܘ ܠܗܽܘܢ܂ ܕܚܶܙܘܳܐ ܗ̱ܘ ܕܰܓܿܳܠܳܐ܂ ܘܰܩܥܰܘ܂
06:50 [ai]ܟܽܠܗܽܘܢ ܓܶܝܪ ܚܙܰܐܘܽܗ̱ܝ ܘܰܕܼܚܶܠܘ܂ ܘܒܼܰܪ ܫܳܥܬܼܶܗ ܡܰܠܶܠ ܥܰܡܗܽܘܢ܂ ܘܶܐܡܰܪ ܠܗܽܘܢ܂ ܐܶܬܼܠܰܒ̱ܿܒܼܘ܂ ܐܶܢܳܐ ܐ̱ܢܳܐ܂ ܠܳܐ ܬܶܕܼܚܠܽܘܢ܀
06:51 [ai]ܘܰܣܠܶܩ ܠܘܳܬܼܗܽܘܢ ܠܰܣܦܼܺܝܢ̱ܬܳܐ܂ ܘܫܶܠܝܰܬܼ ܪܽܘܚܳܐ܂ ܘܛܳܒܼ ܡܶܬܿܕܰܡܪܺܝܢ ܗ̱ܘܰܘ܂ ܘܬܼܰܗܺܝܪܺܝܢ ܒܢܰܦܼܫܗܽܘܢ܂
06:52 [ai]ܠܳܐ ܓܶܝܪ ܐܶܣܬܿܰܟܿܰܠܘ ܗ̱ܘܰܘ ܡܶܢ ܠܰܚܡܳܐ ܗܰܘ܂ ܡܶܛܽܠ ܕܿܠܶܒܗܽܘܢ ܡܥܰܒܰܝ ܗ̱ܘܳܐ܀
06:53 [ai]ܘܟܼܰܕܼ ܥܒܼܰܪܘ ܥܶܒܼܪܳܐ܃ ܐܶܬܼܰܘ ܠܰܐܪܥܳܐ ܕܓܼܶܢܶܣܰܪ܂
06:54 [ai]ܘܟܼܰܕܼ ܢܦܼܰܩܘ ܡܶܢ ܣܦܼܺܝܢ̱ܬܳܐ܃ ܒܰܪ ܫܳܥܬܼܶܗ ܐܶܣܬܿܰܟܠܽܘܗ̱ܝ ܐ̱ܢܳܫܰܝ̈ ܐܰܬܼܪܳܐ܂
06:55 [ai]ܘܰܪܗܶܛܘ ܒܟܽܠܳܗ ܐܰܪܥܳܐ ܗܳܝ܃ ܘܫܰܪܺܝܘ ܠܡܰܝܬܿܳܝܽܘ ܠܰܐܝܠܶܝܢ ܕܒܺܝܫܳܐܺܝܬܼ ܥܒܼܺܝܕܼܺܝܢ܃ ܟܰܕܼ ܫܩܺܝܠܺܝܢ ܠܗܽܘܢ ܒܥܰܪ̈ܣܳܬܼܳܐ ܠܰܐܝܟܿܳܐ ܕܫܳܡܥܺܝܢ ܗ̱ܘܰܘ ܕܺܐܝܬܼܰܘܗ̱ܝ܂
06:56 [ai]ܘܰܐܝܟܿܳܐ ܕܥܳܐܶܠ ܗ̱ܘܳܐ ܠܩܽܘܪ̈ܝܳܐ ܘܠܰܡܕܼܺܝܢܳܬܼܳܐ̈܃ ܒܫܽܘܩܶܐ̈ ܣܳܝܡܺܝܢ ܗ̱ܘܰܘ ܟܿܪ̈ܺܝܗܶܐ܂ ܘܒܼܳܥܶܝܢ ܗ̱ܘܰܘ ܡܶܢܶܗ܂ ܕܳܐܦܼܶܢ ܠܟܼܶܢܦܼܳܐ ܕܰܠܒܼܽܘܫܶܗ ܢܶܩܪܒܼܽܘܢ܃ ܘܟܼܽܠܗܽܘܢ ܐܰܝܠܶܝܢ ܕܿܩܳܪܒܺܝܢ ܗ̱ܘܰܘ ܠܶܗ܂ ܡܶܬܼܰܐܣܶܝܢ ܗ̱ܘܰܘ܀

next chapter